Tjetër lëkundje tërmeti, shumë afër Tiranës

Një tërmet me magnitudë 3.2 ballë është ndjerë rreth orës 14:31 minuta përsëri në vendin tonë. Epiqendra e tërmetit ishte 11 km larg Vorës, dhe rreth 26 km larg Tiranës.

Tërmeti ishte në një thellësi rreth 10 km në brendësi të kores së tokës. Kjo është vala e dytë sizmike që ndihet brenda tre ditëve në vendin tonë.

Kujtojmë se në datën 21 shtator pasdite, vendi ynë u trondit nga lëkundje të forta tërmeti me magnitudë 5.8 ballë të shkallës Rihter.

Ato shkatuan dëme të konsiderueshme materiale dhe shumë persona të lënduar. Prej asaj date, Tirana, Durrësi dhe qytete të tjera në vend, janë lëkundur nga tërmete me fuqi më të vogël.

Dhuna në derby, Tirana: S’jemi polici, Partizani të mos bëj hetuesin

Klubi i Tiranës është distancuar nga dhuna që përfshiu fushën e blerët ku u zhvillua derbi kryeqytetas. Klubi i bardhebluve ka dënuar dhunën e ndodhur mes tifozerisë së dy skuadrave, si dhe është shprehur qartë se nuk mban përgjegjësi për 3 gropat e hapura gjatë natës, që ishin mbushur me një sasi lënde piroteknike me mekanizëm me ndezje elektrike. “Ne jemi klub futbolli dhe jo institucion policor” është shprehur klubi i bardhebluve, i cili ishte dhe ekipi mikpritës i ndeshjes.

Në një komunikatë për mediat, Klubi i Tiranës shprehet se të gjitha pamjet filmike i janë vënë në dispozicion policisë për të hetuar dhe arrestuar përgjegjësit. Gjithashtu Klubi i Tiranës i ka bërë thirrje atij të Partizanit që të bashkëpunojë me policinë nëse ka prova, ndërsa i ka dhënë një mesazh të qartë që të mos hiqet si hetues apo provokator.

“Klubi i Futbollit Tirana distancohet nga te gjitha aktet e dhunës, shfaqjet e shëmtuara jo sportive dhe dënon ashpër te gjitha problematikat e krijuara nga tifozët në ndeshjen Tirana – Partizani. KF Tirana ka zbatuar me rigorozitet planin e masave të hartuar me Policinë e Tiranës për mbarëvajtjen e takimit brenda dhe jashtë stadiumit “Selman Stermasi”. Në përfundim të takimit, klubi ka venë në dispozicion të Policisë, serverat e sistemit të kamerave të stadiumit, për të gjetur dhe dënuar më pas përgjegjësit e incidenteve në stadium por edhe autoret e incidenteve të mbetura fatmirësisht në tentativë.

Klubi i Futbollit Tirana është një klub futbolli dhe jo një institucion policor. Si i tillë, konform të gjithë rregullave të Federatës Shqiptare të Futbollit dhe ligjeve të Shtetit Shqiptar, kemi marre masa organizative për ndeshjen, si dhe dokumentuar me pamje filmike incidentet dhe dorëzuar ato me pas në institucionet përkatëse.

Ftojmë KF Partizanin të ruaj qetësinë, bashkëpunojë me Policinë nëse disponon materiale filmike apo prova për të gjetur autorët dhe fajtorët e incidenteve në stadium. Një klub futbolli mund dhe duhet të mos kalojë kompetencat për të folur nxituar here si hetues dhe here te tjera si prokuror” thuhet në deklaratën e klubit të Tiranës.

Para fillimit të ndeshjes Tirana-Partizani, në stadiumin ‘Selman Stermasi’, tifozët e të dy skuadrave u përfshinë një dhunë e skena përgjakje. Për ndalimin e saj është dashur ndërhyrja e policisë private, policisë së Tiranës dhe FNSH, për qetësimin e gjendjes.

Gjatë ditës së hënë policia tha se janë proceduar 9 persona për aktet e dhunës, nga këta 1 është arrestuar, 2 janë shpallur në kërkim dhe 6 persona të tjerë do hetohen në gjendje të lirë. Dy persona që janë ende në kërkim dyshohet se janë edhe përgjegjësit e hapjes së gropave gjatë natës, të cilat i kishin mbushur me një sasi lënde piroteknike me mekanizëm me ndezje elektrike, përmes të cilave do të sulmonin kundërshtarët. Fatmirësisht ky mekanizëm mbeti thjeshtë në tentativë.

Derby, Partizani e fitoi pa filluar

Derbi Tirana-Partizani është një ndeshje “mitike” për kryeqytetin e vendit. Historia, trofetë e fituar, rivaliteti i përjetshëm i tifozerive, identiteti dhe spektakli që i japin fushës së lojës kët dy skuadra, e bëjnë ndeshjen të krahasueshme me derbe të rëndësishme evropiane. Megjithatë, nëse “lufta” në tribuna është gjithmonë në lartësinë e pritshmërive për një ndeshje derbi (siç ishte dhe të shtunën), në fushën e lojës gjërat ndryshojnë. Partizani dhe Tirana rivalizojnë për trofe këtë sezon, por, dëshira duhet parë gjithmonë edhe me investimet.

Merkato e Tiranës

Tirana ishte një nga klubet më aktive në merkaton e verës, duke afruar plotë 10 futbollistë të rinj. Dhe jo lojtarë do si do, por emra që do t`i kishin zili shumë klubet, pse jo, edhe ato që luajnë në Europë. Emra si: Tefik Osmani, Elton Cale, Idriz Batha, Kristi Vangjeli, Edvan Bakaj, Ismael Dunga, Agustin Torasa, apo mesfushori i kombëtares Andi Lila, iu bashkuan ekipit bardheblu gjatë merkatos së verës. Pesë prej tyre (Osmani, Vangjeli, Batha, Torasa dhe Cale) e nisën si titullar derbin ndaj Partizanit, duke treguar se klubi bardheblu ka pritshmëri të mëdha nga këta lojtarë.

Por, sa është vlera e tyre financiare?

Në fakt, të gjithë lojtarët e afruar nga Tirana erdhën me parametra zero, pra Tirana i gjeti pa kontratë dhe u ofroi atyre mundësi të luanin për klubin bardheblu. Por, nëse ata erdhën me kosto zero (në transferim), pagat e tyre janë nga më të lartat. Ato mund të shkojnë nga 1000 euro (sipas referencave të tregut) deri në 10.000 euro më e larta.

Merkato e Partizanit

Partizani bëri pothuajse gjysmën e afrimeve të Tiranës. William Cordeiro, Esin Haka, Amir Bilali, Solomon, Ron Broja dhe Aldo Teqja ishin lojtarët që Partizani i mbajti në ekip gjatë merkatos së verës. Ashtu si Tirana, edhe klubi i kuq nuk pagoi asnjë lekë për transferimin e tyre, ndërsa pagat, gjithashtu presupozohet të jenë të larta. Trajneri Franko Lerda aktivizoi katër lotjarë në derbin ndaj Tiranës, të cilët erdhën gjatë merkatos së verës.

Vlera financiare e të dy klubeve

Sipas të dhënave të sajtit të specializuar të vlerësimit të klubeve, Transfermarkt, vlera financiare e Partizanit është 6.30 milion euro, ndërsa e Tiranës 4.18 milion euro. Pra, Partizani vlen 2 milion euro më shumë se Tirana si klub. Futbollisti i ardhur nga Flamurtari në Verë, Elton Cale, është lojtari me çmimin më të madh i bardhebluve. Nëse do të shitej tani, vlera e kartonit do arrinte në 450 mijë euro. Ndërsa, Jurgen Bardhi është futbollisti më i shtrenjtë te Partizani. Sulmuesi 21 vjeçar kushton 600 mijë euro. Por Partizani ka dhe lojtarë të tjerë që janë në vlerë mbi 400 mijë euro si: Kordeiro apo Esat Mala.

Pas humbjes të së dielës në derby, Presidenti i Tiranës Refik Halili u shpreh se “disa lojtarë të Tiranës nuk do të luajnë më kurrë në ekipin e parë”, duke lënë të kuptohet se për të “disa nga blerjet” kanë dështuar. Ndërsa merkato e Partizanit ka rezultatuar më efektive, pasi dy nga lojtarët që erdhën në merkaton e verës, Solomon dhe Melo, shënuan golat që i dhanë fitoren e derbit. Pra, Tirana bëri merkato në sasi, ndërsa Partizani në cilësi! Kjo e bëri skuadrën kampione, që ta “fitojë” ndeshjen, ende pa filluar. /Realstory.al/

Partizani zbret Tiranën me këmbë në tokë

Tifozët bardheblu do të presin të paktën 9 javë të tjera kampionat, për të shpresuar një rezultat pozitiv ndaj Partizanit. Të kuqtë e nisën atje ku e lanë në maj. 1-2 fitonin sfidën e fundit ndaj Tiranës aq fituan dhe të dielën në mbrëmje ndaj rivalit të tyre historik.

Ajo që duhet të ishte ndeshja e kthesës, e vazhdimësisë, ajo që do duhet të konfirmonte pretendimet dhe stekën e Tiranës këtë sezon…ajo tregoi një tjetër Tironë… Makthi nisi një orë para sfidës, me një sherr masiv mes dy tifozerive. Një sfidë që pritej të dhuronte spektakël në tribuna (jo se nuk pati), nisi në mënyrën më të keqe të mundshme, me gjak!

Pesë vite pa fitore, pesë vite të dëshpëruara, pesë vite presion, bënë të vetën. Tirana e nis me vrull pjesën e parë, pasi etja për fitore dhe dëshira për të shënuar, tejkalonte edhe vetë pritshmëritë e tyre. Skuadra duket sikur bën mirë në minutat e para, madje duke krijuar dhe iluzionin e golit. Partizani tërhiqet në gjysmëfushën e vetë, ndërsa skuadra bardheblu shkon afër golit. Fati nuk është me Tiranën. Ai i buzëqesh përsëri Partizanit.

Goli i parë erdhi nga këmbët e Kordeiro. Braziliani shfrytëzoi njën gafë të mbrojtjes së Tiranës, dhe futet në zonë, duke mposhtur Likën. Më pas ishte Solomon, që gjeti rrjetën duke përfituar nga asisti i Malës. Sulmuesi i të kuqve realizoi një gol të bukur me kokë, duke bërë që ekipi bardheblu të dorëzohet shumë shpejtë. Pjesa e dytë është e ekuilibruar.

Tirana kërkon të gjejë baraspeshën, por njëherazi mbrohet duket rritur vigjilencën në mbrojtje. Goli vjen dhjetë minuta para përfundimit të ndeshjes, kur Hasani gjen rrjetën dhe ngushton shifrat në 1-2, pas një goditje këndi. Por vetëm kaq, një gol nderi që nuk i mohon as fitoren e tre pikëve e as suksesin e radhës në derbi Partizanit…Fitorja e të dielës e ngjit Partizanin në kuotën e 10 pikëve në vendin e pestë, me po kaq pikë sa të kuqtë.

Heshtje në “Selman Stërmasi”, Partizani shënon dy herë

Një Tiranë e etur për fitore, për të thyer mallkimin që e përndjek prej 5 vjetësh pa triumf ndaj rivalit historik, presion që në nisje, lojë në fushën kundërshtare.

Shumë drithërima që në minutat e para, por fati i buzëqeshi Partizanit në pjesën e parë.

Nuk mjaftoi gjuajtja e Kale dhe presioni bardheblu për të gjetur rrjetën, por mjaftoi një shpërqëndrim në mbrojtjen e Tiranës në të 28`, dhe Kordeiro gjen rrjetën. 0-1 për të kuqtë, heshtje në “Selman Stërmasi”, nervozizëm në fytyrat e lojtarëve të Tiranës dhe stafit teknik.

Nuk vonoi shumë, Partizani gjeti përsëri rrjetën me Solomon pas një asisti të shkëlqyer nga Mala. Tirana dorëzohet në katër minuta, duke humbur përqëndrimin dhe grintët e minutave të fillimit të ndeshjes.

Derby, Mema: fitore me këmbë në tokë

Tirana pret të dielën në mbrëmje Partizanin, në takimin e parë derbi të sezonit. Ekipi bardheblu duket gati për këtë sfidë, i etur për sukses, pasi prej pesë sezonesh, nuk fiton një ndeshje ndaj Partizanit. Trajneri i bardhebluve, Ardian Mema u shpreh në konferencë për mediat, se skuadra është gati dhe në formë të mirë.

“Nga gjendja fizike, ekipi është shumë mirë. Duhet të jemi të kujdesshëm nga ndeshja e fundit pasi ndaj Kukësit kaluam në eufori. Nesër duhet të jemi me këmbë në tokë. Nuk dua eufori! Në krahasim me vjet jemi më mirë por duhet ta tregojmë nesër. Duhet të kemi kujdes pasi jemi një skuadër e riformatuar dhe mund të ketë edhe oshilacione. Ndaj Kukësit mund të kishim fituar ashtu si edhe ndaj Teutës. Kampionati është i gjatë dhe do të kemi edhe shumë ndeshje para”, tha Mema.

Partizani është një ekip i mirë, të cilin Mema e vlerëson. Megjithatë, tekniku bardheblu shpreson që fitorja do të jetë për të dhe skuadrën e tij të dielën. “Partizani ka elementë të mirë brenda dhe ndeshjen mund ta vendosin edhe individët. Shpresojmë të fitojmë pasi kemi pesë vite. Kanë ndikuar përzgjedhja jo e mirë e lojtarëve dhe Partizani ka pasur lojtarë më cilësorë. Shpresoj që këtë radhë të jetë ndryshe”, shprehet Mema.

Sipas tij, humbja me Kukësin i bëri mirë skuadrës, për t`i ulur euforinë dhe të jetë me këmbë në tokë. “Normalisht ekipi duhet të jetë në ekuilibër dhe të mos humbë ndeshjen. Shpresojmë të kemi dinakërinë e duhur dhe t’i shohim gjërat me kujdes. Ekipi kërkon për ta fituar dhe ndoshta rezultati kundër Kukësit na ka bërë mirë për të parë gjërat me më shumë kujdes”, tha trajneri i 24 herë kampionëve të vendit.

Ardi Mema, si një bardheblu që e njeh mirë Tiranën, shprehet se nuk ndihet në presion, ndërsa tregon se nga ekipi kërkon disiplinë, ndërsa ndaj Partizanit kërkon të shmanget presioni.

“E rëndësishme është që të mos e marrim si sfidën e jetës por të jemi të qetë. Presidenti është përgjigjur por për çdo lojtar, është diskutuar nga të gjithë. kemi bërë një merkato të përbashkët. Nuk jam tip që kam presion. Unë jam brenda familjes dhe sfida ime nuk ka të bëjë me presionin. Shpresoj të bëj më të mirën për veten dhe për klubin. Janë gjëra që ndodhin shpesh. Edhe unë jam grindur në fushë por disiplina është e rëndësishme. Duhet që të jemi të bashkuar. Nuk jam i rëndësishëm as unë dhe as Osmani, por i rëndësishëm është grupi”, u shpreh Mema.

Lerda largon presionin: Tirana, vlen tre pikë

Të dielën në mbrëmje luhet derbi i parë Tirana-Partizani për këtë sezon. Një ditë para sfidës, trajneri i të kuqve, Franko Lerda, foli në konferencë për shtyp. Italiani shpreson që ndaj bardhebluve në derbi, shpreson të ruhet tradita, 5 vite pa humbje. “Shpresojmë që këto statistika të jenë në favorin tonë, që të vazhdojmë këtë traditë. Të mbetemi të pathyeshëm në takimet përballë Tiranës. Jemi përgatitur mjaft mirë dhe shpresojmë të ruajmë këtë traditë”, shprehet Lerda, ndërsa shton se e ka përgatitur skuadrën për fitore ndaj Tiranës: “Këtë pyetje e dëgjoj prej fillimit të sezonit. Unë e përgatis ndeshjen për të fituar, pastaj ka shumë gjëra që ndikojnë, sepse futbolli përbehet nga episodet. Por, unë dua të fitoj, skuadra futet për të fituar”, shprehet trajneri i Partizanit.

Tekniku italian ndihet i qetë përpara sfidës, ndërsa tregon se tre pikët në derbi, do ta motivonin më shumë skuadrën. “Pse të ndihem në rrezik. Jemi të qetë dhe të përqendruar në atë çfarë duhet të bëjmë. Brenda në klub dhe lojtarët janë të qetë. Pastaj se çfarë ndodh mbrapa, nuk e di. E konsideroj një ndeshje të rëndësishme sepse për ne vlen tre pikë. Por, për ambientin vlen më shumë. Të fitosh derbin do të na jepte në shtysë të madhe emotive, e rëndësishme edhe përsa i përket klasifikimit. Edhe pse ne jemi aty, vetëm tre pikë larg. Nga aspekti psikologjik do të ishte shumë e rëndësishme”, tha Franko Lerda.

Partizani nuk e nisi mirë sezonin, por Lerda thotë se skuadra është duke u përmirësuar. Sipas tij, në sfidën ndaj Tiranës disa lojtarë rrezikojnë të mos luajnë për shkak të dëmtimit. “Po kërkojmë të perfeksionojmë mekanizmat tona, të përmirësojmë çdo repart. Nuk e di të shohim, kam probleme me disa lojtarë dhe mbetet për t’u vlerësuar. Dje janë stërvitur veçmas, sot do të bëjnë një test dhe më pas mbetet për t’u parë nëse do të jenë për ndeshje apo jo”.

Në fund nuk mungoi as vlerësimi për kundërshtrin. Franko Lerda shprehet se Tirana është skuadër e mirë, me cilësi, dhe sipas tij, nuk meritonte të humbiste në ndeshjen e fundit. “Është një skuadër e mirë. E kam parë në ndeshjen e fundit me Kukësin dhe nuk e meritonte të humbiste. Është një skuadër që ka cilësi dhe dora e trajnerit duket në skuadër. Por, është një ndeshje shumë e rëndësishme për ne dhe do të bëjmë gjithçka për të dalë me sukses”, është shprehur ndër të tjera trajneri i Partizanit. Derbi Tirana-Partizani do të luhet të dielën në orën 19:00 të mbrëmjes në stadiumin “Selman Stërmasi”. Më herët, gjatë të shtunës, klubi bardheblu lajmëroi në rrjetet sociale se interesi nga tifozët për këtë ndeshje ishte i lartë, duke bërë që të gjitha biletat të shkojnë drejt fundit. Tirana vjen e “uritur”, pasi prej pesë vjetësh nuk fiton një ndeshje derbi ndaj Partizanit.

OSHE jep garanci, derbi Tirana-Partizani luhet me drita

Federata Shqiptare e Futbollit vendosi që derbi Tirana-Partizani, të luhet në orën 19:00, të dielën në 29 shtator. Ndeshja ishte parashikuar të zhvillohej në të njëjtën ditë, por në orën 16:00 të pasdites. Duke pasur parasysh rëndësinë e ndeshjes, Tirana si klubi organizator, i kërkoi të mërkurën FSHF-së të shtynte me tre orë zhvillimin e ndeshjes, që sfida të luhej në dritën e prozhektorëve, pasi është dhënë garancia nga OSHE që nuk do të ketë probleme me kufizimin e energjisë elektrike.

“Federata Shqiptare e Futbollit dëshiron të informojë opinionin publik se ndeshja Tirana-Partizani, e vlefshme për javën e 6 të Kategorisë Superiore, do të zhvillohet ditën e dielë, ora 19:00, në stadiumin “Selman Stërmasi”. Ky vendim është marrë pas garancisë që ka dhënë OSHE në lidhje me furnizimin me energji elektrike dhe pa probleme gjatë orarit të zhvillimit të Derbit të Tiranës”, shkruan FSHF në njoftimin e shpërndarë për mediat.

Derbi, habit trajneri i Partizanit, Lerda: Tiranës i sjellë fat

Pas katër ndeshjesh në Superligë, Partizani ka fituar vetëm dy, ndërsa ka humbur dy të tjera. Nuk ka qenë nisja që prisnin të gjithë nga ekipi kampion. Megjithatë, trajneri Franko Lerda ka folur për takimin me Bylis, por me mendjen te derbi me Tiranën. Për sfidën e pestë të kampionatit kundër mallakstriotëve, Lerda shprehet se do t`i kërkojë lojtarëve të jenë agresiv në këtë takim. “Bylis nuk është aspak i lehtë. Ka vlerësimin maksimal tonin. E kam ndjekur me vëmendje në dy takimet që kanë zhvilluar si ndaj Skënderbeut, ashtu edhe ndaj Kukësit. Do të kërkoj nga skuadra ime të jetë mjaft agresive. Është një skuadër që vrapon shumë, por ne duhet të kemi qetësinë e duhur. Të jemi të qetë dhe në fund të marrim 3 pikët”, ka thënë Lerda.

Gjatë konferencës për shtyp, trajneri i Partizanit ka konfirmuar se në skuadër ka presion, për më tepër që ekipi është kampion. Megjithatë, sipas trajnerit italian, skuadra është në harmoni. “Kur je pjesë e Partizanit dhe sidomos kur je skuadër kampione, ke më shumë presion se ekipet e tjera. Sezonin e kaluar Partizani nuk u nis si skuadër që do të synonte titullin kampion, pra nuk kishte atë impenjim që ka impenjimin këtë edicion sepse do të mbrojmë titullin kampion. Kjo cilëson presionin që ka skuadra. Të gjithë ekipet duan të bëjnë mirë, duan të fitojnë ndaj nesh dhe kjo mund të na sjellë presion. Mendoj që harmonia është shumë e mirë. Besoj se diçka e tillë ndodh në gjithë ekipet e tjera”, ka thënë Franko Lerda.

Lerda, pasi ka analizuar situatën në ekip, ka folur edhe për kryesfidën e javës së gjashtë të kampionatit, derbi Tirana-Pratizani. Trajneri italian është shprehur se për të nuk është domosdoshmëri fitorja e të shtunës ndaj Bylisit, duke lënë të kuptohet, se energjitë e skuadrës do të përqëndrohen për Tiranën, megjithëse shprehet se nuk i druhet bardhebluve. “Nuk kemi pse t’i druhemi Tiranës. Kam parë vetëm një pjesë loje të ndeshjeve të saj. E kam ndjekur vetëm një ndeshje në stadium Tiranën. I kam sjellë fat Tiranës pasi në atë ndeshje ka fituar 3-0 kundër Luftëtarit. Duhet ta përgëzojmë për çfarë ka bërë deri më tani pasi gjendet aktualisht në vendin e parë. Akoma s’kam krijuar një mendim të qartë për ta. Objektivi ynë është ndeshja e nesërme kundër Bylisit”, tha Lerda.

Kupa/ Shënkolli shtang Tiranën, fitojnë pretendentët

Janë luajtur të mrëkurën pasdite ndeshjet e turit të parë kualifikues të Kupës së Shqipërisë. Në grupin A, ka pasur surpriza me disa ekipe të Superligës. Tirana ka barazuar 0-0 me Shënkollin, duke befasuar jo pak tifozët, të cilët prisnin më shumë nga ky takim.

Ndërkohë, Teuta ka mundur 2-0 Tërbunin, ndërsa Partizani ka fituar në transfertë ndaj Vorës me rezultatin 3-0. Surpriza më e madhe e Grupit A ka qenë Flamurtari, që pas katër dështimesh në kampionat me 4 humbje, është mundur dhe në ndeshjen e Kupës nga Veleçiku me rezultatin 3-2.

Ndërkohë, në takimet e tjera të këtij grupi, Dinamo është mundur nga Erzeni, me ekipin shijakas që shënoi tre herë në portën e Bluve të kryeqytetit. Ndërkohë, Korabi ka mundur Besëlidhjen me rezultatin 2-1, ndërsa Iliria po 2-1 ka fituar derbin ndaj Kastriotit. Ndërkohë, ndryshe nga Grupi A, në grupin tjetër nuk ka pasur surpriza të mëdha. Vetëm barazimi 0-0 i Laçit me Elbasanin ka prishur rezultatet pozitive të ekipeve të tjera të Superligës.

Kukësi ka fituar 3-1 ndaj Shkumbinit, ndërsa Skënderbeu ka fituar derbin e juglindjes me Devollin me rezultatin 4-1, ndërsa Luftëtari ka mundur Turbinën me rezultatin 1-0. Bylis është pothuajse i kualifikuar për turin tjetër, pasi ka fituar 4-0 në transfertë ndaj Pogradecit, ndërsa në takimet e tjera, Lushnja ka fituar 2-1 ndaj Orikut.

Ndërkohë, Apolonia ka fituar në tavolinë 3-0 ndaj Kamzës, pasi ekipi mik nuk është paraqitur në këtë takim. Në fakt, Kamza është pa ekip pas dënimit që mori nga Federata Shqiptare e Futbollit për dhunën ndaj arbitrit në një ndeshje të sezonit të kaluar.