Dialogu, shfaqet Kryemadhi, thumbon Bashën: Lider është ai që sakrifikon për grupin

Monika Kryemadhi është shfaqur publikisht për herë të parë që prej mesit të muajti korrik, ku ndali aktivitetin e saj politik, duke mos komentuar asnjë zhvillim të aktualitetit. Kryetarja e LSI ka marrë pjesë në kampin e të rinjve të LSI, që zhvillohet në Jalë. Ajo ka folur para të rinjve, duke mbajtur një fjalim me doza të ulëta politike, por pa shmangur mesazhet për PD dhe PS. Gjatë fjalës së saj, Kryemadhi u shpreh se ‘këto kanë qenë ditë të vështira’, duke u kërkuar të rinjve ndryshimin e gjendjes.

“Këto ditë kanë qenë ditë të vështira për LSI, për PD, për opozitën, për qeverinë, institucionet. Por ta dini se më shumë po vuajnë shqiptarët. Ne dhe ju si të rinj keni përgjegjësi për të ndryshuar gjendjen. Kjo që po bëjmë është përballë krimit të organizuar ndërkombëtar. Sigurisht që sfida është shumë e vështirë, por forca, idealizmi juaj është shumë më i fortë sesa makutëria e qeverisjes sonë”, tha ndër të tjera Kryemadhi”, u shpreh Kryemadhi.

Ndërkohë, ndër rreshta gjatë fjalimit të saj, Kryemadhi ka përcjell edhe mesazhe për kreun e PD, që deri më tani nuk ka pranuar të dialogojë me qeverinë dhe kryeministrin Rama, për t`i dhënë fund krizës. Kryemadhi, partia e së cilës, por dhe ajo vetë, kanë shprehur qëndrime të kundërta nga Basha pas zgjedhjeve të 30 qershorit, duke kërkuar zgjidhje të krizës nëpërmjet dialogut. Ndaj, në fjalimin përballë të rinjve, Kryemadhi u shpreh se ‘lider është ai që sakrifikon nga vetja për grupin’.

“LSI theu monopolin e dy partive të mëdha. Ne u rritëm me hapa të përditshëm. Kemi kaluar momente dhe sfida të vështira. Lider është ai që sakrifikon nga vetja për shoqërinë dhe grupin. Ky ka qenë misioni i kampit të LSI. Ne kampin e LSI e përmirësuam edhe më tej. Është puna në grup ajo që i jep shansin dhe mundësive njerëzve.”, tha Kryemadhi. Në këtë mesazh, më shumë se sa drejtuar të rinjve, Kryemadhi duket se i tregon Bashës se duhet të ‘sakrifikojë për grupin’. Në fakt, grupi janë të gjitha partitë aleate, që ndryshe nga kreu i PD, kanë kërkuar dialog dhe ulje në tavolinë me Ramën, për t`i dhënë fund krizës politike.

Lëvizja “Basha ik”, Elezi: Harruam zgjedhjet fals të PDSH, pse të mos harrojmë 30 qershorin?!

Kritikët e Luzlim Bashës i kutjojnë përsëri kryedemokratit zgjedhjet e 30 qershorit. Ibsen Elezi, ish-kreu i PD në Kukës, ka shkruar një status në rrjetin social, ku shprehet se “30 Qershori si vazhdim i marrëveshjes së 17 majit”. Në këtë koment, ai vijon duke u shprehur se “demokratët harruan vitin e zi 2017, dhe tashmë do harrojnë 30 qershorin”.

“Mos kini merak, se ashtu si harruam vitin e zi 2017, ashtu do harrojmë edhe 30 qershorin. Harruam 5 skandalet e 2017, marrëveshjen e fshehtë të 17 majit, listën e 140 deputetëve pa asnjë standard, fushatën e shitur 3 javore të “Republikës së Re” dhe të zhdukjes së simboleve të PD, me një humbje katastrofike, moskryerjen e procesit të analizës pas një humbje të rëndë, duke shkelur çdo normë statusore, zgjedhjet fals për kryetar të PDSH dhe manipulimin e turpshëm të pjesëmarrjes. Pse të mos harrojmë dhe 30 qershorin dhe 60 bashkitë e shitura në tavolinë?!”, shkruan Elezi.

Ibsen Elezi, është pjesë e lëvizjes “Basha Ik”, e cila do të fillojë së shpejti dhe ka si synim mbajtjen e zgjedhjeve brenda PD, dhe një proces të thellë analize. Kësaj lëvizje, paralajmëruar nga Realstory.al, i janë bashkuar shumë figura të Partisë Demokratikë, që kanë pasur rol të rëndësishëm dikur, si ish-kryeparlamentarja në kohën që PD ishte në pushtet, Jozefina Topalli, apo ish nr.2 i kësaj partie, Arben Ristani, dhe shumë ish-ministra e deputetë.

LSI kundër Bashës: Kriza zgjidhet me kompromis (shpreson ende te 13 tetori Metës)

Pretendimet e PD për dënimin e Agim Kajmakut në Greqi në vitin 2003, kanë rikthyer dhe njëherë debatin për zgjedhjet lokale. Të paktën, në rradhët e opozitës, është LSI që artikulon mbajtjen e zgjedhjeve lokale dhe parlamentare, në një ditë të vetme. Me anë të një reagimi, ish-deputeti i LSI, Edmond Panariti shkruan se ‘vetëm zgjedhjet e menjëhershme lokale dhe parlamentare”, krijojnë mundësinë për të dalë nga gremina. Sipas Panaritit, zgjedhjet duhet të mbahen ‘brenda afatit kushtetues’, duke u shprehur se ’13 tetori është kushtetues’.

“Sigurisht në afatin më të afërt kushtetues të mundshëm. Trembëdhjetë tetori është afat kushtetues, i dekretuar tashmë. Është datë në fuqi dhe e pa rrëzuar nga gjykatat supreme të vendit. Interpretimte mbi validitetin nuk mundet ti bëjnë partitë dhe politikanët, as komisionet dhe kolegjet zgjedhore, por vetëm ligji dhe kushtetuta. Por koha ecën dhe datat treten. Bashkë me to dhe shpresa për legjitimitet dhe kushtetueshmëri në këtë vend”, shkruan ndër të tjera Panariti.

Pra, sipas ish-deputetit të LSI, 13 tetori është datë kushtetuese pasi nuk është rrëzuar nga asnjë gjykatë supreme në vend. Për kujtesë, 13 tetori është rrëzuar nga gjykata supreme e zgjedhjeve në vend, Kolegji Zgjedhor. Ishte kjo gjykatë që njohu zyrtarisht 30 qershorin pas dekretit të Ilir Metës për të anuluar këtë datë zgjedhjesh, duke i hapur rrugë procesit legjitim sipas kushtetuës. Gjithashtu, 13 tetori vërtetë nuk është rrëzuar si datë kushtetuese e zgjedhjeve, zyrtarisht nga një gjykatë, por e vetmja gjykatë që ka këtë tagër, është Gjykata Kushtetuese.

Ky është vullnet i ndërkombëtarëve, të cilët në mbështetje të rendit kushtetues, duke dalë garant për zhvillimin e zgjedhjeve lokale të 30 qershorit, deklaruan pas këtij procesi, se “ligjshmëria ose jo e zgjedhjeve mund të gjykohet vetëm nga Gjykata Kushtetuese në vend”, u shpreh Matheë Palmer, Zëvendës Ndihmës Sekretari Amerikan i Shtetit, pak ditë pas mbajtjes së zgjedhjeve të 30 qershorit. Pra, 13 tetori, që opozita e njeh si datë kushtetuese, në fakt është një datë normale, ku nuk mund të mbahen zgjedhjet pa pasur një vendim të Gjykatës Kushtetuese për të së pari.

Gjithashtu, rrëzimi i 13 tetorit ka rënë edhe për një arsye tjetër. Po ndërkombëtarët dhe misioni vëzhgues i zgjedhjeve, ODIHR, raportoi sygjeroi pas 30 qershorit, se ‘verdiktin përfundimtar për zgjedhjet do ta jepnin gjykatat në vend”. Në fakt, gjykatat e shkallëve të para në vend njohën dhe vërtetuan mandatet e të zgjedhurve të 30 qershorit, një vendim që u mor si pasojë e vendimit të një gjykate supreme, Kolegjit Zgjedhor, që njohu pikërisht procesin zgjedhor.

Megjithatë, Panariti, ndonëse përpiqet që të promovojë 13 tetorin si datë kushtetuese, ai shkruan se “unë kam bindjen se përsëri mundemi që edhe në “Zeitnot” apo “Last minute” me vullnet dhe kompromis politik, procesi mund të rikthehet dhe të rimerret nga fillimi, duke e futur atë në shtrat kushtetues dhe në afate ligjore, duke garantuar garë, alternativa dhe sidomos besueshmëri dhe gjithë pranim. Tashmë nuk jemi thjesht vetëm ne kushtet e ilegjitimitetit zgjedhor , por ndodhemi të ndotur me kriminalizim madje edhe pa patur konkurrence dhe konkurente”, shkruan Panariti. Nga kjo deklaratë e ish-deputeti të LSI, kuptohet qartë se tashmë kjo forcë politike, ndryshe nga PD, kërkon kompromis për t`u futur në zgjedhje, madje duke mos cituar në asnjë moment dorëheqjen apo ‘zgjedhje pa Edi Ramën’ Kryeministër.

Basha premton ‘dënimin’ e komunistëve, kthen Shqipërinë pas: Jemi në diktaturë

Lulzim Basha ka kujtuar pasditen e të premtes viktimat e regjimeve totalitare, në ditën e kujtesës. Me një shkrim në rrjetet sociale, Basha shprehet se “askush nuk ka paguar një çmim të lartë” për lirinë në Europë, se sa shqiptarët. Ai numëron edhe viktimat e torturave, internimeve apo ekzekutimeve gjatë sistemit komunist në vendin tonë. Sakrifica e shqiptarëve përkthehet në mijëra të ekzekutuar me dhe pa gjyq, për liri, për demokraci, për dëshirën për të ndërtuar një shoqëri të respektit për dinjitetin njerëzor, sipas normave dhe vlerave europiane, për fjalën e lirë, për besimin në Zot. 34,135 shqiptarë janë burgosur dhe dënuar për arsye politike. 59,009 qytetarë u internuan në kampe përqendrimi. 7.022 prej tyre vdiqën prej trajtimit shatazarak. 984 persona kanë vdekur në burgjet e regjimit. 6.027 burra dhe gra, djem dhe vajza u ekzekutuan me dhe pa gjyq gjatë diktaturës. Nga torturat dhe dënimet e kohës, 308 persona kanë humbur aftësitë mendore gjatë qëndrimit në burgjet e komunizmit”, shkruan Basha ndër të tjera.

Duke e cilësuar krimin komunist në Shqipëri, si më të rëndin në Europë, Basha merr tre angazhime, të cilat shprehet se do të miratohen sapo të zgjidhet parlamenti i parë nga zgjedhjet e lira. Sipas Bashës, (30 vjet pas rënies së komunizmit), do të ndalohet dhe kriminalizohen simbolet komuniste.

“Në këtë ditë kujtese, rikonfirmoj në emër të Partisë Demokratike, së bashku me ndjesën që nuk kemi arritur të bëjmë gjithçka nevojitet për nderimin e sakrifices së të përndjekurve politikë, për gjetjen dhe nderimin e eshtrave të të ekzekutuar pa gjyq, vendosmërinë tonë që në Parlamentin e dalë nga vota e lirë do të miratojmë ndër aktet e para: – ndalimin dhe kriminalizimin e simboleve të komunizmit, dhe nderimin për xhelatët e diktaturës, që kanë për qëllim të fshijnë çdo kujtesë të sakrificës dhe rezistencës për liri. – nderimin e viktimave të komunizmit, për të sprapsur revanshin komunist, i cili u rilind dhe u materializua, me vendimin kriminal për të hequr dhe kufizuar dëmshpërblimin për pasardhësit e të ekzekutuarve. – angazhimin ligjor dhe financiar për gjetjen dhe nderimin e të ekzekutuarve pa gjyq që sot janë pa varr dhe eshtrat e të cilëve nuk gjenden”, shkruan Basha.

Në fund, Basha ka shfrytëzuar rastin, duke përdorur ditën e kujtesës së dhimbjes për qindra e mijëra shqiptarë që kanë vuajtur pasojat e rënda të diktaturës, duke bërë plolitikën e ditës. Sipas kreut të opozitës, Shqipëria është sot në një diktaturë të re, që po përdoret për pasurimin e paligjshëm të Edi Ramës. “Drejtësia nuk mund të vijë nga persekutorët e rilindur. Shqipëria është vendosur nën një tjetër diktaturë të krimit. Për pushtetin dhe pasurimin e tij të paligjshëm Edi Rama ka kthyer policinë politike, prokurorinë dhe drejtësinë private dhe burgosjet dhe gjygjet politike. Ndërkohë kriminelët dhe pushtetarët hajdutë janë mbi ligjin gëzojnë pandëshkueshmëri dhe mbrojtje nga Edi Rama. Kjo e keqe do të ndalet me çdo kusht e me çdo çmim dhe shqiptarët e bashkuar do ta fitojnë betejën për vlerat themelore të demokracisë, votën e lirë, dhe nderimin e trajtimin dinjitoz të të përndjekurve politikë dhe të gjithë shqiptarëve të ndershëm”.

Bashës i ‘ikën’ kujtesa: Gjermania mbështeti Metën, Rama donte luftë (po Aurel Bylykbashi?)

Lulzim Basha ka folur në një studio televizive mbrëmjen e të enjtes, duke komentuar aksionin opozitar të shtatë muajve të parë të 2019. Gjatë fjalës së tij, Basha është ndalur te dekreti i Ilir Metës i 10 qershorit, duke u shprehur se pas tij, dekretit, Edi Rama vendosi të zbatonte skenarin e gjakderdhjes më 30 qershor.

“Pas anulimit të zgjedhjeve me dekretin e 10 qershorit, Rama vendosi për skenarin e gjakderdhjes me 30 qershor. Opozita dhe qytetarët iu shmngën me vetëdije të plotë këtij skenari”, shprehet Basha. Por, në fakt, kryedemokrati, akuzon kryeministrin se donte dhunë në 30 qershor, por në harron se ishte ai vetë (para reagimit të SHBA më 27 qershor) dhe drejtues të partisë së tij kujtojmë Aurel Bylykbashin (lexo këtu) në Elbasan, që bëri thirrje për gjakderdhje dhe konflikt civil për të mbrojtur “votën”.

Lexo këtu lajmin exsluziv të publikuar nga Realstory.al, ku qarkorja e PD dhe letra e kryetarëve të bashkive të djathta drejtuar KQZ, tregonin se si do të zbatohej plani anti-zgjedhje i opozitës.

EXCLUSIVE/PLANI I ERRËT KUNDËR ZGJEDHJEVE, NGA QYTETET E DERI NË KQZ!

Në këtë rast, vlen të kujtojmë gjithashtu rastet kur nga Shkodra, Vaun e Dejës, Dibër, Kukës e shumë qytete të tjera të Shqipërisë, militantët e Partisë Demokratike, dogjën dhe shkatërruan materialet zgjedhore. Ishte reagimi i SHBA më 27 qershor, tre ditë para zgjedhjeve, që u shpreh se “nëse PD-LSI bëjnë akte dhune në 30 qershor, do të ndërpresin marrëdhëniet me SHBA”, duke bërë që të tërhiqet opozita nga skenari i dhunës.

Më tej, gjatë intervistës, Basha flet edhe për një reagim të Gjermanisë, ku citon “nga momenti i anulimit të zgjedhjeve kushtetuese, me 10 qershor, ajo që mbeti ishte ose pranimi i këtij realiteti politik, siç bënte thirrje Gjermania me datë 9 qershor ose ecja me kokëfortësi drejt një procesi të paligjshëm, antikushtetues dhe kriminal që Edi Rama vendosi të bënte duke dalë zbuluar para partnerëve, që ishte shkaku dhe burimi i çdo konflikti në Shqipëri për pushtetin e tij”.

Deklarata e Ambasades Gjermane e berë në datë 8 qershor!

Pra në këtë deklaratë, sipas Bashës, Gjermania ka pranuar dekretin e metës të njoftuar më 8 qershor, ditën e protestës së opozitës, për anulimin e zgjedhjeve. Relastory.al bëri një verifikm për të gjetur një deklaratë të tillë, por e vetmja, të paktën në faqen e ambasadës gjermane, është reagimi ish-ambasdores Schutz, e cila i bënte thirrjes opozitës “të shmangte ose të mbante përgjegjësi për aktet e dhunës, duke dënuar dhunën në protestat e mëparshme”. Në fakt, Gjermania dhe të gjitha ambasadat e Quintit, kanë dalë kundër anulimit të zgjedhjeve të 30 qershorit me dekretin e Ilir Metës, duke u shprehur se “duhet të krijohet Gjykata Kushtetuese për të vendosur nëse zgjedhjet ishin ose jo të ligjshme”. /Realstory.al/

SHTOHEN GJERMANËT KUNDËR BASHËS NË BUNDESTAG: JO DHUNË, JO SHTYRJE ZGJEDHJESH

EXCLUSIVE/PLANI I ERRËT KUNDËR ZGJEDHJEVE, NGA QYTETET E DERI NË KQZ!

QARKORJA E DYSHIMTË E OPOZITËS: “TË PRISHEN ZGJEDHJET ME ÇDO KUSHT”. POR PD E MOHON

Rama shpërfill akuzat e opozitës, tregon transformimin e Pukës

Kreyministri Edi Rama, i distancuar prej ditësh nga replikat politike, ka zgjedhur që gjatë muajit gusht të prezantojë punët e qeverisë në nivel qendror dhe lokal. Pasditen e të enjtes, kryeministri ka postuar në llogarinë e tij Facebook, disa foto ku duket transformimi i hapësirës rreth liqenit në qytetin vogël të Pukës. Rama shkruan se ky liqen, nga një vend i rrënuar me ferra, gropa e plehra, tashmë është kthyer në destinacion turistik.

“Ky është liqeni në fund të bulevardit të qytetit të vogël të Pukës. Imazhet aktuale që do t’ju pëlqejnë besoj, s’janë 3D po fotografi nga realiteti i një destinacioni të ri turistik, aty ku deri dje, siç mund ta shihni në fotot e para pak kohe, kishte vetëm rrënim, ferra, gropa e plehra e nuk shkelte askush. Sot, falë Programit Kombëtar të Rilindjes Urbane, në atë qytet mes pyjesh e pejsazhesh fantastike, po ndodh një transformim që vit pas viti, do të tërheqë gjithnjë e më shumë vizitorë vendas dhe të huaj”, shkruan Rama.

Gjatë muajit gusht, shefi i qeverisë ka lënë pas retorikën politike, duke shpërfillur pothuajse çdo akuzë të bërë nga foltorja apo llogaritë në rrjetet sociale të opozitës. Vetëm në rastin e Valdrin Pjetrit, kryeministri reagoi duke shprehur distancimin e tij nga rasti, nëse ai ishte i vërtetë.

Rama është fokusuar te punët e qeverisë në nivele qendror dhe lokal, duke promovuar jo vetëm investimet e programit “Rilindja Urbane”, por edhe aksionet e nisura gjatë verës, ku më i rëndësishmi është ai kundër informalitetit. Megjithatë, opozitës, ndonëse pa replikuar, Rama i është përgjigjur herë pas here edhe me foto të punëve që kanë bërë kryetarët e rinj të bashkive në ditët e para të mandatit të tyre, ku në sy bie aksioni i gjerë i pastrimit në të gjitha bashkitë.

Ndërkohë, edhe këto foto të kreut të qeverisë, erdhën pas disa akuzave të tjera të bërë nga opozita dhe Lulzim Basha mbi ligjin e ri fiskal, që sipas kryedemokratit, Rama “po zhvat biznesin”, duke e rënduar atë me ligjin e ri fiskal.

Foto: Lulzim Basha kthehet nga Holanda, pasi u “zhduk” për ditë të tëra

Gazeta Tema ka publikuar disa foto, ku shkuran se kreu i opozitës Lulzim Basha, “është duke u rikthyer në Shqipëri”, pasi ka qëndruar disa ditë në Holandë.

“Lulzim Basha pasi u zhduk për ditë të tëra dhe postonte statuse vetëm në FB, ka vendosur më në fund të kthehet në Tiranë”.

“Ai është fotografuar në avionin e Amsterdamit, ndërsa bëhej gati për të udhëtuar drejt Shqipërisë. Nuk dihet nëse Basha do të qendrojë për shumë ditë në Tiranë, apo do të kthehet sërish në shtëpinë e tij të dytë në Holandë”, shkruan Tema.

Ditët e fundit, Basha ka rralluar aktivitetin e tij politik në terren, që nisi fill pas përfundimit të zgjedhjeve të 30 qershorit dhe vijoi deri në ditët e para të gushtit, por u ndëpre siduket dhe për shkak të pushimeve dhe të nxehtit. Kryedemokrati ka qenë aktiv në rrejtet sociale, duke publikuar herë pas here denoncime kundër qeverisë.

Ndërkohë, pas sezonit të pushimeve, PD është shprehur se do të rikthehet te protestat, me nisjen e stinës politike dhe jo vetëm, në muajin shtator. Këtë lajm e ka bërë të ditur ish-deputeti demokrat, Aldo Bumçi.

Debati brenda socialistëve të Shkodrës, turpëron PD

Nga Mero Baze

Lulzim Basha ka ripublikuar sot debatin brenda Këshillit Bashkiak të socialistëve në Shkodër, ndërkohë që ishte në shtëpinë e tij në Hollandë. E ka publikuar si një “skandal” për Partinë Socialiste dhe më pas ka nxjerrë dhe përfundime prej saj, duke përfolur njerëz me akuza pa asnjë bazë. Por kjo e dyta është në traditën e tij. Ajo që duhet të jetë e sikletshme për Lulzim Bashën, është pikërisht ai proceverbal mbledhjeje. Për mua ishte gjëja më e mirë që kam lexuar vitet e fundit nga një parti politike. Dhe nuk e prisja që Partia Socialiste në Shkodër të kishte elementë të tillë kaq politikë, kaq kurajozë, kaq të vërtetë dhe kaq të vendosur, për të mbrojtur vlerat e tyre. Nëse ka një ngjarje pozitive për Partinë Socialiste në Shkodër pas gjithë këtyre gjëmave që i kanë ndodhur, është ai procesverbal mbledhjeje.

Aty kupton që partia aty është e vërtetë, është kurajoze dhe shumë politike. Ai procesverbal e nderon Partinë Socialiste dhe Lulzim Basha është personi më i paduhur jo vetëm për ta publikuar atë, por dhe për ta lexuar. Sikur Partia Demokratike në Tiranë, ose një seksion i saj, të kishte aq kurajo sa për të debatuar për gjëmat që i ka bërë Lulzim Basha, siç kanë diskutuar dhe debatuar ata anëtarët e Këshillit Bashkiak socialistë në Shkodër, PD sot do kishte shpëtuar. Sikur Kryesia e PD në Tiranë më 2017, të kishte debatuar si Këshilli Bashkiak i Shkodrës më 2019, Lulzim Basha do ishte shkarkuar nga kryetar partie, pasi ka bërë një pazar me Edi Ramën, ka shkatërruar gjithë listën e PD dhe nuk ka marrë mendimin e askujt për listën e deputetëve.

Sikur kryesia e PD në Tiranë të kishte nivelin e Këshillit Bashkiak socialist të Shkodrës më 2019, kur Lulzim Basha vendosi të djegë mandatet pa asnjë shpjegim, atëhere Lulzim Basha nuk do ishte më kryetar i PD. Por Kryesia e PD në Tiranë uli kokën dhe bëri çfarë u tha Basha, i cili po ashtu bënte çfarë i kërkonte Berisha. Sikur Kryesia e PD së Tiranës, të sillej si Këshilli Bashkiak socialist i Shkodrës, kur Basha vendosi të mos hyjë në zgjedhje dhe t’i lërë demokratët rrugëve, atëhere do kuptohej se ata nuk do t’i bindeshin urdhërit nga lart dhe do hynin në zgjedhje, duke lënë Bashën rrugëve, në vend të PD. Por Kryesia e PD në Tiranë, është vite dritë larg atij Këshillit Bashkiak socialist të Shkodrës.

Ai është një procesverbal që bën krenar PS-në e Shkodrës dhe i jep peshë debatit politik brenda Partisë Socialiste. Por mbi të gjitha, ai bën një diferencë të frikshme me kokuljen e PD para përdhunimit të Lulzim Bashës dhe daljen si delet nga Parlamenti dhe Bashkitë në rrugë, pas dashit të këmborës Sali Berisha. Punë e tyre që janë dele dhe që shkojnë pas tij, por të paktën të mos u kujtojnë njerëzve që ka dhe parti normale që debatojnë dhe mbrojnë idetë e tyre. Procesverbali i këshilltarëve bashkiakë socialistë të Shkodrës, është letër e parekomandueshme për t’u lexuar nga demokratët dhe sidomos nga Lulzim Basha. Thjesht se u kujton ku e kanë katandisur veten dhe partinë e tyre.

Vettingu i politikanëve, si Komisioni i Venecias rrëzoi draftin e Bashës një vit më parë

Të mërkurën pasdite, kreu i Partisë Demokratike Lulzim Basha, publikoi një video, ku rendiste, sipas tij, pesë arsyet pse Edi Rama ka frik nga Vettingu i politikanëve. Sipas kryedemokratit, kreu i qeverisë ka frikë nga vettingu, pasi ‘është i lidhur me kriminelët’. Por, ndonëse drafti për Vettingun në politikë u rrëzua në dhjetor të vitit të kaluar në Kuvend, ishte i pari Komisioni i Venecias që hodhi poshtë draftin e opozitës për këtë project-ligj. Realstory.al sjell në kujtesë të lexuesve, disa nga argumentat, ku Komisioni i Venecias gjeti paqartësi ligjore për Vettingun në politikë.

“Megjithë qëllimin e ligjshëm në situatën aktuale në Shqipëri – distancimi nga ofenduesit dhe ndikimi i tyre në qeverisjen e profilit të lartë dhe jetën politike – drafti i propozuar kushtetues për kontrollin e integritetit të politikanëve nuk arrin të ofrojë udhëzime të përshtatshme dhe masat mbrojtëse të nevojshme, madje edhe në nivelin kushtetues, për një shkallë të tillë të madhe, komplekse dhe të ndjeshme, me implikime të rënda për të drejtat e atyre që i nënshtrohen. Sa i përket konceptimit të tij aktual, vetingu i propozuar nuk ka qartësi ligjore dhe siguri ligjore, si për sa i përket qëllimit të tij, arsyet për moszgjidhje dhe humbjen e mandatit, dhe mekanizmin e zbatimit të tij. Në shumë aspekte, ai gjithashtu ngre çështje të proporcionalitetit”, shkruhej në pikën e parë të konkluzioneve të raportit të opinionit të Komisionit të Venecias.

Më tej, Venecia ngrite dyshime dhe paqartësi mbi disa temra juridik të përdorur nga PD në draftin e ligjit për Vettingun e politikanëve, ndërsa tregonte se disa dispozita ligjore krijonin mundësin e mosbzatimit të procesit të rregullut e të duhur ligjor. “Projektligji nuk arrin të përcaktojë elemente të caktuara kryesore, veçanërisht (i) se çfarë nënkuptohet pasja e kontaktit me persona të caktuar (ii) çfarë nënkuptohet me përfshirje në krimin e organizuar dhe (iii)çfarë nënkuptohet me përfshirje në rrethin e subjekteve që kanë kontakte me personal. Është e paqartë se cilat dispozita duhet të udhëheqin procedurën e verifikimit. Mungesa e deklaruar (përveç kërkesës për një shumicë prej 3/5) në një propozim që gjithsesi në disa vende janë mjaft të detajuara, së bashku me futjen e propozuar të dy dispozitave kryesore në Kushtetutë si “masë e jashtëzakonshme” krijojnë mundësinë e moszbatimit të procesit të rregullt, të duhur ligjor, pra që procedurat të mos zbatohen”, shprehej Komisioni i Venecias.

Një tjetër dyshim i rëndësishëm sipas Venecias, ishte dhe fakti se kush do të kryente verifikimin e zyrtarëve publikë dhe kandidatëve zgjedhorë, duke shprehur opinionin se në këto ‘aspekte siguria ligjore mungon’. “Nuk është e qartë se kush do të kryejë verifikimin e zyrtarëve publikë dhe kandidatëve zgjedhorë dhe nëse kjo do të bëhet nga një organ gjyqësor ose një organ tjetër i pavarur. Gjithashtu, nuk është e qartë nëse çdo skualifikim duhet të jetë i përhershëm ose i kufizuar në kohë. Në këto aspekte siguria ligjore mungon. Përveç kësaj, nuk janë propozuar masa mbrojtëse për të shmangur rrezikun që do të përdoret në një politikisht i njëanshëm ose arbitrar”.

Drafti i propozuar nga opozita për Vettingun e politikanëve, binte poshtë edhe në disa pika të tjera, sipas Venecias, ku ndër to ishte mungesa e parashikimit të një vendimi gjyqësor, për të kufizuar të drejtën e personave për t`u përfshirë në proceset zgjedhore. “Në kërkesën e tij për zyrtarët e zgjedhur, projektligji nuk është në përputhje me Nenin 3 të Protokollit të Parë të KEDNJ-së dhe Kodi i Praktikës së mirë në çështjet zgjedhore, si terreni i propozuar i ri – duke pasur kontakte me persona të përfshirë në krimin e organizuar- ofron një mundësi shumë të gjerë për të kufizuar të drejtën për të qëndruar në zgjedhje pavarësisht nga natyra e “kontakteve”, nuk parashikon një vendim gjyqësor ose një vendim nga një tjetër organi i pavarur për heqjen e lirisë dhe kufizimit nuk ka një natyrë të përkohshme. Siç duket, propozimi në të vërtetë mund të çojë lehtësisht në më shumë shembuj të abuzimit me pushtetin”.

Dhe në fund, për shkak të këtyre paqartësive, Komisioni i Venecias shprehej se gjithçka i mbetet në dorë Parlamentit dhe politikës shqiptare për të gjykuar dhe vepruar, duke ndjekur rrugën e dialogut konstruktiv. “Për më tepër, merren parasysh dispozitat ekzistuese të neneve 6/1, 45 (3) dhe 179 / a të Kushtetutës së Shqipërisë dhe të legjislacionit përkatës zbatues (në veçanti Ligji për Dekriminalizimin), si dhe mekanizmat e tjerë demokratikë në dispozicion, ligjet e shtuara vlera e amendamenteve të propozuara kushtetuese mund të vihet në pikëpyetje. I përket Parlamentit shqiptar të vendosë për hapat e ardhshëm në lidhje me propozimin ndryshimet kushtetuese, përmes dialogut konstruktiv midis të gjitha forcave politike dhe të shoqërisë në përgjithësi, në interes të demokracisë shqiptare”, thuhej në disa prej pikave të konkluzioneve që arrinte Komisioni i Venecias për ligjin e Vettingut në politikë, që propozoi PD një vit më parë. /Realstory.al/

FACT CHECKING/ BASHA: VETTING PËR TË HETUAR POLITIKANËT, POR GABON (HARRON QË PO KRIJOHET SPAK)

Kulluri ngre pyetjen: A luftohen gënjeshtrat e Ramës me të Bashës, apo varja të vërtetës?!

Partia Demokratike është shfaqur shpesh si mbajtës e ‘flamurit të së vërtetës’, teksa ka denoncuar raste të korrupsionit qeveritar. Në këtë linjë, PD ka ‘shitur’ si të vërteta edhe disa deklarata të bëra nga Martin Hënze, një lobit gjerman, të cilin Selia Blu e quan herë si ‘këshilltar të Anglea Merkel’, kancelares gjermane, dhe herë si ‘eskpert i CDU’, partisë së kancelares (lexo shkrimin në Realstory.al).

Duke u nisur nga ky fakt, që Martin Hënze nuk është as këshilltar dhe as ekspert i Merkel dhe CDU, ish anëtari i Këshillit Kombëtar të Partisë Demokratike, Edvin Kulluri, pjesë e lëvizjes “Basha ik”, ka ironizuar me kryedemokratin duke ngritur pyetjen, “nëse luftohen gënjeshtrat e Ramës me ato të Bashës”.

Duke iu drejtuar disa gazetarëve dhe aktivistëve të djathtë, Kulluri shkruan: “Martin Hënze sipas mediave dhe bashkëpunëtorëve pranë Bashës citohet njëherë si kryekëshilltar i Kancelares Merkel e pastaj “zyrtar i CDU”. Ndërkohë nja dy media kanë cituar burime zyrtare dhe persona pranë CDU që konfirmojnë se zotëria në fjalë nuk është as krye as këshilltar i Kancelares apo i ndonjë organi drejtues të CDU!”.

“Mund të jetë lobues ose ekspert i pavarur. Tani nëse kjo e mediave është e vërtetë, a luftohet gënjeshtra e Ramës me një gënjeshtër të mediave dhe njerëzve të Bashës?! Apo mjafton që të jetë Basha me shokë në pushtet po varja të vërtetës?! Se jemi dhe në mes të luftës dhe e vërteta ka rëndësi”, shkruan Kulluri duke ironizuar Lulzim Bashën.