Tag: taulant balla

Ngritja e SPAK, Balla: Reforma në drejtësi nuk mund të pengohet

Struktura e Posaçme Antikorrupsion, një nga strukturat e drejtësisë së re, emëroi të hënën 8 prokurorët e parë që do të hetojnë dosjet e korrupsionit dhe krimit të organizuar në nivele të larta qeverisëse. SPAK lindi si pjesë Reformës në Drejtësi duke treguar se ajo po funksionon dhe se “peshqit e mëdhenj” i kanë orët e numëruara. Emërimi i këtyre prokurorëve u përshëndet edhe nga kreu i Grupit Parlamentar të PS-së, Taulant Balla, i cili u dërgoi një mesazh të gjithë atyre që mendonin se Reforma në Drejtësi mund të pengohej apo të dështonte.

“Kush thotë që Reforma në Drejtësi po ecën ngadalë, apo për disa syresh që ende shpresojnë se Reforma mund të pengohet apo të dështojë, sot morën edhe një përgjigje tjetër të fortë. Këshilli i Lartë i Prokurorisë emëroi tetë prokurorët e SPAK. Punë të mbarë prokurorëve specialë në luftën kundër korrupsionit dhe çdo lloj forme KÇK”, shkruan Balla.

SPAK pritet të nis punën pas 19 dhjetorit, ku prokurorët do të kryejnë betimin te Presidenti dhe më pas dosjet e prokurorisë së Krimeve të Rënda do të kalojnë në ngarkim të tyre për hetim. Kjo strukturë që perceptohet si “bërthama” e drejtësisë së re se bashku me BKH pritet që të vendos pas hekurave njerëz të pushtetshëm të korruptuar.

PS për Muçin: Shejtani të lirojë zyrën

Kryetari i grupit Parlamentar i PS, Taulant Balla tha se vendimi i KPA për shkarkimin e Besnik Muçit është një vendim kushtetues, që vetëm zbatohet dhe jo të diskutohet e aq më tepër të vihet në diskutim zbatimi i saj. Pas shkarkimit, Besnik Muçi tha se nuk do të lirojë zyrën e tij në Gjykatën Kushtetuese, pasi atë e ka dekretuar Presidenti Meta. Balla tha se Gjykata Kushtetuese më mirë të rrijë më 4 anëtarë se sa me “shejtanin” brenda dhe se askush nuk mund të rrijë në detyrë në kundërshtim flagrant me Kushtetutën.

“Vendimet e komisionit të vlerësimit janë të autoriteteve kushtetuese dhe nuk mund të kenë asnjë lloj atakim politik. Nuk komentoj vendimet e drejtësisë, ato janë të zbatueshme. Të gjithë e dinë se qasja e legjislativit ndaj vendimeve fundore të vettingut. Kjo është qesharake. Vendimet nuk diskutohen vetëm se zbatohen. Ajo që kemi thënë është që institucionet e reja të drejtësisë, Kushtetuesja apo e Larta duhet të kenë në përbërje personalitete të drejtësisë që nuk kanë asnjë mangësi në pastërtinë e figurës dhe aftësinë profesionale. Më mirë një gjykatë Kushtetuese me katër anëtarë sesa me shejtanin brenda. Askush nuk mund të rrijë në detyrë në kundërshtim flagrant me Kushtetutën. Presidenti ka krijuar një konflikt kronik për të penguar reformën në drejtësi. Presidenti të reflektojë dhe ta kthejë në shina” tha Balla.

Taulant Balla paralajmëroi se mazhoranca do t’i drejtohet Komisionit të Venecias për Kushtetuesen, ashtu siç rekomandoi më herët ambasada e SHBA dhe ambasadori italian Cutillo.

“Ne si Kuvend në ditët në vijim duhet të marrim hapat për shtimin e mekanizmave zhbllokues sa herë që një individ apo institucion ndërmerr hapa për të penguar reformën në drejtësi” deklaroi Balla.

Mbi 76 mijë anëtar të PS votuan për zgjedhjen e delegatëve

Sekretari i Përgjithshëm i Partisë Socialiste, Taulant Balla mbajti një konferencë për shtyp mbrëmjen e të shtunës, pas procesit të votimit për zgjedhjen e delegatëve për Kongresin e PS, që do të mbahet më 20 shkurt 2020. Balla u shpreh se 76.068 anëtarë të Partisë Socialiste morën pjesë në votimin për zgjedhjen e 706 delegatëve të Kongresit të PS. Balla veçoi dy risitë e procesit zgjedhor, testimin e votimit elektronik dhe barazinë gjinore.

“Dua të veçoj gjatë ditës së sotme, dy risitë që shënoi ky proces zgjedhor me testimin për herë të parë të votimit elektronik në Njësinë Nr.8 të Tiranës nga 989 anëtarë dhe 100 anëtarë të tjerë që votuan on-line, Partia Socialiste tregoi se nuk është jo vetëm partia më e madhe dhe më e organizuar, por edhe partia më moderne në Shqipëri. Barazia gjinore mori tjetër inkurajim në këtë proces, pasi 47% e kandidatëve për delegatë të Kongresit të  PS ishin gra dhe vajza”, tha Balla.

Ai shtoi se zgjedhjet në parti, kanë një rëndësi të madhe për ecurinë e gjysmës së dytë të mandatit të qeverisë. Taulant Balla u shpreh se Partia Socialiste ka nevojë për një hapje të madhe ndaj shoqërisë.

“E dimë të gjithë se procesi i këtyre zgjedhjeve në parti, ka një rëndësi të veçantë për ecurinë e gjysmës së dytë të këtij mandati dhe për betejën për rinovimin e mandatit të socialistëve si shumicë qeverisëse në Qershor 2021. Ashtu sikundër, e dimë se në stadin aktual partia ka nevojë për një energjizim të ri, një ri-organizim kapilar dhe një hapje të madhe ndaj shoqërisë. Këto zgjedhje konsoliduan një bazë të re përfaqësimi të grave dhe vajzave në vazhdën e reformës transformuese që PS ka udhëhequr në drejtim të barazisë gjinore”, tha Sekretari i PS.

Në fund ai falënderoi të gjithë anëtarët e PS dhe themeluesit e saj, ndërsa u shpreh se “asnjë forcë tjetër përveç PS nuk mund ta sillte këtë transformim dhe asnjë forcë tjetër, përveç PS, nuk mund të sillte transformimin epokal, qoftë në qeverinë qendrore, qoftë në këshillat bashkiakë, tanimë Shqipëria të ketë mundësinë e përfaqësimit me 50% burra dhe djem dhe me 50% gra dhe vajza”, tha Balla.

Zgjidhet raportuesi i KE për Kosovën, uron Balla: Mbështetës i integrimit të Ballkanit

Diplomati gjerman Peter Beyer fitoi garën ndaj diplomatit rus Aleksey Kondratyev për postin e raportuesit të Këshillit të Europës për Kosovën. Në votimin e të enjtes në Komitetin për Politikë të Jashtme dhe Demokraci të Asamblesë Parlamentare të Këshillit të Europës, Beyer fitoi bindshëm me 33 vota ndaj diplomatit rus Kondratyev, i cili mori vetëm 6 vota.

Diplomati gjerman Peter Beyer konsiderohet një prej njohësve më të mirë gjermanë të zhvillimeve në Ballkan dhe sidomos në Kosovë. Ai ka kërkuar shpesh arritjen me dialog të një marrëveshje gjithëpërfshirëse për normalizimin e raporteve mes Kosovës dhe Serbisë. Zgjedhja e tij pritet të kalojë edhe nëpër instanca të tjera të Këshillit, por votimi i mbajtur të enjten është faza më e rëndësishme. Zgjedhja e Peter Beyer si raportuesi i Kosovës në Këshillin Europian është përshëndetur edhe nga sekretari i Përgjithshëm i PS, Taulant Balla, i cili e vlerëson si një mbështetës të integrimit europian të Ballkanit Perëndimor. “Sapo urova kolegun Peter Beyer për zgjedhjen në Asamblenë Parlamentare. Ai mori detyrën si Raportues për Kosovën, pasi fitoi 33 vota, kundrejt deputetit rus Kondratyev (6 vota). Peter Beyer është një njohës i mirë dhe mbështetës i rrugës Europiane të vendeve të Ballkanit Perëndimor” shkruan Balla në Twitter.

PS voton më 16 nëntor, Balla: Siguron barazi gjinore, Rama: Sjell energji të reja

Sekretari i Përgjithshëm i Partisë Socialiste Taulant Balla tha se PS është partia më e besuar në Shqipëri dhe e vetmja që siguron një barazi gjinore në nivele qeverisëse 50 % burra dhe 50 % gra. Këto deklarata Balla i bëri nga Elbasani ku nën moton “TI ZGJEDH” prezantoi kandidatët që do të garojnë në zgjedhjet e 16 nëntorit për delegatë në Kongresin e Partisë Socialiste.

“Partia Socialiste do të bëjë të mundur që të zgjedhurit e saj në qeverisje ose në nivel lokal të jenë 50 për qind burra e 50 për qind gra. PS sot ka bërë shumë për barazi gjinore, teksa ne kemi shumë ministre në qeveri.  Partia Socialiste sot është partia më e madhe në vend, duke pasur mbështetje edhe nga gratë.

Ne në çdo organizatë kemi zgjedhur një burrë e një grua, për ta çua barazinë gjinore në PS 50 për qind burra e 50 për qind gra”, tha  Balla.

Ai foli edhe për integrimin e Shqipërisë në familjen evropiane ku tha se PS do të bëjë gjithçka që nën qeverisjen e saj vendi të integrohet sa më afër BE.

“Ne duhet të bëjmë gjithçka që të marrim edhe mandatin e tretë. Ne kemi sot të gjitha bashkitë në qarkun e Elbasanit. PS qeveris sot në 60 bashki të vendit, ne jemi pjesë e të majtës europiane, kemi ruajtur natyrën reformiste të Partisë Socialiste. Partia Socialiste është partia e vetme moderne në vend.

Nuk duhet të harrojmë se partia në territor është më e fuqishme me njerëzit e thjeshtë. Nuk duhet të harrojmë se Shqipëria sot është kandidate për të hapur negociatat me BE.

Mos të harrojmë se Shqipëria ka bërë të gjitha detyrat që i takojnë, por BE-ja duhet të mbajë fjalën për të hapur negociatat. Misioni historik është që PS të qeveriset nga Edi Rama”, tha Balla.

Nisma “TI ZGJEDH” nga Elbasani u përshëndet edhe nga kryeministri Rama, i cili tha se zgjedhjet e 16 nëntorit do të sjell ripërtëritjen e Partisë Socialiste, për t’u përgatitur për sfidën e 2021 me energji të reja.

“Zgjedhjet në PS nuk bëjnë lajm në mediat e zëna me thashetheme, gënjeshtra e të zeza nga vendi e bota, por janë një proces me shumë pjesëmarrje, organizatë më organizatë e asamble më asamble, ku Partia Socialiste po ripërtërihet e riorganizohet për sfidën e vitit 2021. Një përgëzim për të gjithë anëtarësinë socialiste dhe për socialistët e socialistet e Elbasanit, që siç tregojnë këto pamje po shkojnë drejt zgjedhjes së delegatëve të Kongresit me energji të reja pozitive“, shkruan Rama.

Zgjedhorja, Balla: PD nuk e do votën e emigrantëve

Sekretari i Përgjithshëm i Partisë Socialiste, Taulant Balla bëri një deklaratë të fortë në emisionin  “Real Story” ku tha se PD nuk e do votën e emigrantëve dhe nuk ka denjuar të ulet kurrë për të diskutuar për formulën se si ajo do të zhvillohet. Balla tha se në zgjedhjet e 2021 vendi do të votojë me Kodin e ri elektoral që do të miratohet deri në fund të vitit. Si themel të reformës Zgjedhore, Taulant Balla ka renditur depolitizimin e komisioneve zgjedhore dhe transparencën në fushatë.

“Themeli i Reformës Zgjedhore është depolitizimi i të gjithë komisioneve zgjedhore dhe transparenca e fushatës zgjedhore. Vota e emigrantëve është ajo që ka kërkuar PS, por PD nuk ka pranuara kurrë të ulet të flas. PD nuk e dëshiron votën e emigrantëve. Ajo nuk është ulur kurrë edhe të diskutojë në lidhje me formulën se si mund të realizohet. Në zgjedhjet e vitit 2021 do të shkohet me Kod te ri Zgjedhor, ka përfunduar. Do te shkohet me Kod të ri. Do ta votojmë deri në fund të vitit.” tha Balla

Balla tha gjithashtu se PD tenton të mbajë peng reformën Zgjedhore dhe se maxhoranca ka vite që e pret PD-në për të, por dhe kjo pritje ka një fund.

“Ne e kemi pritur PD-në me vite. Që në 2016 e presim PD-në të miratojmë reformën zgjedhore sipas rekomandimeve të OSBE/ODIHR. Pritja e ka një fund. Dokumenti i Bundestagut e ka të qartë që reforma duhet miratuar me konsensusin e komisionit të posaçëm të reformës zgjedhore. PD nuk mund ta mbajë peng”, tha Balla.

Balla: “Zgjedhorja”, gati në dhjetor

Reforma zgjedhore pritet të miratohet deri në fund të këtij viti, të paktën për sa i përket adresimit të rekomandimeve të OSBE/ODIHR-it. Pas kryeministrit Rama, këtë e konfirmoi edhe kryetari i Grupit Parlamentar të PS Taulant Balla, i cili tha se deri për Krishtlindje, kodi zgjedhor do të jetë miratuar në parlament. Balla tha se miratimi sa më shpejt është i nevojshme si pjesë e 9 kushteve të vendosura nga Bundestagu gjerman. Ai i bëri thirrje edhe opozitës parlamentare se adresimi i ndryshimeve të rekomandimeve të OSBE/ODIHR-it në Kodin Zgjedhor duhet të jetë i menjëhershëm.

“Brenda dhjetorit të këtij viti ne do të kemi miratuar ndryshimet në Kodin Zgjedhor. Meqenëse në këtë tryezë ka përfaqësues të shumicës por edhe të opozitës parlamentare, unë dua të shpreh nevojën që Shqipëria, brenda dhjetorit të miratojë ndryshimet në Kodin Zgjedhor. Këto janë pjesë edhe e detyrave të përcaktuara edhe nga Bundestagu, sepse nuk ka një matricë më të mirë të vlerësimit të progresit të Shqipërisë në rrugën e hapjes së negociatave, se sa vendimi i Bundestagut gjerman. Apeli im, edhe për grupimet e tjera politike, të përfaqësuara në Kuvendin e Shqipërisë, është që, përtej interesave politike që mund të kemi, adresimi i nevojave të ndryshimit të Kod Zgjedhor të rekomandimeve të ODIHR-it duhet të jetë i menjëhershëm.

Besoj që Krishtlindjet e 2019 dhe marrja e presidencës së OSBE-së nga ana e Shqipërisë, do të na gjejnë me ndryshime të miratuara në Parlament.” – tha Balla gjatë seminarit të organizuar nga OSBE/ODIHR, ku morën pjesë deputet të Shqipërisë dhe Maqedonisë së Veriut. 

Opozita parlamentare, e cila kërkon ndryshim të sistemit zgjedhor, ka deklaruar se diskutimi dhe puna për adresimin e rekomandimeve të OSBE/ODIHR-it  dhe ato për ndryshimin e sistemit zgjedhor duhet të bëhen në mënyrë paralele, dhe miratimi në Kuvendi i tyre do të bëhet në të njëjtën kohë. Ndërsa mazhoranca deklaron se reforma të diskutohet në dy faza, ku fillimisht të miratohen rekomandimet e ODIHR-it dhe më pas sistemi zgjedhor, pasi ai kërkon më shumë kohë.

“Ilir e Shkele! Ta tha Rama, e sot, Venecia”

Raporti paraprak i Komisionit të Venecias u përshëndet edhe nga sekretari i përgjithshëm i PS, Taulant Balla, i cili shkruan se Meta e shkeli Kushtetutën dhe se Komisioni i Venecias e tha këtë e zeza në të bardhë. Madje Balla ftoni presidentin të lexojë një pjesë të raportit, për të cilën kryeministri Rama e ka theksuar disa herë që nga dekreti i Metës për anulimin e zgjedhjeve. Rama ka cilësuar se bojkoti i partive nuk mund të pengojë mbajtjen e një procesi të rregullt zgjedhor, pasi kjo do të bëhej rrugë dhe se çdo parti mund ta bllokonte atë në të ardhmen. Edhe në raport theksohet pikërisht kjo gjë nga Komisioni i Venecias. Presidenti Meta disa herë ka justifikuar veten se anuloi zgjedhjet pasi opozita i bojkotoi dhe se kërkonte të shmangte “rikthimin e diktuarës” ku garonte vetëm një parti. Kjo është në shkelje të Kushtetutës, ja tha Rama dje, e sot ja tha dhe Venecia, institucioni që Meta beson verbërisht.

“Që e shkele e shkele Ilir, po sa e shkele do ta vendosë procesi ligjor, ndërkohë që të sugjeroj të lexosh me vëmendje këtë pjesën që mua me pëlqeu më shumë:

“Bojkoti elektoral i subjekteve politike, edhe nëse ata përfaqësojnë një pjesë të madhe te votuesve nuk mund të ndalojë zhvillimin e zgjedhjeve të rregullta. Përndryshe, këto parti do të fitonin të drejtën të pengonin çdo proces zgjedhor në të ardhmen”

E ka thënë Edi Rama pa u lodhur kur i thoshin si mund të bëhen zgjedhjet pa ato parti dhe sot e ka shkruar Komisioni i Venecias, e zeza mbi të bardhë.’ shkruan Balla në facebook.

Balla: Mirënjohje Merkel, vlerësoi progresin e reformave

Sekretari i Përgjithshëm i PS, Taulant Balla, pak para votimit në Bungestag për rezolutën ku kërkohet vota pro për hapjen e negociatave me Shqipërinë, ka shprehur vlerësimin e tij ndaj Kancelares Merkel dhe grupit të CDU/CSU për dhënien e dritës jeshile për vendin. Gjatë takimit me Sekretarin e Përgjithshëm të CDU Paul Zemiak, Balla u shpreh se Gjermania ka vlerësuar ecurinë e Reformës në Drejtësi dhe progresit të Shqipërisë në reformat e tjera. Ai tha se është pikërisht ky progres që po shpërblehet dhe po jep frytet duke i dhënë një mundësi historike Shqipërisë për hapjen e negociatave me BE.

“Shqipëria i është mirënjohëse Kancelares Angela Merkel dhe Grupit Patlamentar të CDU për të mbështetur vendimin e Bundestagut që autorizon Qeverinë Federale për të miratuar në Këshillin Europian të 17-18 Tetorit fillimin e bisedimeve për anëtarësim mes Bashkimit Europian dhe Shqipërisë. Lidhur me rekomandimet e vendimit të Bundestagut, është në interesin e Shqipërisë, por edhe të partnerëve evropianë që puna në këto fusha të drejtohet dhe të monitorohet për hapjen e negociatave, por edhe për të rritur besueshmërinë e procesit të zgjerimit që të tregojë se dedikimi ndaj progresit në reforma po shpërblehet dhe është frytdhënës.” – është shprehur Balla, i cili theksoi se falë SHBA, Gjermanisë dhe BE, Shqipëria po ndërton një sistem të ri të drejtësisë, që do të kontribuojë në pavarësinë dhe transparencën e gjyqësorit.

Zgjerimi dhe forcimi i bashkëpunimit mes dy vendeve gjithashtu ka qenë pjesë e diskutimit, ku u dakordësua edhe për një vizitë e Sekretarit të Përgjithshëm të CDU Paul Zemiak në Tiranë.

Balla: Gjermania dha “po” pasi vlerësoi Reformën në Drejtësi

Kreu i grupit parlamentar i PS-së, Taulant Balla deklaroi se vendimi historik i Gjermanisë për hapjen e negociatave në fakt tregon vlerësimin e saj për Reformën në Drejtësi dhe procesin e vettingut që ka nisur në 2018. Balla nuk heziton as të sulmojë opozitën e cila sipas tij i lexoi gabim dritën jeshile të dhënë nga qeveria gjermane, ndërsa i kërkoi të marrë përgjegjësitë e saj në këtë proces. Opozita, pas miratimit të rezolutën pro Shqipërisë nga CDU/CSU, tha se Shqipërisë iu shtuan edhe 9 kushte të tjera për të plotësuar para hapjes së negociatave. Gjatë një interviste për Deutsche Welle, Balla e ka cilësuar kërkesat e Gjermanisë si detyra shtëpi dhe jo kushte të reja për vendin.

“Ajo që është e rëndësishme është që Bundestagu Gjerman u shpreh pro fillimit të negociatave për Shqipërinë. Pra qeveria gjermane ka marrë autorizimin zyrtar nga Bundestagu që në samitin e Këshillit Evropian të 17-18 tetorit Gjermania të shprehet pro fillimit të bisedimeve për anëtarësimin e Shqipërisë. Ajo që doli në pah në diskutimet dje në grupet e mëdha parlamentare qeverisëse dhe do të diskutohet edhe sot në Komitetin për Çështje Evropiane dhe nesër në seancë plenare, shpreh qartë se ka një vlerësim pozitiv nga Bundestagu dhe nga qeveria federale për ecurinë e deritashme të procesit të Vettingut dhe të reformës në drejtësi. Ata që u nxituan dje në Shqipërinë tonë të dashur t’i quajnë këto vlerësime të Bundestagut si kushte, e kanë shumë gabim dhe duhet të marrin përgjegjësinë e tyre në këtë proces.” – tha Balla

Reforma në drejtësi ka qenë mjaft e sulmuar nga opozita jashtë parlamentare duke thënë se është e kapur nga qeveria. Megjithatë një vlerësim i saj nga ndërkombëtarët tregon edhe njëherë qëndrimin e gabuar të opozitës ndaj drejtësisë së re.

Numri dy i PS-së, Taulant Balla tha se detyrat e shtëpisë për Shqipërinë lidhen me krijimin e Gjykatës Kushtetuese dhe asaj të Lartë, i cili theksoi se shumë shpejt do të jenë funksionale.

“Padyshim që çështjet që lidhen me zbatimin e reformës historike në drejtësi, janë çështje që lidhen me detyrat e shtëpisë. Reforma në drejtësi në Shqipëri nuk ka kthim pas. Unë jam shpresëplotë që anëtarët e rinj të Gjykatës Kushtetuese do të jenë në detyrë në një kohë shumë të shkurtër. Edhe anëtarët e rinj të Gjykatës së Lartë, tre të parët do të jenë në detyrë shumë shpejt, sepse procesi është një fazë shumë të avancuar. Në çdo rast, Konferenca e parë e anëtarësimit do të jetë në gjashtëmujorin e parë të vitit 2020. Koha në dispozicion për atë moment do të jetë plotësisht e mjaftueshme, që ne të kemi anëtarë të rinj të Gjykatës Kushtetuese” u shpreh Balla

Në lidhje me Reformën Zgjedhore, një nga kërkesat e Gjermanisë, Balla tha se mazhoranca gjithmonë ka qenë e gatshme me dorë të shtrirë për të bashkëpunuar si me opozitën brenda ashtu edhe atë jashtë parlamentit, por nuk do të pranonim të negocionim me asnjë për reformën në drejtësi. “Reforma në drejtësi është e pakthyeshme mbrapsht dhe angazhimi ynë për të është i panegociushëm.” tha Balla

Skip to toolbar