Meta sqaron takimin me Alex Soros

Dy ditë pasi priti në zyrë djalin e George Soros, Aleksandër Soros, takim për të cilin u kritikua shumë, duke marrë shkas nga akuzat e tij të forta ndaj miliarderit amerikan, Ilir Meta ka bërë një reagim publik në lidhje me arsyet e këtij takimi. Meta shprehet se kërkesa për takimin ka qenë e “Fondacionit Soros”, pas akuzave publike për rolin e këtij fondacioni në kapjen e drejtësisë së re nga Kryeministër.

“Unë nuk i di arsyet e vizitës së z.Soros në Tiranë, dhe as kam pyetur për to, pasi Shqipëria është e hapur për t’u vizituar nga të gjithë. Ajo që di është se nga muaji korrik kur unë bëra publike disa akuza për rolin e Fondacionit “Shoqëria e hapur” për kapjen e drejtësisë së re nga Kryeministri, ka patur disa kërkesa zyrtare për takim nga përfaqësues të këtij Fondacioni, në veçanti për të sqaruar pozicionin e tyre lidhur me Reformën në Drejtësi”, thotë Meta.

Por, kreu i shtetit ka bërë një tërheqje në lidhje me akuzat e ngritura gjatë verës. Nga deklarata e të dielës, Meta shprehet se “ajo që di është se nga muaji korrik kur unë bëra publike disa akuza për rolin e Fondacionit “Shoqëria e hapur” për kapjen e drejtësisë së re nga Kryeministri”, duke deklaruar se akuzat ishin ndaj fondacionit, dhe jo George Soros direkt. Por, në të vërtetë, Meta iu drejtua në akuzat e tij në korrik, miliarderit amerikan dhe të birit, për të cilin u shpreh se viziton shpesh Tiranën. “Kam dy fjalë edhe për Sorosin; i them Sorosit t`i gëzojë miliardat e veta. Shqipëria është vend i vogël për përmasat e tij. Të vazhdojë punën dhe të investojë në tregjet e mëdha, se Ilir Meta nuk është i racës së Gruevskit është President i Shqipërisë dhe do i dalë për Zot Shqipërisë. Është i racës së Avni Rustemit”, tha ndër të tjera Meta kur e akuzoi drejtpërdrejt George Soros për ndikimin e tij te Reforma në Drejtësi. Megjithatë, pas takimit me djalin e miliarderit amerikan, ai duket se ka ndryshuar qëndrim dhe është zbutur në akuzat e tij.

Më tej, ai sqaron se nëse nuk do e kishte pritur Aleks Soros në takim, “do të ishte jo etike nga ana e tij”. Meta shprehet se “shmangiet dhe gënjeshtrat nuk jaën në karakterin e tij”. Lidhur me temat e diskutuara në takim, Meta thotë se foli për katër tema, jo tre siç njoftoi zëdhënësi i tij në deklaratën për shtyp.

“Takimi është bërë me kërkesë zyrtare dhe ka qenë zyrtar. Tema e të ashtuquajturit “Mini-Shengen” nuk ka ekzistuar në takim. Tre temat që unë jam përqëndruar kanë qenë kapja e drejtësisë nga Kryeministri, përkeqësimi i lirisë së medias dhe të lirisë së shprehjes, dhe gjallërimi i shoqërisë civile në vend kundër shkeljes së të drejtave të njeriut dhe dhunimit të vlerave të demokracisë. E vetmja temë që nuk u përmend nga Zëdhënësi im ishte ajo e menaxhimit të pasojave të tërmetit”, thotë Meta.

Në fund, duke përmendur dhe njëherë qëndrimin e tij për Mini-Shegenin, “se çdo iniciativë rajonale është e dobishme kur është gjithëpërfshirëse e jo përjashtuese, kur udhëhiqet nga partneriteti dhe jo paternalizmi, kur sjell kohezion dhe jo konfuzion, e aq më tepër përçarje”, Meta thotë se asnjë takim i tij nuk e ndryshon axhendën për “sovranitetin”.

“Asnjë takim nuk e ndryshon axhendën e Presidentit të Republikës së Shqipërisë dhe përkushtimin e Tij për t’iu rikthyer sovranitetin të gjithë qytetarëve shqiptarë përmes garantimit të zbatimit të referendumit si e drejtë kushtetuese. Shqipëria e para, Shqipëria në Bashkimin Europian”, thotë Meta.

Kujtojmë se në muajin korrik, Ilir Meta akuzoi Geroge Soros për “deep state”. Fondacioni “Soros” është një nga donatorët dhe mbështetësit e Reformës në Drejtësi në Shqipëri. Gjithashtu, ky fondacion dhe familja Soros, ishin nga të parët që reaguan për tërmetin e 26 nëntorit, duke shprehur mbështetjen me dhurimin e rreth 500 mijë dollarëve për rindërtimin. Meta pranon se është folur dhe për këtë temë, por ajo nuk u bë publike të shtunën nga zëdhënësi i tij, Tedi Blushi.

PS shton akuzat ndaj Metës, por shtyn vendimin me 4 muaj

Komisioni Hetimor për shkeljet e Kushtetutës nga Ilir Meta u mblodh të premten për të miratuar shtyrjen e afateve të punës së tij dhe me 4 muaj të tjerë, pasi në veprimet e këtij komisioni u përfshi dhe hetimi për dekretimin e Marsida Xhaferllarit si anëtare të Gjykatës Kushtetuese. Relatorja e kërkesës, Klotilda Bushka propozoi që për rastin e emërimit të Marsida Xhaferllarit anëtare të Gjykatës Kusthetuese nga Ilir Meta, të thirret për dëshmi në Komision kreu i Këshillit të Emërimeve në Drejtësi, Ardian Dvorani.

Gjithashtu, ajo propozoi që Kuvendi ti drejtohet Komisionit të Venecias për një opinion në lidhje me emërimin e Marsida Xhaferllarit në Gjykatën Kushtetuese, dhe refuzimin e Presidentit për të zhvilluar betimin e Arta Vorpsit si anëtare të kësaj gjykate. Por, deputetët e opozitës në Komision u shprehën kundër kërkesës për shtyrjen e afateve të veprimtarisë së komisionit dhe përfshirjen e hetimit të Ilir Metës për emërimet në Gjykatën Kushtetuese. “Të mbarojmë fillimisht për atë çfarë u mblodhëm. Më pas përfundojmë, dhe vijojmë me shtesat.”- tha Zeneli.

Halit Valteri gjithashtu deklaroi; “Nuk mund të merremi se çfarë bën sot Meta apo çfarë do bëjë Meta. Nuk bëhet kjo punë shto ujë e shto miell. Jemi kundra shtimit të objekteve të hetimit për Presidentit në këtë Komision.”, tha Valteri. Megjithatë, pavarësisht kundërshtive deputetët e opozitës në Kuvend miratuan kërkesën për zgjerimin e hetimeve për Ilir Metën si dhe kërkesën për t`ju drejtuar Komisionit të Venecias për opinion në lidhje me emërimet në Gjykatën Kushtetuese.

Kushtetuesja, nesër në Kuvend kërkesa e 56 deputetëve për hetimin e Metës

Pas situatës dramatike të krijuar nga tërmeti i 26 nëntorit, mesi i kësaj jave pritet të rihapë “luftën” politike në vend. Të enjten në Kuvend do të diskutohen për miratim disa projekt-vendime, rezoluta e ligje të rëndëishme. Një ndër pikat që do të diskutohet në Kuvend, është kërkesa për shtesë në objektin e Komisionit Hetimor për Presidentin.

Kokretisht, me firmën e 56 deputetëve të Kuvendit, do të kërkohet që Komisioni Hetomir: “Për kontrollin e ligjshmërisë së veprimeve të kryera nga ana e Presidentit të Republikës së Shqipërisë, në kuadër të ushtrimit të kompetencave të tij lidhur me zhvillimin e zgjedhjeve për organet e qeverisjes vendore”, të futet edhe kontrolli i ligjshmërisë për emërimin e Marsida Xhaferllarit dhe refuzimin e kryerjes së betimit të Arta Vorpsit, si anëtare të Gjykatës Kushtetuese.

Ndërkohë, Presidenti i Republikës, në një kurs përplasje të plotë të tij me Kuvendin dhe institucione të tjera kushtetuese, ka vijuar cenimin e Kushtetutës me pasoja të rënda, përmes veprimeve konkrete apo mosveprimeve të qëllimshme, të cilat po i rendisim dhe faktojmë në vijim. Rrjedhimisht, vlerësojmë të domosdoshme që edhe këto veprime të bëhen pjesë e vlerësimit nga Kuvendi i Republikës, në kuadër të procedurës së nisur tashmë për shkarkimin e Presidentit të Republikës”, thonë deputetët që kanë votuar dokumentin që i drejtohet parlamentit.

Duke njohur Arta Vorpsin si anëtare të ligjshme të Gjykatës Kushtetuese, që mori detyrën sipas mekanizmit zhbllokues të Kushtetutës, deputetët tregojnë shkeljet që Ilir Meta bëri në rastin e refuzimit të kryerjes së betimit nga Arta Vorpsi.

“Është cenuar e drejta e një gjyqtari kushtetues të ushtrojë detyrën. Është shkelur detyrimi kushtetues për të realizuar betimin e gjyqtarit kushtetues. Është cenuar funksionaliteti i vendimarrjes së Gjykatës Kushtetuese. Është cenuar e drejta e subjekteve për një process të rregullt kushtetues brenda afateve të arsyeshme”, thuhet ndër të tjera në dokument. /Realstory.al/

Si Real Story lajmëroi në 9 korrik themelimin e partisë se re nga Ilir Meta

Kreu i shtetit Ilir Meta tha se më 8 dhjetor do të zbresë në shesh dhe nuk do të lëvizë që aty deri sa shqiptarët të marrin të drejtën e tyre për referendum për çështjet kombëtare dhe ato lokale. Ai kërkoi që edhe kompetencat e tij të vendosen përmes referendumit nga populli dhe jo Gjykata Kushtetuese. Këto deklarata të presidentit Meta ku thotë se epoka e partive përfundoi dhe tashmë erdhi ajo e referendumeve janë një sinjal i qartë se ai po planifikon të ardhmen e tij pas karriges së presidentit dhe ajo lidhet me krijimin e një partie të re, ku modeli i saj është ajo e “Partisë Radikale” të politikanit italian Marco Pannella, bazë e së cilës janë referendumet. Krijimin e një paritë të re nacionaliste nga Ilir Meta, RealStory.al e paralajmëroi që më 9 korrik të 2019.

RealStory.al shkruante se Meta nuk mund të kthehet më te LSI dhe për më tepër të bëhej qesharak dhe të hynte në garë me bashkëshorten e tij dhe për këtë po kërkonte një opsion të ri, atë të krijimit të një partie të re politike. Një parti nacionaliste si ajo e Victor Orban, një parti presidenciale si AKP e Erdogan apo një parti anti-Soros si e Trump.

“Meta rihyn në lojë si Anteu pas rënies në Toke, si Feniksi pas djegies, ai pas ikjes nga presidenca formon partinë e re. Jo me Monikën por me Klajdën, jo me Petritin, por me Tur Zhejin, jo me Balliun por me Fahriun. Dikush mund të thotë, siç thonë francezët: Një gjellë e vjetër në pjata të reja” thuhet në shkrimin e Real Story, ku vetë Ilir Meta e konfirmoi në konferencën e së hënës se ai kërkon një parti radikale dhe që baza e saj do të jetë tek gjykimi popullor me referendumet si ajo e Marco Panellës, pjesë e së cilës ka qene dikur edhe Artur Zheji.

Lexoni shkrimin e Real Story më 9 korrik 2019

META NË BOSNJE, THYEN BOJKOTIN SHQIPTAR. KRIJON NJË PARTI TË RE?

Presidenti Ilir Meta ka thyer bojkotin e shqiptarëve ndaj samitit të SEECP për shkak të mospjesëmarrjes së Kosovës. Qeveria shqiptare njoftoi se nuk do të merrte pjesë në këtë samit në shenjë solidariteti me Kosovën. Por krejt ndryshe nga ky qëndrim zyrtar i qeverisë shqiptare, ka vepruar presidenti Ilir Meta i cili ka shkuar në Bosnje për të marrë pjesë në samit, si i vetmi shqiptar atje.

I dëshpëruar për kontakte ndërkombëtare, Meta është takuar me Erdogan, me të cilin ka shpeshtuar bisedimet. Erdogan është i njohur për mbështetjen që i jep formacioneve të njerëzve të fortë politikë. A po siguron LSI një suport për erën post presidencë të Metës? Burime shumë konfidenciale i thonë realstory.al se nuk është ky rasti, megjithëse Meta në samitin e SEEPC është shfaqur në krah të presidentit të Turqisë, Erdogan.

Kryemadhi ka deklaruar se Metës që të marrë sërish partinë (LSI) i duhet të futet në garë me të.

Por si duket në kokën e Metës është diçka tjetër: një parti politike, nëse gjithçka dështon dhe ai largohet. I ndërgjegjshëm se LSI e ka kryer misionin e vet; i ndërgjegjshëm se nuk mund të bëhet qesharak dhe të sfidojë bashkëshorten në garë partiake, ose më saktë qëllimisht duke dhënë këtë ide. Ilir Meta nëse nuk arrin të kapet pas karriges së presidentit, do kërkojë një sfidë të re politike. E pat paralajmëruar këtë në fakt kur i dorëzoi Petrit Vasilit partinë: “Nëse nuk ecni mirë, do kthehem në politikë si Ariel Sharon, do krijoj parti të re dhe e sigurt që do ju mund”, pat thënë atëherë me shaka.

Po si duket nuk paska qenë ashtu. Dhe modeli është i gatshëm. Një parti presidenciale si AKP e Erdogan. Një model i ngjashëm me çiftin Milosheviç-Markoviç që kishin dy parti, njëri nacionaliste tjetra “liberale” me objekt të rinjtë (të preferuarit e Kryemadhit) , por më shumë modeli turk. Ndaj dhe takimet e tij me Erdogan, qoftë dhe me koston të duket si grevëthyes e të marrë pjesë në një samit të bojkotuar nga shqiptarët, si ai i Bosnjes.

Fundja, më mirë shok me Erdogan, sesa dashnor i heronjve sovjetikë.

Më herët, para se të takonte Erdogan, Meta publikoi një foto me dorën në Kushtetutë dhe shkruante “Shqipëria e para”, njëlloj si slogani i Trump. Mos ndoshta ka në mendje krijimin e një partie anti-Soros si e Trump? Një parti nacionaliste, e ngjashme me Firdez të Orban, të cilin e lavdëroi aq shumë në konferencën e famshme për shtyp.

A ishte pjesë e çmendjes së qëllimshme të presidentit, mesazhi ndaj ndërkombëtarëve dhe shqiptarëve për krijimin e një Firdezi, një AKP, apo një lëvizje anti-Soros nacionaliste në Shqipëri?

Meta beson se PO. Se e majta e LSI është pragmatiste dhe si e tillë ajo shuhet larg pushtetit. Se e djathta e PD po shuhet nën Bashën dhe se Doktori është mjaftueshëm i vjetër për t’i dhënë asaj një dorë për ringritje. Dhe këtu ai rihyn në lojë. Si Anteu pas rënies në Toke, si Feniksi pas djegies, ai pas ikjes nga presidenca formon partinë e re. Jo me Monikën por me Klajdën, jo me Petritin, por me Tur Zhejin, jo me Balliun por me Fahriun. Dikush mund të thotë, siç thonë francezët: Një gjellë e vjetër në pjata të reja. Por Meta është njeri i surprizave. Me ingredientët e duhur, sidomos financiare mund të jetë një gjellë e re në pjata të vjetra. Diçka mes gulashit dhe imam-bajalldisë, mes qetësisë dhe dalldisë. Një surprizë, si Ilir Meta./Realstory.al

META NË BOSNJE, THYEN BOJKOTIN SHQIPTAR. KRIJON NJË PARTI TË RE?

Ngjela: Gjatë këtyre muajve, Meta mund të arrestohet

Nga Spartak Ngjela

Në një krah po vjen SPAK, kurse në krahun tjetër po çthuren mendërisht heronjtë e korrupsionit shqiptar. Nuk mbushin dot fare këta të korruptuar. Po bëhen qesharakë me Perëndimin, se po flasin me frikë, por edhe për një forcë të madhe që thonë se kanë. Pyetja normale për forcën e tyre do të ishte kjo: sa divizione kanë Meta dhe Berisha; dhe sa mjete motorike lufte kanë në dispozicion? Asnjë divizion, madje asnjë togë, dhe asnjë mjet motorik për luftim. Atëherë me çfarë po i kërcënohet Meta Uashingtonit dhe Brukselit? Me asgjë. Por nuk e ka me ata. Këta tanët, me këto dokrra mbajnë përkrahësit e tyre injorantë dhe interesaxhi. Për ata e bëjnë.

Prandaj kanë të drejtë që tallen politikat e mëdha me këta qesharakë. I marin në telefon dhe iu flasin për Venecian. Iu kujtojnë së largu edhe ndonjë fakt korrupsioni apo ndonjë proces të nisur kundër tyre, dhe i lënë që të llomotisin në jerm e përçart nga frika. Tallen me ta. Kurse Meta po pret që ata të tërhiqen, duke kujtuar se do të mendojnë që ky mund të destabilizojë Shqipërinë. As që iu shkon ndërmend ndërkombëtarëve kjo. Ata duan vetëm një gjë: të ecë reforma në drejtësi.

Por, brenda kësaj tallavaje që po e këndon vetë dhe vetëm, Meta kërkon referendum: përse? As vetë Meta nuk e di. Kushtetuta për t’u ndryshuar me amendamente, shkon domosdoshmërisht vetëm mes Parlamentit. Kjo është kushtetuta. Në anën tjetër, Ligji për Referendumet është bllokues për minorancat, sepse, që referendumi të jetë i ligjshëm, duhen 50+1 përqind të zgjedhësve në pjesëmarrje. Metës i duhet një ligj i ri që ta hedhë në referendum për të ndryshuar ligjin e vjetër. Referendumi, do tre muaj të zhvillohet. Gjatë këtyre tre muajve Meta mund të jetë nën arrest.

Por, siç e theksuam, miratimin me referendum të ligjit të ri nuk e lejon as ligji aktual. Me ligjin aktual, që të jetë aktiv si fitues, në referendum duhet të marrin pjesë si votues 50+1 përqind e trupës elektorale. Trupa elektorale në Shqipëri sot është 3.5 milionë votues. Domethënë Metës do t’i duhen rreth 1.7 milionë votues. Asnjëherë nuk është arritur kjo përqindje në votime, se 1.8 milionë votues janë jashtë shtetit.

Për Metën do kthehen këta? Por, është edhe elektorati socialist që sigurisht që nuk del në votin. Si nuk kuptoi kurrë dot asgjë nga jeta moderne dhe nga qytetërimi modern ky fshatar i rëndomtë! Është luftë me mullinjtë e erës kjo lufta jote, zoti Meta. Sepse ke një mur përpara, dhe, për të rrëzuar murin, ke vetëm një kokë. Mos e provo! se do të thyesh kokën dhe jo murin.

ll.

E njëjta psikologji arsyetuese dhe e një niveli të ulët të një province mesjetare është mentaliteti Meta në polemikë. Ka marrë dhe një grusht pseudo gazetarësh që kanë të njëjtën mendësi dhe mungesë të theksuat kulture qytetare. Me këta, Meta përgojon ambasadorët deri në erotikë. Për t’i treguar përkrahësve të vet qorra që nuk është as Uashingtoni, as Berlini dhe as Brukseli kundër Metës, por ambasadorët e korruptuar. Të gjithë këta, njerëz të paqytetëruar, nuk e njohin moralin e hekurt të qytetërimit Perëndimor në cënimin e dinjitetit diplomatik. Kundërpërgjigjia në raste të tilla historikisht ka qenë e përbindshme edhe pa asnjë tërheqje.

Prite Meta!!! E ke çështje ditësh. Edhe gazetarët e implikuar nuk do ta kenë të lehtë. Kjo sepse pikërisht në Shqipëri luftën kundër krimit të organizuar e drejton politika amerikane dhe FBI.

lll.

Çfarë fiton historia e Shqipërisë me likuidimin e të korruptuarëve të mëdhenj? Historia e Shqipërisë nis një rrugë të re të zhvillimit të saj. Ajo që do të vijë pas likuidimit të kësaj klase politike të korruptuar, është në të vërtetë kërkesa 100 vjeçare e Shqipërisë. Por kjo do të sjellë edhe frikën e çdo pushtetari të ardhshëm që, paratë e shtetit dhe abuzimi me pushtetin, do të jenë ferri për këdo. Çdo popull, në historinë e tij të zhvillimit, ka pasur një pikë kthese që e ka zhvendosur të kalojë nga pasiviteti i varfërisë së imponuar prej abuzuesëve me pushtetin politik, në aktivitetin e punësimit, prodhimit të madh dhe pasurimit të tij.

Kjo do të vijë. Po si do të vijë? Cila është rruga? Rruga është e përcaktuar saktësisht në Kushtetutën e Shqiperisë: organet goditëse dhe hetuese për gjendjen aktuale, dhe kontroll i rreptë asgjësues për shtetarët dhe administratën shtetërore që do të vijë. Kryesori është SPAK, i cili sot filloi shfaqjen e tij si instrument ligjor i zgjedhur që do të vijojë punën për likuidimin e klikës së korruptuar të shtetit shqiptar, dhe të krimit të organizuar. Suksese…

Meta merr lidershipin (dhe njerëzit) e opozitës: Nis “fushatën” më 8 dhjetor

Me anë të zëdhënësit Tedi Blushi, Ilir Meta njoftoi të dielën një lajm të pazakontë. Më 8 dhjetor, “Ditën e Rinisë”, Presidenti do të organizojë një tubim mbarëpopullor. Tubimi do të mbahet në sheshin “Demokracia” në Qytetin Studenti, aty ku dhe nisi “Lëvizja Studentore e Viteve 1990, një tubim mbarëpopullor që synon Nisjen e një Dialogu me Shqipërinë. Shqipëria e Para”, shkruan zëdhënësi i Metës.

8 dhjetori është festë kombëtare, “Dita e Rinisë”, në nder të protestave të dhjetorit 1990 për rrëzimin e regjimit komunistit. Në fakt, organizimi i një tubimi nga Presidenti është i pazakontë, por jo kur e bën Ilir Meta, që tashmë na ka mësuar me lëvizje të pazakonta. Meta dëshmon se është “de facto” kryetar i opozitës dhe postin e Presidentit duket se po e përdor për aksionin opozitar.

Ndaj, në 8 dhjetor tubimi i Ilir Metës pritet të ketë simpatizantë të partive opozitare, pasi siç dihet presidenca është institucion mbi palët politike, e rrjedhimisht pa elektorat. Kjo lëvizje e Presidentit vjen në një moment kur sondazhet tregojnë se opozita ka pësuar rënie, e sidomos LSI, partia e themeluar nga Ilir Meta.

Por, me këtë organizim, Ilir Meta merr edhe rolin e lidershipit të opozitës, që prej gati 5 muajsh ndali protestat popullore. Ky tubim, që lajmërohet se do të shtrihet edhe në qytete të tjera, duket si nisja e një fushate elektorale. Madje, Meta ka gjetur dhe sloganin e “fushatës” së tij, “Shqipëria e para”. /Realstory.al/

“DASH i tha, ti je anti-reformë”, Ngjela: Metën e kërcënon penaliteti

Avokat Spartak Ngjela, komentoi reagimin e Departamentit Amerikan të Shtetit në lidhje me sulmet e Ilir Metës ndaj ambasadës së SHBA. Sipas Ngjelës, DASH i tha Metës që “je anti-reformë”.

“Sot, Departamenti Amerikan i Shtetit iu përgjigj me elokuencë Metës duke i thënë: Ti, zoti Meta, je anti-reformë. Por reforma do të vijojë se është jetike për Shqipërinë. Ky është thelbi i përgjigjes. Ndërsa, për atë të shtetit të ambasadorëve në vend të shtetit të së drejtës, që tha Meta dje, DASH i tha se, ‘kryesor është zbatimi i ligjit”, shkruan Ngjela.

Më tej ai thotë se sjellja e Metës me ndërkombëtarët, nuk mund të krahasohet as me atë të Berishës në 1997. “President më të paturpshëm se ky, nuk do t’i vijë më Shqipërisë. Edhe Sali Berisha e humbi toruan në luftën e tij me Uashingtonin në vitin 1997, por, të gjitha absurditetet nuk i tha botërisht si president, por në telefon me ta”.

Ndaj, avokat Ngjela mendon se Presidenti këcënohet nga penaliteti për shkelje të mëdha të ligjit. “Kurse Metën e kërcënon edhe penaliteti për shkelje të mëdha të ligjit, prandaj e ka kaq të madhe shthurjen mendore. Edhe DASh, kështu i thotë: “kryesorja është respektimi i ligjit”. Nuk ndalohet dot kjo reformë, kot lodhet Meta. Dhe DASH njofton gjithashtu se Byroja Kombëtare e Hetimit është duke u ngritur. Po Meta? Tani do të kthejë… duke pritur fatin e tij drejt hetimit: kjo duhet të jetë rruga e tij. Të shohim…”, shkruan Ngjela.

BE “shuplakë” Metës, për sulmet ndaj ambasadorëve

Pas reagimit të Departamentit Amerika të Shtetit, të premten pasdite reagoi dhe Bashkimi Europian në lidhje me sulmet e Ilir Metës ndaj ambasadorëve të huaj. Të enjten, pasi u shkarkua Besnik Muçi nga Vettingu, Meta shpërtheu ndaj disa ambasadorëve të huaj në vend duke i quajtur “palaço”. Këto deklarata të Ilir Metës, Bashkimi Europian i cilëson të papranueshme.

“Deklaratat e përfaqësuesve të autoriteteve shqiptare dhe partive politike që vënë në dyshim integritetin e bashkësisë diplomatike të Bashkimit Evropian në Tiranë për qëndrime të shprehura në cilësinë e tyre institucionale janë krejtësisht të papranueshme”, thuhet në deklaratën e Maja Koçijançiç, Zëdhënëse në Bashkimin Europian. Më tej, BE shprehet se çdo qëndrim zyrtar që mbajnë përfaqësuesit e Bashkimit Europian në Shqipëri, janë qëndrimi dhe pikëpamje të vetë BE-së.

“Deklaratat dhe veprimet e përfaqësuesve të Bashkimit Evropian përfaqësojnë qëndrimet dhe pikëpamjet e BE-së. Ne përsërisim mbështetjen tonë të plotë për punën e shkëlqyer që Ambasadori i BE-së dhe Delegacioni i BE-së po bëjnë për ta sjellë vendin më pranë Bashkimit Evropian”, thuhet në deklaratë.Më tej, Koçijançiç shprehet se BE po punon për të ndihmuar Shqipërinë për të çuar para reformat.

“Bashkimi Evropian, të gjithë përfaqësuesit e tij dhe vendet anëtare po punojnë për t’i mbështetur në mënyrë efektive përpjekjet e Shqipërisë për t’i çuar përpara reformat thelbësore në dobi të qytetarëve shqiptarë. Ne besojmë se respekti dhe bashkëpunimi është i garantuar nga të gjithë aktorët në vend, me qëllim promovimin e partneritetit tonë me Shqipërinë”, lexohet në deklaratën e Koçijançiç.

Sulo: Meta shkeli Kushtetutën me Xhaferllarin. Ngjela: Ka bërë vepër penale

Avokat Spartak Ngjela, i ftuar në studion e “Real Story” të gazetarit Sokol Balla, komentoi krizën dhe përplasjen mes Presidentit, KED dhe Kuvendit për emërimet në Gjykatën Kushtetuese. Sipas Spartak Ngjelës, emërimi i Marsida Xhaferllarit në Gjykatën Kushtetuese nga Ilir Meta, është jo vetëm shkelje e rëndë, por e çon Presidentin drejt veprës penale.

“Emërimi i Xhaferllarit e çon automatikisht në shkelje të rëndë. Është duke shkuar në vepër penale me veprimet e tij. Ka kaluar radha, radhën e cakton KED në bazë të Kushtetutës”, tha Ngjela. Më tej, ai argumentoi se Ilir Meta ka konflikt interesi me emërimin e Marsida Xhaferllarit. “Emërimi i parë i tij me Besnik Muçin nuk është konflikt interesi. Te kjo e dyta del në konflik interesi. Këtu ka bërë shkelje dhe e ka bërë në interes të tij”, tha Ngjela.

Të njëjtin qëndrim mban dhe analisti Arion Sulo, lidhur me emërimin e Marsida Xhaferllarit. Sipas tij, Presidenti shkeli Kushtetutën duke emëruar Xhaferllarin si anëtare të kushtetueses. “Zgjedhja e Marsida Xhaferllarit nga presidenti është shkelje kushtetuese”, tha Sulo. Ndërkohë, lidhur me kallëzimin penal të Ilir Metës ndaj Ardian Dvoranit, Spartak Ngjela u shpreh se s`mund të bëhet.

Sipas tij, Këshilli i Emërimeve në Drejtësi është organ kolegjial, ndaj vendimet i merr në mënyrë kolegjiale. Kjo e liron nga përgjegjësia një anëtar të vetë. “Kallëzimi penal ndaj Dvoranit! KED është organ kolegjial. Ai ka vetëm një votë dhe nuk mund të ketë përgjegjësi për vendimet kolektive. Meta është shumë i rënduar”, tha Ngjela. /Realstory.al/

Paralajmërimi i Metës, Lela: Ka histori me videot

Analisti Alfred Lela u shpreh në “Real Story” se fakti që Meta sulmon ambasadorin e OSBE, lidhet me faktin se Borchardt është hallka më e dobët e zinxhirit të ambasadorëve në Tiranë. Në “Real Story”, Lela u shpreh se mesazhet e Metës janë të qarta, duke paralajmëruar se mund të luftojë me këdo.

“Borchardt përfaqëson disa gjëra, por unë po them dy. Është hallka më e dobët e zinxhirit të ambasadorëve në Shqipëri. E dyta është anëshmëria e perceptuar e tij. Ai shihet si i njëanshëm. Meta është lojtar shumë i mirë politik. Duhet të ndajmë se javët e fundit është lojtar i fort politik nga halli, apo është si i tillë. Shefat e tij e njohin si “nongrata”. Mesazhet janë të qarta, thotë Meta, ‘unë jam gati ta bëjë këtë luftë me këdo’”, tha Lela.

A duhet ndërruar Kushtetuta për të kufizuar Presidentin?

Më tej, Alfred Lela komentoi edhe deklratat e presidentit se në ditët në vijim do të nxjerrë video me fakte, që sipas tij do të vërtetojë kapjen e sistemit të drejtësisë nga mazhoranca. Lela u shpreh që Meta bën mirë të mos e nxjerri një video të tillë, sepse do të rikujtojë videon e vetë.

“Uroj të mos jetë video, se do jetë banale. Presidenti ka një historik me videot, edhe sikur ta ketë një video, mua nuk do më pëlqente që presidenti ta nxirrte, sepse edhe me subkoshiencë do nxjerrë kujtimin e videos së vetë. Do doja të ishte diçka substanciale, jo video. Meta është faktori numër 1 i opozitës politike”, tha Alfred Lela ndër të tjera. /Realstory.al/