Vakanca në KLP, gara hapet në shtator për zëvendësimin e Osmanit

Shkarimi i Gentian Osmanit nga Kolegji i Posaçëm i Apelimit, bëri që Këshilli i Lartë i Prokurorisë të mbetet me 10 anëtar. Ky vakum i anëtarëve të KLP-së, pas largimit të ish-prokurorit të Krimeve të Rënda, duhet të plotësohet me një tjetër anëtar që vjen nga radhët e prokurorisë.

Sipas ligjit, është Prokuroria e Përgjithëshme, Arta Marku, ajo që shpall garën për anëtarin që do të plotësojë 11-shen e Këshillit të Prokurorisë. Po sipas ligjit, pas largimit nga Vettinug të Gentian Osmanit, Marku duhet të kishte hapur garën në datën 2 gusht, por kjo gjë nuk ka ndodhur.

Shkak ka qenë muaji i pushimeve, ndaj, sipas ABC Neës, gara do të hapet në datën 2 shtator, fill pas përfundimit të pushimeve. Ndërkohë, mungesa e anëtarit të 11 sjellë probleme edhe për funksionimin e këtij institucioni, i cili në muajin shtator do të miratojë emrat e katër kandidatëve për Prokuror të Përgjithshëm.

Në kushtet aktuale, nuk dihet ende nëse KLP do të pres emërimin e anëtarit të 11 për të marrë vendimin për t`i dërguar parlamentit emrat e katër prokurorëve që do të synojnë postin që aktualisht mbahet nga Arta Marku, apo do të veprojë në mënyrë tjetër.

Sipas ligjit, në rastin kur ka vakancë në Këshillin e Lartë të Prokurorisë, vota e kryetarit të këtij këshilli ka fuqinë e dy votave. Pra, Gent Ibrahimi parimisht mund të zgjidh ngërçin duke përdorur këtë parashikim ligjor, në mënyrë që brenda shtatorit të paraqiten në kuvend emrat që do të votohen për Prokuror të Përgjithshëm.

SPAK, 4 kandidatë vetting në shtator, emrat e 15 të përzgjedhurve

Këshilli i Lartë i Prokurorisë ka zgjedhur 15 prokurorët që nëse arrijnë të kalojnë me sukses kontrollin e trefishtë të Komisionit të Pavarur të Kualifikimit, do të jenë pjesë e Strukturës së Posaçme Antikorrupsion.

Pas një procesi përzgjedhës, më 16 korrik, KLP bëri pikëzimin e kandidaturave duke zgjedhur si më të mirët, prokurorin Altin Dumani, aktualisht i komanduar në krye të Prokurorisë së Apelit për Krime të Rënda.

I dyti në listë është prokurori i Krimeve të Rënda, Anton Martini. Ky i fundit me një CV të pasur në hetimin e grupeve kriminale. Pjesë e të përzgjedhur nga Këshilli është edhe prokurorja e Krimeve të Rënda, Elizabeta Imeraj, aktualisht e komanduar në krye të Prokurorisë së Tiranës.

Imeraj, më herët është konsideruar si “gruaja e hekurt” gjatë përfaqësimit të Akuzës, në çështjen ndaj ishministrit të Brendshëm, ndërsa ka pasur në dorë dosje të krimit të organizuar dhe funksionarëve të lartë.

I përzgjedhur është edhe prokurori që aktualisht ka nën hetim dosjen ndaj ishkryeprokurorit Adriatik Llalla, Klodian Braho. Besnik Muçi, Doloreza Musabelliu, Manjola Kajana, Edvin Kondili, Ened Nakuçi dhe Behar Dibra, prokurorë në Prokurorinë për Krime të Rënda janë gjithashtu në listën e 15 më të mirëve.

Si të denjë për në SPAK, janë zgjedhur edhe prokurorët Ndini Tavani e Elida Kaçkini, të Prokurorisë së Tiranës. Pjesë e listës përfundimtare është edhe prokurori i Prokurorisë së Përgjithshme, Arben Kraja, Anita Jella, drejtuesja e Prokurorisë së Durrësit dhe Enkeleda Millonaj, prokurore në Elbasan, shkruan panorama.

Ngritja e SPAK është tashmë në dorën e KPK, pasi kandidatët duhet të kalojnë procesin e vetingut. Aktualisht 11 prokurorë janë përballur me procesin e rivlerësimit dhe kanë kaluar, ndër ta Arben Kraja në të dyja shkallët.

Në pritje të vetingut janë prokurorja Elizabeta Imeraj, Doloreza Musabelliu, Anton Martini dhe Ndini Tavani. Ndërkohë, prokurori Besnik Muçi në vjeshtë do të përballet me Shkallën e Dytë./Panorama

PROKURORËT E SPAK

1.Altin Dumani

2.Anton Martini

3.Elisabeta Imeraj

4.Arben Kraja

5.Doloreza Musabelliu

6.Klodian Braho

7.Enkeleda Millonai

8.Manjola Kajana

9.Edvin Kondili

10.Ened Nakuçi

11.Elida Kaçkini

12.Ndini Tavani

13.Behar Dibra

14.Anita Jella

15.Besnik Muçi

Vettingu shkarkon Gentian Osmanin, KLP i kërkon Arta Markut zëvendësimin e tij

Kreu i Këshillit të Lartë të Prokurorisë, Gent Ibrahimi ka kërkuar me urgjencë zëvendësimin e vakancës së lënë nga prokurori Gentian Osmani, pas shkarkimit të tij nga vettingu. Ditën e premte, Këshilli i Lartë Prokurorisë zhvilloi mbledhjen ku shpalli zyrtarisht vendin vakant të lënë nga Osmani, duke i kërkuar Prokurores së Përgjithshme të përkohshme, Arta Marku të hap garën për regjistrimin e kandidaturave për të plotësuar vakancën e anëtarit-prokuror në KLP. Vendi vakant u shpall dy ditë pas vendimit të vettingut për të shkarkuar Gentian Osmanin duke shmangur kështu një ngërç të mundshëm në KLP.

Pasi paraqiten kandidaturat, Prokurorja e Përgjithshme e përkohshme Arta Marku zhvillon mbledhjen e Asamblesë së Përgjithshme të Prokurorëve, të cilët përzgjedhin kandidatin e duhur për t’u bërë anëtari i 6 prokuror në KLP, i cili duhet të ketë kaluar vettingun.

KLP përbëhet nga 11 anëtarë, 6 prokurorë të zgjedhur nga Asambleja e Përgjithshme e Prokurorëve dhe 5 jo-prokurorë të zgjedhur nga Kuvendi.

Gentian Osmani u shkarkuar të mërkurën nga Kolegji i Posaçëm i Apelimit, për “mosjustifikim të pasurisë.’ Osmani ishte anëtar i Këshillit të Lartë të Prokurorisë dhe prokuror pranë Krimeve të Rënda.

KLP ka një rëndësi të madhe në sistemin e drejtësisë, sidomos gjatë muajt shtator ku pritet të caktojë prokurorët për ngritjen e SPAK, emëron prokurorët e rinj, propozon kandidatët për Prokuror të Përgjithshëm, përcakton kriteret për përzgjedhjen e prokurorëve etj.

PAS LARGIMIT TË OSMANIT, KLP NË ‘DORËN’ E ARTA MARKUT, JA SI ZGJIDHET NGËRÇI

KËRKOI SHKARKIMIN E TAHIRIT, VETTINGU KËPUT GENTIAN OSMANIN

Pas largimit të Osmanit, KLP në ‘dorën’ e Arta Markut, ja si zgjidhet ngërçi

Gentian Osmani, anëtari i Këshillit të Lartë të Prokurorisë dhe prokuror pranë Krimeve të Rënda, është shkarkuar nga shkalla e dytë e Vettingut, Komisioni i Posaçëm i Apelimit. Në vendimin e marrë këtë të mërkurë, KPA gjeti parregullësi në pasurinë e prokurorit Osmani, duke argumentuar se “ai nuk justifikonte dotë të ardhurat”, në këtë mënyrë, KPA vendosi shkarkimin e tij. Por shkarkimi i Gent Osmanit pasohet nga një ngërç në funksionimin e Këshillit të Lartë të Prokurorisë, anëtar i të cilit ishte dhe Gentian Osmani. KLP është organi kushtetuese që emëron prokurorët në detyra të reja pasi ata kalojnë vettingun.

Sipas nenit 149 pika 2 të Kushtetutës së Republikës së Shqipërisë, “Këshilli i Lartë i Prokurorisë përbëhet nga 11 anëtar, gjashtë prej të cilëve zgjidhen nga prokurorët e të gjitha niveleve të prokurorisë dhe pesë anëtarë zgjidhen nga Kuvendi, nga radhët e juristëve joprokurorë”. Ndërkohë, po në këtë nene të Kushtetutës, në pikën 3, caktohet se “Anëtarët prokurorë përzgjidhen nga radhët e prokurorëve me integritet të lartë moral dhe profesional, sipas një procedure transparente dhe publike që siguron një përfaqësim të drejtë të të gjitha niveleve të prokurorisë”.

Pra, tashmë do të duhet që kryeprokurorja Arta Marku të mbledh me urgjencë Asamblenë e Prokurorëve, ku të dalin kandidaturat dhe të votohet për anëtarin e gjashtë të KLP-së që duhet të jetë nga radhët e prokurorëve, të cilët kanë kaluar gjithashtu Vettingun. Po përse është i rëndësishëm emërimi i anëtarit të ri të KLP pas largimit të Gent Osmanit? Këshilli i Lartë i Prokurorisë, sipas Kushtetutës është i përbërë nga 11 anëtar. KLP është organi që emëron prokurorët e rinj, propozon kandidatët për Prokuror të Përgjithshëm, përcakton kriteretet për përzgjedhjen e prokurorëve etj.

Ndërkohë, prokrurorët që do të duhet të kandidojnë për t`u bërë anëtar të KLP-së, duhet të plotësojnë disa kushte të tjera. Të kenë ushtruar funksionin e prokurorit për të paktën 10 vjet, nuk duhet të jenë drejtues të një zyre prokurorie ose anëtar drejtues të grupeve të inrteresit, të jenë vlerësuar të paktën “shumë mirë” në dy vlerësimet e fundit të etikës dhe veprimtarisë profesionale, të mos kenë masë disiplinore në fuqi, të mos kenë qenë ish-bashkëpunëtor të Sigurimit të Shtetit, apo të shërbimeve të huaja sekrete. Të gjithë prokurorët që plotësojnë këto kushte mund të kandidojnë për t`u bërë anëtar të KLP.

Vakancat e vettingut, KLP: Kandidati i SPAK, drejtues te Krimet e Rënda

Këshillit i Lartë i Prokurorisë ka miratuar në mbledhjen e së hënës drejtuesit e përkohshëm në disa prej prokurorive të vendit.

Prokurori Altin Dumani, një nga kandidatët e renditur me pikët më të larta për SPAK, u caktua drejtues në prokurorinë pranë gjykatës së apelit të krimeve të rënda. Më herët ky post është mbajtur nga Fehmi Petku, i cili u shkarkua nga detyra nga KPK pasi kishte probleme me deklarimin e pasurisë.

Me shumicë votash në mbledhjen e KLP-së u vendos që Isa Jata, prokuror nё Prokurorinë pranë Gjykatës së Shkallës së Parë Tiranё, të jetë nё pozicionin e prokurorit nё Prokurorinё pranё Gjykatёs sё Apelit tё Krimeve tё Rёnda.

Julian Çafka caktohet drejtues në prokurorinë Gjirokastër, për një periudhë tremujore.

Rozeta Qirjaçi u caktua në funksionin e Drejtueses në Prokurorinë pranë Gjykatës së Apelit Korçё.

Irena Çunoti u caktua në funksionin e prokurores në Prokurorinë pranë Gjykatës së Apelit Korçё.

Procesi i vettingut prej të cilit janë shkarkuar nga detyra dhe janë larguar nga sistemi i drejtësisë një numër i konsiderueshëm prokurorësh dhe gjyqtarësh, ka sjellë vakanca nëpër prokuroritë dhe gjykatat e rretheve dhe këto plotësohen përmes vendimeve të KLP-së me prokurorë dhe gjyqtarë të përkohshëm.

Institucionet e reja të drejtësisë, gati godina për KLP dhe KLGJ

Dy institucionet e reja të drejtësisë, Këshilli i Lartë i Prokurorisë dhe Këshilli i Lartë i Gjyqësorit, së bashku me Shkollën e Magjistraturës, do të kenë një godinë të re. Aktualisht dy institucionet e reja të formuara nga reforma në drejtësi dhe ndryshimet kushtetuese, KLP dhe KLGJ, nuk kanë një godinë të tyre dhe ushtrojnë funksionet në ambiente provizore si tek Ministria e Drejtësisë dhe Prokuroria e Përgjithshme.

Godina e re ndodhet tek ish-fusha e Aviacionit dhe pritet që përurimi i saj të bëhet më 22 Korrik 2019.

Më herët kjo godinë ka qenë e Dhomës Kombëtare të Avokaturës, por që është rikonstruktuar për t’u vënë në dispozicion të administratës së KLP, KLGJ dhe Shkollës së Magjistraturës.

KLP shpall listën: 15 emrat e kandidatëve për SPAK. Mbeten jashtë Prela e Hajdarmataj

Këshilli i Lartë i Prokurorisë ka miratuar në mbledhjen e së martës listën me 15 kandidatët për anëtarë të SPAK.

Kreu i KLP-së, Gent Ibrahimi pasi lexoi listën tha se nuk është përfundimtare pasi do të pritet përfundimi i të dy etapave të vettingut për këta kandidatë. “Kjo nuk do të thotë se kjo listë është përfundimtare dhe se SPAK do të ngrihet menjëherë. Por do mbetemi në pritje të ecurisë së vettingut. Vetëm pasi kanddiatët të kalojnë dy etapat e vettingut atëherë do të marrim vendimin për krijimin e Prokurorisë së Posaçme”, tha Ibrahimi.

Ndërkohë, KLP ka vendosur të përjashtojë nga gara disa prej emrave të njohur të sistemit të drejtësisë, siç është drejtuesja aktuale e Prokurorisë së Krimeve të Rënda, Donika Prela, si dhe ish-kreun e kësaj Prokurorie, Besnik Hajdarmataj.

Gjithashtu, janë përjashtuar edhe dy prokurorët Dritan Prençi e Vladimir Mara, të cilët njihen si prokurorët e dosjeve “të nxehta”.

Kandidatët për anëtarë të SPAK:

Altin Dumani

Anton Martini

Elisabeta Imeraj

Arben Kraja

Doloreza Musabelliu

Klodian Braho

Enkelejda Millonai

Manjola Kajana

Edvin Kondilli

Ened Nakuçi

Elida Kackini

Behar Dibra

Besnik Muçi

Anila Jella

Ndini Tavani

KLP zbulon kandidatët që përjashtohen nga gara

Këshilli i Lartë i Prokurorisë ka publikuar në mbledhjen e së martës raportin mbi procesin e vlerësimit të kandidatëve që kanë aplikuar për të qenë anëtarë të SPAK.

Raporti është lexuar nga Relatori i Komisionit të Posaçëm për SPAK, Sandër Beci, i cili bëri të ditur se për të qenë anëtarë të SPAK kanë aplikuar gjithsej 28 kandidatë, prej të cilëve 3 nuk plotësonin kriteret dhe njëri është pezulluar nga vettingu dhe është përjashtuar nga gara.

Konkretisht sipas KLP-së, kandidati Gëzim Cena nuk plotëson kushtet për të qenë anëtar i SPAK pasi nuk ka punuar asnjëherë si prokuror. Kandidatët Fatmir Hoxha dhe Irena Nino që të dy kanë punuar si prokurorë dhe kanë eksperience pune mbi 10 vjet sikurse e parashikon ligji, por që të dy janë larguar me kërkesën e tyre nga sistemi. Por futja sërish në sistem ka një sërë procedurash më të komplikuara se sa është kërkesa për ngritje në detyrë. Ndaj dhe kandidaturat e tyre përjashtohen nga gara për SPAK.

Një tjetër prokuror që largohet nga gara për SPAK është edhe Eugent Beci për shkak se ai është shkarkuar nga detyra nga komisioni i Vettingut. “KLP vendosi pezullimin e garës për kandidatin Eugent Beci”.

Relatori Sandër Beci bëri të ditur se në procesin e vlerësimit të kandidatëve është përfshirë edhe ekspertiza ndërkombëtare e EURALIUS dhe e OPDAT.

“Me Euralius dhe Opdat është diskutuar metodologjia për kriteret e vlerësimit të kandidatëve të SPAK”, tha Beci, i cili lexoi kriteret specifike mbi bazën e të cilave do të përzgjidhen prokurorët që do të jenë anëtarë të SPAK, të cilët duhet të japin prova konkrete se në punën e tyre kanë qenë të sukseshëm veçanërisht në luftën kundër korrupsioni, krimit të organizuar dhe pastrimit të parave.

Ngritja e SPAK është një strukturë që rrjedh nga Reforma në Drejtësi dhe po kërkohet me ngulm nga ndërkombëtarët që të jetë sa më shpejt funksionale. Kjo strukturë do të vërë para drejtësisë zyrtarët e lartë dhe politikanët e niveleve të larta të akuzuar për afera korruptive.

SPAK, një hap larg. Të mërkurën, lista e plotë e prokurorëve

Ngritja e SPAK tashmë është realitet. Këshilli i Lartë i Prokurorisë do të shpallë të mërkurën listën me emrat e prokurorëve të përzgjedhur pas mbylljes së procesit të intervistimit të 23 kandidatëve të garë.

Intervistat u zhvilluan nga data 8-12 korrik dhe kandidatët për anëtarë të SPAK iu përgjigjen pyetjeve nën monitorimin e ndërkombëtarëve.

Në garë ishin 23 kandidatë për 15 vende që do të ketë Struktura e Posaçme e Hetimit të zyrtarëve të lartë të akuzuar apo të dyshuar për afera korruptive apo për lidhje me krimin.

Rregullorja e Këshillit përcakton datën 16 korrik si afatin e fundit për përzgjedhjen e kandidatëve.

Ngritja e SPAK është kërkuar me ngulm nga ndërkombëtarët. Ambasadori i BE-së Luigi Soreca vetëm pak ditë më herët përmes një mesazhi në twitter vuri theksin në domosdoshmërinë e ngritjes sa më parë në institucioneve të reja të drejtësisë.

“Është gjithashtu koha për të ecur përpara me reformat e sundimit të ligjit. Zbatimi i Reformës në Drejtësi vazhdon dhe është e pakthyeshme. Fokusi tani është krijimi i SPAK dhe sjellja e Gjykatës Kushtetuese në funksionalitetin e saj. Pasi të përfundojë rigorozisht verifikimi i kandidatëve, SPAK do të përmirësojë më tej luftën kundër korrupsionit dhe krimit të organizuar, ndërsa Gjykata do të jetë në gjendje të sqarojë të gjitha çështjet e pazgjidhura që kanë të bëjnë me të drejtat kushtetuese, duke përfshirë çështjet e zgjedhjeve”, theksoi Soreca në twitter.

Vetting edhe për prokurorët e rinj, KLP jep “Ok” për 6 të parët

Këshilli i Lartë i Prokurorisë ka emëruar ditën e sot 6 prokurorët e rinj të drejtësisë që do të plotësojnë vendet vakante në prokuroritë e vendit. Zgjedhja dhe miratimi i tyre u bë përmes një metode të që do të zbatohet për vitet në vazhdim: Vetting për kandidatët që emërohen për herë të parë prokurorë. Procesi i vettingut të tyre do të kalojë me verifikimin e pasurisë dhe figurës për kandidatët e diplomuar në Shkollën e Magjistraturës.

KLP pas verifikimit dhe marrjes së informacioneve në të gjitha institucionet ligjzbatuese për këto kandidatë vendosi me 11 vota pro t’i jap “ok” 6 prokurorëve më të rinj të sistemit të drejtësisë.

Këto prokurorë do të plotësojnë vendet vakante në disa prokurori të vendit, konkretisht:

-Eliona Elezi, emërohet në Prokurorinë e Shkallës së Parë në Krujë

-Erida Visoçi, emërohet në Prokurorinë e Shkallës së Parë në Vlorë

-Mediana Meta, emërohet ne Prokurorinë e Shkallës së Parë në Kavajë

-Françesk Ganaj, emërohet në Prokurorinë e Shkallës së Parë në Lezhë

-Odeta Todorushi, emërohet në Prokurorinë e Shkallës së Parë në Korçë

-Albjona Papajani, emërohet në Prokurorinë e Shkallës së Parë në Berat.

KLP, intervista “sekrete” për SPAK. Ibrahimi: Fshehtësia, për të mbrojtur kandidatët

Përveç Gjykatës Kushtetuese që do të nisë të funksionojë brenda muajit korrik, duket se edhe SPAK është në rrugë të mbarë drejt ngritjes dhe fillimit nga puna.

Mëngjesin e së hënës Këshilli i Lartë i Prokurorisë ka zhvilluar katër intervistat e para me kandidatët për SPAK-un. Në pyetje u morën Altin Dumani, që është drejtues në Prokurorinë e Apelit të Krimeve të Rënda, Anton Martini prokuror te Krimet e Rënda, Arben Kraja prokuror i Prokurorisë së Përgjithshme dhe Anita Jella drejtuese e Prokurorisë së Durrësit.

Ndërkohë, gjatë të martës dhe deri në datën 12 korrik janë parashikuar që të dalin para KLP-së të tjerë prokurorët që kandidojë për të qenë pjesë e SPAK.

Ajo që bie në sy është se intervistat me prokurorët, kandidatë për SPAK, zhvillohen në diskrecion të plotë dhe nën monitorimin e ndërkombëtarëve. Secili prej kandidatëve ka një orë në dispozicion. Intervistat me 22 kandidatët për SPAK-un nuk do të bëhen të njohura për publikun për faktin se gjatë marrjes në pyetje, ata do të pyeten dhe do të japin shpjegime për dosje të caktuara, me emra të pandehurish, apo ato që lidhen me persona te caktuar dhe numra dosjesh me objekt sekret hetimi.

Në fund të intervistimit të katër kandidatëve të parë, kreu i KLP, Gent Ibrahimi, zbuloi arsyet pse ky proces u vendos të bëhej me dyer të mbyllura dhe jashtë syrit të kamerave.

“Intervistat janë regjistruar në audio dhe video, sepse ndonjëri kandidat mund të ankimojë vendimin tonë. KLP është e prirë të jetë e hapur. Ajo çka ndodhi në intervista, ishte pjesë e një procesi administrativ, dedikuar shqyrtimit të kandidatëve. Gjatë intervistave konfirmuam gjetjet paraprake të komisionit. Kur të kemi gati relacionet për çdo kandidat, regjistrimet do bëhen në formë publike”, tha Ibrahimi.

Prej kandidatëve të marrë në pyetje, vetëm prokurori Kraja ka kaluar me sukses procesin e Vettingut.

Lidhur me këtë, kreu i KLP është pyetur nëse ndonjëri nga kandidatët rrezikon të bëhet pjesë e SPAK, pasi mund të ngecë në Vetting. Ibrahimi nuk e përjashtoi rrezikun, duke thënë se KLP merret me profesionalizmin, ndërsa Vettingu me integritetin. Më tej, ai shtoi se i gjithë procesi është ndjekur edhe nga ndërkombëtarët.

“Rreziku ekziston, aftësia profesionale dhe integriteti shkojnë pranë-pranë. Ky proces synon profesionalizmin, ndërsa Vettingu integritetin. Kam besimin që të dy proceset do shpien drejt rezultateve të njëjta. Ndërkombëtarët janë pjesë e çdo etape të këtij procesi, kanë folur një për një, kanë punuar krah për krah. Ata nuk mund të japin pikë në fund, por ne nuk mund të fluturojmë përtej gjetjeve të procesit. Ne duam të marrim më të mirën e kandidatëve, meraku ynë ishte që po të bëhej publik procesi i intervistimit, kandidatët nuk do të ishin të lirë. Morëm një mendim për vështirësitë që kanë hasur ndaj proceseve gjyqësore. Ata dhanë arsyet dhe motivet për të konkurruar, si psh., që vlerësimi këtë radhë do të jetë maksimal. Edhe procesi i përzgjedhjes, kujtojmë si përzgjidheshin prokurorët e Krimeve të Rënda dikur, është si nata me ditën me tani. Besimi i tyre te procesi ishte një arsye kryesore për të konkurruar”, u shpreh kreu i KLP.

Intervistimi i 22 kandidatëve për SPAK përfundon më 12 korrik dhe kjo është etapa e fundit për ngritjen dhe funksionimin e SPAK.

Nga 22 kandidatë do të përzgjidhen 15 anëtarë për SPAK dhe sipas reformës në drejtësi SPAK nënkupton krijimin e një gjykate dhe prokurorie të dedikuar vetëm për hetimin, ndjekjen penale dhe gjykimin e korrupsionit, krimit të organizuar si dhe të gjitha veprave penale nga zyrtarë të kaluar dhe aktualë të nivelit të lartë.

4 KANDIDATËT E SPAK NISIN TË HËNËN INTERVISTAT NËN MONITORIM NDËRKOMBËTAR