Exclusive/ Si do mbrojë Basha “fitoren”: Kur t’iu pyesin për motin, thoni: Zgjedhjet ishin nul

“Edhe po t’ju pyesin për motin, thoni që zgjedhjet janë nul. PD fitoi”. Mund t’ju duket e çuditshme por kjo fjali është pjesë e tezave të Partisë Demokratike të hartuara pas zgjedhjeve të 30 qershorit dhe të shpërndara për anëtarët e kryesisë dhe ish deputetët e Grupit Parlamentar. Realstory.al ka zbulur në mënyrë ekskluzive dokumentin që i është shpërndarë anëtarëve të kryesisë së PD-së dhe një nga porositë që Basha ka për të vetët është që “të përsërisim deri në mërziti, pa u lodhur 2 gjëra, votimet janë të paligjshme, PD fitoi”.

Tetë janë tezat kryesore që duhet t’i përmbahen anëtarët e PD-së. “Përsëritja e gjetjeve kryesore të raportit të OSBE/ODIHR; Këto janë votime të paligjshme; Për herë të parë votime me një parti; Për herë të parë përjashtohet opozita nga komisionet; Edhe pse me vetëm një kandidat nuk lanë as mundësinë në fletë votimi të votohej kundër por vetëm një kuti ku mund të votohej vetëm pro; Edhe Fronti Demokratik në komunizëm kishte formalisht dy kuti një Pro një Kundër; Edhe pse vetë kandidoi, vetë votoi dhe vetë numëroi, i manipuloi të gjitha; Edi Rama manipuloi edhe një proces që e kontrollonte të gjithin vetë dhe kjo tregon edhe njëherë se me të nuk mund të ketë zgjedhje të lira”, shkruhet në dokument.

Përmes këtij dokumenti duket qartë se Basha e PD ka vendosur të mos reflektojë por të vazhdojë me këmbëngulje ta quaj nul 30 qershorin si dhe të bindë të vetët se ata janë fitues.

“Shqiptarët braktisën në masë maskaradën e votimit një partiak të Edi Ramës. 85 përqind e votuesve të regjistruar refuzuan votimet e paligjshme moniste. 85% e shqiptarëve duan ndryshim. Kjo është e vetmja vlerë e 30 Qershorit. Gjithçka tjetër është farsë e paligjshme, antikushtetuese. PD dhe opozita doli më e fortë dhe më e bashkuar nga 30 qershori”, shkruhet në dokument.

Gjithashtu në dokument u jepet porosi ish deputetëve dhe anëtarëve të PD që të mos u përgjigjen çdo lloj pyetje që u drejtohet në mënyrë që të mos prodhojnë lajme, por t’u qëndrojnë vetëm këtyre tezave.

“Edhe nëse pyetemi për motin, ne duhet të themi “sipas raportit të OSBE/ODIHR”. Nuk duhet të komentojmë çdo pyetje që na bëhet. Jo çdo pyetje duhet të marrë një përgjigje që të përbëjë lajm patjetër. Ne duhet të mësohemi të mos i japim përgjigje çdo gjëje dhe sipas rastit t’i themi atyre që nuk kemi koment apo kjo pyetje nuk ka rëndësi për thelbin e çështjes. Është e rëndësishme të jemi koncizë”, shkruhet në dokument.

Porosi jepen edhe në lidhje me qëndrimet që PD duhet të mbajë për deklaratat e presidentit, duke theksuar se në asnjë mënyrë nuk duhen komentuar akuzat e tij për Sorosin, të zbuluar më herët nga realstory.al. (lexo këtu)

“Ne kemi vlerësuar përherë përpjekjet e Presidentit për zgjidhjen e krizës. Por qëndrimi ynë është i pandryshuar: ne nuk hyjmë në zgjedhje pa largimin e Edi Ramës dhe nxjerrjen e drejtësisë së atyre që vodhën zgjedhjet në bashkëpunim me krimin. Për qëndrimet e tjera të Presidentit ne nuk kemi asnjë koment. (Këtu përfshihet edhe çështja e Sorosit)”, shkruhet në tezat e PD-së.

Në lidhje me qëndrimet e SHBA dhe BE, porosia kyçe e lidershipit të PD-së është “nuk kemi asnjë koment”.

“Ne nuk komentojmë qëndrimet e SHBA dhe BE. Qëndrimi ynë për zgjedhjet është i qartë: ne nuk i njohim këto zgjedhje, pasi ato janë të paligjshme. OSBE-ODIHR ka konfirmuar që këto zgjedhje janë të paligjshme. Manipulimet e shumta që u zbuluan vërtetojnë qëndrimin tonë se Edi Rama nuk mund të organizojë zgjedhje të lira dhe të ndryshme. Ai vodhi edhe votat e veta”, shkruhet në tezat e PD-së.

Ish deputetëve dhe anëtarëve u jepet porosi të përmendin në çdo dalje të tyre me shifra pjesëmarrjen e ulët në zgjedhje si dhe t’i cilësojnë të paligjshëm të zgjedhur e rinj vendorë.

Në dokument nënkupton edhe nxitja e trazirave në mënyrë që të mos lejohet marrja e zyrave nga të zgjedhurit e rinj vendorë. Në tezat e PD-së shkruhet se PD e konsideron të paligjshëm zaptimin e zyrave nga të zgjedhurit e rinj vendorë dhe se si reagon populli këtë nuk e parashikon dot askush.

“Emrat që do të dalin nga votimet e paligjshme të 30 qershorit janë rezultat i zgjedhjeve të paligjshme, dhe në kundërshtim me vullnetin e thuajse të gjithë votuesve të Shkodrës, Kavajës, Lezhës, Kamzës, Tropojës dhe bashkive të tjera.

Në këto kushte çdo përpjekje për zaptimin e bashkive është e paligjshme dhe do të trajtohet si e tillë.

Çfarë do të thotë kjo??? Çfarë do bëni???

Ne i konsiderojmë të paligjshme dhe do e trajtojmë si të paligjshëm çdo përpjekje për pushtimin e bashkive.

Se si vendos ti përgjigjet populli, banorët e këtyre bashkive, këtë nuk mund ta parashikojmë sot dhe nuk ka njeri që e parashikon dot!”, shkruhet në dokument.

Në të gjithë dokumentin duket qartë se strategjia e PD-së në ditët në vijim nuk ndryshon asnjë presje me atë që ka bërë deri tani, të mohojë zgjedhjet e 30 qershorit, ta cilësojë veten fituese, të sulmojë me akuza Ramën e qeverinë si dhe të krijojë trazira nëpër bashki duke mos lejuar marrjen e zyrave nga të zgjedhurit e rinj vendorë./Realstory.al

Exclusive/ Dokumenti që provon “tradhtinë” e PD ndaj Metës: Mos prekni Soros

Realstory.al ka zbuluar një dokument të brendshëm të Partisë Demokratike, të shpërndarë anëtarëve të Kryesisë dhe ish deputetëve të Grupit Parlamentar, në mënyrë që ata të orientohen në lidhje me qëndrimet që duhet mbajnë në publik për çështje të caktuara.

Dokumenti ekskluziv i gjetur nga realstory, u jep këshilla anëtarëve të kryesisë dhe ish deputetëve se çfarë qëndrimesh duhet të mbajnë në lidhje me zgjedhjet duke iu referuar gjetjeve të OSBE/ODIHR që “theksojnë se 30 qershori nuk ishte në interesin e qytetarëve shqiptarë dhe votimet ishin të paligjshme”.

Sipas dokumentit të shpërndarë nga Sekretari i Përgjithshëm i PD-së që nuk mban as firmë as vulë, problemet më serioze të gjetjeve të OSBE ishin: votime pa zgjedhje, përjashtim i padrejtë i opozitës nga administrimi i zgjedhjeve dhe monitorimi i procesit zgjedhor, mosfunksionimi i gjykatave, vendime të gabuara të KQZ-së, marrje e kompetencave të Gjykatës Kushtetuese, si dhe gjetje të tjera, të cilat u janë dhënë të detajuara në dokument.

Dhe pikërisht të gjitha këto qëndrime ne i kemi dëgjuar nga eksponentë të ndryshëm të PD-së në daljet e tyre publike.

Por ajo që bie në sy në dokument është porosia që të mos preken aspak deklaratat e akuzat e Metës ndaj Sorosit.

“Për qëndrimet e tjera të presidentit ne nuk kemi asnjë koment. Këtu përfshihet edhe çështja e Sorosit”, shkruhet qartë me germa të zeza në dokument.

Pra në këtë dokument konfirmohen qëndrimet në publik të përfaqësuesve të PD. Në fakt deri ditën e sotme nuk ka asnjë qëndrim publik të eksponentëve të PD-së në lidhje me akuzat e presidentit Meta për “deep state”, ku ai akuzonte Sorosin se ka kapur shtetin në bashkëpunim me Ramën dhe veçanërisht reformën në drejtësi.

Asnjë deklaratë, madje as nga Sali Berisha me të cilin Soros konfirmonte në një intervistë për Sokol Ballën në vitin 2005 se kishin marrëdhënie të shkëlqyera. (shih videon këtu)

Pikërisht ky dokument i shpërndarë nga lidershipi i PD-së e konfirmon këtë. Ky dokument është prova që Soros ka marrëdhënie shumë të mira me Partinë Demokratike, veçanërisht me lidershipin e saj, po ashtu siç ka me Partinë Socialiste dhe krerët e saj. Por niveli i “dashurisë” sigurisht ndryshon. Partia Socialiste sot është në qeveri, ndërsa PD në rrugë. Por kjo nuk e pengon selinë blu të mos prekë e cenojë në asnjë mënyrë Sorosin.

Dokumenti gjithashtu konfirmon që ka një thyerje mes Partisë Demokratike dhe presidentit Meta. PD nuk pranon negociatat e presidentit për të ulur palët. Por mesa duket kjo ka lidhje me preferencën e PD për interlokutorin e krizës, që siç duket qartë, ky nuk është presidenti Meta.

Përsa i përket qëndrimit të presidentit, në dokument theksohet se “PD ka vlerësuar përpjekjen e tij për zgjidhjen e krizës, por qëndrimi ynë mbetet i pandryshuar se nuk hyjmë në zgjedhje pa largimin e Edi Ramës dhe nxjerrjen para drejtësisë se atyre që vodhën zgjedhjet në bashkëpunim me krimin”.

Pra Partia Demokratike vazhdon t’i qëndrojë kërkesës së vazhdueshme se negociatat nuk do të bëhen me Ramën kryeministër dhe se nuk do të ketë zgjedhje me Ramën kryeministër.

Pikërisht ky qëndrim i PD-së shpjegon edhe deklaratën e Metës një ditë më parë, i cili tha se i është drejtuar drejtuesve të OSBE me një letër, prej të cilës kërkon ndërmjetësimin e negociatave mes palëve. Pasi e di në vetë të parë se opozita mund ta pranojë në shtëpi, por jo në tryeze negociatash me Edi Ramën./realstory.al

Pretendimet e Salianjit në KPA për Osmanin rrëzohen nga “prova e tij”

Ish-deputeti i PD, Ervin Salianji ka dorëzuar të mërkurën një CD në Kolegjin e Posaçëm të Apelimit, ku pretendon se ka materiale inkriminuese për prokurorin Gent Osmani.

Salianji pas dorëzimit të CD në KPA, tha në një deklaratë për mediat se prokurori Gent Osmani shfaqet duke bën biseda inkriminuese me Alfred Alizotin, i njohur në çështjen “Babalja”. Sipas Salianjit në përgjime tregohen lidhjet e tij me krimin për të ndikuar në çështje të caktuara për ‘i shërbyer politikës. Të tillë prokurorë deklaroi Salianji duhet të dalin nga sistemi nëse duam një drejtësi të pavarur.

“Sapo dorëzova një CD me të dhëna përgjuese, të bëra me vendim gjykate nga ana e prokurorisë, në të cilat subjekti në rivlerësim, Gent Osmani, sot anëtar i KLP-së, një prej drejtuesve të Këshillit të Lartë të Prokurorisë, i cili vendos për emërimin, shkarkimin apo transferimin e prokurorëve të çdo niveli, po ashtu edhe për krijimin e SPAK-ut, ka komunikuar në mënyrë jo vetëm miqësore, por edhe duke prishur dhe fshirë një pjesë të përgjimit, siç duket në përgjimin që do ta bëj publike edhe për mediat, me shtetasin Alfred Alizoti. E ka vendosur vetë në përgjim dhe ka komunikuar po kështu në mënyrë miqësore, pa lënë më pas asnjë lloj procesverbali, pa pasur asnjë lloj dokumentimi të të gjithë situatës së komunikimit me të dhe duket që është vendosur në mënyrë joprofesionale në shërbim të politikës dhe padiskutim të ish-ministrit Xhafaj, i cili e ka trysnuar për ta mbajtur peng në Kolegjin e Apelimit, sepse në KPK e ka kaluar vetingun.

Është një rast flagrant se si një prokuror, në mënyrë joprofesionale vendoset në shërbim të politikës, duke montuar një çështje të caktuar. Ne nuk po sulmojmë drejtësinë, por jemi për drejtësi të pavarur. Të tillë prokurorë duhet të dalin nga sistemi. E kam dorëzuar materialin sipas procedurave. Duhet të hapet një hetim për shpërdorim detyre për Gent Osmanin” – tha Salianji

Gent Osmani, prokurori i Krimeve të Rënda dhe anëtarë i Këshillit të Lartë të Prokuroisë, pritet të marrë të enjten vendimin final nga KPA për procesin e vettingut. Ai u konfirmua nga shkalla e parë e Vetingut, por Komisioneri Publik ankimoi vendimin, duke kërkuar shkarkimin e tij nga detyra, me argumentin se nuk justifikon pasurinë.

Ajo që vihet re në një video të shkurtër e përgjimit, të shpërndarë nga vetë PD-ja, është se në bisedën mes Alfred Alizotit dhe prokurorit Gent Osmani nuk ka asgjë miqësore, siç pretendon ish deputeti demokrat Salianji. Madje në një moment prokurori i drejtohet Alizotit, i cili e thërret në emër, duke i thënë “jo Genti, por prokuror Genti, nuk jam shoku jot” Kjo frazë e thjeshtë dhe e shkurtër hedh poshtë të gjithë pretendimin e Salianjit se mes tyre ka pasur një bisedë miqësore.

Boçi qetëson militantët: Nuk i kemi dorëzuar armët, do e rrëzojmë Ramën

Partia Demokratike është tërhequr nga protestat por jo nga përpjekja e saj për të rrëzuar Ramën. Ish deputeti Luçiano Boçi ka deklaruar se “opozita nuk i ka dorëzuar armët, por është në betejë për rrëzimin e Ramës”, megjithëse nuk ka dhënë detaje se cili do të jetë plani i ri që do të ndjekë PD për rrëzimin e kryeministrit.

“Nuk mund të eklipsohet fakti i forcës së opozitës në realizimin e një aventure politike, siç ishte 30 qershori, i cili nuk ishte proces zgjedhor, por votues. Të mos ketë iluzione, nuk i kemi dorëzuar armët. Opozita është këtu, është në betejë, opozita është në luftën e saj që vazhdon në forma të tjera. Nuk kemi dorëzuar as më të voglën armë dhe vazhdojmë betejën tonë me synimin kryesor: largimi i Ramës dhe zgjedhjet e parakohshme”, tha Luçiano Boçi në një intervistë për A2CNN.

Së fundi kreu i PD-së ka nisur një tur takimesh në strukturat e PD-së në rrethe, tur që është parë më së shumti si një fushatë e Bashës brenda PD-së për të shuar zërat kundër tij, tani që pas zgjedhjeve të 30 qershorit ka mbetur pa asnjë pushtet. Edhe deklarata e Boçit duket se vjen në po të njejtën linjë me përpjekjen e Bashës. Një thirrje për të mbajtur të karikuar militantët e PD-së që të vazhdojnë të shpresojnë se Basha do rrëzojë Ramën. Megjithëse ende nuk ka një plan të qartë për hapat që do të hedhë në vijim.

Kohët e fundit brenda PD-së, janë shtuar zërat kundër Bashës dhe vendimeve të tij për të djegur mandatet apo për të bojkotuar zgjedhjet e 30 qershorit. Pas Topallit dhe Arben Imamit në studion e Realstory të Sokol Ballës, edhe Arben Ristani tha se Rama tashmë largohet vetëm me zgjedhje, ndryshe nga sa thotë Basha që kërkon zgjedhje të parakohshme pa Ramën kryeministër./Realstory.al

RISTANI NË REAL STORY: BOJKOTI DËSHTOI, KËSHILLI TË RISHIKOJË VENDIMIN. RAMA IKËN VETËM ME ZGJEDHJE

Basha “Vetting” gjithë PD-së (a ka një çështje besimi në parti?)

Partia Demokratike ka hyrë në një fazë ristrukturimi, teksa drejtuesit e saj kanë deklaruar më herët se gjatë gjithë verës do ketë një organizim strukturash. Pjesë e këtij organizimi duket se do të jetë dhe një filtër i imtësishëm i gjithë anëtarësisë së PD-së, duke nisur nga baza deri në formuet më të larata drejtuese të saj.

Konkretisht, Partia Demokratike, duke imituar “Vettingun” e gjyqtarëve dhe prokurorëve dhe atë të policisë, por dhe procesin e dekriminalizimit, ka hartuar një pyetësor prej 13 faqesh, ku të gjithë anëtarët e saj do të vetëdeklarohen.

Formulari i vetëdeklarimit për anëtarësinë e PD-së, përmban pyetje të ndryshme, të cilat në shumicën e tyre janë të ngjashme me ato të formularëve të vetëdeklarimit të zyrtarëve që janë pjesë administratës publike apo që kandidojnë për poste drejtuese.

Në formular kërkohen të dhëna personale, të dhëna për punësimin, shkollimin, apo të dhëna për pastërtinë e figurës që lidhen me gjendjen gjyqësore të anëtarëve të PD. Formulari merr rëndësi të madhe për anëtar të Partisë Demokratike që do të garojnë të jenë pjesë e forumeve të larta drejtuese në Tiranë dhe rrethe, të cilët duhet të deklarojnë gjithçka për veten e tyre.

Anëtarët e PD do të vetëdeklarohen në seksione të veçanta për veprimtarinë e tyre politike, duke nisur prej vitit 1944 deri në vitin 1991, ku të vetëdeklaruarit do të përgjigjen nëse kanë qenë anëtar apo kandidat i Byrosë Politike, Anëtarë i Komitetit Qendrorë i Partisë Punës, Anëtar i Presidiumit të Kuvendit Popullor, Kryetar i Gjykatës së lartë, Prokuror i Përgjithshëm, Kryetar i Hetuesisë së Përgjithshme, anëtar i Këshillit të Ministrave, Bashkëpunëtor i ish sigurimit të shtetit, anëtarë i komisionit qendrorë të Dëbim-Internimit, apo denoncues ose dëshmitar në procese politike të posaçme.

Nuk dihet ende qëllimi i vërtetë i plotësimit të këtij formulari, por gjithçka vjen në një kohë kur zërat kundër Bashës në PD janë shtuar dhe divergjencat brenda partisë nuk janë të pakta.

Javët e fundit, pas zgjedhjeve të 30 qershorit, zërat kritikë ndaj Bashës janë shtuar. Nga Jozefina Topalli, Edvin Kulluri, Arben Imami, e deri tek Arben Ristani, kanë folur për situatën në parti. Ristani, vetëm disa ditë më parë në “Real Story”, kërkoi që PD duhet të hapet dhe të krijohet besimi brenda anëtarësisë së partia është gati për të ardhur në pushtet.

Ndaj, nuk dihet nëse ky formular vetëdeklarimi mund të jetë një masë paraprake nga kreu i PD-së për të frenuar kritikat, jo nga ata që janë jashtë, por ata që janë ende pjesë e strukturave dhe kanë role drejtuese në parti. Apo është vërtet një mision për të vendosur një standard brenda së djathtës, ku çdo anëtar duhet të jetë i ‘pastër’ dhe i denj për të qenë pjesë e forumeve drejtuese të kësaj partie dhe gjithashtu për të kandiduar në poste të rëndësishme nën siglën e PD?! Këtë do ta gjykojë koha!

Ademi i hedh “hi syve” Topallit: Dogjëm kartonë (që shkrumbuan klasën)

Kryetarja në detyrë e Bashkisë së Shkodrës, Voltana Ademi, ka deklaruar se PD nuk ka djegur shkolla, por disa kartonë, duke mos përmendur faktin se ato ishin materialet zgjedhore që ndodheshin brenda një klase dhe bashkë me “kartonët”, ajo klasë doli jashtë përdorimit, siç duket edhe nga pamjet e ditës së ngjarjes. Voltana Ademi është mbrojtur me faktin se po mbronte shkollën nga policia, duke i hedhur “hi syve” Topallit, por jo vetëm, për djegien e shkollës, ku ishte instaluar KZAZ nr. 3 në Shkodër

Pamjet nga momenti i djegies së “kartonëve”, siç pretendon Voltana Ademi

“Në Shkodër nuk është djegur asnjë ndërtesë. Atë ditë janë djegur kartonë. Shkolla nuk është djegur. Ne nuk i djegim shkollat, ne nuk i djegim institucionet. Ne nuk kemi lejuar policinë që të ndërhynte dhe të bënte çfarë të dojë”, ka deklaruar Ademi e ftuar në studion e “News 24”. Ajo u shpreh se Partia Demokratike nuk është një parti e dhunës, edhe problemet ka dashur t’i zgjedhë në mënyrë demokratike dhe me anë të gjykatave shqiptare.

Pas zjarrit në një klasë në katin e parë të një shkolle në Shkodër, Jozefina Topalli shpërtheu kundër Lulzim Bashës e Voltana Ademit, aty ku ndodhej KZAZ-ja nr. 3, duke u shprehur se ‘djegia e shkollës nuk është historia e Shkodrës, e kundërta është historia e këtij qyteti’.

“Kjo nuk ka ndodhur kurrë në 3 dekada. Një demokrat nuk djeg as mandate as shkolla. Një demokrat i vërtetë nuk hedh as molotov e as ka frikë nga zgjedhjet”, shkruante ish-deputetja e PD-së, duke iu drejtuar Lulzim Bashës dhe drejtueses së bashkisë së Shkodrës Voltana Ademi, që kishte dalë ‘flamurmbajtëse” e zbatimit të dekretit të Metës.

Madje, për këtë ngjarje të turpshme reagoi edhe deputetja Rudina Hajdari, e cila premtoi dhe dha në dispozicion të ndërtimit të klasës së djegur rrogën e saj si deputete.

“1200 vota më shumë”, PD në Roskovec padi ndaj komisionarëve të PS

Partia Demokratike Roskovec ka paditur në Prokurorinë e Fierit të gjithë anëtarët e komisioneve në qendrat e votimit të ZAZ nr.60 në procesin e 30 qershorit. Në kallëzimin penal PD ngre akuzat e shpërdorimit të detyrës, falsifikimin e materialeve zgjedhore dhe rezultatet e zgjedhjeve, shkelje të fshehtësisë së votimit dhe votimi më shumë se një herë ose pa u identifikuar.

Partia Demokratike deklaron se disponon të gjitha provat e këtyre parregullsive gjatë 30 qershorit nga monitorimet në terren dhe fakte të grumbulluara. PD madje akuzon se kandidatja e PS edhe pse e vetmen në garë në kutinë e saj janë shtuar 1200 fletë votimi më shumë se sa persona që kanë shkuar të votonin.

Partia Demokratike në Roskovec ka bërë thirrje që prokuroria të hetojë me profesionalizëm provat dhe të marrë një vendim të paanshëm.

“Prandaj duke deklaruar se në kutitë e votimit ka më shumë fletë votimi se votues, i gjithë procesi është i manipuluar dhe për rrjedhojë rezultati në Bashkinë Roskovec mbetet “Nul”.” – thuhet në deklaratën e kallëzimit penal të PD në Roskovec.

Ristani në Real Story: Bojkoti dështoi, Këshilli të rishikojë vendimin. Rama ikën vetëm me zgjedhje

Arben Ristani, ish-Sekretar i Përgjithshëm i Partisë Demokratike, ishte i ftuari i emisionit ‘special’ në “Real Story” të gazetarit Sokol Balla. Një nga ish-njerëzit më të afërt të Lulzim Bashës disa vite më parë, Arben Ristani ka folur për shumë çështje që lidhen me situatën e krizës politike në vend, por kryesisht me Partinë Demokratike. Ristani u shpreh se aksioni opozitar, me djegien e mandateve, bojkotin e zgjedhjeve të 30 qershorit dhe protestat e dhunshme, dështoi. Ndaj, sipas tij, tashmë është koha për reflektim, dhe Lulzim Basha duhet të pranojë zgjedhjet, si e vetmja rrugë për të mundur Edi Ramën. Sipas ish-deputetit demokrat, Lulzim Basha duhet të fokusohet te PD dhe të mendojë për hapjen e saj, si Berisha në 2005, që solli më pas fitoren e të djathtëve. Arben Ristani gjithashtu ka folur dhe për çështje të tjera, si 13 tetori, datë për të cilën Rsitani u shpreh se po shkon drej zhvleftësimit, për shkak të marrjes së mandateve nga të zgjedhurit e rinj në 30 qershor. Megjithatë, Ristani shtroi propozimin që PD duhet të ulet në dialog, dhe të diskutojë për një datë të re zgjedhjesh me Edi Ramën, në mënyrë që votat e djathta të përfaqësohen në pushtetin lokal.

Më poshtë, pjesët kryesore të deklaratave të Arben Ristanit.

Ristani në “Real Story”: Basha la demokratët të pa përfaqësuar, pasoja të tmerrshme për PD

Arben Ristani ka qenë i ftuari i emisionit ‘special’ në “Real Story” të gazetarit Sokol Balla. Ish-sekretari i PD-së, një nga ish-njerëzit më të afërt të Lulzim Bashës, ka treguar se tashmë askush në Shqipëri nuk është i kënaqur me situatën në vend. Ristani u shpreh se: “Askush në këtë moment nga opozita nuk mund të jetë i kënaqur, por unë shoh që dhe shqiptarët nuk janë të kënaqur sepse nuk jetojnë më në një vend normal. Nuk kanë më një politikë normale, një ekonomi të mirë, po largohen nga vendi çdo ditë. Shqipëria është në krizë dhe do zgjidhje. Patjetër që pesha e madhe sigurisht është e Qeverisë, sepse ajo ka detyrimin kryesor që të sigurojë normalitetin në vend. Por edhe opozita ka pjesën e saj në këtë përpjekje për ta çuar Shqipërinë drejt Europës që kemi ëndërruar prej vitesh tashmë”, tha Ristani.

Lidhur me aksionin e opozitës, Ristani u shpreh se gjithçka ishte e menduar, por ajo që nuk dinin ishte reagimi ndërkombëar. Sipas Ristanit, vendimmarrja e Bashës për të bojkotuar zgjedhjet e 30 qershorit, duhet të kishte informacion se çfarë mendimi kishin ndërkombtarët për këtë. Sipas Ristanit, ajo që rezultoi më pas, ishte se PD rrezikoi të shpallej ‘organizatë e dhunshme’.

“Më pas ky veprim u shoqërua me një vendimmarrje për të mos hyrë në zgjedhje me Ramën kryeministër. Në këto kushte kryetari i partisë ka pasur informacionin më të madh, dhe u besua se diçka e tillë do të ishte dhe e dakordësuar, për të arritur në qëllimin final. Ajo që ndodhi ishte se rrezikuam dhe të shpalleshim organizatë e dhunshme. Si përfundim u krye maskarada e zgjedhjeve, pasi ato nuk ishin zgjedhje. PD tashmë humbi veç pushtetit qendror dhe atë lokal. Jemi përpara një pasoje të tmerrshme në politike. E gjithë e djathta, dhe aleatët, dhe një pjesë e shqiptarëve që besojnë te PD, mbetën të papërfaqësuar, qoftë në pushtet qendror, qoft në pushtet lokal”, tha Ristani.

Lënia e mandateve, Ristani: Edhe Murrizi votoi ‘pro’, por s`dinim ç`mendonin ndërkombëtarët

Arben Ristani ishte i ftuari i mbrëmjes në “Real Story” të gazetarit Sokol Balla. Ish-Sekretari i Përgjithshëm i Partisë Demokratike, ka treguar një detaj interesant nga vendimi opozitës për djegien e mandateve në muajin shkurt. Ristani, duke treguar se vendimi për të djegur mandatet nuk erdhi rastësisht, por i menduar, u shpreh se deputeti demokrat, Myslim Murrizi, votoi ‘pro’ lënies së mandatit dhe më pas u rikthye në Parlament. “Djegia e mandateve nuk erdhi si dielli në një ditë me shi. Ishte paraprirë nga deklarata të Berishës. Te demokratët ishte një mendim që kishte kohë që rrihej, ka qenë një vendim i marrë me unitet. Vendimi për të vajtur këtu, ishte unanim. Madje edhe Murrizi ka ngritur dorën lart pro vendimit. Pothuajse ka qenë 100% i dakordësuar. Edhe unë kam votuar pro”.

Më tej, në delartën e tij, Ristani u shpreh se ndonëse mendimi për lënien e mandateve nuk erdhi si rrufeja në qiell të hapur, në fakt, anëtarët e kryesisë dhe deputetët, nuk kishin informacion rreth qëndrimeve të ndërkombëtarëve. Sipas tij, ajo çka ndodhi më pas, tregoi se ndërkombëtarët nuk ishin pro këtij vendimi. “Por informacioni që na mungonte ne ishte konsulta me partnerët ndërkombëtarë, që janë ekskluzivitet i liderit. Duhet të ishte diçka e dakordësuar para se të merrej. Fakti që nuk pati mbështetje ndërkombëtare, tregon që nuk ishte dicka e dakordësuar”. Gjithashtu, Ristani shton se tashmë demokratët janë të papërfaqësuar në të gjithë Shqipërinë, duke e cilësuar këtë si momentin e duhur për reflektim nga kreu i PD-së, Luzlim Basha.

“Ky moment është i duhuri për të reflektuar për të parë dhe gjetur se cila është rruga e duhur për t`ia arritur qëllimit. Është kollaj të thuash se Rama ka rënë, ja dhe pak, deri sa të vijnë zgjedhjet e 2021. Zgjidhja duhet gjetur shpejt, ai zullumin e ka bërë të madh, mundësitë për ta mundur janë, çështja është që ne duhet të shohim te vetja për të mundur rrëzimin e Ramës dhe për të ardhur PD në pushtet. Aktualisht kemi demokrat të papërfaqësuar. Kjo është e tmerrshme në demokraci, i një partie që duhet të mbajë mbështetësit e vetë, dhe të bëhet gati për të ardhur në pushtet. Ka vend për të reflektuar, PD është në mundësitë e veta për të qenë forcë fituese”, u shpreh Ristani.

Ristani: Rruga dështoi, zgjidhja vjen prej zgjedhjeve, po a është gati PD?

Arben Ristani deklaroi në “Real Story” se e vetmja rrugë për të dalë nga kriza janë zgjedhjet. Të parakohshme apo në vitin 2021, sipas ish-Sekretarit të Përgjithshëm të PD, në demokraci ka vetëm një rrugë për të mposhtur kundërshtarin, zgjedhjet. “Ristani: Sigurisht që shtatori nuk është larg. Unë besoj që rrugë për të dalë ka. Në demokraci zgjedhjet janë rruga e vetme për të ndryshuar pushtetutet. Edhe protestat janë forma demokratike, por në përfundim do shkojmë në zgjedhje, normale apo të parakohshme”, tha Ristani, duke shtuar se tashmë është koha që PD të krijojë besim te shqiptarët. “Patjetër që zgjedhjet janë. Demokratët presin që PD t`i fitojë zgjedhjet, dhe në këto kushte, dhe e vetmja mënyrë që të kompensohet qenia jashtë institucioneve, duhet të rritet doza e besimit te lidershipi. Që të rritet besimi, do të duhet, duke u nisur dhe nga një sër sondazhesh, kjo do të thotë që ka probleme me besimin te njerëzit. Pasja e një programi të mirë është pjesë. Ky program i mirë, do dhe njerëzit që do e realizojnë programin. Besueshmëria do duhet edhe te njerëzit që do e realizojnë programin. Ajo që mungon sot është stafet që do realizojnë nesër programin”, u shpreh Ristani.

Megjithatë, për Arben Ristanin, aktualisht Partia Demokratike ka dhe një problem tjetër. Mungesën e një ekipi, i cili do të duhet të prezantojë dhe të bind shqiptarët me një program. Në këtë pikë, Ristani u shpreh se PD duhet që së pari të hapet si parti, duke reflektuar demokracinë e brendshme, në mënyrë që më pas, këtë demokraci ta reflektojë dhe në qeverisje. “Idea ishte që do bëjmë të mundur që “do ketë zgjedhje pa Ramën kryeministër”. Kishte optimizëm, mendohej që do ia dilnim një situate të tillë. Të dyja vendimmarrjet kanë qenë njër pas tjetrës. Sidomos në situata revoltash, është e vështirë të kërkosh dialog. Për tu kthyer te arsyetimi, nga ana tjetër, programi duhet dhe rregullat brenda partisë. PD duhet të reflektojë demokracinë e brendshme, që do e reflektojë në qeverisje. Partia duhet të respektojë dhe funskionojë në bazën e disa parimeve të caktuara. Unë besoj që ka nevojë për tu vënë në pah dhe për tu zbatuar, për të qenë të dukshme për publikun. Ka një punë që ka nisur në PD, por që është në fazat e para. Ekipi i mirë, sigurisht dhe marrëdhëniet me ndërkombëtarët, na duhet patjetër që të kemi mbështetjen e tyre. të gjitha këto, unë besoj që e bëjnë përsëri PD forcë fituese”, tha Rsitani.

Duke u shprehur se Basha ka përgjegjësi për atë që ka ndodhur deri më tani, Ristani u shpreh se tashmë nuk është koha për të diskutuar të keqen që kanë shqiptarët nga Rama, por çështja është se sa e përgatitur është PD për të marrë besimin e shqiptarëve. “Patjetër që lideri i PD ka peshën e vetë të përgjegjësive. Ajo që unë e kam parë me inters, me shumë miratim te zoti Basha, ka qenë ndjesia për të kërkuar ndjesë pas një gabimi. Unë di të them pas zgjedhjeve të 2017, pavarësisht se u ndikuan nga bandat, për ato përgjegjësi që ishin dukshëm të lidershipit të PD, ai ka kërkuar dhe ndjesë. Ajo që nuk duhet të ndodhë është përsëritja e gabimit të 2017. Politikanët kanë demagogjinë e tyre dhe retorikën e tyre për të shprehur mendimin. Unë besoj se koha është për të thënë të vëretën. Nuk mban më retorika që duket sikur u hedhë sy shqiptarëve. E vërteta është kjo; Rama nuk po drejton mirë vendin, që po krijon shumë probleme, për ekonominë, drejtësinë, është e keqe e madhe që shqiptarët e kuptojnë. Çështja është se sa të përgatitur jemi ne për të marrë besimin e shqiptarëve dhe për të fituar zgjedhjet”.

Ristani: Basha të futet në zgjedhje me Ramën, nëse s`e largon dot ndryshe

Arben Ristani tregoi në “Real Story”, se sipas tij, votat e pavlefshme të 30 qershorit, tregojnë që ka një rrevoltë ndaj qeverisë. Megjithatë, Arben Ristani shprehet se në këto momente është mirë që PD të fokusohet te vetja, duke u futur në rrugën e reflektimit. “Zgjedhjet e 30 qershorit, me votat e pavlefshme, pjesëmarrjen, treguan që ka një rritje të mosdakordësisë, të revoltës, ka vend për ndryshim, por çështja është se a do të jemi ne ata që do të bëjmë ndryshimin?! Në fakt, do të doja shumë që fokusi të ishte te qeveria, por bëjmë mirë që të kthehmi dhe te vetja. PD gjithsesi funksionon si institucion, dhe gjërat zgjidhen brenda mekanizmave që paraqet institucioni. Unë shpresoj që këto që po ndodhin të nxisin frymën e reflektimit”.

Arben Ristani shprehet se ky reflektim duhet të përfshijë edhe Lulzim Bashën, duke pranuar zgjedhjet. “Nuk është përgjegjësia vetëm për veten, por për të gjithë shqiptarët. Besoj që është moment reflektimi, duhet ta bëj dhe Bashën për këtë që po ndodhë. Duhet të kapërcejmë dhe vetveten në këtë. Po përdor një shprehje të Berishës, që i tha Bashës “në këto momente duhet të kalosh dhe detin në këmbë”. Unë besoj që në zgjedhje do shkojmë patjetër, nuk ka rrugë tjetër”, tha Ristani.

Mirëpo problemi është deviza e PD, që me Ramën nuk futet në zgjedhje. Në këtë pikë, sipas Ristanit, PD përsëri duhet të reflektojë, pra të futet në zgjedhje me Ramën, nëse s`ka mundësi për ta larguar atë në rrugë tjetër. “Me Ramën apo jo? Nëse çështja është e realizueshme, dakord, por nëse nuk e arrijmë dot, duhet të futemi në zgjedhje me Ramën, të përballemi. Shembujt i kemi, nuk do shpikim në këtë mes. Është vendimmarrja institucionale e PD është nuk ka dialog me Ramën. Unë besoj që ka nevojë për reflektim, ka nevojë që të mblidhemi ta diskutojmë. Të gjendet mënyra të shkohet në zgjedhje, qoftë dhe në zgjedhje të parakohshme. Shqiptarët të papërfaqësuar sa i përket votave të djathta. Ky rezultat është një rezultat shumë i keq që duhet korrigjuar. Prishen balancat e demokracisë, për mua do duhet të gjejmë mënyrë për të shkuar dhe në zgjedhje të parakohshme”.

Ristani: Koha për reflektim, Basha të tregoj planin që ka

Ish sekretari i përgjithshëm i Partisë Demokratike, Arben Ristani është një nga ato persona që ka pranuar se opozita gaboi me vendimet e saj për djegien e mandatave dhe refuzimin për të marrë pjesë në zgjedhjet e 30 qershorit. Nga studio e emisionit “Real Story” të gazetarit Sokol Balla, në një puntatë jashtë sezonit, Ristani shfaqet i penduar për vendimin e tij për djegien e mandateve dhe lënien e PD pa asnjë lloj pushteti. Duket parë përfundimet që nuk ishin aspak në favor të PD, Ristani bën thirrje se ka ardhur koha që PD por dhe vetë Basha të reflektojë dhe të gjejnë zgjidhjen e duhur për të dalë nga kjo situatë. Ristani tha se shpreson që Basha ta dijë se çfarë do të bëjë më 1 shtator dhe të mbledhë strukturat politike dhe t’i udhëzojë se cilat hapa duhen ndjekur për arritjen e fitores përfundimtare.

“Duke parë rezultatin e vendimit tonë për djegien e mandateve, mendoj që ndoshta duhet të kishim gjetur një rrugë tjetër. Shpresoj që Basha ta di çfarë do bëjë në 1 Shtator. Është koha për reflektim dhe për të kuptuar qartë se cila është rruga në të cilën do të ecim si do të ndahet ajo rrugë në etapa dhe si do të fitohen etapat njëra pas tjetrës për të arritur tek fitorja e madhe përfundimtare. Pra kemi nevojë për një qartësi të plotë dhe unë shpresoj që ta bluaj me mendjen e vet dhe t’ia bëj prezente edhe strukturave të PD, për ta diskutuar dhe për ta vendosur. Shpresoj shumë që do të ketë një reflektim. Basha duhet të sqarojë këtë konfuzion pasi demokratët kanë nevojë për një qartësim të situatës.” – tha Ristani

Ristani në “Real Story”: 13 tetori? Jo pa dakordësinë e palëve

13 tetori, data e re e zgjedhjeve të dekretuara nga Presidenti Meta, Arben Ristani e cilësoi si të pamundur dhe të pavlefshme nëse palët nuk bien sa më shpejt dakord .“Nuk mund të ketë 13 tetor nëse nuk ka dakordësi mes palëve” tha Ristani nga studio e emisionit “Real Story” duke shtuar gjithashtu se sa më shumë ditët kalojnë pa arritjen e një marrëveshje aq më i vështirë dhe i pamundur bëhet 13 tetori. Ristani cilësoi se dialogu dhe reflektimi sa më shpejt mes palëve politike është gjëja e duhur për kthimin në normalitet të vendit.

“Për momentin politika është kapur pas datës 13 tetor që sigurisht pas arritjes me dakordësinë e palëve mund të ketë një 13 tetor. Kjo nuk do të ishte një çudi e madhe, megjithëse gjërat kanë shkuar larg tashmë. Mbase pasi të dal nga loja edhe 13 tetori do të shtrohet ndryshe, por unë shpresoj më shpejt tek një reflektim për situatën. Këtu kaosi është prezent, këtu çuarja e shtetit në një absurditet është i prekshëm, të gjithë e shohim dhe e dimë, ne ecim mbi mina në rrugë tonë dhe shpresoj shumë që mendjet të ndriçohen dhe njerëzit të ulen në bisedime dhe të gjejnë gjuhën për të mirën e këtij vendi. Unë besoj se vendi duhet futur në rrugën e vet normale dhe në të kemi zgjedhje të lira dhe të ndershme dhe shqiptarët të vendosin se si dhe nga kush duan të drejtohen.” – tha Ristani

Ristani ka komentuar edhe vendimet e ndryshme të gjykatave për konfirmimin e mandatit të Kryetarëve të rinj të Bashkisë, duke cilësuar se kjo ndodh për shkak të mungesës së Gjykatës Kushtetuese. Por shtoi se sa më shumë njihen mandatet e kryetarëve të rij, aq më i pamundur bëhet 13 tetori si një datë reale.

“Ka pasur vendime të gjykatave që kanë konfirmuar mandatet e kryetarëve të bashkive, por ka pasur edhe një vendimmarrje tjetër nga gjykata. Sa më shumë kalojnë ditët, sa ma shumë vendimmarrje për njohjen e mandateve të kryebashkiakëve aq më e vështirë dhe i pamundur behet 13 tetori të jetë një datë reale. Kjo vjen në kushtet kur nuk ke Gjykatë Kushtetuese që mund ta kishe futur në lojë për të kërkuar pavlefshmëri të vendimmarrjeve të marra deri tani, kështu që nuk ka zgjidhje tjetër. Por gjithsesi mundësitë janë po të ulen dhe të bien dakord palët.” – tha Ristani

Ristani: Gabuam me djegien e mandateve, duhej gjetur një rrugë tjetër

Arben Ristani ka bërë një rikthim në vendimet e marra nga Partia Demokratike në lidhje me djegien e mandatave. I pyetur nëse po të kthehej në kohë do ta miratonte sërish djegien e mandateve, Ristani tha në “Real Story” se ky ishte një vendim i gabuar edhe pse për momentin u dukë si i drejtë. Ish sekretari i përgjithshëm i PD deklaroi se duke parë rezultatin final duhej gjetur një rrugë tjetër për të kërkuar largimin e Ramës dhe largimin e krimit nga qeveria. Madje Ristani shtoi se nëse PD do të ishte futur në zgjedhje mund edhe të kishin fituar duke shfrytëzuar skandalet e qeverisë.

Nëse virtualisht do të riktheheshit në shkurt do t’i digjnit mandatet dhe të mos merrni pjesë në zgjedhje? Ju vet si qëndroni në këtë histori?

Ristani: Unë mendoj se nuk ka qenë zgjidhja e duhur. Mendoj se PD do të kishte bërë mirë të gjente mekanizmat dhe të krijonte patjetër mbështetjen ndërkombëtare për sa i përket diskreditimit të qeverisë dhe lidhjet e saj me krimin dhe përdorimin e parave të pista dhe të mobilizonte partinë për të marrë pjesë në zgjedhje. Jam i bindur se ne mund t’i ishim afruar më shumë fitores në rast se do të kishim hyrë në zgjedhje. Duke u nisur nga sondazhet , duke u nisur nga goditjet e disa grupeve kriminale që besoj shumë se mund të kishim një rezultat tjetër. Dhe tek e fundit do të kishim pasur një shpresë më të madhe brenda partisë demokratike për tu përballuar më pas në zgjedhjet e përgjithshme, që afërmendsh mund të ishin edhe të parakohshme.

Pse nuk e morët mandatin në listë kur sot thoni se ishte gabim?

Ristani: Ju thash që me ndërgjegje kam votuar për djegien e mandateve dhe kam qenë pro, kam djegur edhe mandatin tim. Kjo do të thotë se kam qenë i bindur në atë moment për atë vendim që është marrë. Sot duke parë rezultatin po mundohem të reflektojë dhe të them që ndoshta mund të kishim ndjekur një rrugë tjetër. Unë dua të rris fëmijët në një vend normal. Kam besim se PD e ka drejtuar vendin më mirë në këto vite të demokracisë dhe kam besimin se ajo forcë do të duhet ta drejtojë përsëri për ta bërë më të mirë këtë vend.

Ristani: Basha të hap partinë, aleatët t’i shoh rrugës

Arben Ristani ka komentuar edhe marrëdhëniet me aleatët e PD duke thënë se tani është koha që PD të fokusohet tek vetja, të reflektojë dhe të gjejë zgjidhjen që i duhet për t’u ringritur dhe arritur fitoren përfundimtare që kërkon. Për sa i përket marrëdhënies që PD krijon apo lidh ne aleatët e tjerë ato do i shoh rrugës. Nga studio e “Real Story” Ristani tha se PD është një parti që ka si shtyllë fondamentale vlerat parimore dhe duhet të për qëndrohet tek to, ndërsa aleancat mund t’i shoh edhe në mënyrë pragmatizmi, por fillimisht duhet të forcojë rolin brenda vetës, pasi të bësh pragmatizmin “duhen këllqe të forta”

“ Unë do preferoja që në këto kohëra pragmatizmi është një gjë, por mbështetja mbi parime është një shtyllë fondamentale e një partie. Në këtë kuptim unë jam që të përqendrohemi më shumë tek vetja dhe aleancat i sheh gjatë rrugës, mund ti përdorësh edhe në mënyrë pragmatiste gjatë rrugës, por së pari duhet të kesh këllqe të forta në partinë tënde.” – tha Ristani

Në lidhje me përfaqësimin e figurave publike të PD, Ristani tha se Basha duhet të ndjek shembullin e Berishës në 2005 dhe të hap partinë drejt figurave të reja dhe atyre që kanë qenë kontribuues në PD. Ristani theksoi se e gjithë kjo përvojë që ka pasur PD, nuk mund të shkoj dëm.

“Berisha në 2005 erdhi një numër të rinj dhe sigurisht edhe vlerat. Nuk ka parti politike pa u mbështetur tek vlerat. Një vendim nuk mund të bazohet vetëm në ligj por edhe në zemër. Kjo pjesa e zemrës ka të bëj pak me përvojën jetësore që kultivon njeriu. Në këtë kuptim e gjithë kjo përvojë që ka pasur Partia Demokratik nuk mund të shkoj dëm. Duhet ribashkuar dhe rithithur një numër i madh kontributorësh të PD që e kanë dashur dhe e duan dhe janë të lidhur edhe me strukturat e saj. Militantëve duhet t’u flasësh , por që t’u flasësh duhet të kesh edhe çfarë u thuash dhe t’u transmetosh. Po nuk transmetove, po nuk i njohe, po nuk ishe në hallet e tyre, në këtë kuptim ka shumë për të bërë dhe duke e konsideruar shumë të rendë daljen nga sistemi, duhet të veprojmë më idealizmin dhe besimin dhe ndërthurje të njerëzve.”- tha Ristani. /Realstory.al/

Ristani në “Real Story”: Basha la demokratët të pa përfaqësuar, pasoja të tmerrshme për PD

Opozita po lufton “30 qershorin” e amerikanëve, me armët e… amerikanëve

Të enjten pas mesdite, Voltana Ademi kryebashkiakja e Shkodrës, në cilësinë e Kryetares së Shoqatës së Bashkive, regjistroi pranë Gjykatës Kushtetuese padinë për “Konstatimin e antikushtetues të procesit zgjedhor të 30 qershorit, si dhe verifikimin e kushtetueshmërisë së veprimtarisë së partisë Bindja Demokratike në lidhje me regjistrimin e saj në gjykatë dhe zgjedhjet e 30 qershorit 2019”. Ky është veprimi i fundit i strategjisë së re, që po ndjek opozita për të zhvleftësuar “30 qershorin” dhe votimet e asaj dite.

Partia Demokratike e Lezhës ka depozituar një padi në prokurori, përmes të cilës ka paditur KQZ, komisionerët dhe numëruesit e PS, të cilët organizuan sipas saj “zgjedhje në kundërshtim me dekretin e presidentit”. Si bazë për ngritjen e kësaj padie, dega e PD në Lezhë ka përdorur dekretin e 10 qershorit të Ilir Metës, që anuloi datën 30 qershor si ditën e mbajtjes së zgjedhjeve.

Monika Kryemadhi e paralajmëroi këtë një ditë më herët nga Berati, duke kërkuar ndjekje penale për anëtarët e KQZ.

Sekretari i Përgjithshëm të PD, Gazmend Bardhi, disa ditë më parë, u kërkoi gjykatave që të cilësonin anti-kushtetues procesin zgjedhor të 30 qershorit. Bëhej fjalë për përdorimin e një teknikaliteti të Kodit Zgjedhor, sipas të cilit mandati i bashkiakëve i marrë nga KQZ, merrte një certifikim formal edhe në gjykatat e shkallëve të para. Disa gjykata në vend konfirmuan mandatin e disa të zgjedhurve vendor, duke nisur me kryebashkiakun e ri të Elbasanit, Gledian Llatja, atë të Librazhdit, Kavajës, Cërrikut.

Por ky formalitet u bë një realitet i hidhur politik për disa prej të zgjedhurve vendorë të 30 qershorit. E para viktimë ishte bashkiakja e re e Durrësit, mandati i së cilës u pezullua nga gjykata e shkallës së parë në Durrës, nga një gjykatëse që pritet të ketë probleme me Vettingun dhe që bashkëshortin e saj, e kishte protestues të rregullt gjashtëmujor të opozitës. Gjykatësja Margjeka e argumentoi vendimin e saj bazuar mbi atë që ajo e quan ‘regjistrimin jashtë afateve ligjore të partisë Bindja Demokratike në zgjedhjet e 30 qershorit’. Ky vendim u mirëprit nga PD dhe aleatët e saj në opozitë, të cilët tashmë e përdorin këtë si argument “se 30 qershori ka qenë i paligjshëm”.(Lexo lajmin në Realstory.al).

Në fakt vendimi i saj ishte absurd, pasi në Gjykatë nuk kishte asnjë kërkesë padi me këtë objekt, ndërkohë që KQZ dhe më pas Kolegji Zgjedhor e kishin rrëzuar kërkesën e Partisë Demokratike më herët në qershor. Kujtojmë se Kolegji Zgjedhor është Gjykatë Apeli pa rekurs dhe vendimet e saj janë të formës së prerë dhe me siguri apelimi që do ti bëjë fituesja Sako, do të miratohet prej gjykatës së shkallës tjetër në Durrës. Por nuk është këtu thelbi i kësaj që po ndodh këto ditë me Partinë Demokratike.

Pas Durrësit, Gjykata e Tiranës vendosi të shpallte moskomptencë për dhënien e mandatit të kryebashkiakut të ri të Vorës, Agim Kajmaku. Në këtë rast, Gjykata e Shkallës së Parë në Tiranë, e dërgoi kërkesën e Kajmakut në Gjykatën Administrative, [ka teorikisht do të thotë se edhe Kamza, Paskuqani, Rrogozhina por edhe Tirana e Madhe, do të përcillen në këtë Gjykatë. Të mërkurën, Gjykatës së Tiranës iu drejtua dhe Erion Veliaj me një kërkesë për vërtetimin e mandatit. Me gjasë e gjithë kjo procedurë do të hajë kohë, duke zgjatur kështu rrezikshëm konfirmimin e bashkiakëve të ri, sa më shumë afrohet 10 gushti, që sipas ligjit, është dhe afati i fundit ligjor i qëndrimit të bashkiakëve të vjetër në zyra.

Burime nga Partia Socialiste thonë se “nuk presin probleme në më shumë se 10 bashki”, por realiteti nuk duket aq optimist.

Procesi ligjor i PD për mosnjohjen e 30 qershorit, nisi më herët, në Komisionin Qendror Zgjedhor. Pas certifikimit të rezultati për kandidatët, KQZ nisi certifikimin dhe shpërndarjen e mandateve për këshilltarët. Por nëse për kandidatët KQZ e miratonte rezultatin me shumicë të thjeshtë, për këshilltarët, sipas Kodit Zgjedhor, duhet shumicë absolute e votave të anëtarëve të KQZ. Në këtë pikë, opozita ka shfrytëzuar “kartën” Klement Zguri, për të bllokuar shpërndarjen e mandateve për këshilltarët në këshillat bashkiakë.

Fakt është se Zguri ka votuar kundër në këtë proces, duke detyruar Partinë Socialiste të drejohet në Kolegj Zgjedhor (lexo këtu lajmin në Realstory.al) për kërkuar shpërndarjen e mandateve. Po përse janë të rëndësishëm mandatet e këshilltarëve? Që kryetari i ri i bashkisë i zgjedhur në 30 qershor, të fillojë punën zyrtarisht, duhet të betohet përpara këshilltarëve bashkiakë, pasi këshillat e rinj të konstituohen. Dhe nëse Kolegji punon ditë e natë, 61 paditë do të kërkojnë me gjasë kohë, përtej datës 10 gusht. Pas kësaj date, nga Erion Veliaj e deri te Voltana Ademi, duhet të lënë zyrën, i pari, nëse nuk certifikohet nga gjykata dhe betohet para këshilltarëve, e dyta sepse do të shtonte akuzën e gjashtë penale mbi supet e saj.

Dhe në kohën që Presidenti dhe Basha luajnë në distancë (i pari, duke i kërkuar Ramës të negociojë, qoftë dhe mbi 13 tetorit, dhe i dyti duke luajtur “hapa dollapa” me tezën “Rama Ik”), tashmë askush nuk mund të akuzojë PD për taktikën e saj të re: ajo po shfrytëzon mish mashin e krijuar nga vakumet e reformës në drejtësi dhe cirku presidencial me dekretet dhe afatet, për të justifikuar para ndërkombëtarëve se po ndjek këshillën e tyre: atë institucionale të kontestimit të zgjedhjeve.

Tre ditë para zgjedhjeve të 30 qershorit, Zëvendës Ndihmës Sekretari Amerikan i Shtetit, Mathew Palmer, duke i bërë thirrje opozitës të hiqte dorë nga aktet e dhunës, u shpreh se 30 qershori mund të kontestohej vetëm në rrugë gjyqësore dhe institucionale, pasi çdo rrugë tjetër do të ishte i papranushëm nga ndërkombëtarët. Sigurisht ai foli në kontekstin e gjykatës kushtetuese, por kjo duket pak rëndësi ka për opozitën. Përfaqësues të saj shpesh i janë referuar këto ditë deklaratës një ditë më pas 30 qershorit të Audrey Glover. E pyetur nga gazetarët nëse do t`i certifikonte zgjedhjet, u shpreh se kjo ishte “kompetencë e institucioneve në vend”.

Nuk dihet kush e ka sugjeruar këtë strategji të re të opozitës, e cila njëkohësisht e rikthen atë në “legalitet” pas luftës guerrilase politike gjashtë mujore, si dhe rrezikon seriozisht, në mos anullimin e 30 qershorit, obstruksionin e tij me javë e muaj të tërë. Deri sa të afrohet 10 gushti? Derisa të afrohet 13 tetori? Derisa mazhoranca të ulet në tavolinë? Derisa ndërkombëtarët të binden se po ja lanë institucioneve shqiptare, rrëmuja e qëllimshme dhe jo, mund të thellojë krizën? Ilir Meta e tha këtë qartë më herët të enjten: “Kriza në vend, rrezikon të thellohet”.

Me gjasë, ndryshe nga skenari i parë i tij, ai për dhunë e flakë, ky i dyti është më i mundshëm: sepse nuk ka as tym, as flake e as viktima. Por nëse është kështu, është një përpjekje dinake për të përdorur kësaj radhe armët e ndërkombëtarëve, për arritjen e qëllimit që duket kryesor në këtë lëvizje opozitaro-presidenciale: që në 30 qershor nuk kishte zgjedhje.

Një sfidë e fortë, jo ndaj Ramës, po ndaj BE. Jo ndaj qeverisë, po ndaj amerikanëve. Jo ndaj KQZ po ndaj OSBE. Të gjitha këto organizma që luftuan fort që në vend të kishte zgjedhje në 30 qershor, jo si leksion demokracie sesa si shenjë e sundimit të ligjit. Po tani ata nuk ankohen dot. PD dhe Meta po luajnë me kartat e tyre. Gjithsesi ndërkombëtarët janë ndërkombëtarët. Në [do lojë pokeri, ata e kanë pasur gjithmonë një as nën mëngë./Realstory.al/