Video/ Partizani tremb rivalët, fiton Superkupën me ‘poker’ ndaj Kukësit

Gjashtë gola dhe 120 minuta lojë, një ndeshje plot spektakël, dhe me tre përmbysje të jashtëzakonshme, dhe në fund, Partizani e nis sezonin e ri, ashtu si mbylli të kaluarin, duke fituar trofe. “Të Kuqtë” kanë mundur 4-2 Kukësin duke fituar Superkupën e Shqipërisë, me ndeshjen e zhvilluar në “Elbasan Arena”. Edhe pse me një atmosferë të vakët në shkallët e stadiumit, në fushën e lojës nuk ka munguar spektakli.

Në barazim 1-1 është mbyllur pjesa e parë, me dy gola të realizuar bukur, por me një lojë të vakët në ide dhe agresivitet. “Të kuqtë” kanë kaluar të parët në avantazh që në minutën e 6-të të takimit. Ishte Esat Mala ai që zhbllokoi sfidën, pasi mposhti Avdylin me një gol të bukur nga brenda zonës.

Pasi kaloi mbrojtjen e verilindorëve, Mala futet në zonë dhe nuk e ka të vështirë të shënojë. Deri në minutën e 39-të loja mbetet e ekuilibruar, megjithëse Partizani ka disa mundësi më shumë duke rrezikuar portën kundërshtare, por pa arritur të thellojë diferencën. Megjithatë, në të 39`, Emiliano Musta bën të njëjtën gjë si Esat Mala.

Pasi kalon mbrojtjen e Partizanit me shpejtësi, lë pas dhe portierin Alban Hoxha, Musta shënon golin e barazimit për Kukësin. Gjithçka vendoset në barazpeshë, ndërsa tre minuta para përfundimit të pjesës së parë, Mala ka përsëri një shans të artë për të shënuar, por ndalet nga portieri i Kukësit.

Në pjesën e dytë skuadra verilindore bëhet më agresive, duke sulmuar që në minutat e para portën kundërshtare. Në minutën e 56`, verilindorët fitojnë një goditje dënii. Musta gjuan përsëri duke tundur rrjetën e Alban Hoxhës, dhe njëkohësisht duke shënuar një gol spektakolar.

Megjithatë, kur dukej se Kukësi ishte duke fituar Superkupën, dy minuta para përfundimit të kohës së rregullt, Solomon shënon golin e barazimit për ekipin e Partizanit. Ndeshja shkon në shtesë, aty ku “Të Kuqtë” mbyllin gjithçka shumë shpejt me Broën, që shënon në të 94` dhe 99`. Me shifrat 4-2 mbyllen 120 minuta lojë në Elbasan, me Partizanin që e nis mbarë sezonin e ri, duke fituar trofeun e parë, një javë para nisjes së kampionatit.

Video/ Superkupa e Shqipërisë, ‘paqe’ mes Partizanit dhe Kukësit në pjesën e parë

Është mbyllur në barazim 1-1 pjesa e parë e Superkupës së Shqipërisë mes Partizanit dhe Kukësit, që po zhvillohet në “Elbasan Arena”. “Të kuqtë” kanë kaluar të parët në avantazh që në minutën e 6-të të takimit. Ishte Esat Mala ai që zhbllokoi sfidën, pasi mposhti Avdylin me një gol të bukur nga brenda zonës.

Kalon mbrojtjen e Partizanit me shpejtësi, lë pas dhe portierin Alban Hoxha, dhe shënon golin e barazimit për Kukësin. Gjithçka vendoset në barazpeshë, ndërsa tre minuta para përfundimit të pjesës së parë, Mala ka përsëri një shans të artë për të shënuar, por ndalet nga portieri i Kukësit.

Lerda euforik: Fitojmë Superkupën, Shpëtim Duron nuk e njoh

Partizani ndodhet prej disa ditësh në Elbasan, ku po përgatitet për ndeshjen e së dielës në finalen e Superkupës kundër Kukësit. Për trajnerin Franko Lerda, ekipi është gati në të gjitha aspektet, duke u shprehur se skuadra është e motivuar për ta nisur sezonin duke fituar trofeun e Superkupës.

“Ne jemi gati për ta nisur mirë këtë sezon, kemi dëshirën të bëjmë tonin këtë trofe për ta nisur mirë sezonin. Skuadra po punon shumë mirë, ende nuk kemi të gjithë efektivët në kushtet optimale se kemi pasur përgatitje me emra që janë afruar më vonë. Por po punojmë që të gjithë të jenë sa më gati edhe në aspektin fizik, edhe atë teknik”, është shprehur Lerda.

Ndeshja mund të shkojë dhe barazim, dhe gjithçka të vendoset nga pika e bardhë e penalltisë. Trajneri italian i Partizanit shprehet se është përgatitur për këtë situatë, ndërsa nuk ka preferuar të komentojë deklaratat e bëra nga Shpëtim Duro, se “Parizani luan futboll mbrojtës”.

“Ne jemi përgatitur se e parashikon rregulloja, ndaj kemi përgatitur në stërvitje edhe pjesën e penalltive. Nuk mund të përgjigjem ndaj trajnerit të Kukësit pasi nuk e njoh. Ne e kemi përgatitur me idenë tonë preçize të futbollit. Pastaj do të jetë fusha ajo që do ta japë gjykimin përfundimtar”, ka thën Lerda, ndërsa ka refuzuar të përgjigjet për largimin e Emmanuel Mensah.

“Për këtë çështje duhet të pyetni klubin, për këto gjëra është klubi që merret, unë përgjigjem për fushën e lojës”, është shprehur trajneri Lerda. Ndërkohë, lidhur me merkaton, italiani ka thënë se beson te zgjedhjet e klubit. “Kam ardhur në një vend të huaj, në një kampionat që nuk njoh, me një skuadër që ka fituar titullin, me drejtues që kanë ndërtuar një ekip që funksionon se ndryshe nuk do të fitonte. Nga trajnerët jam si natyre prej atyre që i besojnë klubit, ka edhe trajnerë-menaxherë, por unë i besoj kësaj skeme”.

Musolli: S`kemi diferenca me Partizanin, Superkupën e fitojmë me…fat!

Besar Musolli pritet të mbajë shiritin e kapitenit në ndeshjen e Superkupës së Shqipërisë, që do të zhvillohet të dielën mes Partizanit dhe Kukësit. Si i vetmi lojtar i mbetur nga senatorët në skuadrën verilindore, Musolli ka folur në konferencë për shtyp si lider i ekipit të Kukësit, ku ndër të tjera, ka shprehur dëshirën që të ketë dhe fat të dielën.

“Kemi bërë një fazë të mirë. Nuk kemi pasur pushim, kemi qenë në aktivitet gjithë kohës. Shpresoj që jetë dita jonë, dhe të dalim triumfues nga finalja. Duam të fitojmë. Në fillim, shpresoj që të fitojmë në lojë të rregullt, e të mos shkojë puna deri tek penalltitë. Më pas, nëse më besohet, jam i gatshëm. Ndoshta e shënoj dhe unë penalltinë e fundit dhe i jap fitoren ekipit, kurrë nuk i dihet”, ka thënë Musolli.

Dëmtimi tashmë ka mbetur pas dhe për të ka nisur një cikël i ri në karrierë, pasi ndenji më shumë se gjysmë sezoni pa luajtur. Besar Musolli shpreh keqardhje për lojtarët e larguar nga skuadra, rasti i fundit ishte ai i ish-kapitenit Ylli Shameti. “Kam kaluar një periudhë të vështirë, por që kur jam rikuperuar, deri tani, nuk kam pasur asnjë shqetësim. Jam shumë mirë fizikisht. Shpresoj të vazhdoj kështu. Normale që më vjen keq për ata që janë larguar. Kanë qenë shokë shumë të mirë, për shumë vite. Por, ky është futbolli. Tani, i uroj fat”.

Sa i përket ndeshjes të së dielës, Musolli beson ashtu si dhe trajneri Duro, që Partizani është ekip më i mirë se Kukësi. Megjithatë, sipas kosovarit, diferencat nuk janë të mëdha. “Jemi ndeshur me shumë ekipe, por personalisht kam mendim se Skënderbeu ka qenë ekip më i fortë, se sa Partizani. Për momentin, siç e tha edhe profesor Duro, Partizani është pak më para se ne. Me disa afrime, edhe ne do jemi aty. Kemi lojtarë shumë të mirë dhe cilësorë. Nuk besoj se ka diferenca të mëdha”, thotë Musolli, duke e mbyllur me dëshirën për të fituar trofeun të dielën.

“Nuk më pëlqen të bëj krahasime me ekipet që kemi qenë më para. Por, me ato lojtarë që kemi në ekip, do mundohemi të marrim maksimumin. Edhe me ardhjet e reja, do duan pak kohë sa të ambientohen. Ndaj Partizanit nesër është një finale, dhe ne duam ta fitojmë patjetër Superkupën”.

Superkupa, Duro: Partizani më mirë se Kukësi, por ne jemi gati

Të dielën në “Elbasan Arena” do të luhet ndeshja e Superkupës së Shqipërisë. Partizani dhe Kukësi janë dy skuadrat që do të kërkojnë të fitojnë trofeun e parë sezonal, duke bërë kështu një nisje të mbarë të sezonit të ri të futbollit në vend. Në prag të kësaj sfide, trajneri i Kukësit Shpëtim Duro ka dalë në një konfernecë për shtyp, ku ka analizuar ndeshjen e së dielës. Ish-tekniku i Partizanit që tashmë drejton Kukësin, tregon se “Të Kuqtë” janë disi në avantazh, por shprehet se pavarësisht largimeve që ka pasur në skuadër, ekipi është gati për këtë përballje. “Janë dy ekipe që kanë rivalizuar sezonin e kaluar. Them që, kjo e bën interesante finalen e Superkupës. Partizani, duke iu referuar ndeshjeve të fundit në Europë, është më para. Kukësi ka ndryshime, sepse janë larguar tre lojtarë bazë, si Cuculi, Rrumbullaku dhe Rama. Janë linja e krahut të majtë. Kemi punuar gjithë javën, për t’i zëvendësuar, dhe për ta përgatitur këtë takim”. Ka thënë Duro.

Më tej ai është shprehur se gjatë këtyre ditëve është punuar shumë në merkato për të plotësuar vendet vakante, ndërkohë që tregon se Valdet Rama nuk do të jetë pjesë e ekipit. “Sot paraqitet në stërvitje lojtari nigerian që është aktivizuar në Kroaci, që zëvendëson Cuculin. Këtë javë, po tentojmë për një goditje që të jetë në nivelin e Ramës në sulm. Gjici është i gatshëm, po punojmë shumë edhe me Nexhipin për ta plotësuar skuadrën. Duhet edhe koha e duhur për ambientimin me skuadrën. Unë kam dy javë që kam marrë drejtimin e skuadrës. Duke parë Kukësin e sezonit të kaluar, nuk do doja t’i hiqja asnjë centimetër skuadrës. Ka situata të tilla, dikush nuk bie dakord për kontratën me klubin. Valdeti për arsye të justifikueshme, personale, nuk do jetë. Ideja ime ishte që ta mbaja atë skuadër, që mora në drejtim”.

Duke u rikthyer te ndeshja e së dielës, Duro shprehet se Partizani nuk ka ndryshuar shumë, ndërsa tregon se dëshira e tij do të ishte që të shtyhej me një javë kampionati, për shkak të afrimeve të vonuara në skuadër. “Ne jemi përgatitur, Partizani atë fizionomi ka. Më shumë ka qenë ekip racional, por me rendiment. Edhe ndaj Sherifit, ajo skuadër ka qenë. Ka ndryshuar pak vendosjen për sa i përket skemës. Ne kemi punuar, që të përgjigjemi me atë skemë që ka Partizani. Do kisha dëshirë të paktën të shtyhej një javë kampionati, sepse e thashë, Kotobelli ka 2 ditë që ka ardhur. Partizani është një hap para. Por, kemi kontingjent dhe kapacitet”.

Trajneri i ekipi verilindor ka treguar gjithashtu se klubi po punon për të afruar në skuadër Kristal Abazajn, futbollistin e Anderlecht, që nuk ka gjetur hapësira te skuadra belge, pas përfundimit të huazimit në Kroaci të Osijek. “Po, nuk ka asnjë sekret. Jemi në bisedime. Pastaj, a realizohet, do shohim. Me të po merret Nexhipi. OK-in e fundit e jep presidenti, edhe nga ana financiare. Di që Nexhipi është në tratativa me Abazajn. Nëse nuk bie dakord, kemi edhe një pistë tjetër nga jashtë. Nëse vjen Abazaj, jemi të kompletuar”.

Një ditë para Superkupës, Partizani largon sulmuesin që fitoi titullin kampion

Nga skuadra e Partizanit vijojnë të largohen lojtarë të rëndësishëm, të cilët dhanë kontribut në fitoren e titullit kampion pas 26 vjetësh për “demat”. I radhës, pas largimit të disa senatorëve, është Emmanuel Mensah, një nga lojtarët e afruar gjatë sezonit të kaluar, që bëri paraqitje të mira me “Të Kuqtë” sezonin që lam pas. Lajmin për largimin e Mensah e ka bërë të ditur klubi me anë të një komunikate zyrtare publikuar për mediat.

“Klubi i Futbollit Partizani falënderon Emmanuel Mensah për kontributin e dhënë me fanelën e kuqe. Sulmuesi nga Gana i cili ishte pjesë e suksesit të fitimit të titullit kampion, ka vendosur të ndërpresë aventurën me të kuqtë duke gjetur edhe mirëkuptimin me drejtuesit e klubit”, thuhet në njoftim.

Më tej, po në këtë deklaratë, Partizani citon edhe një falënderim të ish-sulmuesit Emmanuel Mensah, drejtuar tifozëve. “Nëpërmjet kanalit zyrtar, sulmuesi 25 vjeçar falenderon klubin duke i uruar suksese në sezonin e ri, si dhe tifozerinë e Partizanit, e cila do të mbetet pjesë e paharruar në eksperiencën e tij 1 vjeçare duke u shpallur kampion i Shqipërisë. Njëkohësisht klubi dëshiron të falënderoj Emmanuel Mensah, duke i uruar shumë suksese në karrierën e tij sportive”, përfundon njoftimi i Partizanit.

Gjashtë vjet te Partizani, largohet Labinot Ibrahimi, i falenderon të gjithë

Mbrojtësi Labinot Ibrahimi i ka dhënë fund aventurës me Partizanin pas gjashtë vjetësh pjesë e klubit të “demave”. Me anë të një postimi në faqen e tij në Facebook, mbrojtësi kosovar ka lajmëruar tifozët e Partizanit se duke nisur prej të mërkurës nuk do të jetë më pjesë e klubit.

“Të dashur miq, dashamir të mi dhe të skuadrës së Partizanit. Nga sot nuk do të jem më pjesë e këtij klubi. E falënderoj presidentin Gaz Demi për mbështetjen që më ka dhënë këto 6 vjet, falënderoj drejtorin Olsi Rama, falënderoj trajnerët me të cilët punova, shokët e skuadrës, gratë të cilat na bonin bukën e na lanin rrobat, punëtorët e fushës dhe çdo njeri që e rrethon këtë klub”, shkrun ndër të tjera Ibrahimi.

Më tej ai vijon me falënderimet, duke shprehur mirënjohjen për tifozët Ultras Guerrils, ndërsa e mbyll mesazhin e tij duke u shprehur se largohet me kokën lartë, pasi arriti qëllimin, fitoren e titullit kampion. “Unë po largohem nga klubi me të cilin u dashurova që në ditën e parë që erdha. Po largohem me kokën lartë, pasi ja arrita qëllimit që kishta, titullin kampion”, shkruan ndër të tjera Ibrahimi.

UEFA i jep Partizanit 800 mijë euro, përfitojnë dhe Kukësi, Laçi e Teuta

Klubet shqiptare që luajtën në Europë, ndonëse nuk shkuan shumë larg, mund të gëzojnë pasi do të presin shpërblimin financiar që jep UEFA për ekipet që marrin pjesë në kompeticionet e saj. Ekipi i Partizanit, do të fitojë nga pjesëmarrja në Europë, së bashku me shpërblimin si Kampion i Shqipërisë, rreth 800 mijë euro. Kjo është një shumë e konsiderueshme të ardhurash, që do të thotë siguri financiare për klubin dhe lojtarët.

Teuta, Laçi dhe Kukësi do të përfitojnë secili nga 240 mijë euro, si ekipet që luajtën në turin e parë të Europa League. Ky është shpërblimi që UEFA jep vetëm për pjesëmarrjen në turet kualifikuese të saj, ndërsa në rast se këto ekipe do të kishin kaluar turin e parë, shuma e fituar nga pjesëmarrja në Europë do të ishte sa dyfishi që do të fitojnë këtë sezon.

Ndonëse nuk arritën të bënin më të mirën në kupat e Europës, shumat financiare që përfitojnë katër ekipet shqiptare nga UEFA, është ndihmë e konsiderueshme për të përballuar shpenzimet vjetore të klubeve, kryesisht ato të pagave të lojtarëve.

Në kampionatin kosovar, që u përfaqësua me dy ekipe, skuadra e Feronikelit ka arkëtuar plot 1 milionë euro nga pjesëmarrja në Europë, ndërsa Prishtina ka përfituar 220 mijë euro. 800 mijë euro ka përfituar ekipi tjetër shqiptar, Shkëndija e Tetovës në Maqedoninë e Veriut.

Sherifi moldav ‘deporton’ Partizanin nga Europa

Ka zgjatur vetëm 63` minuta suksesi i Partizanit ndaj Sherif Tiraspolit në transfertë. Goli i shënuar nga Jasir Asani në minutën e 29` të takimit, nuk mjaftoi që ëndrra e Partizanit në Europë të vijonte dhe më tej. Skuadra e drejtuar nga trajneri Franko Lerda ka barazuar 1-1 në Moldavi ndaj skuadrës vendase të Sherif Tiraspol, por humbja në “Selman Stërmasi”, 0-1 në favor të miqve, e nxjerr përfundimisht Partizanin nga Europa League.

Sa i përket ndeshjes në Moldavi, Partizani ka qenë superior duke dominuar takimin, ng qarkullimi i topit deri te rastet e krijuara. Në të 29`, Asani del bukur në qendër të zonës dhe i asistuar nga Solomon, shënon me të majtën duke kaluar skuadrën e tij në avantazh. Pjesa e parë nuk sjell ndryshim në rezultat, ndërsa në të dytën, ekuilibrat vendosen përsëri në fushë.

Ishte sulmuesi Ndiaje që mposhti Alban Hoxhën pas një goditje dënimi, duke shënuar nga brenda zonës, ndonëse me dyshime për pozicion. Megjithatë deri në fund të ndeshjes, Partizani u mundua të gjente golin e avantazhit, që do të mjaftonte për të vijuar më tej në Europa League, por miqtë u treguan të kujdesshëm duke mbrojtur barazimin 1-1.

Në këto kushte, me rezultatin e përgjithshëm 2-1, Sherif Tiraspol vijon më tej në turin e tretë të Europa League, ndërsa Partizani bëhet skuadra e fundit që dorëzohet në kompeticionet evropiane, pas Kukësit, Teutës dhe Laçit.

Shkëndija “skuqet” me tre kartonë, largohet nga Europa, dështon dhe Feronikeli

Me tre kartonë të kuq dhe turp, Shkëndija e Tetovës i ka dhënë fund aventurës në Europë. Skuadra e drejtuar nga trajneri Qatip Osmani ka luajtur këtë të martë ndeshjen e kthimit ndaj ekipit të Dudelange në Luxemburg. Ndeshja ka përfunduar në barazim 1-1 por ekipi i Dudelange u kualifikua pasi fitoi ndeshjen e parë në Tetovë me rezultatin 1-2. Megjithatë, sikur të mos mjaftonte largimi nga Europa, Shkëndija e ka mbyllur ndeshjen me tetë lojtarë, pasi Musliu, Nafiu dhe Ibraimi u ndëshkuan me kartonë të kuq brenda dhjetë minutash.

I pari ishte Musliu, i cili në të 85` mori kartonin e dytë të verdhë, ndërsa Nafiu u ndëshkua në të 90+4` me kartonë të kuq. Nervat dhe tensionit i dhanë ndëshkimin edhe Ibraimit, një minutë pas Nafiut, duke e lënë ekipin me tetë lojtarë në fushë, pavarësisht se vetëm një minutë më vonë ndeshja përfundoi. Pak a shumë i njëjti skenar ka ndodhur edhe me Feronikelin e Kosovës, që është eleminuar nga Slova Bratislava pas humbjes në dy ndeshjet (1-2 ndeshjen e parë dhe 0-2 në të dytën).

Skuadra kosovare u mbeti me dhjetë lojtarë në minutën e 89` të takimit, kur Zeka mori kartonin e dytë të verdhë dhe si rrjedhojë të kuqin. Të enjten do të jetë Partizani që do të luajë ndeshjen e kthimit në transfertë ndaj Sherif Tiraspolit, duke synuar mrekullinë e kualifikimit, pas humbjes në ndeshjen e parë në “Selman Stërmasi” me rezultatin 1-0.