Të hënën, zgjidhen dy anëtarët e “Kushtetueses”

Kuvendi voton të hënën, më datë 11 nëntor, dy anëtarët e tij për të plotësuar vakancat në Gjykatën Kushtetuese. Kryetari i Komisionit të Ligjeve, Ulsi Manja tha se Kuvendi do ushtrojë të drejtën e tij në bazë të rregullores për t’i zgjedhur të hënën, ndërsa në lidhje me kërkesën e presidentit Meta për pezullim të procesit tha se “një letër nuk ka fuqinë të anulojë një veprim juridik”. Manja tha se Kushtetuta është e qartë në këtë pikë dhe vepron njësoj për të gjithë si për Presidencën, Kuvendin dhe Gjykatën e Lartë, në lidhje me afatin e zgjedhjes së anëtarit për plotësimin e vakancës në Kushtetuese dhe se si do të zgjidhet ai nëse një nga këto organe nuk vendos në kohë.

“Presidenti ka dërguar një letër ku kërkon pezullimin e dekretimit të vakancës së dytë që i takon presidentit, dhe unë nuk di që letra pezullon një veprim juridik. Kushtetuta flet shumë qartë. Secili nga institucionet kushtetuese të përfshira në procesin e kompozimit të Gjykatës Kushtetuese, dhe këtu e kam fjalën për Presidentin, Kuvendin dhe Gjykatën e Lartë nëse nuk e ushtrojnë këtë kompetencë brenda afatit 30 ditor kandidati i listuar i pari konsiderohet i emëruar dhe ky afat është afat prekluziv. Kuvendi i Shqipërisë ditën e hënë do të ushtrojë këtë kompetencë në përputhje me rregulloren e Kuvendit”, tha Manja.

Manja tha se Presidenti dhe Kuvendi kanë këndvështrime të ndryshme për mënyrën si e lexojnë Kushtetutën, ku fton Metën që ta lexojë atë me “frymën e zhbllokimit”.

“Kemi këndvështrime të ndryshme si gjykojmë Kushtetutën dhe Ligjin. Nga sot presidentit i ka skaduar afati 30 ditor për të dekretuar vakancën e dytë të shpallur prej tij për Gjykatën Kushtetuese. Unë e ftoj presidentit që në këtë fazë të procesit të plotësimit të vakancave Kushtetuese të lexojë kushtetutën në frymën e zhbllokimit të procesit”, shprehet Manja.

Presidenti Meta kërkoi më 7 nëntor, një ditë para skadimit të afatit, pezullim të procesit me arsyetimin se ishte shkelur Kushtetuta dhe se ai nuk mund të zgjidhte anëtarin e dytë pa folur ende Kuvendit. Vetë KED iu përgjigj menjëherë letrës së presidentit duke i lënë të kuptohet se ajo ka për detyrë vetëm të hartojë listat e kandidatëve dhe jo të pezullojë procese, afatet e të cilave janë të vendosura në Kushtetutë. Në këtë mënyrë pritet që mbrëmjen e 8 nëntorit, kur mbaron edhe afati i Presidentit për plotësimin e vakancës në Kushtetuese, të zgjidhet Arta Vorpsi, e cila renditet e para në listë.

Komisioni i Ligjeve, seancë dëgjimore me kandidatët për Kushtetuesen

Kandidatët nga lista e Kuvendit, të cilët garojnë për dy vendet vakante në Gjykatën Kushtetuese folën të martën në seancën dëgjimore të thirrur nga Komisioni i Ligjeve. Kuvendi nisi procedurat për zgjedhjen e tyre për plotësimin sa më shpejtë të vakancave të Kushtetueses. Para Komisionit të Ligjeve 3 kandidatet, Arta Vorpsi, Fiona Papajorgji dhe Elsa Toska thanë se “përvojat e tyre në punë do të ndihmojnë në funksionimin e drejtë të Gjykatës Kushtetuese dhe mbajtjen e një qëndrimi neutral ndaj debateve politike.” Seanca e cila u hap nga kryetari i Komisionit të Ligjeve, Ulsi Manja tha se Besnik Muçi u zgjodh anëtar i Gjykatës Kushtetuese nga lista e propozuar nga presidenti i Republikës, Ilir Meta.

Kandidatja Arta Vorpsi pohoi se “përvoja e gjatë e imja do më ndihmoje në punën time për të çuar me tej të drejtën kushtetuese. Nuk kam qenë asnjëherë e angazhuar në ndonjë parti politike apo grupim politik”.

Kandidatja e dyte në seance dëgjimore Elsa Toska u shpreh se eksperienca e saj është e fokusuar tek e drejta kushtetuese. “Në vizionin tim Gjykata Kushtetuese duhet të behet neutralizuese e debateve kushtetuese politike. Objektivat sipas meje që duhet të ketë kjo gjykatë, do jenë në krijimin e një jurisprudence të re post-reformë. Ligji për Gjykatën Kushtetuese u ndryshua gjatë reformës në drejtësi, është ndër më të mirët dhe besoj se do i përgjigjet sfidave për të ardhmen në çështjen e të drejtave të njeriut dhe çështjeve kushtetuese”.

Fiona Papajorgji, kandidatja e tretë, u shpreh e bindur se i plotëson kushtet për të qenë pjesë e Kushtetueses. “Mendoj se plotësoj kushtet për të qenë anëtare e gjykatës Kushtetuese. Ka ardhur koha që Kushtetuesja të kalojë në stadin e forcimit të parimeve të vlerave kushtetuese”.

Pas seancës dëgjimore Komisioni i Ligjeve do të zgjedhë dy kandidatë dhe më pas do të shkojnë për miratim në Parlament me 84 vota. Kuvendi ka ende kohë në përcaktimin e dy kandidatëve nga lista e tij, dhe se fillimisht po pret që presidenti të plotësojë vakancat nga lista e tij.

Listat me 4 kandidatët për të plotësuar vakancat janë dërguar nga Këshilli i Emërimeve në Drejtësi më 14 tetor. Konkretisht Arta Vorpsi, Fiona Papajorgji, Elsa Toska dhe Besnik Muçi janë 4 kandidatët që janë në listat e Kuvendit dhe Presidentit. Besnik Muçi është zgjedhur dhe betuar para Metës si anëtari i parë i Kushtetueses, edhe pse nuk ka kaluar fazën e dytë të vettingut. Presidenti ka afat për zgjedhjen e kandidaturës së dytë deri më 8 nëntor, ndërsa parlamenti deri me 14 nëntor. Duke qenë se këto kandidatë janë në listat si të Kuvendit dhe Presidencës, atëherë është bërë një koordinim i heshtur që presidentit t’i dërgohen më herët listat me emra për zgjedhjen e tyre dhe më pas Kuvendit, në mënyrë që të mos ketë përplasje të emrave.

Meta rihap garën për Kushtetuesen. 6 kandidatë i dërgohen KED

Pas dekretimit të Besnik Muçit si anëtar i Gjykatës Kushtetuese, Presidenti Ilir Meta rihapi garën për “Vakancën e parakohshme” e krijuar nga përfundimi para kohe i mandatit, të ish-gjyqtari Besnik Imeraj. Në këto kushte, Ilir Meta rihap garën për plotësimin e një tjetër vendi vakant në Gjykatën Kushtetuese për një nga 3 vende që plotësohen nga propozimet e kreut të shtetit. Pas përfundimit të afatit të rishpalljes për aplikim për këtë vend vakant, sipas merave të publikuar nga Presidenti Ilir Meta, kanë shfaqur interes 6 kandidatë.

Ata janë: Dedë Kasneci, Envi Hicka, Prelë Martini, Shaqir Hasanaj, Vasil Bendo dhe Vjosa Bodo Mujo. “Lista e aplikantëve të mësipërm, së bashku me dokumentacionin e dorëzuar prej tyre do t’i përcillet menjëherë Këshillit të Emërimeve në Drejtësi me qëllim që ky organ të revokojë/shfuqizojë Vendimin nr.137, datë 21.09.2019 të pezullimit të procedurës së verifikimit, si dhe vijimin e procesit për verifikimin dhe vlerësimin e të gjitha kandidaturave për plotësimin e këtij vendi vakant, sipas ligjit”, shkruhet në njoftimin e Presidentit.

Ndërkohë, në mbledhjen e datës 21 shtator të këtij viti, Këshilli i Emërimeve në Drejtësi vendosi pezullimin e procedurës së verifikimit të kandidaturave për “Vakancën e parakohshme” pas përfundimit të mandatit ish-gjyqtarit Besnik Imeraj. Shkak i pezullimit të procedurës së verifikimit të kandidatëve u bë skualifikimi nga gara i kandidates Zhaklina Peto, ndërsa në konkurrim mbetën vetëm dy kandidtë, nga tre që ishte minimumi i lejuar për garën.

Ndërkohë, sipas ligjit, pesë ditë nga publikimi i listës së kandidatëve të Presidentit, KED thërret mbledhjen për të shqyrtuar plotësimin e kushteve nga kandidatët. Më pas, 10 ditë pasi është zhvilluar mbledhja e parë, KED bën renditjen e kandidatëve në bazë të pikëve që ata kanë marrë.

Më pas lista i dërgohet Presidentit të Republikës, i cili brenda 30 ditëve duhet të zgjedhë një kandidat për plotësimin e vakancës së krijuar për shkak të përfundimit para kohe të mandatit të ish-gjyqtarit Besnik Imeraj. Nëse Presidenti nuk zgjedh gjyqtarin brenda 30 ditëve nga paraqitja e listës nga Këshilli i Emërimeve në Drejtësi, kandidati i renditur i pari në listë konsiderohet i emëruar./Realstory.al/

“S`ka besueshmëri”. KP: Të shkarkohet kandidatja për Kushtetuesen

Komisioneri Publik, ka bërë ankim në Kolegjin e Posaçëm kundër vendimit të Komisionit të Pavarur të Kualifikimit, për gjyqtaren Regleta Panajoti, aktualisht gjyqtare pranë Gjykarës së Rrethit Gjyqësor Tiranë dhe kandidate për gjyqtare në Gjykatën Kushtetuese. “Nisur nga dispozitat e nenit 179/b/5 të Kushtetutës, aneksit të Kushtetutës dhe në zbatim të jurisprudencës së Kolegjit të Posaçëm të Apelimit, Komisioneri Publik ndan gjykim të kundërt me Komisionin pasi vlerëson se, për rastin konkret, në gjendjen që janë faktet dhe provat e administruara gjatë hetimit administrativ, subjekti i rivlerësimit nuk arrin nivel të besueshëm për konfirmimin në detyrë”, thuhet në njoftimin e Komisionerit Publik. Më tej, ky institucion, kërkon ndryshimin e masës për gjyqtaren Regleta Panajoti, duke kërkuar shkarkimin e saj nga detyra.

“Duke ritheksuar se Komisioneri Publik ka detyrimin që të ushtrojë kontroll mbi vendimet e dhëna nga Komisioni, me qëllim që të garantojë mbrojtjen e interesit publik në procesin e rivlerësimit, bazuar në kërkesat e neneve Ç, D, Dh, E dhe F, të aneksit të Kushtetutës, nenit 4 dhe nenit 61, pikat 3 dhe 5, të ligjit nr. 84/2016, kërkon që shkaqet e këtij ankimi të merren në shqyrtim nga ana e Kolegjit dhe, në zbatim të nenit 66, të ligjit nr. 84/2016, të vendosë: – Ndryshimin e vendimit nr.169, datë 26.6.2019, të Komisionit të Pavarur të Kualifikimit dhe shkarkimin nga detyra të subjektit të rivlerësimit, znj. Regleta Panajoti”, thuhet në njoftimin e Komisionerit Publik.

Po përse është bërë ankimi? Sipas vendimit të dhënë më 26 qershor nga Komisioni i Pavarur i Kualifikimit, gjyqtarja Regleta Panajoti kalonte me sukses të treja pikat e rivlerësimit, pastërtinë e figurës, aftësinë profesionale dhe pasurinë. Mirëpo, nuk është në këtë mendim Komisioneri Publik, që mendon se kandidatja për Kushtetuese “ngel” te pasuria.

“Nisur nga hetimi dhe vlerësimi që ka kryer Komisioni për të tria kriteret e rivlerësimit, ankimi i Komisionerit Publik, në rastin konkret, evidenton dhe parashtron si çështje për gjykim rrethana dhe fakte ligjore, lidhur me (sipas radhës së trajtimit): (i) pasaktësi dhe pamjaftueshmëri në deklarimin e subjektit për dy pasuri të paluajtshme, të llojit apartament banimi; (ii) mungesë e dokumentacionit provues mbi burimin e ligjshëm të shumës prej 3.500.000 lekë, deklaruar si e ardhur nga puna në emigracion; (iii) mungesë e dokumentacionit provues për të ardhurat në shumën 200.000 lekë; (iv) deklarim i rremë për shitjen e pasurisë së paluajtshme e llojit truall, në Korçë (rrethanë kjo, e cila lidhet edhe me etikën dhe figurën e magjistratit/subjektit të rivlerësimit); (v) mundësinë financiare e huadhënësit ***.*** për ti dhënë hua subjektit shumën 10.000 EUR; (vi) mungesa e burimeve të ligjshme për depozitimin e shumës prej 12.000 euro në vitin 2007; si dhe (vii) deklarime të pasakta lidhur me posedimin e likuiditeteve cash ndër vite nga ana e subjektit të rivlerësimit”, thuhet në një nga argumentat e Komisionerit Publik që kërkon shkarkimin e Regleta Panajotit, aktualisht kandidate për anëtare të Gjykatës Kushtetuese. /Realstory.al/

Lexo ankimin e plotë të Komisionierit Publik për kandidaten e Kushtetueses

24.Ankim-kundër-vendimit-nr.-169-datë-26.6.2019-të-KPK-së-znj.-Regleta-Panajoti Shkarko dokumentin

Emrat/ Kuvendi shpall kandidatët për vakancën në Gjykatën Kushtetuese

Kuvendi ka dalë më një listë prej 6 kandidatësh për plotësimin e vakancës së krijuar në Gjykatën Kushtetuese, pas largimit të gjyqtarit Fatos Lulo, i cili u rrëzua nga vettingu pasi nuk mundi të justifikonte dot pasurinë. Më 21 gusht Kuvendi rishpalli kandidimin për vendin vakant duke përcaktuar edhe kriteret që duhet të plotësojnë kandidatët, ndërsa aplikimi u mbyll më 15 shtator.

Të martën, Kuvendi bëri publike 6 emrat që kanë aplikuar për vakancën e përkohshme në Gjykatën Kushtetuese, ku së bashku me dokumentacionin përkatës pritet t’ia dërgojë Këshillit të Emërimeve në Drejtësi. 6 kandidatët që kanë aplikuar për vakancën e përkohshme janë: Ardita Buna Alsula, Ded Kasneci, Klodian Rado, Regleta Panajoti, Shaqir Hasanaj dhe Vjosa Bodo Mujo.

Aktualisht Kushtetuesja ka vetëm një anëtar, Vitore Tushën dhe sipas ligjit duhet të pakën 6 anëtarë që kjo gjykatë të jetë funksionale dhe të fillojë me shqyrtimin e çështjeve në themel.

Më herët, KED ka bërë gati listën me 6 kandidatë që do të plotësojnë 4 vendet vakante, ku dy do të zgjidhen nga Presidenti dhe dy nga Kuvendi. Aktualisht në listë janë 6 emrat e miratuara konkretisht Arta Vorpsi, Besnik Muçi, Elsa Toska, Fiona Papajorgji, Marsida Xhaferrllari dhe Regleta Panajoti. Për shkak të procesit të vettingut, Gjykata Kushtetuese prej më shumë se një viti është jashtë funksioni, pasi gjyqtarët ose janë rrëzuar gjatë procesit të rivlerësimit të tyre, ose kanë dhënë dorëheqjen për t’i shpëtuar këtij testi. Gjykata Kushtetuese pritet të ngrihet në tetor dhe çështja e parë që pritet të shqyrtojë është shkarkimi i presidentit Meta.

Kushtetuesja gati për 30 ditë (dhe nga shkarkimi i Metës)

Ngërçi për Gjykatën Kushtetuese po shkon drejt zgjidhjes. Emrat e gjashtë kandidatëve të përzgjedhur nga Këshilli i Emërimeve në Drejtësi, pritet t`i propozohen Kuvendit dhe Presidentit brenda kësaj jave. Sipas Report Tv, mësohet se në mbledhjen e kësaj jave, KED pritet të bëjë pikëzimin përfundimtar për 6-të kandidatët, që kanë kaluar fazën e parë të vlerësimit. Deri tani, emrat e të kualifikuarëve janë gjyqtarja Arta Vorpsi, Bensik Muçi, Elsa Toska, Fiona Papajorgji, Marsida Xhaferllari dhe Regleta Panajoti. Në mbledhjen e datës 10 shtator, KED bëri pikëzimin paraprak për gjashtë kandidatët, ku Arta Vorpsi mori 89.610 pikë, Besnik Muçi 81.926 pikë, Elsa Toska 85.425 pikë, Fiona Papajorgji 88.783 pikë, Marsida Xhaferllari 81.999 pikë dhe Regleta Panajoti me 80.284 pikë. Të gjashtë emrat e kualifikuara paraprakisht si kandidat për Gjykatën Kushtetuese, do të kalojnë dhe njëherë në sistemin e pikëzimit, që do të jetë i fundit.

Më pas, emrat do t`i dërgohen Presidentit të Republikës dhe Kuvendit. Kështu, nëse deri të premten mbyllet vlerësimi përfundimtar, KED do t`i paraqesë Kuvendit dhe Presidentit listat me kandidatët që kanë më shumë pikë. Së pari, Presidenti ka afat 30 ditë për të përzgjedhur dhe shpallur dekretin për emërimin e anëtarit të Gjykatës Kushtetuese për vendin e shpallur vakant. Nëse Ilir Meta do të refuzojë të përzgjedhë një kandidat brenda 30 ditësh, në fund të këtij afati, kandidati i renditur i pari në sistemin e pikëzimit, emërohet automatikisht anëtar i Gjykatës Kushtetuese për vendin vakant. Në fakt, KED do të paraqesë dy lista të ndryshme për kandidatët për Gjykatën Kushtetuese, duke i hapur rrugë kështu zgjedhjes të pakën të katër anëtarëve.

Por si do të zgjidhen anëtarët për Gjykatën Kushtetuese?

Sipas ligjit Nr.8577, datë 10.2.2000 (ndryshuar me ligjin nr.99/2016) “Për funksionimin e Gjykatës Kushtetuese”, ky organ suprem gjyqësor, përbëhet nga 9 anëtar, (aktualisht ka vetëm një anëtar gjyqtaren Vitore Tusha). Ndaj, janë 8-të vende vakante. Po sipas këtij ligji, anëtarët e Gjykatës Kushtetuese zgjidhen 3 nga Presidenti, 3 nga Kuvendi dhe 3 nga Gjykata e Lartë. Në kushtet kur Gjykata e Lartë ende nuk është funksionale, do të jetë vetëm Kuvendi dhe Presidenti që do të zgjedhin anëtarët e Gjykatës Kushtetuese. Kështu, pasi më herët janë shpallur vakancat, sipas ligjit të sipërpërmendur, në rastet kur ka më shumë se një vend vakant, hartohen dy lista me kandidatët për Gjykatën Kushtetuese, ku në njërën listë, duhet të jenë emra gjyqtarësh të ardhur nga radhët e gjyqësorit. Praktikisht, KED do të paraqitet me lista të ndryshme, si në Kuvend ashtu dhe te Presidenti, me 6 kandidatë gjithsej.

Presidenti ka 30 ditë afat për të përzgjedhur dhe emëruar anëtarët e Gjykatës Kushtetuese. Nëse kreu i shtetit nuk e zbaton këtë të drejtë, automatikisht, kandidati i renditur me më shumë pikë, sipas vlerësimit të KED-së, emërohet anëtar i Gjykatës Kushtetuese. Ndërkohë, e njëjta procedurë është dhe për Kuvendin, që pasi ka marrë listat e kandidatëve, brenda 30 ditëve duhet të votojë në parlament me 3/5 një prej tyre. Në rast se kjo nuk ndodhë, atëherë automatikisht përzgjidhet kandidati i renditur në krye të listës nga KED me më shumë pikë. Por, nëse për Presidentin mund të ketë dyshime për dekretimin e emrave të gjyqtarëve për Gjykatën Kushtetuese, te Kuvendi kjo gjë nuk pritet të ndodhë. Kështu, në rastin më të keq, pas 30 ditësh, ose thënë ndryshe brenda datës 20 tetor, Gjykata Kushtetuese pritet të ketë të paktën 5 anëtar, një është aktualisht, 3 pritet të votohen në Kuvend dhe 1 pritet (në rast se Meta nuk do të dekretojë 3 emra), pritet të futet automatikisht për shkak të pikëzimit.

Në këto kushte, merr jetë Gjykata Kushtetuese, institucioni kyç i kërkuar nga partnerët e SHBA dhe BE, për t`i dhënë zgjidhje disa çështjeve kryesore, deri te shkarkimi i Ilir Metës. Në fakt, Presidenti duket se nuk do të presë krijimin e Gjykatës Kushtetuese, pasi ka paralajmëruar se do të largohet më herët nga Presidenca, nëse sipas tij, Komisioni i Venecias do të dërgojë një opinion ku gjen shkelje Kushtetuese të Ilir Metës. Megjithatë, Meta duket se ka kuptuar, madje pranuar tashmë, shkeljet e Kushtetutës. Pasi, fakti që ai u paraqit në Komisionin Hetimor ngritur për hetimin e tij, ishte një sinjal që tregon frikën e Metës për shkarkimin. Për më tepër, në deklaratat e bëra pas paraqitjes në komision dhe pas takimit të delegacionit të Venecias, Meta ka shfaqur dhe më shumë frikën e shkarkimit, duke u shprehur se nuk do të presë një gjë të tillë nga Kuvendi, por do të largohet vetë, duke dhënë dorëheqjen. /Realstory.al/

GJYKATA KUSHTETUESE, KUVENDI RIHAP GARËN PËR PLOTËSIMIN E VAKANCËS

GJYKATA KUSHTETUESE, PËR DY DITË LISTA PËRFUNDIMTARE E KANDIDATËVE

Kushtetuesja drejt krijimit, 124 dosje presin drejtësinë e re

Gjykata Kushtetuese aktualisht është jashtë funksionit, pasi në përbërjen e saj ndodhet vetëm një anëtare, Vitore Tusha. Kjo për shkak të procesit të vettingut, ku një pjesë e gjyqtarëve të saj u shkarkuan nga procesi i rivlerësimit të pasurisë, pastërtisë së figurës dhe aftësive profesionale, ndërsa një pjesë zgjodhi të jap dorëheqjen duke iu shmangur këtij testi të drejtësisë së re.

Që prej shkurtit të 2018, kur ka nisur procesi i vettingut, nën monitorimin e vazhdueshëm të ndërkombëtarëve, Gjykata Kushtetuese nuk është e aftë të marrë dot vendime dhe për këtë arsye numri i dosjeve dhe çështjeve për t’u gjykuar sa vjen dhe rritet.

Aktualisht numri i dosjeve që pritet për t’u rishqyrtuar me funksionin e saj është 124, ku aktualisht 8 çështje janë të mbartura nga viti 2017, 68 çështje janë të mbartura nga viti 2018 dhe pjesa tjetër janë dosje të 2019.

Gjykata Kushtetuese ka konfirmuar për Shqiptarja.com se 23 kërkesa janë paraqitur për kundërshtim të ligjeve të miratuara nga Parlamenti, ndërsa 8 kërkesa për kundërshtim të vendimeve të qeverisë, 83 kërkesa janë kundër gjykatave për proces të parregullt, nga të cilat 1 kërkesë për shfuqizim vendimi të Këshillit të Lartë të Drejtësisë dhe 1 kërkesë për shfuqizim vendimi të Komisionit të Pavarur të Apelimit. Një kërkesë është paraqitur për zgjidhje mosmarrëveshjeje të kompetencës, 7 kërkesa të paraqitura për konstatim cenimi (mosekzekutim vendimesh ose mosgjykim brenda afatit të arsyeshëm), 1 kërkesë e sjellë nga individ për interpretim të ligjeve dhe 1 kërkesë për interpretim vendimi të Gjykatës Kushtetuese.

Gjykata Kushtetuese pritet të jetë funksionale në fund të shtatorit dhe se çështja e parë që pritet të shqyrtojë është ajo e shkarkimit të Presidentit Meta. Kreu i Shtetit akuzohet se ka kryer shkelje të rënda të Kushtetutës dhe për të është ngritur një komisionin hetimor si dhe është kërkuar një draft opinion nga komisionin i Venecias për të bërë interpretimin ligjor të vendimeve të Presidentit. Vendimi që do të paraqes ky komision do të çohet për miratim në Kuvend dhe në fund do i dorëzohet Gjykatës Kushtetuese për të thënë fjalën e fundit. Do të jetë Gjykata Kushtetuese që do të vendos për shkarkimin ose jo të presidentit Meta.

Më herët Meta ka deklaruar e nuk i trembet shkarkimit dhe se ka respektuar Kushtetutën me çdo dekret të tij, por shtoi se do të jap dorëheqjen nëse në raportin e Komisionit të Venecias thuhet se ai ka kryer shkelje të Kushtetutës.

Kushtetuesja, KED i thotë “Jo” dy herë Zhaklina Petos

Në mbledhjen e datës 9 shtator, Këshilli i Emërimeve në Drejtësi, ka vendosur të ndalojë kandimin e Zhaklina Petos si kandidate për dy vende vakante në Gjykatën Kushtetuese. KED ka vendosur të ndalojë kandimin e Zhaklina Petos në të dyja vakancat e shpallura nga Presidenti i Republikës në datën 7 shkurt të vitit 2018. Konkretisht, Zhaklina Peto nuk mund të kandidojë as për vakancën e plotë e as për vakancën e parakohshme, për t`u zgjedhur si anëtare e Gjykatës Kushtetuese.

“Ndalimin e kandidimit të kandidates Zhaklina Peto për vendin vakant të gjyqtarit në Gjykatës Kushtetuese, vakancë e plotë, të shpallur nga Presidenti i Republikës në datën 07.02.2018; Ndalimin e kandidimit të kandidates Zhaklina Peto për vendin vakant të gjyqtarit në Gjykatës Kushtetuese, vakancë e parakohshme, të shpallur nga Presidenti i Republikës në datën 07.02.2018”, shkruhet në njoftimin e KED.

Ndonëse vendimi i zbardhur ende nuk është bërë i ditur, ndalimi i kandidimit të Zhaklina Petos për Gjykatën Kushtetuese, lidhet me konfliktin e interesit. KED nisi verifikimet për kandidaten Peto pak kohë më parë, pasi Gjykata e Apelit Administrativ i dha të drejtë Zhaklina Petos për të vijuar kandidimin. Më herët, KED i kishte ndaluar kandidimin gjyqtares Peto, për shkak të problemeve të konstatuara me pasurinë.

Këshilli i Emërimeve në Drejtësi vendosi ndalimin e kandidimit të Zhaklina Petos për të dyja vakancat më 2 gusht 2019. Sipas vendimit të zbardhur, ajo u ndalua të kandidonte për shkak se dështoi të kalonte me sukses procedurën e kontrollit dhe verifikimit të pasurisë së saj dhe të familjarëve. Lidhur me kontrollin e pasurisë, Këshilli i Emërimeve në Drejtësi administroi raportin e ILDKPKI-së, i cili vlerësonte se Peto “nuk kishte kryer deklarim të saktë, ka mungesë dokumentacioni ligjor për burimin e pasurisë si dhe ka mosdeklarim të tyre”.

Sipas ILDKPKI, Peto ka deklaruar pronësinë mbi një apartament me sipërfaqe 130 m2 në rrugën “Ismail Qemali” në Tiranë, por nuk ka deklaruar shtesën e apartamentit që ka gjithashtu sipërfaqe prej 130 m2, nga të cilat 64 m2 janë verandë. Për këtë pasuri, ILDKPKI konstaton gjithashtu se subjekti ka mungesë dokumentacioni justifikues në lidhje me shpenzimet dhe burimin financiar të shtesës, ka mungesë dokumentacioni për 80 mijë dollarë të deklaruara si dhuratë nga prindërit si dhe vlera e deklaruar prej 3.9 milionë lekësh për blerjen e apartamentit dhe tarracës në vitin 2000 gjykohet të jetë e ulët.

ILDKPKI ka konsideruar gjithashtu të dyshimtë transaksionin e shkëmbimit të një apartamenti 110 m2 me një apartament 156 m2. Sipas ILDKPKI, apartamenti i shkëmbyer është blerë për rreth 117 mijë euro në vitin 2017 dhe është shitur për 170 mijë euro një vit më vonë. Një transaksion i ngjashëm është evidentuar edhe në vitin 2013, ku Peto sipas ILDKPKI deklaron se ka blerë një makinë për 500 mijë lekë, të cilën e ka shitur katër vite më vonë për 13 mijë euro.

Gjykata Kushtetuese, Kuvendi rihap garën për plotësimin e vakancës

Me kërkesë të Këshillit të Emërimeve në Drejtësi më datë 9 gusht 2019, Kuvendi ka rihapur garën për plotësimin e vakancës në Gjykatën Kushtetuese. KED i kërkoi zyrtarisht Kuvendit dhe Presidentit shpalljen e vendeve vakante për anëtarët e tjerë të Gjykatës Kushtetuese, që u krijuan nga shkualifikimi nga gara i disa kandidatëve për shkak të vettingut, duke krijuar dy vakanca të lira në listat emërore të Presidentit dhe Kuvendit.

Të mërkurën më 21 gusht Kuvendi ka hapur zyrtarisht garën për aplikime të kandidatëve, të cilët dëshirojnë të jenë pjesë e Gjykatës Kushtetuese që prite të ngrihet në shtator. Gara do të jetë e hapur deri më 15 shtator dhe më pas lista me dokumentacionin përkatës për secilin kandidat do t’i përcillet Këshillit të Emërimeve në Drejtësi.

Kuvendi ka paraqitur të gjitha kriteret që duhet të plotësohen nga gjyqtarët që duan të bëhen pjesë e garës për të plotësuar një vend vakant të krijuar pas largimit nga venttingu të gjyqtarit Fatos Lulo. (Lexo këtu kriteret që duhet të plotësojnë kandidatët).

Aktualisht Gjykata Kushtetuese është vetëm me një anëtar, Vitore Tusha, dhe sipas ligjit duhet të pakën 5 anëtarë që kjo gjykatë të jetë funksionale dhe të fillojë me shqyrtimin e çështjeve në themel. KED ka bërë gati listën me 6 kandidatë që do të plotësojnë 4 vendet vakante, ku dy do të zgjidhen nga Presidenti dhe dy nga Kuvendi. Aktualisht në listë janë 6 emrat e miratuara nga KED pas intervistës që ka bërë me ta, konkretisht Arta Vorpsi, Besnik Muçi, Elsa Toska, Fiona Papajorgji, Marsida Xhaferrllari dhe Regleta Panajoti.

Gjykata Kushtetuese pritet em interes të madh jo vetëm nga politika por edhe qytetarët, pasi një nga çështjet e rëndësishme që pritet të shqyrtojë të parën është kërkesa e qeverisë për shkarkimin e presidentit Meta.

KUSHTETUESJA NË SHTATOR, KED GATI LISTËN E EMRAVE

Kushtetuesja, KED lejon kandidimin e Xhaferrllarit. 6 kandidatë për 4 anëtarë

Marsida Xhaferrllari është kandidatja e fundit e miratuar nga Këshilli i Emërimeve në Drejtësi për garën në Gjykatën Kushtetuese, duke e çuar në numrin total të kandidatëve për 4 vendet vakante. Kandidatura e saj u vlerësua dhe pranua nga Këshilli i Emërimeve në Drejtësi gjatë mbledhjes të martën, ndërsa sipas njoftimit po të këtij institucioni të mërkurën pritet të hapet zyrtarisht procedura e pikëzimit, që do të përcaktojë renditjen për secilin kandidat, qoftë ai nga Presidenti, qoftë nga Kuvendi.

Në mbledhjen e së martës, KED vendosi të pranonte kandidaturën e Xhaferllarit, e cila kandidon për vendet vakante për Gjykatën Kushtetuese të shpallur nga Presidenti, por edhe për vakancat për drejtimin e Inspektoratit të Lartë të Drejtësisë, pasi ajo ka konkurruar për të dy funksionet. KED ka njoftuar se të mërkurën do të nisë procedura dhe intervistimi i kandidatëve për të bërë vlerësimin, pikëzimin dhe të renditjes së kandidatëve për Gjykatën Kushtetuese dhe ILD-në pa humbur kohë në mënyrë që në shtator të dy këto institucione të jenë funksionale.

Marsida Xhaferrllari i bashkohet kështu garës për vakancat e Gjykatës Kushtetuese me 6 kandidatët e konfirmuar nga KED për 4 anëtarë të Kushtetueses. Pra, për të zgjedhur 4 anëtarë të rinj të Gjykatës Kushtetuese, Presidenti dhe Kuvendi duhet të vendosin mes 6 emrave të konfirmuar nga KED dhe Xhaferllarit, të sapozgjedhur si pjesë e garës. Konktretisht në garë janë: Arta Vorpsi, Besnik Muçi, Elsa Toska, Fiona Papajorgji, Marsida Xhaferrllari dhe Regleta Panajoti. Xhaferrllari kandidon edhe për ILD, bashkë me 3 kandidatët e tjerë Artur Metani, Eris Hysi dhe Artur Malaj.

Marsida Xhaferrllari, e cila ka qenë kryeinspektore pranë ish-Inspektoratit të Këshillit të Lartë të Drejtësisë, u zgjodh nga KED edhe pse procesi i vettingut nuk dha një përgjigje apo një përfundim për të në muajin mars të 2019. Edhe pse ajo kaloi të gjitha fazat e rivlerësimit të pasurisë, aftësive personale dhe pastërtisë së figurës, KPK doli me deklaratën përfundimtare duke thënë se për shkak se Xhaferrllari kishte humbur statusin e magjistratit nuk mund të vendoste për konfirmim apo jo të saj. Një rast i paprecedentë i KPK, pasi ligji e detyron atë që të marrë një vendim për çdo rast edhe kur një person nuk e gëzon statusin e magjistratit. /RealStory.al