Debati i shumëkërkuar dhe i paralajmëruar si fundi i botës nga opozita, kishte vetëm një shifër premtuese. Që do të zgjaste 24 orë. Kjo tregonte se e kishin një plan dhe mund të bënin diçka.
Në fakt, debati u konsumua tek fjalimi i Edi Ramës dhe pas tij, Berisha iku fare nga salla bashkë me të tijtë, dhe grupi tjetër vazhdoi diskutime rutinë. Kjo ishte ndoshta seanca më e kulturuar e Parlamentit të Shqipërisë nga 2013, prej kur Berisha është në opozitë.
Dhe kjo ngre disa pikëpyetje për pafuqinë e tij.
Pikëpyetja e pare, është se kur nuk ka fuqi të mbajë një debat 24 orë, pse e paralajmëron atë si furtunë dhe përfundon furtunë në gotë.
Një debat i paralajmëruar prej 24 orësh, nënkupton që ke argumente të bësh debat. Në fakt, aty nuk kishte argument as për të vazhduar diskutimet pas fjalës së Ramës.
Dhe praktikisht, Foltorja që bëri zhurmën e madhe, iku e para dhe e la debatin rrugëve.
Një tjetër arsye që e shkatërroi debatin ishte padyshim deklarata e Departamentit të Shtetit një natë më parë në Report TV, e cila e cilësonte Sali Berishën gënjeshtar dhe konfirmonte dizajnimin e tij “non grata”, për minim të demokracisë dhe korrupsion madhor. Kjo e shfrynte gjithë përpjekjen e Berishës për t’i “dalë zot” SHBA-së.
Por paralajmërimi aq i fortë për debatin dhe shfryrja e tij si një flluske sapuni, është një ogur i keq dhe për mitingun e nesërm, i cili është paralajmëruar po me aq dhunë dhe përmbysje.
Njësoj si debati i sotëm në sale, dhe protesta nesër në rrugë mund të ketë të njëjtin fat, pasi plani që debati të karikonte mitingun, dështoi.
Duket se Berishës nuk i mungojnë më vetëm protestuesit entuziastë, por dhe deputetët entuziastë.
Ai është kthyer në një institucion dëshpërues, që vetëm ç’mobilizon gjithkënd, protestues, mbështetës opozitarë, madje dhe deputetë opozitarë.
Kurrë në historinë e Shqipërisë nuk ka pas ndonjë politikan që ndjell kaq shumë dëshpërim sa ai tek të vetët. Sidomos në opozitë.