Tirana-Partizani, përballjet historike mes dy klubeve

Tirana dhe Partizani përballen mbrëmjen e të dielës në orën 19:00 mes tyre, në ndeshjen e parë derbi të këtij sezoni. Një nga sfidat më emocionuese të historisë së futbollit shqiptar, pritet të dhurojë spektakël në fushë dhe në tribuna, në stadiumin “Selman Stërmasi”. Sfida e të dielës do të jetë e 154-ta në historinë e përballjeve mes tyre, ku Tirana vjen me një bilanc negativ në pesë vitetet e fundit, pasi nuk ka fituar asnjëherë ndaj Partizanit. Megjithatë, skuadra e këtij sezoni duket premtuese dhe në radhët e klubit ka optimizëm. Por si ka nisur historia e përballjeve mes Tiranës dhe Partizanit?

Ndeshja e parë mes dy skuadrave është luajtur në vitin 1947, takim që në atë kohë Partizani e fitonte me rezultatin 4-2. Më pas nisi një epokë e tërë, me Partizanin që ka fituar të paktën 65 takime, Tirana 40 dhe 48 të tjerë kanë përfunduar në barazim. Por pavarësisht historive të ndeshjeve derbi, Tirana krenohet pasi është klubi me më shumë tituj kampion në Shqipëri, plotë 24 herë, ndërsa Partizani ka 16.

Skuadra bardheblu ka fituar dhe 16 Kupa të Shqipërisë dhe 1 herë Superkupën, ndërsa dy sezone më parë, fitoi dhe kampionatin e Kategorisë së Parë. Në sezonin e fundit Partizani fitoi tre nga katër ndeshjet e derbit, kryesisht me rezultate minimale, ndërsa një takim përfundoi në barazim. Aktualisht Tirana ka bërë sezon më të mirë se të kuqtë, pasi numëron 10 pikë në renditje dhe mban vendin e tretë, me një pikë më pak se dy vendet e para. Ndërsa Partizani është në vendin e 7-të të renditjes me po kaq pikë.

Tirana ka disa statistika të tjera me të cilat krenohet, siç është golashënuesi më i mirë. Refik Resmja mban rekordin me 14 gola të shënuar në derbi, ndërsa pas tij vjen Indrit Fortuzi me 11. Në vendin e tretë është Agim Murati për Partizanin me 11 gola, ndërsa më pas është Agustin Kola me 10.

Një nga fitoret më të thella të Tiranës ndaj Partizanit është ajo e 30 prillit të vitit 2005, ku bardheblutë triumfuan me rezultatin 4-0, ndërsa ndeshja me rezultat historik është ajo e sezonit 1985/86, kur Tirana fitoi 7-3. Ndërkohë, Partizani ka fituar ndaj Tiranës me rezultatet e thella 8-0 në vitin 1947 dhe 6-0 në vitin 1950.

Derby, Mema: fitore me këmbë në tokë

Tirana pret të dielën në mbrëmje Partizanin, në takimin e parë derbi të sezonit. Ekipi bardheblu duket gati për këtë sfidë, i etur për sukses, pasi prej pesë sezonesh, nuk fiton një ndeshje ndaj Partizanit. Trajneri i bardhebluve, Ardian Mema u shpreh në konferencë për mediat, se skuadra është gati dhe në formë të mirë.

“Nga gjendja fizike, ekipi është shumë mirë. Duhet të jemi të kujdesshëm nga ndeshja e fundit pasi ndaj Kukësit kaluam në eufori. Nesër duhet të jemi me këmbë në tokë. Nuk dua eufori! Në krahasim me vjet jemi më mirë por duhet ta tregojmë nesër. Duhet të kemi kujdes pasi jemi një skuadër e riformatuar dhe mund të ketë edhe oshilacione. Ndaj Kukësit mund të kishim fituar ashtu si edhe ndaj Teutës. Kampionati është i gjatë dhe do të kemi edhe shumë ndeshje para”, tha Mema.

Partizani është një ekip i mirë, të cilin Mema e vlerëson. Megjithatë, tekniku bardheblu shpreson që fitorja do të jetë për të dhe skuadrën e tij të dielën. “Partizani ka elementë të mirë brenda dhe ndeshjen mund ta vendosin edhe individët. Shpresojmë të fitojmë pasi kemi pesë vite. Kanë ndikuar përzgjedhja jo e mirë e lojtarëve dhe Partizani ka pasur lojtarë më cilësorë. Shpresoj që këtë radhë të jetë ndryshe”, shprehet Mema.

Sipas tij, humbja me Kukësin i bëri mirë skuadrës, për t`i ulur euforinë dhe të jetë me këmbë në tokë. “Normalisht ekipi duhet të jetë në ekuilibër dhe të mos humbë ndeshjen. Shpresojmë të kemi dinakërinë e duhur dhe t’i shohim gjërat me kujdes. Ekipi kërkon për ta fituar dhe ndoshta rezultati kundër Kukësit na ka bërë mirë për të parë gjërat me më shumë kujdes”, tha trajneri i 24 herë kampionëve të vendit.

Ardi Mema, si një bardheblu që e njeh mirë Tiranën, shprehet se nuk ndihet në presion, ndërsa tregon se nga ekipi kërkon disiplinë, ndërsa ndaj Partizanit kërkon të shmanget presioni.

“E rëndësishme është që të mos e marrim si sfidën e jetës por të jemi të qetë. Presidenti është përgjigjur por për çdo lojtar, është diskutuar nga të gjithë. kemi bërë një merkato të përbashkët. Nuk jam tip që kam presion. Unë jam brenda familjes dhe sfida ime nuk ka të bëjë me presionin. Shpresoj të bëj më të mirën për veten dhe për klubin. Janë gjëra që ndodhin shpesh. Edhe unë jam grindur në fushë por disiplina është e rëndësishme. Duhet që të jemi të bashkuar. Nuk jam i rëndësishëm as unë dhe as Osmani, por i rëndësishëm është grupi”, u shpreh Mema.

OSHE jep garanci, derbi Tirana-Partizani luhet me drita

Federata Shqiptare e Futbollit vendosi që derbi Tirana-Partizani, të luhet në orën 19:00, të dielën në 29 shtator. Ndeshja ishte parashikuar të zhvillohej në të njëjtën ditë, por në orën 16:00 të pasdites. Duke pasur parasysh rëndësinë e ndeshjes, Tirana si klubi organizator, i kërkoi të mërkurën FSHF-së të shtynte me tre orë zhvillimin e ndeshjes, që sfida të luhej në dritën e prozhektorëve, pasi është dhënë garancia nga OSHE që nuk do të ketë probleme me kufizimin e energjisë elektrike.

“Federata Shqiptare e Futbollit dëshiron të informojë opinionin publik se ndeshja Tirana-Partizani, e vlefshme për javën e 6 të Kategorisë Superiore, do të zhvillohet ditën e dielë, ora 19:00, në stadiumin “Selman Stërmasi”. Ky vendim është marrë pas garancisë që ka dhënë OSHE në lidhje me furnizimin me energji elektrike dhe pa probleme gjatë orarit të zhvillimit të Derbit të Tiranës”, shkruan FSHF në njoftimin e shpërndarë për mediat.

Derbi me Partizanin, Mema: Mezi po pres

Tirana ka dy sfida të rëndësishme në pak ditë. Së pari është Kukësi dhe më pas vjen derbi ndaj Partizanit. Katër ndeshje, asnjë humbje, 10 pikë të grumbulluara dhe kryesim i kampionatit. Ardian Mema ka dalë në konferencë për shtyp, duke folur për të gjitha këto. Së pari e ka nisur me rivalin e të shtunës, Kukësin, duke u shprehur se është një ekip cilësor, ndërsa objektivi është rezultati pozitiv. “Kukësi është një ekip shumë i fortë, ka elementë mjaft cilësore brenda vetes, duhet menaxhuar shumë mirë ndeshja nesër. Na duhet ta përgatisim mirë ndeshjen. Shpresojmë të bëjmë më të mirën nesër dhe të kemi një rezultat pozitiv. Për ekipet e elitës, ndeshja e nesërme, dashje pa dashje është test. Ka të bëjë shumë edhe me vazhdimësinë e ekipit. Ideja është që këtë ekipe duhet të mirë menaxhohen dhe nuk duhet të humbasësh”, ka thënë Mema.

Tirana do të ketë disa lojtarë që rikthehen dhe do të jenë të gatshëm për takimin ndaj Kukësit. Agostin Torasa është prej tyre, ndërkohë që Andi Lila ende nuk është gati për të luajtur. “Torasa është pjesë e grupit nesër. Nuk do ta fillojë nga fillimi por do të jetë pjesë e grupit. Ndryshe nga viti i kaluar, Kukësi ka kontingjent të ri lojtarësh, por i kanë ikur lojtarë të rëndësishëm si Shameti dhe Rama, por edhe i kanë ardhur disa lojtarë. Andi Lila do kohën e vetë, akoma nuk është gati. Stërvitet intesivisht, shpresojmë që të kthehet shumë shpejt. Secila skuadër ka specifikat e vete. Mendoj që nesër duhet të jemi të përqëndruar. Të jemi ne fitimtarë dhe të jemi ne që ta diktojmë ndeshjen dhe të arrijmë ato çfarë shpresojmë ne si skuadër”, ka thënë Mema.

Ndonëse në aspektin e rëndësisë, ndeshja me Kukësin është po aq e rëndësishme, për trajnerin Ardian Mema, derbi me Partizanin pritet me padurim. Sipas tij, ky i këtij viti, nuk është si Partizani i sezonit të kaluar. “Partizani ka pasur një ecuri jo të mirë këto ndeshje. Elementët brenda ekipit i ka. Çdo gjë varet nga periudha, lojtarët, trajneri i ri. Shpresojmë fillimisht të kalojmë Kukësin dhe pastaj të shohim për Partizanin. Tifozët e Tiranës mezi e presin atë ndeshjen për ta fituar. Unë padashje e kam parë Partizanin me Kukësin dhe në finalen e Superkupës, kam parë edhe ndeshjet e tjera. Nuk ka qenë primare të shikoj Partizanin se kam parë ekipet kundërshtaret. Nuk mund ta mendoj që javën e parë si mund të luaj me Partizanin. Nuk është Partizani i vjetshëm, kjo është e vërtetë”, ka thënë Ardi Mema.

Derbi, habit trajneri i Partizanit, Lerda: Tiranës i sjellë fat

Pas katër ndeshjesh në Superligë, Partizani ka fituar vetëm dy, ndërsa ka humbur dy të tjera. Nuk ka qenë nisja që prisnin të gjithë nga ekipi kampion. Megjithatë, trajneri Franko Lerda ka folur për takimin me Bylis, por me mendjen te derbi me Tiranën. Për sfidën e pestë të kampionatit kundër mallakstriotëve, Lerda shprehet se do t`i kërkojë lojtarëve të jenë agresiv në këtë takim. “Bylis nuk është aspak i lehtë. Ka vlerësimin maksimal tonin. E kam ndjekur me vëmendje në dy takimet që kanë zhvilluar si ndaj Skënderbeut, ashtu edhe ndaj Kukësit. Do të kërkoj nga skuadra ime të jetë mjaft agresive. Është një skuadër që vrapon shumë, por ne duhet të kemi qetësinë e duhur. Të jemi të qetë dhe në fund të marrim 3 pikët”, ka thënë Lerda.

Gjatë konferencës për shtyp, trajneri i Partizanit ka konfirmuar se në skuadër ka presion, për më tepër që ekipi është kampion. Megjithatë, sipas trajnerit italian, skuadra është në harmoni. “Kur je pjesë e Partizanit dhe sidomos kur je skuadër kampione, ke më shumë presion se ekipet e tjera. Sezonin e kaluar Partizani nuk u nis si skuadër që do të synonte titullin kampion, pra nuk kishte atë impenjim që ka impenjimin këtë edicion sepse do të mbrojmë titullin kampion. Kjo cilëson presionin që ka skuadra. Të gjithë ekipet duan të bëjnë mirë, duan të fitojnë ndaj nesh dhe kjo mund të na sjellë presion. Mendoj që harmonia është shumë e mirë. Besoj se diçka e tillë ndodh në gjithë ekipet e tjera”, ka thënë Franko Lerda.

Lerda, pasi ka analizuar situatën në ekip, ka folur edhe për kryesfidën e javës së gjashtë të kampionatit, derbi Tirana-Pratizani. Trajneri italian është shprehur se për të nuk është domosdoshmëri fitorja e të shtunës ndaj Bylisit, duke lënë të kuptohet, se energjitë e skuadrës do të përqëndrohen për Tiranën, megjithëse shprehet se nuk i druhet bardhebluve. “Nuk kemi pse t’i druhemi Tiranës. Kam parë vetëm një pjesë loje të ndeshjeve të saj. E kam ndjekur vetëm një ndeshje në stadium Tiranën. I kam sjellë fat Tiranës pasi në atë ndeshje ka fituar 3-0 kundër Luftëtarit. Duhet ta përgëzojmë për çfarë ka bërë deri më tani pasi gjendet aktualisht në vendin e parë. Akoma s’kam krijuar një mendim të qartë për ta. Objektivi ynë është ndeshja e nesërme kundër Bylisit”, tha Lerda.

Partizani bie në Laç. Starova i jep “leksion” Lerdës

Në katër ndeshje, dy humbje dy fitore. Partizani e ka nisur në mënyrën më të keqe të mundshme kampionatin këtë sezon, pasi ndryshe nga sa mendohej, kampionët në fuqi të Superligës, nuk po arrijnë të gjejnë ecurinë pozitive.

Në takimin e javës së katërt të kampionatit, Laçi priti në shtëpi Partizanin, duke marrë tre pikë përballë të kuqve, me të vetmin gol të shënuar nga Regi Lushkja. Ishte minuta e 60-të e takimit, kur Lushkja realizoi një gol të bukur nga distanca duke lënë të shtangur Alban Hoxhën.

Gjatë pjesës së parë loja ka qenë e ekuilibruar, me të dyja skuadrat që kanë qarkulluar topin në mesin e fushës. Megjithatë, Partizani ka tentuar më shumë portën kundërshtare, por pa arritur të rrezikojë seriozisht. Në të dytën, Laçi kërkon të thyejë balancat, duke shtuar presionin. Shpërblimi vjen me golin e Lushkjes në të 60`, ku kurbinasit kalojnë në avantazh me rezultatin 1-0.

Pas golit, Partizani ndryshon disi lojën. Çinari zbret disa herë në portën kundërshtare, por pa bërë asgjë, ndërkohë që trajneri Lerda tenton gjithçka me ndryshimet që kryen. Pas fitores së të dielës, Laçi shkon në kuotën e 4 pikëve, dhe mban vendin e tetë në renditje, ndërsa Partizani mbetet në vend të pestë me 6-të pikë.

Fitorja e Laçit ishte edhe një përgjigje që Sulejman Starova i dha trajnerit të Partizanit, Franko Lerda. Italiani u shpreh më herët se Starova është strateg, por në Laç do të fitonte Partizani. Kjo gjë nuk ndodhi, e kundërta po. Starova heshti me fjalë, iu përgjigj në fushë.

Skënderbeu mposhtet nga Bylis, Partizani ‘fundos’ Flamurtarin

Bylisi ka befasuar Skënderbeun në shtëpi duke e mundur me rezultatin e thellë 0-3. Skuadra ballshiote ka bërë një ndeshje të pabesueshme në javën e tretë të kampionatit, duke marrë tre pikë kundër korçarëve që vinin pas dy fitoresh radhazi. Ishte minuta e 10-të e takimit kur Murtaj realizon një gol nga brenda zonës, pasi u la i pambuluar nga mbrojtja vendase. Skënderbeu u mundua të reagonte, por ekipi i Ilir Dajës shfaqi shumë mangësi në lojën sulmuese.

Kështu në minutën e 45, skuadra e Bylis realizon përsëri duke dyfishuar shifrat. Këtë herë ishte Qardaku që futet në zonën e Skënderbeut dhe pasi kalon mbrojtjen, godet drejt portës, por topi ndalet nga portieri Koliçi, që në fakt i dërgon topin Guidos, që nuk e ka të vështirë të gjejë rrjetën. Goli i tretë i sfidës ka ardhur në minutën e 61` nga pika e bardhë e penalltisë. Ka qenë Pollozhani ai që ka gabuar në mbrojtje duke shkaktuar 11-të metërshin.

Ekzekutimin e penalltisë e mori përsipër veterani i portës së Bylisit, ish-portieri i kombëtares, Isli Hidi. Shtatlarti nuk ka gabuar përballë Koliçit duke trefishuar shifrat. Pas fitores të së dielës, Bylis shkon në kuotën e katër pikëve ndërsa Skënderbeu mbetet me 6-të. Ndërkohë Partizani ka fituar ndaj Flamurtarit me rezultatin minimal 1-0.

Skuadra e ‘demave’ ka marrë tre pikët e radhës në kampionat, duke mundur Flamurtarin, që ende nuk ka marrë asnjë pikë. Ka qenë Solomon ai që i ka dhënë fitoren ‘demave’, pasi ka shënuar një gol të bukur në minutën e 23 të sfidës. Ishte një asist i Trashit, i shndërruar në gol nga brenda zonës nga Solomon. Tre pikët e së dileës e ngjisin Partizanin në kuotën e 6 pikëve dhe në vendin e 4, po aq sa Skënderbeu.

Kukësi i kthen ‘reston’ Partizanit në kampionat, Jorgji nuk kursehet, ndëshkon 10 lojtarë

Një javë pasi i rrëmbeu në pak minuta trofeun e Superkupës, Kukësi ka marrë ‘hak’ ndaj Partizanit në ndeshjen e parë të kampionatit. Skuadra e drejtuar nga trajneri Shpëtim Duro e ka nisur në mënyrën më të mirë ndeshjen e parë të sezonit të ri të Superligës, duke fituar ndaj Partizanit me rezultatin 1-0. Goli i vetëm i takimit u shënua nga Vasil Shkurtaj në minutën e 39` të sfidës, i cili mposhti Alban Hoxhën nga pika e bardhë e penalltisë. Ndeshja e së premtes në kampionat ishte ndryshe nga ajo e Superkupës.

Pati më shumë agresivitet dhe grinte, me të dyja skuadrat që kërkuan deri në fund. Megjithatë, të dy ekipet e mbyllën me rezultatin e pjesës së parë, 1-0 për Kukësin, dhe me nga një lojtar më pak seç e nisën. Në minutën e 62`, futbollisti i Partizanit, Solomon goditi me kokë Brunon Lulajn, ndërsa futbollisti i Kukësit ia ktheu reston duke shtyrë në fushë. Enea Jorgji nuk e kurseu të kuqin, duke i nxjerr të dy lojtarët jashtë fushe.

Sa i përket arbitrimit, Jorgjit i është dashur të nxjerrë të paktën tetë herë kartonin e verdhë dhe dy të kuq, duke vendosur një rekord në ndeshjen hapëse të kampionatit. Pas sfidës së parë, Kukësi mban kreun e renditjes me 3 pikë, ndërsa Partizani ndodhet në vendin e fundit pas kësaj humbje. Të mërkurën do të luhen dhe katër sfidat e tjera të javës së parë të kampionatit.

Të premten nis Superliga, Duro: Kam ardhur të dalë kampion me Kukësin

Të premten në 23 gusht ngre tiparin sezoni i ri i Superligës. Një javë pasi u ndeshën në Superkupën e Shqipërisë, Kukësi dhe Partizani do të përballen në ndeshjen e parë hapëse të kampionatit, që do të luhet të premten në orën 19:00 në Elbasan. Një ditë para kësaj sfide, trajneri i verilindorëve, Shpëtim Duro është shprehur se nga Superkupa i ka mbetur peng rezultati dhe jo loja, duke treguar se nuk ka presion nga takimi i një jave më parë.

“Ishim pranë fitimit për 2 minuta dhe mund të merrnim trofeun por ajo ndeshje më erdhi keq për rezultatin dhe jo lojën. Në një periudhë të shkurtër dhe me probleme në formacion sidomos në prapavijë, jam befasuar nga loja. Historia e një ndeshjeje me eliminim është gjë tjetër. Kam ardhur për kampionatin dhe Kupën dhe e kam thënë para finales. Duke pasur jo skuadrën e plotë dhe duke ardhur Kotobelli me 1 ditë stërvitje, gabimet e tij janë të pranueshme” ka thënë Duro.

Shpëtim Duro ka treguar se nuk do të ndryshojë asgjë nga ndeshja e parë, ndërsa ka komplimentuar lojën e disa futbollistëve të tij. “Unë luaj ndaj një skuadre të konsoliduar kurse unë lojtarë me një stërvitje. Nuk do të ndryshoj asgjë nga loja por duhet më shumë përqendrim në momente të veçanta. Në pjesën e dytë kishim dominim dhe për 2 minuta do të ishte histori tjetër. Pa Valdet Ramën bëmë super ndeshje dhe imagjino, të ishte edhe ai. Gavazaj më ka befasuar sepse ka 3-4 muaj pa luajtur dhe nuk e prisja atë ndeshje. Largimi i tij dhe i Shkurtajt ndikuan. Nuk dua të ndryshoj asgjë nga loja e shkuar”.

Kristal Abazaj i bashkohet të enjten Kukësit në stërvitje. Sulmuesi tashmë është zyrtarisht pjesë e Kukësit, dhe me përforcimet e bëra gjatë merkatos, Shpëtim Duro ka më shumë optimizëm. “Duam një ndeshje të mirë, pikë por është kampionat i gjatë dhe jo vetëm një trofe me 10 minuta. Nuk ka njeri këtu që të luash me Partizanin në moment të shpejtë në atë formë dhe të dominosh, nuk është e lehtë. Kjo lojë dhe kjo mënyrë loje në skuadër, më bëjnë optimist. Me afrimin e Abazajt dhe ndonjë tjetri, më bën optimist për skuadër të fortë. Nuk ka trajner që nuk e do fitoren”.

Rikthehet Superliga, Kukësi- Partizani ngren ‘perden’ e sezonit të ri të kampionatit

Të premten e kësaj jave do të fillojë sezoni i ri i Superligës, ku dhjetë ekipe do të luftojnë në 36 javë për të fituar titullin kampion. Shorti i hedhur disa ditë më parë në Federatën Shqiptare të Futbollit, ka rezervuar një supersfidë që në nisje të kampionatit. Do të jetë Kukësi-Partizani, dy ekipet që mbrëmjen e të dielës u përballën mes tyre në Superkupën e Shqipërisë, me trofeun që i shkoi të ‘demave’, do të përballen përsëri pas katër ditësh.

Stadiumi do të jetë përsëri “Elbasan Arena”, pasi skuadra e Kukësi edhe këtë sezon do t`i zhvillojë ndeshjet në fushë asnjëanëse për shkak se stadiumi “Zeqir Ymeri” ka nisur rikonstruksionin. Do të jetë një sfidë emocionuese, ashtu si dhe të dielën në Superkupë, ku Partizani shënoi katër herë në portën e verilindorëve, ndërsa skuadra e Shpëtim Duros shpërdoroi fitoren e trofeut, duke barazuar dy minuta nga përfundimi i kohës së rregullt. Ndeshja e parë e këtij sezoni të Superligës do të luhet në orën 19:00.

Ndërkohë, pas ndeshjes të së premtes, një ditë më pas do të luhen dhe katër takimet e tjera. Vllaznia-Laçi dhe Skënderbeu-Flamurtari, janë dy sfidat e orës 16:00 që do të luhen të shtunën, ku skuadrat vijnë me ndryshime të mëdha në organikën e tyre. Ndërkohë, ekipi i Vllaznisë do të bëj debutimin në Superligë, pasi vitin e shkuar luajti në Kategorinë e Parë.

Dy ndeshjet e mbrëmjes do të jenë ajo mes Teutës dhe Bylisit, me këtë të fundit që rikthehet në Superligë dhe Tiranës me Luftëtarin. Ekipi i drejtuar nga Ardian Mema ka bërë ndryshime rrënjësore në merkato, duke afruar futbollist shumë cilësor. Ndryshe nga sezoni i shkuar, Tirana do të jetë një ekip pretendent për titullin kampion, të paktën në letër duket e tillë.