Nuk janë paguar, lojtarët e Skënderbeut bojkotojnë stërvitjen

Kriza financiare nuk është një gjë e re për klubet e Superligës. Së fundi, probleme me financat janë shfaqur te Skënderbeu. Sipas Panorama Sport, lojtarët e klubit korçar kanë kohë që nuk janë paguar nga klubi. Ndaj, në shenjë proteste, lojtarët kanë bojkotuar seancën stërvitore të së martës. Lojtarët shkuan si zakonisht në stadium për të kryer stërvitjen, por morën vendimin të bojkotonin.

Trajneri Ilir Daja ka mbetur i befasuar kur u njoh me vendimin e lojtarëve. Lojtarët kanë qëndruar vetëm disa minuta në ambientet stërvitore të klubit dhe më pas janë larguar. Situata te Skënderbeu ka qenë e vështirë pas vendimit për dënimin me 10 vite përjashtim nga kupat e europës dhe gjobën 1 milion euro.

Klubi nuk arriti të përfitojë ulje apo falje të dënimit as në Gjykatën e Arbitrazhit Sportiv në Lozanë, ndërkohë që drejtuesit e Skënderbeut janë shprehur se do të apelojnë vendimin në Gjykatën Federale në Zvicër. Megjithatë, dënimi nga UEFA e ka dëmtuar jo pak gjendjen financiare të klubit, që siguronte të ardhura të konsiderueshme nga pjesëmarrja në garat europiane dhe shitja e lojtarëve.

Busti i Gjergj Kastriotit vendoset edhe në Parma

Busti i heroit tonë kombëtar, Gjergj Kastriotit është vendosur së fundi edhe në qytetin e Parmas në Itali.

Vendosja e bustit të Skënderbeut në Parma ishte pjesë e aktiviteteve të organizuara për edicionin e 13 të muajit të Kulturës Shqiptare organizuar nga shoqata “Scanderbeg”.

Busti i Gjergj Kastriotit është vendosur në parkun “Eunice Kennedy”. Nisma është mbështetur nga zyrtarët e bashkisë së Parmas.

Në ceremoninë e inaugruimit të monumentit kushtuar Skënderbeut, ishte e pranishme ambasadorja e Shqipërisë në Itali, Anila Bitiri dhe përfaqësues të tjerë të trupës diplomatike të Shqipërisë dhe Kosovës në vendin fqinj.

Teuta mund Skënderbeun, rikthen normalitetin në Durrës

Pasditen e të dielës në stadiumin “Niko Dovana” në Durrës, u luajt ndeshja midis Teutës dhe Skënderbeut. Ndeshja u luajt në një ambient solidar dhe miqësor, e cila u reflektua edhe në fushën e lojës. Takimi sportiv është nga aktivitetet e para që zhvillohet në qytet pas tragjedisë së rëndë të 26 nëntorit, që shkaktoi 24 viktima vetëm në qytetin e Durrësit.

Teuta ishte ekipi më i tronditur nga tërmeti i 26 nëntorit, por të dielën pasdite lojtarët gjetën forcën për të rikthyer atmosferën e normalitetit në qytet. Me ndihmën e tifozëve, skuadra durrsake fitoi minimalisht 1-0 ndaj Skënderbeut, me golin e shënuar nga Lorenco Vila në fund të kohës së rregullt të lojës.

Ndërkohë, gjatë ndeshjes të dyja ekipet u shfaqën të kujdesshme, ndërsa rastet nuk munguan. Teuta pretendoi dhe një penallti gjatë pjesës së dytë, por arbitri nuk e vlerësoi si të tillë. Ndërkohë, tifozët ultras të Teutës, “Djemtë e Dedit”, bën një dedikim prekës gjatë ndeshjes.

Në një banderolë ata shkruan “Prehuni në paqe”, ndërsa në qendër të saj kishin vendosur numrin ‘51’ që simbolizon viktimat e tërmetit të 26 nëntorit. Pas fitores të së dileës, Teuta ngjitet në vendin e pestë me 22 pikë, ndërsa Skënderbeu me 20 pikë ndodhet në vendin e shtatë.

Supergolat e Laçit “shkatërrojnë” Skënderbeun

Korça ishte pritëse e ndeshjes Skënderbeu-Laçi, por që rezultoi në marrjen e 3 pikëve nga kurbinasit. Një ndeshje interesante ku në pjesën e parë mbizotëruan korçarët dhe në të dytën kurbinasit. Ndeshja u mbyll me rezultatin e thellë 1-4 për Laçin. Goli i parë u shënua nga Skënderbeu që më pas u pasua nga goli i Laçit duke mbyllur pjesën e parë barazim 1-1.

Në pjesën e dytë u shënuan 3 gola nga skuadra e Laçit, përkatësisht dy nga sulmuesi amerikan Nuabueze në minutën e 48’ dhe 83’ dhe një gol i Xhixhas në minutën e 63’.

Me 3 pikët e fituar ndaj korçarëve, Laçi renditet në vend të 5-të me 16 pikë, ndërsa Skënderbeu zbret në vendin e 8-të me 14 pikë.

Pjesa e parë/ Sukaj e Bregu shënojnë në Vlorë. Paqe në Tiranë

Skënderbeu dhe Flamurtari e mbyllën në barazim 1-1 pjesën e parë, në takimin e javës së parë të fazës së dytë të Superligës. Skuadra e drejtuar nga Ilir Daja gjeti rrjetën në minutën e 23` me Dejvi Bregun.

Sulmuesi i Skënderbeut shënoi pas një asisti brenda zonës nga Nazmi Gripshi, teksa me të djathtën e tij gjuajti fortë drejt rrjetës dhe ndryshoi shifrat e takimit.

Ndërkohë, Skënderbeu dominoi lojën gjatë pjesës së parë, duke tentuar disa herë portën, por goli i Bregut ishte i vetmi që realizuan. Në fund të pjesës së dytë, ishte sulmuesi shkodran i Flamurtarit, Xhevair Sukaj ai që vendosi barazpeshën në takim.

Në krahun tjetër, supersfida e kësaj jave është ajo mes Partizanit dhe Kukësit që po zhvillohet në “Selman Stërmasi”. Të dyja skuadrat e mbyllën pjesën e parë të lojës me rrjeta të paprekura, por duke rrezikuar jo pak në portat respektive.

Megjithatë, pjesa e parë nuk solli asnjë gol. Në sfidën e parë mes këtyre dy skuadrave për këtë sezon, ishte Kukësi që mori tre pikët në fillim të kampionatit, por prej asaj kohe, Partizani është rritur duke kryesuar kampionatin

Skënderbeu merr kreun. Ndalet Tirana e Partizani

Tirana nuk shkoi më shumë se barazimi 2-2 ndaj Flamurtarit, në takimin e javës së 7-të të kampionatit, që vinte fill pas derbit. Bardheblutë e nisën mirë takimin, me Hasanin që gjeti rrjetën vetëm pas katër minutash lojë. por, goli i sulmuesit bardheblu, u pasua nga një autogol i Ngoo. Sulmuesi anglez realizoi në portën e Ilion Likës në të 13` duke vendosur barazpeshën në fushën e lojës. Megjithatë, Hasasni mendoi për rikthimin e avantazhit në të 38`.

Me avantazhin 1-2, Tirana mendoi se e fioi ndeshjen, por vlonjatët surprizuan në të 90+2`, kur Ardit Hoxhaj realizoi golin e barazimit për Flamurtarit. Kjo ishte pika e dytë për këtë sezon për skuadrën vlonjate, ndërsa Tirana shkon në kuotën e 11 pikëve. Në takimin tjetër të së shtunës, Partizani dhe Teuta ndanë gjithashtu ndanë nga një pikë mes tyre. Avdyli kaloi Teutën në avantazh në të 37`, ndërsa Trashi shënoi në minutën e tretë shtesë të pjesës së parë për Partizanin.

Skënderbeu është rikthyer te fitorja në kampionat, pasi mundi Luftëtarin 2-0. Të dy golat e fitores së korçarëve u shënuan në kohën shtesë, nga Dita dhe Muja në të (90+3` dhe 90+3`). Tre pikët e të shtunës, e ngjisin Skënderbeun në vendin e parë në renditje me 12 pikë, po aq sa Teuta që mban vendin e dytë. Ndërkohë, Partizani ndodhet në vendin e tretë me 11 pikë, po aq sa Tirana dhe Bylis, që ndajnë vendin e katërt dhe të pestë.

O’Tiron je “kampion”! Tre gola “ujqërve”

Tirana ka marrë fitoren e tretë në kampionat këtë sezon, duke mundur në shtëpi Skënderbeun me rezultatin 3-1. Ashtu siç pritej, 24 herë kampionët e vendit kanë tentuar që në fillim portën, por mbrojtja korçare është treguar e kujdesshme. Presionit të vendasve, skuadra e Skënderbeut i ka rezistuar deri në minutën e 45+2. Michael Ngoo ka kaluar Tiranën në avantazh. Kobina tenton rrjetën, por ndalet nga Koliçi i cili nuk kontrollon si duhet, dhe përfiton Ngoo që tund rrjetën. Ky gol bën që të shpërthejë festa në tribunat e “Selman Stërmasit”. Me nisjen e pjesës së dytë, Tirana mbetet në sulm, por Skënderbeu barazon në të 66`.

Një krosim i bukur i Gripshit shfrytëzohet në mënyrën e duhur nga Pollozhani, i cili realizon dhe vendos barazimin në fushë. Barazimi nuk e kënaq Ardi Memën, i cili i kërkon skuadrës të bëjë më shumë presion. Kështu, Skënderbeu dorëzohet në pesë minutat e fundit të ndeshjes. Në të 85` minutë, Grent Halili gjen rrjetën duke shënuar me kokë pas një asisti të Hoxhallarit. Pesë minuta më vonë, në të 90`, Hoxhallari përfiton nga një rrëmujë në zonë duke devijuar topin në rrjetë pas një goditje këndi.

Me fitoren e të shtunës, Tirana ngjitet në krye të renditjes me 10 pikë, ndërsa pas saj është Teuta me 8 pikë që parazoi me Vllazninë, me rezultatin 0-0. Në ndeshjen tjetër të kësaj jave, Luftëtari ka mundur Flramurtarin në “derbin” e jugut, pas një dygolëshi të Realdo Filit, që shënoi në minutën e 53 dhe 90`. Kështu, gjirokastritët ngjiten në vendin e tetë me 3 pikë, ndërsa Flamurtari në vendin e fundit pa asnjë pikë. Të dielën do të luhen dy sfidat e mbetura të javës së katërt të Superligës, Kukësi-Bylis dhe Laçi-Partizani.

Skënderbeu firmos me ish-mbrojtësin e Kukësit

Skënderbeu ka bërë një tjetër lëvizje në orët e fundit të merkatos. Klubi korçar ka firmosur me mbrojtësin 20-vjeçar Faton Dzemaili, i cili luajti me Kukësin sezonin e fundit. Marrëveshja mes Skënderbeut dhe 20-vjeçarit është arritur orët e vona të së mërkurës. Dzemaili ka nënshkruar një kontratë që e mban të lidhur për 3 vite me skuadrën e Skënderbeut. Futbollisti aktivizohet në krahun e majtë të mbrojtjes.

Sezonin e shkuar Dzemaili u aktivizua me skuadrën e Kukësit në Superligë, duke fituar eksperiencë. Futbollisti nga Kosova është pajisur me pasaportën shqiptare, çka do të thotë se trajneri Daja nuk do të ketë probleme me aktivizimin e lojtarëve të huaj. Dzemaili duket se do të jetë nënshkrimi i fundit i Skënderbeut për këtë verë.

Klubi është rinovuar pothuajse i gjithi me lojtarë të rinj në moshë dhe eksperiencë. Mungesa e pjesëmarrjes në kupat e europës, ka shtyrë klubin që të mendojë për një tjetër strategji për të fituar të ardhura. Promovimi i talenteve dhe më pas shitja e tyre në ekipe jashtë vendit, çka do t`i siguronte skuadrës vazhdimësi financiare nëpërmjet merkatos.

Skënderbeu mposhtet nga Bylis, Partizani ‘fundos’ Flamurtarin

Bylisi ka befasuar Skënderbeun në shtëpi duke e mundur me rezultatin e thellë 0-3. Skuadra ballshiote ka bërë një ndeshje të pabesueshme në javën e tretë të kampionatit, duke marrë tre pikë kundër korçarëve që vinin pas dy fitoresh radhazi. Ishte minuta e 10-të e takimit kur Murtaj realizon një gol nga brenda zonës, pasi u la i pambuluar nga mbrojtja vendase. Skënderbeu u mundua të reagonte, por ekipi i Ilir Dajës shfaqi shumë mangësi në lojën sulmuese.

Kështu në minutën e 45, skuadra e Bylis realizon përsëri duke dyfishuar shifrat. Këtë herë ishte Qardaku që futet në zonën e Skënderbeut dhe pasi kalon mbrojtjen, godet drejt portës, por topi ndalet nga portieri Koliçi, që në fakt i dërgon topin Guidos, që nuk e ka të vështirë të gjejë rrjetën. Goli i tretë i sfidës ka ardhur në minutën e 61` nga pika e bardhë e penalltisë. Ka qenë Pollozhani ai që ka gabuar në mbrojtje duke shkaktuar 11-të metërshin.

Ekzekutimin e penalltisë e mori përsipër veterani i portës së Bylisit, ish-portieri i kombëtares, Isli Hidi. Shtatlarti nuk ka gabuar përballë Koliçit duke trefishuar shifrat. Pas fitores të së dielës, Bylis shkon në kuotën e katër pikëve ndërsa Skënderbeu mbetet me 6-të. Ndërkohë Partizani ka fituar ndaj Flamurtarit me rezultatin minimal 1-0.

Skuadra e ‘demave’ ka marrë tre pikët e radhës në kampionat, duke mundur Flamurtarin, që ende nuk ka marrë asnjë pikë. Ka qenë Solomon ai që i ka dhënë fitoren ‘demave’, pasi ka shënuar një gol të bukur në minutën e 23 të sfidës. Ishte një asist i Trashit, i shndërruar në gol nga brenda zonës nga Solomon. Tre pikët e së dileës e ngjisin Partizanin në kuotën e 6 pikëve dhe në vendin e 4, po aq sa Skënderbeu.

Para Bylisit, Daja: Të japim maksimumin, pres dhe një afrim

Trajneri i Skënderbeut, Ilir Daja ka folur një ditë para ndeshjes me Bylisin, e vlefshme për javën e tretë të Superligës. Trajneri i ‘ujqërve’ e ka nisur me një analizë të dy ndeshjeve të para, ku shprehet i befasuar dhe vetë për marrjen e pikëve të plota. “Brenda një ndeshje janë të treja rezultatet, me kohën që kishim në dispozicion nuk e kishim menduar që në dy javët e para, mund të mernim pikët e plota. Por, ajo që u pa në fushën e lojës në të dyja ndeshjet, kishte një emërues të përbashkët, sepse të gjithë duke filluar nga lojtarët besuan deri në fund, pasi edhe në ndeshjen e parë dhe në Laç besuam dhe përmbysëm rezultatin. Mentaliteti është dhe në kushte vështirësie shfaqet. Në këto momente ai që është më i rëndësishmë është komponenti psikologjik”, është shprehur Daja.

Ndaj Bylisit kërkohet përsëri të jepet maksimumi, ndërsa Daja shprehet se është një ekip të cilin e njeh mirë dhe nuk do të jetë e lehtë. Ndërsa shton se në formacion do të jenë lojtarët të cilët kanë luajtur dy ndeshjet e kaluara. “Të them të drejtën Bylisin e njoh mirë, ata nuk kanë bërë shumë ndryshime në grup. Ka bërë mirë, pavarësisht se nuk kanë marrë rezultatet të mira. Duhet të harrojmë dy fitoret e para dhe të djersijmë në fushë. Ende nuk e kemi konsoliduar manovrën dhe kështu, lojtarët me përvojë duhet të japin maksimumin që të jemi në ekuilibër. Ekipi që fiton nuk ndryshohet dhe në bazë të kundërshtarit dhe lojtarëve që kemi në dispozcion, thuajse do të e jetë ekipi që ishte në javët e para”, është shprehur Daja.

Ekipi është entuziast tregon trajneri Daja, ndërsa shton se problemi i vetëm ka qenë forma jo e mirë fizike e disa lojtarëve. Kur kanë mbetur dhe pak orë nga mbyllja e merkatos, Daja shprehet se shpreson që të ketë dhe ndonjë afrim të fundit. “Entuziazmi është prezent dhe padyshim i merituar, pasi në një kohë të shkurtër që kemi pasur në dispozicion edhe muskujt kanë qenë të rënduar dhe ne nuk kemi pasur formën më të mirë fizike. Jemi goxha mirë, por duhet të jemi me këmbë në tokë. Kemi biseduar dhe komunikuar me presidentin deri në orët e vona të natës të bëjmë të mundur, që në këtë hapësirë kohore prej disa orësh të afrojmë ndonjë elementë që do na shërbejë për vazhdimësinë”, është shprehur Daja.