Në tre bashki, përkatësisht në Kamëz, Vorë dhe Elbasan do të votohet elektronikisht në zgjedhjet e 14 majit. Kreu i KQZ, Ilirjan Celibashi garantoi nga Elbasani se pajisja siguron 100 % fshehtësi të votës, ndaj edhe ftoi qytetarët të mos hezitojnë të votojnë më 14 maj.
“Nga pikëpamja e sigurisë dhe garancisë së fshehtësisë së votës, kjo pajisje ka garanci 100%. I ftoj votuesit e këtyre 3 bashkive të marrin pjesë e të votojnë pa hezitim, pa qenë në dyshim se vota e tyre do të jetë e njohur ose e bërë publike. Pajisja dhe sistemi ofron të gjitha garancitë.
Nga ana tjetër pajisja është shumë e thjeshtë, për të gjitha kategoritë e votuesve. Lehtëson procesin e votimit, qytetarët në këto tre bashki do verifikojnë se procesi është shumë i thjeshtë.” tha Celibashi, ndërsa shtoi se pajisja elektronike, shmang fenomenin e votimit familjar.
“Pikërisht këtë fenomen e ndalon ky sistem, para makinës mund të paraqitet vetëm një votues, që do të ndihmohet nga një përfaqësues teknik.
Kemi sjellë në Elbasan në tre pika, në Kamëz 2 dhe në Vorë një, për të krijuar mundësi votuesve të familjarizohen. Ftoj partitë të nxisin qytetarët për të ardhur e për të testuar përdorimin e pajisjes.
Rezultatin paraprak mund ta shpallim brenda 30 minutave nga momenti që mbyllet votimi” vijoi Celibashi.
Sa i përket një sulmi të mundshëm kibernetik, Celibashi u shpreh se pajisjet janë 100% të sigurta.
“E rikonfirmoj sigurohet fshehtësia e votës 100%. Siguria është më e madhe me votimin me këtë pajisje se sa me fletën e votimit. Janë 100% të sigurta nga sulmet kibernetike, nuk janë të lidhura në rrjet me internet. Një raport printohet me printerin që është i lidhur me pajisjen dhe ka vulat përkatëse.
Përdorimi është shumë i thjeshtë, nuk kërkohet kualifikim i posaçëm. Sfidë mbetet rekrutimi I operatorëve.” u shpreh më tej Celibashi.