“Jam invalid, nuk rrihet më në çadër!” denoncimi i qytetarit të dëmtuar nga tërmeti në Shijak: 8 muaj as pension, as përkrahje,asgjë

Banori i Shijakut, Klodian Luku, bashkë me 16 anëtarët e tjerë të familjes së tij, kanë jetuar në dy çadra të ngushta që pas tërmetit të 26 nëntorit. Vështirësia në çadër e ka detyruar atë dhe familjrët e tij që të kthehen në shtëpinë e prishur, pasi deri më tani institucionet përkatëse nuk i ka dhënë asnjë zgjidhje.

Gjatë bisedës me Shefin e kabinetit të kryetarit të Partisë Demokratike, Dorian Teliti, ai tha se shtëpitë e prishura i ka rregulluar vetë me vëllezërit e tij, sepse deri më tani nuk ka shkuar asnjë ekspert, të paktën për ta vlerësuar. Ai gjithashtu shprehet se shteti ia ka hequr edhe pensionin e invaliditetit që ai kishte 15 vite që e merrte, dhe se ndodhet në gjendje shumë të vështirë ekonomike.

Klodian Luku: Jam Klodian Luku, banor i qytetit të Shijakut. Kam ndenjur katër muaj me familjen, me vëllain 10 vetë atje, 7 këtu, 17. Kemi ndejtur, asnjë gjë s’kemi marrë, asnjë lloj përkrahje. 8 muaj as pension, as përkrahje, as ndihmë sociale asnjë lloj gjëje. Se ku do hamë, se ku do pimë, ja shihe në tokë, asnjë lloj gjëje

Dorian Teliti: Shtëpitë që ke pasur, janë dëmtuar shumë?

Klodian Luku: Shtëpitë po, i kam shtëpitë e dëmtuara tek babi, të dëmtuara janë, i kam bërë vetë me forcat e mia kur ra tërmeti në fillim fare.

Dorian Teliti: Nga shteti, more ndonjë lloj mbështetje?

Klodian Luku: Asnjë lloj gjëje, asnjë lloj gjëje, s’ben vaki!

Dorian Teliti: As një qind lekësh nuk more?

Klodian Luku: As dhjetë lekë, përkundrazi, kanë refuzuar babin, e kanë përzënë nga bashkia përjashta.

Dorian Teliti: Pse shkoi i takoi babai?

Klodian Luku: Po po me dosje, me gjëra.

Dorian Teliti: Dhe e kanë përzënë?

Klodian Luku: Po asnjë lloj gjëje a ça janë këta DS1, DS2, asnjë lloj gjëje, fare, fare, are… asnjë lloj gjëje. Shih unë jam invalid kam marrë 15 vjet pension. Shih si jam copë-copë, nuk kam se është turp. Ku do shkoj unë? Për punë jam unë? Del ajo ministrja e shëndetësisë dhe thotë të dalin dhe të punojnë ndërtim. Ku do punoj unë ndërtim me këtë këmbë.

Dorian Teliti: Jetoni të gjithë bashkë, jetoni në këto çadra keni ndejtur 4-5 muaj këtu?

Klodian Luku: Kemi ndejt 4-5 muaj këtu. Po! Ku do shkojmë? Ku do mbytemi?!

Dorian Teliti: Po tani ku janë kthyer te shtëpitë e prishur?

Klodian Luku: Te shtëpiat, aty te pallati jemi kthy.

Dorian Teliti: Po pse?

Klodian Luku: Po s’kemi ça… rrihet më këtu?! Të vdes me këtë vapë. Të vdesim? Babi me tension, me diabet, me zemër, ku të vdesim.

Dorian Teliti: Kanë kaluar 11 muaj tani.

Klodian Luku: Asnjë lekë pasha Zotin, se është Zoti më vret. Asnjë lekë, po rrimë vetë!

Prej 1 viti në çadër, kryefamiljari në Mallkuç të Krujës: Shteti po na pengon, shtëpinë do ma bënin fondacionet fetare

Disa familje në Mallkuç të Bubqit në Krujë, prej 21 shtatorit të 2019 ose 26 nëntorit janë në çadra ose konteinerë teksa denoncojnë se shteti nuk i ka ndihmuar

Ish- deputetja Oriola Pampuri ka vizituar banorët për t’u njohur me shqetësimet e ty, teksa një prej tyre, Indrit Preni thotë se ka 9 muaj në çadër e askush nuk është parë më nga Bashkia dhe Komuna.

Indrit Preni: Jam Indrit Preni. Siç e shihni vetë, mbrapa tërmetit ç’kanë ardhë në fillim të tërmetit, kanë 9 muaj gati 1 vit, s’është t’u pa kush më as nga Bashkia as nga Komuna. Bashkia ma ka nxjerrë DS4.
Desilda Preni: Që ditën e tërmetit, domethënë që kur ka rënë tërmeti, ne jetojmë në atë kontenier, që na e kanë sjellë por me kushte të vështira. Deri tani s’kemi parë gjë, për shëmbull me ardhë me na thënë do bëhet këtu apo do bëhet atje, po qef prej vendit tim nuk kam me lëviz prej këtu.
Orjola Pampuri: Po ndërkohë kërkohen të merren masa për higjenën, ndërkohë në atë vend ku ju jetoni ishte aq i vogël sa vetëm masa higjene…
Desilda Preni: Me atë po përpiqemi t’i mbajmë sa më pastër.
Orjola Pampuri: Po ndërkohë që 5 veta në një çadër është e vështirë…
Desilda Preni: E vështirë është po ça të bëjmë.

Ndërkohë Martin Jaku, kryefamiljar ka denoncuar se shteti nuk lejon ndërtimin e shtëpisë së tij nga fondacionet fetare. Ai thotë se tërmetet e 21 shtatorit dhe 26 nëntorit i shkatërruan shtëpinë, kurse Bashkia e Krujës i kërkon 5 mijë euro për leje ndërtimi.

Ai tregon se fondacione fetare i premtuan se do e ndihmojnë për shtëpinë, madje duke sjellë ustallarë dhe inxhinierë nga jashtë shtetit, por për të Bashkia po bëhet pengesë.

Jaku tregon se nëse do i kishin dhënë lekët do e kishte bërë shtëpinë pa nevojën e kujt por pa shtëpi, me 7 anëtarë në familje atij i kërkohen dhe 5 mijë euro nga Bashkia që nuk i ka.

Martin Jaku: Jam Martin Jaku, banues i fshtait Mallkuç, lagjja Tarin. Në muajin shtator ra tërmeti dhe më shkatërroi shtëpinë, edhe më erdh komuna. Do të marrësh inxhinierin. I shkrujta inxhinierit, inxhinieri nuk më erdhi. Ditën e fundit vjen inxhinieri te një shtëpi këtu me një fjalë, se ka shtëpiat në Mazhe ai, ka 3 shtëpia, i ka bërë vetë, dhe më tha mua nuk marr urdhër nga ty, marr nga kryetari i komunës. Ore kam shkrujt emrin. Ore nuk vij, tha. Tani mu më thanë ca të fesë, me një fjalë, që mund të më ndihmojnë për shtëpinë, e kështu, se shkoi vonë. Edhe shko, duam leje ndërtimi tha. Duam një leje ndërtimi tha, se inxhinierët dhe ustallarët i biem nga jashtë shtetit. Edhe unë atë ditë çova gruan me vajzën, se isha i angazhuar me punë. Shko atje në bashki e tha ne nuk na e kanë pru zyrtare. Leja e ndërtimit bënë 5 mijë euro. Edhe unë fola me këta. Unë tha të jap paret ty o Martin, të bëj shtëpinë ty, e nuk mund t’i jap 5 mijë euro shtetit!
Orjola Pampuri: Domethënë kushtet janë këto që janë, këto që shohim ne?!
Martin Jaku: Këto që janë…
Orjola Pampuri: Këtu ti jeton me fëmijët, me bashkëshorten, tani vjen dimri…
Martin Jaku: Jam vetë i 7-ti. Unë vetë i 5-ti, 2 motrat 7. Jemi katandisur kështu dhe nuk kemi asnjë shpresë, e themë publikisht këtu. Të më kishte dhënë paret, e kisha bërë shtëpinë unë, edhe më fundërrina në fshat e kishte bërë shtëpinë!

“Ne bëjmë atë që themi”, një vit nga tërmeti i 21 shtatorit, Rama publikon videon

Kryeministri Edi Rama ka kujtuar tërmetin e 21 shtatorit të 2019, i cili sot shënon 1-vjetorin e tij.

Rama publikon një video me këtë rast duke theksuar se çdo familje në Tiranë e prekur nga ai tërmet, në numër 65, janë strehuar në banesa të reja.

Ai ndërkohë thotë se puna vijon, dhe bën të qartë se qeveria thotë atë që bën, dhe bën atë që thotë. Tërmeti i 21 shtatorit me një magnitudë rreth 5.6 të Shkallës Rihter shkaktoi jo pak dëme në Tiranë e Durrës, duke lënë edhe familje pastrehë.

STATUSI NGA EDI RAMA

🗓🏚Sot 1 vit nga tërmeti i 21 shtatorit🏡 🏗🏘 #NETHEMIATËQËBËJMË dhe #BËJMËATËQËTHEMI

🗓🏚Sot 1 vit nga tërmeti i 21 shtatorit🏡 🏗🏘#NETHEMIATËQËBËJMË dhe #BËJMËATËQËTHEMI
Gepostet von Edi Rama am Sonntag, 20. September 2020

Ahmetaj: Në 10 mars nisim rindërtimin

Ministria e Rindërtimit prezantoi të dielën platformën online, ku qytetarët që u prekën nga tërmeti i 26 nëntorit do të aplikojnë për të përfituar nga programi i rindërtimit. Ministri Arben Ahmetaj prezantoi në mënyrë të detajuar platformën, e cila do të jetë e hapur për qytetarët në datën 29 janar. Ministri shtoi se për aplikimin do të ketë afat për 30 ditë. Ahmetaj u shpreh se në çdo bashki, që u prek nga tërmeti, do të ketë një zyrë të posaçme ku punonjës të trajnuar do të plotësojnë aplikimin për qytetarët e prekur nga tërmeti.

“”Nga e mërkura do duhet të ketë në çdo bashki nga një zyrë, ku jo qytetarët duhet të vijnë tek ju, por të merrni qytetarët për të bërë aplikimin online. Platforma bazohet në vetë deklarimin e qytetarëve. Do të deklarojnë dëmet. Të gjitha Bashkitë do të dërgojnë tre persona që do trajnohen nesër në orën 11:00, procesin e aplikimit. Që të kenë të saktë zonën, sipërfaqen e banesës. Kryetari i njësisë administrative do e marrë me shkrim, njësia administrative e hedh online. Aty ku qytetari ju jep të drejtën të mblidhi dokumentacionin vetë, atëherë do ia merrni ju. Është detyra juaj. Kemi bërë një manual të detajuar.

Fillon vlerësimi dhe apelimi, brenda fazës së dytë. Për 30 ditë duhet të ketë mbaruar aplikimi me dosjet e shoqëruara. S’ka të bëjë të ketë akt pronësie. Çdo njëri nga ne ka një dokument të tillë në lidhje me pronësinë, përveç atyre që nuk kanë filluar procesin e legalizimit dhe s’kanë asnjë dokument. Në bazë të saj, do ta shikoni që dy janë programet kryesore. Rindërtimi, pallate dhe banesa private. Rikonstruksioni.

Do të ketë një sistem pikëzimi që do të bëhet automatikisht online dhe ku banesat më prioritare do të ndërtohen të parat. Bëhet në mënyrë automatike. Më 6 shkurt mbaron procesi në Entin e banesave e prokurimit për modelet modulare, por që janë anti sizmike euro-kod. 7-10, njësitë e autorizuara do të hapin prokurimet për njësitë individuale. Në datën 10 mars ne shpresojmë të kemi kompanitë e para për ndërtimin”, tha ndër të tjera Ahmetaj.

Orët mësimore të humbura nga tërmeti, datat kur do të zëvendësohen

Nxënësit e sistemit para universitar do të zëvendësojnë orët e mësimit të humbura për shkak të tërmetit të 26 nëntorit 2019 në ditët e tyre pushime. Konkretisht nxënësit e qarqeve të Tiranës, Durrësit, Vorës, Kurbinit, Shijakut, Krujës, Lezhës, Mirditës, Rrogozhinës, Kamzës dhe Kavajës do të jenë në mësim disa ditë të shtuna në maujijn janra, shkurt dhe mars, për të rikuperuar orët e humbura të mësimit.

Lajmi është dhënë nga drejtoria e Përgjithshme e Arsimit Parauniversitar dhe urdhri është firmosur nga drejtori Selman Hodaj.

Në Tiranë, Durrës, Vorë, Kurbin, Shijak, Krujë, mësimi do të zëvendësohet në datat 25 janar, 15 shkurt, 29 shkurt, 16 mars dhe 28 mars.

Ndërkohë në Lezhë, Mirditë, Rrogozhinë, Kamëz dhe Kavajë mësimi do të zëvendësohet më 25 janar, 29 shkurt dhe 16 mars.

Për shkak të dëmtimit të disa shkollave dhe panikut të përhapur nga tërmeti i 26 nëntorit, mësimi u pezullua në qarqet e prekura prej tij për disa ditë, orët e të cilave do të zëvendësohen në ditët pushim.

Dy tërmete godasin Kukësin e Dibrën, nuk ka dëme materiale

Kukësi dhe Dibra janë goditur nga dy tërmete të njëpasnjëshme me magnitudë 3.8 dhe 3.9 të shkallës rihter. Epiqendra e tërmetit në Kukës ka qenë në Barrë me një thellësi 10 km, ndërsa lëkundjet janë ndjerë edhe në Maqedoni, Kosovë si dhe Serbi. Tërmeti tjetër që u ndje në Dibër e kishte epiqendrën në Arrë-Mollë.

Pas tërmeteve Ministria e Mbrojtjes duke thënë se në të dy bashkitë nuk raportohet për dëme materiale.

“Sipas informacionit paraprak nga IGJEUM, dy lëkundje me magnitudë 3.8 dhe 3.9 te shkalles rihter janë ndjerë në Dibër e Kukës. Nuk raportohen dëme nga shtabet e Emergjencave Civile në këto dy bashki.

Shqipëria u godit nga një tërmet i fuqishëm më 26 nëntor, me magnitudë 6.4 të shkallës rihter, ku preku Durrësin, Thumanën, Tiranën, Fushë-Krujë, Laç e Lezha, ku humbën jetën 51 persona dhe shkaktoi dëme të mëdha materiale.

Dosja “Tërmeti”, 31 të arrestuarit, 7 orë para gjykatës. Nesër vendimi

31 të arrestuarit në lidhje me dosjen “Tërmeti” në zonat e Vorës, Farkës dhe Kasharit, të akuzuar për shpërdorim detyre dhe falsifikim dokumentesh kanë dëshmuar të premten për 7 orë në Gjykatën e Tiranës. Seanca filloi në orën 12:00 dhe përfundoi në orën 19:00 të së premtes, ndërsa nuk u arrit të merrej një vendim përfundimtar duke e shtyrë atë për ditën e shtunë. Gjykatësja Vjollca Spahiu tha se vendimi do të jepet në orën 10:00, ndërsa prokuroria kërkoi “arrest me burg” për 13 të akuzuarit, “detyrim paraqitje” për 5 prej tyre dhe “arrest shtëpie” për 13 të tjerët. Mes të akuzuarve për të cilët prokuroria kërkoi “arrest me burg” janë edhe dy ish-kryetarët e komunave Kashar dhe Farkë, Besnik Fuçia dhe Fatbardh Plaku.

Të arrestuarit akuzohen se kanë lejuar ndërtimet pa leje të godinave dhe objekteve si dhe kanë fshehur abuzimet që janë bërë me to në strukturë, dëme që dolën në pah nga tërmeti i 26 nëntorit 2019.

Prokuroria, e cila nisi hetimet për tërmetin që në datën 27 nëntor të vitit 2019, ka dokumentuar dhe evidentuar të gjitha banesat e shpallura të pabanueshme nga tërmeti dhe personave përgjegjës për këtë në zonat e Vorës, Kasharit dhe Farkës duke arrestuar 31 persona, ndërsa 11 të tjerë janë ende në kërkim.

Ata akuzohen se kanë favorizuar ndërtime jashtë kritereve apo lejeve të lëshuara, për ndërtime të një cilësie të dobët, duke ndërhyrë në strukturë me hollimin e bazamenteve mbajtëse të tyre.

Pas Vorës, Kasharit dhe Farkës, hetimet do të vijojnë për bashkinë e Kamzës dhe të ish-komunës së Dajtit, ku prokuroria do të marrë në dorë të gjitha dosjet e objekteve të shpallura të pabanueshme nga tërmeti në këto zona.

Shembjet e objekteve nga tërmeti, hetimet e Prokurorisë: Betoni e hekuri, jashtë çdo standardi

Cilësia e dobët e betonit dhe hekurit e përdorur nga ndërtuesit në objektet e shembura nga tërmeti ka qenë edhe arsyeja e kolapsit të tyre. Sipas prokurorisë së Durrësit, analizat laboratorike të betonit dhe hekurit si dhe analizimi i filmimeve dhe fotografive të ndërtesave të shembura nga tërmeti i 26 nëntorit, arriti në përfundimit se ka qenë cilësia e dobët e ndërtimeve ajo që u mori jetën 51 personave.

Prokuroria e Durrësit ka konstatuar shkelje flagrante të rregullave të sigurisë teknike në godinat e shembura nga tërmeti i 26 nëntorit në Durrës. Sipas prokurorisë, analizat laboratorike kanë përfunduar duke nxjerrë në pah faktin se betoni i përdorur nga ndërtuesit ka qenë disa herë më i dobët se cilësia e duhur lidhur me rezistencën që i duhet godinave

Probleme janë konstatuar edhe me kolonat mbajtëse të godinave, të cilat janë konstatuar se nuk kanë pasur dimensionet dhe sasinë e duhur të hekurit, çka ka sjellë edhe dëmtimin e tyre nga lëkundjet e tërmetit. Konstatimet janë pjesë e rëndësishme e hetimit dhe pritet që tani të zgjerojë numrin e personave nën hetim duke mos përjashtuar edhe arrestime të tjera. Sipas A2 CNN, prokuroria e Durrësit ka kërkuar studimet e Institutit të Gjeoshkencave për zonën e Durrësit për zonat që janë përcaktuar si me lëkundje dhe sa është zbatuar ky studimin në lejet e ndërtimit që është dhënë për pallatet e dëmtuara.

“Shtëpitë do grupohen, toka u mbetet banorëve”, Rama: Në prill nis montimi i parafabrikatëve

Kryeministri Edi Rama i shoqëruar nga kryebashkiaku Erion Veliaj kanë vizituar familjet e prekura nga tërmeti në Farkë, konkretisht në familjen Shkalla. Pas dëmtimit të banesës nga tërmeti i 26 nëntorit, kjo familje është vendosur të jetojë në kontejner deri në ndërtimin e shtëpisë së re. Kjo zgjidhje është parë shumë më e volitshme nga kryeministri Rama, i cili ka thënë se të gjitha familjet do të vendosen në të tilla hapësira për të përballuar dimrin. Të parat që do të zhvendosen janë ato me fëmijë të vegjël, ka qenë porosia e kryeministri Rama, ndërsa kryebashkiaku Veliaj tha se janë porositur 200 kontejnerët e parë.

Rama tha se në fillim të muajit prill do të nis montimi i shtëpive të reja me parafabrikate, të cilat do të grupohen në një vend të caktuar, ndërsa toka që kanë do u mbettë po atyre.

“Kjo nuk është çështje parafabrikati apo tullash, por të kemi shtëpi më të mira dhe më të forta, anti-sizmike dhe ato që do të ngremë i kanë këto parametra, janë shumë komode, i përdor Amerika, Gjermania. Nuk duhet pasur ideja se po u bë me llac dhe tulla është më e fortë. Mos u mërzit se do ta kapërcejmë këtë situatë. Këtu janë bashkë, thjeshtë në këto raste do të rindërtohet shtëpia ku ka qenë, ndërsa në rastet e tjera do i bëjmë bashkë, nuk do i pyesim shumë, pasi është e mira e tyre, do të kenë shumë më tepër kushte të mira. Do të jenë afër njëri tjetrit, por edhe shërbimet, dhe jo nga maja e malit për të marrë pensionin poshtë, apo kur ka nevojë për një urgjencë të vijë në majë të malit, apo fëmijë ik dhe eja në majë të malit. Ndërkohë që toka i mbetet atij që e ka dhe të shkojë ta punojë. Krijohet edhe format e tjera, mblidhen familjet….Këtë do ta bëjmë, po ecim shpejt me punët edhe besoj që në fillim të pranverës në fund të marsit me ndihmën e Zotit të fillojmë të montojmë shtëpitë e reja,” u shpreh Rama.

Kryetari i Bashkisë Tiranë, Erion Veliaj tha se zgjidhja për dimrin do të jenë kontejnerët, ku janë porositur 200 të parët.

“Nesër kanë një takim do ta shikojnë nëse i konvenon parafabrikati dykatësh që keni porositur, se janë dy kurora do të zbatojmë atë dëshirë, nëse i konvenon. Do rrëzojmë këtë dhe më pas. Për dimrin kemi zgjidhjen me kontejner. Kryeministri na la një porosi që ku ka fëmijë të vegjël, që çadra nuk është komode, kemi porositur kontejnerët, kemi porositur 200. Kemi filluar edhe pastrimin e territoreve ku do të jenë lagjet e reja. Familjet do i grupojmë,” tha Veliaj.

#TiNukDoJeshKurrëVetëm🤗👐🏿🇦🇱Farkë – Në familjen Shkalla, banesa e së cilës u dëmtua nga tërmeti i 26 nëntorit, e që tashmë është sistemuar në kontinier, deri në ndërtimin e shtëpisë së re model si nga cilësia dhe siguria😊
Gepostet von Edi Rama am Dienstag, 7. Januar 2020

Rindërtimi nga tërmeti, Ahmetaj: Bashkitë duhet të caktojnë zonat ku do ndërtohet

Ministri për Rindërtim Arben Ahmetaj doli të hënën në një konferencë për mediat, ku sqaroi hapat që po ndiqen për procesin e rindërtimit nga tërmmeti. Ahmetaj tha fillimisht se pas tërmetit janë strehuar të gjithë familjet që patën dëmtime apo shtëpitë e tyre u shembën nga tërmeti. “Që nga data 26 nëntor, kemi vazhduar me akomodimin e të gjithë qytetarëve që humbën shtëpinë ose shtëpitë e tyre u përcaktuan si ta pabanueshme”, tha ai. Më tej, Ahmetaj u shpreh se pas kërkesës së Kryeministrit, të gjitha bashkitë në zonat e emergjencës duhet të përcaktojnë zonat ku të rindërtohen lagjet apo banesat e reja për të pastrehët nga tërmeti.

“Bonusi i qirave bën të mundur, që deri në kthim në shtëpi, të mund të jetojnë në shtëpi me qira dhe më datë 2 janar, kryeministri ka kërkuar nga bashkitë në zonat e emergjencës, që të gjithë kryetarët përkatës të bashkive të vazhdojnë procesin e përcaktimit të tokave ku do të ndërtohen qytezat urbane, të cilave kryeministri iu është referuar në vazhdimësi, që janë pjesë e ligjit të posaçëm për rindërtimin. Për 15 deri 20 ditë do të kemi në të gjithë territorin e Shqipërisë ku është përcaktuar ku ka dëmtime, kryesisht në Shqipërinë e mesme, por edhe në Lezhë e Kamëz, pra të gjitha këto bashki janë të detyruara brenda afatit që ka kërkuar kryeministri të sjellin verifikimet e tokave ku do ndërtohen banesat individuale, qytezat urbane siç jemi referuar në ligj të posaçëm”, tha Ahmetaj.

Më tej, Ahmetaj u shpreh se banorët e këtyre zonave (shtëpitë e të cilëve u shembën ose janë shpallur të pabanuara), duhet të aplikojnë pranë bashkive përkatëse. Ministri për Rindërtimin sqaroi se pranë bashkive do të ngrihen platforma të posaçme për aplikimin e qytetarëve. “Është hera e parë që kemi një ligj të posaçëm për një situatë emergjente. Kemi procedurat përkatëse për programin e rindërtimit. Nesër ka një takim të posaçëm me kryetarët e bashkive, ku do të bëjmë një listë të familjeve që kanë humbur shtëpitë dhe që banesat e tyre janë vlerësuar si të pabanueshme ose banesa që kanë nevojë për rikonstruksion. Në bazë të vendimit, duke nisur nga nesër, kryetarët e bashkive duhet të ngrenë platformë aplikimi për qytetarët”.

“Aplikimi do të jetë tepër i thjeshtë. Ju lutem, të gjithë familjarëve që banesat e tyre janë quajtur të pabanueshme ose të dëmtuara, të mund të drejtohen në institucione, kudo të bëhet financimi përmes njësive vendore ose entiteteve që do të autorizohen nga Këshilli i Ministrave. Ky është vendim shtyllë, sepse detyron të gjitha bashkitë që në bazë të tokave që do të caktojnë (ne kemi rekomanduar tokat shtetërore) për 30 ditë tokat ku do të ndërtohet. Pa këto, nuk kalohet dot tek rindërtimi. Ne nuk kemi lënë asnjë qytetar jashtë. Do të bëhen edhe rikonstruksione në bazë të dëmtimeve dhe do kemi grante për këtë gjë”, deklaroi ministri Ahmetaj.

Ndërkohë, ai tha se banesa do të përfitojnë edhe ata që kishin ndërtuar pa leje, por shtëpitë e tyre janë shembur nga tërmeti. “Rindërtimi, që nga shtëpitë tek pallatet apo qytezat urbane që do të ndërtohen dhe palnfiifkohen në Bashki të ndryshme, të gjitha do të kenë bazën kushtetuese ku është e domosdoshme të shpronësimit. Aty ku ka ndërtime pa leje, shteti të marrë përsipër që ajo familje të përfitojë nga programi i rindërtimit, kundrejt kushteve të përcaktuara nga VKM. Komisioni i Rindërtimit, kemi bërë dy mbledhje, tani nëpërmjet vendimi detajohet funksioni i tij”, Ahmetaj.