Brazili është shpallur fitues i Copa America pasi mundi në finale Perunë, me ndeshjen që u mbyll me rezultatin 3-1. Finalja e madhe u zhvillua në Rio De Janiero, në stadiumin ‘Maracana’, aty ku vendasit treguan edhe njëherë se janë zotër të futbollit në Amerikën Latine. Heroi i ndeshjes ishte Gabriel Jesus, ai që asistoi golin e parë dhe shënoi të dytin, që vlejti për fitoren e ndeshjes dhe të trofeut të Copa America. Megjithatë, sulmuesi nuk arriti të shijonte deri në fund suksesin gjatë ndeshjes, pasi në mesin e pjesës së dytë doli nga fusha e lojës me të kuq.
Brazili e ka mbyllur në avantazh me rezultatin 2-1 pjesën e parë në finalen e Copa America, ndaj Perusë. Skuadra e drejtuar nga trajneri Tite, e ka nisur mirë takimin, duke gjetur golin vetëm pas 15` lojë. Ka qenë një aksion i bukur i nisur në krahun e djathtë, me Gabirel Jesus që është afruar në kufjitë e zonës së rreptësisë me topin në këmbë.
Më pas sulmuesi ka gjetur hapësirë dhe ka gjuajtur në krahun tjetër të zonës, aty ku Everton i lënë pa mbulim nga mbrojtja peruane nuk e ka pasur aspak të vështirë të shënoi golin e avantazhit.
Pas golit skuadra e Tites arrin të jetë dominuese në fushën e lojës, ndërsa kundërshtari tregohet i kujdesshëm për të mos lejuar më gabime si në golin e parë. Me gjithë tentativat e herë pas hershme të Brazilit, gjuajtjet e pastra drejt portës ishin vetëm dy, çka bëri që dhe rezultati të mos ndryshonte.
Por, ishte Peruja ajo që rriti presionin në minutat e fundit të pjesës së parë, dhe pas një prekje të topit me dorë, arbitri akordon penallti pasi konsultohet me VAR. Roberto Guerrero nuk gabon nga pika e bardhë duke mposhtur Alison, dhe barazuar shifrat përkohësisht gjatë pjesës së parë.
Por, Gabriel Jesus arrin të shënojë golin e avantazhit vetëm disa sekonda para se arbitri të dërgonte lojtarët në dhomat e zhveshjes për pushimin e pjesës së parë.
Gjatë pjesë së dytë gjërat mund të përkeqësoheshin për Brazilin, pasi autori i golit të dytë dhe i asistit në të parin Gabriel Jesus u ndëshkua me kartonin e dytë të verdhë duke dalë nga fusha e lojës me të kuq. Megjithatë, trajneri Tite ndryshoi skemën pas këtij momenti duke larguar forcat në sulm dhe rritur përqëndrimin në mbrojtje dhe mesfushë. Kështu, Selecao i shkoi deri në fund takimit duket ruajtur të pandryshuar rezultatin, madje duke shënuar dhe golin e tretë me Richarlison në minutën e 88′. Për rrjedhojë shpallet fitues i këtij edicioni të Copa America, duke shkurorëzuar Chilin.
Ndërkohë, të shtunën Argjentina mundi Chilin për vendin e tretë në kompeticionin e këtij sezonit të Copa America, ku fitorja ndaj kampionëve në fuqi të këtij kompeticioni, u shoqërua me shumë tension, aq sa Lionel Messi mori kartonin e dytë të kuq të karrierës së tij si lojtar.
