Ambasada Amerikane në Tiranë ka reaguar në lidhje me raportimin në disa media për një shqetësim të shprehur nga DASH për ndikimin kinez në rrjetin 5G, duke thënë se e vërteta është se SHBA mbështet qasjen e Shqipërisë në këtë rrjet dhe se hapat e ndërmarra nga qeveria shqiptare janë të matura dhe të përgjegjshme. Ambasada gjithashtu e cilëson gazetari të dobët lidhjen e këshillave të DASH, me lancimin e 5G në Shqipëri.
“Faktet kanë rëndësi. “Gazetaria” shkel e shko dhe çorientuese, që synon të shtrembërojë politikën e Shteteve të Bashkuara të Amerikës për rrjetin 5G, nuk e ndryshon të vërtetën. Faktet janë këto: Shtetet e Bashkuara e mbështesin qasjen e matur dhe të përgjegjshme të Shqipërisë për rrjetin 5G. E Ngarkuara me Punë, a.i. Leyla Moses-Ones e tha këtë javën e kaluar në Konferencën “Politika e Sh.B.A. në Ballkanin Perëndimor”, thekson ambasada.
Më tej citon dhe një deklaratë të ngarkuarës me punë Leyla Moses-Ones, e cila në konferencën e Politikës së SHBA në Ballkanin Perëndimor, ka thënë se Shqipëria tashmë po bën gjënë e duhur duke ushtruar vigjilencë në mbrojtje të rrjeteve të saj.
“Dhe, përsa i përket vendndodhjes gjeostrategjike, ju e dini se revolucioni 5G po vjen: ndërlidhja e rrjeteve 4G të Shqipërisë së shpejti do të përmirësohet; ndërlidhja e vendit të saj gjeostrategjik në hartë është e rëndësishme sepse ka vende si Kina që do të dëshironin të kapnin mënyrën e jetesës dixhitale të Ballkanit Perëndimor për të thithur informacione prej tyre dhe asfiksuar rrjetet e aleatëve të Sh.B.A-së. Shqipëria tashmë po bën gjënë e duhur duke ushtruar vigjilencë në mbrotje të rrjeteve të saj. Edhe një herë, disa gjëra në Shqipëri thjesht nuk janë për shitje”, ka thënë Leyla Moses-Ones në Konferencën Politikës së ShBA në Ballkanin Perëndimor.
Por pse u ngatërruan mediat në Shqipëri në lidhje me qëndrimin e SHBA për rrjetin 5G?
SHBA shpërndau një material informues që nuk kishte lidhje me Shqipërinë, por ishte një fushatë kundër teknologjisë kineze ne fushën e telekomunikacionit, veçanërisht kundër kompanisë kineze Huawei. Rastisi që ky material u shpërnda në të njejtën kohë kur një operator privat në Shqipëri lançoi rrjetin 5G. Rrjetin 5G nuk e ka në dorë qeveria, por kompania që ka blerë frekuencat, e cila nuk përdor Huawei. Pra në Shqipëri nuk ka asnjë shkelje.