Gjithë arsyet përse dështoi aksioni i opozitës

Opozita zhvilloi 10 protesta nga 16 shkurti deri në 8 korrik, me kauzën “largim i Qeverisë ilegjitime, dalë nga vota të blera”. Kështu mund të përmblidhet në një fjali aksioni opozitar i këtyre pesë muajve. Tashmë që Lulzim Basha, zhvilloi dhe protestën falënderuese për qytetarët dhe Presidentin më 8 korrik, është momenti për të bërë një bilanc të aksionit opozitar, asaj që mund të quhet fitore për PD-në dhe padyshim aspekti tjetër janë humbjet. Në këtë rast, që në nisje vlen të theksohet, se aksioni opozitar lexohet në mënyra të ndryshme, ku disa thonë ishte pozitiv djegia e mandateve dhe bojkoti i zgjedhjeve, ndërsa një pjesë tjetër janë të mendimit se aksioni opozitar e ka dëmtuar kauzën e opozitës.

Le ti marrim me radhë:

Si fillim, lënia e mandateve ishte një akt ekstrem (i pranuar nga vetë PD dhe aleatët), por i justifikuar si e vetmja mënyrë për t`i bërë presion Qeverisë të largohet. Fakti është se lënia e mandateve nuk e largoi Qeverinë, ajo vijon punën edhe sot e kësaj dite. PD dhe aleatët u shprehën ditën e parë që morën vendimin, se mandatet do ti djegin të gjithë deputetët, në fakt, ndodhi e kundërta, PD-ja u tradhtua nga të tijët, jo vetëm që s`i dogjën të gjithë, por shumë nga listat e demokratëve pranuan mandatin, ata janë sot opozita parlamentare të drejtuar nga Rudina Hajdari. Pikërisht, gabimi i parë i PD-së, ishte lënia e mandateve dhe mosllogaritja e pasojave, goditjen ja dhanë dhjetra demokratë që zunë vendin e ish-deputetëve në Parlament, duke vënë në pikëpyetje të madhe vendim e PD-së.

Dështimi i dytë i opozitës, ishte mosllogaritja e qëndrimeve që do të mbante një tjetër faktor, ndërkombëtarët. Në fakt, ky është një nga gabimet e pakuptueshme të opozitës. E cila kishte një shembull real, se në aksionin ekstrem të bojkotit parlamentar dhe lënien e mandateve, ndërkombëtarët nuk do të ishin krah tyre. Do të mjaftonte vetëm pak kujtesë për aksionin opozitar të nisur në shkurt të 2017 dhe përfunduar me marrëveshjen e 17 majit, po atë vit, për të kuptuar se qëndrimi i ndërkombëtarëve nuk do të ishte as këtë herë në krahun e ekstremit të një aksioni politik. Këtë opozita nuk e llogariti, pasojat e saj i mësoi tre ditë para zgjedhjeve (kujtoni intervistën e Mathew Palmer).

Gabimi i tretë, që dështoi aksionin opozitar, ishte mungesa e një plani. Javë pas jave e protestë pas proteste, u kuptua qartë se opozita nuk kishte një plan konkret, për të detyruar qeverinë të tërhiqej. Radikalizmi (me sulme molotov gjatë protestave) mbeti gjithsesi në kufijtë e një tensioni të kontrolluar, ndërsa opozita nuk dha asnjë plan konkret, se si do të detyronte Edi Ramën të largohej nga Kryeministria. Madje, opozita nuk pati asnjë plan as për zgjedhjet e 30 qershorit, dhe tashmë duket se nuk ka asnjë plan, as se si do të mbrohet nga të vetët (kryetarët rebel të bashkive që mbetën të zhgënjyer nga aksioni i PD). Pasojat mund të jenë të pallogaritshme për Lulzim Bashën dhe PD.

Gabimi tjetër i opozitës ishin sulmet ndaj ndërkombëtarëve. I gjendur i rrethuar dhe pa asnjë komunikim dhe mbështetje nga Shtetet e Bashkuara të Amerikës, Lulzim Basha bëri një deklaratë befasuese pak ditë para zgjedhjeve të 30 qershorit, duke i cilësuar ambasdorët “Don Kishotë që mbrojnë Edi Ramën dhe e mbajnë atë në pushtet”. Ky ishte një tjetër gabim, që përkeqësoi situatën brenda vetë opozitës, që dështimin e aksionit të vetë, po kërkonte t`ia faturonte të huajve.

Veprimi tjetër, që rrënoi aksionin opozitar, ishte vendimi për të mos marrë pjesë në zgjedhje. Lulzim Basha dhe aleatët dogjën afatet për t`u regjistruar në zgjedhjet e 30 qershorit, pasi kërkesa e tyre për largimin e Qeverisë nuk ishte përmbushur. Megjithatë, para kësaj meriton një vëmendje të hollë aksioni opozitar. Basha bëri një gabim strategjik. Pesjëmarrja në zgjedhjet e 30 qershorit, mund të forconte kauzën e tij (të manipulimit dhe vjedhjeve të votave nga Qeveria) duke u futur në garë dhe monitoruar atë direkt. Kështu, nëse do të kishte probleme gjatë zgjedhjeve të 30 qershorit, opozita do të kishte më shumë argumenta për të bindur të huajt dhe shqiptarët, se qeveria vjedh zgjedhjet. Por, opozita zgjodhi një strategji tjetër, vendosi të mbështeste publikimin e përgjimeve të Bild, që jepnin indicie për blerje votash, por për zgjedhjet e tre viteve të shkuara. Ky akt, në fakt nuk u pasua me pritshmëritë e PD-së, që besonte se do të vinte nën presion ndërkombëtarët dhe vetë Qeverinë.

Madje reaksioni ishte i kundërt, ndërkombëtarët i zhvlerësuan përgjimet e Bild, dhe mbështetën zgjedhjet e 30 qershorit, dhe thanë: “Krimet elektorale të merret drejtësia, standardet elektorale i vendosni me dialog duke bërë Reformën Zgjedhore”. Ky mund të ketë qenë zhgënjimi më i madh i opozitës, një goditje e kauzës dhe aksionit të saj. Gjithashtu, refuzimi i pjesëmarrjes në zgjedhjet e 30 qershorit, ka një pasojë dhe më të rëndë. PD dhe opozita, nëse do të ishin futur në garë, me siguri do të kishin mbrojtur disa bastione të tyre në bashkitë e vendit, e do të tentonin të merrnin disa të tjera. Kështu, PD mund të konfirmonte atë që thoshte gjatë protestave: “opozita është shumica”. Zgjedhjet do të ishin sondazhi real për të provuar rritjen e opozitës. Basha nuk e bëri këtë, tani pasojat janë të rënda, opozita nuk ka asnjë pushtet real në Shqipëri.

Refuzimi i dialogut ishte një tjetër hap i gabuar. Ndonëse Kryeministri Edi Rama u akuzua nga opozita si autor i “krimeve elektorale të 2017”, ai ishte i vetmi njeri me të cilin opozita do të duhej, dhe duhet të ulet në dialog. Nëse zgjedhjet e 2017 u fituan me blerje vote, siç Katari fitoi të drejtën e organizimit të Botërorit të 2022 me blerje të kupolës drejtuese të FIFA-s, vërtetimi i korrupsionit, çoi në largimin e Blaterit nga drejtimi i FIFA-s, por Katarit nuk i është hequr e drejta për të organizuar Kupën e Botës. Në një situatë të ngjashme, PD-ja nëpërmjet dialogut, mund të kërkonte hetim të plotë (siç e ka kërkuar në deklarata) të personave përgjegjës (nëse ka) të krimeve elektorale, dhe kryerjen e Reformës Zgjedhore. Praktikisht, nëse janë vjedhur votat në Dibër e Durrës, si votat për Katarin, kjo nuk e zhvleftësonte legjitimitetin e Qeverisë, e cila në rastin konkret, do të kishte dy fish përgjegjësi, (angazhim që e ka treguar), për të dialoguar dhe ofruar garanci që ato që kanë ndodhur të mos ndodhnin më.

Një tjetër gabim i opozitës, ishte thirrja për konflikt në 30 qershor. Kjo rëndoi dhe më tepër situatën dhe mbështetjen ndërkombëtare të PD-së. Amerika, e cila heshti deri sa foli Kolegji Zgjedhor për dekretin e Ilir Metës, u shpreh qartë: “Kush bën dhunë më 30 qershor, ndërpret marrëdhëniet me SHBA”. Në këto kushte, thirrjet për konflikt, shkaktuan një tronditje të madhe brenda opozitës. Skenari i përgatitur prej kohësh përpamundësim të zgjedhjeve nëpërmjet dhunës, dështoi, por shtoi zhgënjimin te kryebashkiakët e djathtë, të cilët kishin marrë premtim nga Basha se nuk do të kishte zgjedhje më 30 qershor. Në këto kushte, Basha është i detyruar të bëj paqe me kryebashkiakët e tij, aq sa tashmë ka harruar Edi Ramën, dhe po i shkon në takim çdo kryetari në ikje nga bashkitë e drejtuara nga PD.

Mirëpo, nëse të gjitha këto janë disa nga arsyet e shkatërrimit të aksionit opozitar, ajo më e rënda duket se është mungesa e qartësisë për të ardhmen dhe konfuzioni brenda vetë aleatëve. Monika Kryemadhi ka lënë të kuptohet se do dialog, me Edi Ramën, jo si Kryeministër, por megjithatë, pranon të futet dhe në zgjedhje me të, ndryshe nga Basha, që mbetet stoik në vendimet e tij. Në krahun tjetër, Basha ka rryma revolte brenda së djathtës, shumë ish-drejtues të kësaj partie janë rikthyer në skenë, kërkojnë largimin e tij dhe reformim të partisë, para se PD të shuhet. Gjithashtu, Lulzim Basha, ka dhe një problem që duhet të zgjidhë. Refuzimi i pashpjegushëm për të hyr në dialog dhe për të gjetur zgjidhje të krizës. Ky është problem me veten, pasi aleatët i kanë dhënë shenjat se “kupa është mbushur”, kriza duhet zgjidhur. /Realstory.al/

Braçe vë në “punë” Bashën: Rregullo transformatorin, se meruat Selenicën

Numri dy i Qeverisë, Erion Braçe, ka reaguar pas takimit që kryetari i PD-së Luzim Basha ka pasur me kryetarin në largim të Bashkisë Seleincë, Përparim Shameti. Zëvendës kryeministri Braçe i kërkon Lulzim Bashës që të kap prej “veshi” kryebashkiakun që i rri në krah, dhe bashkë me të, të shkojnë të rregullojnë transformatorin e energjisë që furnizon me elektricitet ujësjellsin e Selencisë. Erion Braçe shprehet se për shkak të neglizhencës së kryetarit të Bashkisë, banorët e Selenicës kanë një javë pa ujë të pijshëm.

“Ti lyrzim nuk po lufton për karrige? Ti lyrzim po lufton për interesin publik? E ke seriozisht këtë? Atëhere, merre për veshi atë Papin tënd, domethënë “kryetarin legjitim” të Selenicës, të dy bashkë çoni bythën nga karrigia partiake e tavolina po e tillë, e shkoni e ndërroni transformatorin nga merr energji pompa e ujësjellësit se meruat Selenicën. Ka 7 ditë pa ujë dhe Papi yt legjitim as që mendon për këtë”

“Ujësjellësi është në pronësi të tij, pompën e dogji se e linte ditë e natë ndezur pa kontroll. Pompën e re ja blemë dhe ja vendosëm ne, Qeveria! Tani lërini dënglat me karrige e ndërroni transformatorin se edhe atë e keni djegur! Ky është interes publik! Bëjeni tani meqë qenkeni në Selenicë! Ndryshe e bëjmë ne, por ti e ju hani peshk pas kësaj!”, shkruan Erion Braçe.

Bar West/ Monika puthet me Lulin, Meta me qenin?

Politika tejkalon përherë pritshmëritë e publikut, jo vetëm me aktet e saj që vendosin për mirë ose për keq jetën e qytetarëve, por dhe me veprimet individuale të jetës sociale të njerëzve që përfshihen në të. Presidenti Ilir Meta është shndërruar në politikanin, që i ka dhënë më shumë se kushdo material autorëve të memeve në rrjetet sociale. Në fakt, Ilir Meta ka zgjedhur në njëfarë mënyre të jetë vetë aktor në angazhimin në rrjetet sociale.

Pas konferencë për shtyp, ku tregoi një version për zgjidhjen e krizës, duke shpallur dhe ‘zgjedhjet presidenciale’, Ilir Meta e ka marrë me shumë sportitet jetën, duke u bërë tepër aktiv në rrjetet sociale. Megjithëse, të jesh aktiv si politikan në rrjetet sociale nuk ka asgjë të keqe, e bën çdo lider, por për çështje të rëndësishme dhe që lidhen me detyrën. Ndërsa, Presidenti në largim i Shqipërisë, publikon ç`gjen në facebook.

Nga video dhe fotot me rroba plazhi, apo meme ku ai vetë është në fokus, te video me tifozët e Celltic në rrugët e Bosnjes, apo miqësia e re me, një qen, e pas tyre, foto dhe video nga takimet zyrtare, si ajo me Erdogan apo presidentin e Maqedonisë.

Pra, kreu i shtetit, ka kaluar përtej seriozitetit të një lideri, aq më tepër të një Presidenti Republike, që për vetë staturën që ka, seriozitetin duhet ta ketë pikën e parë të sjelljes së tij si përfaqësues i postit të lartë të Kreut të Shtetit. Në krahun tjetër, kryetarja e LSI dhe ai i PD-së, janë bërë gjithashtu pjesë e memeve në rrjetet sociale, ku foto e ditës është ajo e takimit të Kryemadhit me Bashën, pas protestës të së hënës.

Përçahet opozita, Monika ‘flirton’ me Ramën

Monika Kryemadhi prej disa ditësh ka dalë me qëndrime më të moderuara se kryetari i Partisë Demokratike, në lidhje me vijimin e aksionit opozitar dhe zgjidhjen e krizës. Shefja e LSI-së, deklaroi tre ditë më parë, se ishte gati për dialog me Edi Ramën, por me kushtin e vetëm që Kryeministri, të paraqitet në tryezën e dialogut si kryetar i PS-së. Ky qëndrim i Kryemadhit, nuk ka marrë mbështetje nga liderë të tjerë të opozitës, por as nuk është kundërshtuar.

Megjithatë, Lulzim Basha vijon të mbetet i prerë në qëndrimin e tij, Rama të largohet dhe më pas zgjidhet kriza. Por, qëndrimet e Bashës, duket se tashmë nuk janë në koherencë të plotë me ato të Kryemadhit. Shefja e LSI, mbrëmjen e vonë të së martës, ka folur në një studio televizive, ku është shprehur se “ Të jem unë si Lulzim Basha unë shkoj në zgjedhje me Edi Ramën. Sot të shkosh në zgjedhje me Edi Ramën kemi 90% të shqiptarëve. Ja kam thënë dhe Basha e di shumë mirë këtë gjë, jo vetëm Basha por shumë të tjerë. Nuk kam asnjë kontraditë (me Bashën), jemi të rakorduar. Jemi në negociata me ndërkombëtarët. Sot opozita është në udhëheqje të opinionit kombëtar dhe shqiptar”.

Një deklaratë e fortë kjo e Kryemadhit, që bëhet për herë të parë pas pesë muajsh aksion opozitar, dhe që duket se vë kreun e PD-së nën presion për të pranuar hyrjen në dialog. Në këtë pikë, deklarata e Monika Kryemadhit duhet lexuar edhe si një sfidë ndaj Lulzim Bashës për 13 tetorin. Të gjithë aleatët e vegjël të Bashës kanë deklaruar më herët se do të futen në zgjedhjet e 13 tetorit, edhe LSI e Monika Kryemadhit do të mbështesë dekretin e Ilir Metës. I vetmi që nuk ka pranuar këtë dekret deri më tani, është Lulzim Basha, i cili deklaroi më 27 qershor (ditën që doli dekreti) se nuk do të pranonte asnjë datë zgjedhjesh pa largimin e Ramës.

Në këto kushte, Monika Kryemadhi, e vënë edhe nën presion elektoral, tashmë që nuk do të ketë më asnjë pushtet lokal dhe qendror, dhe me rrezikun e firove në rradhët e partisë së saj, duket se po kërkon një proces të përshpejtuar të zgjidhjes së krizës dhe shkuarjen në zgjedhje sa më parë, pasi vetëm kështu mund të shpëtohet LSI.

Këtë e vërteton edhe një sondazh i fundit i Eduard Zaloshnjës, i cili tregon se LSI, nëse zgjedhjet mbahen sot, humb më shumë se 140 mijë vota në krahasim me zgjedhjet e fundit. Ndërkohë, këto vota që kanë rrjedhur nga LSI, kanë shkuar te PD-ja, pasi po sipas këtij sondazhi, Partia Demokratike kishte pësuar një rritje me rreth 100 mijë vota.

Protesta e opozitës, Euronews: U zhvillua pasi Parlamenti vendosi të shkarkojë Ilir Metën

Rrjeti televiziv “Euronews” i ka kushtuar një kronikë protestës së opozitës, që u mbajt të hënën më 8 korrik përballë Kryeministrisë në Tiranë. Eurones shprehet se protestuesit u mblodhën në protestën e dhjetë kombëtare të opozitës, ku përsëritën thirrjen “Rama Ik”, dhe “E duam Shqipërinë si Europa”. Rrjeti më i madh televiziv në Europë thekson gjithashtu konfliktin që hyri presidenti me Qeverinë, në lidhje me dekretin anti-kushtetues për anulimin e zgjedhjeve.

“Mbështetësit e Opozitës shqiptare u kthyen në rrugë… Ata u bashkuan të hënën në mbrëmje në Tiranë për të kërkuar largimin e qeverisë Rama, që e akuzojnë si të korruptuar dhe të lidhur me krimin e organizuar. Një manifestim i thirrur nga forca kryesore në opozitë, Partia Demokratike. “Zgjedhjet e 30 qershorit ishin një referendum kundër së keqes. Rama largohu. Rama ik’, thirri Lulzim Basha lideri i Partisë Demokratike”.

“Kjo erdhi pasi Parlamenti votoi ngritjen e një Komisioni Hetimor për shkarkimin emundshëm të Presidentit, pasi Ilir Meta vendosi të nxirrte një dekret për anulimin e zgjedhjeve të fundit, për të cilat tha se do të ishin të pavlera pa pjesëmarrjen e partive të opozitës. Kryeministri Edi Rama i quajti veprimet e Metës të pabazuara në Kushtetutë”.

“Në qendër të kësaj krize politike, Edi Rama e akuzon opozitën se po kërkon të vendosë në diskutim Reformën në Drejtësi që do ti japë fund korrupsionit. Kryeministri po nxit që Bashkimi Evropian të fillojë negociatat e pranimit me vendin e tij dhe shpreson për një përgjigje pozitive këtë vjeshtë”, shkruan Euronews.

Euronews English e ka futur Shqipërinë në agjendën e lajmeve europiane falë bashkëpunimit të ri me Euronews Albania. Lajmet nga Shqipëria tashmë mund të ndiqen nga audienca e Euronews në 12 gjuhë të ndryshme. #EuronewsAlbania #Euronews #Allviews
Gepostet von Euronews Albania am Dienstag, 9. Juli 2019

Kryemadhi si Basha për ndryshimin, si Meta për Shqipërinë!

Disa orë pasi Lulzim Basha publikoi një video të protestës së 8 korrikut, ku fjalën më të përdorur të përshkrimit të tij kishte “ndryshimin”, shembullin e kreut të PD-së, e ka ndjekur dhe partnerja e tij opozitare, Monika Kryemadhi. Kryetarja e LSI-së, ka publikuar gjatë pasdites të së martës një video nga protesta, ku përsëri flet për ndryshimin. Megjithatë, ndryshe nga Basha, Monika është më e përmbajtur te përdorimi i fjalës “ndryshim”, pasi e përdor vetëm një herë këtë fjalë, ndryshe nga Basha, që e përdorte plotë gjashtë herë, në pesë fjali.

Monika Kryemadhi shkruan se “shqiptarët meritojnë një qeveri që mban përgjegjësi para popullit, një sistem demokratik funksional që vjen nga zgjedhjet e lira e të ndershme, një Shqipëri ku të gjithë janë të barabartë para drejtësisë, me mundësi të barabarta për punësim, mirëqenie, shëndetësi, arsim dhe ku dinjiteti njerëzor nuk nëpërkëmbet”.

“Ky është momenti për t’i dhënë Shqipërisë një shtet me institucione të forta dhe sistem që nuk çimenton kontrollin e individit mbi shtetin por garanton fuqinë e popullit mbi pushtetin. Pazaret në kurriz të shqiptarëve për karriket e politikës kanë marrë fund. Ne jemi së bashku në këtë betejë si qytetarë të barabartë që duan më shumë Shqipërinë se sa partinë. Rruga jonë është e mbushur me sfida dhe ne jemi të gatshëm t’i përballojmë. Sepse për ne Shqipëria është e para, shqiptarët janë të parët. Zoti e bekoftë Shqipërinë dhe shqiptarët”, shkruan në komentin shoqërues të videos nga protesta.

Ndërsa në mesazhin e videos, ndër të tjera theksohet “protestat e shqiptarëve janë për ti dhënë fund tranzicionit 30 vjeçar që ka kapur Shqipërinë”. Pra, në fakt, shefja e LSI thotë diçka të vërtetë në këtë rast, pasi ajo, bashkëshorti i saj Ilir Meta, Sali Berisha dhe disa politikanë të tjerë, kanë prej 1990-së që mbajnë Shqipërinë në tranzicion.

Basha flet për “ndryshim”, por harron aksionin e opozitës

Lulzim Basha ka reaguar duke publikuar një video të shkurtër nga protesta e të hënës, mbajtur përballë godinës së Kryeministrisë. Kreu i PD e ka shoqëruar videon e publikur me një tekst, ku përmend disa herë fjalën “ndryshim”.

“Sot shqiptarët janë të etur për ndryshim. Sot shqiptarët duan ndryshim të vërtetë, jo të përkohshëm, jo fals, jo fasadë, por ndryshim që do t’u japë fund krizave dhe traumave të tranzicionit. Një ndryshim që do të na fusë në rrugën e sigurt drejt Bashkimit Europian dhe vlerave perëndimore. Zgjedhjet e lira e të ndershme do t’i hapin rrugën transformimit politik dhe ekonomik që ka nevojë Shqipëria, do ti hapin rrugë ndryshimit të vërtetë. Ky ndryshim është tani, qëllimi ynë kryesor, përparësia ime absolute ndaj çdo shqiptari”, shkruan Lulzim Basha.

Protesta e të hënës, e 10 kombëtare për nga numri prej 16 shkurtit, ishte ndoshta protesta e fundit kombëtare për muajin e verës. Burime nga PD u shprehën për Realstory.al, se tubimi i 8 korrikut ishte si shenjë falënderimi ndaj qytetarëve, të cilët kanë ndjekur aksionin opozitar prej djegies së mandateve parlamentare.

Megjithatë, protesta, ishte dhe shenj falënderimi ndaj Ilir Metës, i cili me një mesazh para nisjes së protestës, konfirmoi zyrtarisht se ishte pjesë e opozitës, duke u bërë thirrje qytetarëve që të dilnin në protestë ndaj qeverisë. Aksioni opozitar është pa një axhendë, të paktën pas protestës së të hënës.

Ndonëse përfaqësues të opozitës kanë lënë të kuptohet se do të ketë tubime dhe gjatë verës, liderët kryesor të PD dhe LSI, ende nuk kanë konfirmuar se cili do të jetë hapi i radhës i tyre. Megjithatë, kulmi i aksionit opozitar gjatë korrikut dhe ditëve të para të gushtit, duket se do të jetë pengsa e të zgjedhurve të PS për të futur në zyrat e bashkive, që aktualisht drejtohen nga PD-LSI.

Sot shqiptarët janë të etur për ndryshim.Sot shqiptarët duan ndryshim të vërtetë, jo të përkohshëm, jo fals, jo fasadë, por ndryshim që do t’u japë fund krizave dhe traumave të tranzicionit. Një ndryshim që do të na fusë në rrugën e sigurt drejt Bashkimit Europian dhe vlerave perëndimore.Zgjedhjet e lira e të ndershme do t’i hapin rrugën transformimit politik dhe ekonomik që ka nevojë Shqipëria, do ti hapin rrugë ndryshimit të vërtetë. Ky ndryshim është tani, qëllimi ynë kryesor, përparësia ime absolute ndaj çdo shqiptari.
Gepostet von Lulzim Basha am Dienstag, 9. Juli 2019

Basha thotë ‘Jo’, e tradhton Pampuri: Zgjedhjet më 13 tetor

Lulzim Basha është shprehur se nuk do të marrë pjesë në zgjedhjet e 13 tetorit (nëse ato do të mbahen). Kreu i PD-së kërkon largim të Qeverisë, dhe krijimin e një kabineti tranzitor për të garantuar zgjedhje “të lira dhe të ndershme”, shprehet Basha. Por, ky komunikim publik i Lulzim Bashës, duket se nuk është në të njëjtën linjë me komunikimin brenda partisë.

Të paktën kështu ka lënë të kuptohet ish-deputetja e PD-së, Oriola Pampuri, që ka folur në një studio televizive dhe është shprehur se “Ka një dekret të Presidentit, që zgjedhjet të mbahen më 13 tetor. Nuk mund ta hedhësh poshtë dhe as të bësh asnjë hap kundër këtij dekreti. Vetëm Gjykata Kushtetuese do ta gjykojë, çdo hap i gabuar do të gjykohet nga kjo gjykatë. Sot jemi pa drejtësi dhe pa gjykata. Ramin e tradhtoi padituria”, është shprehur Pampuri.

Tani, se kush tradhton kë, kjo kuptohet qartë. Pasi në fakt, është ish-deputetja demokrate që nxjerr zbuluar liderin e saj, që është zotuar se nuk merr pjesë në zgjedhjet e 13 tetorit (gjithmonë nëse ato do të mbahen). Por, ky ligjërim i Pampurit s`mund të jetë kurrsesi jashtë linjës së mendimit politikë të partisë që ajo përfaqëson.

Dhe kjo kuptohet nga fakti që Pampuri në deklaratën e saj në vijim, ka përsëritur në një moment atë që tha Lulzim Basha në protestën e të hënës “se me Ramën nuk bëhet marrëveshje, pasi ai nuk i qëndroi asaj të 2017”. Ndërkohë, ish-deputetja ka shprehur dhe qëndrime të tjera zyrtare, që legjitimoin në fakt pranimin e zgjedhjeve të 30 qershorit nga opozita, siç ishte rasti i disa ditëve më parë, kur vetë Oriola Pampuri deklaroi në një konferencë për shtyp se PD do të padiste Taulant Ballën dhe Denar Bibën për shpërdorim detyre, për rezultatin e zgjedhjeve për Elbasanin. Thënë kjo, PD pranon ‘de facto” 30 qershorin, dhe nëpërmjet ish-deputetes jep sinjale për një marrëveshje me Qeverinë, për të shkuar përsëri në zgjedhje më 13 tetor.

Basha krah Xhelalit në Kamëz: Hajdeni të rrëzojmë Edi Ramën

Lulzim Basha është shfaqur krah Xhelal Mziut pasditen e të dielës, kryebashkiakut të Kamzës në detyrë, që ka kërcënuar se nuk do të lirojë zyrën për kryetarin e ri, i zgjedhur në 30 qershor. Nga një njoftim i shpërndarë nga zyra e shtypit e PD-së, mësohet se Lulzim Basha ka zhvilluar një takim me banorët e Kamzës, të cilët i ka ftuar të marrin pjesë në protestën e 8 korrikut.

“I shoqëruar nga sekretari i përgjithshëm, Gazment Bardhi dhe kryetari i bashkisë së Kamzës, Xhelal Mziu, Basha i ftoi qytetarët e Kamzës, që ashtu siç kanë bërë edhe në 9 protestat e tjera kombëare, të jenë në krye të lëvizjes kombëtare për ndryshim, per largimin e Edi Rames dhe krijimit te nje qeverie qe garanton zgjedhje te lira e te ndershme. Gjate takimeve informale qe nisi dje ne Kavaje dhe Elbasan dhe, sonte, ne Kamez e Vore, kreu i opozites synon te percjelle ftesen per protedte, tek sa me shume qytetare qe refuzuan ne 30 Qershor regjimin kriminal dhe te korruptuar te Edi Rames”, shkruhet në njoftimin e PD-së.

Dy ditët e fundit, Lulzim Basha ka zhvilluar takime informale me militantët e PD-së në Kavajë, Elbasan, Kamëz dhe Vorë, qytetet më të afërta me Tiranën, të cilat mesaduket Basha shpreson që të sjellin sa më shumë njerëz në protestën e 8 korrikut. Ndërkohë, Tiranën ia ka lënë në dorë LSI, pasi ka qenë kryetarja e kësaj force politike, Monika Kryemadhi, që dy ditët e fundjavës, ka zhvilluar takime me militantët dhe ka kërkuar angazhim maksimal për të pasur sa më shumë njerëz në protestë.

Pas Kamzës dhe Vorës, Lulzim Basha ka shkuar në Durrës, ku sipas PD-së, është shprehur se nesër shqiptarët duhet të jenë bashkë për të treguar se do ta bëjmë Shqipërinë si gjithë Europa. Ndërkohë, po sipas këtij njoftimi të ardhur nga zyra e shtypit të PD, Basha mësohet të ketë thënë se 30 qershori ishte dita që shënoi fillimin e fundit real të Edi Ramës.

Sulmi ndaj Lubonjës? Balla: Nxiten nga retorikat e politikës ndaj gazetarëve

Gazetari dhe drejtuesi i “Real Story” dhe “Realstory.al”, Sokol Balla ka reaguar duke shprehur solidaritet ndaj sulmit që i është bërë mjetit të vëllait të gazetarit Fatos Lubonja, gjatë të dielës. Me një reagim në rrjetet sociale, Sokol Balla, evidenton faktin e hidhur të mungesës së solidaritetit mes gazetarëve, përfshirë dhe atë vetë, që vetëm pak ditë më parë u kërcënua gjatë një konference për shtyp nga Presidenti i Republikës, Ilir Meta. Sokol Balla nxjerr në pah faktin, se sa të pambrojtur janë gazetarët, që bëhen preh e sulmeve që motivohen nga retorika e egër e politikanëve shqiptarë, dhe padyshim standardin e dyfishtë që përdorin këta politikanë në shprehjen e solidaritetit, sikundër bën këtë të diel Ilir Meta, Monika Kryemadhi dhe Lulzim Basha.

“Dhe këtu larg në Rio, ndërsa shëtisja në Ipanema, pa njerëz në mëngjes, mësova për incidentin që mund të ketë përfshirë Lubonjën ose vëllain e tij. Pastaj lexova postimin e Presidentit, të gruas së Presidentit, të partnerit të saj opozitar dhe babait të tij shpirtëror. Pa i hyrë dy-standardeve dhe të vërtetës shumë thellë, indiferent ndaj mungesës së solidaritetit mes nesh njerëzve të medias në raste të tillandaj meje, totalisht solidar me Lubonjën dhe familjarët e tij, edhe ky rast tregon sesa të pambrojtur janë gazetarët, sesa shpesh ata janë vetëm me hijen e tyre, përballë retorikave të egra të politikanëve, që pastaj motivojnë indirekt të çmendur në rrugë të sulmojnë ata (gazetarët) në mënyrë agresive. Nuk e them këtë si shenjë frike, po jo të gjithë i kemi sistemuar fëmijët me pallate dhe eskorta policie”, shkruan gazetari Sokol Balla.

Të dielën u denoncua në media një rast ku pretendohej se ishte sulmuar makina e gazetarit Fatos Lubonja. Lajmi bëri xhiron e mediave fillimisht, më pas, njëzëri dhe në mënyrë të sinkronizuar, reaguan dhe krerët e opozitës, përfshi Ilir Metën. Basha, Monika dhe bashkëshorti i saj, Presidenti, shprehën idinjatën dhe nxituan ta cilësonin sulmin “politik” apo nga “çunat problematik”, ende pa folur policia. Kjo e fundit foli më pas, dhe sqaroi se personi që ka goditur mjetin, i cili nuk ishte i Fatos Lubonjës siç mësoi Realstory.al, por i vëllait të tij, ishte një person me probleme mendore. Pasi ishte arrestuar, personi është lënë përsëri i lirë. (Lexo lajmin për sulmin e makinës së Lubonjës)

View this post on Instagram

Dhe ketu larg ne #rio ndersa shetisja ne #Ipanema pa njerez ne mengjes, mesova per incidentin qe mund te kete perfshire Lubonjen ose vellain e tij. Pastaj lexova postimin e Presidentit, te gruas se Presidentit, te partnerit te saj opozitar dhe te babait te tij shpirteror. Pa i hyre dy-standardeve dhe te vertetes shume thelle, indiferent ndaj mungeses se solidaritetit mes nesh njerezve te medias ne raste te tilla ndaj meje, totalisht solidar me Lubonjen dhe familjaret e tij, edhe ky rast tregon sesa te pambrojtur jane gazetaret, sesa shpesh ata jane vetem me hijen e tyre, perballe retorikave te egra te politikaneve, qe pastaj motivojne indirekt te cmendur ne rruge te sulmojne ata (gazetaret) ne menyre agresive. Nuk e them kete si shenje frike, po jo te gjithe i kemi sistemuar femijet me pallate dhe eskorta policie.

A post shared by Sokol Balla (@sokolballaofficial) on Jul 7, 2019 at 7:54am PDT