Meta trembet nga Venecia, nis seriozisht mbrojtjen

Pak orë pasi delegacioni i Komisionit të Venecias përfundoi vizitën zyrtare në Tiranë, Ilir Meta, si asnjë zyrtar tjetër në vend, që zhvilloi takime me këtë delegacion, doli në një konferencë për shtyp, e cila zgjati rreth 1 orë e 30 minuta. Ndryshe nga herët e tjera, Meta e nisi konferencën ulur, me shumë letra dhe me seriozitet (të cilin e humbi në fund të konferencës). Kulmi i seriozitetit në fakt ishte në momentin që kreu i shtetit sqaroi takimin që zhvilloi të martën me delegacionin e Komisionit të Venecias, që mbrriti në Tiranë në kuadër të përgatitjes së opinionit në lidhje me shkarkimin e Presidentit nga Parlamenti.

Meta, duket i ‘trembur’ paraprakisht nga një opinion jo në favor të tij nga Komisioni i Venecias, ka bërë një analizë të gjatë ligjore e kushtetuese për vendimet e tij të muajit qershor. Gjatë fjalës së tij, Meta u shpreh se ‘unë përfaqësoj shtetin e së drejtës’ në të gjitha aktet si President. “Ju dëgjoni shqiptarët, se jetojmë në dy shtete, në shtetin e propagandës dhe të drejtës. Unë besoj se përfaqësoj shtetin e së drejtës me të gjitha aktet e mia si president. Në shtetin e propagandës, thuhet që presidenti nuk ka të drejtë të çdekretojë dhe ju me të drejtë thoni a ekziston fjala çdekretim? Jo nuk ekziston. Dhe ju thoni ore si çdekretoi ky? Unë nuk kam çdekretuar. Unë kam të drejtë të nxjerr dekrete”, u shpreh Meta.

Në këtë mënyrë, për herë të parë, Ilir Meta përmend se nuk ka ‘çdekretim’ por ‘dekretim’ të cilin, sipas tij e ka detyrë ekskluzive. Megjithatë, ndonëse Kushtetuta nuk parashikon shtyrje të datës së zgjedhjeve në asnjë pikë të saj, Meta e cilësoi këtë si ‘dekret’ për ‘shfuqizim dekereti’, duke e krahasuar me të drejtën që ka Këshilli i Ministrave për shfuqizimin e VKM-ve apo Kuvendi për të votuar ligje për shfuqizim ligjesh të mëparshme.

“Kuvendi i Shqipërisë ka të drejtë të nxjerrë ligje. Qeveria vendime. Unë kam të drejtë të nxjerr një dekret për të shfuqizuar dekretin tim të mëparshëm. Parlamenti ka të drejtë të nxjerrë ligj që shfuqizon të mëparshmin, qeveria ka të drejtë të nxjerrë një vendim për të shfuqizuar të mëparshmin. Nëse edhe unë do bëhesha pjesë e shtetit të propagandës, dhe mua më vjen keq se si juristët bëjnë sikur nuk e dinë, po të shkojnë qytetarët në Gjykatën e Strasburgut, do të na shqepi me gjoba gjykata e Strasburgut”.

“Në rast se ata flasin për çdekretin, kur në fakt kemi të bëjmë me dekret që shfuqizon dekretin. Unë mund t’i përgjigjesha, që edhe parlamenti nuk ka të drejtë të çligjërojë, apo qeveria të çvendërojë, sepse këto terma nuk ekzistojnë. E gjitha kjo është një lojë propagandistike që njerëzit të thonë ore vërtetë mos ka shkelur kushtetutën ky?! Komisioni i Venezias është i rëndësishëm dhe nuk bazohet në propagandë por i shërben ose i ka shërbyer deri më tani forcimit të shtetit të së drejtës dhe sundimit të ligjit”, tha Meta.

Ndërkohë, në kushtet kur Komisioni i Venecias do të marrë një vendim përfundimtar për të dhënë opinionin e tij në lidhje me vendimet kushtetuese ose jo të Presidentit, Ilir Meta, u shpreh se të gjitha dokumentet që i ka dorëzuar këtij komisioni, do t`i bëjë publike edhe për qytetarët. Sipas Presidentit, ky veprim do të bëhet me qëllim që qytetarët, por sips tij, dhe ekspertët e fushës brenda dhe jashtë vendit, të japin opinione dhe të ‘pasurojnë’ këto argumente me mendime.

“Dua të falënderoj përzemërsisht Kuvendin për respektin që tregon ndaj Komisionit të Venecias. Bashkëpunimi i Presidentit me Komisionin e Vencias do të jetë i shkëlqyer dhe transparent. Për këtë arsye ne u kemi dhënë një raport paraprak lidhur me disa pyetje që Kuvendi u ka drejtuar. Këto dokumente do të jenë publike në faqen zyrtare të Presidentit të Republikës, pasi të bëhen dhe disa saktësime. Këto dokumente do të jenë të hapura për t`u pasuruar me mendime dhe vrejtje nga juristë dhe specialistë vendas dhe të huaj. Gjithçka do të jetë në dispozicionin jo vetëm tuajin por dhe mbarë opinionin publik, dhe të gjitha institucioneve ndërkombëtare. Është një sfidë që unë e mirëpres”, tha Meta ndër të tjera./Realstory.al/

DEKRETI I 13 TETORIT, META PRANON SHKELJEN E AFATEVE ZGJEDHORE

“DJEGIA E KUVENDIT”, META: KOMISIONI KËRKOI DETAJE, POR JANË SEKRET

DEKLARATA E METËS PËR DJEGIEN E KUVENDIT, KËRKOHET RAPORTIM NGA SHISH

PD i bën ‘avokatin’ Metës te Komisioni i Venecias (por 13 tetorin nuk e njeh)

Oerd Bylykbashi dhe Klajda Gjosha kanë zhvilluar një takim me delegacionin e Komisionit të Venecias, që ndodhet në Tiranë për një vizitë zyrtare. Takimi nisi rreth orës 08:00 të mëngjesit dhe ka zgjatur rreth 55 minuta. Pas mbledhjes, ku është diskutuar për shkarkimin e Ilir Metës nga Kuvendi, ish-deputeti i Partisë Demokratike, Oerd Bylykbashi, nuk ka treguar detaje nga biseda me përfaqësuesit e Komisionit të Venecias. Megjithatë, në deklaratën për mediat, Bylykbashi la të kuptohet se para juristëve të Venecias, ka bërë ‘mbrojtjen’ e Metës.

“Kushtetuta është mjaftë e qartë; Presidenti i Republikës shkarkohet nga Gjykata Kushtetuese. Presidenti është përpjekur të garantojë unitetin e popullit dhe pluralizmin në vend. Kjo është detyrë fisnike. Presidenti i dha garancinë shqiptarëve që zgjedhjet të bëheshin në një moment të dytë. Ne bëm të qartë dhe aspektin politik, pse kemi ardhur në këtë situatë. Raporti i ODIHR ësthë lajmërim i vdekjes së zgjedhjeve në Shqipëri”, tha ndër të tjera Bylykbashi.

Megjithatë, ndonëse opozita përpiqet të mbrojë Metën, në fakt, Partia Demokratike nuk e kanë njohur dekretin e 13 tetorit. Pra, edhe pse Bylykbashi shprehet se ‘presidenti u dha mundësi shqiptarëve që zgjedhjet të bëheshin në një moment të dytë’, partia e tij nuk e ka njohur këtë vendim të kreut të shtetit, që tashmë e mbron përpara Komisionit të Venecias.

Ndërkohë, Klajda Gjosha, që ishte së bashku me Bylykbashin në takim me delegacionin e Komisionit të Venecias, u shpreh se mazhoranca duhej t`i drejtohej Gjykatës Kushtetuese për veprimet e Metës. “Sot diskutuam mbi një çështje që është e paprecedentë. Në këtë moment, ku qeveria do duhej të fokusohej për plotësimin e kushteve për negociatat, merremi me një çështje që është mjaftë e rëndë për imazhin e vendit. Për mua është për të mbuluar gjithçka që shkon keq në qeverisje. Raporti i OSBE/ODIHR tregon se zgjedhjet në Shqipëri janë pa standarde. Kush ka pasur pikëpyetje për veprimet e presidentit do duhej t`i drejtohej Gjykatës Kushtetuese”, tha Gjosha.

Shkarkimi i Metës, Komisioni i Venecias zbarkon sot në Tiranë, ja axhenda

Një përfaqësi e Komisionit të Venecias do të zhvillojë një vizitë zyrtare në Tiranë të martën më 10 dhe të mërkurën më 11 shtator. Delegacioni i Venecias vjen në Tiranë, pas kërkesës që kryetari i Kuvendit, Gramoz Ruçi i ka bërë këtij komisioni, për të dhënë një opinion në lidhje me ‘rolin e Presidentit në caktimin e datës së zgjedhjeve në sistemet parlamentare’. Një ditë para nisjes së vizitës së delegacionit të Komisionit të Venecias, Kuvendi ka publikuar axhendën e takimeve. Sipas njoftimit për shtyp, në orën 9:00, delegacioni i Venecias do të ketë një takim me kryetarin e Grupit Parlamentar të PS, Taulant Balla dhe deputetët e këtij grupi.

Në orën 10:00, delegacioni do të zhvillojë një takim me krerët e grupeve parlamentare të opozitës në kuvend, ndërsa në orën 11:00, delegacioni i Komisionit të Venecias do të takojë Kryetarin e Kuvendit, Gramoz Ruçi. Takimet do të jenë të hapura për mediat vetëm për pak minuta, ndërsa deri më tani nuk është raportuar për konferenca shtypi. Megjithatë, pas takimeve me përfaqësuesit e Kuvendit, delegacioni i Komisionit të Venecias do të zhvillojë dhe takime të tjera. Sipas axhendës të publikuar më herët, përfaqësuesit e delegacionit të Venecias do të zhvillojnë takime me Presidentin Ilir Meta, Kryeministrin Edi Rama, Minisrtin e Brendshëm Sandër Lleshaj, Kryetarin e Gjykatës Kushtetuese dhe Komisionit Qendror të Zgjedhjeve.

Ndërkohë, Partia Demokratike ka lajmëruar se delegacioni i Komisionit të Venecias do të zhvillojë takime edhe me përfaqësues të opozitës. Sipas një komunikate shpërndarë mediave disa ditë më parë, PD bënte me dije se do të jetë Klajda Gjosha nga LSI dhe Oerd Bylykbashi nga PD, përfaqësuesit e opozitës që do të takohen me delegacionin e Komisionit të Venecias. Sipas PD, takimi është parashikuar të zhvillohet të martën më 10 shtator në orën 8:00 në Rogner, por, në faqen zyrtare të Komisionit të Venecias, në axhendën e publikuar disa ditë më parë, ende nuk është konfirmuar ky takim.

Qëllimi i vizitës së delegacionit të Komisionit të Venecias është me karakter informues, në prag të përgatitjes së opinionit që i është kërkuar nga Kuvendi në lidhje me kushtetueshmërinë ose jo të dekreteve të Ilir Metës për anulimin e zgjedhjeve të 30 qershorit dhe dekretin e 13 tetorit. Ky raport, ashtu siç është shprehur Ulsi Manja, kryetar i Komisionit Hetimor për shkarkimin e Ilir Metës, do të jetë shumë i rëndësishëm për vendimin përfundimtar të hetimit ndaj Presidenti. /Realstory.al/

PD PËRPLASET ME KOMISIONIN E VENECIAS. DY AXHENDA TË NDRYSHME PËR TAKIMET

Presidenti i një shteti paralel

Nga Mero Baze

E vetmja ngjarje pozitive nga Komisioni Hetimor për veprimtarinë e presidentit, ishte Ilir Meta i veshur me kostum. Pas shafqjes të së shtunës me brekë në plazh, duke ndihmuar një mace në majë të tendës, performanca e sotme, jep shpresë së paku për shëndetin mendor. Por nga ato që tha me dhe pa dashje, ai demonstroi se është president i një shteti paralel, dhe jo president i Shqipërisë. Nuk di të them a duhet të hetohet penalisht a jo për këtë, por së paku një herë të shkarkohet. Në rrëmin e tij para Komisionit, ai pranoi se kishte marrë vendime bazuar në informacione që nuk i disponon shteti shqiptar.

Fjala vjen, vendimi për shtyrjen e 30 qershorit, sipas tij, ishte marrë në kushtet kur ai ishte informuar nga burime të tjera të tij. Shërbimi Informativ Shtetëror, nuk e ka pasur ndonjë informacion për djegie Parlamenti. Policia jo. “Burimet e tjera” të Ilir Metës, nuk na interesojnë, por nuk janë burime të shtetit shqiptar. I vetmi argument në këtë pikë është nëse ka përgjuar mesazhet e gruas së tij me Lulin, dhe nëse ata kanë pasur ndonjë plan për ta djegur. Por nëse e ka pasur këtë informacion dhe nuk ka denoncuar, është dhe më keq për të. Ne, në të vërtetë e dimë pse e shtyu 30 qershorin.

E shtyu për t’i vënë zjarrin Parlamentit, dhe jo për ta shmangur atë. E shtyu për t’i vënë akën vendit dhe jo për ta shpëtuar atë. Por dhe në këtë version nuk ndryshon gjë fakti që ai sillet si presidenti i një shteti parallel, dhe jo presidenti i Shqipërisë. Argumentet e tij ligjore, po ashtu janë jashtë Kushtetutës sonë. Ai i referohet ose Kushtetutës së Ramiz Alisë, ose ndonjë precedenti të huaj, që duket se ja kanë përkthyer dhe gabim, ku nuk ka asnjë ngjashmëri me historinë tonë. Shtyrja e 30 qershorit nuk ngjan me asgjë, vetëm për shkak të faktit se është shtyrje zgjedhjesh.

Shtyrje zgjedhjesh mund të ketë pasur dhe mund të ketë në të ardhmen. Dekreti i Ilir Metës nuk ishte për shtyrje zgjedhjesh, por për prishje zgjedhjesh dhe për ta lënë Shqipërinë pa institucion të zgjedhjeve. Zgjedhjet shtyhen kur palët bien dakord. Zgjedhjet shtyhen kur vendi është në luftë. Zgjedhjet shtyhen kur ke qëllim të bësh zgjedhje. Dhe rast të tillë nuk ka askund as në Shqipëri, as në botë, përveçse në shtetin paralel të Ilir Metës. Së fundmi, vendimet e Ilir Metës janë marrë dhe kundër interesit kombëtar të shqiptarëve, pasi janë përdorur si një mënyrë për t’u koniktuar me dy aleatët strategjikë të Shqipërisë, SHBA dhe Bashkimit Europian.

Ilir Meta ka marrë qëndrime zyrtare publike kundër të dërguarit special të SHBA për Ballkanin, zotit Palmer, duke e denigruar atë dhe personalisht e familjarisht, dhe po ashtu ka sulmuar qëndrimin e Bashkimit Europian e OSBE për Shqipërinë. Kamikazë të tij i kanë shkuar në shtëpi dhe kanë kërcënuar ambasadorin e OSBE në Tiranë. Ilir Meta ka refuzuar të presë në takim me ambasadorët e tjerë, përfaqësuesen e Ambasadës së SHBA në Tiranë dhe atë të Republikës italiane.

E gjithë kjo krijoi një përplasje formale të institucionit të presidentit të Shqipërisë, me Perëndimin, dhe nese SHBA dhe BE do ta kishte konsideruar Ilir Metën realisht president të Shqipërisë, ne sot do ishim të përgjakur dhe të rrethuar me tela me gjemba. Por SHBA, BE dhe OSBE, nuk e identikuan kurrë Ilir Metën me Shqipërinë. Ata u rreshtuan në krah të shqiptarëve, duke shmangur gjakderdhjen më 30 qershor. Për fatin tonë tonë të mirë, ata nuk e konsideruan si president të Shqipërisë, por udhëheqës të një bande politike që kërkon t’i vërë zjarrin asaj.

Kjo e bën “de facto” Ilir Metën presidentin e një shteti paralel, që nuk ka lidhje me shtetin shqiptar, edhe për Perëndimin. Ndaj duhet trajtuar si i tillë deri në fund, duke i rikthyer institucionit të Presidentit, legjitimitetin e veprimeve, Kushtetutën dhe mbrojtjen e interesit kombëtar edhe në raport me orientimin e shqiptarëve drejt Perëndimit. Ky nuk është presidenti ynë.

Ngjela zbulon skenarin: Meta donte destabilizim të Shqipërisë

Pas dëshmisë që Ilir Meta dhë përpara Komisionit Hetimor Parlamentar, që po heton shkeljet kushtetuese të Presidentit, ka reaguar avokati dhe analisti, Spartak Ngjela. Në një koment të shkurtër në rrjetet sociale, Ngjela shkruan se Meta dëshironte të digjej Parlamenti më 8 qershor. Sipas avokat Ngjelës, pasi kjo gjë nuk ndodhi, kreu i shtetit nxori dekretin e 10 qershorit për anulimin e datës së zgjedhjeve, me qëllim që t`iu jepte dhe një herë dorë hordhive të vijonin përplasjet për destabilizimin e Shqipërisë.

“Çfarë na tha sot presidenti ynë Meta? “Kisha të dhëna- tha ai – se do digjej Kuvendi në datën 8 qershor!” Po dekreti u zhdekretua në datën 10 qershor? Çdo të thotë kjo? Kjo tregon se ky farë Presidenti e ka pritur djegien e Kuvendit me ankth në datën 8 qershor, dhe meqë ai nuk u dogj dot, zhdekretoi zgjedhjet që t’iu jepte dhe një dorë hordhive të vijonin përplasjet për destabilizimin e Shqipërisë. Kjo është e vërteta. Por, a di Komisioni Hetimor këtë? Sigurisht që e di”, shkruan Ngjela.

Ndërkohë, Presidenti Ilir Meta deklaroi të hënën përpara Komisionit Hetimor Parlamentar, se kishte pasur ‘informacion se në protestat e opozitës, njerëz të caktuar do të tentonin të digjnin Kuvendin’. Mirëpo ishte i menjëhershëm reagimi i Partisë Demokratike, që nëpërmjet Gazmend Bardhit hodhi poshtë akuzat e Metës, duke u shprehur se opozita nuk kishte pasur një plan të tillë.

“Do digjnin Kuvendin”, PD përplaset me Metën, i kujton Hitlerin

Presidenti Ilir Meta deklaroi të hënën përpara Komisionit Hetimor Parlametar, se ‘kishte informacione se në mitingjet e opozitës do të digjej Parlamenti’. Kreu i shtetit u shpreh përpara deputetëve se këto informacione i kishte marrë në rrugë zyrtare dhe jo zyrtare, ndaj sipas tij, ishte munduar të ‘shmangte një `97-të tjetër’. Mirëpo, dekaratat e Metës nuk janë pritur mirë nga Selia Blu. Partia Demokratike ka reaguar pasditen e të hënës me anë të Sekretarit të Përgjithshëm Gazmend Bardhi. Me anë të një deklarate shpërndarë nga zyra e shtypit e PD-së, mësohet se Bardhi i është përgjigjur interesit te mediave, duke u shprehur se PD dhe opozita nuk kanë pasur kurrë një plan për djegien e institucioneve.

“Partia Demokratike dhe opozita e bashkuar nuk ka pasur kurrë asnjë plan për djegien e institucioneve, pavarësisht se ato nuk përfaqësojnë interesin publik, por interesin e një grupi oligarkësh dhe kriminelësh të lidhur me kryeministrin e vendit. Partia Demokratike fton mediat të hapë arkivat e javëve përpara 30 qershorit dhe do të gjejë se opozita dhe kreu i saj, Lulzim Basha, ka denoncuar skenarët e dhunshëm të Edi Ramës, që ka patur për qëllim t’i përdorë më pas kundër PD dhe opozitës”, thuhet ndër të tjera në deklaratën e Partisë Demokratike.

Më tej, Partia Demokratike, duke dashur të interpretojë deklartatën e Ilir Metës se “nuk mund të pranonte një Rajshtag në Shqipëri”, shprehet se të ‘të gjithë e dinë se me djegien e dyshimtë të Parlamentit gjerman, Hitleri çimentoi pushtetin Nazist pas ardhjes në pushtet, pak kohë para djegies së Rajshtagut’, shkruan PD. Në fund, Partia Demokratike i del në ‘mbrojtje’ Metës, kur shprehet se Komisioni Hetimor është mjet ‘për të mbuluar skandalet e qeverisë’. “Partia Demokratike e konsideron komisionin hetimor për shkarkimin e Presidentit si një mjet për të mbuluar skandalet e qeverisë ilegjitime të Edi Ramës, ndërsa anëtarët e këtij komisioni, personazhe të dosjeve 184 dhe 339, si bashkëpunëtorë të krimit në vjedhjen e zgjedhjeve lokale dhe parlamentare”, përfundon deklarata e Bardhit.

Ligjet rrëzojnë Metën. Braho e Fino të ashpër ndaj presidentit

Komisioni i Ligjeve është mbledhur të premten paradite, për të rishqyrtuar dy ligje të kthyera nga Presidenti Ilir Meta. Ligji i parë që është marrë në shqyrtim, ishte ai “Për vetëqeverisjen vendore”. Presidenti e ktheu këtë ligj kryesisht për nenet që kanë të bëjnë me tjetërsimin e pronës. Meta shprehej se “ndryshimet ligjore në nenin 54-55 të ligjit 139/2015, janë të pajustifikuara pasi mënyra e re që propozohet për kuorumin e nevojshëm në vendimmarrjet e Këshillave Bashkiake nuk garanton mbrojtjen e interesit publik në procedurat e tjetërsimit të aseteve publike në pronësi të pushtetit vendor”.

Megjithatë, këto vlerësime të kreut të shtetit nuk janë marrë parasysh nga Komisioni i Ligjeve, i cili ka votuar kundër dekretit të Metës, duke e rikthyer ligjin për votim në Kuvend pa ndryshime. Ndërkohë, relatori i këtij ligji, Bashkim Fino, është shprehur se mënyra se si është ndërtuar relacioni i kthimit të ligjit në Kuvend, është kundër tij.

“Më vjen keq se në të gjithë relacionin po vërej me keqardhje se i gjithë relacioni është drejtuar kundër relatorit. Mesa duket presidenti e paska personale. Nëse ju e keni personale më thoni që kam relator kushtetues. Presidenti i nderuar ka qenë 4 vjet kryetar Kuvendi dhe i di shumë mirë procedurat. Në komision ka relator. Edhe komisioni dhe relatori bëjnë ndryshimet e nevojshme. Këtë praktike e ka ndjekur Meta, po e ndjek dhe unë. Unë jam relator kushtetues”, ka thënë ndër të tjera Fino.

Pas votimit kundër dekretit të Metës për ligjin “Për vetëqeverisjen vendore”, në shqyrtim është marrë ligji tjetër i kthyer në Kuvend nga Presidenti, ai “Për Kodin Penal”. Gjatë diskutimeve në komision, ka folur deputeti Spartak Braho, i cili i është drejtuar këshilltarit ligjor të Presidentit, që të ‘jenë më të kujdesshëm në kthimin e ligjeve në Kuvend’. Braho u shpreh se ‘presidenti ka të drejtën të gjykojë natyrën kushtetuese të ligjeve dhe jo atë teknike të hartimit të tyre’.

Ndërkohë, kujtojmë se Braho ka qenë një nga njerëzit e afërtë të Ilir Metës në të shkuarën, kur presidenti ishte kryetar i LSI. Ndërkohë, edhe Bashkim Fino, i cili u shpreh se ‘presidenti e ka personale’ me të, ka qenë një nga bashkëpunëtorët e afërt në radhët e PS. Pas diskutimeve, Komisioni i Ligjeve ka marrë vendimin për të rrëzuar dhe dekretin e Metës për ndryshimet në ligjin e Kodit Penal.

Shkarkimi, PD i bën avokatin Metës (por 13 tetorin nuk ia njeh)

Pas vendimit të Komisionit Hetimor Parlamentar për miratimin e planit të hetimit për shkarkimin e Ilir Metës, Partia Demokratike ka reaguar nëpërmjet ish-deputetit Edi Paloka. Me anë të një statusi në rrjetet sociale, Paloka sulmon kryeministrin Edi Rama për shkarkimin e Presidentit, duke mbrojtur Ilir Metën.

“Vazhdimi i lojës me të ashtuquajturin ‘komision hetimor për shkarkimin Presidentit të Republikës’, tregon qartazi se Rama ka vendosur të zhytet edhe më thellë në çmendurinë e tij antiligjore, antikushtetuese dhe antidemokratike. Ai që emëroi Valdrin Pjetrin dhe që vazhdon të mbrojë Kajmakun, kërcënon me shkarkim të Presidentit të Republikës vetëm sepse në zbatim të detyrave të tij kushtetues mori vendime që prishën planet e Ramës për të futur vendin në gjakderdhje”, shkruan Paloka.

Megjithatë, ndonëse i bën avokatin mbrojtës, PD nuk e ka njohur asnjëherë zyrtarisht dekretin e Ilir Metës për zgjedhjet e 13 tetorit. Gjithashtu, ndonëse PD shprehet se ‘Meta ndali planin e Ramës për gjakderdhje’, në fakt harron, që ky plan ishte i opozitës, dhe me dekretin e 10 qershorit të Ilir Metës, përshkallëzimi i konfliktit erdhi duke u rritur deri në reagimin e amerikanëve, 3 ditë para zdhjedhjeve të 30 qershorit.

Më tej, ish deputeti demokrat, shprehet se Shqipërisë, sipas Palokës, i është prerë rruga për hapjen e negociatave. Shkak për këtë, akuzon PD, është sipas saj ‘qeveria e lidhur me krimin’. “Shqipërisë tanimë i është prerë rruga për hapjen e negociatave prej një qeveria të lidhur me krimin e që shkeljen e ligjit e të Kushtetutës e ka kthyer në rutinë, por nuk mund të lejojmë që çmenduria dhe babëzia e një njeriu të na kthejë vite mbrapa. Shqipërët meritojnë Evropën, jo Edvin Ramën”, përfundon Paloka.

Javën e ardhshme, Meta “i pandehur” në Kuvend. 9 hapa për shkarkimin

Pas përfundimit të pushimeve të verës, Komisioni Hetimor për hetimin e shkeljeve të Kushtetutës nga Ilir Meta, është rikthyer në punë. Mesditën e të martës, ky komision ka zhvilluar mbledhjen e tretë të tij që pas krijimit në muajin korrik. Në rendin e ditës të këtij komisioni, ishte miratimi i procesverbalit të datës 15 korrik 2019, dhe miratimi i planit të hetimit. Para se të shkonte në miratimin e këtyre pikave, Kryetari i Komisionit, Ulsi Manja, u shpreh se për të zhvilluar një hetim sa më të plotë, sekretariati i Komisionit Hetimor ka kërkuar dokumentacionin nga disa institucione.

“Përpara se të arrijmë në miratimin e planit të hetimit, siç e shpejgova, Komisioni, bazuar në ligj, u është drejtuar me shkresë për të sjellë në Sekretarinë e Komisionit dokumentacionin e duhur; Qedrës së Botimeve Zyrtare, Policisë së Shtetit, Kolegjit Zgjedhor, Autoritetit të Mediave Vizive, Komisionit Qendror të Zgjedhjeve, Prokurorisë së Përgjithshme dhe institucionit të Presidentit. Jemi vënë në dijeni nga sekretariati, që të 7-të institucionet kanë sjellë përgjigje dhe përgjigja e fundit është ajo e Presidencës në datën 2 gusht”, ka sqaruar Manja.

Më tej, kreu i këtij komisioni, ka prezantuar planin e hetimit për Ilir Metën, që synon shkarkimin e tij për shkeljet kushtetuese. Sipas këtij plani, hetimi do të nisë me seancën degjimore të Presidentit Ilir Meta, dhe më pas do të vijojë me shqyrtimin e materialeve të administruara nga 7-të institucionet që u është kërkuar informacion. Plani parashikon 9 hapa, duke u mbyllur pikërisht me raportin përfundimtar të këtij Komisioni Hetimor, që do t`i dorëzohet Parlamentit për votim.

“Pasi është administruar dokumentacioni i ardhur nga këto institucione, kemi ardhur sot me këtë projekt-plan hetimi, që unë kam propozuar për miratim. Hapi i parë është seanca dëgjimore me Presidentin Ilir Meta, hapi i dytë administrimi dhe shqyrtimi i materialeve të marra nga 7-të institucione; administrimi i raportit të Komisonit për Çështjet Ligjore për shqyrtimin e kërkesës së deputetëve që iniciuan shkarkimin e Ilir Metës; administrimi i kërkesës së 55 deputetëve që bën kërkesën në Kuvend; administrimi i Opinionin të Komisionit të Venecias; administrimi i çdo dokumentacioni tjetër që Komisioni Hetimor e shikon të arsyshëm për shqyrtim; diskutim për gjetjet e Komisionit Hetimor; përgatitja e raportit përfundimtar dhe hapi i fundit, paraqitja në Kuvend e këtij Raporti”, tha Manja.

Në fund, Ulsi Manja ka lajmëruar se në datën 9 shtator, një panel ekspertësh nga Komisioni i Venecias do të vizitojnë Shqipërinë, ku do të zhvillojnë takime të nivelit të lartë me përfaqësuesit e opozitës, mazhorancës dhe një takim me të gjithë anëtarët e Komisionit Hetimor për shkarkimin e Ilir Metës. Ndërkohë, nënkryetari i këtij komisioni nga radhët e opozitës parlamentare, Alban Zeneli, ka kërkuar që të shtyhet afati i funksionimit të Komisionit Hetimor, me qëllim që të ngrihet dhe Gjykata Kushtetuese.

“Çdo raport që del nga ky institucion do të shkojë në Parlament, është detyrim që çdo vendim që merr Kuvendi, të shkojë në Gjykatën Kushtetuese. Ne jemi në rastin që kjo gjykatë nuk është formuar. Ne i kemi bërë kërkesë Komisionit të Venecias për një opinion, unë dua të kërkoj që të mos e lëmë me një boshllëk. Besoj është më e pranueshme që ne t`i kërkojmë Kuvendit të shtyjë afatin e komisionit hetimor, në qëllim që të shkojë paralel me krijimin e Gjykatës Kushtetuese”, tha Zeneli.

Ndërkohë, Ulsi Manja është përgjigjur ndaj deputetit të opozitës, duke u shprehur se funksionimi i Komisionit Hetimor do të bëhet sipas afateve ligjore, duke e mbyllur detyrën e tij më 8 tetor të këtij viti. “Unë e kam bërë të ditur, procedura e shkarkimit të Presidentit është një marrëdhënie mes Parlamentit dhe Gjykatës Kushtetuese. Sigurisht që ky Komision Hetimor, në zbatim të rregullores së Kuvendit, do duhet ta përfundojë veprimtarinë e vetë në datën 8 tetor të vitit 2019. Faza e dytë është ajo e Gjykatës Kushtetuese. Ngritja dhe bërja funksionale e gjykatës, nuk e pengon Kuvendin për të përfunduar këtë detyrë që i ka ngarkuar kuvendit. Opinioni i Komisionit të Venecias do duhet të pritet nga ky komision, për të arritur një vendim përfundimtar”, tha Manja.

Vijon…

Kuvendi rinis punën, shkarkimi i Metës dhe reforma zgjedhore në krye të axhendës

Këtë të hënë pasdite Kuvendi do të mblidhet për të çelur sesionin e ri të punimeve. Për herë të parë që nga rënia e diktaturës, ky sesion i ri parlamentar e gjen Partinë Demokratike jashtë Kuvendit. Megjithatë, deputetët e mazhorancës dhe ata të opozitës parlamentare, kanë një axhendë voluminoze pune për të bërë gjatë gjithë muajit shtator. Në krye të punëve të Kuvendit, do të jetë puna për shkarkimin ose jo të Presidentit Ilir Meta, i cili akuzohet për shkelje të Kushtetutës, pas dekretit të 10 qershorit për anulimin e datës së zgjedhjeve, dhe dekretit të 27 qershorit, për shpalljen e një date të re zgjedhjesh ndërkohë që më herët dekreti i tij ishte rrëzuar nga Kolegji Zgjedhor.

Komisioni Hetimor Parlamentar për shkarkimin e Metës, ka vijuar punën edhe gjatë muajit gusht, pavarësisht se nuk është mbledhur. Ai ka funksionuar në nivel sekretariati, ndërsa me rinisjen e punimeve plenare, ky Komision do të ketë një punë voluminoze përpara. Megjithatë, pritet që brenda muajit shtator apo në fillim të tetorit, Kuvendi të marrë një vendim përfundimtar për çështjen e Ilir Metës, duke pasur parasysh faktin që kaq është dhe koha e përcaktuar e funksionimit të Komisionit Hetimor, i cili në fund do të dorëzojë në Kuvend raportin përfundimtar. Gjithashtu, një pikë e rëndësishme e vlerësimit të këtij raporti do të jetë opinioni i Komisionit të Venecias.

Në fund të muajit korrik kryetari i Parlamentit Gramoz Ruçi i dërgoi një letër Komisionit të Venecias, ku i kërkoi mendim në lidhje me shkeljet ose jo të Kushtetutës nga Ilir Meta. Një tjetër axhendë e rëndësishme e punimeve të sesionit të ri parlamentar, do të jetë puna për Reformën Zgjedhore. Opozita parlamentare, ashtu si në rastin e shkarkimit të Ilir Metës, ka kërkuar dhe është angazhuar për ndryshimin e kodit aktual zgjedhor. Tashmë pritet të shihen veprimet konkretete të opozitës në lidhje me këtë reformë.

Gjithashtu, brenda muajit shtator apo në fillim të tetorit, në Kuvend pritet të votohen 2 anëtarët për Gjykatën Kushtetuese, që do t`i hapte rrugë krijimit të këtij institucioni, i kërkuar nga ndërkombëtarët edhe për të vlerësuar ligjshmërinë ose jo të zgjedhjeve të 30 qershorit dhe dekreteve të Metës. Gjithashtu, Kuvendi do të ketë edhe një dosje të madhe për rishqyrtimin e ligjeve të kthyera në Parlament nga Presidenti, i cili vetëm gjatë muajit korrik, ktheu të paktën 4 ligje.