Basha mbështet PS për arsim: Do ta bëjmë edhe ne

Kreu i Partisë Demokratike Lulzim Basha ka mbështetur një pikë të programit të Partisë Socialiste për arsimin duke u shprehur se do ta bëjë edhe partia e tij këtë gjë kur të vij në pushtet. Kjo pikë ka të bëje me bërjen e detyrave në shkollë. Gjatë një takimi me të rinjtë e Korçës, Basha tha se falë investimeve që do të bëjë kur ai të vij në pushtet, do t’i kthejë shkollat në tempujt e dijes.

“E kemi pjesë të programit tonë. Nxënësve do tu jepet mundësia që të përdor shkollën për kurse. Platforma jonë parashikon edhe digjitalizimin për të avancuar. Të bëjnë detyrat, të mësojnë gjuhë të huaj. Nuk jam kundër kësaj. Pse ka dështuar kjo e përdorimit të ambienteve të shkollës? Çfarë ndodhi me iniciativën e detyrave në shkollë? Nisma u anulua apo vdiq rrugës? Kthimi i shkollave në tempuj të dijes duhen investime dhe ne këtë synojmë të bëjmë këtë.” është shprehur Basha.

Basha foli edhe për ndryshimin mes tij dhe Ramës, i cili tha se paratë që paguhen për koncesionet në vit do të shkojnë për modernizimin e arsimit.

“Arsimi duhet të jetë prioriteti i çdo kombi që synon përparim. Siç është rinia sot, do të jetë vendi nesër. Vendet e përparuara mbështesin arsimin parauniveristar me buxhet në rritje. Shqipëria është i vetmi vend, ku nuk ndodh kjo. Buxheti është pasqyra e qeverisjes, por këta ende nuk e kanë publikuar. Po ju tregoj një shifër që është rrëqethëse: 120 mln euro janë planifikuar vetëm për koncesionet, 10 apo 12 të tilla. Do të mjaftonin 70 milionë euro për të bërë një revolucion total për universitetet dhe arsimin e lartë. Ne do jua dedikojnë investimet për infrastrukturën, dixhitalizimin, trajnimin e pedagogëve, sjelljen e pedagogëve të huaj, trajnimin profesional sipas modelit gjerman – gjysma e kohës në fakultet, gjysma në praktikë. Në planin tonë, për 10 mijë më të mirët, ne do të paguajmë stazhin për 1 vit. Ja ku do t’i çoja unë dhe qeveria ime këto para sot dhe ja ku i çon kjo qeveri. 120 milionë euro i marrin 6-7 njerëz, që janë vjedhje të pastra. Shqipëria i ka të gjitha mundësitë që të ndryshojë menjëherë cilësinë e universiteteve shqiptare. Por kjo qeveri zgjedh t’ua japë këto para disa oligarkëve dhe lë rininë në mëshirë të fatit.” tha Basha

Basha ka nisur turin e tij “Rrugëtimin për Shqipërinë” për të takuar të rinjtë dhe qytetarët në çdo qytet të vendit.

E rëndë, katër aksidente, 2 të vdekur dhe 8 të plagosur

Një aksident me pasoja tragjike ka ndodhur mbrëmjen e së dielës në aksin rrugor Pogradec-Korçë, në afërsi të fshatit Leshnicë. Dy mjete, një tip “Golf” dhe një tip “Benz”, janë përplasur mes tyre, ku si pasojë ka mbetur i vdekur në vend drejtuesi i mjetit tip golf, emri dhe mosha e të cilit ende nuk bëhet i ditur.

Ndërkohë, si pasojë e po këtij aksidenti, kanë mbetur të plagosur dhe katër persona të tjerë. Konkretisht, të plagosura kanë mbetur dy gra dhe një fëmijë i mitur, që udhëtonin në mjetin tip “Golf”, si dhe drejtuesi i mjetit tip “Benz”, shtetasi me inicialet D.H., raporton policia.

Sipas informacionit zyrtar, mësohet se të plagosurit ndodhen nën kujdesin e mjekëve, ndërsa policia ka nisur hetimet për zbardhjen e rrethanave të aksidentit tragjik. Ndërkohë, viktima e këtij aksidenti, ka mbetur brenda makinës së aksidentuar për më shumë se një orë.

Ky është aksidenti i katërt që ndodhë brenda një dite në vendin tonë. Paraditen e të dielës, në një aksident në Rrugën e Kombit, mbeti e vdekur një vajzë e mitur, që po udhëtonte me të atin e saj.

Gjithashtu, një kamion është aksidentuar në aksin rrugor Burrel-Milot, por fatmirësisht shoferi është hedhur para kohe nga kabina e mjetit, duke mos pasur lëndime. Ndërkohë, pasditen e të dielës, tre makina mësohet se janë përplasur në aksin rrugor Peqin-Elbasan.

Si pasojë e këtij aksidenti, kanë mbetur të plagosur katër persona, tre shoferët dhe një grua, për të cilën raportohet se është në gjendje të rëndë shëndetësore. Në aksident janë përshirë dy mjete tip “Benz” dhe një “Mitsubishi”. Të gjithë të plagosurit janë transportuar në spitalin e Elbasanit për ndihmë mjekësore. Policia ka shkuar në vendin e ngjarjes pas aksidentit dhe ka nisur punën për zbardhjen e tij.

Plagosi me armë një person në Korçë, vetëdorëzohet autori

Një person i shpallur në kërkim për plagosje me armë zjarri është vetëdorëzuar në polici, duke i dhënë fund arratisë së tij. Shtetasi J.Hoxha, 28 vjeç, është vetëdorëzuar në Policinë e Korçës, pasi ka plagosur më armë zjarri shtetasin Ilir Hoxha, 48 vjeç. Dorëzimi i tij ka ndodhur pas bashkëpunimit të policisë me familjarët, të cilët kanë bindur të riun.

Ngjarja ka ndodhur më 7 shtator, ku pas një sherri për motive të dobëta, 28-vjeçari ka marrë një kallashnikov dhe ka qëlluar në drejtim të 48-vjeçarit duke e lënë të plagosur rëndë. Më pas autori është larguar nga vendi i ngjarjes me makinën e tij tip “BMW”. I plagosuri ka marrë plagë të rënda në shpatull duke i dëmtuar mushkërinë, për shkak të gjendjes së rëndë ai është dërguar në spitalin e Traumës në Tiranë, ku ndodhet jashtë rreziku për jetën.

Pas vetëdorëzimit të 28-vjeçarit, policia ka sekuestruar armën tip kallashnikov dhe makinën me të cilën u arratis i riu, si provë materiale.

Pranga, rrahu punonjësit e ujësjellësit dhe policët

Policia e Korçës ka arrestuar një 35-vjeçar, i cili është konfliktuar me punonjësit e një firme ndërtimit me pretendimin se po i cenonin pronën. Specialistët për Hetimin e Krimeve në Komisariatin e Policisë Korçë, bënë arrestimin në flagrancë të shtetasit M.M., banues në fshatin Kamenicë, (me precedentë të mëparshëm penal në fushën e narkotikëve dhe dhunës në familje).

Policia, pasi ka marrë njoftimin se në fshatin Kamenicë, disa shtetas po konfliktoheshin me njëri-tjetrin, efektivët Blu, janë nisur menjëherë drejt vendngjarjes, ku kanë konstatuar shtetasin M.M., duke u konfliktuar me disa punonjës të një firme ndërtimi, me pretendimin se punimet e kryera nga firma e tyre për ndërtimin e ujësjellësit në këtë fshat, i kishin cënuar pronën e tij.

Në momentin kur punonjësit e policisë kanë ndërhyrë për të neutralizuar situatën, ky shtetas, i ka kundërshtuar me dhunë, si edhe nuk i është bindur urdhërit të tyre, gjatë shoqërimit për në ambjentet e Komisariatit. Materialet në ngarkim të tij i kaluan Prokurorisë pranë Gjykatës së Shkallës së Parë Korçë për veprime të mëtejshme.

Fermerët bllokojnë unazën në Korçë: Nuk po na lejojnë të shesim

Mëngjesi i kësaj të hëne ka nisur me një protestë në qytetin e Korçës, ku tregatërt e në tregun agro-ushqimor kanë bllokuar unazën e qytetit. Shkak sipas tregtarëve është bërë fakti, që sipas tyre, policia bashkiake nuk i ka lejuar të tregtojnë mallrat.

Në fakt, autoritetet kanë ndaluar shitjen e produkteve nga tregtarët të cilët ende nuk janë pajisur me NIPT fermeri, por vetëm me NIPT tregtari, çka do të thotë se mund të shesin mallin vetëm në pikat e tregtimit me shumicë.

Nga ana tjetër, tregtarët pretendojnë se ata kanë 20 vjet që shesin produktet e tyre në treg, ndërsa këtë fillim jave janë bllokuar nga bashkia.

Disa prej tregtarëve kanë hedhur në tokë produktet e tyre bujqësore në shenjë proteste, ndërsa gjatë saj janë dëgjuar dhe thirrjet “Ram ik”. Për shkak të bllokimit të unazës, në qytetin e Korçës ka pasur kaos në qarkullimin e mjeteve, ndërsa ka ndërhyrë policia për të normalizuar situatën.

Korçë, qëllohet me armë zjarri në drejtim të banesës, objektivi ndodhej në oborr

Disa persona të paidentifikuar kanë qëlluar me armë zjarri në drejtim të një banese në qytetin e Korçës. Ngjarja ka ndodhur mbrëmjen e të premtes në lagjen numër 3 në zonën e njohur si ish depo e ujit në Korçë.

Sipas informacioneve paraprake është qëlluar në drejtim të banesës së Juxhin Kullës, person me precedent penalë në fushën e trafikimit të lëndëve narkotike.

Në momentin kur është qëlluar me armë zjarri, Kulla ka qenë në oborrin e banesës. Nga të shtënat nuk ka pasur të lënduar, ndërsa policia ka nisur hetimet për zbardhjen e ngjarjes dhe autorëve.

Dyshohet se shkak për sulmin mund të jetë e kaluara e Juxhin Kullës dhe përfshirja e tij në trafikun e drogës. Juxhin Kulla ka vuajtur dënimin në burgun e Drenovës me 8 vite burg, pasi u kap gjatë një operacioni policor me 5.6 gramë drogë, të cilat iu gjetën në makinë.

Ndërsa në shtator të 2016 Kulla u ndalua në Tiranë në rrugën “Qemal Stafa” pasi qarkullonte me armë zjarri tip pistoletë me vete.

Po kalonin rrugën, makina përplas dy fëmijë në Korçë

Dy fëmijë janë përplasur nga një fugon udhëtarësh, ndërsa po tentonin të kalonin rrugën. Aksidenti ka ndodhur në Korçë, ku dy fëmijët të moshës 11 dhe 12 vjeç kanë qenë duke kaluar rrugën, teksa janë përplasur nga një automjet transporti të udhëtarëve.

Sipas policisë shkak i aksidentit ka qenë shpejtësia tej normave të lejuara të fugonit që bënte transportin e udhëtarëve të linjës Korçë- Bilisht.

Dy fëmijët, identiteti i të cilëve nuk bëhet i ditur, kanë marrë plagë të rënda dhe janë dërguar në spital.

Makina ‘fluturon’ në kanal, drejtuesi dhe pasagjeri në gjendje të rëndë

Një aksident me dy persona të plagosur, ka ndodhur mbrëmjen e së enjtes në aksin rrugor Korçë – Pogradec. Nga informacionet praprake mësohet se një mjet tip “Audi”, ka dalë nga rruga, teksa ishte duke udhëtuar.

Mjeti ka përfunduar në një kanal, ndërsa për shkak të përplasjes mësohet se është plagosur shoferi, i cili ka marrë plag të rënda, dhe një pasagjer.

Personat e plagosur janë dërguar me urgjencë në spitalin e Korçës për të marrë mjekim. Menjëherë pas marrjes së njoftimit, policia ka shkuar në vendin e ngjarjes.

Pas nisjes së hetimeve, policia ka raportuar paraprakisht se shkak i aksidentit ka qenë shpejtësia e lartë me të cilën po udhëtonte mjeti. Për këtë shka, dyshohet se drejtuesi ka humbur kontrollin duke dalë nga rruga. Grupi hetimor ka nisur hetimet për të zbardhur shkaqet e ngjarjes.

Kultivuan bimë narkotike, arrestohen babë e bir, procedohet kryeplaku i fshatit

Policia e Korçës ka vënë në pranga babë e bir, të cilët akuzohen për kultivim të lëndëve narkotike dhe tregtim të tij. Ndalimi i tyre u bë gjatë kontrolleve rutinë të policisë, ku në makinën tip “Volkswagen” me të cilën po udhëtonin D.L, 19 vjeç dhe Xh.L, 51 vjeç, (atë e bir), banues në fshatin Gjonomadh, iu gjet një sasi lënde narkotike.

Pas arrestimit, policia vijoi kontrollin edhe në banesën e tyre në fshatin Gjonomadh, ku u gjetën të kultivuara bimë narkotike kanabis sativa.

Për këtë ngjarje policia nisi edhe një procedim penal për kryeplakun e fshatit Gjonomadh, N.S, 40 vjeç, për “Shpërdorimi i detyrës” dhe “Moskallëzimi i krimit”.

Kapet me 35 doza kanabis, arrestohet korçari, procedohet një tjetër

Policia e Korçës ka arrestuar në flagrancë një shtetas, ndërsa ka nisur procedimin penal për një tjetër. Shtetasi me inicialet L.M., 38 vjeç banues në Korçë, i dënuar më parë për veprën penale të vjedhjes, është arrestuar në flagrancë pasi është kapur me lëndë narkotike Cannabis Sativa. Ndërkohë, policia ka nisur procedimin penal në gjendje të lirë ndaj shtetasit F.A., 35 vjeç, banues në fshatin Hotolisht të Librazhit, i dënuar më parë për veprën “Mbajtja pa leje dhe prodhimi i armëve dhe i municionit”.

Shërbimet e Policisë, nga informacione të siguruara në rrugë policore, ku dyshohej se shtetasit e mësipërm, bashkëpunonin me njëri-tjetrin dhe ushtronin aktivitetin në fushën e prodhimit dhe shitjes së narkotikëve, kanë organizuar punën dhe kanë bërë lokalizimin e tyre në lagjet nr.8 dhe nr.17 të qytetit të Korçës.

Gjatë kontrollit fizik të ushtruar ndaj shtetasit L.M, iu gjetën e sekuestruan në cilësinë e provës materiale 35 doza me lëndë të dyshuar narkotike Cannabis Sativa si dhe 17.500 lekë, ndërsa gjatë kontrollit të ushtruar në mjetin tip “Citroen” të cilin shtetasi F.A., drejtonte si edhe në banesën e tij, iu gjetën e sekuestruan disa doza të tjera me lëndë të dyshuar narkotike Cannabis Sativa. Materialet i kaluan Prokurorisë pranë Gjykatës së Shkallës së Parë Korçë për veprime të mëtejshme.