Cakaj në “Real Story: Vizioni i Francës, çmimi që po paguan Shqipëria

“Shqipëria dhe Maqedonia e Veriut po paguajnë vizionin e Francës, që kërkon reformim të brendshëm”, u shpreh Ministri i Jashtëm në Detyrë, Gent Cakaj në studion e “Real Story” të gazetarit Sokol Balla. “Maqedonia ka marrë rekomandimin e 10-të për hapjen e negociatave. Për ne është e qartë se ky është një proces që kërkon konsensus të plotë të të gjithë anëtarëve. Shumica e vendeve anëtare mbështesin Shqipërinë në aspiratën e saj. Ne duhet të jemi të rezervuar dhe jemi para faktit që Franca ka një vizion tjetër për Bashkimin e Europian. Ne po paguajmë çmimin në këtë proces”, tha Cakaj. Kreu i diplomacisë shqiptare, u shpreh se Shqipëria dhe Maqedonia e Veriut përmbushën të gjitha kushtet e kërkuara nga Komisioni Europian. “Të gjitha çështjet në procesin e axhendës Europian, që kanë qenë të varura nga performanca e qeverisë, janë plotësuar. Reforma elektorale nuk është thjesht përgjegjësi e qeverisë, është obligim i parlamentit, që kërkon angazhimin e opozitës parlamentare dhe jashtë parlamentare. Çështja e përgjegjësive të qeverive në rastin e hapjes së negociatave është minimale”, u shpreh Ministri Cakaj.

Gent Cakaj u shpreh se nëse negociatat nuk do të hapen, përgjegjësia nuk është e qeverisë. Ai solli rastin e Maqedonisë së Veriut, që sipas tij bëri kompromis duke ndryshuar emrin si kush kryesor për negociatat, dhe tashmë përballet me “Jo” e Francës. “Në Luksemburg më shumë se sa diskutimi i kushteve të posaçme, ka pasur diskutim për të ardhmen e BE. Një popull që ka ndryshuar dhe emrin shtetëror, dhe një shtet që ka bërë këtë kompromis, është para një pozicioni që merr “Jo” e Francës. Nëse një shtet me një kompromis kaq madhor dështon për hapjen e negociatave për shkak të Francës, ku qëndron problemi i qeverisë këtu”, tha Cakaj.

Më tej, i pyetur nga gazetari Sokol Balla, se nëse Franca ndryshon qëndrim dhe hapen negociatat, kush do e ketë meritën, Gent Cakaj u shpreh se merita do të jetë e të gjithëve, por kryesorja e qeverisë. “Merita është e të gjithë faktorëve dhe aktorëve që kanë qenë të përfshirë në këtë proces. Reforma elektorale është vendosur si parakusht nga Bundestagu. Nga viti 2018, deri më sot, janë shtuar dhe fakte të reja. Të gjithë aktorët që kanë qenë të përfshirë në këtë proces kanë meritat e tyre. Në këtë pikëpamje meritat i takojnë të gjithë, por në mënyrë të veçantë qeverisë që ka udhëhequr këtë proces. Mos hapja e negociatave duhet të analizohet me shkaqet. Është gjë tjetër nëse negociatat nuk hapen se qeveria ka dështuar, dhe është një gjë tjetër që negociatat nuk hapen se vendet anëtare duhan të reformohen nga brenda që të zgjerohen nga jashtë. Nëse negociaat nuk hapen për shkak të problemeve të brendshme të BE, nuk është faji jonë”, tha Cakaj.

Gent Cakaj u shpreh se Gjermania dhe Shqipëria shpresonin se çështja e negociatave nuk do të ngatërrohej me reformimin e brendshëm të Bashkimit Europian, gjë të cilën e kërkon Franca. “Edhe kur u shty vendimi vitin e kaluar, faji është i Francës. Macron ka bërë të qartë se ai insiston në një reformim të brendshëm para se të zgjerohet. Ai ka shqetësime të drejtpërdrejta në mënyrën se si funksionon BE për momentin. Edhe qëndrimi i Gjermanisë dhe shpresa jonë, ka qenë se nuk do të ngatërrohet procesi i zgjerimit me procesin e anëtarësimit. Ne po flasim për procesin e negocimit për anëtarësim në një kohë të më vonshme. Procesi i negocimit për anëtarësim nuk është një proces i përvetësimit të ligjeve të BE siç janë. Ky është një proces dinamik, Shqipëria do të ishte reformuar krahas reformimit në BE. Në parim ekziston mundësia për tu zhvilluar edhe negociatat për anëtërësim edhe reformimi i BE”, tha Cakaj.

Sipas Ministrit të Punëve të Jashtme, Strategjia e Zgjerimit të BE në Ballkanin Perëndimor, nuk parashikon anëtarësim të këtyre vendeve përpara vitit 2025. Ai shtoi, se edhe kur të fillojë diskutimi i kapitujve, nuk do të ketë hapje të kapitullit paardhës, pa pasur rezultate konkrete për kapitullin që është në diskutim. “Në strategjinë e BE për Ballkanin, thuhet qartë se nuk mund të ketë anëtarësime para vitit 2025. Qëndrimet e Francës nuk janë të kohëve të fundit. Kufiri kohor 2025 është miratuar nga vendet anëtare. Por kjo nuk do të thotë se do ketë anëtarësim në vitin 2025. Nëse hapen kapitujt, nuk mund të vazhdohet me kapitullin tjetër pa pasur rezultate konkrete. Për besueshmërinë ndërkombëtare për rezultatet kemi arsye të jemi të lumtur”, tha Cakaj.

NEGOCIATAT, CAKAJ: KA ENDE PAK SHPRESË PËR NJË “PO” TË KUSHTËZUAR

Ministri i Jashtëm në detyrë Gent Cakaj tha se ka ende një shpresë të vogël për çeljen e negociatave, pavarësisht deklaratave të presidentit Macron se BE i duhet më shumë kohë për të vendosur për to. I ftuar në emisionin “Real Story” në News 24, ministri Cakaj tha përballë gazetarit Sokol Balla se nuk ka pritshmëri të lartë për marrjen e një “PO-je”, po ka ende shpresë, pasi kancelarja Merkel po bën çdo përpjekje të mundshme të bindë Macron-in.

Cakaj tha se proces nuk i takon më Shqipërisë, por BE–së duke theksuar se nëse marrin një “po” atëherë do të jetë e kushtëzuar nga Franca për mënyrën dhe metodologjinë e negocimit me vendet. Ndërsa një ndarje të mundshme të Shqipërisë dhe Maqedonisë së Veriut për hapjen e negociatave, Cakaj e hodhi poshtë duke deklaruar e ky diskutim ka marrë fund në Luksemburg.

“Kancelarja Merkel nuk heq dorë nga përpjekjet për të bindur Macron se procesi i reformimit të BE dhe hapja e negociatave mund të bëhet paralelisht. Ekziston ende një shpresë e vogël për një “Po” të kushtëzuar nga Franca si kushtet e vendosur nga Bundestagu. Kushtëzimi i Francës mund të jetë në lidhje me metodologjinë që do të përdoret për hapjen e negociatave me vendet. Procesi tashmë nuk i takon më Shqipërisë. Ne duhet të jemi realistë, sepse procesi nuk i takon Shqipërisë dhe as Ballkanit Perëndimor. Ne jemi me një situatë që nuk mund të përcaktojmë politikat e vendeve të Europës. Shumica e vendeve janë pro hapjes së negociatave. Propozimi për ndarjen ka dështuar që në Luksemburg. Ne po trajtohemi në mënyrë të njëjtë. Kjo tregon se dy vendet kanë plotësuar kushtet”- tha Cakaj./Realstory.al/

Negociatat, Cakaj: Ka ende pak shpresë për një “Po” të kushtëzuar

“Parlamenti është ilegjitim” Kryemadhi përplaset me Vasjarin

Legjitimiteti i Kuvendit dhe deputetëve të rinj të opozitës ka përplasur kryetaren e LSI-së, Monika Kryemadhi me analistin Arjan Vasjari në studion e emisionit ‘Real Story”.

Kryemadhi theksoi se parlamenti është ilegjitim pasi nga 140 deputetë në fakt ka vetëm 122 dhe se procedura e emërimit të tyre është bërë kundër rregullave.

“Kuvendi është ilegjitim pasi nga 140 deputetë sot ka 122. Gjithashtu mënyra e emërimit të tyre duhej bërë një nga një ashtu siç duheshin thirrur edhe deputet e larguar një nga një. Por procedurat nuk janë respektuar dhe emërimi i tyre është bërë në bllok duke u përshpejtuar.” tha Kryemadhi

Ndërsa për analistin Arjan Vasjari, Kuvendi është legjitim dhe çdo deputet i zgjedhur nga listat emërore të partive janë legjitimë. Ndërsa në lidhje me legjitimitetin moral, Vasjari tha se çdokush e mendon në mënyrë të ndryshme.

“Parlamenti është legjitim. Të gjithë ato që janë atje brenda janë legjitim. Ata që kanë dalë nga lista emërore e partive janë legjitim atje ku janë në parlament. Në kuptim të çështjes morale atëherë çdo njeri prej nesh ka një mendim të caktuar.”- tha Vasjari / Real Story

Kryemadhi: Zgjedhjet zgjidhin krizën, mbyllin debatin shterpë

Kryetarja e LSI Monika Kryemadhi tha se zgjedhjet janë e vetmja mënyrë për daljen e vendit nga kriza dhe t’i jap fund një debati shterpë të zgjatur në kohë. Kryemadhi tha se nëse kriza tejzgjatet më shumë atëherë vendi do të përfundojë në një kolaps që në fund do e vuajnë qytetarët shqiptarë. E ftuar në studion e emisionit “Real Story” të gazetarit Sokol Balla në News 24, Kryemadhi tha se fakti pavarësisht akteve ekstreme të marra nga opozita, ishte ajo që i ofroi një platformë zgjidhje me 5 pika qeverisë. E pyetur nëse opozita kishte ndryshuar qëndrimin e saj ku sot flet për dialog dhe zgjedhje të reja, Kryemadhi u shpreh se kjo nuk ka ndodhur. Ajo theksoi se aktet ekstreme të marra nga opozita u bënë për të treguar atë që raporti i OSBE/ODIHR-it tha për zgjedhjet e 30 qershorit.

“Zgjedhjet janë e vetmja mundësi që mbyll këtë mish amash të madh që është krijuar në vend. Ky është një debat shterpë dhe njerëzit janë lodhur nga fjalimet politike dhe kërkojnë zgjidhje për familjet e tyre. Kjo zgjidhje do të vijë vetëm përmes zgjedhjeve. Kjo krizë e tejzgjatur do të sjelle një kolaps të ekonomisë që në fund do e paguajnë shqiptarët dhe jo klasa politike. Për zgjidhjen e kësaj opozita paraqiti një platformë me 5 pika. Pra ishte opozita që më aktet saj ekstreme iu drejtuar më një plan të qartë qeverisë për të zgjidhur krizën. Në votimet e 30 Qershorit, Edi Ramën nuk e dëmtoi pjesëmarrja në zgjedhje por raporti i OSBE/ODIHR. Opozita me qëndrimet e saj ekstreme vendosëm që përmes tyre të nxirrnin atë që nxori raporti. ” tha Kryemadhi

Në lidhje me negociatat, Kryemadhi e cilësoi katastrofike nëse do të kishte një ndarje të Shqipërisë nga Maqedonia e Veriut. Ndërsa theksoi se ato duhet të hapen në mënyrë që të ketë një kontroll më të madh ndaj qeverisë dhe zbatimit të ligjit.

“Veçimi i Shqipërisë nga Maqedonia e Veriut do të ishte një katastrofë. Kjo nuk duhet të ndodh. Ndërsa hapjen e negociatave e shoh si një “futje në kornizë” të klasës politike dhe e detyron atë të ketë një qëndrim të stabilizuar në politiken e jashtme. Hapja e negociatave do krijojë një lloj vlere dhe barazie në ekonominë shqiptare por dhe krijimin e kushteve për arritjen e depolitizimit të administratës dhe përfshirjes së politikës në korrupsion.” tha Kryemadhi / Real Story

“Gjesti i Borschardt, i dënueshëm, cenon paanësinë e tij”

Gjesti ofendues i ambasadorit të OSBE, Bernd Borschardt ku nxori gishtin e mesit ndaj protestuesve të opozitës, gjë për të cilën kërkoi ndjesë më pas, është kritikuar nga paneli i të ftuarve në studion e emisionit “Real Story” të Sokol Ballës në News 24. Gjesti i tij u cilësua i dënueshëm dhe aspak etik për një person që mban postin e Ambasadorit dhe për më tepër të OSBE, që nuk përfaqëson vetëm një shtet, por një organizatë tepër të madhe, që shkon përtej një shteti. Ky gjest i ambasadorit mund të cënojë edhe besueshmërinë për paanësinë e tij thanë të ftuarit në studion e “Real Story”.

Për ish kryetarin e KQZ dhe ish deputetin demokrat, Arben Ristani, ambasadori Borschardt arrin të bëjë veprime të tilla aspak civile dhe të dënueshme, pasi i shkon dhe veprimeve të Kryeministrit edhe Presidentit. Ristani tha se kjo ndodh pasi Shqipëria është kthyer në një vend qesharak, ku respekti për qytetarin apo ligjin nuk eksiton më.

“Kur je në postin e Ambasadorit duhet t’i mbash nervat dhe të mos arrihet në sharje të tilla. Shqipëria është kthyer në një vend qesharak, ku nuk ka respekt për publikun dhe qytetarin dhe veprimi i tij është aspak qytetar dhe i dënueshëm. Për mua Ambasadori i OSBE, arrin të bëjë dhe veprime të tilla, pasi i shkon dhe veprimeve të Kryeministrit edhe Presidentit.” tha Ristani, i cili shtoi se ky veprim rriti edhe më shumë dyshimet për paanësinë e tij që mund të ndikojë në tryezën e Reformës Zgjedhore.

“ Besueshmëria që ai ka, edhe pas veprimit të djeshëm, mund ta cenojë një tryezë ku palët kërkojnë të gjejnë zgjidhje.” Në të njëjtën linjë ishte edhe politologu Roland Lami i cili tha se gjesti “nuk është aspak etik për postin që mban dhe më tepër kur është iniciator i një tryeze diskutimi për reformën zgjedhore mes të gjitha palëve”

Për Kristaq Kumen më shumë se shqetësimi për gjestin ai është i shqetësuar për mënyrën e tyre të sjelljes me popullin shqiptar dhe ofendimin tij. ‘Mos ja kemi krijua neve mundësinë që ai të sillet kështu? Duhet të reflektojmë mbi këtë gjë, pasi një ambasador nuk mund të sillet ashtu vetëm se ndikohet nga emocionet. Për mua kjo është në rezultat i një bashkëveprimi i një sinergjie negative mes atyre dhe neve bashkë.”

Ish kryetari i KQZ-së, Ilirjan Celibashi tha se ky gjest i papranueshëm do të jetë një minus në karrierën e tij diplomatike.

“Ndjesa është reagimi i duhur dhe për atë që Borschardt përfaqëson dhe padyshim që gjesti i tij është i papranueshëm. Është një ngjarje që vendos një minus në karrierën e tij të gjatë diplomatike.” tha Celibashi / Real Story

Analiza në Real Story: S’ka “zgjedhore’ të suksesshme pa drejtësi të pavarur

Reforma Zgjedhore dhe ndryshimi i sistemi elektoral kanë qenë pjesë e diskutimeve në studion e emisionit “Real Story” të gazetarit Sokol Balla në News 24. Dy nga problematikat që vihen re aktualisht në reformën zgjedhore në Shqipëri janë mungesa e një drejtësie të pavarur dhe mungesa e një vullneti të mirë politik për të vendosur interesat e Shqipërisë mbi ato partiak e personal.

Të ftuarit në panelin e diskutimit Krista Kume, Arben Ristani, Ilirjan Celibashi dhe Roland Lami mbajtën të njëjtin qëndrim duke deklaruar se shqiptarët duhet të zgjedhin sistemin që përshtatet më mirë në vendin e tyre dhe situatën ku ndodhet Shqipëria. Ata theksuan se të gjithë sistemet elektorale janë demokratike në thelbin e tyre, por të shoqëruar me problematika, në bazë të të cilave duhet të vendoset se cila është më e përshtatshme për vendin tonë.

Gjithashtu një pjesë të mirë të diskutimit e pati edhe punimi paralelisht si me Reformën Zgjedhore ashtu edhe me atë në Drejtësi për krijimin një baze të fortë ligjore, të zbatueshme në mënyrë që dobësitë apo të këqijat e një sistemi zgjedhor të marrin përgjigje përmes drejtësisë dhe gjykatave të pavarura të vendit. Edhe sikur të arrihet një sistem dhe një Reformë Zgjedhore e mirë dhe e plotësuar, ajo nuk mund të parandalojë problemet e shitblerjes së votës po nuk pati një zbatim të drejtë dhe të pavarur të ligjit.

Për Arben Ristanin nuk mund të ketë një reformë zgjedhore funksionale nëse nuk ka një drejtësi të fortë dhe të pavarur. “Na duhet një drejtësi e pavarur që të funksionojë reforma zgjedhore në këtë vend. Nëse ti ke probleme me zbatimin e ligjit atëherë nuk ta ka fajin më sistemi apo reforma zgjedhore. Pra duhet të ketë një vullnet të mirë nga të gjitha palët. Të kesh një vullnet të mirë politik do të thotë të kesh Shqipërinë mbi interesat personal dhe ato partiak. Kur ka vullnet të mirë politik, zgjedhjet bëhen edhe me një letër dhe një laps. Prandaj duhet të ecet paralelisht si me reformën zgjedhore dhe atë në drejtësi.”

Ndërsa ish kryetari i KQZ-së Ilirja Celibashi bëri një krahasim se kush do të ishte një sistem i duhur për Shqipërinë. Ai tha se një vend si Shqipëria ka nevojë për një qeveri të qëndrueshme dhe një përfaqësim dhe këtë e ofron sistemi proporcional rajonal me lista të hapura. “Për një vend si Shqipëria ku është në fazë të zhvillimit të reformave kërkon një qeveri të qëndrueshme dhe në këtë drejtim na duhet një sistem mazhoritar. Por duhet të ketë dhe një përfaqësim dhe për këtë , një sistem që i përfshinë të dyja është sistem proporcional rajonal me lista të hapura.” tha Celibashi i cili shtoi se një qeveri e dobët është e pritur për të bërë pazare.

Kristaq Kume theksoi rëndësinë e respektimi të ligjit në mënyrë që të kemi një reformë zgjedhore të mirë. Kume i vë fajin “ngrehinës legjislative” që është ndërtuar që shkakton kaq shumë parregullsi dhe devijime. “Ne kemi devijuar nga dy parime bazë të funksionimit të demokracisë. Domosdo duhet kultura e zbatimit të ligjit, e respektimit të ligjit. Duhet të ndërhyjmë brenda shtratit ligjor, të bëjmë reformën zgjedhore sa më mirë. Mënyra se si ne e kemi ndërtuar të gjithë “ngrehinën legjislative” është e tillë që ka krijuar kushte që ne të devijojmë. Qytetari duhet të zgjedhë se kush janë njerëzit që ai dëshiron të jenë përfaqësuesit e tij politik. Ideja është që të ndërtojmë një sistem që të eliminojmë sa më shumë parregullsitë që mund të krijohen.” tha Kume / Real Story

“Meta shkeli Kushtetutën, procesi deri në fund”

“Ilir Meta ka shkelur Kushtetutën dhe kjo as që diskutohet. E kam thënë që në momentin e parë para zgjedhje dhe këtë e shkruajti edhe Komisioni i Venecia” Kjo ishte deklarata e Kryeministrit Rama në emisionin “Real Story” të gazetarit Sokol balla në News 24, në lidhje me draftin paraprak të publikuar nga Komisioni i Venecias për shkeljet kushtetuese të Presidentit Meta.

Kryeministri Rama tha se Venecia foli shqip lidhur me shkelje kushtetuese dhe marrëzitë e ndodhura nga Presidenti Meta, para zgjedhjeve të 30 qershorit. Për Ramën, kjo vërtetoi atë që ai kishte thënë më herët gjatë fushatës elektorale. Megjithatë kur u pyet ne lidhje me shkarkimin e tij, Rama tha se këtë gjë e kanë në dorë institucionet shqiptare dhe komisioni hetimor që ka një mandat për këtë çështje.

“Besoj se më shqip që foli komisioni i Venecias në lidhje me të gjithë odisenë e marrëzinë antikushtetuese që i parapriu 30 qershorit, nuk ka folur askush. Më vjen mirë që Venecia përmendi një frazë që unë e kam thënë shpesh gjatë fushatës elektorale kur më pyesni si do shkoni në zgjedhje pa opozitën. E tash unë, e tha Venecia, do të ishte fatale që zgjedhjet të mos mbaheshin nëse ikën një parti, pasi në të ardhmen këto parti mund t’i marrin peng ato. Thelbi është u qartë: Ilir Meta ka shkelur Kushtetutën dhe kjo nuk diskutohet. Shkarkohet apo jo këtë e vendos i gjithë procesi. Unë e kam thënë që në sekondën e parë. Fakti që kjo mazhorancë nuk vrapon për të bërë ekzekutimin, por pret vendimin e Venecias duke e parë çështjen nga të gjitha aspektet do të thotë se gjërat funksionojnë siç duhet në anën tonë dhe jo si mund t’i duket disave.” tha Rama në Real Story.

I pyetur nga gazetari Sokol Balla se pse nuk kërkoi mendimin e Komisionit të Venecias edhe në lidhje me mosdrektimin e ministrave Cakaj dhe Lleshaj, ku presidenti Meta sërish bëri një faull ndaj Kushtetutës, Rama tha se këto çështje i janë drejtuar Gjykatës Kushtetuese dhe do të shqyrtohen me ngritjen e saj.

“S’kemi asnjë arsye pasi ato janë depozituar në Gjykatën Kushtetuese dhe do të jetë ajo që do të bëj interpretimin. Ndërsa në lidhje me marrëzitë para zgjedhje nuk kishim asnjë dilemë që presidenti bëri një akt ekstrem ndaj Kushtetutës që mund të kishte pasoja të rënda. Jo vetëm u shkel Kushtetuta, por u bë si një akt patriotik për të shpëtuar Shqipërinë, ndërkohë që ne të tjetër që respektuam ligjin dhe votuesit, u trajtuam sikur po merrnim peng dynjanë.” tha Rama në Real Story

Gjekmarkaj-Çupi përplasen për rrymat ruse dhe islamike në Tiranë

Ndërhyrja ruse dhe influencat e lindjes janë një problem që po ndihen edhe në Shqipëri. Për gazetarin Frrok Çupi kjo është bërë evidente, por janë partnerët perëndimorë ata që e mbajnë Shqipërinë drejt perëndimit dhe e ruajnë atë nga fryma islamike apo anti-amerikane.

“Ne sot kemi embrione të një anti-amerikanizmi. Kemi politikanë që frynë rryma islamike dhe pro ruse. Influencat e lindjes kanë hyrë në Shqipëri dhe jemi në një rrezik, por është interesi i shtuar i partenerëve Perëndimore që na ruan.” tha Çupi gjatë emisionit “Real Story” në News 24.

Ndërsa analisti Agron Gjekmarkaj akuzoi kryeministrin Rama si sjellës të këtyre influencave erdoganiste-putiniste, pasi është mik me presidentin turk dhe kjo u pa që nga memoriali i turpshëm te kodrat e Liqenit.

“Ndikimin më të madh e shoh nga influenca erdoganiste-putiniste dhe kjo u duk që tek memoriali i turpshëm tek Kodrat e Liqenit. Ky ndikim i erdoganzimit bëhet nën drejtimin e kryeministrit Rama, pasi është mik me Erdoganin.” tha Gjekmarkaj

Përtej lobimeve në SHBA apo dyshimeve për ndërhyrje të parave ruse duket se edhe problemet e qeverisjes apo humbja e terrenit nga opozita janë kthyer në një debat mes gazetarit Frrrok Çupi dhe analistit Agron Gjekmarkaj në emisionin “Real Story” të gazetarit Sokol balla në News 24.

Për Çupin në politikë ka ende elita dhe intelektualë dhe se fatmirësisht qeveria ka një qasje pro amerikane. Por për Çupin është për të ardhur keq që opozita po humb terren çdo ditë e më shumë “Një qeveri ka elita, ka intelektualë, ka elita diplomatike. Unë flas në parim. Opozita jonë rrjedh nga shifrat përditë. Ne kemi një qeveri që është e detyruar të jetë pro-amerikane.” tha Çupi.

Analisti Gjekmarkaj nuk është në një mendje duke deklaruar se në fakt në qeveri jo që nuk ka elita por vetëm shërbëtor të Ramës. “ Çfarë elitash. Nuk ka elita, ka shërbëtorë. Të shikosh te Edi Rama elitarizëm është tmerr.”

Për Edvin Kulluri i vetmi fat i mirë në gjithë këtë histori është se Shqipëria është pjesë e NATO-s dhe se siguria është më e madhe nga lotimet ruse. “Shqipëria do të shndërrohet në një brez të sigurisë së madhe nën ombrellën e NATO-s. Ky është lajm i mirë, fat i mbarë.”

Lobimi në SHBA, analiza në Real Story: Ndryshimi mes Ramës dhe Bashës

Lobimi në SHBA nga Rama dhe Basha ka qenë tema e diskutuar në emisionin Real Story të Sokol Ballës në News24, ku analistët shprehen se ato nuk janë të së njëjtës natyrë dhe se çështja e Bashës mund të cilësohet edhe më e rëndë, pasi kreu i opozitës po hetohet edhe në Shqipëri për pastrim parash.

Deklarata e avokatit të amerikanit 61-vjeçar William Argero, i cili pranoi se klienti i tij ka kontribuuar në mënyrë të paligjshme me 80 mijë dollarë për llogari të një politikani të huaj në fushatën presidenciale amerikane të vitit 2012, dhe që “klienti i tij po vepronte për llogari të Edi Ramës” ka hapur një debat të fortë për lobimin e politikanëve shqiptarë në SHBA.

Duke marrë shkas nga kjo, analisti Agron Gjekmarkaj në krahasimin mes dy liderëve politikë, pozitën e Ramës e shikon më të rëndë. “Kryeministri në kontekstin moral, është në vështirësi. Ndërsa në aspektin juridik, mbetet për t’u parë. Unë mendoj se Arta Marku ka treguar se është e varur politikisht. Kam dyshimet e mia te kjo Prokurori, e cila dosjet më të nxehta i çon nga Tirana në Dibër. Kjo që ndodh në Amerikë është një gjykim i vërtetë, është dënim i vërtetë. Së paku në SHBA nuk di që të ketë procedim ndaj Lulzim Bashës. Mirëpo, në Amerika ka një gjyq për një person që ka ndihmuar Ramën për të bërë foto me Obamën. Moralisht Rama është në gjendje kritike”, tha Gjekmarkaj.

Kurse gazetari Frrok Çupi shkon edhe më tej, duke vënë në dukje se lobim në SHBA nuk bëjnë vetëm politikanët shqiptarë, megjithëse sipas tij, çështja e Bashës është më komplekse. Si Rama dhe Basha, por jo vetëm këta të dy, keqpërdorin Kushtetutën e Amerikës dhe rregullat e lobimit. Në Shqipëri, Basha është i akuzuar për pastrim parash, sepse nuk ka treguar shumat e vërteta dhe nga kanë ardhur. Në fillim ka thënë ‘i kam marrë nga shqiptarë amerikanë’, pastaj doli se nuk ishin shuma 25 mijë por edhe 675 mijë të tjera, gjëra që rëndojnë shumë pozitën e kryetarit të Partisë Demokratike”, deklaroi Çupi. E përbashkëta mes Ramës dhe Bashës, sipas Çupit, është fakti se që të dy keqpërdorin Kushtetutën e Amerikës dhe parimin e lobimit. Ndërsa për dallimet mes tyre, analisti theksoi se fondet e përdorura nga Rama nuk janë deklaruar në Departamentin Amerikan, ndryshe nga çka ndodhur me Bashën. “Basha ka financuar Presidentin e SHBA, që do të thotë ka përzier në një çështje të pistë financimesh vetë kreun e shtetit të Amerikës. Fondet e përdorura nga Rama nuk janë deklaruar në DASH, por fondet e Bashës janë deklaruar. Ndërsa Rama ka këtë çështjen e fotos, Basha është i akuzuar në Shqipëri për pastrim parash, pasi nuk ka dëshmuar asnjëherë shumat e vërteta dhe nga kanë ardhur. Sipas ligjit, rëndohet më shumë pozita e Bashës”, tha Frrok Çupi.

Ndërsa Edvin Kulluri, një kritik i ashpër si për Bashën, ashtu edhe për Ramën shprehet se duhet sqaruar se nuk ka ende një gjykim në themel të çështjes. “Nuk dihet nëse hetimet do të bëhen në Amerikë apo në Shqipëri, për sa kohë që janë shtetas shqiptarë. Kemi çështje serioze të implikimit të dy liderëve, Ramës dhe Bashës. Jemi 7 vjet më pas dhe drejtësia amerikane ka pasur kohë. Unë besoj se Edi Rama është në pozicion të vështirë, besoj do ketë problem ligjor me këtë financim, që dyshohet i paligjshëm. Një person ka përmendur z. Rama në gjyq. Kemi dy liderë që bëjnë këto punë, të cilët sulmojnë njëri-tjetrin politikisht. Nëse Rama falsifikon dhe paguan 80 mijë USD për të bërë një foto me Obamën dhe fiton zgjedhjet, kundërshtari i tij shpenzon 950 mijë USD dhe del më keq në zgjedhje se 4 vite më parë”, tha Kulluri.

Po ashtu, në të njëjtën linjë ishte edhe Minxhozi, sipas të cilit, problemi i Bashës, ndryshe nga Rama është se ai ka rënë në det me këmbët e tij për çështjen e financimit. “Edi Rama nuk e nxori foton në rrjetet sociale, kurse Basha bëri me jehonë. Besoj se Basha ka rënë në det me këmbët e veta për financimin. Këtu nuk ka asnjë transparencë për paratë e partive. Këtu gropat skeptike të vërteta janë fushata elektorale. Nëse Rama ka lobuar për foto me Obamën gjatë fushatës, Basha ka lobuar për Presidentin Trump, pikërisht në kohën kur kritikat ishin shumë të mëdha”, u shpreh Minxhozi. Gjithsesi, analisti shtoi se dalja në publik me personin më të rëndësishëm në botë, është një tundim që nuk i shpëtojnë dot jo vetëm politikanët shqiptarë, por edhe të tjerë.

RAMA RIKTHEHET NË “REAL STORY”, TË ENJTEN PËRBALLË SOKOL BALLËS

Rama sonte në “Real Story”

Kryeministri Edi Rama rikthehet në Real Story të enjten më 3 tetor, ora 21:00 në News 24 përballë Sokol Ballës.

Kreu i qeverisë do t’i përgjigjet pyetjeve të gazetarit Balla mbi çështjet më të nxehta që shoqëruan jo vetëm stinën e verës, por vazhdojnë të jenë në qendër të vëmendjes, mbi krizën politike, nismën e mazhorancës për shkarkimin e Presidentit Meta, zgjedhjet vendore të 30 qershorit dhe shumë të tjera pa lënë mënjanë diskutimin mbi Ballkanin dhe çështjen e hapjes së negociatave.

Të enjten në orën 21:00 ndiqini të gjitha këto dhe më tepër në emisionin ‘Real Story’ Kryeminsitrin Rama përballë gazetarit Sokol Balla.