Opozita i bën dalje Metës. Mediu: Dialog me Ramën (dhe ndërkombëtarët)

Pas sulmeve që Ilir Meta bëri ndaj opozitës, duke u shprehur se në protestat e saj ‘do të tentohej të digjej parlamenti’, Partia Demokratike dhe aleatët, po japin sinjale të thellimit të krisjes me kreun e shtetit, të cilin në fakt deri pak kohë më parë e shihnin si garantin e ‘unitetit’ kombëtar. Në një intervistë në një studio televizive, kryetari i Partisë Republikane, Fatmir Mediu, është shprehur se opozita duhet të dialogojë me mazhorancën, duke thënë se ‘institucioni i opozitës duhet të ulet me institucionin e mazhorancës’.

“Opozita duhet të kërkojë dialogë me mazhorancën. “Rama ik” patjetër, sepse është simbol i së keqes. E lidhim politikën thjesht me individ. Përgjegjësia ka një hierarki, asnjëri nuk është i imunizuar nga e keqja. Këta kanë një përgjegjësi më të madhe se personat e tjerë. Në Shqipëri, pushteti nuk është më institucional, por i liderëve partiak. Institucioni i opozitës duhet të ulet me institucionin e mazhorancës, me faktorin ndërkombëtar. Historia ka treguar që në momente të vështira është gjendur zgjidhje. Duhet ta mendojmë më afatgjatë zgjidhjen”, shprehet Mediu.

Më tej, ai ka shtuar se dialogu i opozitës me mazhorancën duhet të bëhet nëpërmjet partnerëve ndërkombëtarë. “Kemi nevojë për partnerët ndërkombëtar, se çfarë bëjmë ne janë edhe kërkesa të tyre. Në këtë pikëpamje, Komisioni Europian, SHBA dhe OSBE-ODIHR kanë shpallur interes për dialog, por nuk mund të vijnë kur ne sot jemi pjesë e një sherri. Nuk heq dorë se sa më shpejt të largohet Rama, aq më mirë, por s’e kam në dorë. Unë duhet të shikojë interesin e vendin. Nëse opozita do marrëdhënie me qytetarët dhe ndërkombëtareve, duhet të lërë indinjatën”, tha Mediu.

Në fakt, Ilir Meta nuk ngurroi të sulmonte përsëri ndërkombëtarët të mërkurën pasdite gjatë një konference për shtyp. Akuzat ishin të rënda, aq sa kreu i shtetit i cilësoi ndërkombëtarët se ‘po mbajnë Shqipërinë në situatë ngërçi’. Ndërkohë, fakti që aleatët e Bashës, dhe vetë kryedemokrati është shprehur më herët, se zgjidhja e krizës duhet të bëhet me ndërmjetësimin e ndërkombëtarëve, është dhe një përgjigje ndaj Ilir Metës për deklaratën e tij të një dite më parë, ku fajësoi ndërkombëtarët si përgjegjës për krizën politike në vend.

Fact Checking/ Metamorfoza e Metës, në 2 muaj 20 sulme ndaj ndërkombëtarëve

Kushdo që e dëgjon tani presidentin Meta i duket shumë larg figurës së tij të dikurshme kur sa herë që dilte në media thoshte sloganin e famshëm “me qetësi e dashuri”. Nga një kryetar Kuvendi që të paktën në media kishte krijuar imazhin e një politikani të qetë dhe kontribuues, në rolin e presidentit Meta ka pësuar një metamorfozë. Përveçse ka marrë rolin e drejtuesit të opozitës, gjë që faktoi me mesazhin e së enjtes përmes të cilit shigjetonte hapur Bashën, Meta ka dalë hapur dhe ka sulmuar ndërkombëtarët në të paktën 20 raste.

Realstory ka bërë një verifikim për të gjitha sulmet e tij ndaj BE dhe SHBA, ku rezulton se brenda një kohe prej gati dy muajsh, Meta ka bërë 20 deklarata të forta ndaj faktorit ndërkombëtar por edhe misioneve ONM dhe EURALIUS për Reformën në Drejtësi.

Sulmet e para ai i filloi më 18 qershor, tetë ditë pas nxjerrjes së dekretit për anulimin e zgjedhjeve të 30 qershorit, në një konferencë për shtyp, ku doli kundër OSBE dhe ndërkombëtarëve, të cilët kërkuan respektimin e datës së zgjedhjeve brenda afateve kohore duke treguar se njohin 30 qershorin dhe jo dekretin e tij për anulimin e zgjedhjeve. Me një ton të ashpër, Meta i quajti ato ngatërrestarë dhe tha se është ai përgjegjësi për stabilitetin e vendit. “ Kush ka dëshirë të kontribuojë me ngatërresa, jemi lodhur me disa prej tyre. “ u shpreh Meta. Por këto sulme nuk u ndalën këtu, por vijuan të shtoheshin dhe ashpërsoheshin akuzat ndaj tyre. Më 24 qershor Meta e cilësoi kuintin e ambasadorëve si një “fondacion ndërkombëtarësh” pasi ato nuk njohën dekretin e tij dhe janë përgjegjës për krizën në vend. Një ditë më pas më 25 qershor gjatë një konference për shtyp Meta i sulmoi ata sërish për mosnjohjen e dekretin e tij për anulimin e 30 qershorit duke u treguar se ai nuk kishte anuluar zgjedhjet as në Itali dhe as në SHBA, por në Shqipëri, ku ishte president vetë dhe vendoste po vetë.” Në Shqipëri i vetmi institucion që vendos për datën e zgjedhjeve është Presidenti i Republikës. Unë nuk kam anuluar zgjedhjet as në Itali, as në Amerikë dhe as në Kinë.”

Por sulmet nuk ndalën këtu, më 26 qershor, me një ton të ashpër gjatë takimit që zhvilloi me Ministrin e Jashtëm të Hungarisë, Peter Szijjarto, kreu i shtetit i cilësoi ndërkombëtarët përgjegjës nëse do të ketë konflikt në vend. “Çdo veprim drejt rrugës së paligjshmërisë dhe të konfliktit, e nxjerr Shqipërinë nga perspektiva e saj europiane e njëkohësisht të gjithë aktorët e brendshëm ose të jashtëm që i kontribuojnë këtij skenari, do të mbajnë përgjegjësi përpara popullit shqiptar”, shprehej Meta. Një ditë pas dekretimit të zgjedhjeve të reja më 13 tetor, më 28 qershor Meta nuk e uli sulmin e tij, por këtë herë zgjodhi të flasë përmes ish-vartësit të tij, Ylli Manjani me një ripostim të statusit të tij në Facebook, i cili deklaron se të vetmit që përfitojnë dhe kënaqen nga dhuna janë “ndërkombëtarët të cilët “fërkojnë barkun.” por që në “në fakt duhet të kenë turp””. Një ditë pas 30 qershorit, ku Meta u fut në histori si presidenti i parë që nuk voton, më 1 korrik ai sërish zgjodhi të sulmonte dhe fliste përmes Manjanit me ripostimin e statusit të tij në Facebook ku shkruante “Shumë faleminderit ambasadës se USA për deklaratën mbi votimet një partiake. Si gjithmonë edhe këtë herë, nuk ngurroi t’ja fuste kot! “

Meta zgjodhi të fliste me 2 korrik në konferencën e tij të famshme ku sulmet përfshinë këdo, veçanërisht të huajt, deklarata të cilat për shumicën u cilësuan si “të çmendura”. Meta bëri disa akuza dhe deklaratat të paarsyeshme, madje duke shpallur edhe zgjedhje presidenciale në një Republikë parlamentare. Meta akuzoi ndërkombëtarët se po punojnë për interesat e Ramës madje duke i akuzuar edhe për “Deep State” që synon një “total state capture” (kapje të plotë të shtetit) në Shqipëri. “I kam bërë të qartë zotit Basha, Kryemadhit dhe mikut tim doktorit të mos bien pre e provokimeve të një grupi të strukturuar PPPd, që punon sipas parimeve të Deep State që synon kapjen e shtetit. PPPd do të thotë, Politikanët, Propaganda, Policia (Rrugët policeske që ndiqen për të shantazhuar sipërmarrës, gazetarë, opozitarë, qytetarë) dhe d e vogël diplomatë që kanë braktisur parimet perëndimore dhe raportojnë sipas qejfit të Ramës”, deklaroi Meta. Në këto akuza ai nuk kurseu as miliarderin George Soros, të cilin e akuzoi për “Deep State” duke i thënë se “Ilir Meta nuk është i racës së Gruevskit është presidenti i vendit dhe i del për zot vendit, Jam i racës së tipit Avni Rustemi, Mic Sokolit, Vojo Kushi”.

Më 3 korrik zgjodhi të sulmojë reformën në drejtësi, jo pak po 5 herë brenda 12 orëve. Filloi me një sulm mëngjesin e 3 korrikut përmes një postimi në Facebook dhe më pas përfundoi me letrën drejtuar Naureda Llagamit, kryetaret të këshillit të lartë gjyqësor. Si në postimet e tij në Facebook ashtu edhe në letrën zyrtare drejtuar KLGJ-së, Meta sulmon ashpër EURALIUS, ndërkombëtarët e misionit të BE, që janë marrë posaçërisht me hartimin dhe zbatimin e Reformës në Drejtësi, ku sipas presidentit zgjidhjet provizore të propozuara nga misioni ndërkombëtar i BE-së janë në shkelje të Kushtetutës. “Për sa i takon pjesës së opinionit të “EURALIUS V” (që rekomandon një skemë delegimi të gjyqtarëve të përkohshëm në Gjykatën e Lartë deri në emërimin e anëtarëve të përhershëm të saj) presidenti vëren se ky propozim cenon kompetencat kushtetuese të Presidentit të Republikës” – thuhet në deklaratat e tij të shumta atë ditë duke e cilësuar Reformën në Drejtësi si “Ramaformë”. Sigurisht që po atë ditë nuk i munguat sulmit as ambasadori i BE-së, Luigi Soreca duke e akuzuar se ai ishte ai “realisht për nxitjen e dialogut mes palëve?” dhe shefja e ONM, Genoveva Calavera për Reformën në Drejtësi. Më 5 korrik sërish duke e sulmuar Calaverën dhe ndërkombëtarët Meta tha se nuk i trembët SPAK dhe Reformës në Drejtësi duke treguar se sapo kaloi Spaçin. Mospranimi i zgjedhjeve të reja më 13 tetor si nga ndërkombëtarët dhe vetë aktorët politik të skenës shqiptare, duket se nuk e lanë presidentin të pushonte i qetë. Më 8 korrik ai lajmëroi një tjetër konferencë, që sa vijnë e bëhen më të shpeshta, sërish duke sulmuar aleatët e Shqipërisë dhe akuzuar ato për njëanshmëri në lidhje me zgjedhjet. “Presidenti i fton të gjithë të mos thellohen në rrugën e paligjshmërisë, njëanshmërisë dhe konfliktualitetit .”

Ditën e 16 korrikut, Presidenti Meta e nisi sërish me një status në Facebook duke sulmuar Reformën në drejtësi apo “Ramaformën” nuk kurseu aspak sulmet e ashpra për përfaqësuesit e misioneve OPDAT, USAID, ONM dhe EURALIUS se nuk i kishin ardhur presidentit në dy takime në 2017 dhe 2018 për mbledhjen e KED dhe plotësimin e vakancave në Gjykatën Kushtetuese. “Pra ekspertiza e BE-së (EURALIUS) dhe Delegacioni i BE-së, e “braktisën” këtë iniciativë të Kreut të Shtetit.” – shkruan Meta. Gjatë një vizite në Xhafzotaj të Shijakut, vetëm dy ditë më pas, më 18 korrik,Meta sulmoi sërish ndërkombëtarët duke përdorur shprehjen se ato mund të “bëjnë edhe gomarin të fluturojë”, por kjo nuk ndodh në Shqipëri. “Le të thotë kush të dojë e çfarë të dojë, çdo shqiptar e çdo ndërkombëtar se gomari fluturon! Ne mund t’i themi se kjo mund të ndodhë në art, mund të ndodhë në ëndërr e mund të ndodhë në piktura, por ne e dimë që gomari, të paktën këtu në Shqipëri nuk është shqiponjë që të fluturojë!”

Edhe pse u duk sikur ra për disa ditë në qetësi dhe shkoi me pushime në Gjirin e Lalzit ku nuk mungonin dhe foto e tij me rroba banjo duke përshëndetur qytetarët, Presidenti Meta u shfaq sërish me sulmet e tij pas dorëzimit të kërkesës në Gjykatën Kushtetuese për shpalljen antikushtetues të ligjit për shembjen e godinës aktuale të Teatrit Kombëtar. Më 24 korrik, nga dera e Gjykatës Kushtetuese, në një deklaratë për mediat, kreu i shtetit foli për““rilindës lokalë” dhe ‘rilindës ndërkombëtarë” që e lanë vendin pa Gjykatë Kushtetuese duke shtuar do të marrë fund njëherë e mirë sundimi i oligarkëve. “Më 30 korrik, presidenti doli në një konferencë për shtyp, që u dukë sikur do të ishte e fundit me nisjen e pushimeve për institucionet dhe administratën, por nuk ishte kështu. Meta tha se do të vijonte konferencat për të bindur palët që 13 tetori është data e zgjidhjes së krizës në vend. Ndërsa nuk harroi të përmendte edhe ndërkombëtarët duke thënë se ato janë bërë palë me Ramën për të krijuar “Ramaformën”. “Siç ka shqiptarë të ndryshëm ka dhe ndërkombëtar të ndryshëm”, ndërsa tha se për integrimin e vendit nuk keni pse pyesni “ndërkombëtarët pasi ato janë me një “mandat të limituar”, por të pyesin atë vetë, pasi është marrë me këtë proces gjatë gjithë karrierës së tij politike.”

Katër ditë më pas, më 3 gusht Presidenti Meta ka shtuar dozën e sulmit kundër SHBA-së duke akuzuar zëvendës ndihmës sekretarit amerikan të shtetit, Mathew Palmer për “njëanshmëri” “Pas një terapie me ujë bore, më lindi një pyetje që dua ta ndaj me ju, dhe që u drejtohet atyre të cilët bëjnë si të paanshëm, pasi kanë shkëlqyer me njëanshmërinë e tyre, duke ia kaluar dhe Kryeministrit tonë, i cili në fund të fundit përfaqëson një anë politike”. Më 5 gusht duket se shënohet edhe sulmi i fundit i Metës ndaj ndërkombëtarëve me dekretimin e dy ligjeve njëri prej të cilëve “ndryshimet për statusin e gjyqtarëve dhe prokurorëve” edhe pse Meta i vlerësoi ndryshimet nuk hezitoi të akuzonte EURALIUS se “për shkak të nxitimit të tyre dhe mosgjykimit në mënyrë të thelluar nuk e hartuan në mënyrën e duhur ligjit që në fillim.”

Sulmet e presidentit Meta gjatë gjithë kësaj kohë kanë qenë të paprecedentë, të forta dhe të ashpra, por duket se ditët e fundit po fokusohet në një tjetër rol, atë të drejtimit të opozitës duke lënë në hije dhe mënjanuar Bashën. /RealStory.al

Haradinaj apel aleatëve: Ndalni presionin ndaj Kosovës

Ramush Haradinaj ka bërë një deklaratë të fortë duke u kërkuar ndërkombëtarëve të ndalin trysninë dhe presionin që i bëjën Kosovës për heqjen e taksës, duke etiketuar drejtpërdrejtë SHBA dhe BE.

Haradinaj tha se kërkon një drejtpeshim të trysnisë së bashkësisë ndërkombëtare ndaj Kosovës dhe Serbisë, duke argumentuar se i është detyruar të jap dy herë dorëheqje për t’u përballur me drejtësinë ndërkombëtare, ndërkohë që shqetësime të tilla nuk i kanë udhëheqësit aktual serb, që ishin pjesë e regjimit të Slobodan Millosheviçit.

Haradinaj, gjatë intervistës për Zërin e Amerikës, konfirmoi qëndrimin e tij se kufijtë e Kosovës nuk janë të diskutueshëm dhe se tarifa do të hiqet deri kur të ketë një njohje reciproke nga Serbia. “Këto qëndrime janë reale dhe vazhdoj t’i paraqes si këtilla dhe kërkoj prej bashkësisë ndërkombëtare, aleatëve tanë, që ta ndalin presionin e padrejtë mbi Kosovën sikur për tarifat po ashtu edhe tema tjera për shkak se nuk është në rregull të pranohen kushtet e Serbisë për dialog për shkak se ofendohet pala, në këtë rast që jemi ne viktimë.” – tha Haradinaj

Zëri i Amerikës: Që nga dorëheqja juaj është diskutuar për mundësinë e një lidhjeje ndërmjet thirrjes për t’u paraqitur në Hagë dhe qëndrimeve tuaja politike rreth tarifave ndaj mallrave serbe. A shihni ju ndonjë lidhje të tillë?

Ramush Haradinaj: Do të thotë unë e kam kryer obligimin ligjor si rezultat i një ftese për t’u paraqitur si i dyshuar në bisedë hetuese. Kam dhënë dorëheqje prej kryetarit të qeverisë dhe vetvetiu kjo ka ndikime politike ftesa, duke pasur parasysh faktin se unë kam qenë dy herë në procese gjyqësore dhe ja kam dhënë mundësinë drejtësisë ndërkombëtare që ta shqyrtoj atë periudhë, periudhën e luftës në tërësi. Jam mjaft i habitur me këtë ftesë. Ka plot dyshime në Kosovë se mund të jetë një konspiracion, por ajo që mund të konfirmoj është që besoj në ato qëndrime politike që i kam shprehur në mënyrën më të sinqertë ndaj partnerëve ndërkombëtarë e që është pra; kufijtë e Kosovës nuk janë të diskutueshëm dhe nuk bën të diskutohet për territorin dhe kufijtë, marrëveshja me Serbinë duhet të arrihet për njohje reciproke në kufijtë ekzistues sepse për Kosovën është e papërballueshme një krijesë si Dodik Republikë sepse na e bjen Rusinë në Kosovë dhe njëkohësisht tregtia e lirë pra duhet të jetë e arritur me njohje edhe tarifa hiqet me njohje. Këto qëndrime janë reale dhe vazhdoj t’i paraqes si këtilla dhe kërkoj prej bashkësisë ndërkombëtare, aleatëve tanë, që ta ndalin presionin e padrejtë mbi Kosovën sikur për tarifat po ashtu edhe tema tjera për shkak se nuk është në rregull të pranohen kushtet e Serbisë për dialog për shkak se ofendohet pala, në këtë rast që jemi ne viktimë. Imagjinoni unë jam kryetar qeverie. Thirrem për të dytën herë për të dëshmuar para një gjykate ndërkombëtare. E kam dhënë dorëheqjen njëherë e kam dhënë dytën herë, ndërsa në anën tjetër është zoti (Aleksandër) Vuçiç që ishte ministër i zotit (Slobodan) Millosheviç dhe dihet që regjimi i Millosheviçit çfarë krime ka kryer në Ballkan jo veç në Kosovë por edhe në vende tjera edhe ai nuk ka shqetësime të asnjë natyre. Pra kjo dëshmon një disbalanc të logjikave të presionit të bashkësisë ndërkombëtare e që duhet të korrigjohen sa më shpejt.

Zëri i Amerikës: Kur flisni për aleatët, cilët po bëjnë trysni?

Ramush Haradinaj: Mendoj në Shtetet e Bashkuara të Amerikës dhe Bashkimin Evropian.

Lexoni këtu intervistën e plotë.

Opozita po lufton “30 qershorin” e amerikanëve, me armët e… amerikanëve

Të enjten pas mesdite, Voltana Ademi kryebashkiakja e Shkodrës, në cilësinë e Kryetares së Shoqatës së Bashkive, regjistroi pranë Gjykatës Kushtetuese padinë për “Konstatimin e antikushtetues të procesit zgjedhor të 30 qershorit, si dhe verifikimin e kushtetueshmërisë së veprimtarisë së partisë Bindja Demokratike në lidhje me regjistrimin e saj në gjykatë dhe zgjedhjet e 30 qershorit 2019”. Ky është veprimi i fundit i strategjisë së re, që po ndjek opozita për të zhvleftësuar “30 qershorin” dhe votimet e asaj dite.

Partia Demokratike e Lezhës ka depozituar një padi në prokurori, përmes të cilës ka paditur KQZ, komisionerët dhe numëruesit e PS, të cilët organizuan sipas saj “zgjedhje në kundërshtim me dekretin e presidentit”. Si bazë për ngritjen e kësaj padie, dega e PD në Lezhë ka përdorur dekretin e 10 qershorit të Ilir Metës, që anuloi datën 30 qershor si ditën e mbajtjes së zgjedhjeve.

Monika Kryemadhi e paralajmëroi këtë një ditë më herët nga Berati, duke kërkuar ndjekje penale për anëtarët e KQZ.

Sekretari i Përgjithshëm të PD, Gazmend Bardhi, disa ditë më parë, u kërkoi gjykatave që të cilësonin anti-kushtetues procesin zgjedhor të 30 qershorit. Bëhej fjalë për përdorimin e një teknikaliteti të Kodit Zgjedhor, sipas të cilit mandati i bashkiakëve i marrë nga KQZ, merrte një certifikim formal edhe në gjykatat e shkallëve të para. Disa gjykata në vend konfirmuan mandatin e disa të zgjedhurve vendor, duke nisur me kryebashkiakun e ri të Elbasanit, Gledian Llatja, atë të Librazhdit, Kavajës, Cërrikut.

Por ky formalitet u bë një realitet i hidhur politik për disa prej të zgjedhurve vendorë të 30 qershorit. E para viktimë ishte bashkiakja e re e Durrësit, mandati i së cilës u pezullua nga gjykata e shkallës së parë në Durrës, nga një gjykatëse që pritet të ketë probleme me Vettingun dhe që bashkëshortin e saj, e kishte protestues të rregullt gjashtëmujor të opozitës. Gjykatësja Margjeka e argumentoi vendimin e saj bazuar mbi atë që ajo e quan ‘regjistrimin jashtë afateve ligjore të partisë Bindja Demokratike në zgjedhjet e 30 qershorit’. Ky vendim u mirëprit nga PD dhe aleatët e saj në opozitë, të cilët tashmë e përdorin këtë si argument “se 30 qershori ka qenë i paligjshëm”.(Lexo lajmin në Realstory.al).

Në fakt vendimi i saj ishte absurd, pasi në Gjykatë nuk kishte asnjë kërkesë padi me këtë objekt, ndërkohë që KQZ dhe më pas Kolegji Zgjedhor e kishin rrëzuar kërkesën e Partisë Demokratike më herët në qershor. Kujtojmë se Kolegji Zgjedhor është Gjykatë Apeli pa rekurs dhe vendimet e saj janë të formës së prerë dhe me siguri apelimi që do ti bëjë fituesja Sako, do të miratohet prej gjykatës së shkallës tjetër në Durrës. Por nuk është këtu thelbi i kësaj që po ndodh këto ditë me Partinë Demokratike.

Pas Durrësit, Gjykata e Tiranës vendosi të shpallte moskomptencë për dhënien e mandatit të kryebashkiakut të ri të Vorës, Agim Kajmaku. Në këtë rast, Gjykata e Shkallës së Parë në Tiranë, e dërgoi kërkesën e Kajmakut në Gjykatën Administrative, [ka teorikisht do të thotë se edhe Kamza, Paskuqani, Rrogozhina por edhe Tirana e Madhe, do të përcillen në këtë Gjykatë. Të mërkurën, Gjykatës së Tiranës iu drejtua dhe Erion Veliaj me një kërkesë për vërtetimin e mandatit. Me gjasë e gjithë kjo procedurë do të hajë kohë, duke zgjatur kështu rrezikshëm konfirmimin e bashkiakëve të ri, sa më shumë afrohet 10 gushti, që sipas ligjit, është dhe afati i fundit ligjor i qëndrimit të bashkiakëve të vjetër në zyra.

Burime nga Partia Socialiste thonë se “nuk presin probleme në më shumë se 10 bashki”, por realiteti nuk duket aq optimist.

Procesi ligjor i PD për mosnjohjen e 30 qershorit, nisi më herët, në Komisionin Qendror Zgjedhor. Pas certifikimit të rezultati për kandidatët, KQZ nisi certifikimin dhe shpërndarjen e mandateve për këshilltarët. Por nëse për kandidatët KQZ e miratonte rezultatin me shumicë të thjeshtë, për këshilltarët, sipas Kodit Zgjedhor, duhet shumicë absolute e votave të anëtarëve të KQZ. Në këtë pikë, opozita ka shfrytëzuar “kartën” Klement Zguri, për të bllokuar shpërndarjen e mandateve për këshilltarët në këshillat bashkiakë.

Fakt është se Zguri ka votuar kundër në këtë proces, duke detyruar Partinë Socialiste të drejohet në Kolegj Zgjedhor (lexo këtu lajmin në Realstory.al) për kërkuar shpërndarjen e mandateve. Po përse janë të rëndësishëm mandatet e këshilltarëve? Që kryetari i ri i bashkisë i zgjedhur në 30 qershor, të fillojë punën zyrtarisht, duhet të betohet përpara këshilltarëve bashkiakë, pasi këshillat e rinj të konstituohen. Dhe nëse Kolegji punon ditë e natë, 61 paditë do të kërkojnë me gjasë kohë, përtej datës 10 gusht. Pas kësaj date, nga Erion Veliaj e deri te Voltana Ademi, duhet të lënë zyrën, i pari, nëse nuk certifikohet nga gjykata dhe betohet para këshilltarëve, e dyta sepse do të shtonte akuzën e gjashtë penale mbi supet e saj.

Dhe në kohën që Presidenti dhe Basha luajnë në distancë (i pari, duke i kërkuar Ramës të negociojë, qoftë dhe mbi 13 tetorit, dhe i dyti duke luajtur “hapa dollapa” me tezën “Rama Ik”), tashmë askush nuk mund të akuzojë PD për taktikën e saj të re: ajo po shfrytëzon mish mashin e krijuar nga vakumet e reformës në drejtësi dhe cirku presidencial me dekretet dhe afatet, për të justifikuar para ndërkombëtarëve se po ndjek këshillën e tyre: atë institucionale të kontestimit të zgjedhjeve.

Tre ditë para zgjedhjeve të 30 qershorit, Zëvendës Ndihmës Sekretari Amerikan i Shtetit, Mathew Palmer, duke i bërë thirrje opozitës të hiqte dorë nga aktet e dhunës, u shpreh se 30 qershori mund të kontestohej vetëm në rrugë gjyqësore dhe institucionale, pasi çdo rrugë tjetër do të ishte i papranushëm nga ndërkombëtarët. Sigurisht ai foli në kontekstin e gjykatës kushtetuese, por kjo duket pak rëndësi ka për opozitën. Përfaqësues të saj shpesh i janë referuar këto ditë deklaratës një ditë më pas 30 qershorit të Audrey Glover. E pyetur nga gazetarët nëse do t`i certifikonte zgjedhjet, u shpreh se kjo ishte “kompetencë e institucioneve në vend”.

Nuk dihet kush e ka sugjeruar këtë strategji të re të opozitës, e cila njëkohësisht e rikthen atë në “legalitet” pas luftës guerrilase politike gjashtë mujore, si dhe rrezikon seriozisht, në mos anullimin e 30 qershorit, obstruksionin e tij me javë e muaj të tërë. Deri sa të afrohet 10 gushti? Derisa të afrohet 13 tetori? Derisa mazhoranca të ulet në tavolinë? Derisa ndërkombëtarët të binden se po ja lanë institucioneve shqiptare, rrëmuja e qëllimshme dhe jo, mund të thellojë krizën? Ilir Meta e tha këtë qartë më herët të enjten: “Kriza në vend, rrezikon të thellohet”.

Me gjasë, ndryshe nga skenari i parë i tij, ai për dhunë e flakë, ky i dyti është më i mundshëm: sepse nuk ka as tym, as flake e as viktima. Por nëse është kështu, është një përpjekje dinake për të përdorur kësaj radhe armët e ndërkombëtarëve, për arritjen e qëllimit që duket kryesor në këtë lëvizje opozitaro-presidenciale: që në 30 qershor nuk kishte zgjedhje.

Një sfidë e fortë, jo ndaj Ramës, po ndaj BE. Jo ndaj qeverisë, po ndaj amerikanëve. Jo ndaj KQZ po ndaj OSBE. Të gjitha këto organizma që luftuan fort që në vend të kishte zgjedhje në 30 qershor, jo si leksion demokracie sesa si shenjë e sundimit të ligjit. Po tani ata nuk ankohen dot. PD dhe Meta po luajnë me kartat e tyre. Gjithsesi ndërkombëtarët janë ndërkombëtarët. Në [do lojë pokeri, ata e kanë pasur gjithmonë një as nën mëngë./Realstory.al/

Basha ndryshoi, pasi Cutillo tha në “Real Story”: S`jemi palë me asnjë parti

Pasi dështoi në të gjitha mënyrat dhe format për të larguar qeverinë apo për të penguar zgjedhjet e 30 qershorit, opozita ka nisur të kërkojë rrugën e daljes nga kriza ku është vetë futur. Një ditë më parë, pas takimit me strukturat në Berat (lexo këtu), Lulzim Basha së bashku me Monika Kryemadhin dhe disa drejtues të tjerë të partive opozitare, u nisën drejt Vienës, ku të mërkurën kanë pasur një takim me Sekretarin e Përgjithshëm te OSBE, z. Thomas Greminger. Ky zhvillim vjen në një kohë kur opozita ka humbur çdo pushtet, ndërsa Lulzim Basha pranoi zyrtarisht njohjen e 13 tetorit si datë për zgjedhjet, duke e cilësuar atë si një mundësi për zgjidhjen e krizës.

Kjo tërheqje e opozitës, në krahun tjetër ka marrë edhe sinjale pozitive nga Kryeministri Edi Rama, i cili i ka shtrirë dorën e dialogut. Në këtë pikë, palët duket se kanë arritur dakordësimin e parë. Por opozita ende nuk është e bindur në atë që kërkon, qoftë në kanale private komunikimi me qeverinë, në lidhje me pikat që do të diskutohen në dialog, qoftë edhe për mënyrën se si do ta prezantojë në publik, uljen në tryezën e dialogut, duke pasur parasysh retorikën që ka përdorur deri tani. Një nga aleatët e PD-së, Dashamir Shehi është shprehur, sipas disa mediave, që Basha duhet të ulet në tryezë me Ramën, duke pasur garanci ndërkombëtare.

Pra, në këto kushte, vetë opozita duket se po kërkon një përfaqësi ndërkombëtare, për të bërë ndërmjetësimin e tryezës së dialogut. Në fakt, kjo nuk është diçka e re, pasi e njëjta situatë u krijua dhe në 2017. Por, lëvizja e radhës e opozitës, takimi urgjent në Vienë me përfaqësuesit e OSBE dhe pranimi i 13 tetorit, vjen menjëherë pas deklaratave që ambasadori italian në Shqipëri, Alberto Cutillo, bëri të hënën në studion e “Real Story” të gazetarit Sokol Balla.

Cutillo, një prej diplomatëve që ka ndjekur nga afër zhvillimet në vend gjatë muajve të fundit, pavarësisht qëndrimit të tërhequr që ka mbajtur, u shpreh se palët duhet të ulen në një tryezë të gjerë dialogu, pse jo edhe me praninë e një përfaqësuesi ndërkombëtar, që mund të jetë ish-kryeministri Massimo D`alema.

Gjithashtu, po në studion e “Real Story”, ambasadori Cutillo bëri dhe një tjetër deklaratë të rëndësishme, duke përgënjeshtruar Bashën, në thëniet e tij se “ambasadorët kanë mbajtur anën e Qeverisë”. Alberto Cutillo u shpreh se kjo nuk është e vërtet, dhe se roli i tij dhe gjithë ambasadorëve në Shqipëri, është të ndihmojnë në rritjen e bashkëpunimit mes vendeve. Këto deklarata, pavarësisht se s`mund ta themi me siguri, kanë pasur një ndikim të rëndësishëm në kthesën e opozitës.

Së pari, Basha mund të jetë zhveshur nga paragjykimet për ambasadorët dhe ndërkombëtarët, duke i pranuar ata si miq dhe jo si rivalë, dhe e dyta dhe më e rëndësishmja, Basha dhe opozita, po kërkojnë një përfaqësues ndërkombëtar, me qëllim që të ulen në tryezë e dialogut me Ramën. Tashmë mbetet të presim se çfarë do të thonë krerët e opozitës, pas takimeve në Vienë.

Rama shtrin dorën po s`ul kokën: Fitoi Shqipëria e re, reforma me PD

Kryeministri Edi Rama ka mbajtur një konferencë për shtyp, e cila ka nisur në orën 21:00 të mbrëmjes të së dielës, dy orë pas mbylljes së procesit të votimit. Duke e cilësuar një fitore të vështirë, Edi Rama, shprehu falënderim ndaj prtnerëve ndërkombëtar, të cilët, sipas Kryeministrit, u kërcënuan por nuk u lëkundën.

“Ishte një fitore e vështirë, sepse nuk luftuan kundërshtarë, por vetë sistemi ende i brishtë demokratik. Sot 30 qershori qe dukej sikur s’do vinte kurrë, po ikën paqësisht, duke marrë me vete ankthin, pasigurinë dhe kaosin institucional. Një faleminderit miqve dhe partnerëve, që u kërcënuan, por nuk u lëkundën në mbrojtje të demokracisë, lirisë së zgjedhjeve dhe të së drejtës për të zgjedhur. Faleminderit SHBA, BE, Misionit të OSBE dhe çdokujt tjetër nga përfaqësuesit e nderuar të botës demokratike që dhanë një dorë në këtë betejë. Jo vetëm faleminderit, por edhe ndjesë, shumë ndjesë, miqve të huaj që u bënë objekt e sulmeve të turpshme. Me ato sulme na turpëruan të gjithëve, si vend, si popull, si njerëz. Pas pas hyn një ditë e re që e gjen Shqipërinë të çliruar nga makthi, por vjen e ngarkuar nga plagët që hija e marrëzisë ka lënë pas”, tha fillimisht Rama.

Duke e cilësuar si ditë historike 30 qershorin, Kryeministri Edi Rama u shpreh se nuk do të largohet, pavarësisht kërkesës së opozitës. Ai tha se gjatë muajit korrik do të nis një debat brenda së majtës për të analizuar qeverisjen, duke korrigjuar gabimet e bëra deri më tani. “Nuk iki, megjithëse e di sesa shumëfish më shumë se sot është sfida e shlyerjes së tij nëse nuk fillojmë të ndryshojmë nga ata që jemi sot. Do të zhvillojmë një debat në korrik për të analizuar qeverisjen. Do të programojmë të tëra korrigjimet e nevojshme në funksion të sfidës. Një debat të gjerë për të analizuar situatën në familjen tonë politike”, tha Rama.

Ndërsa shtoi se tani, ai dhe PS do të jetë gati për dialog me opozitën, nëse kjo e fundit do të pranojë rrugën e paqes dhe duke hequr dorë sulmet ndaj vendit. Dhe pozicionin tonë të ri në skenën politike dhe marrëdhëniet ndërpartiake, qoftë me opozitën brenda parlamentit apo jashtë. Plaga e hapur kërkon kurim, ne do të bëjmë cdo gjë, pavarësisht se e hapën humbësit me turp. Nëse duan paqe, paqe do të kenë dhe paqja mund të fillojë vetëm duke u tërhequr nga sulmet kundër Shqipërisë. Nëse duan marrëveshje për Shqipërinë, marrëveshje do të kenë, vetëm me dialog pa kushte dhe shprehje për t’u angazhuar të gjithë për celjen e negociatave. Dora ime është e shtrirë, reforma zgjedhore mbetet sfidë me opozitën parlamentare dhe atë jo parlamentare, shtoi Rama.

Duke folur për opozitën, që në gjashtë muaj ka sulmuar institucionet në mënyrë të dhunshme, Rama la derën e hapur, duke u shprehur se tani fillon një ditë e re. “Molotovët i kishin zëvendësuar me firzamonika dhe lehjet komike kundër monizmit imagjinar. Pas pak fillon një ditë e re, dita dhe koha kur ne do të vijojmë të bëjmë tonën, në radhë të parë duke u përulur shumë më tepër para popullit, duke reflektuar shumë më tepër sesa sot para qeverisjes jonë në nivelin qendror dhe vendor. Ne nuk fituam ndonjë betejë për mandatin e ardhshëm të bashkive, por luftën përgjithmonë për zgjedhjet. Nga sot, Shqipëria nuk do të shohë më djegie mandatesh, molotov, bojkot dhe fronte. Për ata është një mësim, por edhe të gjitha partitë dhe përgjithmonë. Nga sot, ne, fitimtarët e 30 qershorit, nuk fituam ngaqë kemi bërë punë shumë të mira, apo se mjaftojnë ato që kemi bërë”.

Kriza, analiza në “Real Story”: Zgjidhja vjen nga ndërkombëtarët, pas 30 qershorit!

Kriza politike dhe situata në vend në prag të zgjedhjeve të 30 qershorit, ishte tema e diskutimit në emisionin e mbrëmjes të së mërkurës në “Real Story” të gazetarit Sokol Balla në Vizion Plus. Të ftuarit e mbrëmjes ishin analistët Agron Gjekmarkaj, Skënder Minxhozi, Erl Murati dhe Roland Lami. Gjatë analizës, Skënder Minxhozi u shpreh se opozita i ka bërë llogaritë gabim në momentin që dogji mandatet dhe nisi protestat për largimin e Edi Ramës. “Biem dakord të gjithë që këto janë votime. Por çfarë ndodh nëse Edi Rama në 2021 del dhe deklaron që nuk ka zgjedhje këtë vit, shihemi pas një viti? Elementët të cilët opozita i ka llogaritur keq kur i hyri kësaj rruge, sot po duken të gjitha. Opozita nuk u nis për të dështuar zgjedhjet lokale por për te rrëzuar qeverinë”, tha ai.

Debati u fokusua në pjesën kryesore të tij te roli i ndërkombëtarëve në zgjidhjen e krizës. Agron Gjekmarkaj u shpreh se ata janë duke u përpjekur të shkurajojnë opozitën, ndërsa qeverisë i kërkojnë të mbajë një profil të ulët. “Ata përpiqen ta shkurajojnë opozitën në aksionin e vetë, dhe nga ana tjetër ata i kërkojnë qeverisë që të mbajë profil të ulët. Kriza ishte në mesin tonë dhe persëri them që qëndrimi i opozitës se si del ajo në ndeshjen epike me ndërkombetarët, është qendrimi i duhur. Rama i mori zgjedhjet me tepsi e timon, e s`do i mari me filxhan”.

Për analistin Erl Murati, kjo nuk është hera e parë që opozitat në Shqipëri përplasen me ndërkombëtarët, ndërsa shtoi se Lulzim Basha është i detyruar të pamundësojë zgjedhjet për shkak të presionit nga militantët. “Kjo nuk është hera e parë që ndërkombëtarët përplasen me opozitën në Shqipëri. Unë lexova një fjalim të Ramës në dhjetor të 2010, dhe dilte kundër OSBE. Lulzim Basha gjendet përpara situatës kur duhet patjetër të pamundësoi zgjedhjet e 30 Qershorit. Ka presion nga militantët, nga të zgjedhurit vendor”.

Roland Lami e sheh rolin ndërkombëtar si të lidhur ngushtë me vendin tonë. Sipas tij, Shqipëria është një vend që ndan sovranitetin me faktorin ndërkombëtar, ndaj çdo veprim i tyre merr vlerë te ne. “Ne nuk jemi një vend që e ndajmë sovranitetin me veten, e ndajmë më faktorin ndërkombëtar. Çdo veprim i tyre merr vlerë te ne. Pa to nuk bëjmë dot. Unë gjykoj se e legjitimuan 30 qershorin, por do të zgjidhin krizën që vjen pas 30 qershorit. E legjitimuan sepse nuk duan që të kenë precedent, dhe në krahun tejtër nuk mund të anashkalojnë degradimin që ka sistemi ynë. Me mungesën e Gjykatës Kushtetuese gjithçka mund të ndodhi. Na ruajt Zoti se edhe mund të çmendet, pasi nuk ka asnje instance qe mund ta kontrollojë”.

EXCLUSIVE/ PD, “paqe në 30 qershor”. Por problem mbetet Berisha…

Dita e zgjedhjeve do jetë një ditë e qetë, pavarësisht çfarë thotë Partia Demokratike me retorikë dhe shkresa. Selia Blu i ka dhënë garanci ndërkombëtarëve, që 30 qershori nuk do të ketë dhunë dhe incidente të shkaktuara prej saj. Megjithëse PD nuk heq dorë nga mospranimi i zgjedhjeve dhe ka mobilizuar gjithë kryetarët e bashkive të tentojnë të pengojnë procesin zgjedhor. Kreu i saj i ka dhënë garanci ambasadorëve Leyla Moses-Ones dhe Soreca që trokitën të martën në zyrën e tij. Por ambasadorët kanë patur edhe një mesazh për Ramën: jo festë e fishekzjarre të dielën dhe të hënën.

Të dy ambasadorët kanë shkuar te Rama e Basha pas takimit që u mbajt në orën tetë të mëngjesit të të martës, siç edhe Realstory.al kishte lajmëruar një ditë më parë. Ambasadorët e BE, OSBE, Italisë, Gjermanisë dhe Britanisë, janë takuar për më shumë se një orë në zyrën e ambasadorit britanik në Rrugën e Ambasadave. Takimi sipas burimeve brenda tij do të prodhojë një deklaratë të përbashkët, ku do t’i kërkohet palëve të sigurojnë zgjedhje të qeta në 30 qershor, një mesazh ky direkt për Bashën si dhe në funksion të paqes dhe qetësisë, jo festë e fishekzjarre nga pala tjetër, një mesazh ky për Ramën. Burime diplomatike i pohojnë Realstory.al se i vetmi qëndrim “ndryshe” ka qenë ai i Britanisë, i cili ka “kërcënuar” të tërheqë vëzhguesit britanikë nga Veriu i vendit, nëse nuk garantohet siguria e tyre.

Soreca më pas është bashkuar me zonjën Moses-Ones , (SHBA nuk janë bashkuar tryezës, pasi qëndrimi i tyre ka qenë i qartë, për të mos pasur negociata, pa pasur një proces pa dhunë e incidente në 30 qershor), e më pas i janë drejtuar zyrave të Bashës e Ramës. Sipas burimeve diplomatike Basha i ka siguruar ambasadorët se e ka marrë mesazhin e qartë dhe se dhuna verbale e 24 orëve të fundit është “për të mos humbur entuziazmin e bazës”, e cila mund ta interpretojë si humbje, mbajtjen e zgjedhjeve nga të cilat u vetëpërjashtuan e që po mbahen me Ramën (akoma) kryeministër.

Por duket se shpresat për një dialog politik pas një 30 qershori të qetë, pa incidente e festa, janë shtuar. Ambasadorët kanë diskutuar sërish mundësinë e ardhjes pas zgjedhjeve të një të Dërguari të Posaçëm, i cili të nisë ndërmjetësinë mes palëve. Momenti më delikat është ai i një takimi Basha-Rama, pas refuzimit të prerë të të parit për të bërë një gjë të tillë, sa kohë Rama është kryeministër. Por duket se edhe këtu është gjetur një dakordësi “teknike”. Fillimisht do të realizohet takimi i Bashës me një politikan socialist të “pranueshëm” për të, e më pas edhe takimi me Ramën.

Dihet se Basha ka një miqësi me Pandi Majkon, me të cilin është takuar edhe në 2017, gjatë periudhës së çadrës në Rogner. A thua dhe pajtimi do kalojë sërish mes duarve të tij?

Rëndësi ka që pavarësisht çfarë thuhet e shkruhet, palët do përpiqen (s’kanë ku shkojnë) të sillen mire dhe urtë në 30 qershor, një datë që është e rëndësishme më shumë për ndërkombëtarët, sesa ata vetë. Puna më e madhe i mbetet Bashës, të cilit përveçse me të vërtetën si zakonisht, i duhet të përballet dhe me linjën e ashpër Brenda PD të përfaqësuar nga Berisha e që ka jo pak mbështetje. Burime diplomatike të konfirmuara edhe nga vetë Brenda PD, flasin se Basha e Berisha nuk përjetojnë ditët më të mira mes tyre. 30 qershori ndoshta do të jetë provë edhe për këtë: nëse Basha e ka apo jo në kontroll Partinë. Nëse s’ka incidente i bie që meqë s’mundi Ramën, së paku të mundë Berishën dhe tu tregojë ndërkombëtarëve se e “vrau” babën e vet. Nëse në 30 qershor në PD triumfon linja e dhunës dhe e forcës, atëherë Lulzim Bashën nuk ka askush që ta shpëtojë. As Berisha, as ndërkombëtarët dhe as Rama vetë!/ Realstory.al

Ndërkombëtarët “opium” për… opozitën

Protestës së opozitë i ka paraprirë një reagim i fortë nga selitë diplomatike dhe përfaqësues të shteteve partnere në Tiranë. I pari që reagoi paraditen e së shtunës, ishte Zëvendës Ndihmës-Sekretari i Shtetit në SHBA Mattheë Palmer, që i dha një mesazh të fortë krerëve të opozitës. Z.Palmer, në një intervistë për mediat shqiptare u shpreh se nëse në protestën e opozitës do të ketë akte dhune, përgjegjësit do të ishin Lulzim Basha dhe Monika Kryemadhi.

“Dua të jem shumë i qartë me Z. Basha, Znj. Kryemadhi dhe të tjerë në partitë e tyre: nëse në protestat e ardhshme ka akte dhune, për ne ata do të jenë përgjegjësit. Ka qenë shumë e qartë në të kaluarën që kur drejtuesit duan që protestat që të jenë paqësore, ato kanë qenë paqësore. Demonstratat e dhunshme po dëmtojnë përpjekjet e Shqipërisë për reforma demokratike si dhe perspektivën e vendit për të ecur përpara në rrugën drejt BE”, shprehet Palmer.

Por, Palmer nuk është ndalur vetëm me dënimin e dhunës së ushtruar në protestat e opozitës, pasi ai ka lëshuar dhe një paralajmërim të fortë për ata që do të tentojnë të prishin zgjedhjet e 30 qershorit, një paralajmërim që së fundmi është dëgjuar shpesh edhe nga kryeministri Edi Rama në takimet elektorale që po zhvillon në këtë fushatë.

“I kemi paralajmëruar drejtuesit e opozitës të mos pengojnë procesin zgjedhor, çka siç e vërejta, mund të përbënte shkak për të mos u kualifikuar për të hyrë në SHBA. Ditën e zgjedhjeve, ekipet tona të ambasadës do të vendosen në qendra votimi për monitorim zgjedhor. Kemi në plan të shqyrtojmë raportimet për monitorimin zgjedhor të ekipeve tona si dhe ato të ODIHR”, deklaroi Palmer.

Pak para nisjes së protestës së 8 qershorit, ambasada e Bashkimi Europian në Tiranë ka reaguar duke bërë thirrje që nuk do të tolerojnë asnjë lloj të dhunës apo përdorim të mjeteve që janë projektuar për të lënduar. Në një deklaratë për mediat, BE cilëson se nëse ka dhunë në protestë përgjegjës do të jenë vetëm drejtuesit e saj, ndërsa ka bërë thirrje për një dialog urgjent për të kapërcyer situatën aktuale politike.

“Ndërkohë që respektojmë plotësisht të drejtën themelore të qytetarëve shqiptarë për të demonstruar, ritheksojmë rëndësinë e ushtrimit të kësaj të drejte në mënyrë të rregullt dhe paqësore. Ne dënojmë të gjitha aktet e dhunshme që kanë ndodhur në protestat e mëparshme. Asnjë formë e nxitjes së dhunës nuk është e tolerueshme. Përdorimi i eksplozivëve ose i ndonjë sendi tjetër të projektuar për të shkaktuar lëndime është krejtësisht i papranueshëm”, thuhej ndër të tjera në deklaratën e ambasadës së BE në Tiranë.

Të njëjtën retorikë mbajti edhe Ambasada Gjermane në Tiranë, ku bëri thirrje që drejtuesit e protestës të siguroheshin që nuk do të kishte përdorim dhune, ndërsa theksuan nevojën urgjente për tu ulur në tryezën e dialogu.

Ambasada e Britanisë së Bashkuar në Tiranë ka zgjedhur ta japë mesazhin e saj për opozitën në dy gjuhë. Në anglisht dhe shqip, selia diplomatike në Britanisë në Tiranë, i drejtohet opozitës dhe kryetarit të saj Lulzim Basha, që të ushtrojë të drejtë për të protestuar në mënyrë të rregullt dhe paqësore.

“Ndërkohë që respektojmë plotësisht të drejtën themelore të qytetarëve shqiptarë për të demonstruar, ritheksojmë rëndësinë e ushtrimit të kësaj të drejtë në mënyrë të rregullt dhe paqësore”, shkruan në nisje të deklaratës së saj ambasada e Britanisë.

Më tej, mesazhi bëhet dhe më i qartë, më domethënës për opozitën dhe drejtuesit të saj, pasi ambasada e Britanisë shprehet se “dënon të gjitha aktet e dhunës që kanë ndodhur në protestat e mpërashme të opozitës, dhe asnjë formë e dhunës nuk është e tolerueshme”, thuhet në deklaratën e ambasadës së Britanisë.

“Përdorimi i eksplozivëve ose i ndonjë sendi tjetër të projektuar për të shkaktuar lëndim është krejtësisht i papranueshëm. Është përgjegjësi e drejtuesve të protestës të sigurojnë që demonstrimet të mbahen në mënyrë të sigurt si për pjesëmarrësit ashtu dhe për banorët e tjerë në Tiranë, si dhe për të shmangur çdo përshkallëzim gjatë protestave”, thuhet në deklaratën e ambasadës së vendit ishullor.

Në fund, ambasada e Britanisë dërgon dhe një tjetër mesazh, duke u kërkuar palëve angazhim urgjent për dialog. “Ne vazhdojm t`i bëjmë thirrje të gjitha palëve të angazhohen urgjentisht në një dialog konstruktiv për të kapërcyer situatën politike”, mbyllet mesazhi i ambasadës britanike.

Basha i zbutur nga Gjermania, ftesë për protestë paqësore dhe “intelektuale”

“Të rinj e të reja, studentë dhe profesionistë, pedagogë, artistë, intelektualë, mjekë e infermierë dhe mësues, etj, mirësevini nesër në bashkimin popullor dhe qytetar në orën 19 në Tiranë”, ka qenë kjo thirrja e Lulzim Bashës për drejtuar qytetarëve shqiptarë për të marrë pjesë në në protestës e tetë kombëtare që opozita do të organizojë të shtunën përpara Kryeministrisë.

Pas disa ditësh qëndrimi në Gjermani, ku pati disa takime në nivele të larta, Lulzim Basha u ka bërë ftesë qytetarëve shqiptarë për protestën, por duke zgjedhur të ndryshojë mjetin dhe mënyrën e ftesës. Një ftesë krejt ndryshe nga shtatë protestat e tjera, ku mungojnë fjalë të tilla të zakonshme si “vendos sovrani, rrëzojmë Edi Ramën, s`ka zgjedhje pa opozitën”, etj. Ndryshe nga ftesat e protestave të kaluara, ku Lulzim Basha ka ftuar shqiptarët në protestë nëpërmjet rrjeteve sociale dhe videove të montuara, kreu i PD ka zgjedhur të flasë në konferencë për shtyp nga selia Blu, për ti dhënë më tepër kuptim mesazhit të tij, ndoshta edhe me gjuhën e trupit.

Në fakt, toni i zërit të kreut të PD ka qenë ndryshe, i zbutur dhe në kushte shumë normale, çka tregon se Basha ka ardhur me tjetër mendim për aksionin politik, pas takimeve që ka pasur në Gjermani. Dhe në fakt, kjo u lexua dhe nga mesazhet që përcolli gjatë fjalës së tij. Ndonëse foli gjerësisht dhe solli në kujtesë ato, që ai i quan denoncime të PD-së për lidhjen e Qeverisë me krimin, këtë herë Basha nuk e kishte drejtpërdrejt me Edi Ramën, se me ata, që sipas tij, e mbajnë në pushtet. Dhe këtë mesazh, Basha ua drejton ndërkombëtarëve, që prej kohësh kanë dalë në mbështetje të dialogut me Qeverinë dhe zgjidhjes së problemeve në tryezën e bisedimeve.

“Të gjitha këto, unë dhe PD i kemi denoncuar dhe luftuar përditë. Shumë njerëz na kanë marrë për Don Kishotë, por sot don kishotët janë ata që Edi Rama ju dukej artist dhe perëndimor dhe jo ai që është: një kriminel llogaritës dhe manipulator gjakftohtë që ka instaluar në Shqipëri një regjim kriminal”, u shpreh Basha.

“Ata që mendojnë ndryshe janë të verbër ose naivë. Ata që nuk kanë problem që Edi Rama të qeverisë me standarde mafioze dhe diktatoriale, ata që mbyllin sytë përditë përballë krimit, korrupsionit dhe kapjes së shtetit, nuk mund t’i kërkojnë opozitës që të kthehet në Kuvend apo të marrë pjesë në zgjedhje”, u shpreh Luzlim Basha.

Veç kësaj, Basha dukej se është tërhequr edhe nga prishja e zgjedhjeve, pasi në asnjë fjalë dhe mesazh të artikuluar prej tij, nuk u përmend prishja e zgjedhjeve të 30 qershorit. Madje, ndonëse nuk e artikuloi, por fjala e Bashës u duk në sinkron edhe me atë të Monika Kryemadhit, që vetëm 10 minuta më pas, artikuloi nga një takim që pati me simpatizantët e LSI, se në protestën e të shtunës, nuk do të ketë dhunë dhe prekje të unfirmoës së Policisë.

Në fakt, veç efektit “gjerman”, që mund të ketë zbutur tonin e kreut të opozitës, duket se diçka tjetër mund të ketë pasur rol në këtë qëndrim. Të premten në “Real Story”, Edi Rama deklaroi prerazi se nuk ka negociatat me opozitën para datës 30 qershor, duke lënë të kuptohet se gjithçka mund të ndodhë, por vetëm pas zgjedhjeve lokale.