Lefter Alla te SPAK: Bëj testin e drogës

Kryetari i Bashkisë Bulqizë, Lefter Alla do të përballet me testin e drogës duke dorëzuar kampion gjaku dhe urine në laboratorët e Institutin e Mjekësisë Ligjore. Ai është paraqitur të premten për herë të dytë në dyert e SPAK për të dëshmuar lidhur me videon ku pretendohet se ai po konsumon kokainë në një lokal. SPAK nisi të enjten hetimet për Allën dhe ky hetim tashmë ka hyrë në fazën e verifikimit të autenticitetit të videos pas sekuestrimit të origjinalit dhe i ka kërkuar kryebashkiakut të bëjë testin e drogës.

Këto analiza do të vërtetojë nëse Alla është konsumues droge apo jo dhe përgjigja e saj do të jetë baza e kësaj çështje penale dhe që mund të shtyjë prokurorët të ngrenë akuzë për kryebashkiakun e Bulqizës. Video origjinale është dorëzuar në SPAK nga gazetari Artan Hoxha, i cili dhe e bëri atë publik për mediat. Ekspertimi i videos do kryhet nga ekspertët e laboratorit të policisë shkencore në Ministrinë e Brendshme, ku do të provohet nëse personi që shfaqet me shpinë në video duke pirë kokainë, është ose jo Lefter Alla.

Kryebashkiaku i Bulqizës u paraqit të enjten për herë të parë për të dëshmuar në SPAK para prokurorit të çështjes Ened Nakuçi, ku qëndroi rreth 1 orë e 20 minuta. Pas dëshmisë në SPAK, Alla, i shoqëruar nga avokati i tij Petrit Ismaili, nuk është prononcuar për mediat duke thënë shkurt se çështjen e pezullimit të tij e ka në dorë drejtësia.

Përmes reagimeve të tij publike, Lefter Alla ka mohuar të jetë personi në video, ndërsa akuzon PD për montazh së bashku me një televizion lokal si dhe ka deklaruar se për këtë do të padisë ish-deputetin e Partisë Demokratike Ervin Salianji. Ndërsa në lidhje me rastin deputetët e PS janë shprehur se nëse vërtetohet se është ai në video, atëherë “përgjegjësia është personale”.

Lefter Alla “jep llogari” në SPAK: Pezullimin e ka në dorë drejtësia

Kryebashkiaku i Bulqizës, Lefter Alla për rreth 1 orë e 20 minuta ka dëshmuar para prokurorit të SPAK, Ened Nakuçi lidhur me videon, ku PD e akuzon se është duke konsumuar kokainë në një lokal. Pas përfundimit të dëshmisë, Alla i shoqëruar nga avokati i tij Petrit Ismaili nuk është prononcuar për mediat duke thënë shkurt se gjithçka kishte për të thënë e tha para drejtësisë dhe se çështjen e pezullimit të tij e ka në dorë ajo.

“Do bisedojmë herë tjetër. Do kemi kohë. Sot s’kam komente. Komentet i kam në prokuroi. E ka në dorë drejtësia edhe pezullimin tim nga detyra”, tha Alla ndërsa largohej nga SPAK. Ndërsa avokati i tij, Petrit Ismaili e cilësoi videon një montazh, ndërsa shtoi se Alla nuk ka arsye të japë dorëheqjen nga posti i kryebashkiakut. “Montazh, video nuk duket fare se kush është. Nuk ka arsye të japë dorëheqjen”, u shpreh avokati.

Më herët Lefter Alla ka mohuar të jetë personi në video, ndërsa akuzon PD për montazh së bashku me një televizion lokal si dhe ka deklaruar se për këtë do të padisë ish-deputetin e Partisë Demokratike Ervin Salianji.

SPAK ka nisur një hetim për rastin duke e regjistruar si procedim penal, por nuk është sqaruar se për çfarë vepre penale. SPAK fillimisht duhet të vërtetojë origjinalitetin e videos dhe më pas të vërtetohet nëse personi në të është Lefter Alla, ndërsa një tjetër çështje që sjell edhe më shumë vështirësi në hetime është të konfirmohet nëse lënda ishte kokainë siç pretendohet apo diçka tjetër dhe nëse ajo është mbajtur dhe sjellë nga vetë kryebashkiaku. Në këto kushte, ka shumë gjasa që ky hetim mund të mos sjellë pasoja penale, por nëse vërtetohet që ai është Lefter Lala mund të sjellë përgjegjësi morale të tij si funksionar publik në drejtimin e Bashkisë Bulqizë.

Në lidhje me rastin deputetët e PS janë shprehur se nëse vërtetohet se është ai në video, atëherë përgjegjësia është personale.

Vetë Lefter Alla ka deklaruar se “ishte në dijeni të ekzistencës së këtij video-montazhit rreth një viti më parë por ka besuar se drejtësia do të zbardh të vërtetën”.

Kreu i Bashkisë Bulqizë: Montazh, vazhdim i telenovelës Babale nga PD

Kryetari i Bashkisë së Bulqizës, Lefter Alla ka refuzuar në mënyrë kategorike të jetë ai personi që shfaqet ne video në një lokal duke pirë kokainë. Në videon, që u paralajmërua fillimisht nga Partia Demokratike dhe u publikua më pas nga gazetari Artan Hoxha, pretendohet se në të është kryetari i bashkisë Bulqizë, Lefter Alla.

Përmes një reagimi në facebook, Alla shprehet se ky është një montazh i ulët i krijuar nga Partia Demokratike për ta sulmuar atë politikisht. Alla e cilësoi videon si vazhdim të “telenovelës” Babale, ndërsa tha se ish deputeti demokrat Ervin Salianji do të përballet në gjykatë për akuzat e hedhura ndaj tij.

“Është për të ardhur keq kur një parti që ka bërë histori në këtë vend, një parti që pretendon se është alternativë qeverisëse, e redukton aksionin e vet politik në montazhe e transmetime videosh me Babale. Por, është akoma më kriminale kur kjo parti, e koordinon aksionin e vet politik me grupe biznesi e grupe kriminale, që dikur plaçkisnin pasurinë e Bulqizës me bekimin e Partisë Demokratike. Dhe sot, që Bulqizën nuk e drejton më PD dhe atyre ju është prerë rruga e grabitjes, kthehen të gjithë bashkë në montazhierë për të më shantazhuar mua!

Montazhi që po shfaqin sot është seria e radhës e telenovelës Babale, që si për turp shfaqet në TV me Ervin Salianjin, të njëjtin njeri që sajoi Babalen e që sot është dënuar me burg për mashtrimin e vet në atë telenovelë e do të përballet me gjykatën edhe për këtë rast. Nuk ka shanse që t’ju ecë ky shantazh.

Unë nuk jam në detyrë për të kënaqur orekset e mbushur xhepat e klientëve të PD që për vite me radhë e kthyen Bulqizën në një parajsë për grabitje e ferr për qytetarët. Jam këtu për të punuar për qytetarët e thjeshtë dhe jam krenar që një nga punët më të mira që kam bërë ka qenë largimi i asaj tufe grabitësish që sot montojnë video në SHQUP”, shkruan Alla.