Në rrezik plotësimi i 6 vendeve në Gjykatën Kushtetuese

Në Shqipëri, procesi i nisur për anëtarët e rinj të Gjykatës Kushtetuese nuk do të mund të çojë në plotësimin e 6 vendeve bosh të cilat duhet të emërohen 3 nga presidenti dhe 3 nga parlamenti.

Në mbledhjen e fundit të dy ditëve më parë, Këshilli i Emërimeve në Drejtësi ka vendosur ndalimin e kandidimit ndërmjet të tjerëve dhe për Fiona Papajorgjin, Valbona Balën dhe Sinan Tafajn. Këta tre emra ishin të vetmit që kandidonin për zëvendësimin e ish anëtarit të Gjykatës Kushtetuese, Fatos Lulo, të rrëzuar nga procesi i rivlerësimit të gjyqtarëve. Në një situatë të tillë, në përfundim të të gjitha procedurave, Parlamentit i duhet të shpallë një thirrje të re.

Në këtë mënyrë, Gjykata Kushtetuese, e cila aktualisht ka vetëm një anëtar, Vitore Tushën, pritet të ketë vetëm 5 anëtarë të rinj, duke bërë që numri të shkojë në limitet e funksionimit të saj dhe mundësisë së vendimarrjes, vetëm me 6 gjyqtarë.

Por ky proces rrezikohet dhe nga një moment tjetër, që mund ta reduktojë edhe me një tjetër anëtarë Gjykatën. Për shkak të numrit të kufizuar të kandidatëve që janë përzgjedhur, gjithshka duket se do të jetë në dorë të presidentit Iir Meta. Nëse Kreu i Shtetit për tre vendet vakante të shpallura prej tij, do të përzgjidhte emrat e Arta Vorpsit, Besnik Muçit dhe Elsa Toskës, atëherë automatikisht, do të mbetej pa kandidat vakanca e shpallur nga parlamenti për zëvendësuesin e ish anëtarit Vladimir Kristo. Ky rast mund të tejkalohet nëse do të ketë një koordinim mes dy institucioneve, në mënyrë që të mos pengojnë njëra tjetrën, dhe presidenti do të zgjidhte të paktën një nga dy kandidatët e tjerë të kualifikuar.

Deri më tani 12 kandidatë janë rrëzuar, dhe vetëm 5 janë përzgjedhur. Nga këto Besnik Muçi pret vendimin e Kolegjit të Posaçëm të Apelimit në fillim të shtatorit, ndërsa për Regleta Panajotin, pritet të shihet nëse Komisioneri Publik do të bëjë ose jo ankimim për vendimin e Komisionit të Pavarur të Kualifikimit, i cili e konfirmoi atë në detyrë. Në listë janë dhe dy kandidatë të tjerë në pritje të shqyrtimit./VOA/

24 emrat që u ‘dogjën’ për në Kushtetuese, mes tyre dhe sekretari i Bashës

Këshilli i Emërimeve në Drejtësi vijon verifikimin e kandidatëve për plotësimin e gjashtë vendeve vakante në Gjykatën Kushtetuese, të shpallura nga Presidenti dhe Kuvendi. Javën e kaluar, KED shpalli 4 kandidatët e parë që plotësojnë kriteret për t’u bërë pjesë e Gjykatës Kushtetuese, ndërsa përjashtoi nga gara pesë kandidatë. Anila Guri dhe Ilir Mustafaj u përjashtuan sepse janë shkarkuar nga Komisioni i Vetingut, ndërsa Dedë Kasneci, Mimoza Qinami dhe Vladimir Gërmenji janë përjashtuar për arsye që nuk janë bërë ende me dije nga KED. Ndërkaq, Shqiptarja.com identifikon edhe një grup tjetër kandidatësh për anëtarë të Gjykatës Kushtetuese, të cilët janë përjashtuar nga gara nga Këshilli i Emërimeve në Drejtësi si dhe që janë tërhequr nga gara.

Ish-drejtuesja e Njësisë për Dekriminalizimin në Prokurorinë e Përgjithshme, Rovena Gashi, është përjashtuar nga gara për t’u bërë pjesë e Gjykatës Kushtetuese. Gashi kandidoi për nga gjashtë vendet vakante nga Kushtetuesja, por u shkarkua nga detyra në të dy shkallët e Vetingut, për shkak të problemeve me pasurinë. Gjithashtu, Luan Dervishi, gjyqtar në Gjykatën e Apelit Shkodër, nuk është kualifikuar si nga KED si kandidat potencial për Gjykatën Kushtetuese. Dervishi është shkarkuar nga detyra nga Komisioni i Pavarur i Kualifikimit, organi bazë i Vetingu. Ndërkaq, Dervishi ka kërkuar në Kolegjin e Apelimit rrëzimin e këtij vendimi dhe rikthimin në detyrë. Kolegji ende nuk ka marrë një vendim për këtë çështje. Në 14 maji të 2019, Këshilli i Emërimeve në Drejtësi ka njoftuar se u ka ndaluar kandidimin për në Gjykatën Kushtetuese Denar Bibës, nënkryetar i KQZ dhe Kristaq Trajës, kryetar i KKRTSH. Po ashtu, u është ndalur kandidimi Ardita Alsulës, Vasil Bendos dhe Kostandin Kazanxhiut. Përjashtimi i pesë emrave të fundit nuk ka lidhje me procesin e Vetingut. Gjithsej janë 12 kandidatë, të cilët kanë shprehur ambicien dhe kanë aplikuar për t’u bërë pjesë e drejtësisë, por që janë përjashtuar nga gara nga Këshilli i Emërimeve në Drejtësi.

Tërheqjet

12 kandidatë kanë aplikuar për t’u bërë pjesë e Gjykatës Kushtetuese, por që më pas janë tërhequr nga gara. Pjesë e kësaj liste edhe Çlirim Gjata, aktualisht Sekretar për Çështjet Ligjore në Partinë Demokratike. Në një kohë kur Lulzim Basha dhe Sali Berisha akuzonin Edi Ramën për kapjen e drejtësisë, sekretari i partisë së tyre Çlirim Gjata ishte në garë për t’u bërë pjesë e gjykatës më të rëndësishme në Shqipëri. Gjata ka marrë postin Sekretarit në PD në janar të këtij viti, ndërsa letra e tij e dorëheqjes nga gara mban datën 10 prill 2019, kohë gjatë së cilës KED ka thirrur Gjatën për t’u paraqitur, me qëllim për të nisur verifikimin dhe vlerësimin e tij si kandidat për në Gjykatën Kushtetuese. Pra, dorëheqja e tij ka ardhur në momentin që Këshilli i Emërimeve në Drejtësi ka nisur procedurat për ta verifikuar, ku përfshihet edhe kontrolli i pasurisë.

Ardian Dvorani dhe Medi Bici

Anëtari i vetëm i Gjykatës së Lartë, Ardian Dvorani, është tërhequr nga kandidimi për një vend në Gjykatën Kushtetuese, për shkak se është kryetar i KED. Gjithashtu nga gara është tërhequr edhe Medi Bici, për shkak se u zgjodh anëtar i Këshillit të Lartë Gjyqësor. Që të dy janë konfirmuar në detyrë me vendime të formës së prerë. Ish-kryeprokurori Theodhori Sollaku dhe ish-kryetar i Gjykatës së Kasacionit Avni Shehu, kanë aplikuar për t’u bërë pjesë e Gjykatës Kushtetuese. Që të dy u tërhoqën nga kandidimi.

Përjashtimi

Janë 12 kandidatë, të cilët kanë shprehur ambicien dhe kanë aplikuar për t’u bërë pjesë e drejtësisë, por që janë përjashtuar nga gara nga Këshilli i Emërimeve në Drejtësi.

Tërheqjet

Kandidatët e përjashtuar dhe të tërhequr nga gara për Gjykatën Kushtetuese

Anila Guri, gjyqtare e Gjykatës së Tiranës, e shkarkuar nga Vetingu, përjashtuar nga KED.

Ilir Mustafaj, gjyqtar i Gjykatës së Tiranës, i shkarkuar nga Vetingu, përjashtuar nga KED.

Rovena Gashi, e shkarkuar nga të dy komisionet e Vetingut, përjashtuar nga KED.

Luan Dervishi, gjyqtar në Gjykatën e Apelit Shkodër, shkarkuar nga KPK, çështja në Kolegj, përjashtuar nga KED.

Dedë Kasneci, i përjashtuar nga Këshilli i Emërimeve në Drejtësi.

Mimoza Qinami, e përjashtuar nga Këshilli i Emërimeve në Drejtësi.

Vladimir Gërmenji, i përjashtuar nga Këshilli i Emërimeve në Drejtësi.

Denar Biba, nënkryetar i KQZ, përjashtuar nga KED.

Kristaq Traja, kryetar i KKRTSH, përjashtuar nga KED.

Ardita Alsula, përjashtuar nga KED.

Vasil Bendo, përjashtuar nga KED.

Kostandin Kazanxhi, përjashtuar nga KED.

Kandidatët e tërhequr nga gara

Ardian Dvorani, është tërhequr nga kandidimi për shkak, për shkak se është kryetar i KED, konfirmuar në detyrë nga Vetingu

Medi Bici, është tërhequr nga kandidimi për shkak se u zgjodh anëtar i Këshillit të Lartë Gjyqësor, konfirmuar në detyrë nga Vetingu

Çlirim Gjata, i tërhequr nga gara, për shkak se mban post politik në Partinë Demokratike.

Elsa Toska, këshilltare ligjore pranë Gjykatës Kushtetuese, e konfirmuar në detyrë nga Vetingu, por është tërhequr nga gara

Alban Brati, i tërhequr nga gara.

Irena Reso, e tërhequr nga gara.

Theodhori Sollaku, i ish-kryeprokuror, tërhequr nga gara.

Avni Shehu, ish-kryetar i Gjykatës së Kasacionit, i tërhequr nga gara.

Genci Ismaili, i tërhequr nga gara.

Elira Kokona, tërhequr nga kandidimi.

Kestrin Katro, tërhequr nga kandidimi.

Prel Martini, tërhequr nga kandidimi.

Kandidatët e kualifikuar për 6 vende vakante në Kushtetuese

1. Arta Vorpsi, për vendin vakant të shpallur nga Presidenti i Republikës, në datën 07.02.2018;

2. Arta Vorpsi, për vendin vakant të shpallur nga Kuvendi, në datën 12.02.2018;

3. Arta Vorpsi, për vendin vakant të shpallur nga Presidenti i Republikës, në datën 04.03.2019;

4. Arta Vorpsi, për vendin vakant të shpallur nga Kuvendi, në datën 04.03.2019;

5. Besnik Muçi, për vendin vakant të shpallur nga Presidenti i Republikës, në datën 07.02.2018;

6. Besnik Muçi, për vendin vakant të shpallur nga Kuvendi, në datën 12.02.2018;

7. Besnik Muçi, për vendin vakant, vakancë e parakohshme, të shpallur nga Presidenti i Republikës, në datën 07.02.2018;

8. Fiona Papajorgji, për vendin vakant të shpallur nga Presidenti i Republikës, në datën 04.03.2019;

9. Fiona Papajorgji, për vendin vakant të shpallur nga Kuvendi, në datën 04.03.2019;

10. Regleta Panajoti, për vendin vakant të shpallur nga Presidenti i Republikës, në datën 07.02.2018;

11. Regleta Panajoti, për vendin vakant, vakancë e parakohshme, të shpallur nga Presidenti i Republikës, në datën 07.02.2018./Shqiptarja.com

Gjykata Kushtetuese, për dy ditë lista përfundimtare e kandidatëve

Gjykata Kushtetuese është shumë pranë krijimit të saj. “Për dy ditë do të jetë gati lista përfundimtare me kandidatët që plotësojnë kriteret për të qenë anëtarë të Gjykatës Kushtetuese.” Kështu ka deklaruar kreu i Këshilli të Emërimeve në Drejtësi, Ardian Dvorani.

“Menjëherë pas përfundimit të verifikimeve nga KED, do të nisë intervistimi i kandidatëve. KED ka përfunduar verifikimet për 11 nga 14 kandidatët, që garojnë për 6 vendet vakante.” tha Dvorani për ABC news.

Gjykata Kushtetuese, organi më i lartë i drejtësisë që garanton respektimin e Kushtetutës, aktualisht është jashtë çdo funksioni. Puna për ngritjen dhe funksionimin e saj ka nisur në fillim të korrikut me emrat e kandidatëve të parë që pritet t’i drejtohen Kuvendit dhe Presidentit. Gjykata Kushtetuese përbëhet nga 9 anëtarë , ku tre anëtarë do të duhet të emërohen nga Presidenti i Republikës, tre anëtarë zgjidhen nga Kuvendi dhe tre anëtarë zgjidhen nga Gjykata e Lartë.

Kjo gjykatë pritet të bëhet funksionale në fillim të shtatorit dhe ndër çështjet e para që pritet të diskutojë është shkarkimi i presidentit Meta, kërkesë e miratuar në Kuvend me 100 vota pro. Një tjetër kërkesë e dërguar në Kushtetuese është edhe ajo e Shoqatës së Bashkive, e kryesuar nga Voltana Ademi për të shpallur procesin e 30 qershorit antikushtetues si dhe vendimin e fundit të çuar nga presidenti Meta për ligjin për shembjen e Teatrit Kombëtar.

Zhbllokohet Kushtetuesja, emrat e 4 kandidatëve të parë për 6 vende vakante

Këshilli i Emërimeve në Drejtësi i ka hapur rrugë të enjten plotësimit të vendeve vakante në Gjykatën Kushtetuese, boshatisja e të cilës për shkak të veprimit të ligjit të Vetingut, është kthyer në ‘mollë sherri’ mes opozitës dhe mazhorancës. KED ka publikuar ditën e djeshme listën e parë me katër kandidatë për gjashtë vende vakante në Kushtetuese, të shpallura nga Presidenti i Republikës dhe Kuvendi.

Pjesë e listës së parë për t’u bërë pjesë e Gjykatës Kushtetuese është këshilltarja ligjore në Gjykatën Kushtetuese, Arta Vorpsi, e cila është kualifikuar për vendet vakante të shpallura nga Presidenti në datat 7 korrik 2018 dhe 4 mars 2019, si dhe për vendet vakante të shpallura nga Kuvendi në datat 12 shkurt 2018 dhe 4 mars 2019. Kandidati tjetër është prokurori i Krimeve të Rënda, Besnik Muçi, i cili është kualifikuar si kandidat për vendi vakant i shpallur nga Presidenti në 7 korrik 2018 dhe nga vendi vakant i shpallur nga Kuvendi në 13 shkurt 2018.

Fiona Papajorgji, këshilltare ligjore në Gjykatën Kushtetuese, është shpallur kandidate për t’u bërë pjesë e kësaj gjykate, për vendet vakant të shpallura nga Presidenti në 7 shkurt 2018 dhe 4 mars 2019 si dhe për vendit vakant të shpallur nga Kuvendi po në 4 mars 2019. Kandidatja e katërt është Regleta Panajoti, e kualifikuar për vendin vakant të shpallur nga Presidenti në 7 shkurt 2018.

Ndërkaq, KED ka përjashtuar nga gara Anila Gurin, Dedë Kasnecin, Ilir Mustafajn, Mimoza Qinamin dhe Vladimir Gërmenjin. Këshilli i Emërimeve në Drejtësi po verifikon edhe kandidatët e tjerë nëse plotësojë apo jo kushtet për anëtarë të Gjykatës Kushtetuese.

Kur të plotësohen tre kandidatë për çdo vend vakant të shpallur, KED do t’u dërgojë për votim emrat Kuvendit dhe Presidentit. Në mbledhje e radhës, KED të vendosë lidhur me lejimin ose ndalimin e kandidimit e kandidatëve Elsa Toska dhe Gëzim Allaraj në vendet vakante për gjyqtar në Gjykatën Kushtetuese, si edhe për kandidaten Eris Hysi për vendin vakant të Inspektorit të Lartë të Drejtësisë, shtyhen për mbledhjen e radhës së Këshillit të Emërimeve në Drejtësi. Gjykata Kushtetuese përbëhet nga 9 anëtarë. Tre anëtarë zgjidhen nga Kuvendi, tre nga Presidenti dhe tre nga Gjykata e Lartë, pas verifikimit dhe me propozim të KED. Aktualisht janë 8 vende vakante në Kushtetuese, e cila ka mbetur vetëm me një anëtare, Vitore Tushës, të cilës i ka mbaruar mandati, por që mund të qëndrojë në detyrë deri kur të zëvendësohet./Shqiptarja.com

Kushtetuesja, në gusht çohen emrat e parë në Kuvend dhe te Meta

Gjykata Kushtetuese, organi më i lartë i drejtësisë që garanton respektimin e Kushtetutës, aktualisht është jashtë çdo funksioni. Puna për ngritjen dhe funksionimin e saj ka nisur dhe në fillim të gushtit emrat e kandidatëve të parë pritet t’i drejtohen Kuvendit dhe Presidentit për përzgjedhjen e 3 kandidaturave secili. Lajmin e bëri të ditur kreu i Këshillit të Emërimeve në Drejtësi, Ardian Dvorani i cili tha se KED do të mblidhet të mërkurën për të marrë në shqyrtim kandidatët e parë dhe më pas t’i çohen Kuvendit dhe Presidentit. Në listë janë 14 kandidatë që kanë shprehur interes për të qenë pjesë e trupës së Gjykatës Kushtetuese.

“Në fillim të gushtit mund të dërgojmë renditjen përkatëse të kandidaturave tek Kuvendi dhe Presidenti dhe për një muaj ato kanë të drejt të punojnë me procedurën e tyre. Edhe në rast se ato nuk arrijnë të gjejnë shumicën e nevojshme , ose vlerësojnë të mos shprehen me vendimmarrje përkatëse, ligji dhe kushtetuta parashikojnë mekanizmin që ky proces të mos bllokohet për të zgjedhur kandidatët dhe gjyqtarët e ardhshëm të Gjykatës Kushtetuese.” – tha Dvorani për mediat.

Gjykata Kushtetuese përbëhet nga 9 anëtarë dhe aktualisht ka vetëm një. Ajo është në pritje të plotësimit të vakancave të saj për nisjen nga puna. Për shkak të procesit të vettingut, anëtarët e kësaj gjykatë janë përjashtuar nga drejtësia ose kanë dhënë dorëheqjen duke shmangur procesin e rivlerësimit të pasurisë, pastërtisë së figurës dhe aftësive në punë.

Kjo Gjykatë pritet të bëhet funksionale në fillim të shtatorit dhe se çështja e parë që pritet të diskutojë është shkarkimi i presidentit Meta, e miratuar në Kuvend me kërkesë të Partisë Socialiste . Një tjetër kërkesë e dërguar në Kushtetuese është edhe ajo e Shoqatës së Bashkive, e kryesuar nga Voltana Ademi për të shpallur procesin e 30 qershorit antikushtetues.

Voltana Ademi çon 30 qershorin në Kushtetuese: Të shpallet pavlefshmëria e tyre

Shoqata e Bashkive ka dorëzuar ditën e enjte në Gjykatën Kushtetuese kërkesën për të shpallur procesin e 30 qershorit antikushtetuese. Kërkesa u dorëzuar nga kryetarja e Shoqatës së Bashkive, Voltana Ademi, e cila është njëherësh edhe kryetare e Bashkisë Shkodër. Ademi, tha se në këtë kërkesë parashtrohen dy çështje, konstatimi antikushtetues i procesit të 30 qershorit dhe verifikimin e kushtetutshmërisë së Bindjes Demokratike lidhur me regjistrimin e saj për 30 qershorin. Ademi tha se kjo kërkesë e Shoqatës së Bashkive të shqyrtohet sapo të krijohet Gjykata Kushtetuese dhe shpreson që Rama të mos pengojë ngritjen e saj.

“Jemi këtu duke iu referuar asaj që është e drejtë kushtetuese dhe publike në interes të qytetarëve. Dekreti duhet të merrej në konsideratë, shpresoj që në momentin e parë që të jetë në punë të nis gjykimin e një çështje me rëndësi. Ne shpresojmë që Rama të mos pengojë ngritjen e gjykatës dhe të marrë sa më shpejt çështjen në gjykim. Ne po veprojmë në mënyrë institucionale. Gjithë kryetarët e bashkive i janë drejtuar institucioneve të drejtësisë, një e drejtë e jonë, për të ndërtuar demokracinë mbi bazën e shtetit. Apeloj që çështjet të hetohen dhe gjykohen në mënyrë të pavarur duke mos iu nënshtruar presionit politik. Ajo që ne dimë është se kemi gjykata që kanë vepruar në mënyrë të ndryshme dhe kjo ngre një pikëpyetje të madhe e cila do çojë drejt një kaosi që do dojë një shpjegim se çfarë ka ndodhur.”- tha Ademi

Të mërkurën, Gjykata e Durrësit nuk pranoi t’i jap mandati kryetares së re të Bashkisë Durrës, Valbona Sako me pretendimin se partia Bindja Demokratike është regjistruar jashtë afateve gjyqësore ne zgjedhje, ndërsa Gjykata e Tiranës nuk i dha mandatin kryetarit të Bashkisë Vorë, Agim Kajmaku pasi e cilësoi si moskompetencë të saj. Këto dy vendime vijnë në një kohë kur disa gjykata të tjera të vendit kanë miratuar mandatin për disa nga kryetarët e rinj të bashkive të vendit.

Bardhi zbulon skemën e PD: Ja si do qëndrojë në zyrë Voltana dhe Xhelali

Partia Demokratike, po mundohet të gjejë çdo mënyrë, për të delegjitimuar 30 qershorin. Pas kërkesës së dërguar KQZ-së nga Gazmend Bardhi, ku të martën i kërkonte materialet zgjedhore për zgjedhjet, të mërkurën PD ndërmerr një tjetër hap. Është Gazmend Bardhi ai që tregon një tjetër mënyrë, se si PD do të veprojë për të mos njohur zgjedhjet. Sipas sekretarit të përgjithshëm të PD, janë dy mënyra për të bërë të paligjshme mandatet e kryebashkiakëve të dalë nga zgjedhjet e 30 qershorit.

“Sipas ligjeve të vendit, që një Kryebashkiak të marrë detyrën, mandati i tij duhet të vërtetohet nga gjykata, nëse është marrë në përputhje me Kushtetutën, nëse është fituar apo jo në zgjedhje të organizuara në mbështetje të Dekretit të Presidentit. Nëse gjyqtarët do të tregojnë integritet, do t’i binden ligjit dhe nuk do t’i nënshtrohen kërcënimeve me veting apo me mjete të tjera mafioze, të përdorura më parë nga Edi Rama, vendimi i tyre është shumë i thjeshtë: të respektojnë kompetencën kushtetuese të Presidentit për të shpallur datën e zgjedhjeve. Gjyqtarët, ku kandidatët e votimeve të shfuqizuara me dekretin e Presidentit, do të paraqiten për të marrë mandatin e paligjshëm, kanë dy mënyra për të mbrojtur shtetin e së drejtës nga sundimi mafioz i një personi të vetëm. Gjyqtarët të mos vërtetojnë si të vlefshëm mandatet, ose të pezullojnë gjykimin derisa dekreti i presidentit të shqyrtohet nga Gjykata Kushtetuese”, tha Gazmend Bardhi.

Megjithatë, kjo duket se do të jetë karta e fundit që opozita do të përdor, përpara se kryebashkiakët e PD dhe LSI të detyrohen të lirojnë zyrën deri më 12 gusht. Në fakt, Bardhi ka lënë të kuptohet, se kjo do të jetë lëvizja e fundit dhe e vetme, duke pamundësuar njohjen e mandateve të bashkiakëve të rinj në rrugë ligjore, por, gjithsesi pengim me forcë të futjes në zyrë të kryebashkiakëve të rinj nuk do të ketë. “Kjo është pengesa e fundit institucionale mes demokracisë dhe diktaturës!

Është pengesa e fundit institucionale që Edi Rama të marrë nën kontroll të plotë, me votime të paligjshme, edhe hallkën e fundit të pushtetit në vend, pushtetin lokal. Ne nuk kemi për ta lejuar kurrë që kjo të ndodhë, por mënyra për ta ndaluar me sa më pak kosto për vendin është që gjyqtarët t’i binden ligjit dhe të bëjnë drejtësi përmes ligjit”, shprehet Bardhi, duke hequr dorë nga dhuna, dhe përdorur hapësirat ligjore për të nxjerr të pavlefshëm mandatet e bashkiakëve të rinj të zgjedhur më 30 qershor.

Gjykata Kushtetuese, mazhoranca propozon më 5 korrik emrat e parë

Më 5 korrik, mazhoranca do të propozojë emrat për Gjykatën Kushtetuese dhe do t’i paraqesë për t’i diskutuar në Kuvend. Ky lajm u dha nga gazetari Sokol Balla në emisionin e tij Real Story duke konfirmuar edhe atë që është thënë më herët se Gjykata Kushtetuese do të jetë funksionale brenda verës.

Gjykata Kushtetuese aktualisht është jo funksionale prej disa muajsh për shkak se disa prej anëtarëve u përfundoi mandati ndërsa të tjerë nuk kaluan dot procesin e vettingut. Qeveria kërkon që ta vërë atë sa më shpejt në funksion. Arsyeja: Shkelja e Kushtetutës nga presidenti Meta, ku mazhoranca miratoi edhe një rezolutë në Kuvend për shkeljet ligjore që Presidenti bëri me dekretin e tij të anulimit të zgjedhjeve më 30 qershor.

Krijimi i Gjykatës Kushtetuese është një lajm i keq vetëm për Ilir Metën. Çështjen e parë që kjo gjykatë do të shqyrtojë, pas krijimit të saj, është procesi i shkarkimit të Presidentit Meta, ku shumica duket mjaft e vendosur për të çuar deri në fund. Përveç mazhorancës, edhe ndërkombëtarët e kanë kërkuar me ngulm krijimin e kësaj Gjykate sa më shpejtë të jetë e mundur, si një domosdoshmëri për të ruajtur kushtetuan dhe zbatimin ligjit, pa u cenuar nga askush.

Kjo çështje u diskutua edhe në emisionin Real Story me ish deputetin e PD-së, Enkelejd Alibeaj, i cili e kundërshtoi se ky informacion do të ishte i vërtet. Alibeaj deklaroi se si koncept nuk ecën me procedurë dhe me ligj. “Sot që flasim për të arritur te dalja e kandidaturave sipas reformës në drejtësi, duhet të bëhet verifikimi dhe së pari për tu bërë verifikimi, duhet pritur që nga ana e vettingut ta kalojë. Hapi tjetër është pikëzimi që duhet ta bëjë këshilli në drejtësi, që duhet së paku një javë. Më pas këto kandidatura 3 nga kuvendi 3 nga presidenti duhet të shkojnë në Kuvendin e Ligjeve”.

Gjykata Kushtetuese përbëhet nga 9 anëtarë , ku tre anëtarë do të duhet të emërohen nga Presidenti i Republikës, tre anëtarë zgjidhen nga Kuvendi dhe tre anëtarë zgjidhen nga Gjykata e Lartë. /realstory.al

Minxhozi: Gjykata foli, asgjë nuk vlen më…

Nga Skënder Minxhozi

Ka pasur një heshtje të kujdesshme këto kohë nga ana e ndërkombëtarëve, sa herë që pyeteshin për sherrin mes Metës dhe Ramës, në lidhje me zgjedhjet lokale. Përkundër kritikave të shpeshta që kanë prodhuar në momente të tensionuara politike, këtë herë ata e lanë debatin mbi 30 qershorin në “duart e shqiptarëve”. Është një çeshtje e brendshme, zgjidheni ju! Kjo është fraza që u dëgjua në kor nga ambasadorët dhe organizmat ndërkombëtare që folën pasi Ilir Meta “çdekretoi” zgjedhjet.
Tani kjo situatë e habitshme dhe e pakuptueshme ka marrë fund. Kolegji Zgjedhor vendosi t’i japë fund sagës juridike, duke marrë një vendim që pritet t’i japë formë krejt të ndryshme debatit të gjatë për 30 qershorit. Shumica do të ketë një vendim gjyqësor mbi datën që dëshëron për zgjedhjet, presidenti dhe opozita do të kenë një pengesë më shumë në rrugën drejt pengimit të zgjedhjeve, kurse të huajt do të disponojnë një akt juridik mbi të cilin të bëjnë arbitrin e palëve në orët në vijim.

Hyrja në lojë e Kolegjit Zgjedhor nuk do ta fashisë polemikën politike, por i ka dhënë një drejtim definitiv opinionit zyrtar juridik mbi datën e zgjedhjeve lokale.
Ka qenë një vendimmarrje delikate dhe e shumëpritur, pasi edhe në një ambjent thellësisht mosbesues dhe paragjyklues si ky i yni, kur flet gjykata të tjerët duhet të heshtin dhe të zbatojnë vendimin e saj. Opozita e ndjeu se Kolegji ishte vënë në lëvizje nga një parti aleate e PS, me qëllimin që ta detyronte këtë gjykatë të shprehej formalisht mbi datën e zgjedhjeve.

Ajo e di se pas vendimit të Kolegjit, nuk ka më asnjë pengesë formale në rrugën drejt zgjedhjeve të të dielës së ardhshme. Këtë e di edhe Kreu i shtetit, i cili u investua në këtë fazë të luftës politike, me të gjithë arsenalin e institucionit që drejton, duke e ekspozuar veten si një kontigjent të vërtetë sulmi të opozitës, kundër qeverisë dhe kundër zgjedhjeve.
Pas vendimit të Kolegjit, zgjedhjet e 30 qershorit nuk janë më një problem juridik formal. Nyja e interpretimit ligjor të datës së zgjedhjeve tashmë zgjidhur. E diela e ardhshme është ajo që të gjithë prisnim: një problem logjistik, një problem rendi e sigurie, jo një çeshtje gare elektorale apo konkurimi alternativash.

Po shkojmë drejt një dite të nxehtë votimesh, por më mirë një ditë e tillë, sesa një dështim i turpshëm në përmbushjen e detyrës bazë të një demokracie: mbajtjen e zgjedhjeve të lira. Do të votohet pa praninë e një porcioni të madh të spektrit politik e ky është një detaj me peshë mbi imazhin dhe rezultatin e këtyre zgjedhjeve. Por më mirë një palë zgjedhje të këqia se hiç zgjedhje! Kolegji mori të vetmin vendim të mundshëm dhe që evitoi një figurë të shëmtuar brenda dhe jashtë vendit.

Kush janë kandidatët e Kushtetueses (dhe përse duket lajm i keq për Metën)

Po cilët janë kandidatët që janë vetofruar për të qënë anëtarë të Gjykatës Kushtetuese? Emrat, aktiviteti, anshmëria politike janë të rëndësishme të vlerësohen, për shkak të vendimit të rëndësishëm që ata mund të vlerësojnë, sapo të ulen në karrigen prestigjioze të anëtarit të Gjykatës Kushtetuese: ligjshmërinë e Shkarkimit të Presidentit Ilir Meta. Janë dy lista, njëra në derë të Presidentit dhe tjetra në tavolinën e Gramoz Ruçit. Ka prej tyre që kanë aplikuar në të dyja institucionet. Lista e kandidatëve që kanë aplikuar të presidenti, kryesohet nga Alban Brati, kunati i Ben Blushit, ish deputet dhe dikur ish rival i Ramës, ndërsa sot i angazhuar në biznes privat. Avni Shehu është një tjetër kandidat, gjykatës i vjetër i emëruar kryetar i Gjykatës së Lartë që në kohën e Berishës së Parë, në vitin e largët 1996. Shehu ka aplikuar edhe në Kuvend, ku gjasat që ai të fitojë, janë afër zeros, nëse nuk merr parasysh vetëm faktin se origjina e tij dibrane, mund të jetë një plus për vlerësimin e kandidaturës së tij, në Komisionin e Ligjeve, kryesuar nga Dibrani Ulsi Manja. Tek Presidenti ka aplikuar edhe Denar Biba, ish kryetar dhe tani nënkryetar i KQZ, personi që shpalli absolutisht të pavlefshëm dekretin e shfuqizimit të zgjedhjeve nga ana e Presidentit, po me siguri aplikimi ka qënë më i hershëm. Biba gjithsesi ka aplikuar per anëtar të gjykatës së Kushtetuese edhe pranë kuvendit, ku me siguri kandidatura e tij do të trajtohet me më shumë qetësi dhe dashuri nga partia që e propozoi në KQZ, sesa nga Ilir Meta. Në presidencë ka aplikuar edhe Ilir Panda, që në kohën e Ilir Metës si kryeministër, kryesonte KLD. Shpesh i anatemuar nga politika si i majtë, ai gjithsesi ja ka arritur të mbajë një profil të ulët dhe të mbijetojë në pozicione të rëndësishme në Gjyqësor 20 vitet e fundit. Panda rezulton edhe në listën e kandidatëve të Kuvendit. Juristi i njohur Kristaq Traja, që ka përfaqësuar Shqipërinë si Gjykatës edhe në Strasburg ka aplikuar në të dyja listat. Drejtues i një zyre të njohur avokatie, ai sot është kryetar i këshillit drejtues të Radiotelevizionit Shqiptar. Ish prokurori i përgjithshëm Theodhori Sollaku ka aplikuar në të dyja institucionet, por me gjasë me “cilësi” të ndryshme. Ndërsa tek Presidenti Ilir Meta ai shkon me CV e ish kreut të akuzës, që u zgjodh aty edhe me vullnet të Metës (i cili në 2002, bashkoi votat me Berishën per të shkarkuar Arben Rakipin dhe për të vënë në këtë pozicion pikërisht, Sollakun, ish këshilltarin juridik të Doktorit për 5 vjet në Presidencë), në Kuvend, Sollaku ka cilësinë e “viktimës”. Pasi ishte pikërisht Berisha që e shkarkoi me dy komisione hetimore rresht në vitin 2007 ish beniaminin e tij. Dhe Socialistët e bënë në 2013, anëtar të Asamblesë Kombëtare. “Bixhozi” i Sollakut me politikën mund të rezultojë i frytshëm, pasi ai i jep garanci të dyjave palëve, se së paku nuk do tu bëjë keq dhe do zgjedhë pasivitetin. Një gjë që e bëri mirë nga viti 2002 deri kur u shkarkua në 2007. Qetësi u thye vetëm nga ngjarje të rënda dhe të pazbuluara si vrasja e shoferit të tij në vitin 2005… Te Presidenti ka aplikuar edhe Rovena Gashi, ish prokurorja e shkarkuar nga Arta Marku me vendim gjykate e më pas edhe nga Vettingu. Zonja Gashi, një nga bashkëpunëtoret më të afërta të ish kryeprokurorit Llalla, nuk dihet pse figuron në listën e botuar nga shqiptarja.com, pasi ajo nuk mund të aplikojë më për nje pozicion në sistemin e drejtësisë. Në presidencë dhe Kuvend ka aplikuar edhe Sinan Tafaj, i Shoqatës së të verbërve. Jurist në profesion ai nuk ka ngurruar ta përdorë handikapin e tij, si avantazh diskriminues pozitiv, edhe më herët kur ka aplikuar (pa sukses) për anëtar të Gjykatës së Lartë. Në listën e Kuvendit shfaqet dhe emri i Shpresa Beçajt, ish kryetare e Gjykatës së Lartë, e shkarkuar Bujar Nishani, menjëherë pasi ai u bë kryetar i KLD-së në vitin 2012, me sa duket si e njohur për afëritë me Bamir Topin. Beçaj nuk ka aplikuar në Presidencë, megjithëse dikur, kur Meta ishte Ministër i jashtëm dhe vajza e saj u emërua në një ambasadë të rëndësishme, marrëdheniet e saj me presidentin ishin shumë të mira. Prishja e tyre ishte dhe mbetet një mister, por fakti që ajo s ‘e ka cuar emrin në Presidencë dhe armiqësia e saj personale me Metën, e bëjnë një kandidaturë të preferuar tek shumica e majtë në Kuvend. Tek lista e Kuvendit ka shumë emra që nuk janë kandiduar edhe në Presidencë, dhe mbiemrat e tyre lidhen me emra të njohur të Partisë Socialiste, çka të shtyn të besosh se të preferuarit për anëtar të Gjykatës Kushtetuese, nuk do t’i shpëtojnë analizës së mësipërme si dhe vlerësimit subjektiv politik. Dhe në dritën e zhvillimeve dhe procesit të shkarkimit të Presidentit, kjo listë, nuk duket një lajm i mirë për Ilir Metën. Së paku në letër. /realstory.al/

Kandidatët që kanë aplikuar te Presidenti i Republikës Alban Brati Avni Shehu Besnik Muçi Dedë Kasneci Denar Biba Gëzim Allaraj Ilir Mustafaj Ilir Panda Kristaq Traja Luan Dervishi Petrit Kaja Rexhep Bekteshi Theodhori Sollaku Vladimir Gërmenji Ardita Alsula Elsa Toska Regleta Panajoti Rovena Gashi Valbona Bala Zhaklina Peto Prel Martini Sinan Tafaj Ardita Buna Alsula Kandidatët që kanë aplikuar në Kuvend Anila Kristani Arta Vorpsi Besnik Muçi Çlirim Gjata Dashamir Kore Dedë Kasneci Denar Biba Elsa Toska Gëzim Allaraj Ilir Kadiu lir Panda Irena Nino Kazhanxhi Kristaq Traja Rexhep Bekteshi Sinan Tafaj Sokol Hasani Shpresa Beçaj Theodhori Sollaku Valbona Bala Ilir Panda Sinan Tafaj Theodhori Sallaku Vasil Bendo Elsa Toska Fiona Papajorgji Valbona Bala Avni Shehu Marsida Xhaferllari Theodhori Sollaku