Viza amerikane i heq vizën Eugen Becit. Prokurori i preferuar i PD jashtë drejtësisë

Komisioni i Pavarur i Kualifikimit, ka shkarkuar nga detyra prokurorin Eugen Beci, një emër i njohur dhe i preferuar në rrethet e politikës nga PD, i cili përmes këtij vendimi del jashtë sistemit të drejtësisë dhe shkak për këtë është bërë revokimi i vizës amerikane.

Sipas vendimit të Komisionit të Vetingut, prokurori nuk ka deklaruar faktin se i është revokuar viza amerikane në datën 26.1.2017. Drejtoria e Sigurimit të Informacionit të Klasifikuar ka dorëzuar dy raporte për Eugen Beçin pranë Komisionit të Pavarur të Kualifikimit. Në datën 4 prill të 2019, DSIK ka depozituar pranë KPK një raport të dytë për Beçin, duke korrigjuar raportin e parë. Në raportin e dytë, DSIK thotë se prokurori i Krimeve të Rënda ka bërë deklarim të pasaktë në plotësimin e deklaratës për kontrollin e figurës, pasi nuk ka deklaruar revokimin e vizës amerikane.

“Mosdeklarimi në këtë rast, e ngarkon subjektin, Eugen Beçi, me përgjegjësinë e fshehjes së faktit dhe me plotësimin jo me vërtetësi të deklaratës për kontrollin e figurës. Grupi i Punës rishikon konstatimin fillestar të figurës së subjektit të rivlerësimit dhe arrin në përfundimin mbi papërshtatshmërinë e vijimit të ushtrimit të detyrës nga subjekti i rivlerësimit, z. Eugen Beçi”, thuhet në raport.

Shkak për shkarkimin e Becit është bërë edhe kontaktet që ai ka pasur me persona të papërshtatshëm që kishin lidhje me trafikun e lëndëve narkotike. Megjithëse Beci e kishte deklaruar këtë fakt në deklaratën e tij, kjo nuk është konsideruar si rrethanë lehtësuese për faktin se çështja është bërë publike dhe se prokurori nuk kishte sesi ta mbante të fshehtë një gjë të tillë.

Kujtojmë se emri i Eugen Becit nis të lakohet më së shumti në vitin 2014 kur u akuzua nga Tom Doshi se ishte pjesë e një skenari për vrasjen e tij, për interesat e ish-kryetarit të Parlamentit, sot President i Republikës, Ilir Meta.

Sipas Doshit, një miks personash, kishin planifikuar, organizuar dhe tentuar eliminimin e tij fizik.

Në investigimet private që kishte realizuar deputeti shkodran, rezultonte, sipas tij, se shtetasit Agim Rama, kunati i Sali Berishës; Agron Kuliçi, ish-zv.drejtor i Përgjithshëm i Policisë, Eugen Beci, drejtues i Krimeve të Rënda në atë kohë, Ylli Xhaxhollari, biznesmen, kishin kontaktuar me shtetasin Fatjon Skënderi për të gjetur një “vrasës me pagesë” (Durim Bami), i cili do të ekzekutonte fizikisht Tom Doshin, për llogari të Ilir Metës.

Për të bërë bindës skenarin e tij, Doshi publikoi edhe një foto të vitit 2014, ku disa prej personave të sipërpërmendur, gjendeshin në lokalin “Viva”, në zonën e ish-Bllokut, në pronësi të Xhaxhollarit.

Skenari publik i Tom Doshit u hetua nga Prokuroria për Krime të Rënda. Në përfundim, rezultoi se situatat e paraqitura nga deputeti shkodran ishin sajuar prej tij, kolegut të tij Mark Frroku dhe shtetasit Durim Bami, të cilët u morën të pandehur për “kallëzim të rremë”.

Por kjo ngjarje dhe lidhjet e Eugen Becit me shtetasin Fatjon Skënderi, ish-i dënuar për çështje narkotikësh janë bërë shkak për ngecjen e tij në vetting.

ONM kthen në vetting prokurorin Artan Madani

Komisioneri Publik pritet të ankimojë në Kolegjin e Posaçëm të Apelimit kërkesën për rivlerësim të kryeprokurorit të Kavajës, Artan Madani, i cili mori dritën jeshile nga KPK. Artan Madani kaloi vettingun më 1 korrik 2019, por duket se ai ende nuk ka bindur vëzhguesit ndërkombëtar të ONM që mbikëqyrin procesin e vettingut të prokurorëve dhe gjyqtarëve.

ONM i ka paraqitur Komisionerëve Publikë rekomandimin për ankimimin në KPA të vendimit të konfirmimit në detyrë të kryeprokurorit të Kavajës, Artan Madani. Këtë kërkesë Komisionerët publik duhet ta ankimojnë pranë KPA brenda 15 ditëve pasi të njoftohen me shkrim për vendimin e Komisionit të Pavarur të Kualifikimit.

Nuk dihet se cila çështje ka penalizuar kryeprokurorin e Kavajës, Artan Madani që ONM nuk është bindur dhe ka kërkuar rivlerësim të tij.

Vettingu është një proces vlerësimi për prokurorët dhe gjyqtarët në tre drejtime 1-justifikimin e pasurisë 2-pastërtinë e figurës dhe 3-aftësitë profesionale.

Prokurori Klodian Braho, kandidat për SPAK, kalon Vettingun

Kandidati për Prokurorinë Speciale anti-Korrupsion, Klodian Braho ka kaluar shkallën e parë të Vettingut, pasi është konfirmuar në detyrë nga Komisioni i Pavarur i Kualifikimit. Braho është një nga kandidatët e përzgjedhur nga Këshilli i Lartë i Prokurorisë për t`u zgjedhur anëtarët e SPAK. Në listën e KKLP, Klodian Braho është renditur i gjashti me pikë në listën e KLP.

Lidhur me vendimin për konfirmimin në detyrë si prokuror, Komisioni i Pavarur i Kualifikimit nuk ka gjetur probleme me pasurinë e prokurorit. Gjithashtu Klodian Braho është vlerësuar i përshtatshëm edhe në aspektin e profesionalizmit dhe të integritetit.

Megjithatë, që prokurori Braho të bëhet pjesë e strukturave të reja të drejtësisë, do të duhet të kalojë edhe vendimin e Komisionerit Publik, nëse do të apelojë vendimin e KPK-së apo do ta lërë në fuqi.

Klodian Braho ka mbaruar Shkollën e Magjistraturës në vitet 2005-2008 dhe më pas është emëruar prokuror në Berat. Në vitin 2012, Braho u transferua në Prokurorinë e Vlorës ku mbajti edhe postin e zv.drejtuesit, ndërsa në vitin 2015 u dekretua në Prokurorinë e Krimeve të Rënda. Paralelisht me punën si prokuror, Braho është angazhuar edhe në mësimdhënie apo si ekspert në Shkollën e Magjistraturës.

ONM kundër KPK për gjyqtarin Selita, kërkon rivlerësim

Operacioni Ndërkombëtar i Monitorimit ka kërkuar ankimin e vendimit të KPK për kreun e Gjykatës Administrative të Apelit Kastriot Selita. Ai kaloi Vettingun nga Komisioni i Pavarur i Kualifikimit, por ONM nuk është dakord me këtë vendim të KPK-së për Selitën.

Në këto kusthe, vëzhguesi ndërkombëtar ka kërkuar nga Komisioneri Publik, që të apelojë Vettingun për kreun e Gjykatës Administrative të Apelit. Kastriot Selita kaloi Vettingun në datën 18 qershor, pasi KPK vendosi ta konfirmonte në detyrë.

Ky vendim për Kastriot Selitën i është komunikuar Komisionerit Publik këtë të mërkurë në datë të 24 korrikut. Menjëherë pas këtij njoftimi, ka qenë Operacioni Ndërkombëtar i Monitorimit që i ka paraqitur Komisionerit Publik rekomandimin për të ankimuar këtë vendim të KPK në Kolegin e Posaçëm të Apelimit.

Bazuar në pikën 1, të nenit 63, të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, Komisionerët Publikë, brenda 15 ditëve nga data e njoftimit të vendimit nga Komisioni i Pavarur i Kualifikimit, kanë të drejtë të paraqesin ankim pranë Kolegjit të Posaçëm të Apelimit.

Pasuri e dyshimtë, KPA lë në fuqi shkarkimin e Brocit

Kolegji i Posaçëm i Apelimit ka lënë në fuqi me unanimitet, të premten, vendimin e marrë më herët nga KPK, për të shkarkuar gjyqtarin e Gjykatës së Lartë Artan Broci. Trupa gjykuese e KPA kryesohej nga Ina Rama, ndërsa relator ishte Ardian Hajdari, me Albana Shtyllën, Luan Dacin dhe Sokol Çomon anëtar. Pas dëgjimit të kërkesave nga palët, KPA vendosi se shkarkimi i Brocit ishte i drejtë.

“Në përfundim të gjykimit në dhomë këshillimi, trupi gjykues, bazuar në nenin 66, pika 1, germa “a” të ligjit nr.84/2016, vendosi në mënyre unanime: Lënien në fuqi të vendimit nr.53, datë 31.07.2018 të Komisionit të Pavarur të Kualifikimit që i përket subjektit të rivlerësimit Artan Broci”, thuhet në vendimin që është përfundimtar.

Gjyqtari Artan Broci u shkarkua me shumicë votash nga Komisioni i Pavarur i Kualifikimit në 13 korrik të vitit të kaluar. Shkak i shkarkimit të tij ishte se “nuk ka arritur një nivel të besueshëm në vlerësimin e pasurisë”, si dhe vlerësimi me notë negative në kriterin e aftësive profesionale, duke “cënuar besimin e publikut te drejtësia”.

KPK shkarkon nga detyra prokurorin Alfred Agolli, probleme me pasurinë

Komisioni Pavarur i Kualifikimit (KPK) ka shpallur të hënën vendimin për shkarkimin nga detyra të drejtuesit të Prokurorisë së Apelit Gjirokastër, Alfred Agolli. Tre anëtarët e trupës gjykuese të KPK-së, me kryesuese Etleda Çiftja, Roland Ilia relator dhe Olsi Komici anëtar, kanë vendosur unanimitetin për shkarkimin e prokurorit Agolli.

Prokurori gjirokastrit është vlerësuar për tre kritere. Si fillim, në seancën dëgjimore që u mbajt të enjten, KPK tregoi problemet e gjetura ndaj gjyqtarit Agolli, një apartament 68.5 metra i blerë në vitin 2007 në Gjirokastër. Komisioni i Pavarur i Kualifikimit është shprehur se për këtë pasuri ishin përdorur dy hua dhe se për të parën në vlerë 3 milionë lekë, nuk ishte deklaruar dhe nuk kishte për të informacione që e provonin.

Megjithatë, Prokurori Agolli nuk ka qenë dakord me gjetjet e KPK-së, duke argumentuar sipas tij mënyrën se si i kishte kryer. Por, gjatë fjalës së tij ai është shprehur se nuk i kishte të deklararuara dhe se nuk dispononte dokumentacion për huanë e parë. Gjithashtu, KPK-ja, ka hedhur poshtë edhe një raport të dytë të Drejtorisë së Informacionit të Klasifikuar, ku prokurori Agolli cilësohej si i papërshtatshëm për të vijuar detyrën. Ndërkohë, Komisioni ngriti pikëpyetje mbi kriterin e profesionalizimit lidhur me disa vendime pushimi dhe mosnjoftim të palëve.

Alfred Agolli e ka nisur karrierën në sistemin shqiptar të drejtësisë në vitin 1998 dhe ka ushtruar funksionin fillimisht në prokuroritë e Gjirokastrës. Në vitin 2008, Agolli është emëruar drejtues i Prokurorisë së Sarandës ndërsa në vitin 2013 është promovuar drejtues i Prokurorisë së Apelit të Gjirokastrës.

Nuk justifikon pasurinë, Zaganjori rikthehet përsëri në sitën e Vettingut

Ish-kryetari i Gjykatës Kushtetuese, aktualisht Kryetar i Gjykatës së Lartë, Xhezair Zaganjori ka dalë këtë të martë para Kolegjit të Posaçëm të Ankimimit, me kërkesën e Komisionerit Publik. Ky organ, Komisioneri Publik, me rekomandim të ONM, të cilët nuk ishin dakord me vendimin e KPK, ka ankimuar vendimin e dhënë nga Kolegji i Pavarur i Kualifikimit, i cili në korrik të vitit 2018 e la në detyrë Xhezair Zaganjorin, duke e kaluar Vettingun me sukses.

Por, Komisioneri Publik pretendon se ka parregullsi në deklarimet e pasurisë së Zaganjorit, ndaj, kërkon rivlerësim të tij. Gjatë seancës të së martës para KPA-së, Komisioneri Publik ka dhënë shpjegime dhe argumente të reja, duke u shprehur se gjyqtari Zaganjori s`ka burime për të justifikuar pasurinë dhe në deklaratat vjetore, ka vlera më të ulëta sesa realja.

“KPK ka bërë interpretim të gabuar të ligjit me rastin e Zaganjorit. Subjekti i rivleresimit ka katër pasuri në zotërim. I ka në bashkëpronësi me bashkëshorten. Zaganjori ka bërë deklarim të pasaktë dhe të pamjaftueshëm të pasurisë si dhe nuk ka burime të mjaftueshme financiare për ta justifikuar atë. Në deklaratat vjetore ka deklaruar vlera më të ulëta sesa realja. Ndërsa në deklaratën e vettingut vlera e pasurive është më e lartë. Pra ka pasaktësi. Pasaktësitë në vlera reflektohen edhe në kontratat e shitjes, në të cilat vlera për apartament është 500 mijë lekë”.

“Për dyqanin është përcaktuar 125 mijë lekë dhe vlera për bodrumin, 125 mijë lekë dhe për zyrën 125 mijë lekë. Nga aktet në dosje, nuk provohet burimi i ligjshëm për vënien e këtyre pasurive. Sa i takon transfertave monetare nëpërmjet bankës, nuk provohen një pjesë e tyre. Nuk ka paraqitur dokumentacion provues për barrën e provës dhe justifikimet e tij ngelin në nivel deklarativ. Në lidhje me burimin e ligjshëm të krijimit të të ardhurave për krijimin e pasurive të sipërcituara janë të ardhurat nga shitja e një apartamenti tjetër, të ardhura personale dhe të ardhura nga qiraja”, ka deklaruar Komisioneri Publik.

Vetë Zaganjori në dalje deklaroi se në shtëpinë e tij jeton që prej vitit 1997. Por tha se kishte gjetur kontratën e sipërmarrjes 30 vjet më parë dhe se prona i përkiste fisit të gruas prej 200 vjetësh.

Tani pritet vendimi i Kolegjit të Posaçëm të Apelimit, i cili ka në dorë të vendosë nëse gjyqtari Zaganjori do të konfirmohet në detyrë, apo ky organ, pra KPA, do të rrëzojë vendimin e një viti më parë nga KPK, duke shkarkuar nga detyra dhe larguar nga sistemi i drejtësisë Xhezair Zaganjorin.

Ngërçi me zgjedhjen e Kryeprokurorit, KLP kërkon Vetting të përshpejtuar për Olsian Çelën

Këshilli i Lartë i Prokurorisë i është drejtuar me një letër zyrtare Komisionit të Pavarur të Kualifikimit, për përshpejtimin e procedurës për rivlerësimin e kandidatit për Prokuror të Përgjithshëm Olsian Çela.

Ky i fundit është një nga kandidatët që ka dorëzuar dosjen për tu bërë Prokuror i Përgjithshëm, por deri më tani, Çela ende nuk e ka kaluar Vettingun, pasi dosja e tij mbetet në pritje për rivlerësim nga Komisioni i Pavarur i Kualifikimit. Shkresa e KLP-së mban firmën e kryetarit të saj Gent Ibrahimi, i cili ndër të tjera shkruan:

“Në këto kushte, nisur nga rëndësia e procesit të përzgjedhjes së Prokurorit të Përgjithshëm, si dhe duke mbajtur parasysh afatin e parashikuar nga neni 31 i Ligjit nr 97/2016 “Për Organizimin dhe Funksionimin e Prokurorisë së Republikës së Shqipërisë”, për kryerjen e verifikimit të plotësimit të kushteve ligjore nga kandidatët, do të kërkonim nga ana juaj rivlerësimin me përparësi të subjektit Olsian Çela brenda 30 ditëve nga mbërritja e kësaj kërkese”, thuhet në shkresën e KLP-së.

Vetëlargohet nga sistemi i drejtësisë gjyqtari i lartë Andi Çeliku

I emëruar anëtar i Gjykatës së Lartë në korrik të vitit 2008 dhe mbajtja e këtij funksioni deri në 2017, kanë qenë të mjaftueshme për gjyqtarin Andi Çelikun, i cili nuk ka pranuar më t’i shërbejë sistemit të drejtësisë. Mosqenia më pjesë e sistemit të drejtësie, shmang gjithashtu edhe procesin e vettingut për të më lidhje me vlerësimin e pasurisë, pastërtisë së figurës dhe aftësive profesionale.

Gjyqtari është larguar nga Gjykata e Lartë në qershor të vitit 2017 për shkak të mbarimit të mandatit, ndonëse sipas ligjit mund të qëndronte në detyrë deri kur të zëvendësohej. Pas largimit nga Gjykata e Lartë, sipas statusit të magjistratit, Çeliku kishte të drejtë të shërbente si gjyqtar në Gjykatën e Apelimit, por me një shkresë të datës 26.03.2019, ai ka njoftuar Presidentin se nuk kërkon të përfitojë nga të drejtat që i burojnë nga statusi i magjistratit. Madje në shkresë përcakton se me vullnetin e tij ai nuk e dëshiron më statusin e magjistratit. Të njëjtën shkresë ai e ka paraqitur edhe më datë 08.04.2019 në Këshillin e Lartë Gjyqësor.

Këshilli i Lartë Gjyqësor në datë 25.04.2019 e ka dërguar vendimin për mbarimit të statusit të magjistratit, pranë Komisionit të Pavarur të Kualifikimit (KPK), duke ndërprerë kështu procesin e vettingut për ish gjyqtarin e Gjykatës së Lartë, Andi Çeliku. Vettingu kishte nisur 11 ditë para se ai të njoftonte Presidentin për heqjen dorë nga statusi i magjistratit.

Vendimi i KPK për ndërprerjen e procesit të vettingut për gjyqtarin Andi Çeliku

Vendimi përfundimtar: Rovena Gashi jashtë drejtësisë

Trupi Gjykues i Kolegjit të Posaçëm i Apelimit të Vettingut, ka lënë në fuqi vendimin e Komisionit të Pavarur të Kualifikimit për shkarkimin e prokurores Rovena Gashi, që ushtronte detyrën në Prokurorinë e Përgjithshme.

Znj.Gashi nuk e kaloi Vettingun nga KPK më parë, por ajo vendosi të apelonte këtë vendim në KPA. Gjatë ditës së sotme Kolegji i Posaçëm i Apelimit ka dhënë vendimin përfundimtar pasi ka shqyrtuar dosjen e prokurores Rovena Gashi.

Kolegji i Posaçm i Apelimit nuk ka gjetur asnjë shkelje nga KPK, duke lënë në fuqi vendimin e marrë më herët. Sipas vendimit të dhënë këtë të mërkurë, Rovena Gashi nuk justifikon blerjen e dy apartamenteve, një në Durrës te zona e quajtur “Shkëmbi i Kavajës” dhe një Tiranë.

Sipas KPA, Rovena Gashi ka bërë deklarime të pasakta në lidhje me blerjen e këtyre apartamenteve. Gjithashtu, ajo ka bërë deklarime të pasakta dhe të pamjaftueshme të pasurisë, të cilat nuk justifikojnë blerjen e këtyre apartamenteve.