Akuzat e PD për 64 milionë euro humbje, OSHEE: Ka qenë vit i vështirë, kryem investime

Partia Demokratike tha të premten se Operatori i Shpërndarjes së Energjisë Elektrike është duke u zhytur në një gropë të madhe abuzimesh dhe korrupsioni. Me anë të një deklarate për mediat, zyrtarit i PD-së, Ervin Minarolli tha se OSHEE ka dalë me 64 milionë euro humbje për vitin që lam pas. “Operatori i Shpërndarjes së Energjisë Elektrike ka humbur 64 milionë euro vitin që shkoi, duke e zhytur kompaninë publike në një gropë të madhe abuzimesh dhe korrupsioni. Humbja dramatike e kaq shumë parave ndodh, kur shqiptarët paguajnë çmimin më të lartë të energjisë në rajon. 64 milionë eurot që i mungojnë arkës së Operatorit të Energjisë Elektrike janë para të futura në xhepat e Edi Ramës dhe njerëzve të tij, duke blerë energji me çmim më të lartë se tregu, apo duke përdorur paratë poblike për të mbushur xhepat e klientëve të vet, në dëm të financave të kompanisë”, tha Minarolli.

Megjithatë, lidhur me këtë deklaratë reagoi OSHEE, e cila pohon humbjet, por arsyeton se viti që sapo lam pas ishte shumë i vështirë. Sipas OSHEE, pritet që të ketë një bilanc negativ me 7.4 miliard lekë, por kjo ka ardhur, sipas OSHEE për disa arsye. “Operatori i Shpërndarjes së Energjisë Elektrike ka përmbyllur të dhënat e treguesve kryesore ekonomiko/financiar për vitin 2019, i cili konsiderohet si më i vështiri, për shkak të thatësirës së tejzgjatur që çoi në mungesën e prodhimit nga HEC-et e Kaskadës së Drinit dhe ato private. Kostoja e pashmangshme e mbulimit me energji importi të prodhimit të munguar ashtu sikurse ekzekutimi i detyrimeve në zbatim të vendimeve të gjykatave kanë sjellë përkeqësimin e rezultatit vjetor financiar të kompanisë por nuk kanë cënuar objektivat e vendosura në raport me reduktimin e humbjeve, rritjen e arkëtimeve dhe kontributin në Buxhetin e Shtetit përmes tatim/taksave.

Humbjet në rrjetin e shpërndarjes në vitin 2019 zbritën në 21.7% (kur objektivi i BB është 23%) ndërsa një vit më parë ato ishin 23.9%. Arkëtimet pritet të arrijnë 97% të vlerës së faturuar çka përbën rritje me 2% prej parashikimit në Buxhet dhe në Planin e Rimëkëmbjes së sektorit elektroenergjetik. Të ardhurat nga shitja e energjisë për vitin 2019 rezultojnë me një rritje prej 2% ose në vlerë rreth 1.3 miliard lek krahasuar me të njëjtën periudhë të një viti më parë. Gjatë këtij viti, Operatori i Shpërndarjes së Energjisë Elektrike ka paguar 8.1 miliard Lek Buxhetit të Shtetit përmes tatim/taksave. Brenda kësaj shume është edhe tatim-fitimi për vitet e mëparshme në vlerën 3.3 miliard lek. OSHEE ka likujduar në këtë vit 100% të faturave korente ndaj Korporatës Elektroenergjetike, Operatorit të Sistemit të Transmetimit dhe Postës Shqiptare. Gjithashtu, është likujduar shuma prej 1.2 miliard Lek si pagesë për detyrimet e vjetra të trashëguara ndaj Korporatës Elektroenergjetike Shqiptare.

Në sajë të disiplinës financiare, OSHEE ka mundësuar edhe kryerjen e investimeve të domosdoshme për të garantuar sigurinë dhe qëndrueshmërinë e rrjetit të shpërndarjes. Përtej arritjes së këtyre objektivave, Operatori i Shpërndarjes së Energjisë Elektrike pritet të dalë për vitin 2019 me një rezultat financiar negativ prej 7.4 miliard lekësh. Kjo shifër reflekton pashmangshmërisht angazhimin e Operatorit të Shpërndarjes për: a) garantimin e furnizimit të vazhdueshëm me energji të konsumatorëve pavarësisht thatësirës; b) menaxhimin e situatës financiare pa rënduar mbi Buxhetin e Shtetit; c) mbajtjen e pandryshuar të tarifave të energjisë elektrike për konsumatorët final”, thotë ndër të tjera OSHEE.

OSHEE-deklarata OSHEE

Meta sulmon “Venecian”. Letër me akuza Presidentit Buquicchio

Ilir Meta publikoi të premten në mesditë letrën drejtuar Prsidentit të Komisionit të Venecias Gianni Buquicchio, ku mban qëndrimin e tij në lidhje me rezultatet paraprake të Draft-Opinionit të kërkuar nga Kuvendi në lidhje me hetimet ndaj Presidentit për shkeljen e Kushtetutës. Meta, duke shprehur pakënaqësi me raportin e Komisionit të Venecias, pasi e quan “kontradiktor”, shprehet se “paraqitja e fakteve dhe rrethanave është e paplotë”.

“Projekt-opinioni është shpeshherë kontradiktor, me vlerësime diametralisht të kundërta për të njëjtën çështje. Krijohet përshtypja se ekspertët e Komisionit të Venecias janë udhëhequr apriori nga disa ide fikse duke bërë që faktet dhe analiza të mos kenë përputhje racionale me konkluzionet e projekt-opinionit; Paraqitja e fakteve dhe rrethanave në projekt-opinion është e pabalancuar dhe e paplotë”, shkruan Meta.

Më tej, Meta i tregon kreut të këtij Komisioni, se si duhet të vepronin ekspertët e “Venecias”. Sipas Ilir Metës, ata duhet të ndërtonin një “opinion teorik” duke iu referuar vetëm bazës ligjore, ose një “opinion në themel”, duke u futur plotësisht në brendësi të çështjes. Ndaj, Presidenti arrin në konkluzionin, se “shmangia e një procesi të plotë”, sjell “vlerësim të gabuar”. “Shmangia dhe pamundësia e një procesi të plotë faktmbledhës që dëshmojnë përmasën e thellë dhe të gjerë të krizës politike në Shqipëri sjell vlerësim të gabuar edhe të situatës juridike”, shkruan Meta.

Më tej, Meta rëndon akuzat ndaj Komisionit të Venecias, duke përdorur të njëjtën shprehje që “Venecia” përdori për Metën, “tejkalim kompetencash”. “Projekt-opinioni nxjerr disa konkluzione që tejkalojnë mandatin e Komisionit të Venecias si organ këshillimor, dhe për të cilat nuk është pyetur nga Kuvendi i Shqipërisë. Vlerësimi i shkallës së rrezikut në Shqipëri duke u kufizuar në ballafaqimin e cunguar të deklaratave të autoriteteve publike është joprofesional dhe janë jashtë objektit të punës së ekspertëve të Komisionit të Venecias. Gjithashtu ekspertët në disa raste kanë tejkaluar kompetencat e tyre këshillimore, duke i veshur vetes atributet e gjykatësit”, shkruan Meta.

Sipas Ilir Metës, Komisioni i Venecias ndërhyri në kompetencat e OSBE/ODIHR për zgjedhjet, duke cituar pjesë nga raporti i tyre. Meta ngre shumë pyetje drejtuar Komisionit të Venecias në lidhje me vendimmarrjen për përgatitjen e draft-opinionit të kërkuar nga Kuvendi. Presidenti fajëson direkt Komisionin e Venecias, se “ky draft-opinion rindezi polarizimin politik në vend, kur palët rivendosën urë dialogu”.

Pra, sipas Presidentit, publikimi i draft-opinionit të Venecias, largoi palët nga dialogu dhe i riktheu ato në pozicione fillestare. Pak ditë më parë, Komisioni i Venecias publikoi gjetjet paraprake të draft-opinionit, duke u shprehur se “Ilir Meta tejkaloi kompetencat kushtetuese” për anulimin e zgjedhjeve të 30 qershorit.

Një tjetër gjetje, ishte ajo se “nuk kishte asnjë problem mbajtja e zgjedhjeve pa partitë e opoziës”, duke legjitimuar në një mënyrë 30 qershorin. Gjithashtu, Venecia u shpreh se “ndonëse janë tejkaluar kompetecant e kushtetuese nga Ilir Meta, është Kuvendi që vendos për të shkarkimin e tij së bashku me Gjykatën Kushtetutese”. /Realstory.al/

Letra-e-Metes-per-Komisionin-e-Venecias Letra e Metës:

Pas akuzave për tenderin, Lleshaj çon PD në gjykatë

Ministri i Brendshëm Sandër Lleshaj njoftoi se do të padisë në gjykatë Partinë Demokratike për akuzat e bëra për korrupsion në tenderin për uniformat e reja të Policisë së Shtetit. Përveçse i përgënjeshtroi akuzat e PD-së, Lleshaj nuk është mjaftuar me kaq, por shkruan se do ta çojë në Gjykatë PD-në për këtë çështje, ndërsa shumën financiare që do të rezultojë si zhdëmtim pas procesit gjyqësor, do ta çojë në favor të familjeve të policëve të rënë në detyrë.

Sipas Lleshajt “drejtuesit e PD-së vuajnë një krizë të thellë. Ata besojnë sinqerisht se kushdo që ka një pushtet vjedh, pasi ata vetë kanë vjedhur sa herë kanë patur një mundësi për ta bërë këtë.”

“Duke hedhur poshtë me neveri gënjeshtrat e turpshme që mbajnë logon e PD-së, më mbetet t’ju them autorëve të tyre: Sandër Lleshaj nuk i përket farës tuaj. Sandër Lleshaj ka dhe do të ketë vetëm një pasuri në jetën e tij: Nderin e tij, të familjes, të të parëve të tij dhe të Atdheut të tij. Sado të ëndërroni, Sandër Lleshajn nuk do ta keni kurrë të ngjashëm me ju, as në vjedhje, as në vrasje dhe as në turpe të tjera.” shkroi ministri në Facebook.

Lleshaj i shikon akuzat si një përpjekje djallëzore për të ndërhyrë dhe ndikuar në një procedure publike dhe të hapur ndërkombëtare.

“PD do të duhet të mbrojë përpara një gjykate poshtërsitë me të cilat ka ndotur opinionin publik. Çdo shumë financiare, që do të rezultojë si zhdëmtim pas procesit gjyqësor, do të shkojë në favor të familjeve të policëve të rënë në detyrë”, shkroi ministri.

Ditën enjte ish deputetja e PD-së, Lealba Pelinku ndërsa denoncoi si aferë korruptive këtë procedurë të Ministrisë së Brendshme tha se PD “do ta ndjekë me vëmendje këtë tender dhe do të denoncojë çdo akt korruptiv që fut duart e Ministrit të Brendshëm apo të kujtdo tjetër në 30 milionë euro para publike”.

AKUZAT E PD PËR TENDERIN E UNIFORMAVE, REAGON MINISTRIA: NUK NJOHIN LIGJIN

4-vjeçari mbytet në lum, prokuroria akuzon prindërit. Nëna: Ai ishte hiperaktiv

Një ngjarje e rëndë ndodhi dy muaj më parë në Zvicër, ku një fëmijë 4-vjeçar shqiptar u mbyt në lum dhe tani prindërit e tij përveç dhimbjes për humbjen e fëmijës po përballen me akuzat e ngritura nga prokuroria për pakujdesi.

Prokuroria në Aargau ka hapur një padi ndaj prindërve të viktimës, për vrasje nga pakujdesia.

42-vjeçarja Burbuqe M. në një intervistë për mediat, duke bërtitur thotë: “Unë isha një nënë e mirë dhe gjithmonë aty për djalin tim. Nuk jam fajtore. Në atë fatkeqësi, Zeneli luante me fëmijët e tjerë në këndin e lojërave, por papritmas djali është zhdukur. E vura re menjëherë dhe gjeta biçikletën e tij. Por kam kërkuar kudo dhe kot”, tha nëna.

“Ai ishte thjesht hiperaktiv”, thotë ajo. Prokuroria tani mendon se Burbuqja ka shkelur detyrën e saj si nënë për të mbikëqyrur dalin e mitur. Prandaj ka ngritur akuzën për vrasje nga pakujdesia. Zeneli ra në një kanal, ku edhe u mbyt, ngjarje për të cilën kanë shkruar më herët mediat zvicerane.

Ristani i bën dalje Bashës: “S’jam marrë me paratë e PD. Nuk di asgjë”. (Dhe thotë të vërtetën)

Ish sekretari i Përgjithshëm i PD-së, Arben Ristani është njohur me akuzën e Prokurorisë ndërsa për mediat tha se ai s’ka asnjë lidhje me hetimet për lobimin me paratë ruse të PD-së në SHBA.

Pasi doli nga prokuroria Ristani tha për mediat se ai nuk ka pasur asnjë dijeni për financimin e PD-së dhe se nuk ka asnjë dokument apo bisedë që e lidh atë me këtë hetim.

“Nuk ka asnjë dokumentacion që unë të kem lidhje me pagesa. Unë nuk jam marrë kurrë me paratë e PD-së. Nuk kam pasur as kuriozitet që të dij për këtë gjë dhe nuk kam pasur asnjë dijeni. Akuza është e nxitur dhe e organizuar politikisht.

Unë dhashë deklaratën time dhe përsëris unë nuk kam asnjë lidhje me këtë histori. S’ka prova. S’ka asnjë dokument. Fakti që u paraqita është teknikalitet”, tha Ristani ndërsa bëri me dije se ishte njohur me akuzën ndaj tij.

Prokuroria akuzon Ristanin, Bashën dhe financierin Ilir Dervishi se kanë kryer veprën penale për pastrim parash dhe falsifikim dokumentesh.

Vendimi i prokurorisë së kryeqytetit vjen pas letër-porosisë nga SHBA. Lulzim Basha akuzohet se ka fshehur financimin prej 650 mijë dollarëve në SHBA për fushatën e elektorale të vitit 2017.

Për këtë arsye, prokuroria ka nisur procedimin për veprat penale të parashikuara nga nenet 190 dhe 187 të Kodit Penal, konkretisht “Falsifikim i vulave, i stampave ose i formularëve” dhe “Pastrimi i produkteve të veprës penale ose veprimtarisë kriminale”.

Prokuroria deklaronte se njëra nga këto pagesa rezulton të jetë bërë nga “Biniatta Trade”, që rezulton një kompani fantazmë, e regjistruar në Edinburg të Skocisë dhe është në pronësi të rusëve dhe pjesë e një zinxhiri kompanish të regjistruara në Belize, një shtet i Amerikës Qendrore i njohur si “parajsë fiskale”.

Kryedemokrati Lulzim Basha refuzoi të hënën që të paraqitej në prokurorinë e Tiranës duke e cilësuar fletë thirrjen në kundërshtim me ligjin. Prokuroria i ka dhënë afat deri në datën 20 qershor për t’u paraqitur, ndryshe do të përdorë forcë. Fillimisht u duk sikur Ristani do të ndiqte shembullin e Bashës. Por njeriu që i dha atij bashkinë e Tiranës në tavolinë në 2011, dhe Basha ia “shpërbleu” duke e lënë jashtë Kuvendit duket ka dashur të japë një mesazh: që ai vërtet nuk di asgjë për këtë cështje. Ai që di, është vetëm Lulzim Basha. Jo vetëm se ka vënë firmën në letrën që sot e përball me drejtësinë.

Letra e tretë, Rama-Bashës: Shihemi në gjykatë për akuzat, por tani dialog

Edhe pas refuzimit të prerë të Bashës dje, Rama e ka nisur ditën sot me një tjetër letër publike drejtuar kreut të PD-së. Kjo është letra e tretë e Ramës, përmes të cilës sërish e fton Bashën të ulen dhe të dialogojnë për të gjetur një zgjidhje. Lidhur me të gjitha akuzat drejtuar tij, Rama duke i cilësuar shpifje e gënjeshtra, i shkruan Bashës se e fton të paraqesë prova në gjykatë për çdo akuzë.

“Do t’Ju ftoj në gjykatë për të sjellë qoftë edhe një provë të vetme për maskarallëqet që keni artikuluar në mesazhin Tuaj të djeshëm; që nga 30 milionë eurot që paskam dashur të vjedh e të pastroj në Amerikë me një kompani fallco(!) e me radhë të tëra”, shkruan Rama.

Kryeministri sqaron dhe situatën e krijuar në drejtësi duke thënë se vendi është pa gjykata për shkak se vettingu preu fijet që lidhnin gjykatësit me krimin dhe korrupsionin.

“Sot Shqipëria është e vërtetë po, nuk e ka funksionale Gjykatën Kushtetuese, por jo sepse unë nuk dua që ta ketë, po sepse trupa e Gjykatës Kushtetuese është fshirë në pjesën dërrmuese të saj nga Vetingu dhe është në procesin historik të rindërtimit pas rrënimit korruptiv, ashtu si i gjithë sistemi i drejtësisë”, shkruan Rama, teksa i bën thirrje Bashës të mos ketë frikë nga reforma në drejtësi.

Ai gjithashtu mbetet i prerë dhe thotë se nuk do të japë dorëheqjen dhe se zgjedhjet do të zhvillohen në 30 qershor.

LETER E TRETE PUBLIKE E EDI RAMËS DREJTUAR LULZIM BASHES

Zoti Kryetar,

kjo letër e tretë po shkruhet pas leximit të mesazhit Tuaj drejtuar dje qytetarëve, si përgjigje me spond ndaj letrave të mia në adresën Tuaj për t’u ulur në Tryezën e Dialogut.

E para gjë që mendova duke lexuar atë përmbledhje akuzash Tuajat ndaj meje, ishte si ka mundësi vallë udhëheqësi i një grupimi politik që pretendon të qeverisë vendin, të mund të hedhë kaq rrjedhshëm në letër një lumë të tërë gjysëm të vërtetash (gjysëm të vërtetat janë edhe gënjeshtrat më të mëdha dihet!), sajesash, vulgaritetesh e veshëgjatësirash të hatashme(?)! Por unë fatmirësisht s’kam gisht në zgjedhjen Tuaj dhe prandaj edhe s’kam se si ta përjetoj keq personalisht, faktin se Ju jeni ky që jeni. Kështu që pa problem, asgjë personale!

Ama sigurisht, përjetoj me dhimbje faktin se tërë lumi i llumit në fjalë, është derdhur e vijon të derdhet në gjuhë të huaja, duke Ju bërë Juve të dytin udhëheqës në Europë pas udhëheqësit Tuaj, që i bën një të padëgjuar batërdi verbale vendit të vet – jo thjesht kundërshtarit të tij. Por është ende më i habitshëm fakti, se edhe pse megjithë këtë gjuhështhurrje ekstreme, Ju as i keni fituar, as do t’i fitoni dot deri kur të largoheni nga detyra votat e shumicës së shqiptarëve, ashtu sikundër as keni bindur e as bindni dot, asnjë mik e partner ndërkombëtar të Shqipërisë, Ju vazhdoni i bini fyellit po njësoj. Madje jo, i bini fort e më fort!

Sidoqoftë, për hir të njerëzve që me plot të drejtë presin nga udhëheqësit e çdo pale Dialog Politik, unë po e konsideroj mesazhin Tuaj një mundësi për të nxitur Dialogun. Aq më mirë që njerëzit mund të na lexojnë të dyve.

Ju e nisni mesazhin me “asgjësimin” e Gjykatës Kushtetuese dhe më atribuoni mua, “shpalljen hapur” të mendimit se “shqiptarët janë më mirë pa gjykata”! E pavërtetë!

Ndërsa e vërteta është se shqiptarët ishin de facto pa gjykata, për më shumë se dy dekada kur drejtësia, mu ashtu siç e donte udhëheqësi Juaj e jo vetëm ai, ishte një mall që i falej më të fortit dhe blihej nga më i pasuri. Ju keni edhe eksperiencë personale lidhur me këtë fakt dhe jeni një ilustrim kuptimplotë i tij!

Sot Shqipëria është e vërtetë po, nuk e ka funksionale Gjykatën Kushtetuese, por jo sepse unë nuk dua që ta ketë, po sepse trupa e Gjykatës Kushtetuese është fshirë në pjesën dërrmuese të saj nga Vetingu dhe është në procesin historik të rindërtimit pas rrënimit korruptiv, ashtu si i gjithë sistemi i drejtësisë. Problemi Juaj nuk është thjesht se nuk dini ç’do të thotë të rindërtosh pas rrënimit, çka sigurisht Ju nuk e dini për fat të keq. Problemi Juaj nuk është as se nuk doni ta kuptoni, që të rindërtosh nuk është një fjalë goje po një përpjekje e mundimshme, e cila kërkon durim e kohë. Çka fatkeqësisht nuk doni ta kuptoni, e qartë edhe kjo. Por jo, problemi Juaj është më i madh se mosdija dhe përtacia mendore.

Ju jeni i trembur!

Keni frikë nga zbatimi i Reformës në Drejtësi dhe përfaqësoni një grupim që udhëhiqet nga frika e kësaj reforme qysh ditën e parë të nisjes së saj. Por unë s’Ju ndihmoj dot në këtë pikë! Puna Juaj pse e keni tërë këtë lebeti në atë barkun e kasolles Suaj politike, kështu që kaq për Gjykatën Kushtetuese.

Vazhdojmë.

Edhe pse Ju jeni natyrisht në dijeni të disa gjyqeve që unë kam nisur me Ju (për shpifje sigurisht), në mesazhin Tuaj të djeshëm, keni grumbulluar shumë syresh. Prandaj, për hir të këtij komunikimi të hapur mes nesh, po Ju bëj me dije se do t’Ju ftoj në gjykatë për të sjellë qoftë edhe një provë të vetme për maskarallëqet që keni artikuluar në mesazhin Tuaj të djeshëm; që nga 30 milionë eurot që paskam dashur të vjedh e të pastroj në Amerikë me një kompani fallco(!) e me radhë të tëra, tek im vëlla që qenka zbuluar i lidhur me një grup kriminal trafikantësh droge(!), e deri tek negociatat e mia për kufijtë e Shqipërisë(!)dhe madje edhe të Kosovës!

Puna është se tërë këto shpifje e plot të tjera akoma, të cilat janë gatuar në kazanin Tuaj të stërmadh, janë derdhur nëpër kazanët e neveritshëm të mexhelisit tonë mediatik, janë përhapur si mbetje toksike sado e kudo ku keni mundur, në Shqipëri, në Kosovë dhe nëpër botë, Ju i quani “zbulime”!

Zbulime!

Pra na qenkeshin zbuluar dhe jo gatuar, paketuar e promovuar prej Jush e atyre që Ju rrethojnë dhe shërbejnë qorrazi, tërë këto të zeza për të cilat unë, sipas Jush, duhet të kisha dhënë të paktën 20 herë dorëheqjen me hir, kurse tani u dashka ta jap me pahir! Sepse përndryshe, Ju dhe populli imagjinar që Ju paska zgjedhur për shpëtimtar, nuk do të lejoni zhvillimin e zgjedhjeve në 30 qershor apo jo?

Hajde logjikë hajde!

S’ka më keq për një udhëheqës se sa të mos dijë të lexojë humbjen dhe s’ka më zi për një udhëheqës sesa të humbë logjikën. Unë patjetër kam bërë gabimet e mia në kryerjen e misionit tim. Po ama asnjëherë s’i kam tradhëtuar ata që ma kanë ngarkuar këtë mision dhe lidhje në botë s’kam me maskarallëqet që Ju më keni mveshur e keni mbushur botën! E që të jemi shumë, po shumë të qartë, askënd përveç atyre që më kanë votuar dhe familjes time (e cila paguan përditë koston e lartë shpirtërore të baltës së pafundme të mizerabilitetit politik e mediatik që derdhet ndaj meje e familjarëve të mi), s’e marr dot seriozisht kur më kërkon dorëheqjen. Ndërsa kur ma kërkoni dorëheqjen Ju dhe populli imagjinar i punonjësve të bashkive që do dorëzoni si Çeçua në 30 qershor, bashkë me ujësjellësat e falimentuar, që furnizojnë më shumë militantë në protestat Tuaja se sa ujë në çezmat e njerëzve, mua vetëm më shumëfishohen fuqitë për të vazhduar luftën me plagët e panumërta të trashëgimisë Suaj qeverisëse.

Kështu që i dashur Lulzim, shkeputu nga krahët e mllefit që ta ka çuar për pambuk logjikën, çlirohu nga paniku i humbjes që të rri shkruar mbi ballë, mbaje për vete e për Plakun tënd Digjital frikën nga Reforma në Drejtësi dhe bëj atë që bën çdo udhëheqës në këtë situatë të padëshiruar: Ulu në Tryezën e Dialogut!

(Ndjesë për momentin e adresimit me “ti”, po sinqerisht mjaft me këtë karshillëk me zarar që po i bëni vendit, shumicës dërrmuese të shqiptarëve dhe miqve e partnerëve të Shqipërisë, në një kohë kur Shqipërisë i duhen kundërshtarë politikë që dinë të arsyetojnë, jo kalamaj në formë burrash që luajnë luftash në dëm të saj – ndjesë edhe kalamajve për ofendimin e paqëllimtë!).

Duke Ju ftuar përsëri në Tryezën e Dialogut, Ju lutem të mos harroni ndërkohë se po nuk u kthyet në realitet, përtej dëmit që mund t’i bëni vendit dhe atyre pak individëve kokënxehtë, të cilët mbase për të keqen e tyre mund të shkojnë deri në fund pas berihajit ku po i udhëhiqni, Ju s’keni asnjë shans të pengoni 30 qershorin të vijë për ata që duan të votojnë. Asnjë shans të ndryshoni qeverinë pa zgjedhje. Asnjë shans të më ndaloni mua dhe Partinë Socialiste të Shqipërisë të kryejmë misionin historik të transformimit europian të Shqipërisë.

Akoma në pritje,

Edi Rama

24 maj, 2019

Amerikanët, 17 akuza të reja për Assange

Pas arrestimit në ambasadën e Ekuadorit në Londër, drejtësia amerikane ka shtuar listën e akuzave kundër themeluesit të WikiLeaks Julian Assange. Bëhet fjalë për 17 akuza të reja kundër tij. Assange akuzohet nga amerikanët për spiunazh dhe botime të materialeve të klasifikuara. Zyrtarë të lartë amerikanë thonë se themeluesi i WikiLeaks publikoi në mënyrë të paligjshme emra burimesh të klasifikuara dhe bashkëpunoi me ish zyrtarin e ushtrisë amerikane për të krijuar akses në informacione që nuk duhej kurrsesi të binin në duart e tij.

Shumë prej këtyre akuzave parashikojnë dënime me 10 vjet, ndaj parashikohet që Assange mund të qëndrojë me dekada në burg.

Mediat ndërkombëtare shkruajnë se 47 vjeçari, aktualisht po vuan dënimin me burg në Angli për shkak të shkeljes së kushteve të lirimit të tij me kusht dhe po përballet me ekstradimin.

Julian Assange u arrestua një muaj më parë dhe u nxorr me forcë nga Ambasada Ekuadoriane në Londër, ku strehohej që nga viti 2012.

Klevis Balliu me dy gishta para gjykatës, pret vendimin për 6 akuza

Është shfaqur i qeshur dhe me dy gishta para gjykatës, ish deputeti i Partisë Demokratike, Klevis Balliu, i arrestuar dy ditë më parë për dhunë ndaj policisë.

Balliu ka dalë sot para gjykatës dhe pret vendimin e saj për 6 akuzat që rëndojnë mbi të. Ish deputeti akuzohet për Goditje për shkak të detyrës, kundërshtim me dhunë i policisë,organizim dhe pjesëmarrje në tubime të paligjshme, pengim i qarkullimit të mjeteve, shkatërim prone, prishje e qetësisë publike.

Në seancë e sotme ishin të pranishëm ish-deputetë të djathtë, si Edmond Spaho, Genc Pollo, Albana Vokshi, Ervin Salianji, dhe sekretari i Përgjithshëm i PD-së, Gazmend Bardhi.

Balliu tha para gjyqtares Rexhina Merlika se është 30 vjeç, tregoi adresën e banimit, u shpreh se ka arsim të lartë, është beqar dhe i padënuar më parë. Ndërsa mbrohet nga dy avokatë, njëri prej tyre Genc Gjokutaj.

Vendimi për Balliun do të jepet në një seancë me dyer të mbyllura.

Ish-Presidenti Rumun Iliesku akzuohet për krime kundër njerzimit

Ish-Presidenti Rumun Ion Iliesku është akuzuar për krime kundër njerzimit, bazuar në rolin e tij në revolucionin që rrezoi regjimin komunist në viitin 1989.

Edhe pse 89 vjeçar, dy here ish-Presidenti i Rumanise u njoh me akuzat ndaj tij ditën e Hënë.

862 civile mbetën të vrare gjatë revolucionit të vitit 1989 i cili rrëzoi regjimin komunist të Nicolae Çausheskut. Prokurorët thanë se Iliesku ëhstë përgjegjës për fushatën e dezinformimit e cila krijoi një klimë terrori për vendin dhe qytetarët. Ata e akuzojnë atë edhe për organzimin e gjyqit kriminal jo të vertëte që pasi ekzekutivimin e Çausheskut dhe bashkëshortes së tij Elena.

Gazetarët rumunë të komentuan këtë zhvillim. Ata u shprehën se periudha pas revolucionit në Rumani ishte shumë kaotike dhe se Iliesku ka manipuluar me qëllim situatën duke krijuar pasiguri në vend për qëllimet e tij politike.