Zguri: Hetim për mospërputhjen e shifrave, KQZ: Dakord, por jo tani

Kryetari i Komisionit Qendror të Zgjedhjeve, Klement Zguri ka kërkuar nisjen e një hetimi administrativ për shkak të mospërputhjes së shifrave të pjesëmarrjes në zgjedhjet e 30 qershorit. Zguri paraqiti disa fakte mbi të cilën bëri edhe kërkesën e tij për ngritjen e një hetimi administrativ.

“Kemi deklaratën e orës 11:00 të KQZ ku thuhet pjesëmarrja në votime 12%. Ndërkohë këtu kam tabelat në faqen e KQZ, ora 11:00 kur deklarata thoshte 12%, në tabelën është 6.19 %, gati gjysmë për gjysmë. Kur unë këtu jam i paqartë mendo sa i paqartë është publike. I kemi detyrim qytetarëve për transparencë në procesin zgjedhor. Në deklaratën para mediave të dielën, deklarova që KQZ do duhet të ndërmerrte një hetim administrativ kryesisht duke i bërë thirrje kolegëve të mi. Kjo që po kërkoj ndihmon kryesisht në rritjen e transparencën dhe në risjelljen e besimit të publikut në procesin zgjedhor. Propozimin e kam në tavolinë.” – tha Zguri

Anëtari i KQZ, Denar Biba tha se është dakord me propozimin e kryetarit Klement Zguri për të nisur një hetim administrativ nisur nga shifrat e ndryshme të pjesëmarrjes në votimet e 30 qershorit, por shtoi se në të gjitha deklaratat e KQZ-së përmes zëdhënëses, është theksuar që raportimet janë paraprake dhe jo zyrtare. Ai tha së njëjtë ka ndodhur edhe në zgjedhjet e vitit 2017, ku deklarimet kanë qenë të ndryshme gjatë ditës, për shkak se janë bërë publike nga informacione paraprake dhe jo të zyrtarizuar. Të 4 anëtarët e KQZ në parim e mbështetën kërkesën e Zgurit, por thanë se ky proces mund të bëhet edhe më vonë, kur të kemi një përmbyllje zyrtare të të gjithë rezultatit.

Diskutimi për nisjen e një procesi hetimor është shoqëruar me detabe, pasi Zguri në moment të fundit ka kërkuar hapjen e kutive të votimit, për të numëruar edhe një herë votat për të nxjerrë shifra të sakta të pjesëmarrjes. Kjo kërkesë u quajt nga nënkryetari Denar Biba si një mënyrë për të hedhur në erë procesin zgjedhor të 30 qershorit. Biba i tha Zgurit se ndryshove mendim në moment të fundit pasi të erdhi një sms nga Gaz Bardhi, pasi kjo nuk ishte ajo që paraqite në fillim.

Zguri: Të nisë hetimi administrativ duke kërkuar procesverbalet e mbylljes së qendrave të votimit dhe listat për çdo zonë zgjedhore, në gjithë Shqipërinë.

Biba: Gjithë Shqipëria të numërohet në KQZ?

Zguri: Jo të numërohen, të kontrollohen të gjithë procesverbalet dhe listat

Biba: Ky nuk ishte propozimi i hedhur në erë, kjo është hedhje në erë e gjithë procesit zgjedhor.

Zguri: Ti nuk hidhesh në erë, mos u bëj merak

Biba: Mua s’ka perëndi të më hedhë në erë jo më ti.

Zguri: Po kush e vë në dyshim

Biba: Po të fala Gazment Bardhit.

Zguri: Kush është dakord me propozimin tim për të hapur kutitë e votimit dhe për të marrë procesverbalet dhe listat për të verifikuar sa është numri i atyre që kanë votuar?

Anëtarët: Jo, nuk ishte kjo kërkesa, hapja e kutive është tjetër gjë.

Biba: Për të bërë hetim po, për të hedhur zgjedhjet në erë, të fala Gazit. Hetim adminsitrativ në lidhje me sjelljet që ka bërë KQZ. Përmendët disa shifra që sipas jush kanë cënuar besimin e popullit. Në bindjen time, populli e di shumë mirë se çfarë ka ndodhur, edhe ata që shkuan në plazh e dinë fare mirë.

Zguri: Pse trembesh?

Biba: Më fal jemi në të njëjtën anë. Unë kam ngritur dorën bashkë me ju (për votë pro) por është tjetër gjë të hetosh pjesëmarrjen dhe tjetër të hapësh të gjitha kutitë. Këto zgjedhje nuk do mbarojnë kurrë nëse do të hapen të gjitha kutit, atë që kanë bërë 90 KZAZ dhe 5489 QV

Biba: Nuk e keni dashur kurrë këtë proces, e keni thënë që në fillim. Ti duhet ta tregosh, vazhdo shpalose deri në fund. Ti nuk doje këtë proces dhe nuk e do në as në këtë moment. Në këtë pikë çfarë do të bësh? Çdo gjë për ta sabotuar. Gjykojë në moral Klement nuk ka lidhje me nenet, nenet t’i gjen Gaz Bardhi ty. Ti në fillim këtë doje, këtë që dua edhe unë, por të erdhi një mesazh edhe ndryshove qëndrim.

Zguri: Nuk më bezdis fare, me kalimin e kohës nuk më krijon asnjë lloj gudulisje

Skënderi- Ruani etikën

Zguri: Kush e prishi etikën pse më drejtohesh mua. Unë mundohem të flas ju futeni tek fjala ime

Biba: Unë jam dakord të bëhet një hetim i brendshëm administrativ, ai që realisht nisët ju para se t’ju vinte ajo SMS-ja. Të bëhet hetim në lidhje me çdo lloj sjellje brenda KQZ, të rojës së derës që mund të ketë vënë në pikëpyetje besueshmërinë në zgjedhje, por të hapni ju gjithë kutitë, nuk ju mbështes dot.

Zyrtare: 771863 shqiptarë votuan në 61 bashki të vendit

Rreth 771863 qytetarë shqiparë kanë shprehur vullnetin e tyre të dielën e 30 qershorit, duke zgjedhur 61 kryetarët e bashkive në vend. Në përqindje, kjo shifër është 21.6%. Në deklarëtën e zëdhënses së KQZ, mësohet se votimi në 7 qendra në KZAZ Nr.2 në Shkodër nuk është zvilluar.

“Komisioni Qendror i Zgjedhjeve informon opinion publik se janë mbyllur të gjithë qendrat e votimit. Procesi i votimit ka vijuar normalisht në të gjithë vendin, duke përjashtuar 7 qendrat e votimit të KZAZ-nr. 2, Shkodër ku nuk u zhvillua votim.

Menjëherë pas mbylljeve të qendrave të votimit sipas procedurave të përcaktuara nga Kodi Zgjedhor, Komisionet e Qendrave të Votimit sipas proceduave ligjore kanë nisur procesinedorëzimin të kutive të votimit dhe kutive të materialeve zgjedhore nga Qendrat e Votimit drejt Vendeve të Numërimit të Votave. Sipas të dhënave të raportuara nga Qendrat e Votimit në Komisionin Qendror të Zgjedhjeve, pjesëmarrja është si vijon: 771863, ose 21.6%.

Theksojmë se këto të dhëna janë paraprake. Sipas përcaktimeve të Kodit Zgjedhor dhe akteve të KQZ-së, numërimi fillon vetëm pasi të jenë marrë në dorëzim nga KZAZ-të të gjitha kutitë e votimit me fletët e votimit dhe kutitë e materialeve zgjedhore nga të gjithë qendrat e votimit nën juridiksionin e saj”, thuhet në deklaratën e KQZ.

Voltana “Schwarzenegger” reziston, detyron KQZ të ndryshojë gjashtë qendra votimi

Voltana Ademi vijon të bëj rezistencë. Kryebashkiakja e Shkodrës dhe strukturat e bashkisë së drejtuar prej saj nuk kanë lejuar hapjen e disa godinave publike, ku ishte parashikuar të vendoseshin qendrat e votimit. Për këtë arsye, me një mbledhje paraditen e së dielës, Komisioni Qendror i Zgjedhjeve ka vendosur të ndryshojë vendodhjen e gjashtë qendrave të votimit në Qarkun Shkodër. Gjithashtu edhe në Berat janë ndryshuar vendodhjet e dy qendrave të votimit.

“Komisioni Qendror i Zgjedhjeve shqyrtoi dhe miratoi projektvendimin: “Për dhënie autorizimi për ndryshimin e vendndodhjeve të disa QV-ve, për zgjedhjet për organet e qeverisjes vendore të datës 30 qershor 2019”. KQZ vendosi dhënien e autorizimin për ndryshimin e vendndodhjeve të 6 qendrave të votimit në Qarkun Shkodër dhe 2 qendrave të votimit në Qarkun Berat”, thuhet në një njoftim të KQZ.

Gjatë paradites të së dielës ka pasur disa probleme në Qarkun e Shkodrës, pasi disa qendra janë hapur me vonesë për shkak të pengesave të krijuara nga pushteti lokal. Ndërkohë, në Shkodër dhe në Mat, në dy qendra votimi ka pasur dhe incidente më të rënda. Dy qendra votimi janë djegur me molotov, duke bërë që KQZ-ja të marrë vendimin për zëvendësimin e materialeve zgjedhore të këtyre qendrave.

Mban peng QV, KQZ-Voltanës: Bashkëpuno ose…burg

Komisioni Qendror i Zgjedhjeve ka njoftuar se materialet zgjedhore janë shpërndarë pothuajse në të gjithë vendin. Në një deklaratë për shtyp, zëdhënsja e KQZ-së, njoftoi se materialet zgjedhore janë duke u shpërndarë nga 90-të KZAZ-të në të gjithë vendin, për 5417 qendra votimit. Sipas KQZ-së, deri në orët e pasdites të së shtunës, ka përfunduar shpërndarja e materialeve zgjedhore nga 53 Komisione Zonale të Administrimit të Zgjedhjeve, ndërkohë, sipas KQZ-së, në të gjitha KAZA-të e tjera procesi është drejt përfundimit.

Megjithatë, vetëm në KZAZ-në NR.6, bashkia Vau i Dejës, procesi shpërndarjes së materialeve të votimit në qendrat ku do të zhvillohet procesi të dielën, ka nisur me vonesë. Kryesja është djegia e materialeve të para zgjedhore nga militantët e PD-së tre ditë më parë, çka detoryi KQZ-në të riprintonte fletë të reja votimi dhe pajisje logjistike të nevojshme për votimet. Megjithatë, edhe në KZAZ-në e Vaut të Dejës, materialet zgjedhore do të shpërndahen brenda të shtunës në 53 qendrat e votimit të kësaj bashkie.

Qarku i Shkodrës mbetet më problematiku deri më tani sipas KQZ-së, pasi 50% e qendrave të votimit mbahen të mbyllura me forcë nga autoritetet vendore. Komisioni Qendror i Zgjedhjeve i ka bërë thirrje Voltana Ademit që të heq dorë nga pengimi i zgjedhjeve, duke i kujtuar asaj se pengimi i zgjedhjeve konsiderohet vepër penale.

Megjithatë, edhe pse bashkia Shkodër dhe kryetarja e saj, Voltana Ademi kanë bllokuar qendrat e votimit, në disa prej tyre, ashtu siç konfirmoi KQZ-ja, materialet zgjedhore janë shpërndarë. Për këtë arsye, ka reguar kryebashkiakja e Shkodrës, e cila i ka quajtur “hapje me dhunë të institucioneve publike” dhe “njollosje të të drejtës së votës së lirë”, duke u shprehur se të gjitha, sipas Voltana Ademit, do të filmohen dhe do tu jepen autoriteteve të huaja, si OSBE-ODIHR.

U dogjën nga militantët e PD-së, KQZ dërgon fletët e reja të votimit në Vaun e Dejës

Të enjten militantët e Partisë Demokratike, të udhëhequr nga drejtues të lartë të Bashkisë së Vaut të Dejës, dhe të afërm të kryebashkiakut, dogjën dhe shkatërruan materialet zgjedhore të KZAZ-së Nr.6. Materialet zgjedhore janë bërë të papërdorshme për zgjedhjet e 30 qershorit, ndaj, Komisioni Qendror Zgjedhor ka vendosur që t`i zëvendësojë në kohë rekord këto materiale, në mënyrë që gjithçka të jetë gati për zgjedhjet e 30 qershorit. Gjatë mbledhjes së ditës së premte, KQZ ka vendosur të nxjerrë jashtë përdorimit materialet zgjedhore (fletë votimi ,vula, kuti votimi, kode sigurie), të KZAZ-së Nr.6, duke i zëvendësuar ato me të tjera.

“Për nxjerrjen jashtë përdorimit të materialeve zgjedhore (fletë votimi ,vula, kuti votimi, kode siguri) të qendrave të votimit në KZAZ nr.6, Qarku Shkodër dhe zëvendësimin e tyre me materialet zgjedhore të nevojshme”. KQZ vendosi të nxjerrë jashtë përdorimit fletët e votimit për kryetar dhe kandidat për këshillin e bashkisë Vau i Dejës, dhe të prodhojë e pajisë KZAZ-në nr. 6 me 39.527 fletë votimi për kandidatët për kryetar dhe 39.527 fletë votimi për kandidatët për këshillin e bashkisë Vau i Dejës”.

“Gjithashtu KQZ vendosi të nxirren jashtë përdorimit vulat e KQZ-ve dhe të zëvëndësohen ato me vulat rezervë. Të nxirren jashtë përdorimit vulat e kryetarëve të 53 KQV-ve të KZAZ-së nr. 06, dhe të prodhoje e pajisë KZAZ-në nr. 6 me 53 vula për kryetarët e KQV-ve. KQZ vendosi të dërgojë në KZAZ-në nr. 6, 106 kuti votimi dhe kuti të materialeve zgjedhore së bashku me kodet e sigurisë përkatëse. KQZ vendosi të dërgojë në KAZ-nr. 6, Qarku Shkodër, të gjithë materialet e tjera zgjedhore të parashikuara nga neni 99 i Kodit Zgjedhor”, shkruhet në njoftimin e KQZ-së.

KQZ i përgjigjet Metës. Si u plotësuan vakancat e Kuvendit

Komisioni Qendror i Zgjedhjeve i është përgjigjur letrës së Presidentit Meta, ku kërkohej procedura e ndjekur për plotësimin e vakancave në Kuvend nga deputetët e rinj, pas djegies së mandateve nga Partia Demokratike, LSI dhe aleatët e tyre.

KQZ i ka dërguar Presidentit Meta të gjithë dokumentacionin, që nga nisja e mandatit pas zgjedhjeve parlamentare të vitit 2017 e deri te vendimet e deputetëve të opozitës për të lënë mandatet. Bashkangjitur me njoftimet e vendeve vakante, KQZ informon presidentin dhe për vendimet e dhënies së mandateve të deputetëve që kanë plotësuar vakancat në parlament, të ardhura nga listat shumë emërore të PD-së dhe LSI-së.

Letra e dytë e Presidentit drejtuar KQZ u konsiderua si një strategji e Metës për të mbrojtur veten nga një shkarkim i mundshëm nga Kuvendi i Shqipërisë, pas rezolutës së miratuar me 100 vota, që vinte në pah paligjshmërinë dhe shkeljet e Kushtetutës përmes dekretit të tij për anulimin e 30 qershorit.

Gjatë deklaratës të martën në mëngjes Meta nuk tha asgjë pse po kërkonte shkresat për deputetët. Ai pranoi se s`ka asnjë mjet për të ndaluar zgjedhjet në 30 qershor. “Duhet të keni të qartë që presidenti nuk ndërhyn për të penguar zgjedhjet partiake, por padyshim lidhur me 30 qershorin, kjo datë ka rënë. Nuk ekziston më ligjërisht. Kush do të zhvillojë zgjedhje partiake është i lirë”, tha Meta.

PRESIDENTI META I DASHURUAR ME POSTIN. DO MBROHET NGA SHKARKIMI, DERI NË STRASBURG

Bashkitë e opozitës: Nuk ka zgjedhje më 30 Qershor

Bashkitë që janë nën drejtimin e opozitës kanë vënë në dijeni Komisionin Qendror të Zgjedhjeve se asnjë vendim i paligjshëm i këtij Komisioni nuk do t’i pengojë ato të marrin nën administrim ambientet në pronësinë e tyre, të zëna nga komisionet e administrimit zonal dhe grupet e numërimit. Bashkitë që drejtohen nga opozita i kanë dërguar të njëjtën shkresë njëkohësisht KQZ-së, ku vihet në dukje se i vetmi vendim për zgjedhjet, me fuqi ligjore, është dekreti i presidentit, që ka shfuqizuar datën 30 Qershor.

Duke shprehur vendosmërinë për zbatimin e këtij dekreti në shkresën e bashkive të opozitës thuhet marrja nga KQZ e kompetencave të Gjykatës Kushtetuese, çka po cenon sigurinë dhe stabilitetin demokratik në vend, nuk do të thotë që njësitë e qeverisjes vendore ta ndjekin pas KQZ-në në këtë absurd kushtetues.

“Ju bëjmë me dije se ne jemi të vendosur qё të marrim nën administrim ambientet, ku janë vendosur KZAZ dhe GNV, pa asnjë tolerim, pavarësisht pengesave të paligjshme që na janë krijuar nga Policia e Shtetit në të shkuarën.”- thuhet në shkresën e bashkive të opozitës

Gjithashtu, kryebashkiakët, njoftojnë Komisionin Qendror të Zgjedhjeve se “në datat 27 Qershor deri në 2 Korrik, ambientet që ishin vënë në dispozicion për zgjedhjet, përpara shfuqizimit të datës 30 qershor nga Presidenti, do të jenë në dispozicion të qytetarëve për aktivitete të ndryshme artistike, kulturore dhe letrare, që do të organizohen nga bashkitë apo për tubime të tjera.”

Duke iu referuar Kodit Zgjedhor, kryebashkiakët njoftojnë KQZ-në se kanë shfuqizuar aktet me të cilat kanë dërguar listën e zgjedhësve pranë KZAZ-ve, si dhe aktet për vendet e qendrave të votimit në bashkitë e tyre, ku nuk do të lejohet vendosja e asnjë material zgjedhor, si dhe aktet e propozimit për qendrat e votimit në ambientet private.

“Këtë njoftim po e bëjmë për efekt të detyrimit që ju keni për të mos çuar dëm materialet zgjedhore, sepse zaptimi i ambienteve tona me material, që nuk janë të autorizuara nga ne të futen brenda, do të shkaktojë asgjësimin e tyre të menjëhershëm, në funksion të lirimit të ambienteve, për realizimin e aktiviteteve të qytetarëve”-thuhet në shkresën e kryebashkiakëve. Ata shprehen se KQZ po vepron në paligjshmëri, kur i referon bashkitë të zbatojnë e rezolutën e Parlamentit, një akt me natyrë jo detyruese, dhe jo dekretin e Presidentit, akt me natyrë detyruese dhe i vetmi në fuqi nëlidhje me zgjedhjet.

Kryebashkiakët thonë hapur se duke mos zbatuar dekretin e Presidentit, gjë për të cilën do të mbajnë përgjegjësi personale, anëtarët e zgjedhur nga PS, e kanë shndërruar Komisionin Qendror të Zgjedhjeve në Komisionin e Garancive Statutore të Partisë Socialiste. “Në të ardhmen, ju lutem na kurseni kohën me shkresa e ultimatume të kota, sepse as nuk na impresiononi dhe as nuk e realizoni dot objektivin tuaj për të na intimiduar në ushtrimin me përgjegjshmëri të përgjegjësive tona kushtetuese e ligjore”- thuhet në shkresën e kryebashkiakëve të drejtuar nga opozita.

Bashkitë e Opozitës: Nuk do lejojmë mbajtjen e zgjedhjeve më 30 qershor

Opozita refuzon të njohë vendimet e një gjykate të miratuar prej saj në Kodin Zgjedhor, atë të Kolegjit Zgjedhor, që në unanimitet të plotë me 5 vota pro, vendosi që zgjedhjet do të mbahen më 30 qershor, duke rrëzuar dekretin e presidentit Meta për anulimin e tyre.

Në të njëjtën linjë ishin edhe bashkitë që drejtohen nga opozita, kur ditën e hënë për herë të dytë u kanë dërguar letër KQZ për të larguar materialet zgjedhore nga KZAZ-të, nga ambientet që administrohen prej tyre, me arsyetimin se njohin dekretin e presidentit Meta se zgjedhje nuk do të ketë më 30 qershor.

Bashkia e Devollit dhe ajo e Pogradecit ka çuar një letër të dytë në drejtim të KQZ, ku kërkojnë “shfuqizimin e aktit të caktimit të Qendrave të Votimit, duke cilësuar se nuk do të lejojë futjen e materialeve zgjedhore në ambientet që administrohen nga bashkia.” Bashkitë opozitare njoftojnë se kanë shfuqizuar aktin administrativ për listat e zgjedhësve, një kërkesë që kreu i PD-së Lulzim Basha e kërkoi pas protestës së 21 qershorit. Në letrën e tyre Bashkia e Devollit dhe ajo e Pogradecit deklarojnë se “Zaptimi i ambienteve në administrim të bashkisë nuk do të tolerohet dhe nuk do të lejohet futja e materialeve zgjedhore. Nëse kjo ndodh, materialet zgjedhore do të asgjësohen. Shfuqizohet akti administrativ për vendndodhjen e Qendrave të Votimit në ambiente private dhe se do të vendosen punonjës të bashkisë për ruajtjen e tyre. “

Ndërsa Bashkia Kukës ka vendosur që të padisë anëtarët e KZAZ, pasi janë duke mbajtur peng ambientet që i takojnë bashkisë. Bashkia Kukës ka paditur për shpërdorim detyre anëtarët e KZAZ numër 11, pasi vazhdojnë të mbajnë të bllokuara, në mënyrë të paligjshme, mjediset në Shkollën e Mesme “Havzi Nela”.

“Pavarësisht se anëtarët e KZAZ-së kanë marrë dijeni për shkak të detyrës, për anulimin e datës së zgjedhjeve vendore, ata vijojnë të mbajnë të bllokuar një objekt në pronësi të Bashkisë Kukës dhe kanë penguar Bashkinë në ushtrimin e detyrës së saj” thuhet në padinë e dorëzuar në Prokurorinë e Kukësit.

Xhelal Mziu, kryetari i Bashkisë Kamëz, i ka kthyer përgjigje Komisionit Qendror Zgjedhor në lidhje me zgjedhjet vendore të 30 qershorit, ku sqaron se në Kamëz ato nuk do zhvillohen. “Komisioni Qendror Zgjedhor nuk ka tagër ligjor që të gjykojë mbi Dekretet e Presidentit për sa i përket datës së zgjedhjeve. Nëse Komisioni Qendror i Zgjedhjeve ka rezervat e tij ligjore për Dekretet e Presidentit, mund t’i drejtohet këtij institucioni (Presidentit). Zbatimi i Dekretit të Presidentit nga ana e qeverisjes vendore Bashkia Kamëz, është një detyrim ligjor dhe aq më tepër kushtetues.” thuhet ndër të tjera në letrën që Bashkia Kamëz i ka dërguar KQZ.

Kur PD vidhte votat live (dhe s’kish nevojë për përgjime)

Vjedhja e votës në Shqipëri nuk është një çudi e dekadës së dytë të shekullit të XXI. Ajo nis të bëhet fenomen kryesisht pas vitit 1997 e në vijim. Shumë ngjarje të tilla elektorale nuk harrohen lehtë nga shqiptarët, e aq më tepër kur ato janë bërë haptazi, në syrin e gjithë botës, drejtpërdrejtë në ekranet televizive. Maj 2011, Lulzim Basha kundër Edi Ramës për bashkinë e Tiranës.

Ky i fundit e fitoi kryeqytetin me dhjetë vota më shumë, por PD kërkoi hapjen e kutive ku dyshohej se “ishte bërë numërim gabim”. Këtu nisi gjithçka, numërim në KQZ, i transmetuar nga të gjitha mediat, dhe rezultati ishte kthim i vullnetit të qytetarëve, duke i dhënë bashkinë Lulzim Bashës.

Ajo skenë nuk do të harrohet lehtë nga shqiptarët, por në një kohë kur janë publikuar përgjimet e Bild, që japin indicie për blerje vote, rikthimi në kujtesë (me shkrim dhe pamje) i numërimit të votave në 2011, tregojnë se dikur vota vidhej, direkt në transmetim televiziv, pa pasur nevojë për përgjime.

Arben Ristani, ka qenë kryetar o KQZ

Eridian Salianji dhe Genc Gjonçaj, përfaqësues të PS

Idajet Beqiri: përfaqsues i PK që mori mbi 1300 vota

Dialogu i anëtarëve të KQZ, maj 2011:

Arben Ristani: Po tani, shqip flasim e turçe merremi vesh. Shkruan nga pas flet e kontestuar se ka…ka vullnet nga populli ka shkrujt ky, po…punë për të…

Idajet Beqiri: Ore, ju gjetët një votë, ku vajti njëra…se thotë dy, janë dy aty

Arben Ristani: Ta gjejmë së bashku. Ne një gjetëm…

Idajet Beqiri: Po gjetët një, po kush e mori atë tjetrën..Se ju gjeni vetëm të Lul Bashës, po do gjetur dhe tjetra

Arben Ristani: Ta gjejmë bashkë…

Eridian Salianji (PS): Po ti kishit ditur këto të paktën më përpara, të ndërronit kutitë, të sillnit ndonjë tjetër…

Arben Ristani: Atëherë kjo çështje që nga ky moment është në rendin e ditës dhe duhet të marrë një zgjidhje…

Genc Gjonçaj: ore ti mund të bësh ca të duash ore, eeee…ti mund të shpallësh edhe rezultat që ta gjeti ai tjetri dhe jo rezultatin e popullit eeee…

Arben Ristani: Ka votu populli I shkretë ore…

Eridian Salianji: Me leje, mund të kontestoj unë?

Arben Ristani: Po po, vazhdoni kontestoni…

Idajet Beqiri: Në procesverbal thuhet se janë katër, këtu janë gjetur pesë tani…nga doli kjo e pesta…

Arben Ristani: Ja që doli e pesta…Gjendja e faktit aq doli…Po ca rëndësie ka, katër, pesë…ne I hapim, I gjejmë, I numërojmë, I fusim prapë Brenda…aty I ke, si merr njeri…

Idajet Beqiri: Ore kush I shtoi, se janë shtuar rrugës

Arben Ristani: Po Perëndia mbase…

Idajet Beqiri: Po lëre Perëndinë

Arben Ristani: Po lëre se gjynaf, ata njerëz kanë votuar…tia cojmë votën atje ku e kanë nisur

Eridian Salianji: Çoje në bazë të ligjit, jo sic e do ti…

Arben Ristani: Po pse o burr I dheut…se siu vodhën popullit o burrë…Kanë votuar populli I shkretë…

Genc Gjoncaj: Ju nuk e keni merakun të coni votën e qytetarit atje ku duhet, nuk është ky meraku juaj.Meraku juaj është si të rregulloni numrat e atij që nuk ka fituar.

Eridian Salianji: Kjo kuti, mos, mos, mos…një second ore ti djali

Arben Ristani: Vazhdo ti vazhdo me procedurën…Shprehu të lutem ti tjetri

Eridian Salianji: Një second or ti ooooo

Arben Ristani: Vetëm po deshe mos e trash zërin se na tremb o burrë…

Eridian Salianji: Ti je I trembur, kështu ke hyrë që në mëngjes sot këtu…stë tremb dot unë…

Genc Gjoncaj: Nuk dini të bëni deklarata juve …

Arben Ristani: Vazhdojmë me rendin e ditës diskutimet në tavolinë…jo nuk ta jap fjalën…Merre pak kutinë të lutem, ik andej, ik andej…të lutem, largoje atë qerosin (Eridian Salianji) që andej…(fillon sherri)…o djema, largojini pak këta djemtë…largojini këta djemtë…

KQZ shkel afatin. Shtyn miratimin e grupeve të numërimit

Komisioni Qendror i Zgjedhjeve ka miratuar ndryshimin e vendodhjes së KZAZ Nr.11 në Kukës, e cila zhvendoset nga ambientet e palestrës së një shkolle në këtë qytet, në një ambient privat, hotel. Ky vendim i KQZ-së vjen fill pas sulmeve të dhunshme që militantët e PD-LSI, të nxitur nga kryetari i bashkisë Kukës, kryen ndaj materialeve zgjedhore në këtë KZAZ. Pas ndërhyrjes së forcave të rendit u bë largimi paqësor i materialeve zgjedhore, të cilat tashmë do të qëndrojnë në ambientet e një hoteli, nga ku do të koordinohet puna për shpërndarjen e materialeve zgjedhore për datën 30 qershor.

Megjithatë, në mbledhjen e kësaj të shtune të KQZ-së kur u morën disa vendim, mes të cilëve dhe ai për ndryshimin e vendodhjes së KZAZ-së Nr.11, anëtarët vendosën që të shtyjnë për në mbledhjen e radhës, marrjen e vendimit për miratimin e “Për ngritjen e Grupeve të Numërimit të Votave, për zgjedhjet për organet e qeverisjes vendore të datës 30 qershor 2019”. Por, çfarë parashikon Kodi Zgjedhor për ngritjen e grupeve të numërimit? Sipas Nenit 95 pika 1, për numërimin e votave në rang ZAZ-je, me vendim të KZAZ-së, 10 ditë para ditës së votimit, caktohen Grupet e Numërimit.

“Për numërimin e votave në rang ZAZ-je, me vendim të KZAZ-së, 10 ditë para ditës së votimit, caktohen Grupe Numërimi të Votave. Numri i grupeve të numërimit është dy për çdo tavolinë numërimi, sipas pikës 2 të nenit 94 të këtij Kodi. Anëtarët e grupeve të numërimit të votave duhet të plotësojnë kushtet dhe kriteret e neneve 30 dhe 31 të këtij Kodi. Propozimet për emërimin e anëtarëve duhet të dorëzohen në KZAZ të paktën 12 ditë para datës së zgjedhjeve”, thuhet në Nenin 95 pika 1 të Kodit Zgjedhor. Pra, praktikisht, KQZ-ja duhet të kishte miratuar ngritjen e grupeve të numërimit, por nuk dihet pse ky vendim është shtyrë për në mbledhjen e radhës.