Ambasadorët SHBA-BE zbresin në terren, vëzhgojnë nga afër zgjedhjet

Ambasadorët e SHBA-së, BE por edhe ambasadori britanik Norman kanë inspektuar nga afër procesin zgjedhor në disa qendra votimi në Tiranë.

E para ka qenë e zyrtarja e lartë e ambasadës amerikane në Tiranë, Leyla Moses-One e cila që në orën 9.00 të mëngjesit ka qenë e pranishme në shkollën Edit Durham në Tiranë ku pa nga afër procesin zgjedhor.

Ndërsa Zëvendësambasadori amerikan Daniel Koski ka monitoruar sot nga afër KZAZ-në nr 35, të Njësisë Nr 5., Tiranë, ku ka qëndruar për më shumë se 10 minuta.

Edhe ambasadori i Bashkimit Europian, Luigi Soreca ishte i pranishëm në KZAZ-në që ndodhet te Liceu Artistik në Tiranë. Ai nuk pranoi të jepte një prononcim për mediat duke kërkuar që “ta linin të bënte punën e tij”. Ambasadori Soreca ka vizituar gjithashtu një tjetër qendër votimi në Kamëz të Tiranës.

Pra i gjithë faktori ndërkombëtar në Tiranë është në punë këtë të diel dhe është duke mbajtur shënim çdo gjë në lidhje me zgjedhjet.

Ambasadori Britanik Duncan Norman ka vëzhguar nga afër zgjedhjet në Kamëz. I pyetur nga gazetarët ai tha se “Zgjedhjet që bëhen sot është gjë e mirë megjithatë është një situatë e pazakontë. Pasi votuesit nuk kanë mundësi të zgjedhin mes kandidatëve, por nuk na takon ne kjo. I takon gjykatës Kushtetuese për ta vlerësuar. Ne jemi në krye të detyrës për të vëzhguar këtë proces dhe situatën.

Çmoj faktin që zgjedhjet janë të qeta. Po patjetër që i shërben. Ne jemi për dialog, patjetër që është një mundësi dialogu. Kemi bërë thirrje për dialog. Shpresojmë që kjo t’i shërbejë dialogut”, është shprehur ambasadori britanik.

Edhe ambasadori suedez në Shqipëri, ka shkuar të monitorojë zgjedhje në qendrat e votimit në Kamëz. Ndërkohë përfaqësues të ambasadës amerikane ka pasur edhe në qendrat e votimit në Elbasan.

Me sa duket ky është apeli i ndërkombëtarëve. Pasi të përfundojnë zgjedhjet palët të ulen në dialog për t’i dhënë fund krizës politike.

I gjithë faktori ndërkombëtar mbështet zhvillimin e zgjedhjeve të 30 qershorit, pavarësisht vendimit të opozitës për t’i bojkotuar ato.

BE: Politikanët, përgjegjës për dhunën

Delegacioni i BE-së në Tiranë i bën apel aktorëve politike që të mbajnë përgjegjësi për të siguruar zhvillimin pa asnjë pengesë të zgjedhjeve të 30 qershorit.

BE bën thirrje që zgjedhjet e 30 qershorit të jenë të rregullta dhe paqësore dhe të gjithë shqiptarët të ushtrojnë të drejtën e tyre për të votuar.

“Qytetarët shqiptarë duhet të jenë në gjendje të ushtrojnë të drejtën e tyre për të votuar në mënyrë të rregullt dhe paqësore. Duke pasur parasysh votimet që do të zhvillohen më 30 qershor 2019, është e domosdoshme që qytetarët që ushtrojnë të drejtat e tyre ta bëjnë këtë në një mënyrë të rregullt. Është përgjegjësi e drejtpërdrejtë e të gjithë aktorëve politikë për të siguruar që veprimtaritë e votimit të mos pengohen”, shkruhet në deklaratë.

BE thekson se çdo veprim i dhunshëm është i papranueshëm, ndërsa i bën thirrje politikanëve që të shmangin retorikën provokuese. BE garanton se zgjedhjet do të monitorohen nga OSBE/ODIHR, pjesë e së cilës janë vëzhgues nga disa vendeve anëtare të unionit.

“Demonstrata e zhvilluar në Tiranë më 21 qershor 2019 ishte e paqësore dhe të njëjtat parime dhe vlera demokratike duhen ruajtur këtë fundjavë. Çdo veprim i dhunshëm apo çdo formë nxitjeje për dhunë janë absolutisht të papranueshme në çfarëdo lloj rrethane. Të gjitha palët politike duhet të tregojnë përmbajtje dhe të shmangin retorikën provokuese. Procesi i votimit do të vëzhgohet nga një mision ndërkombëtar i drejtuar nga OSBE/ODIHR që përfshin vëzhgues nga disa vende anëtare të Bashkimit Evropian”, shkruhet në deklaratë.

BE gjithashtu apelon që politikanët të angazhohen në një dialog për gjetjen e një zgjidhje për të kapërcyer situatën aktuale politike.

“Të gjitha palët duhet të angazhohen në një dialog të mirëfilltë, sa më shpejt që të jetë e mundur, për të kapërcyer situatën aktuale politike në mënyrë që t’i përqëndrojnë përpjekjet e tyre në mbështetjen dhe konsolidimin e progresit të bërë nga Shqipëria deri më tani në procesin e reformave në rrugën e saj të integrimit në Bashkimin Evropian”, përfundon deklarata.

Ky reagim i BE-së, vjen pas deklaratës së zv. Ndihmës Sekretarit të shtetit të SHBA-së, Mathew Palmer i cili tha se qeveria amerikane njeh zgjedhjet e 30 qershorit në Shqipëri duke rrëzuar në këtë mënyrë dekretin e 3-të të presidentit Meta që zgjedhjet të zhvillohen në 13 tetor.

Exclusive/Plani i errët kundër zgjedhjeve, nga qytetet e deri në KQZ!

Opozita i ka dhënë një ultimatum të rëndë KQZ-së, ku kërkon lirimin e KZAZ-ve brenda datës 27 qershor, duke paralajmëruar akte dhune dhe asgjësim të materialeve zgjedhore, nëse nuk zbatohet kërkesa e tyre. Ky paralajmërim është bërë nga 24 bashkitë e drejtuara nga PD-LSI, duke sfiduar paqen e kryedemokratit Basha, i cili të martën në mbrëmje, u bëri thirrje qytetarëve të bojkotojnë daljen në votime, por nuk përmendi bllokim të procesit zgjedhor. Madje, PD mohoi edhe qarkoren e publikuar të hënën nga Sokol Balla gjatë emisionit Real Story, por duke parë shkresën e nisur nga bashkitë e djathta, vëren se ajo qarkore ka shumë të vërteta brenda.

Realstory.al siguroi një kërkesë tip, ku sipas informacioneve është nisur nga zyrat e PD për të gjitha bashkitë e opozitës, të cilat më pas e kanë firmosur dhe vulosur, duke ia drejtuar KQZ-së dhe policisë, e për dijeni vëzhguesve të OSBE-ODIHR. Aty thuhet qartë ato do të shkatërrojnë materialet zgjedhore.

Në këtë shkresë deklarohet se ne jemi të vendosur që të marrim nën administrim ambientet ku janë vendosur KZAZ dhe GNV, pa asnjë tolerim. “Në datat 27 Qershor 2019 – 2 Korrik 2019, në kushtet kur nuk ka një Dekret të Presidentit të Republikës për caktimin e datës së zgjedhjeve, në ambientet që ishin vënë në dispozicion paraprakisht për KZAZ dhe GNV, është planifikuar të jenë në dispozicion të qytetarëve për aktivitete të ndryshme artistike, kulturore dhe letrare, që do të organizohen nga njësia e qeverisjes vendore, apo për tubime që do të organizohen në përputhje me të drejtën kushtetuese të lirisë së tubimit, sipas nenit 47 të Kushtetutës. Këtë njoftim po e bëjmë për efekt të detyrimit që ju keni për të mos çuar dëm materialet zgjedhore, sepse zaptimi i ambienteve tona me materiale që nuk janë të autorizuara nga ne të futen brenda, do të shkaktojë asgjësimin e tyre të menjëhershëm, në funksion të lirimit të ambienteve”, paralajmërohet në kërkesë.

Pas sigurimit të kërkesës tip në realstory.al, gazetarët tanë pyetën kryetarët e bashkive nëse kjo kërkesë ishte e vërtetë dhe nëse ata ia kishin dërguar institucioneve përkatëse. Shumë prej kryetarëve të bashkive të opozitës, konfirmuan për realstory.al se kjo shkresë u është dërguar institucioneve përkatëse.

Konkretisht shkresa e dërguar u konfirmua nga Bashkia Tropojë, Kukës, Mat, Klos, Shkodër, Lezhë, Kamëz, Mallakastër, Devoll, Selenicë, Dropull. Madje, disa prej tyre dërguan dhe shkresat e firmosura, ku rezulton se të gjitha janë firmosur më 24 qershor, pikërisht ditën që u publikua edhe qarkorja e PD për moslejimin e procesit zgjedhor dhe janë të njëjta në përmbajtje.

Por plani nuk ndalet me kaq. Mesa duket ai ka edhe një Grand Finale. Pikërisht ditën e zgjedhjeve. Pas mbylljes së orarit të votimit, pas intimidimit të votuesve, pas prishjes së materialeve zgjedhore, turmat e mbështetësve të Bashës, Berishës, Kryemadhit e Metës, do të tentojnë bllokimin e akseve kryesore, për të penguar kutitë e votimit të mbërrijnë në KQZ. Një plan i rrezikshëm për qetësinë, dhe prova finale e premtimit të gënjeshtërt dhënë ndërkombëtarëve.

Ndërkombëtarët gjithsesi nuk e kanë thënë ende fjalën e fundit. Siç Realstory.al e ka paralajmëruar, pritet këto dy ditë, një deklaratë e fortë e ndërkombëtarëve, në kor, në veçanti nga Shtetet e Bashkuara. Kjo e dyta, ka një fytyrë dhe një emër: Matthew Palmer. I dërguari jo zyrtar për krizën shqiptare, ashtu si Hoyt Yee dy vjet më parë, pritet të përmendë “ofertën” finale të SHBA, atë ofertën që siç tha ish ambasadori Lu në një intervistë në Real Story vjet në shtator: “që politikanët shqiptarë nuk mund ta refuzojnë”.

Një ofertë që katërshja e krizës B.B.M.K. e ka dëgjuar në zyrë. Deri të premten me siguri, do ta dëgjojmë të gjithë. Ata që do shkojnë në votime, dhe ata që do tentojnë t’i pengojnë ato. Kësaj radhe do ketë një faturë, që nuk do ta ndajnë të gjithë shqiptarët. Ata nuk janë aq të pasur, sa të shkaktojnë krizën. Për fatin tonë, këtë e kanë kuptuar amerikanët. /Realstory.al

Dokumenti, Arta Marku urdhër prokurorëve: Regjistroni çdo krim elektoral

Kryeprokurorja Arta Marku përmes një urdhri të shpërndarë prokurorëve të rretheve kërkon që të regjistrohen dhe të mbahet shënim çdo akt dhune dhe krim elektoral që mund të ndodhë në ditët në vijim dhe gjatë procesit zgjedhor.

Urdhëri i kryeprokurores ka si qëllim mbledhjen e provave dhe “ndjekjen penale ndaj autorëve që prekin zgjedhjet e lira dhe sistemin demokratik të zgjedhjeve apo që cënojnë procesin zgjedhor”.

Arta Marku përmes këtij udhëzimi kërkon që të gjithë “Prokurorët të jenë në gatishmëri së bashku me oficerët e policisë gjyqësore nga ora 07:00 e mëngjesit deri në 22:00 të darkës”.

Sipas udhëzimit, pas orës 22:00 personeli i gatishmërisë do të komunikojë me sallën operative të policisë.

Realstory disponon dokumentin e firmosur nga kryeprokurorja siç e shihni në fotot mëposhtë.

Braçe: Më 30 qershor, një proces i qartë dhe i qetë zgjedhor

Pavarësisht situatës që sot duket shumë e nxehtë për shkak të sulmeve të organizuar të militanëve të PD-së ndaj KZAZ-ve, zëvendës kryeministri Erion Braçe garanton se më 30 qershor jo vetëm që do të ketë zgjedhje, por këto do të jenë edhe të qeta.

Ai tha të enjten para gazetarëve se të gjithë ata që kanë sulmuar dhe do sulmojnë zgjedhjet do të trajtohen në bazë të Kodit Penal, ndërsa garantoi se mjetet e dëmtuara zgjedhore janë lehtësisht të rikuperueshme.

“Kemi dy gjëra, së pari nuk ka përplasje, por sulme mbi institucionet zgjedhore dhe publike, mbi policinë e shtetit që është në krye të detyrës sipas ligjit. Grupe kriminale të nëpunësve të bashkive të cilat kanë përdorur mjete të dhunshme për të penguar procesin elektoral. Jam djegur materialet zgjedhore, por që janë të rikuperueshme lehtësisht për votimin.

Materialet thelbësore nuk janë cënuar. Të gjithë këta që kanë sulmuar do të trajtohen sipas Kodit Penal dhe do të marrin atë që u takon. Në 30 qershor do të ketë një proces të qartë dhe qetë zgjedhor, atje ku do të pamundësohet do të trajtohet në përputhje me ligjin. Pavarësisht angazhimit të çdo ofiqari apo mandatari për të shfuqizuar të drejtën e qytetarëve për të votuar” tha ai, referuar dekretit të Metës.

Zëvendës kryeministri komentoi edhe përgjimet e publikuara nga Bild ku shfaqen ministra dhe deputetë të PS-së, dhe tha se blerje votash nuk ka pasur, ndërsa kërkoi që hetimet të shkojnë deri në fund dhe nëse faktohet fajtorë të dalin para ligjit individualisht.

“Përgjimet i kam lexuar, dhe shefi i komisariatit nuk thotë se kam bërë vota për PS-në, por se ka ruajtur rendin nga një bandë e qartë politike dhe partiake dhe që ka dhunuar përfaqësues të PS-së me pistoletë në dorë. Madje nuk iu bind urdhrave të policisë dhe goditi makinën e policisë. Prokuroria duhet të vërtetojë autenticitetin.

Pjerin Ndreu nuk thotë cilido mësues. Ai nuk thotë se mësuesit nëse nuk votojnë për PS-në duhet të largohen, ai i referohet drejtorit të një shkolle, që nuk janë të ndaluar që të merren me aktivitet politik. Një socialist i kërkoi një socialisti…. Ndreu i ka identifikuar dy personat, atë që ka folur dhe atë që ka përdorur atë lloj shprehje. Nuk bëhet fjalë për të gjithë mësuesit e Dibrës, por dy persona që janë brenda PS-së.

Prokuroria duhet të provojë që ato para janë provuar apo kanë blerë vota, apo kanë ndikuar në rezultatin e zgjedhjeve, të mbajnë përgjegjësi. Nëse identifikohen rastet e blerjes së votave, krimi është individual dhe duhet të ishte hetuar në kushtet e flagrancës dhe prokurori politik duhet të mbajë përgjegjësi. Për palën tjetër që rrahu, bleu vota nuk është bërë asnjë veprim.

Në rast se ka fakte prova dhe provohet secili individualisht. Kush ka folur për shit-blerje votash. Në asnjë prej përgjimeve të publikuara për Durrësin apo Dibrën, në gojën e Dakos apo të tjerë socialistë, përfshirë Gjiknurin apo të tjerë nuk flitet për para për të këmbyer…Qoftë Gjiknuri apo Dako nuk është gjetur që të ketë komunikuar për çështje parash, për secilin prokuroria duhet të hetojë nga i pari tek i fundit, përfshirë edhe këta të dy”, tha Braçe.

Lleshaj: Zero shans për konflikt civil. Meta humbi votëbesimin e Kuvendit

Në një intervistë për edicionin e lajmeve në “Vizion Plus”, ministri i Brendshëm Sandër Lleshaj shprehet se presidenti Ilir Meta e ka humbur votëbesimin në Kuvend.

Ai madje e përgënjeshtroi Metën, duke deklaruar se nuk ka asnjë sinjal nga organet ligjzbatuese për konflikt civil më 30 qershor dhe as nuk do të lejohet një gjë e tillë në asnjë ditë të vitit.

Kujtojmë se një nga argumentet e Presidentit Meta për anulimin e zgjedhjeve të 30 qershorit ishte pikërisht informacioni se ishte në rrezik siguria e vendit. Por ndryshe nga Presidenti, ministri i Brendshëm garanton se nuk ka asnjë informacion të tillë dhe se policia do të marrë të gjitha masat për mbarëvajtjen e zgjedhjeve në 30 qershor.

Nga ana tjetër, ministri Lleshaj duke u ndalur tek rezoluta e PS, theksoi se Meta me aktin e tij humbi votëbesimin e Kuvendit. Ai komentoi gjithashtu edhe veprimet e opozites si dhe protestat e zhvilluara kunder kryeminsitrit Rama ne Librazhd, ndërsa tha se policia do të bëjë detyrën sa herë shkelet ligji.

Z.Lleshaj, lideri i opozitës ju ka akuzuar se po bëni arrestime politike. Pse duhej marrë masa e arrestit ndaj drejtuesve të PD, që protestuan në Librazhd?

Ministri Lleshaj: Së pari edhe unë do të doja ndoshta ta pyesja dhe z.Basha dhe udhëheqjen politike të asaj partie se a janë politike, a ka diçka politike në lëndët shpërthyese që përdorën kundër Policisë së Shtetit? A ka diçka politike në bllokimin e rrugëve? A ka diçka politike në bllokimin dhe në ndalimin e lirisë së qytetarëve për të ushtruar të drejtën e tyre të zgjedhjes? Në qoftë se këto janë politike pra në qoftëse fishekzjarret, kapsollat, gurët e hedhura ndaj eskortës së Kryeministrit apo ndaj mitingut përkatës të një partie politike në zgjedhje janë politike, atëhere duhet të mendohemi të gjithë mirë ata dhe ne.

Përgjigja ime e shkurtër është kjo: nuk ka asgjë politike, është thjesht një përgjigje e policisë ndaj veprave të pastra kriminale të ushtruara nga persona të caktuar, pavarësisht se këto duan të etiketohen si politikë.

Nëqoftëse Basha do t’i etiketojë si politikë, kjo është puna e tij po ne, policia është marrë me veprime kriminale të ushtruara ndaj saj dhe ndaj qytetarëve, që duan të marrin pjesë në fushatë zgjedhore.

Dje parlamenti miratoi me 100 vota pro rezolutën ku theksohet se Presidenti i Republikës ka shkelur kushtetutën. A do të pasohet kjo rezolutë me shkarkimin e Ilir Metës?

Ministri Lleshaj: Unë di të them që Parlamenti bëri të paktën diçka ndryshe nga Presidenti; parlamenti nuk zhbëri aktin e vet të mëparshëm me të cilin e ka zgjedhur Ilir Metën president të vetin, por shprehu një votë mosbesuese ndaj tij përmes deklarimit ose konstatimit të një pavlefshmërie absolute të aktit të Presidentit për anullimin e zgjedhjeve.

Dhe, përmes kësaj, gjëja që vlen për t’u konstatuar është se dje Ilir Meta humbi në një farë mënyre votëbesimin e parlamentit prej nga ka dalë, prej nga është zgjedhur.

Dikur është zgjedhur me 87 vota dhe dje mori 100 vota kundër, është një shenjë, një mesazh shumë i qartë që përfaqësuesi i sovranit, pra i popullit i jep Presidentit të Republikës si një shans reflektimi për të mos shkuar më tej në thyerjen e ligjit dhe shkeljen e kushtetutës.

Këtë shoh unë si lajmin themelor të djeshëm. Se çfarë do të bëhet më tej, kjo është një çështje që meriton kohën e vet.

Gjithsesi si kundërpërgjigje ndaj parlamentit, sot Presidenti i ka kërkuar informacion KQZ sa deputetë ka aktualisht parlamenti. Ka të drejtë Presidenti të shpërndajë parlamentin dhe çfarë do të bëjë mazhoranca nëse Kreu i Shtetit ndërmerr një hap të tillë?

Ministri Lleshaj: Sigurisht që është interesante kërkesa e presidentit për të mësuar sa deputetë ka Parlamenti i Shqipërisë. Do të duhej që ta dinte edhe më përpara, do të duhej që ta dinte në çdo çast numrin e deputetëve që ka Kuvendi i Shqipërisë, megjithatë kjo është çështje e presidentit.

Unë dua edhe mund të them vetëm këtë; di që në Kushtetutën e Shqipërisë, për shkak të faktit që Shqipëria është republikë parlamentare, parlamenti zgjedh presidentin, ose presidenti zgjidhet nga parlamenti dhe nuk kuptoj se si mundet që presidenti të shkarkojë, të zhbëjë, të shpërndajë organin prej të cilit ka dalë, prej të cilit buron, prej të cilit i buron fuqia e tij.

Kështu që nuk besoj që mund të kishte as hapësirë ligjore, as kushtetuese, po as logjike që Presidenti, i cili është zgjedhur nga ky parlament të tentojë të shpërndajë një parlament ndaj të cilit nuk ka asnjë tagër, për arsye se, për shkak të natyrës së republikës tonë parlamentare, Presidenti është i dalë prej këtij parlamenti. Dhe nuk mund të përmbyset bota sepse në qoftë se presidenti do t’i lejonte vetes të zhbënte organin prej të cilit i buron gjithë fuqia kushtetuese, politike dhe institucionale, do të thotë që të ishim në një situatë absurdi. Dhe besoj që pa u kthyer bota përmbys, kjo nuk mund të ndodhë.

Nga ana tjetër opozita ka deklaruar se nuk do të lejojë zhvillimin e zgjedhjeve në 30 qershor, duke krijuar për këtë qëllim edhe aleancën për mbrojtjen e demokracisë. Çfarë do të bëni për të siguruar një process të qetë zgjedhor dhe si do të veprohet nëse do të tentohet bllokimi i qendrave të votimit?

Ministri Lleshaj: E kam dëgjuar disa herë këtë paralajmërim të opozitës për të parandaluar ose për të penguar zhvillimin e zgjedhjeve të lira në datë 30 qershor. Madje opozita pretendon që ka fuqi të madhe për ta bërë, pra ka fuqi të madhe për t’i prishur zgjedhjet, për të mos e lejuar zhvillimin normal të tyre, por unë do të pyesja: në qoftë se opozita e ka këtë fuqi për t‘i prishur zgjedhjet, ka fuqi për të dëmtuar një proces të madh zgjedhor, i cili zhvillohet në të gjithë vendin, rreth 5000 qendra votimi, do të pyesja: Përse nuk e përdor opozita këtë fuqi në mënyrë konstruktive për t’i ndrequr zgjedhjet? Në qoftë se paska fuqi për t’i prishur, përse nuk ndreq? Pse nuk përpiqet që zgjedhjet të zhvillohen të lira, të ndershme, të drejta, demokratike, dinjitoze për Shqipërinë dhe pastaj përmes këtyre zgjedhjeve ajo mund të rrisë fuqinë e saj politike.

Nuk kuptoj se si mund të përdoret fuqia e një force politike për të prishur, ndërkohë që mund të përdoret për të ndrequr.

Sigurisht metafora të tilla për prishje zgjdhje si komitete shpëtimi ose aleanca për të mbrojtjen e demokracisë janë metafora të cilat e kanë humbur çdo vlerë. Janë metafora të cilat burojnë nga mendje të paorganizuara dhe që nuk e njohin as shtetin, as ligjin, as demokracinë dhe as kushtetutën dhe dua të them që si të tilla ato nuk mund të kenë shans për të krijuar situata paralele në shtetin shqiptar.

Askush nuk mund të mendojë dhe nuk mund të shpresoj dhe nuk mund të guxoj të mendoj që mund të ndërtojë institucione paralele, të cilat minojnë funksionimin normal të shtetit shqiptar.

Zgjedhjet janë një e drejtë kushtetuese e qytetarëve, është një detyrim kushteues i shtetit për t’i organizuar ato, për të krijuar mjedisin e nevojshëm që ato të zhvillohen të drejta, të lira dhe të ndershme. Kushdo që futet në këtë lojë për të prishur zgjedhjet, futet në një lojë me ligjin me kushtetutën dhe me të ardhmen e vendit, me parimet demokratike, futet në një lojë të rrezikshme dhe një ballafaqim të rrezikshëm jo vetëm me institucionet e shtetit shqiptar po edhe me partnerët ndërkombëtarë të Shqipërisë, të cilët qartësisht po thonë dhe po ftojnë të gjitha mediat e arsyeshme që të futet në rrugën dhe hullinë e ligjit, të ikin nga kjo retorikë, e cila nuk sjell asnjë rezultat përveçse penalitete të padobishme për askënd.

Zoti Lleshaj a kanë informacione Ministria e Brendshme, Policia dhe agjencitë ligjzbatuese se në 30 qershor mund të tentohet konflikti social?

Ministri Lleshaj: Institucionet dhe njësitë ligj zbatuese të shtetit shqiptar nuk kanë asnjë informacion se me 30 qershor mund të kemi një konflikt social. Konflikti social i pretenduar, i reklamuar apo i dëshiruar prej disa mendjeve të nxehta është një opsion i pamundur.

Jo, nuk do të ketë konflikt social në Shqipëri, as me 30 qershor, as me 30 nëntor dhe as me 30 dhjetor për arsye se në Shqipëri nuk ekziston asnjë lloj konflikti midis shtresave, midis qytetarëve, pra një konflikt social.

Ajo që ekziston në Shqipëri është një aspiratë e pashpresë për të marrë pushtetin në rrugë të paligjshme dhe kjo nuk mund të lejohet.

Ajo që sot shitet apo tentohet të shitet si mundësia e një konflikti social në Shqipëri, është thjesht përpjekje për të minuar arritjen më të madhe të Shqiptarëve në këto tre dekadat e fundit që është ngritja e një sistemi drejtësie, i cili më në fund do të krijojë shpresë për një rend të drejtë, të barabartë për të gjithë qytetarët e këtij vendi. Mundësia për një konflikt social është e barabartë me zero, mundësia që të kemi konflikte midis grupeve të caktuara apo elementeve të caktuara kriminalë, të cilët synojnë të shkatërrojnë ose të dëmtojnë ose të cënojnë një proces zgjedhor, po, për këtë kemi informacione që ka përpjekje ka plane ka organizime, për të bërë të mundur cënimin e procesit zgjedhor.

Për të bërë të pamundur që qytetarët shqiptarë të shkojnë të ushtrojnë lirisht të drejtën e tyre për të vituar apo për të mos votuar, por këto informacione lidhen me elementë apo me grupe të caktuara.

Dhe këtu nuk jemi në rrafshin e politikës, jemi në rrafshin e kriminalitetit dhe bazuar në të gjitha prerogativat që parashikon kushtetuta, kodi zgjedhor dhe ligje të tjera të Shqipërisë, janë marrë të gjitha masat që qytetarët të kenë mundësi të ushtrojnë në liri të plotë të drejtën e tyre për të zgjedhur në datën 30 qershor.

Ndërkohë që kujtdo që mendon të mund të intimidojë, cenojë apo të dëmtojë procesin zgjedhor duhet t’iu themi që tërhiquni nga idetë e gabuara, nga iluzionet e gabuara për arsye se do të keni përballë ligjin, kushtetutën shqiptare, do të keni përballë qytetarët e vendit, të cilët mbrojnë të drejtën e tyre për të votuar, do keni përballë aleatët, partnerët, miqtë e Shqipërisë, të cilët janë në mbështetje të këtij procesi jetik për vendin.

Vendi është në prag të hapjes së negociatave të anëtarësimit për në BE, vendi është në fillimin ose në kulmin e një sezoni turistik, jetik, të domosdoshëm për ekonominë dhe askush nuk mund të guxojë që të cenojë këto gjëra kaq të rëndësishme për qytetarët shqiptarë, të cilët duan punë, duan qetësi, duan mirëqenie, duan integrim europian dhe jo rrëmujë të pakuptimtë.

Z.Ministër, sot policia e Elbasanit dhe forcat speciale arrestuan kreun e grupit kriminal të fisit Çapja, por bashkë me të janë arrestuar edhe zyrtarë dhe ish zyrtarë të Autoritetit të Medias. Ku qendron implikimi i tyre në këtë çështje, për çfarë janë prangosur ata?

Ministri Lleshaj: Sot policia ka zhvilluar një aksion të madh, një megaoperacion, madje edhe dje, edhe sot në Elbasan janë kryer goditje shumë të rëndësishme të policisë kundër krimit të organizuar. Unë nuk di të them asgjë për CV-të e atyre personave që janë arrestuar.

Në këndvështrimin e Policisë së Shtetit, në këndvështrimin tonë, personat që arrestohen nuk kanë asnjë cilësi tjetër përveç cilësisë së personit të dyshuar për pjesëmarrje në veprimtari të krimit të organizuar. Dhe çdo përpjekje për t’i klasifikuar disi ndryshe persona të caktuar të arrestuar, më duket e padobishme për momentin.

Procesi është në zhvillim, në hetim. Ajo që vlen të theksohet është që suksesi i sotëm i Policisë së Shtetit është një tjetër tregues i përmirësimit të jashtëzakonshëm të fuqisë së saj goditëse.

Mos harroni që në harkun e disa muajve janë vënë para drejtësisë disa nga ekzemplarët më të njohur të krimit të organizuar në vend, emra të njohur dhe ky proces është thjesht në vazhdim. Operacioni për goditjen e krimit të organizuar është në zhvillim të plotë dhe dua të garantoj qytetarët që jo vetëm në Elbasan, por në Elbasan dhe në të gjithë Shqipërinë, Policia e Shtetit, në bashkëpunim me prokurorinë dhe me struktura të tjera ligjzbatuese do ta vazhdojë këtë operacion jetik për të ardhmen europiane të vendit.

Janë dy gjëra që ne duhet të bëjmë tani fort, në kuptimin e organeve ligjzbatuese: është lufta kundër krimit të organizuar, lufta kundër emigracionit të paligjshëm dhe azilkërkimit të paligjshëm në vendet e BE-së.

Këto të dyja janë prioritete të mëdha të cilat na kërkohen shumë jo vetëm nga qytetarët e këtij vendi, jo vetëm nga e ardhmja jonë por dhe nga partnerët tanë të cilët na masin çdo ditë suksesin bazuar në këto 2 tregues të rëndësishëm.

Goditja sot në Elbasan është vetëm një goditje e madhe e radhës. Ka patur shumë që e kanë paraprirë, jam i sigurt që do të ketë shumë të tjerë që do të vijojnë në të ardhmen për ta bërë Shqipërinë atë që duhet të jetë. Faleminderit!

Meta anulon zgjedhjet, Veliaj në fushatë, letër tiranasve: Votën më 30 qershor

E ndërsa presidenti Meta firmosi sot dekretin për anulimin e datës së zgjedhjeve, kryebashkiaku i Tiranës, Veliaj vazhdon fushatën në kryeqytet. Ai i ka nisur sot një letër të personalizuar qytetarëve të Tiranës përmes të cilës kërkon votën për të vazhduar rrugën e nisur, ndërsa thekson se zgjedhjet do të zhvillohen më 30 qershor.

“E dashur familje e Tiranës sonë! Me shumë përulësi më lejoni t’ju falenderoj për besimin dhe ndihmën tuaj në transformimin e Kryeqytetit në këto 4 vite të paharruara. Të gjithë së bashku, me punë, arritëm t’ia ndryshojmë faqen kryeqendrës së gjithë Shqipërisë! Sot Tirana gëlon: Nga sheshi “Skënderbej”, tek “Bulevardi i Ri”, “Pazari i Ri”, tek “Amfiteatri i Liqenit”, “Parku Olimpik”, “Reja” – qyteti është plot e përplot me aktivitete e energji. Sot Tirana numëron 44 kënde lojërash, 5 shkolla të reja dhe 17 të tjera të nisura, kopshte e çerdhe publike të rikonstruktuara, të cilat nuk janë më objekte turpi, por shtëpiza krenare për të vegjlit, të cilët rriten shëndetshëm”, thuhet në letrën e Veliajt.

Mandej, ai shton se falë transformimit të shpejtë që ka pësuar Tirana, kryeqyteti konsiderohet nga guidat turistike si një ndër qytetet më energjike të Ballkanit. Veliaj thekson se tashmë Tiranës i referohen si metropol dhe kryeqyteti është motori kryesor i zhvillimit të Shqipërisë me rritje ekonomike 10%, më e larta në vend e rajon. “Në këto 4 vite kemi ndërhyrë thuajse në çdo lagje të Tiranës, në qendër dhe në periferi, me blloqe banimi të shtruara me asfalt, të ndriçuara, të gjelbëruara, dhe me hapësira dëfrimi, duke rikthyer ndjenjën e humbur të komunitetit”, shkruan ai.

Në letrën dërguar qytetarëve, Veliaj i siguron ata se ai dhe ekipi i tij kanë ende shumë punë për të bërë dhe se Tirana vetëm sa e ka nisur rrugën e saj të shkëlqimit. Veliaj thekson se bashkimi përmes votës më 30 Qershor është një datë shumë e rëndësishme për të ardhmen e familjeve dhe të qytetit tonë. “Kemi ende shumë e shumë punë për të bërë! Tirana vetëm sa e ka nisur rrugën e saj të shkëlqimit. Ambicia ime dhe e skuadrës që drejtoj shkon shumë më larg transformimit të deritanishëm. Ashtu si edhe ju, unë dua të punoj dhe të rris familjen time në një qytet edhe më të pastër e modern, me mundësi për çdo fëmijë, të ri e të rritur. Prandaj, më 30 Qershor do t’ia dalim vetëm nëse bashkohemi të gjithë me votën tonë, si më e çmuara dhuratë për jetën e familjeve tona dhe gjithë qytetit. Mezi pres të nisim së bashku një tjetër 4-vjeçar”, shkruan Veliaj.

Zgjedhjet në Danimarkë, një leksion demokracie. Kryeministri uron rivalen fituese

Kryeministri liberal i Danimarkës, Lars Lokke Rasmusen, ka pranuar humbjen në zgjedhjet e përgjithshme të vendit, duke i hapur rrugën kryetares së socialdemokratëve Mette Frederiksen për të marrë pushtetin.

“Ne patëm zgjedhje vërtetë të mira, por do të ketë një ndryshim të qeverisë”, i tha kryeministri mbështetësve.

Blloku i udhëhequr nga Social-Demokratët e qendrës së majtë fituan 91 nga 179 vende në parlament.

Mette Frederiksen, 41 vjeç do të jetë kryeministrja më e ri e vendit.

Zgjedhjet e përgjithshme u dominuan nga debatet mbi ndryshimet klimatike, ulja e mirëqenies dhe imigracioni.

Partia Liberale e Z. Rasmussen ka qenë në pushtet për 14 vjet gjatë 18 viteve të fundit.

Danimarka bëhet vendi i tretë nordik që brenda një viti zgjedh një qeveri majtiste, pas Suedisë dhe Finlandës.

Rama, letrën e 7-të e shkruan për demokratët, jo për Bashën: Ai ka frikë nga humbja dhe drejtësia

Letrën e shtatë publike, kryeministri Rama ia kushton demokratëve dhe jo kreut të PD-së. Ndryshe nga herët e tjera, në këtë letër kryeministri zgjedh t’i drejtohet demokratëve dhe t’ua sqarojë atyre sesi qëndron e vërteta. Ai bën të ditur se Basha ka braktisur zgjedhjet sepse ka frikë nga humbja, por edhe nga drejtësia.

Në letrën e gjatë të postuar në facebook kryeministri teksa i drejtohet demokratëve dhe thotë se sot PS nis fushaten zgjedhore, ndersa rruga e nisur nga opozita, dëmton Shqipërinë.

“Fatkeqësisht, jo vetëm për ju po edhe për vendin, udhëheqja juaj politike ka hyrë në rrugën pa krye të frikës nga zgjedhjet, të panikut nga drejtësia dhe të kërcënimeve e të orvajtjeve të dëshpëruara, në dëm të Shqipërisë e të çdo shqiptari të interesuar për paqe sociale, zhvillim ekonomik, integrim të plotë të vendit në Bashkimin Europian”, shkruan Rama.

Ai më tej sqaron se vetpërjashtimi nga zgjedhjet i një partie politike, nuk i bën ato jo demokratike, pasi të gjithë kanë të drejtë të marrin pjesë në zgjedhje, por i tremben sfidës elektorale.

“Udhëheqja juaj nuk do zgjedhje, sepse i trembet një disfate elektorale të radhës. Ndërsa ne nuk e shkelim dot detyrimin, sepse duam të zgjidhemi në zgjedhjet e radhës. Kam dëgjuar shpesh pyetjen: A mund të bëhen zgjedhje demokratike pa opozitën?

Zgjedhje demokratike do të thotë që të gjithë të gëzojnë të drejtën të zgjidhen. Por nëse përjashtimi në çfarëdo forme i opozitës nga zgjedhjet i bën ato antidemokratike, vetëpërjashtimi i një partie kryesore nga zgjedhjet nuk i bën ato jodemokratike”, shkruan Rama.

Ai gjithashtu kujton se prekja e zgjedhjeve, bllokimi apo dëmtimi i tyre dënohet rëndë në Kodin Penal. Në përfundim kryeministri thekson sërish se zgjedhjet do të zhvillohen në 30 qershor.

LETER E SHTATE PUBLIKE JO PER LULZIM BASHEN

Bashkëqytetarë demokratë,

sot Partia Socialiste nis zyrtarisht fushatën e zgjedhjeve të 30 qershorit. Ndërsa partia të cilës ju i përkisni si anëtarë apo që e keni votuar, si mbështetës ose simpatizantë, nuk merr pjesë në këto zgjedhje. Fatkeqësisht, jo vetëm për ju po edhe për vendin, udhëheqja juaj politike ka hyrë në rrugën pa krye të frikës nga zgjedhjet, të panikut nga drejtësia dhe të kërcënimeve e të orvajtjeve të dëshpëruara, në dëm të Shqipërisë e të çdo shqiptari të interesuar për paqe sociale, zhvillim ekonomik, integrim të plotë të vendit në Bashkimin Europian.

Braktisja pa kthim e parlamentit, nxitja e dhunës, bojkotimi i zgjedhjeve, janë në thelb arratisje nga misioni, funksioni dhe korniza e vlerave të një partie demokratike. Jam sinqerisht i keqardhur për këtë.

Unë nuk jam ai që ju doni të shihni në krye të vendit. Nuk më keni votuar dhe sot nuk ju kërkoj të më votoni, po thjesht shpresoj të më lexoni.

Kur kemi vendosur të jetojmë në një sistem shumëpartiak dhe të synojmë bashkimin e Shqipërisë me Europën, kemi sfiduar një histori të gjatë e aspak bujare në aspektin e traditës demokratike. Hymë në rrugën krejt të re të demokracisë, pas një gjysëm shekulli diktaturë komuniste dhe një mënyre jetese të imponuar, ku kundërshtari politik ishte thjesht një armik për t’u luftuar pa asnjë mëshirë, e për t’u asgjësuar pa asnjë ngurrim. Sot e gjithë ditën, jeta jonë politike vuan ende nga paaftësia për ta respektuar kundërshtarin pa e sakatuar publikisht, me sulme që rëndom tejkalojnë çdo kufi etik dhe kthehen shpesh në dhunë gjuhe të përdalë me egërsi, deri në farë e në fis. Por sidoqoftë, kemi tejkaluar një fazë të rëndë, kur kundërshtarët politikë sakatoheshin me dhunë fizike ose kur protestat ishin të rrezikshme, sepse armët e shtetit përdoreshin për të qëlluar me plumba mbi protestuesit apo reagimi policor ndaj tyre kthehej në hu masiv. Kësisoj, edhe pse rikthimi fatkeq i protestave të dhunshme së fundmi ka treguar se ende s’jemi deprimitivizuar politikisht, kemi bërë sidoqoftë progres të madh në qasjen e qeverisë e në sjelljen e forcave të policisë ndaj protestuesve. S’është pak.

Disa mijëra ndër ju, keni marrë pjesë në protestat partiake të kohëve të fundit dhe shumë të tjerë prej jush, i mbështesni ato edhe pse, bazuar në anketimet tona, po edhe në çfarë tregojnë anketimet e pavarura të bëra nga miqtë tanë ndërkombëtarë, shumica e demokratëve nuk mbështesin as djegien e mandateve, as dhunën e ushtruar në protesta dhe as bojkotin e zgjedhjeve nga ana e udhëheqjes suaj. Gjithësesi, juve as ju pyeti kush për këto vendime politike ekstreme dhe politikisht vetëvrasëse, as nuk është qëllimi im këtu t’ju them çfarë duhet të bëni me udhëheqjen tuaj, e cila ka humbur shikimin pasi s’di të shohë përtej hundës së vet.

Askush ndër ju mbase, unë jo e jo, s’e kishte menduar se do të vinte dita kur partia juaj, e lindur si parti parlamentare nga zgjedhjet e para pluraliste, as të mos ishte më parlamentare dhe as të mos futej në zgjedhje. Çudi dhe degradim i madh njëkohësisht! Por sot, me një vendim sovran të udhëheqjes së asaj partie jemi përpara këtij fakti të kryer dhe s’kemi, mesa duket, asnjë mundësi ta zhbëjmë një zhvillim kaq negativ.

Zgjedhjet janë një e drejtë e panegociueshme kushtetuese e të gjithë atyre që duan të zgjedhin dhe një detyrim i pashmangshëm kushtetues i të gjithë atyre aë duan të zgjidhen.

Udhëheqja juaj nuk do zgjedhje, sepse i trembet një disfate elektorale të radhës. Ndërsa ne nuk e shkelim dot detyrimin, sepse duam të zgjidhemi në zgjedhjet e radhës.

Kam dëgjuar shpesh pyetjen: A mund të bëhen zgjedhje demokratike pa opozitën?

Prandaj unë e ngre ndryshe pyetjen: A mundet që zgjedhjet demokratike të bëhen vetëm nëse do opozita?

Imagjinoni për një moment sikur zhvillimi i zgjedhjeve në këtë vend të varet nga do apo s’do opozita të bëhen! Mendje të lehta politike e mediatike, kanë rrahur së fundmi shumë ujë në havan, lidhur me sa e tmerrshme qenka të bëhen zgjedhjet pa opozitën dhe sa e thjeshtë qenka, që të shtyhet data e zgjedhjeve meqë s’do opozita!

Sinqerisht ju them, po të ishte kaq e thjeshtë, do të isha unë i pari që do të merrja flamurin e shtyrjes së zgjedhjeve, sepse në fund të fundit do të parapëlqeja të përqëndrohesha non stop tek punët e qeverisë, pa qenë nevoja t’i bija rreth e përqark për fushatë Shqipërisë. Por jo vetëm pse është e pamundur nga pikëpamja kushtetuese, por edhe pse është e tmerrshme nga këndvështrimi i bashkëjetesës demokratike, unë mbetem absolutisht kundër idesë së shtyrjes së zgjedhjeve.

Si mund të vendoset – ku është parë? – ky rregull i ri i bashkëjetesës demokratike, që zgjedhjet të varen nga dëshira ose mungesa e dëshirës së një pale për zhvillimin e tyre, në datën e caktuar nga Kushtetuta. Kjo s’është punë date apo stine, kjo është punë qëndrueshmërie e themelit të jetës demokratike. Imagjinoni pak sikur të hapej rruga e një marrëzie të tillë jo vetëm qartësisht antikushtetuese, po edhe thelbësisht antidemokratike, se çfarë do të ndodhte në zgjedhjet pas këtyre zgjedhjeve, në ato pas tyre dhe me radhë, kur sipas tekave të opozitës së radhës (apo edhe të palës tjetër në qeveri pse jo!) data e zgjedhjeve të kthehej, nga një detyrim kushtetues për ata që duan të zgjidhen, në një lojë politike e kujtdo që nuk do zgjedhje!

Disa mendje ndër ato të lehtat që lartpërmenda i bien shkurt: Po ik ti (dmth unë) e pastaj le të bëhen bashkë, andej nga vjeshta, zgjedhjet vendore e ato të përgjithshme dhe fitoji prapë po deshe, se po vazhduam kështu vendi do shkojë në përplasje civile! Kjo është një recetë nga ato që heqin dhimbjen e kokës duke e paralizuar komplet trupin! Imagjinojeni pak çfarë rruge e tatëpjetë hapet për demokracinë tonë nesër, nëse sot vendoset precedenti që mjafton të ikësh nga parlamenti, të ushtrosh dhunë e të kërcënosh me moslejim të zgjedhjeve lokale dhe e përmbys, mu në mes të mandatit qeverinë e zgjedhur – duke provokuar zgjedhje të reja kur do ti, madje me kryeministrin që vendos ti! Nuk është e nevojshme besoj të zgjatem në këtë pikë, sepse s’ka mendje normale që s’e kupton çfarë çorapi do të ishte një jetë e tillë politike, ku fituesi nuk qeveris dot sipas kontratës me popullin dhe humbësi i imponohet me dhunë edhe vetë popullit!

Shkurt, çdo zgjidhje anormale në emër të normalitetit demokratik sot, kthehet në bumerang që prodhon anormalitet antidemokratik, për vite me radhë nesër.

Edhe dy fjalë për moslejimin e zgjedhjeve. Eshtë krim dhe ndëshkohet rëndë nga Kodi Penal i Republikës së Shqipërisë, kushdo që e kryen një krim të tillë. Po jo vetëm kaq, cilido që do të kuturisej të prekte një hallkë të vetme të procesit zgjedhor dhe do të dënohej më pas për krime zgjedhore në Shqipëri, nuk do ta kishte më të mundur të shkelte për gjithë jetën në Shtetet e Bashkuara (do të merrte në qafë edhe familjarët e afërt sipas ligjit përkatës në SHBA) dhe as do të kalonte dot më, kontrollin e kufijve të Bashkimit Europian duke u përfshirë në listën e kompjuterizuar të personave me rekorde kriminale, të cilët nuk hyjnë dot në territorin e Unionit.

A i’a vlejnë të gjitha këto pasoja të rënda për të shkuar pas berihait? Nuk besoj dhe jam i bindur se nuk do të ketë njerëz të zakonshëm, që të bëhen pjesë e një marrëzie kaq të jashtëzakonshme.

Në 30 qershor do të votohet në të 61 bashkitë e vendit. Ne do të bëjmë më të mirën për t’i dhënë Kukësit, Shkodrës, Kamzës, Lezhës, Devollit, Mallakastrës e me radhë bashkive blu, qeverisjen e munguar deri më sot, pavarësisht nëse ju do të dilni apo jo në votime. Kudo ku do të fitojmë aty ku kemi kundërshtarë të regjistruar, njësoj si aty ku s’kemi të tillë, ne do të jemi në dispozicion të të gjithë qytetarëve pa dallim. Betejën politike me udhëheqjen tuaj ne e kemi fituar dukshëm e bindshëm, sa për meritën tonë aq edhe për paaftësinë e asaj udhëheqjeje – ndajeni vetë cila nga të dyja peshon më shumë. Por betejën e vërtetë, më të vështirën, ne e kemi me plagët e qyteteve e të fshatrave kudo në Shqipëri, po sidomos aty ku ende era e ndryshimit të madh urban të katër viteve të fundit, s’ka fryrë sa e si duhet si pasojë e keqqeverisjes vendore të shumë bashkiakëve demokratë.

Me respekt të plotë për të drejtën tuaj për të menduar ndryshe prej meje, ju përshëndes e ju uroj çdo të mirë e shëndet në familjet tuaja.

Edi Rama

1 qershor, 2019

LETER E SHTATE PUBLIKE JO PER LULZIM BASHENBashkëqytetarë demokratë, sot Partia Socialiste nis zyrtarisht fushatën e…
Gepostet von Edi Rama am Samstag, 1. Juni 2019

Berluskoni rikthehet si eurodeputet në Parlamentin Europian

Forza Italia fiton me 10 për qind në zgjedhjet për parlamentin europian dhe ish kryeministri historik i Italisë, Silvio Berluskoni rikthihet si eurodeputet në Bruksel.

Pesë vjet pas dëbimit të tij nga Parlamenti italian, në nëntor 2013, Silvio Berlusconi kthehet në Parlament Europian.

“Ne jemi ende të domosdoshëm. Pa Forza Italia qendra e djathtë humbet . Ne jemi e vetmja forcë e moderuar në një koalicion fitues . Jemi banka e vetme kundër populizmit anti-evropian. Më shumë se kjo nuk mund të bëhej, dhashë më të mirën”, ishin këto fjalitë e para të Silvio Berlusconit, tashmë 82 vjeç.

Më 1 gusht 2013, Berlusconi u dënua me katër vjet burg për mashtrim tatimor në procesin e shitjes së të drejtave televizive Mediaset dhe u dëbua nga parlamenti italian.