Protesta e opozitës, Tirana blindohet nga policia

Opozita e bashkuar do të zhvilloj sot protestën e saj kombëtare në orën 18:30 siç ka paralajmëruar më herët. Policia e Shtetit ka marrë masa për mbarëvajtjen e saj dhe sigurimin e rendit publik duke vendosur kamera në rrugët kryesore si dhe forcat RENEA dhe efektivët e gardës do të monitorojnë protestuesit nga godinat e larta. Mbi 1500 forca policie do të janë të aktivizuara gjatë pasdites së sotme, ndërsa Kryeministria dhe Parlamenti janë rrethuar me gardh metalik. Në gatishmëri do të qëndrojnë edhe ambulancat dhe forcat zjarrfikëse për çdo të papritur.

Opozita ka kërkuar leje deri në mesnatë për zhvillimin e protestës, ndërsa policia e Tiranës ka dhënë leje deri në orën 20:30.

Opozita përgatitet për protestën, por mban të fshehtë skenarin

Ndryshe nga protestat e tjera ku opozita pak a shumë e shfaqte skenarin e protestës, këtë të sotmin e ka mbajtur të fshehtë. Protesta sot do të zhvillohet në orën 18:30 në sheshin përpara Kryeministrisë.

Kjo është protesta e katërt e opozitës dhe sipas tyre kjo është vendimtarja, pasi do të sjellë largimin e Ramës.

Në lidhje me këtë protestë ka reaguar edhe Ambasada Amerikane në Tiranë ku në një mesazh të publikuar bënte thirrje që çdokush që merr pjesë të distancohet nga dhuna dhe çdo thirrje për dhunë.

Ndërkohë policia ka marrë masa për të shmangur incidentet dhe ka angazhuar ashtu si dhe herët e tjera mbi 1500 efektivë policie, automjete të hedhjes së ujit si dhe garda e republikës do të jenë të angazhuara si pjesë e planit të masave.

Caktohen pozicionet e reja për opozitën në Parlament

Me largimin e deputetëve të PD-së dhe LSI-së nga Kuvendi, janë lënë vakant edhe pozicionet që këto deputetë mbanin në komisionet parlamentare apo strukturat drejtuese të këtij institucioni.

Në seancën e sotme me 92 vota pro është vendosur që deputeti Myslym Murrizi të zgjidhet nënkryetar i Kuvendit, post që më herët mbahej nga Edi Paloka. Ndërsa Rudina Hajdari do të drejtojë Komisionin e Integrimit, që më parë drejtohej nga Genc Pollo.

Postet e marra nga opozita e re në Kuvend:

– Myslym Murrizi, zëvendëskryetar I Kuvendit

– Rudina Hajdari, kryetare e Komisionit të Integrimit Europian

– Fationa Dhimitri, kryetare e Komisionit të medias

– Enver Roshi, kryetar i Komisionit të Shëndetësisë

– Alban Zeneli zv.kryetar në Komisionin e Sigurisë

– Halil Jakini zv.kryetar i Komisionit të Veprimtarisë Prodhuese

– Korab Lita, zv.kryetar i Komisionit të Ligjeve

-Ralf Gjoni zv.kryetar i Komisionit të Jashtëm

Mbyllet protesta, policia nis shoqërimet në komisariat

Pas përfundimit të protestës së opozitës së bashkuar që zgjati dy orë kanë nisur edhe shoqërimet e para në polici.

Raportohet se 4 persona janë shoqëruar në Tepelenë, mes tyre edhe kryetari i degës së PD-së.

Të shoqëruarit janë Skënder Bega, Hysen Ismaili, Astrit Guga dhe Ladi Bana, ky i fundit kryetar i degës së PD-së në Tepelenë. Në komisariatin e Tepelenës kanë shkuar ish-deputeti Tritan Shehu dhe kryetari i degës së PD-së Gjirokastër Dasho Aliko duke kërkuar shpjegime.

Protestë në 12 qarqe, ja rrugët që bllokohen

Opozita e bashkuar do të protestojë ditën e sotme në orën 18:00 në 12 qarqe të vendit duke bllokuar akset kryesore të qarkullimi të mjeteve.

Ish-deputetët e opozitës do të jenë bashkë me protestuesit të përqendruar në pika të ndryshme të vendit duke e cilësuar këtë protestë si shenjë e përshkallëzimit të mosbindjes civile. Bllokimi i akseve kryesore të vendit është një tjetër formë proteste e opozitës, që po zhvillohet për herë të dytë pas asaj të 25 prillit. Ja se cilat akse rrugore do të bllokohen dhe si do të jetë shpërndarja e deputetëve.

Qarku Shkodër – në kryqëzimin e rrugës në Kryebushat (ku ndan rruga për Vaun e Dejës)
(Flamur Noka, Lorenc Luka, Bardh Spahia, Izmira Ulqinaku, Romeo Gurakuqi)

Qarku Kukës – Ura e Drinit në hyrje Rrugës së Kombit
(Isuf Çela)

Qarku Lezhë – Mbikalimi Milot
(Lindita Metaliaj, Andon Frrokaj)

Qarku Dibër – Ura në kryqëzimin Burrel – Rrëshen- Klos
(Xhemal Gjunkshi)

Qarku Durrës – Plepa, në hyrje të Autostradës
(Edi Paloka, Florion Mima, Oerd Bylykbashi, Fatbardha Kadiu, Oriola Pampuri)

Qarku Elbasan – Mbikalimi Bradashesh
(Lulzim Basha, Edmond Spaho, Endri Hasa, Luçiano Boçi)

Qarku Korçë – Rruga nacionale në hyrje të Korçës
(Ervin Salianji, Hekuran Hoxhalli)

Qarku Fier – Rruga nacionale, Ura Mbrostar
(Luan Baçi)

Qarku Vlorë – Hyrje e superstradës Vlorë- Levan
(Nadire Meçorapaj)

Qarku Berat – Ura Vajgurore dhe dalje Beratit, Aksi Berat – Ura Vajgurore
(Astrit Veliaj)

Qarku Gjirokastër – Kryqëzim i rrugës Përmet-Tepelenë- Gjirokastër
(Tritan Shehu)

Qarku Tiranë – Tiranë, Rrethrrotullimi “Shqiponja”
(Gazment Bardhi, Gent Strazimiri, Grida Duma, Dhurata Çupi, Jorida Tabaku, Valentina Duka, Genc Pollo, Agron Shehaj, Aldo Bumçi, Klevis Balliu, Albana Vokshi, Halim Kosova, Enkelejd Alibeaj)

Shpërndarja e ish-deputetëve të LSI:

Në Durrës, rrethrrotullimi i Plepave: Kryetarja e LSI-se Monika Kryemadhi,

Në Tiranë, rrethrrotullimi Shqiponja: Petrit Vasili, Luan Rama, Klajda Gjosha, Floida Kerpaci, Edmond Panariti dhe Erisa Xhixho

Në Shkodër: Agron Cela

Në Lezhë: Viktor Tusha

Në Milot: Perparim Spahiu

Në Fier: Kejdi Mehmetaj

Në Elbasan: Edmond Haxhinasto

Në Korçë: Endrit Braimllari

I gënjen mendja se do ndalojnë zgjedhjet! Rama mesazh opozitës

Pas kthimit nga samiti i Berlinit dhe mesazheve të ndërkombëtareve, kryeministri Rama ka mbledhur sot në Tiranë grupin Parlamentar të PS-së ku ka dhënë mesazhe drejtuar opozitës dhe kërkesave të saj. Rama tha se opozita shqiptare është refuzuar nga ndërkombëtarët të cilët e kanë dënuar vendimin e tyre për djegien e mandateve. Kryeministri gjithashtu tha se zgjedhjet vendore nuk mund të pengohen nga askush dhe se qeveria nuk e ka aspak për detyrë të fusë me zor opozitën në zgjedhje.

“Kujtuan se do tronditnin Evropën e Amerikën duke djegur mandatet e duke veshur jelekët, por në këmbim kanë marrë refuzimin enjë maskaradë të pashoqe, e po vazhduan kështu do të marrin edhe izolimin total nga gjithë bota demokratike, kujtojnë se do ngremë njerëz për të djegur godinat e institucioneve duke shpresuar se do të prodhojnë dëshmorë në revolucionin e tyre imagjinarë. Se në kohën e tyre u përgjigjshin me kallashnikov por gjetën disa të verbër që janë në burg për faj të tyre.

I gënjen mendja se do ndalojnë zgjedhjet vendore se ende kujtojnë se do të gjejnë budallenj që të shkojnë me këmbët e tyre burgjeve.

E meqë në gjithë broçkullat që u thanë në samitin e Berlinit u tha se mua do më kërkonin shtyrjen e zgjedhjeve apo do më tërhiqnin veshin për mospjesëmarrjen e të arratisurve, nuk më zuri veshi, asnjë kapje të kësaj natyre, por asgjë, zero.

Në demokraci askush nuk është i detyruar të hyjë më zor në zgjedhje, nuk është detyra e qeverisë të fusë me zor në zgjedhje ata që nuk duan”, u shpreh Kryeminstri.

ERTV Live😊: FJALA NE MBLEDHJEN E GRUPIT PARLAMENTAR TE PS🌹
Publiée par Edi Rama sur Jeudi 2 mai 2019

Përshkallëzohet protesta, 12 rrugët që do të bllokojë opozita sot

Opozita e bashkuar është e vendosur për të thelluar krizën dhe përshkallëzuar protestat duke bllokuar 12 akse të rëndësishme rrugore në çdo qark të vendit.

Bllokimi i rrugëve do të nisë në orën 18 dhe do të vazhdojë për 2 orë.

Do të jenë 12 rrugë që do të bllokohen nga veriu në jug duke penguar qarkullimin e automjeteve dhe duke djegur goma makinash.

Basha tha dje pas takimit me kryetaren e LSI-së, Monika Kryemadhi se sot do të bëjë publike detyrat e qeverisë transitore. “Në orën 18:00 do të nisë aksioni në 12 qarqet e vendit për bllokimin e akseve kryesore si një intensifikim, si një përshkallëzim i mosbindjes civile. Paradite në orën 11:00 do të shpalosim bashkë me koalicionin tonë opozitar detyrat e qeverisë tranzitore për të garantuar zgjedhje të lira dhe të ndershme. Largimi i Edi Ramës është kusht i panegociueshëm për të hapur rrugën e dialogut politik që do të çojë drejt qeverisë tranzitore. ”- tha Lulzim Basha.

Rrugët që do të bllokohen sot nga opozita:

1. Qarku Kukes – Ura e Drinit ne hyrje Rruges Kombit.

2. Qarku Shkoder- Rruga Shkoder-Koplik

3. Qarku Lezhe – Mbikalimi Milot

4. Qarku Diber- Ura ne kryqezimin Burrel – Rreshen- Klos.

5. Qarku Durres- Plepa, ne hyrje te Autostrades

6. Qarku Tirane- Sheshi Shqiponja

7. Qarku Elbasan – Mbikalimi Bradashesh

8. Qarku Korçe – Hyrja, rruga nacionale e Korçes.

9. Qarku Gjirokaster- kryqezimi i Rruges Permet-Tepelene – Gjirokaster .

10. Qarku Fier- Rruga nacionale tek Ura Mbrostar.

11. Qarku Berat ne Ura Vajgurore, aksi Berat – Ura Vajgurore.

12. Qarku Vlore- Hyrja e superstrades Vlore- Levan

“Standardet europiane në Shqipëri, ende jo në masën e duhur”

Nënkryetari i grupit parlamentar CDU/CSU në Bundestag, Johann Wadephul ka folur rreth krizës politike që ka përfshirë Shqipërinë. Në një intervistë për “Deutsche Welle” ai tha se palët duhet të dialogojnë dhe të gjendjet një kompromis për të mirën e vendit, pasi vetëm në këtë mënyrë do të përparojnë dhe të shpejtojnë integrimin në BE.

Wadephul tha se vendimi për hapjen e negociatave do të jepet në shtator, ndërsa foli edhe për djegien e mandateve të PD duke u thënë “mos u mbyllni përgjithmonë: Kush kalon portën për të dalë jashtë, duhet ta kalojë atë sërish për të hyrë brenda. ”

Wadephul gjithashtu ka folur edhe për ngecjen e dialogut Serbi-Kosovë, ku tregon se samiti i Berlinit ka dhënë impulset e duhura që këto dy shtete të nisin sërish komunikimin me tyre.

Deutsche Welle: Zoti Wadephul, cili është vlerësimi juaj për samitin e Ballkanit Perëndimor në Berlin?

Johann Wadephul: Samiti ishte shumë pozitiv. U gëzova shumë që erdhën kaq shumë liderë nga rajoni për të biseduar me kancelaren Merkel dhe presidentin Macron. Ishte një impuls i rëndësishëm që Angela Merkel me Emmanuel Macron dhanë dhe ky impuls tani duhet të merret nga vendet e rajonit. Dhe sidomos mes Serbisë dhe Kosovës na nevojiten negociata shumë konkrete.

Si mendoni ju se mund të zgjidhet konflikti Serbi-Kosovë?

Problemi i njohjes nuk mund të zgjidhet brenda ditës, askush nuk e pret këtë. Por mund të flitet për çështje të veçanta, për trashëgiminë kulturore, për mbrojtjen e pakicave, për asociacionet e komunave. Tani është e rëndësishme që të dyja palët të bisedojnë e të mos ngecet në ca grindje të panevojshme për territore. Këto janë çështje të dorës së dytë. Nëse negociatat do të fillojnë tani me zgjidhjen e këtyre çështjeve praktike dhe shumë konkrete, atëherë kjo është një shenjë e mirë. Gjithsesi, ishte një nismë e rëndësishme nga Parisi dhe Berlini, sepse tani mund të rifillojnë negociatat.

Ju u takuat edhe me kryeministrin e Shqipërisë, Edi Rama. Kur mund të shpresojë Shqipëria të marrë “po”-në e grupit parlamentar CDU/CSU për çeljen e negociatave?

Ne jemi në pritje të rekomandimit të Komisionit të BE-së dhe ky do të na vijë pas zgjedhjeve evropiane. Prandaj, sipas gjasave, nuk do të jemi në gjendje që t’i organizojmë konstultat deri në qershor. Vendimi do të merret në shtator. Por parimisht u kemi thënë të gjitha vendeve të Ballkanit Perëndimor se janë pjesë e Evropës dhe se e kanë vendin në Bashkimin Evropian. Dhe, nëse Shqipëria i përmbush kushtet për çeljen e negociatave, edhe ne do ta japim votën tonë pozitive në Bundestagun gjerman, duke i mundësuar qeverisë gjermane që të votojë në nivel europian.

A i ka plotësuar Shqipëria kushtet për çeljen e negociatave?

Duhet të presim njëherë raportin e Komisionit të BE-së. Unë këtë nuk e njoh. Duhet ta lexoj dhe të shoh situatën në vend. Unë konstatoj se bëhen përparime, por ka ende për të bërë në luftën kundër korrupsionit dhe ndërtimin e shtetit të së drejtës. Sot e kam të vështirë të jap një vendim. Prandaj them se duhet të ecet përpara. Kush dëshiron të hyjë në BE, duhet të afrohet me standardet europiane, dhe kjo nuk ka ndodhur ende në atë masën që ne e konsiderojmë të duhur. Por ka shumë shanse që të arrihet.

Shqipëria është momentalisht në një krizë ku është përfshirë edhe partia simotër e partisë suaj, PD-ja. A shihni ndonjë mundësi për ta zgjidhur krizën?

Zgjidhje ka gjithmonë. Zhvillimi aktual është i keq. Është problematike që PD-ja nuk mund të marrë pjesë në parlament me deputetët që janë zgjedhur në të vërtetë. Dikur ajo duhet të guxojë një fillim të ri. Unë besoj se është e rëndësishme që Shqipëria të gjejë veten. Prandaj u them partive pro-europiane që të arrijnë kompromise në nivel kombëtar dhe të vijnë së bashku në Evropë.

Mos është ky një apel për kolegët e partisë simotër, pra, për Bashën, që ai të marrë pjesë në zgjedhjet lokale?

Nuk do të dëshiroja të ndërhyja në raportet personale të PD-së në Shqipëri. Por dëshiroj ta inkurajoj atë të marrë pjesë në proceset politike. Ne nuk mund ta sjellim Shqipërinë në Bashkimin Evropian nëse forcat pro-evropiane qofshin ato pro-Rama, qofshin pro-Basha, janë në konflikt me njëra-tjetrën. Duhet bërë një afrim në një farë mënyre. Sesi do të arrihet kjo, kjo do të vendoset në Shqipëri. Unë mund të them në drejtim të partisë simotër: mos u mbyllni përgjithmonë: Kush kalon portën për të dalë jashtë, duhet ta kalojë atë sërish për të hyrë brenda. Demokraci do të thotë komunikim, grindje, por edhe aftësi për kompromis. Pa kompromis nuk ka demokraci./Marrë nga DW

Opozita në protestë, qarkullimi bllokohet për 2 orë

Kryedemokrati Basha tha ditën e sotme se nesër opozita do të bllokojë akset kryesore rrugore si protestë dhe përshkallëzim i mosbindjes civile. Protesta do të jetë si ajo e 25 prillit, por ndryshimi i vetëm është se nuk do të jenë më në 5 qarqe dhe 1 orë, por do të ketë një zgjerim të saj në 12 qarqe të vendit dhe do të zgjasë plot 2 orë.

Protestat do të nis në orë 18:00 ku protestuesit pritet të dalin në rrugë dhe të bllokojnë qarkullimin e mjeteve dhe ku do të kërkohet largimi i kryeministrit Rama.

Akset që do të bllokohen:

Qarku Kukës – Ura e Drinit në hyrje të Rrugës Kombit.

Qarku Shkodër- Rruga Shkodër-Koplik

Qarku Lezhë – Mbikalimi Milot

Qarku Dibër- Ura ne kryqëzimin Burrel – Rrëshen- Klos

Qarku Durrës- Plepa, në hyrje të autostradës

Qarku Tiranë- Sheshi Shqiponja

Qarku Elbasan – Mbikalimi Bradashesh

Qarku Korçe – Hyrja, rruga nacionale e Korçës.

Qarku Gjirokastër- kryqëzimi i Rrugës Përmet-Tepelenë – Gjirokastër .

Qarku Fier- Rruga nacionale tek Ura Mbrostar.

Qarku Berat ne Ura Vajgurore, aksi Berat – Ura Vajgurore.

Qarku Vlore- Hyrja e superstradës Vlore- Levan

Aleatët kërkojnë tryezë dialogu, por PD ende e paqartë

Ndërsa aleatët e Koalicionit Opozitar kërkojnë një tryezë dialogu opozitë maxhorancë, selia blu ende duket e paqartë në qëndrimin e saj.

Një ditë më parë kryetari i PD-së, Lulzim Basha në mënyrë indirekte pranoi se është i hapur për dialog, duke thënë se qëndrimet e PD-së janë në koherencë me qëndrimet e partive aleate, ndryshe është shprehur numri dy i kësaj partie, Gazmend Bardhi.

Ai e ka thënë në mënyrë të prerë se nuk do të ketë asnjë tryezë bisedimi me Ramën kryeministër.

“Ajo që unë mund të pohoj me 100% siguri është që as kryetari i PD, Lulzim Basha, as ndonjë drejtues tjetër i PD, nuk ka asnjë kanal konunikimi me Edi Ramën.

Nuk ka për të patur asnjë kanal komunikimi me Edi Ramën, asnjë marrëveshje me Edi Ramën, sa kohë ky është kryeministër, sepse situata ku ndodhet sot vendi është për shkak të këtij njeriu.

Nuk mund të negociohet me shkaktarin e situatës. Do të duhet të largohet shkaktari i situatës Edi Rama dhe, më pas, vendi do të shkojë drejt zgjidhjes, që i japin fund krizës politike apo institucionale, por negociata me Edi Ramën sa kohë ky është kryeministër i Shqipërisë, nuk ka për të patur”, ka thënë Bardhi në emisionin e Ilir Babaramos në Report TV.