Plagosja në Fier, autori i ndoqi viktimat, i mori armën policit dhe i qëlloi brenda në Spital

Një ngjarje e rëndë ka tronditur Fierin mbrëmjen e së shtunës, ku si pasojë e një konflikti, raportohet se kanë mbetur të plagosur të paktën 5 persona, 3 prej të cilëve nga të shtënat me armë zjarri. Ngjarja ka nisur në qytezën e Levanit, ku mësohet se dy grupe janë konfliktuar fizikisht me njëri-tjetrin. Si pasojë e konfliktit fizik, kanë mbetur të plagosur disa persona.

Këta janë nisur në drejtim të Fierit për të marrë mjekim, ndërsa një person i ka ndjekur nga pas. Në ambientet e brendshme të Spitalit të Fierit, personi që ishte vënë në ndjekje të këtyre personave, me të cilët ishte konfliktuar në Levan, ka hyrë dhe ka qëlluar me armë zjarri, e tipit pistoletë.

Si pasojë e të shtënave janë plagosur tre persona, të cilët janë duke u kuruar në Spitalin e Fierit. Autori dyshohet se i ka marrë armën policit të shërbimit në Spitalin e Fierit. Më pas, mësohet se autori është larguar nga vendi i ngjarjes, por një polici është përleshur me të, duke i marrë dhe armën dhe më pas duke e arrestuar.

Ndërohë, veç autorit, policia ka arrestuar dhe persona të tjerë të dyshuar si të përfshirë në këtë ngjarje, ndërkohë që një tjetër është shpallur në kërkim. Pas ngjarjes së rëndë, në ambientet e Spitalit të Fierit kanë shkuar forca të shumta të policisë, FNSH dhe RENEA. Emri i autorit dhe personave të plagosur ende nuk bëhet i ditur, ndërkohë që policia po punon për zbardhjen e ngjarjes.

Plagoset me armë zjarri në ballkonin e banesës në Vlorë, ish mësuesi i fizkulturës me precedent penal

Një person është plagosur më armë zjarri teksa qëndronte në ballkonin e banesës së tij në lagjen “10 korriku” në qytetin e Vlorës. I plagosur ka mbetur shtetasi Eljus Thartori, 36 vjeç, i cili është dërguar në spital dhe ndodhet jashtë rreziku për jetën.

Thartori , është një emër i njohur për policinë, pasi ka qenë i dënuar më parë për vrasje. Eljus Thartori është dënuar me 10 vite burg për akuzën e vrasjes me paramendim dhe armëmbajtje pa leje.

36-vjeçari jetonte jashtë vendit, ndërsa ishte kthyer pak kohë më parë. Eljus Thartori ka punuar si mësues i edukimit fizik të shkollës 9-vjeçare “Teli Ndini” në Vlorë, ndërsa u shkarkuar pas u shfaq në media në një video ku inkurajonte nxënësit të ofendonin drejtoreshën dhe luante me ta bixhoz gjatë orës së mësimit.

Nuk dihet ende nëse atentati i sotëm ka lidhje me të kaluarën e Thartorit, ndërsa policia po heton për zbardhjen e ngjarjes.

Makina përplas motorin, plagosen dy turistë izraelit në Elbasan

Dy turistë izraelitë janë plagosur rëndë si pasojë e një aksidenti në unazën e Elbasanit. Çifti izraelit po udhëtonte me një motor tip Honda me targa rumune, ku është përplasur me një makinë.

Nga përplasja e motorit me fuoristradën gruaja ka përfunduar e shtrirë në rrugë disa metra më larg, ndërsa bashkëshorti i saj është tërhequr nga makina duke e zënë poshtë.

Ai ka mbetur i bllokuar për disa momente poshtë mjetit dhe është nxjerrë më pas me ndërhyrjen e disa personave të pranishëm në vendin e aksidentit.

Dy turistët izraelit u dërguan fillimisht në spitalin e Elbasanit për të marrë mjekimin e duhur, por si pasojë e gjendjes kritike, ato u dërguan me urgjencë drejt Tiranës.

Nuk dihen ende shkaqet e aksidentit, por policia ka nisur hetimet për zbardhjen e plotë të tij.

Shitje heroine, arratisje dhe plagosje, arrestohen tre shtetas në Vlorë

Policia e Vlorës gjatë të enjtes ka rrestuar tre shtetas për vepra të ndryshme penale. Mësohet se një nga të arrestuarit është një shtetas me inicialet S.M., 48 vjeç banues në Vlorë. Arrestimi i tij u bë në lagjen “Pavarësia” Vlorë pasi gjatë kontrollit të automjetit me të cilin ky shtetas udhëtonte u gjet një sasi lënde narkotike e dyshuar si heroinë me peshë 2.3 gramë. Materialet iu referuan Prokurorisë për veprën penale “Prodhimi dhe shitja e narkotikëve”.

Në Dukat të Vlorës, është arrestuar shtetasi V.B., 44 vjeç, pasi ka thyer masën e sigurisë Arrestu me burg. Sipas Policisë së Vlorës, arrestimi i tij u bë pasi ky shtetas ishte larguar nga vendi i qëndrimit të detyrueshëm pasi ka qenë me masë sigurie “Arrest në shtëpi” për veprën penale “Drejtimi i automjetit në mënyrë të parregullt”, ndërsa tashmë do të hetohet edhe për veprën penale “Largimi i të burgosurit nga vendi i qëndrimit”.

Ndërkohë, Policia e Sarandës ka arrestuar një të ri 19 vjeç me inicialet O.K., banues në Gjirokastër. Ndalimi i tij u bë pasi Prokuroria pranë Gjykatës së Shkallës së Parë Sarandë ka lëshuar urdhërin e ndalimit të tij si i dyshuar për veprat penale “Prodhim dhe shitje narkotikësh”, “Mbajtja pa leje e armëve të ftohta” dhe “Plagosja e lehtë me dashje”.

Katër aksidente në pak minuta, 8 të plagosur, 2 në gjendje të rëndë

Në harkun kohor prej pak minutash janë shënuar katër aksidente në pjesë të ndryshme të vendit duke lënë të plagosur 8 persona, dy prej të cilëve ndodhen në gjendje të rëndë.

Një aksident i ndodhur pasditen e të shtunës në Fushë-Krujë, në afërsi të fshatit Gjormë, ka lënë të plagosur rëndë dy persona. Makina me të cilën udhëtonin ka dalë nga rruga duke shkaktuar plagë të rënda për dy personat që ndodheshin në të. Dy të plagosurit janë dërguar me urgjencë në spitalin e Traumës në Tiranë.

Një aksident tjetër ka ndodhur në autostradën Lezhe-Laç, pranë Fushë Milotit, ku dy automjete janë përplasur së bashku duke lënë të plagosur dy persona. Nuk dihen shkaqet e aksidentit, por të plagosur kanë mbetur drejtuesi dhe pasagjeri i njërës prej makinave të përfshira në aksident.

Në Mamurras është shënuar një tjetër aksident, ku si pasojë e humbjes së kontrollit një makinë ka përfunduar jashtë rrugë. Për pasojë mbetën të plagosur 2 personat që ndodheshin në makinë.

Aksidenti i katërt ndodhi pranë qendrës së qytetit të Elbasanit. Makina për shkak të shpejtësie ka humbur kontrollin dhe ka përfunduar në një kanal jashtë rruge. Drejtuesi i makinës dhe pasagjeri që ndodhej në të kanë marrë plagë të lehta.

Të gjithë të plagosurit kanë marrë trajtimin e duhur mjekësor dhe ndodhen jashtë rreziku për jetën. Në gjendje më të rëndë ndodhen dy të plagosurit e Fushë-Krujës, të cilët janë dërguar në Tiranë për kurim më të specializuar.

Tiranë, po rregullonte internetin, bie në kontakt me rrymën elektrike

Një person ka rënë në kontakt me rrymën elektrike gjatë kohës që ishte duke punuar për të rregulluar linjën e internetit. Shtetasi me iniciale V.N., 30 vjeç, ishte duke riparuar rrjetin e internetit, kur ka rënë në kontakt me rrymën, kjo ka bërë që ai të bie nga shtylla e tensionit nga një lartësi e konsiderueshme.

Ngjarja e rëndë ka ndodhur në rrugën “Demokracia”, ndërsa 30-vjeçari ndodhet në spital në gjendje kritike për jetën.

Policia ka nisur hetimet për zbardhjen e plotë të ngjarjes së rëndë.

Punëtori qëllohet me plumb në kokë te “Myslym Shyri”, ndodhet në gjendje kome

Një ngjarje e rëndë ka ndodhur në rrugën “Myslym Shyri” në mes të ditës, ku një 30-vjeçar është qëlluar me armë zjarri në kokë.

Ngjarja ka ndodhur rreth orës 11:30, në një ndër zonat më të popullarizuara të Tiranës. I plagosuri ndodhet në gjendje kome në spital dhe nuk është identifikuar ende.

Personi, i cili punonte si punëtor ndërtimi, është qëlluar pranë objektit që është në rikonstruksion, një ndërtesë tre katëshe në zonën e Mylsym Shyrit. Punëtori ka qenë i vetëm në momentin kur është qëlluar me plumb nga persona ende të paidentifikuar nga blutë e kryeqytetit.

Kanë nisur shoqërimet e para në polici, të personave që mund të jenë bërë dëshmitarë të kësaj ngjarje të rëndë, detajet e të cilëve mund të ndihmonin në zbardhjen e dinamikës dhe identifikimin e autorëve.

Sherr në lokal, vëllezërit plagosin me thikë vëllain e policit

Dy vëllezër kanë plagosur me thikë 38-vjeçarin Vat Shpati, banues në Shkodër, ku i dëmtuari rezulton të jetë vëllai i një oficeri policie. Të dy autorët e ngjarjes janë identifikuar dhe janë vënë në kërkim nga policia për t’u arrestuar, ndërsa mësohet se i plagosuri ndodhet në spitalin e Shkodrës, ku ka marrë trajtimin mjekësor.

“Më datë 12.08.2019, në lagjen “Mark Lula” Shkodër, pas një konflikti të çastit për motive të dobëta, është plagosur me thikë shtetasi Vat Shpati, 38 vjeç banues në Shkodër, i cili ndodhet në Spitalin Rajonal Shkodër, për ndihmë mjeksore.

Grupi hetimor ka bërë identifikimin dhe shpalljen në kërkim të autorëve të dyshuar, dy vëllezërit A. M. dhe L. M., banues në Shkodër dhe po punohet intensivisht për kapjen e tyre.

I plagosuri është vëllai i oficerit të policisë për vrasjet, Pëllumb Shpati. Policia tha se do të marrë në pyetje të plagosurin për të mësuar më shumë detaje rreth konfliktit.

Plumba në sy dhe këmbë, plagosen 3 persona në Elbasan, në kërkim autori

Tre persona kanë mbetur të plagosur në qytetin e Elbasanit, pas një sherri që ka degjeneruar në përdorimin e armës së zjarrit. Ngjarja ka ndodhur brenda një lokali pranë Pallatit të Sportit, ku të plagosurit dhe autori ishin ulur së bashku në tavolinë.

Sipas raporteve paraprake dyshohet se mes tyre ka nisur një sherr për motive të dobëta dhe personat janë konfliktuar fizikisht me njëri-tjetrin me mjete të forta. Më pas autori është larguar në drejtim të shtëpisë, ku ka marrë armën e zjarrit dhe ka plagosur personat me të cilët ishte ulur në tavolinë.

Ngjarja ka ndodhur rreth orës 17:30 dhe sipas të dhënave të para dyshohet se janë plagosur me armë zjarri shtetasit Fezi Ago dhe Astrit Cërriku, ndërsa Mihal Kocashi, ka mbetur i plagosur gjatë kohës së sherri ka qenë fizik, nga mjetet e rënda të përdorura.

Të plagosurit janë dërguar me urgjencë në spital, ku njëri prej tyre ndodhet në gjendje kritike për jetën. Sipas raporteve plumbat kanë prekur të plagosurit në sy dhe në këmbë.

Autori është larguar menjëherë nga vendngjarja. Policia ka identifikuar autorin dhe ka ngritur disa postblloqe në qytet për kapjen e tij. Sipas policisë ngjarja nuk ka lidhje me grupet kriminale apo larje hesapesh, por lidhet me motive të dobëta mes këtyre personave.

Një i plagosur pas një sherri me thika në Fier, arrestohet autori

Policia e Fierit ka arrestuar një person, i cili akuzohet për plagosje me dashje të një shtetasi pas një konflikti për motive të dobëta. Ngjarja ka ndodhur në fshatin Kallm i Vogël, ku dy persona pasi janë kapur me fjalë me njëri-tjetrin, situata ka degjeneruar në një konflikt deri në përdorimin e thikave.

Për pasojë 43-vjeçari me iniciale M.K., ka plagosur e thikë shtetasin A.Xh., 45 vjeç, i cili ndodhet jashtë rreziku për jetën.

43-vjeçari pritet të përballet me drejtësinë për veprën penale të plagosjes me dashje.