Ish kreu i grupit parlamentar të LSI, Petrit Vasili i ka dalë në mbrojtje presidentit Meta duke e cilësuar ngritjen e Komisionit Hetimor për shkarkimin tij si një vendim pa asnjë vlerë juridike dhe një “kalbësirë kriminale”. Vasili argumenton se Presidenti Meta nuk mund të shkarkohet për dekretet e tij, pasi të njëjtën gjë e kanë bërë më parë edhe presidenti Nishani dhe Moisiu, por që nuk përmend se Moisiu, ndryshe nga Meta, e kreu këtë veprim, vetëm pasi palët politike bënë ndryshimet përkatëse në Kodin Zgjedhor, ku Presidenti Moisiu të bazonte shtyrjen e zgjedhjeve, ndërsa Nishani e bëri lëvizjen pas paktit Rama-Basha.
“Komision hetimor është i vdekur është një kalbësirë kriminale sepse juridikisht është zero dhe moralisht është më pak se zero. Juridikisht zero sepse mblidhen të diskutojnë ndërkohë që janë në një paligjshmëri të plotë. Dekretet e Presidentit janë në përputhje të plotë me Kushtetutën e vendit. Si veprim juridik ishte dhe mbetet thjesht një precedent si gjithë të tjerët më parë. Një precedent që e ka aplikuar në mënyrë korrekte Presidentët Nishani dhe Moisiu në funksion të situatës. Pra s’ka asnjë ngjarje juridike, dhe juridikisht nuk ekziston asgjë.” – shkruan Vasili në Facebook.
Por, ndërsa Vasili e krahasoi dekretin e Metës me dekretin e Moisiut nuk përmendi faktin se Moisiu ndërmori një veprim të tillë, pasi palët politike ranë dakord që të ndërhyjnë në Kodin Zgjedhor për të bërë ndryshimet përkatëse që lejonin shtyrjen e zgjedhjeve. Vetëm pasi palët politike futën një nen të veçantë në Kodin Zgjedhor, Presidenti Moisiu nxori një dekret të ri për zgjedhjet, ndërsa Meta e bëri këtë veprim komplet në mënyrë të njëanshme, që sipas tij, kishte marrë sinjale nga shërbimet e huaja për trazira dhe donte të mirën e vendit.
Edhe për rastin e shtyrjes së zgjedhjeve nga Presidentit Nishani, Vasili sërish keqinformoi, duke mos përmendur se edhe në vitin 2017, pati një pakt Rama-Basha që u bë shtyrja e zgjedhjeve, ndërsa Ilir Meta i shtyu zgjedhjet pa asnjë pakt dhe pa asnjë garanci nga asnjëra palë. Madje, vetë PD ka deklaruar se as 13 tetorin nuk e njeh si datë zgjedhjesh, pavarësisht dekretit për anulimin e paprecedentë të 30 qershorit.
Sipas Vasilit, Rama kërkon të hetojë vetëm rastet që nuk i interesojnë atij dhe shpik komisione në paligjshmëri të plotë. Madje Vasili shtoi se Komisioni Hetimor nuk ka çfarë faktesh apo provash juridike të hetojë “Komisioni Hetimor është zero. Materia juridike me dispozicion te tij është më pak se zero, sepse çdo te bëjnë do të hetojnë të gjitha precedentët e shtyrjes së zgjedhjeve? Apo shtyrjet e zgjedhjeve që i interesojnë Edi Ramës janë të ligjshme ndërsa te tjerat jo!?”
Vasili ka folur edhe për anën “morale të komisionit hetimor’ duke i cilësuar anëtarët e saj si banditë që janë bërë njësh me krimin dhe janë aty falë vjedhjes së votave. “Ata, që drejtojnë këtë komision janë nën akuzë se kanë vjedhur vota, duke u bërë njësh me krimin, kanë manipuluar pushtetin për vota, u kanë bërë kërcënime njerëzve dhe falë Bild-it dhe Zëri të Amerikës u njoh botërisht dhe hapur krimi zgjedhor i tyre dhe çdo shqiptar i dëgjoi me veshët e tij se çfarë janë këta. A kanë moral të flasin për paligjshmëri këta banditë?” – shkruan Vasili.
