Tag: gjykata kushtetuese

Gjykata Kushtetuese, lista e kandidatëve gati. Meta shkarkohet brenda verës

Gjykata Kushtetuese do të ngrihet për punë ditësh. Të paktën kështu njofton vetë ky institucion i cili aktualisht ka 6 vende vakante, ndërsa lista e kandidatëve që kanë aplikuar është pothuajse gati dhe më pas do të kalojë për përzgjedhje dhe votim në Kuvend.

Funksioni i gjykatës më të rëndësishme në vend merr një rëndësi të veçantë në kushtet aktuale ku maxhoranca ka nisur procedurat për shkarkimin e Presidentit, pasi pretendon se ai ka shkelur kushtetutën për nxjerrjen e një dekreti të ri për anulimin e zgjedhjeve të 30 qershorit. E ndërsa maxhoranca pritet të miratojë kërkesën e saj për shkarkimin e Metës në seancë parlamentare, ky vendim në bazë të kushtetues duhet të marrë vulën e prerë të gjykatës kushtetuese, që të certifikohet dhe të hyjë në fuqi.

Lajmi i mirë është se brenda disa ditëve, Këshilli i Emërimeve në Drejtësi do të përfundojë verifikimin e kushteve ligjore të kandidatëve, për të vijuar më pas me vlerësimin e kritereve profesionale dhe morale, si dhe renditjen përfundimtare të tyre.

Në përgjigje të interesimit të Shqiptarja.com, Gjykata Kushtetuese, pranë se cilës është vendosur Këshilli i Emërimeve në Drejtësi, thotë se shumë shpejt lisat me renditjen e kandidaturave për 6 vendet vakante në Gjykatën Kushtetuese do t’i dërgohet Kuvendit dhe Presidentit.

“Ka përfunduar i gjithë kuadri normativ i domosdoshëm për funksionimin dhe mbarëvajtjen e organit të Këshillit të Emërimeve në Drejtësi. Në ditët në vijim do të përfundojë edhe miratimi i metodologjisë mbi bazën e së cilës Këshilli i Emërimeve në Drejtësi do të bëjë vlerësimin profesional/moral/organizativ të kandidatëve, pikëzimin dhe renditjen e tyre përfundimtare. Ka përfunduar i gjithë procesi paraprak përgatitor në lidhje me mbledhjen e informacionit dhe verifikimin e dokumentacionit të paraqitur nga kandidatët që kanë shprehur interesin për vendet vakante të shpallura nga organet e emërtesës, Presidenti i Republikës dhe Kuvendi i Shqipërisë. Brenda disa ditëve pritet të përfundojë edhe faza e verifikimit të pushteteve ligjore të secilit prej kandidatëve”.

Lajmi i keq është vetëm për Ilir Metën. Vendosmëria e shumicës për të përfunduar procesin e shkarkimit të tij para 30 qershorit (pra javës tjetër), do të thotë se Kushtetuesja e re, nga gjërat e para që do shqyrtojë, do jetë pikërisht akti final i procesit të shkarkimit të tij.

Rama: Ngrejmë Gjykatën Kushtetuese dhe shkarkojmë Metën, do dialogoj!

Mazhoranca është e vedosur ti shkojë deri në fund shkarkimit të Ilir Metës si President i Republikës. Pas hapit të marrë sot për nisjen e procedurës për ngritjen e Komisionit Hetimor Parlamentar, Kryeministri Edi Rama ka konfirmuar se do të ngrihet edhe Gjykata Kushtetuese, në mënyrë që kjo e fundit të gjykojë vendimin e Parlamentit për shkarkimin e presidentit.

“Procedurat e shkarkimit kanë nisur. Ato nuk do të ndalen deri në votimin e shkarkimit, patjetër. Pastaj natyrisht do t’i takojë Gjykatës Kushtetuese të marrë në shqyrtim argumentat e shkarkimit dhe të nxjerrë vendimin përfundimtar. Kështu e thotë Kushtetuta e Republikës së Shqipërisë. Është një Gjykatë Kushtetuese që është pastruar nga llumi që e kishte fundosur moralisht, falë vettingut dhe që do të rikrijohet dhe ri organizohet me kandidatura që do të vijnë për gjykim pasi të kenë kaluar procesin e vettingut dhe të kenë dalë të pastër prej tij. Pra është një zhvillim jashtëzakonisht i rëndësishëm dhe pozitiv dhe muajt e tranzicionit apo koha e tranzicionit nga pastrimi tek rikrijimi janë të pa shmangjshme”, ka thënë Rama në emisionin televiziv.

Kryeministri Edi Rama ka theksuar se nuk do të largohet kurrë nga protestat apo çfarëdolloj forme që përjashton votën e popullit, por, kreu i ekzekutivit, i ka lënë derën e hapur dialogut, duke diskutuar për interesa të përbashkëta, pa vendosur barrikada.

“Se unë jam kryeministri i vendit. Nuk diskutohet që nuk ka asnjë shans që me protesta dhe me çfarëdolloj forme që përjashton votën e popullit unë të largohem apo qeveria të largohet. Qeveria ka 1001 e punë për të bërë çdo ditë”, ka thënë Rama. “Për këto interesa të përbashkëta unë kam qenë gjithmonë i gatshëm për dialog, në çdo sekondë, por nga ana tjetër ka gjëra që bëhen në tavolinë, ka gjëra që bëhen me garë. Gara nuk mund të zëvendësohet nga tavolina”, ka shtuar ai.  

Më tej, Rama ka shtuar se zgjedhjet do të mbahen më 30 qershor, ndërsa për aktet e dhunës, që opozita ka nisur të kryejë dhe ka paralajmëruar se do të zhvillojë datën e zgjedhjeve, kryeministri thotë se ato do të ndëshkohen

“Ekzakt, interesi i vendit kërkon që më 30 qershor të bëhen zgjedhje dhe interesi i vendit kërkon që këto gabime të paguhen dhe të mos kalojmë si të shkuara e të harruara, siç kanë kaluar herë të tjera”, ka thënë Rama. “Janë deklarata të mjaftueshme për të qenë të shqetësuar se deri ku mund të shkojnë këta njerëz, por janë edhe më të mjaftueshme për të qenë të vendosur për të qëndruar deri në fund ndaj kësaj vale haxhiqamiloide”, është shprehur ndër të tjera.

Meta kapet pas dekretit: Juncker e ka gabim, zgjedhje s’mund të ketë

Presidenti i Repbulikës Ilir Meta ka folur në një intervistë për transmetuesin “Al Jazeera”, ku ka shprehur bindjen se më 30 qershor nuk do të ketë zgjedhje. “Nuk do të ketë zgjedhje më 30 qershor. Ky dekret është publikuar tashmë në Fletoren Zyrtare dhe të gjithë kanë detyrimin ta zbatojnë atë”, ka thënë ndër të tjera Meta. Për gazetarin John T. Psaropoulos, Ilir Meta ka thënë se dekreti për anulimin e zgjedhjeve ka hyrë në fuqi dhe duhet të zbatohet nga të gjitha palët. Ndërsa, lëvizjen e tij, e ka argumentuar si të nevojshme për të ruajtur paqen dhe stabilitetin në vend.

“Ky vendim i shërben paqes sociale, stabilitetit, duke shmangur përshkallëzimin e mëtejshëm e të pakontrolluar të situatës, që mund të çojë në një përplasje civile në vend ashtu siç edhe ju e keni parë gjatë zhvillimeve të muajit të fundit, sepse zgjedhjet pa opozitën, jo vetëm minojnë stabilitetin e vendit, por gjithashtu çdo shans pozitiv që Shqipëria të bëjë hapa përpara në procesin e çeljes së negociatave me BE-në sa më shpejt të jetë e mundur”, ka thënë Meta.

Partia për Unitet Kombëtar e Idajet Beqirit, pritet të dërgojë në Kolegjin Zgjedhor vendimin e KQZ-së për mos çregjistrimin si parti politike nga zgjedhjet e 30 qershorit. Në këtë mënyrë, në rast se Kolegji Zgjedhor lë në fuqi vendimin e marrë nga KQZ pak ditë më parë, atëherë merr miratimin e parë ligjor mbajtja e zgjedhjeve më 30 qershor, dhe rrëzohet dekreti i kreut të shtetit. Por, Ilir Meta shprehet se dekretin e anulimit të zgjedhjeve, në kushtet aktuale, nuk mund të kontestohet nga asnjë gjykatë tjetër në vend, veç Gjykatës Kushtetuese.

“I vetmi autoritet suprem që mund të shqyrtojë këtë dekret është Gjykata Kushtetuese, por ajo për të cilën dëshiroj t’ju siguroj është se ky diskutim dhe ky debat është humbje kohe, pasi ky dekret është publikuar tashmë në Fletoren Zyrtare. Tani në këto kushte ky dekret nuk mund të kontestohet nga asnjë gjykatë tjetër në vend. Dhe sigurisht, është një dekret që unë e kam firmosur para qytetarëve shqiptarë, duke marrë të gjitha përgjegjësitë për atë veprim”, ka thënë Meta.

Zhvillimi i zgjedhjeve më 30 qershor ka pasur miratimin e faktorit ndërkombëtar dhe Bashkimit Europian. Megjithatë, Meta, në intervistën për “Al Jazeera” është shprehur se Juncker nuk është informuar siç duhet për zgjedhjet e 30 qershorit.

“Jam i sigurt se ai nuk është informuar siç duhet për faktin se zgjedhjet e 30 qershorit praktikisht, ose në thelb janë thjesht votime dhe jo zgjedhje, sepse janë zgjedhje pa opozitën. Jam i sigurt se ai nuk është plotësisht në dijeni të gjithë situatës.Në këtë drejtim, ajo që ju thoni është korrekte, por tani nuk është më përgjegjësi e Komisionit Europian, sepse ky Komision e ka bërë tashmë një rekomandim pozitiv për Shqipërinë. Tani ky vendim do të merret në nivelin më të lartë të politikës europiane dhe mesazhet janë të qarta se zgjedhjet pa opozitën nuk ndihmojnë progresin europian të Shqipërisë”, ka thënë ndër të tjera Meta.

Intervistën e plotë te Ilir Metës e lexoni KËTU

Kushtetuesja e re në 2 muaj. Meta shkarkohet brenda verës?

Brenda kësaj vere, Gjykata Kushtetuese e Shqipërisë, e mbetur pa gjyqtarë për shkak të vettingut, pritet të bëhet sërish funksionale. Nga 9 gjyqtarë që ka gjithsej, 7 të tillë do të zgjidhen së shpejti.

Sipas Kushtetutës së ndryshuar në korrik të 2016, 9 anëtarë e Gjykatës Kushtetuese zgjidhen 3 nga Kuvendi i Shqipërisë, 3 nga Presidenti dhe 3 nga Gjykata e Lartë, në bashkëpunim me Këshillin e Emërimeve në Drejtësi.

Gazeta Shqiptarja.com shkruan të mërkurën se gjashtë anëtarët e parë, sipas të gjitha gjasave dhe bazuar në afatet ligjore, do të emërohen brenda dy muajve, ku së bashku me anëtaren aktuale Vitore Tusha, Gjykata Kushtetuese do të ketë të paktën 7 anëtarë, të cilët mund të nisin shqyrtimin e 79 kërkesave që janë në pritje për t’u shqyrtuar. Ndërkaq, Presidenti, Kuvendi, politika apo Gjykata e Lartë, kanë zero mundësi dhe hapësira për të bllokuar zgjedhjen e anëtarëve të rinj të Gjykatës së Lartë. Aktualisht, meqenëse Kushtetuesja ka vetëm një anëtare, konkretisht Vitore Tushën, mund të depozitohen kërkesa, ndonëse nuk shqyrtohen. Nëse Kuvendi vendos të shkarkojë Presidentin, vendimi i shkarkimit mund të depozitohet në Kushtetuese, e cila mund ta shqyrtojë me përparësi sapo të emërohen gjashtë anëtarët e parë. 

Presidenti i Republikës ka një rol formal dhe figurativ në zgjedhjen e tre anëtarëve të Gjykatës Kushtetuese. Kreu i shtetit është i detyruar që për çdo vend vakant në Gjykatën Kushtetuese të zgjedhë një emër mes tre emrave të parë në listën e renditur nga Këshilli i Emërimeve në Drejtësi. Nëse Presidenti refuzon që ta ushtrojë këtë të drejtë brenda 30 ditëve, kandidati i renditur në krye të listës konsiderohet i emëruar.

Dule i kërkon Metës të shpërndajë parlamentin

Kryetari i Partisë Bashkimi për të Drejtat e Njeriut, Vangjel Dule ka reaguar për krizën politike në vend, duke i kërkuar Presidentit Ilir Meta të shpërndajë parlamentin.

Me anë të një statusi, publikuar në twitter, Dule shprehet se aktualisht nuk përmbushet neni 64 i Kushtetutës për pasjen e 140 deputetëve në parlament.

Në këtë linjë, Dule, duke pasur parasysh mungesën e Gjykatës Kushtetuese, i kërkon Ilir Metës që të shpërndajë parlamentin.

“Pavarësisht farsës së zëvëndësimit të opozitës, tani edhe me saktësi matematike nuk mund të plotësohet më kërkesa e nenit 64 të Kushtetutës për 140 deputetë. Kuvendi ka rënë”.

“Në mungesë te Gjykatës Kushtetuese, arsyeja juridike kërkon nismën e Presidentit për shpërndarjen e tij”, shkruan Dule në rrjetet sociale.

Gjykatës Kushtetuese i ikin 10 kandidatë

Këshilli i Emërimeve në Drejtësi ka zhvilluar sot mbledhjen e radhës për vlerësimin e kandidatëve në Gjykatën Kushtetuese dhe atë të Inspektorit të Lartë të Drejtësisë. KED vendosi sot përfundimin e procedurës së verifikimit dhe vlerësimit të kandidaturave të tërhequra nga kandiditimi dhe ato që janë të ndaluar.

Këshillimi i Emërimeve në Drejtësi, pasi shqyrtoi procedurën e ndjekur për verifikimin e kandidaturës dhe aktet përkatëse për shprehjen e vullnetit për tërheqje nga kandidimi dhe për ndalimin për kandidim mbi bazën e korrespondencës me ILDKPI për mosdorëzimin në afat të deklaratave të pasurisë sipas ligjit (brenda 15 ditëve), ka vendosur përfundimin e procedurës së verifikimit, vlerësimit, pikëzimit dhe renditjes së kandidaturës për 5 kandidatë dhe ndalimin e kandidimit për 5 kandidatë të tjerë, në vendet vakante ekzistuese.

Lista e kandidatëve të tërhequr nga kandidimi, për të gjitha pozicionet janë Alban Brati, Irena Reso, Theodhori Sollaku, Genci Ismaili, Avni Shehu. Ndërsa lista e kandidatëve të ndaluar nga kandidimi janë Ardita Alsula, Denar Biba, Kristaq Traja, Vasil Bendo, Kostandin Kazanxhi.

Vendet vakante në Gjykatën Kushtetuese pritet të jenë të plotësuara brenda qershorit të këtij viti.

Skip to toolbar