Strategjia e KQZ-së, votimi jo në shkolla por në ambulanca. Ja arsyeja

Pas kërcënimeve të opozitës se nuk do të lejojë zhvillimin e zgjedhjeve në bashkitë që drejtohen prej saj, KQZ ka ndryshuar strategjinë. Në njësitë vendore që drejtohen nga PD dhe LSI, KQZ ka propozuar që qendrat e votimit të zhvendosen nga shkolla, që administrohen nga ana e bashkitë, drejt qendrave shëndetësore.

Arsyeja është se qendra Shëndetësore janë varësi të ministrisë së Shëndetësisë dhe kjo duket se do t’i japë zgjidhje përpjekjes së opozitës për të bllokuar procesin zgjedhor në bashkitë që drejtohen prej saj, për të mos i lënë gjë në dorë krerëve të bashkive, siç ndodhi në rastin e Shkodrës ku iu vu zjarri shkollës. Kjo vetëm për arsyen se Voltana dha urdhër boshatisja e shkollës nga materialet zgjedhore.

Gjatë mbledhjes KQZ vendosi që Qendrat e Votimit në disa prej bashkive që janë administrimin e opozitës si në Pogradec, Patos, Selenicë, Kamëz, t’i zhvendosë nga shkolla që ishin projektuar, duke i dërguar në Qendrat Shëndetësore.

Argumentimi i nxjerrë nga administrata është se këto objekte arsimore janë në rikonstruksion, ose janë të rrënuara. “Qendra e Votimit nr 4608, e caktuar në shkollën 9-vjeçare “Gumenicë Fushë”, e cila është amortizuar, KZAZ nr.85 propozon caktimin e QV-së në ambulancën e fshatit Gumenicë. QV nr 4571, e caktuar në shkollën Mesarak, e cila është e amortizuar, KZAz propozon që të zhvendoset në Qendër Shëndetësore”, thuhet në materialin e KQZ-së së paraqitur për votim në mbledhjen e KQZ-së.

Mbi 20 QV u ndryshuan me vendim KQZ nga shkolla publike në qendra shëndetësore.

Zguri nuk i votoi propozimet e paraqitura për ndryshim të qendrave të votimit, ndërsa katër anëtarët e tjerë i votuan pro.

Voltana “Terminator” bëhet “goc e mirë”. Kundër zgjedhjeve, por me padi e ligje.

Dhuna e ushtruar pasdite e së enjtes në Shkodër mes protestuesve dhe forcave të rendit për të mos lejuar mbajtjen e një takimi elektoral të PS, Voltana Ademi, kryetarja e Bashkisë Shkodër, u tërhoq dhe bëri thirrje që protesta do të jetë paqësore. Sigurisht kjo thirrje ra në veshe të shurdhër, pasi pak pas përfundimit të takimit elektoral të PS, disa protestues gjuajtën me gurë mbi policinë. Ditën e premte ka venduar të flasë ndryshe, jo më me marshim protestë, por me akte ligjore dhe kallëzime penale në prokurori, larg dhunës dhe gazit lotsjellës të një dite më parë që u zhvillua në pedonalen e qytetit.

Të premten, Voltana Ademi ka dorëzuar në Prokurorinë e Shkodrës një kallëzim penal ndaj drejtorit të Policisë së Shkodrës, KQZ-së dhe Drejtorinë Vendore të Policisë së Shkodrës, duke vijuar kështu betejën e saj për të mos lejuar zhvillimin e zgjedhjeve më 30 qershor pas dekreti të presidentit Meta për shfuqizimin e tyre.

Bashkia e Shkodrës i akuzon për shpërdorimi detyre dhe mosrespektim të ligjit, duke mos zbatuar kërkesën për lirimin e KZAZ-ve, por kanë vijuar me paligjshmërinë duke dhunuar dhe duke i mbajtur ato të bllokuara, duke penguar Bashkinë Shkodër të ushtrojë lirshëm të drejtat e saj mbi pronat që ka në administrim.

Në shkresën e kallëzimit penal thuhet se Bashkia njeh dekretin e presidentit, i cili është akt normativ në fuqi dhe i zbatueshëm për të gjithë, por KZAZ-të kanë vazhduar ushtrimin e funksionit, duke konsumuar elementë të veprës penale. KQZ akuzohet se nuk ka marrë asnjë masë në lidhje me ndërprerjen e gjendjes së paligjshmërisë duke mos njoftuar Bashkinë Shkodër në lidhje me spostimin e tyre dhe duke mos liruar ambientet, ndërsa policia e Shkodrës i ka mbajtur të bllokuara këto mjedise duke mos lejuar bashkinë të bëj detyrën e saj. Shkolla “Shejnaze Juka” ku është vendosur KZAZ me numër 3 ka qenë një prej godinave të sulmuara ditë më parë nga militantët e PD-së, të cilës ju vu flaka edhe një klase, në përpjekje për të larguar materialet zgjedhore. Edhe pse në fakt mes tre liderëve kryesorë Rama, Basha dhe Meta duker se gjuha është zbutur ndjeshëm, duke aluduar se mund të ketë edhe mundësi për arritjen e një marrëveshje, që të fusë opozitën në zgjedhje, Voltana duket e vendosur që të zbatojë dekretin e presidentit dhe të mos lejojë mbajtjen e zgjedhjeve më 30 qershor.

KQZ, apel bashkive të opozitës: Dekreti, i pavlerë. Zbatoni Kushtetutën

Komisioni Qendror Zgjedhor i ka dërguar një dokument kryetarëve të bashkive që kanë bërë kërkesë për lirimin e ambienteve të KZAZ-ve. Bëhet fjalë për krerët e bashkive që drejtohen nga PD dhe LSI, të cilët kanë vendosur që të zbatojnë dekretin e Metës për anulimin e zgjedhjeve. KQZ i kujton atyre që të zbatojnë Kushtetutën dhe se dekreti i Metës është i pavlerë.

Duke u nisur nga situata e krijuar në disa qytete të vendit ku zyrtarët e bashkive janë bërë bashkë me militantët e PD-së për të dëmtuar materialet zgjedhore, KQZ bën thirrje që krerët e këtyre bashkive të lexojnë mirë rezolutën e miratuar në Kuvend dhe pikat e shkelura nga presidenti Meta përmes dekretit të tij që anulon zgjedhjet.

Sipas KQZ dekreti i Presidentit është krejtësisht i pavlefshëm ndaj dhe kërkesa e bashkive opozitare është e jashtëligjshme. Në fund të letrës së tyre KQZ u kujton bashkive të opozitës, se veprimet e tyre përbëjnë shkelje të ligjit “Shpërdorim i detyrës”, “Pengim i subjektit zgjedhor”, “Dëmtim me dashje i mjeteve zgjedhore” .

Shpërthen prapë Meta: E ka me Voltanën apo me KQZ?

Ndonëse pritej që Presidenti i Republikës të dënonte aktet e dhunës dhe futjen me forcë nga militantë të opozitës në KZAZ-në e Tropojës, kreu i shtetit ka reaguar nëpërmjet zëdhënësit Tedi Blushi, duke i bërë thirrje KQZ-së që të mos provokojë tensione artificiale.

“Presidenti Meta vlerëson të gjitha institucionet që zbatojnë ligjin dhe i inkurajon që ta bëjnë këtë me përgjegjshmëri maksimale dhe transparencë të plotë. Presidenti mban shënim të gjithë personat që shkelin ligjin dhe provokojnë tensione artificiale, të cilat u shërbejnë vetëm atyre grupimeve të errëta vendase dhe të huaja, që kërkojnë destabilitet në Shqipëri dhe rajon, me qëllim defaktorizimin e Shqipërisë dhe shqiptarëve”, shkruan zëdhënësi i Ilir Metës.

Kjo deklaratë ka ardhur fill pas konferencës për shtyp që mbajti zëdhënësja e KQZ-së, Drilona Hoxha, e cila i quajti të paligjshme veprimet e disa bashkive të drejtuar nga kryetar të opozitës, që kanë kërkuar lirimin e ambienteve publike, ku janë vendosur Komizionet Zonalet të Administrimit të Zgjedhjeve.

“Komisioni Qendror i Zgjedhjeve, vlerëson se këto kërkesa janë në tejkalim të kompetencave, të drejtave dhe detyrave të njohura nga Ligji 139/2015 “Për vetëqeverisjen vendore”, duke cituar më të drejtën ligjin themelor që rregullon funksionet e pushtetit lokal.

Megjithatë, si kreu i shtetit dhe që mbron unitetin kombëtar, Meta i jep kurajo opozitës në njëfarë mënyre, që dekreti i tij për anulimin e zgjedhjeve, i cilësuar i jashtëligjshëm nga Qeveria dhe i panjohur nga KQZ, të gjejë zbatim në rrugë të tjera, krejtësisht antiligjore nëpërmjet ndërhyrjes me dhunë dhe prishjes së materialeve zgjedhore. Tani një pyetje duhet ti përgjigjet Presidenti: dhuna e Tropojës apo KQZ është veprim destabilizues i forcave të huaja që nuk e duan vendin?

KQZ paralajmëron Voltanat e opozitës: Tre herë në burg nëse bllokoni zgjedhjet.

Bllokimi i KZAZ-ve nga militantë të PD-së me urdhër të kryebashkiakëve të djathtë është cilësuar në kundërshtim me kompetencat e qeveritarëve vendorë dhe në shkelje me ligjin e Kodin Zgjedhor.

Komisioni Qendror i Zgjedhjeve u bëri thirrje të martën, kryebashkiakëve që të mos tentojnë të bllokojnë procesin zgjedhor sepse do të marrin përgjigjen sipas ligjit.

Zëdhënësja e KQZ-së Drilona Hoxha tha se “KQZ do t’i drejtohet organeve kompetente për të garantuar zbatimin e ligjit, duke cituar tre veprat penale për të cilat do të padisë kryebashkiakët dhe personat për cenimin e një procesi të qetë zgjedhor në KZAZ”.

Shpërdorim detyre, pengim i subjekteve zgjedhore, dëmtim me dashje i materialit zgjedhor, – citoi zëdhënësja e KQZ-së duke thënë se këto janë vepra penale të parashikuara në ligjin për dekriminalizimin.

“Disa kryetar bashkie i janë drejtuar KZAZ ku kanë kërkuar lirimin si dhe ndërprerjen e afishimit të listave të zgjedhjeve në shkolla, në administrim të bashkive.

KQZ vlerëson se këto kërkesa janë në tejkalim të kompetencave për vetëqeverisjen vendore.

KQZ ripërsërit kërkesën për reflektim dhe për të shmangur pengimin e procesit zgjedhor, cenojnë kompetencën e KQZ, KZAZ, në ushtrimin e funksioneve administrative publike të parashikuara në kodin zgjedhor”, tha Hoxhaj e cila përmendi edhe rezolutën e miratuar nga Kuvendi, që inkurajon zbatimin e ligjit për zhvillimin e zgjedhjeve në 30 qershor.

Por fill pas kësaj deklarate ka reaguar kryetari i KQZ-së, Klement Zguri që është përfaqësues i PD-së në KQZ, i cili thotë se nuk ndan të njëjtin qëndrim me 4 anëtarët e tjerë të komisionit. Ai thotë se kjo deklaratë e zëdhënës së KQZ-së është mendim vetëm i 4 anëtarëve të tjerë të KQZ-së dhe jo i tij.

Kujtojmë se Zguri braktisi mbledhjen e KQZ-së kur u diskutua dekreti i Metës për anulimin e zgjedhjeve duke thënë se nuk futet në brendësi të dekretit dhe ta komentojë atë, por e ka për detyrë vetëm ta zbatojë. Ndërkohë që 4 anëtarët e tjerë të KQZ-së e cilësuan nul dekretin pasi bie ndesh me Kushtetutën dhe vendosën që të vazhdojnë me organizimin e zgjedhjeve të 30 qershorit.

Deklarata e plotë e KQZ-së:

Komisioni Qendror i Zgjedhjeve,bazuar në Kushtetutën e Republikës së Shqipërisë, urdhërimet e Kodit Zgjedhor, në parimet dhe përcaktimet e kuadrit ligjor që regullon veprimtarinë e organeve administrative, në përmbushje të misionit, detyrave dhe përgjegjsive, vijon punën për administrimin e procesit zgjedhor, të datë 30 qershor 2019.

Disa kryetarë bashkie me shkresa drejtuar KZAZ-ve kanë kërkuar, lirimin e mënjëhershëm të ambienteve ku janë vendosur Vendet e Numërimit të Votave të Zonave të administrimit Zgjedhor, të caktuara me vendime nga KQZ, si edhe ndërprerjen e veprimeve për afishimin e listave të zgjedhësve në institucionet arsimore parashkollore dhe parauniversitare (çerdhe, kopshte, shkolla), në administrim dhe pronësi nga këto bashki.

Komisioni Qendror i Zgjedhjeve, vlerëson se këto kërkesa janë në tejkalim të kompetencave, të drejtave dhe detyrave të njohura nga Ligji 139/2015 “Për vetëqeverisjen vendore”.

Në vijim të deklaratës së datës 14.06.2019, KQZ ripërsërit kërkesën për të reflektuar dhe shmangur veprime që pengojnë administrimin e procesit zgjedhor të datës 30 qershor 2019, veprime të cilat cënojnë kompetencat dhe të drejtën e KQZ-së dhe KZAZ-ve,pjesë ë administratës së saj, në ushtrimin e funksioneve administrative publike të parashikuar nga Kodi Zgjedhor dhe legjislacioni në fuqi në Republikën e Shqipërisë.

Kuvendi i Shqipërisë përmes Rezolutës, datë 10.06.2018:

– ka shprehur mbështetjen për qëndrimin e Komisionit Qendror të Zgjedhjeve për vijimin e procesit zgjedhor duke inkurajuar KQZ të mbrojë pacënueshmërinë si dhe të garantojë vazhdimësinë e procesit zgjedhor për zgjedhjet vendore, të datës 30 qershor 2019, në zbatim të dekretit të Presidentit nr. 10 928, datë 5.11.2018 “Për caktimin e datës së zgjedhjeve për organet e qeverisjes vendore”;

 i bën thirrje të gjitha organeve publike, që ngarkon ligji me detyra në kuadër të mbarëvajtjes dhe organizimit të zgjedhjeve vendorë të datës 30 qershor 2019, të konsiderojnë si inekzistent aktin e Presidentit, datë 10.06.2019, për shfuqizimin e Dekretit nr. 10928, datë 5.11.2019, dhe të vijojnë përmbushjen e detyrave të tyre sipas përcaktimeve në legjislacionin përkatës për të garantuar të drejtën kushtetuese të shtetasve shqiptarë për të zgjedhur përfaqësuesit e tyre në pushtetin vendor.

Komisioni Qendror i Zgjedhjeve, çdo kërkesë apo veprim për të cilat, Ligji 139/2015, nuk i parashikon në kompetencë Organeve të Qeverisjes Vendore, të cilat shkelin në thelb Kodin Zgjedhor të Republikës së Shqipërisë dhe parimet e përgjithshme parashikuar në nenin 3 të tij, i konsideron cënim të veprimtarisë institucionale, marrëdhënieve juridike të vendosura me ligj, mospërmbushje të regullt të detyrës nga ana e tyre, me pasoja të rënda për interesat e zgjedhësve dhe mbarëvajtjen e procesit zgjedhor, të datës 30 qershor 2019, dhe do t’i drejtohet organeve kompetente për të garantuar zbatimin e ligjit.

Ju kujtojmë se, veprime të tilla përbëjnë vepër penale sipas nenit 248 “Shpërdorim i detyrës”, nenit 325 “Pengimi i subjekteve zgjedhore” dhe nenit 326/a “Dëmtimi me dashje i materialit zgjedhor”, të Kodit Penal të Republikës së Shqipërisë. Penalizimi për këto vepra, është edhe shkak për moszgjedhje/mosemërim në funksionet publike, sipas ligjit nr.138/2015 “Për garantimin e integritetit të personave që zgjidhen, emërohen ose ushtrojnë funksione publike” (dekriminalizimi).

Duke kërkuar mos ndërhyrjen për çështje që janë kompetencë e Komisionit Qendror të Zgjedhjeve, shprehim besimin për angazhimin në përputhje me misionin e vetëqeverisjes vendore për të siguruar qeverisje të efektshme, efikase dhe në një nivel sa më afër qytetarëve nëpërmjet respektimit të të drejtave dhe lirive themelore të shtetasve, të sanksionuara në Kushtetutë dhe ligje të tjera.

Zguri distancohet nga KQZ: Nuk është qëndrimi im, njoh dekretin e Metës

I menjëhershëm ka qenë reagimi i kryetarit të Komisionit Qendror të Zgjedhjeve, Klement Zguri, pas deklaratës së zëdhënëses së KQZ, Drilona Hoxhaj, e cila u bëri thirrje kryebashkiakëve të opozitës që mos të cenojnë KZAZ-të duke i cilësuar kërkesat e tyre të paligjshme dhe në shkelje të Kodit zgjedhor.

Zhuri, është distancuar nga kjo deklaratë duke thënë se ky nuk është qëndrimi i tij zyrta, por i 4 anëtarëve të KQZ, ndërsa qëndrimin e tij e ka shprehur më herët kur ka deklaruar se njeh vendimin e presidentit Meta, për anulimin e datës së 30 qershorit.

“Deklarata e zëdhënëses së KQZ-së nuk është qëndrim i kryetarit të institucionit, por i përket katër anëtarëve të mazhorancës në KQZ. Unë si kryetari i institucionit e kam bërë të qartë qëndrimin tim në mbledhjen e zhvilluar pas dekretit të Presidentit Meta. Njoh dekretin e Presidentit Meta për anulimin e zgjedhjeve më 30 qershor”, ka thënë Zguri në një deklaratë për mediat.

Rama vazhdon fushatën: Mos ndiqni katër të marrët!

Kryeministri Rama ka vijuar fushatën elektorale në qytetin e Patosit, ku nuk ka hezituar të përmend edhe faktin se bashkitë opozitare kanë vendosur të ndjekin dhe zbatojnë dekretin e presidentit Meta për shfuqizimin e zgjedhjeve më 30 qershor, duke ju drejtuar një letër Komisionit Qendror të Zgjedhjeve për largimin e KZAZ-ve dhe listave emërore.

Pra qytetarëve Rama tha se “kryebashkiakëve demokratë nuk duhet të ndiqni pas katërshen e marrosur, por ti referoheshin ligjit, përndryshe do të bëheshin viktima të tij. Akti i Metës për të bërë në marrëzi në mes të fushatës elektorale, për të fshirë firmën e tij me firmën e tij është si t’i frysh konfliktit civil dhe jo ta qetësosh atë.”

Kryeministri argumentoi edh enjë herë se pse zgjedhjet nuk mund të shtyhen duke e cilësuar këtë fakt si një të keqe më të madhe se mbajtja e tyre pasi “ në këtë mënyrë do të futej në fuqi rregulli që prish të gjitha rregullat se një parti mund të kërkojë të shtyjë zgjedhjet sa herë që t’i teket.”

“Kushtetuta nuk mund te argumentohet sikur po lexon filxhan apo sikur po lexon gazetën” tha Rama, i cili u ndal edhe në reformën në drejtësi, duke e cilësuar si frikën më të madhe të Metës, Saliut, Monikës dhe Lulit. “Katërshja kërkon të mbjell frikë, për të fshehur frikën e tyre më të madhe. Ato janë futur në errësirë dhe nuk mund të dalin dot më.’

E quajti të paligjshëm, Meta nis procesin e shkrirjes së parlamentit

Në kuadër të krizës aktuale politike, presidenti Ilir Meta ka bërë të premten lëvizjen e fortë duke iu drejtuar me letër Komisionit Qendror Zgjedhor.

Përmes kësaj letre ai kërkon që t’i vihet në dispozicion informacion i detajuar se sa është numri aktual i deputetëve në Kuvend, si dhe kërkon listën emërore të deputetëve aktualë në Kuvend, cilës bashki i përkasin dhe cilit subjekt parlamentar.

Në letrën e presidentit shtjellohet edhe vendimi i opozitës për të djegur mandatet si dhe vendimi i KQZ-së për t’i zëvendësuar ato me emrat e tjerë në listë.

Në bazë të Kushtetutës, kuvendi i Shqipërisë përbëhet nga 140 deputetë. Aktualisht në kuvend janë 122 deputetë, pra 18 deputetë më pak.

Prej kohësh diskutohet edhe ideja se ai mund të shpërndajë parlamentin me idenë se ai është i paplotë dhe jo në përputhje me detyrimin kushtetues, duke i hapur rrugën zhvillimit të menjëhershëm të zgjedhjeve të parakohshme.

Kujtojmë se më herët Meta e cilësoi ilegjitim parlamentin aktual.

Ndërkohë kohë më parë kreu parlamentar i PS Taulant Balla pati deklaruar se sipas ligjit, vendet e lëna të pambushura në listat e opozitës, duhet të mbusheshin me emrat nga listat e PS, porse kjo nuk do të kishte sens politik, pasi behej fjalë për vende të opozitës. Por në momentin që Meta synon të deligjitimojë Parlamentin me këtë argument, pra atë të numrave jo të plotë, ky qëndrim i PS mund të ndryshojë. Ndërkombëtarët kanë qenë të qartë se përveç datës së zgjedhjeve që nuk lëviz, gjithashtu edhe parlamenti duhet të jetë funksional. Ambasada e SHBA pas 16 shkurtit kur opozita dogji mandatet, i bëri thirrje kandidatëve në lista të marrin përgjegjësitë dhe mandatet e lëna. Mbi 30 prej tyre iu përgjigjën pozitivisht. Të gjitha mandatet e LSI u zëvendësuan dhe një numër jo i vogël, edhe nga listat e PD.

Garda mbron KQZ, Vasili: I kërcënon vetëm ligji

Mbrojtja e anëtarëve të Komisionit Qendror të Zgjedhjeve nga Garda e Republikës, ka sjell edhe reagimin e nënkryetarit të LSI-së, Petrit Vasili, i cili i ka cilësuar ato si puçistë që kanë shkelur Kushtetutën duke refuzuar dekretin e presidentit Meta për shfuqizimin e zgjedhjeve të 30 qershorit.

“Këta anëtarë janë thjesht puçistë,që kanë shkelur Kushtetutën dhe ligjin duke refuzuar dekretin e presidentit.” Vasili shtoi se nga e vetmja gjë që anëtarët e KQZ-së duhet të ruhen është ligji.

‘Kërcënimi i vetëm këtyre anëtareve të KQZ, ju vjen nga ligji, të cilin e kanë shkelur dhe dhunuar ne emër te rilindjes dhe me urdhër të saj.”- shkruan Vasili në facebook.

Pasi KQZ vendosi të mos njihte dekretin e Ilir Metës për shfuqizimin e datës së zgjedhjeve, ajo vijon punën normalisht me katër anëtarët e mbetur Denar Biba, Bledar Skënderi, Edlira Jorgaqi dhe Rezarta Bitri. Kryetari i këtij institucioni, Klemenet Zguri ka bojkotuar mbledhjet që pas vendimit të Presidentit për anulimin e zgjedhjeve.

Ai i mbrojne dot bodyguardet anetaret e rilindjes ne KQZ nga pergjegjesia para ligjit ???Anetaret e rilindjes ne KQZ…
Gepostet von Petrit Vasili am Mittwoch, 12. Juni 2019

Garda i merr në mbrojtje, KQZ miraton vëzhguesit amerikanë për 30 qershorin

Situata politike në vend është futur në një labirint të errët, megjithëse kjo është vetëm për njërën palë, opozitën dhe Presidentin, që tashmë e kanë konfirmuar zyrtarisht se nuk do të shkojnë në zgjedhje. Megjithatë, Qeveria dhe Komisioni Qendror i Zgjedhjeve, me mbështjen e ndërkombëtarëve, janë duke punuar për përmbushjen e detyrimit kushtetues, për mbajtjen e zgjedhjeve më 30 qershor.

Ndërkohë, një ditë pasi KQZ vendosi të mos njihte dekretin e Ilir Metës për shfuqizimin e dekretit që caktonte datën e zgjedhjeve, organi administrues i votimeve në Shqipëri, ka vijuar punën normalisht.

Këtë të mërkurë është zhvilluar mbledhja e radhës e KQZ, për të miratuar disa pika të rendit të ditës. Por, ajo që ka rënë në sy, ka qenë prania e punonjësve të Gardës së Republikës, të cilët kanë marrë në mbrojtje katër anëtarët e mbetur të KQZ, Denar Biba, Bledar Skënderi, Edlira Jorgaqi dhe Rezarta Bitri, pasi kryetari i këtij institucioni, Klemenet Zguri ka bojkotuar mbledhjet.

Në mbledhjen e ditës së mërkurë, KQZ miratoi listat emërore të shtetasve të cilët mund të emërohen anëtar të KQV-ve, si dhe disa pika të tjera. Një ndër pikat, ishte dhe ajo e miratimit të vëzhguesve afatgjatë të Institutit Demokratik Amerikan, për zgjedhjet për organet e qeverisjes vendore të datës 30 qershor 2019.

Pikat e rendit të ditës të miratuara nga KQZ:

1. “Për miratimin e listës emërore të shtetasve të cilët mund të emërohen kryesisht anëtarë KQV-ve, për zgjedhjet për organet e qeverisjes vendore të dates 30 qershor 2019”.

2. “Për dhënien e autorizimit për ndryshimin e vendndodhjeve të disa QV-ve, për zgjedhjet për organet e qeverisjes vendore të dates 30 qershor 2019”.

3. ‘Për miratimin e vëzhguesve afatgjatë të Institutit Demokratik Amerikan ( NDI), për zgjedhjet për organet e qeverisjes vendore të dates 30 qershor 2019”.

4. “Për një shtesë në Vendimin nr.669, të datës 28.05.2019 ‘Për miratimin e vëzhguesve afatgjatë të KSHH’, për zgjedhjet për organet e qeverisjes vendore të dates 30 qershor 2019”.

5. “Për miratimin e vëzhguesve afatgjatë të Shoqatës për Gratë dhe Fëmijët, për zgjedhjet për organet e qeverisjes vendore të dates 30 qershor 2019”.