Dy muaj pas tërmetit, Basha: Thumana, krim shtetëror

Pak orë pasi qeveria prezantoi platformën onlinë për të aplikuar për rindërtimin, erdhi dhe reagimi i kryedemokratit Lulzim Basha. Duke kujtuar ngjarjen tragjike të dy muajve më parë, Basha akuzon qeverinë se dështoi për menaxhimin e situatës. Sipas Bashës, qeveria ende nuk ka faturën e dëmeve gati, nuk ka një vlerësim përfundimtar për objektet e pabanueshme dhe të dëmtuara. Gjithashtu ai akuzon se shumë familje janë ende nëpër çadra duke kaluar ditët e ftohta të dirmit.

“Dy muaj pas tërmetit tragjik të 26 nëntorit, ndërsa përkujtojmë me dhimbje 51 jetët e humbura, të gjithë jemi dëshmitarë sesi shteti i babëzisë dhe korrupsionit ka dështuar në çdo detyrë. Sot nuk ka ende një faturë reale dëmesh të vlerësuara. Sot nuk ka ende një vlerësim përfundimtar të objekteve të pabanueshme dhe të dëmtuara. Sot ka ende mijëra familje që kalojnë ditët e ftohta nëpër çadra, pa asnjë ndihmë nga shteti.

Sot qytetarët vazhdojnë të sorollaten nga njëra zyrë në tjetrën për të marrë bonusin e qerasë. Sot ka mijëra qytetarë të cilët nuk kanë ku të fusin kokën dhe nga dëshpërimi, janë futur në banesat e dëmtuara duke rrezikuar kështu jetën e tyre dhe të fëmijëve. Sot fëmijë e të moshuar janë në gjendje të rënduar shëndetësore për shkak të kushteve të vështira në të cilat po mbijetojnë që prej dëmtimit të shtëpive. Ende banorët pyesin se çfarë do të bëhet me shtëpitë e tyre, por nuk marrin përgjigje.

Ende sot nuk ka asnjë masë për të ndihmuar në ringritjen e biznesit në Durrës e në zona të tjera të dëmtuara nga tërmeti. Shumë biznese po mbyllen e qindra qytetarë po mbeten pa punë. Rënia ekonomike e Durrësit sjell rënie ekonomike të të gjithë vendit. Sot është e qartë për qytetarët se kjo qeveri dhe ky kryeministër i dështuar prodhon vetëm gënjeshtra dhe korrupsion, gjë të cilën e vërtetoi edhe raporti i Transparency International”, shkruan Basha.

Më tej, Basha rikthehet te retorika e “oligarkëve”, duke u shprehur se “150 milion dollarë që u jepen 10 oligarkëve, t`u akordohen qytetarëve”. Ndërsa akuzat nuk i kursen as për prokurorinë, që sipas tij, për 24 viktimat e Thumanës, të cilën Basha e quan “krim shtetëror” nuk ka ende asnjë hetim apo të arrestuar.

“Nëse 150 milion dollarët që Edi Rama u jep 10 oligarkëve do të ishin akorduar për qytetarët, sot do të ishin strehuar në banesa me qera cdo qytetar që është lënë në mëshirë të fatit. Nëse qeveria do të kishte miratuar paketën ndihmëse për biznesin e dëmtuar, do të kishte nisur rimëkëmbja. Ndërkohë për krimin shtetëror në Thumanë që mori 24 jetë, nuk ka asnjë të arrestuar, asnjë hetim serioz, vetëm heshtje nga prokuroria politike që mbron Dakon dhe Bushin me urdhër të Edi Ramës.

Çdo ditë dështimi dhe mashtrimesh, është një ditë vuajtjesh më shumë, një mundësi e humbur për tu ardhur në ndihmë qytetarëve në nevojë dhe për të kontribuar në rimëkëmbjen ekonomike dhe rikthimin në normalitet të jetës së mijëra familjeve. Dhimbja dhe vuajtja e tyre nuk mund të kapërcehen me lugën bosh të një kryeministri të dështuar”, shkrun Basha.

“Zgjedhorja”, Basha: Me “Damianin” bashkëpunojmë, por s`e amnistojmë

Lulzim Basha mbajti një konferencë për mediat, i shoqëruar nga ish-deputetë të Partisë Demokratike. Fjala e Bashës u fokusua te tryeza për reformën zgjedhore dhe pranimi për t`u ulur në të njëjtën tryezë me Damian Gjiknurin, të cilin e akuzojnë për blerje të votave në Dibër. Ndaj gazetarët e pyetën për kryedemokratin për mungesë koherence në qëndrime, pasi më herët e kishte cilësuar “simbol të krimit elektoral”, Damian Gjiknurin. Megjithatë, Basha u përgjigj se ishte “e pavërtetë dhe naive”, duke thënë se ky pohim kishte dalë nga “propaganda e Ramës”.

“Nuk ka asgjë më të pavërtetë dhe naive se kjo. Mund të rri këtu e të habitem sesi propaganda e Ramës ka arritur në këto nivele apo naivitei i njerëzve ka arritur në këto nivele, por kjo nuk është detyra ime. Detyra ime është t’ju tregoj fare qartë se teza se “u legjitimua Damian Gjiknuri” është një tezë e dalë direkt nga kancelaria e Edi Ramës dhe e shpërndarë përmes renegatëve dhe patericave të tij, pre e të cilës mund të ketë rënë edhe ndonjë naiv apo ndonjë person që ka pritshmëri jorealiste dhe revolucionare për mënyrën sesi duhet të ndryshojë Shqipëria”, tha Basha.

Ai vijoi më tej duke iu referuar kushteve të Bundestagut, që sipas kryedemokratit, një prej këtyre kushteve kërkon “ndjekjen penale ndaj personave që lidhen me vjedhjen e votave”. “Në kushtet e Bundestagut është edhe “fillimi i ndjekjes penale dhe proceseve gjyqësore kundër atyre që lidhen me blerjen e votave në zgjedhje dhe ndjekjen serioze e të shpejtë të procedimeve.” Në rezolutën e PPE-së ky kusht është forcuar edhe me “arrestimin e përsonave të kapur në përgjime duke vjedhur votat.” I njëjti kusht përsëritet edhe nga Unioni Demoktatik Ndërkombëtar, ku, përveç Partive Popullore Europiane, përfshihet edhe partia në pushtet e SHBA dhe partia në pushtet në Britaninë e Madhe. Duke parë në sy qytetarët dua t’ju them se nuk ka për të patur amnisti as për Damian Gjiknurin, as për Imer Lalën, as për Vangjush Dakon, as për Avdylajt, për askënd që është përfshirë në shitblerjen e votave”, th Basha.

Gjithashtu, Lulzim Basha tha se “dërgimi para drejtësisë i këtyre personave është prioritetet i Partisë Demokratike”. “Dërgimi i tyre para drejëtësisë dhe aty ku e kanë vendin është prioritet absolut i PD-së, i opozitës së bashkuar dhe institucioneve euroatlantike. Ju lutem ta kuptoni realitetin, ashtu siç është. Këta janë të gjithë ushtarë të Edi Ramës. Stigmatizimi i procesit të reformës zgjedhore, nuk është gjë tjetër veçsee rënie viktimë e kësaj propagande. Synimi im është të largojmë fenomenin e Edi Ramës, personin e Rdi Ramës, qeverinë e Edi Ramës, bandat e Edi Ramës dhe të krijojmë kushtet që kurrë më, asnjë parti politike, asnjë individ të vendosë shqiptarët dhe Shqipërinë në kushte pengmarrje nga krimi”, shtoi Basha. Por pavarësisht këtyre deklaratave, fakti është se Partia Demokratike pranoi të bashkëpunojë me Damian Gjiknurin si bashkëkryetar i komisionit për Reformën Zgjedhore, pavarësisht se më herët e kanë akuzuar atë për blerjen e votave në Dibër. /Realstory.al/

Balla: KLP edhe KLGJ të hetojnë gabimet procedurale

Kreu i grupit parlamentar socialist, Taulant Balla e ka cilësuar të turpshëm vendim e gjykatës për pushimin e çështjes me lobimin rus në SHBA, ku i akuzuar kryesor ishte kryedemokrati Lulzim Basha së bashku me ish-Sekretarin e Përgjithshëm, Arben Ristani dhe financierin e PD, Ilir Dervishi.

Balla tha se një vendim i tillë tregon se gjyqtarët që nuk kanë kaluar ende vettingun po zbatojnë parimin e “kap ç’të kapësh” me teatro të tilla, ndërsa paralajmëroi se do të ketë apelim të çështjes duke i bërë thirrje Këshillit të Lartë të Gjyqësorit dhe Këshillit të Lartë të Prokurorisë për të hetuar gabimet procedurale që janë bërë me dashje për këtë çështje.

“Prokuroria hetoi 2 vite dhe gjykata e mbylli për 2 orë” tha Balla duke shtuar se përfituesi i parave Nik Muzin duhet të merret në pyetje dhe kjo dosje e rëndë nuk mund të mbyllet pa u hetuar në themel.

“Kush mendon se kjo dosje e rëndë me të pandehur kryesor Lulzim Bashën, mund të mbyllet kështu pa u hetuar aspak në themel, pa u marrë në pyetje të gjithë personat e përfshirë, e ka shumë gabim.

Kjo nuk është një çështje vetëm e drejtësisë shqiptare.

Nxitimi i stimuluar i ndonjë prokurori dhe gjyqtari që nuk e ka kaluar procesin e vettingut dhe që zbaton parimin ‘kap çfarë të kapësh’, shfaqën sot këtë teatër të turpshëm për sytë e shqiptarëve dhe jo vetëm.

Këshilli i Lartë i Gjyqësorit dhe Këshilli i Lartë i Prokurorisë duhet të hetojnë gabimet procedurale me dashje, që çuan në këtë teatër të turpshëm, ku prokuroria hetoi 2 vite dhe gjykata e mbylli për 2 orë.

Apelimi i këtij vendimi absurd dhe rikthimi i çështjes për hetim të plotë duke dhënë edhe garancitë nga Gjykata për marrjen në pyetje të përfituesit të parave Nik Muzin, janë hapat e vetëm për të hedhur dritë e për të bërë drejtësi në këtë dosje të rëndë”, shkruan Balla në facebook.

Gjykata e Tiranës pushoi të hënë çështjen në ngarkim të kreut të PD, Lulzim Basha dhe ndaj dy zyrtarëve të tjerë të PD Arben Ristani dhe Ilir Dervishi, në lidhje me lobimin rus në SHBA me pretendimin se nuk ekzistojnë prova.

“RUSSIAGATE”, GJYKATA PUSHON HETIMET NDAJ LULZIM BASHËS

A do takohet me Ramën? Basha: Ky mit ka rënë. Të hapur për ndryshimin e sistemit zgjedhor

Lulzim Basha doli në një konferencë me gazetarët mbrëmjen e të shtunës, nga ku la të kuptohet se nuk do të ketë ndryshim të sistemit zgjedhor. Sipas Bashës, problem nuk është sistemi zgjedhor në Shqipëri, por kriminelët në politikë. “Përsa kohë Edi Rama vazhdon ta mbështesë karrierën e tij politike dhe fatin e tij politik tek kriminëlet, përsa kohë zbulohen kriminelë në Kuvend, në bashki, në insitucione dhe ai vazhdon të kruajë mjekrën sikur nuk ka ndodhur asgjë, harrojeni se këtu do të ketë zgjedhje të lira e të ndershme! Shqipëria ka nevojë për një qeveri dhe një kryeministër kujdestar të zgjedhjeve të lira e të ndershme, i cili nuk është i përlyer dhe as pjesë e tepsisë me krimin dhe e pushtetit të marrë me krimin. Asnjë sistem nuk ka për të garantuar zgjedhje të lira e të ndershme, po nuk e ndamë politikën nga krimi dhe ky mbetet prioriteti absolut i PD dhe i opozitës. Asnjë sistem nuk ka për të garantuar zgjedhjet, nëse ne nuk ndëshkojmë krimin elektoral”, tha ndër të tjera Basha.

Megjithatë, kryedemokrati u shpreh se ai është gati për të diskutuar edhe për ndryshimin e sistemit. Madje, Basha tha se sistemin le ta zgjedhë dhe Edi Rama, pasi sipas tij, PD ka fituar me të gjitha llojet e sistemeve. “Nuk kam ndryshuar qëndrim. Le ta zgjedhë dhe Edi Rama po të dojë sistemin. PD ka fituar me mazhoritar të pastër, me mazhoritar proporcional, prandaj e rëndësishme është që të konsultohet me shqiptarët. Nuk mund ta zgjedhë krimi i organizuar vendin ku do të bëhen zgjedhjet. Prandaj duhet më parë të dënohen krimet elektorale. Kjo e para, më pas sistemi le të zgjidhet me konsensus të popullit. Të jetë procedurë e një projekti transparent, dua të përsëris që futja e diskutimit nga sistemi është metoda më e mirë për të hequr vëmendjen nga krimi. Po ja u them mazhoritarin e pastër. Edhe ai do të dështojë nëse nuk ndajmë politikën nga krimi, nuk zmbrapsim paratë e pista të oligarkëve”, tha Basha.

Por a do të pranojë ai të ulet në tavolinë me Ramën? Basha u shpreh se ky “mit” ka rënë tashmë, duke pohuar se nuk do të ulet në tavolinë me kryeministrin, ndërsa bëri thirrje që të mos vonohet miratimi i reformës zgjedhore. “Miti i uljes së kryetarit me kryeministrit në tryezë ka rënë. Nuk ka për të ndodhur diçka e tillë. Ne kemi propozuar një ide të qartë. Ai ka vjedhur kohën e mundshme. Tani nuk ka më asnjë alibi. S’do të pranohet asnjë alibi. Pak rëndësi ka për mua se si prezantohen, rëndësi ka të kryhen. Sot është data 11 janar. Bundestagu e kërkonte që reforma zgjedhore të kalonte në dhjetor. Ky kryeministër e ka bërë shkeljen e parë. Ka shkelur një nga afatet gjermane. Thirrja ime është; asnjë minutë vonesë më. Propozimin tonë e kanë pasur që në muajin shtator”, pohoi Basha.

I pyetur nëse opozita do t`i rikthehet protestave, Lulzim Basha tha se opozita do të përdor të gjitha format për të larguar qeverinë. Ndërsa shtoi se ai është gati të hyjë në zgjedhje që nesër. “Të gjithë format. Do të përdorim çdo formë për të sjellë zgjedhjet e parakohshme. Shqipëria nuk është e Edi Ramës por është e shqiptarëve. Prandaj zgjedhin ata nëse duan të lirohen, ose të mbesin peng e kësaj qeverie të lidhur me krimin. Që nesër hajde bëjmë zgjedhje. Si e shoh unë të arsyeshme dhe si do bëhem është gjë tjetër. Por ne do luftojmë që të bëhen një orë e më parë”, tha Basha.

Reforma Zgjedhore, Basha takohet me grupin e punës të opozitës

Kreu i Partisë Demokratike mblodhi të hënën grupin e punës për çështjen e reformës zgjedhore. Sipas një lajmi publikuar nga Balkanweb, opozita pritet të publikojë së shpejti propozimet për reformën zgjedhore, që do ti hapin rrugën një konsultimi publik.

“Reforma zgjedhore nuk ka asnjë përparim, pavarësisht se është 1 nga 9 kushtet e Bundestagut për nisjen e negociatave të anëtarësimit me Bashkimin Europian. Bundestagu ka kërkuar që reforma zgjedhore të kryhet me përfshirjen dhe konsensusin e të gjitha palëve politike, por PD dhe opozita bëjnë përgjegjëse kryeministrin Rama si pengues të saj”.

Po sipas këtij lajmi, PD e konsideron “shtyrjen e gjendjes së jashtëzakonshme me 3 muaj, si mekanizëm për të penguar reformën zgjedhore dhe zbatimin e saj, siç e kërkon Bundestagu”. Ndërkohë, në ditët në vijim Basha pritet të takohet me aleatët e tjerë të opozitës.

QUDS do të kryente sulme në Shqipëri, Rama e PD mbështesin SHBA për vrasjen e Solejmanit

Shqipëria është rreshtuar krah Shteteve të Bashkuara të Amerikës, pas aksionit për vrasjen e liderit të Forcave Elitare QUDS të Iranit, Kasem Solejmanit. Kryeministri Edi Rama reagoi në mbrëmje duke u shprehur se “si një vend që njohu pak kohë më parë veprimtarinë e padrejtë të Iranit kundër botës së lirë dhe mori distancë të qartë nga ajo, Shqipëria aprovon me forcë qëndrimin e Donald Trump ndaj një aktivisti keqdashës të regjimit të Teheranit! Ne jemi të vendosur me SH.B.A. dhe shpresojmë se të gjithë ta bëjnë këtë”, shkruan kryeministri Rama në Twitter.

Të njëjtin qëndrim mbajti edhe Partia Demokratike, e cila u shpreh se “mbështet angazhimin e SHBA në luftë kundër terrorit. Vendimi i presidentit Trump për goditjen e njërit prej arkitektëve dhe drejtuesve të aktiviteteve terroriste është nje akt i fortë lidershipi dhe mbrojtje e vlerave demokratike e të paqes”, shkruan Partia Demokratike.

Po çfarë e lidh Kasem Solejmanin me Shqipërin? Gjatë muajit tetor të vitit të kaluar, Policia e Shtetit doli në një deklaratë për mediat ku njoftoi se kishte parandaluar një akt terrorist. Disa shtetas iranianë do të kryenin sulme terroriste në vendin tonë ndaj përfaqësuesve të opozitës iraniane “MEK”, që strehohet prej vitesh në Shqipëri. Sipas Policisë së Shtetit personat që do të kryenin këto sulme ishin pikërisht anëtar të QUDS, Forcës së Gardës Revolucionare të Iranit, të drejtuar nga Kasem Solejmani.

Mini-Schengeni, Basha akuzon Ramën për vetëpërjashtimin e Kosovës

Lulzim Basha reagoi të dielën, një ditë pasi u mbyll Samiti i Tiranës mes Liderëve të Ballkanit Perëndimor për Mini-Shengenin. Basha shprehet fillimisht se mirëpret në parim “çdo nisëm rajonale që ka për qëllim afrimin e shteteve dhe forcimin e bashkëpunimit mes tyre”. Megjithatë, kryedemokrati e sheh këtë si nismë “përjashtuese për Kosovën”. “Por ne gjykojmë se fqinjësia e mirë në Ballkanin Perëndimor kurrsesi nuk mund të arrihet duke përjashtuar Republikën e Kosovës”, thotë Basha.

Mirëpo, Kryeministri Edi Rama është shprehur se “Kosova po vetëpërjashtohet” nga ky proces, pasi për liderët e shtetit të Kosovës nuk kanë munguar ftesat për të marrë pjesë, në të paktën dy samitet e fundit të mbajtura në Ohër dhe Tiranë. “Uroj që Kosova të dalë nga një rreth vicioz që nuk i bën mirë. Kosova nuk ka nevojë për një garë të brendshme se kush refuzon më shumë dialogun. Kosova duhet të qëndrojë fort afër Shqipërisë dhe miqve të vet SHBA dhe BE dhe të mos kthejë vizionin e të ardhmes në një luftë politike të ditës”, tha Rama të shtunën për gazetarët.

Vetëpërjashtimin e kanë pranuar dhe vetë liderët e Kosovës. Ishte Presidenti i Kosovës Hashim Thaçi, që pak ditë para Samitit të Tiranës, duke konfirmuar ftesën, tha se nuk do të marrë pjesë në këtë takim. Duke arsyetuar se “Serbia është pengesa kryesore e mungesës së konsolidimit të shtetit të Kosovës”, Thaçi u shpreh “se rrethanat që e kanë pamundësuar pjesëmarrjen e Republikës së Kosovës në takimin e parë të mbajtur në Novi Sad dhe në të dytin të mbajtur në Ohër, nuk kanë ndryshuar. Si rrjedhojë, unë si President i Republikës së Kosovës, në emër të institucioneve shtetërore refuzoj pjesëmarrjen në takimin e tretë të këtij formati rajonal që mbahet në Tiranë”, tha ai disa ditë para samitit.

Basha gjithashtu mendon se nisma për krijimin e Mini-Shengenit “cënon orjentimin perëndimor të ShqipërisË”. Sipas tij, blloku i ri i vendeve që po krijohet ka dyshime se mund të orjentohet drejt Rusisë. “Pavarësisht retorikës pro-perëndimore, gjatë viteve të fundit Serbia ka thelluar bashkëpunimin ushtarak me Rusinë duke ndërmarrë manovra të përbashkëta dhe bërë blerje masive armatimi. Të gjitha këto veprime të Serbisë hedhin hije dyshimi mbi orientimin gjeopolitik të një blloku të ri shtetesh ballkanike ku shteti më i fuqishëm që shërben si lokomotivë e kësaj nisme, flirton haptazi me Rusinë dhe nuk e ka të sinqertë orientimin drejt perëndimit”, thotë Basha.

Por, të paktën siç kanë deklaruar dhe vepruar publikisht, vendet perëndimore e kanë mbështetur krijimin e kësaj zone të re ekonomike, që mundëson lehtësira në lëvizjen e lirë të njerëzve, mallrave dhe shërbimeve. Në Samitin e Tiranës ishin të pranishëm drejtues të përfaqësive diplomatike të Shteteve të Bashkuara të Amerikës dhe Bashkimit Europian. Ndërsa me një artikull kushtuar këtij samiti, Deutsche Ëelle thoshte se “ideja për krijimin e këtij mini-shengeni është hedhur nga kancelarja gjermane Angela Merkel”. Pra, duket që ky projekt jo vetëm s`mund të orjentohet drejt lindjes, por “bekimin” e ka nga Perëndimi, ku qëllimi final është “integrimi në Bashkimin Europian”, siç tre liderët kryesorë, Rama, Vuçiç dhe Zaev kanë deklaruar. /Realstory.al/

PD akuza për bonusin e qirasë, reagon kreu i PS në Radë

Partia Demokratike, nëpërmjet një deklarate për mediat hodhi akuza të shtunën se në Durrës po abuzohet me bonusin e qirasë. Në deklaratën që Selia Blu publikoi, pretendonte se anëtarët e familjes Basha në Durrës, të cilët jetonin në një vilë tre katëshe në fshatin Radë në Manëz, e dëmtuar nga tërmeti, kanë përfituar tre bonuse qiraje.

“Për Manzën janë dhënë 7 bonuse qeraje, 3 prej të cilave janë për familjen e Kryetarit të Partisë Socialiste të fshatit Radë, Armand Basha. Ai është njëkohësisht shpërndarës i ndihmave në Manzë dhe pronar i firmës së ndërtimit “Armandi shpk.”. Siç tregon dokumenti, bonus qeraje ka përfituar edhe babai i Kryetarit të PS, Hysni Basha, edhe ky ndërtues dhe gjyshi i Kryetarit të PS, Murat Basha. Të tre këta jetojnë në një shtëpi, por paratë për qeranë e kanë marrë sikur të jetonin të ndarë për arsyen e vetme se drejtojnë Partinë Socialiste në zonën e manzës”, thuhej në deklaratën e PD.

Por, pak orë më vonë, pasi u publikua kjo deklaratë, reagoi edhe Armand Basha, kryetari i PS në këtë zonë njëherazi një nga tre përfituesit bonusit të qirasë në familjen Basha. Ai publikoi foto nga vila tre katëshe e dëmtuar nga tërmeti, ku banonte së bashku me disa familjarë të tij. Armand Basha publikon edhe foto të certifikatave familjare, që sipas tij vërtetojnë, se paçka se familjet jetonin në të njëjtën vilë, e shpallur e pabanueshme, ato janë të ndarë nga njëri-tjetri. Pra, pavarësisht se jetojnë në të njëjtën godinë, secili prej tyre kishte banesën e tij në ndërtesën e dëmtuar nga tërmeti i 26 nëntorit.

“Të nderuar miq dhe të njohur, siç jeni në dijeni, në 26 Nëntor 2019, më së shumti Qarku i Durrësit, u prek nga një tërmet i fuqishëm, me pasoja tragjike dhe viktima. Për fat të mirë, unë dhe familjaret e mi, shpëtuam shëndoshe e mirë, por praktikisht banesa ime private në fshatin Radë, Manëz (Durrës), ku unë dhe familjaret e mi jetojmë, u demtua rëndë dhe është e pabanueshme, vërtetuar kjo dhe nga akt- konstatimi i banesës, firmosur nga ekipi i specialistëve të ardhur nga Turqia”.

“Gjithsesi, papritur e papandehur, sot u gjenda i ballafaquar me sulmin zyrtar të Partisë Demokratike, për shkak të funksionit përfaqësues, që kam për Partinë Socialiste në këtë zonë, ku nëpërmjet një deklarate zyrtare të tyre, hamendësojnë se kam përfituar bonuse qeraje për vete dhe familjarët e mi, në mënyrë të pamerituar, si privilegj për faktin se jam pjesë përfaqësuese e PS-së. Mendoj se PD-ja, duhet të gjente kohë për solidaritet, jo për sulme personale që është pak të thuash, se janë tepër banale e mediokre. Më poshtë gjeni 1. Certifikatat familjare, të cilat qartazi tregojnë sa persona e familje ishim në banesë, 2. Fotot e banesës private pas dëmtimit”, thuhet ndër të tjera në reagimin e Armand Bashës.

Basha, qeverisë: Po abuzohet me ndihmat

Pas tërmetit, kreu i Partisë Demokratike Lulzim Basha po i rikthehet retorikës së zakonshme politike. Të enjten ai akuzoi qeverinë për menaxhim jo të mirë të situatës, duke u shprehur se shumë familje ende nuk kanë marrë asnjë ndihmë. Madje, Basha akuzoi se shpërndarja e ndihmave është bërë në mënyrë selektive për miq dhe kushërinj partiakë.

“Në më shumë se dy javë që nga dita e tërmetit, familje të tëra nuk kanë marrë ende asnjë ndihmë, edhe në rastet kur kanë qënë me fat, u është dashur të presin me orë të tëra apo të sorollaten nëpër zyra për të marrë “ kuponin”. Në shumë raste, shpërndarja e ndihmave është bërë në mënyrë selektive për miq e kushërinj dhe me preferenca partiake. Nese nuk do të ishte ndihma e vullnetarëve, mjaft familje nuk do të kishin as buke për fëmijët e tyre”.

“Shumë familje janë jashtë dhe pa asnjë ndihmë në këtë të ftohtë. Qytetarët thonë se nuk i njohin personat e ngarkuar për situatën, ndërkohë që nuk ka asnjë informacion për fondet e vëna në dispozicion për emergjencën. Asnjë transparencë, se kur do të nisë rikonstruksioni i banesave të dëmtuara , si do të bëhet, fondet e akorduara, e shumë pyetje të tjera pa përgjigje”, shkruan ndër të tjera Basha.

Më tej, Basha shprehet grupet e inspektimit janë kaotike. Sipas kryedemokratit, dy javë pas tërmetit, ende nuk ka një bilanc të plotë të evidentimit të dëmeve. “Sot kemi hyrë në javën e tretë pas tragjedisë së rëndë dhe ende nuk kemi evidentimin e plotë të: sa banesa janë dëmtuar, sa pallate janë shpallur të pabanueshëm, sa qytetarë kanë mbetur të pastrehë, sa qytetarë janë strehur në hotele dhe sa janë ende në qiell të hapur. cila është lista e objekteve të dëmtuara dhe për të cilat deri më tani ka vendim për prishje. cilat janë shkollat e dëmtura dhe kur ishin ndërtuar apo rikonstruktuar ato”, shprehet Basha.

Batuta e Gjekmarkajt: Nëse sfidoj Bashën, bëhem kryetar i PD

Mbrëmjen e të martës në emisionin “Real Story”, analisti Agron Gjekmarakj, duke folur për çështjen “Babale” dhe kërkesën për dënimin e Ervin Salianjit, bëri dhe një batutë. Gjekmarkaj u shpreh me humor se “nëse sfidon Bashën për kryetar të PD, mund të bëhet kryetar i kësaj partie”. “Unë nuk do bëhem ndonjëherë kryetar i PD-së, se nuk kam ndërmend ta konkurrojë Bashën. Por edhe nëse e konkurroj, edhe mund të bëhem”, tha Gjekmarkaj.

Por gazetari Sokol Balla e “zbriti” me këmbë në tokë analistin Gjekmarkaj, pas deklaratës së tij se “nëse sfidon Bashën, bëhet kreytar i PD”. “Më duhet ta tërheq dhe ta zbresë me këmbë në tokë”, tha me humor gazetari Balla. Më pas, Gjekmarkaj u shpreh se prokurorët e dosjes “Babale” po sillen mirë që të kalojnë vettingun.

“Të dy prokurorët po sillen mirë që të kalojnë vettingun. Por kur Shteti dhe pushteti bëhen bashkë, ato që sakrifikohen janë institucionet. Fatkeqësisht kemi një polici që nuk është shumë larg strukturave mafioze dhe duket shumë dashamirëse me to. Inasitucionet janë nën sedrën e politikës”, tha Gjekmarakj./Realstory.al/