Letra e publikuar nga Realstory.al, Rama për Metën: Një i lajthitur që bërtet pa ditur çfarë flet

Kryeministri Edi Rama ka reaguar në Twitter, pas publikimit ekskluzivisht nga Realstory.al të letrës, që kreu i shtetit Ilir Meta i dërgon kreut të OSBE, Miroslav Lajçak, ku i shpreh shqetësimin për situatën në Shqipëri.

Meta, në letrën dërguar Lajçak, shprehet se Shqipëria rrezikon të përfundojë në një konflikt të rëndë civil, të cilin e bën fakt të kryer kur shprehet: “Prej dhjetë ditësh po përpiqem… të ndaloj konfliktin civil, që për fat të keq mund të dëmtojë procesin e integrimit dhe kryesimin e ardhshëm tonin të OSBE”.

Kreyministri Rama ka bërë jo pak ironi me këtë letër të Presidentit kur thotë “inshallah ka humbur rrugës e s`ka arritur në destinacion”.

“Kjo letra e Ilir Metës për Presidentin e OSBE inshallah ka humbur rrugës e s’ka arritur në destinacion, se do kujtojnë bota se është shkruar nga ndonjë humorist që ka dashur të tallet me Presidentin e Republikës, duke e nxjerrë si një të lajthitur që bërtet pa ditur çfarë flet”, shkruan Rama.

Në letrën që Ilir Meta i dërgon Miroslav Lajçak, lexohet qartë një pozicionim i kreut të shtetit në krah të opozitës, duke ngarkuar me përgjegjësi qeverinë. Për më tepër lexoni letrën e publikuar ekskluzivisht nga Realstory.al/

EXCLUSIVE/ LETRA SHOKUESE E METËS PËR LAJÇAK, SI BERISHA PAS 21 JANARIT: “RAMA PO BËN PUÇ SHTETI, VENDI DREJT ANARKISË”.

REALSTORY: 15 GAFAT, TË PAVËRTETAT DHE AUTOGOLËT E LETRËS SË PRESIDENTIT PËR LAJÇAK

Realstory: 15 gafat, të pavërtetat dhe autogolët e letrës së Presidentit për Lajçak

Letra e Presidentit dërguar kreut të OSBE në Vienë, që e botoi në mënyrë ekskluzive Realstory.al., meriton analizë të plotë. Cilat janë të vërtetat e letrës dhe cilat janë gënjeshtrat e saj. Cilat janë faktet e argumentet e Presidentit dhe cilat gjëra ai “harroi” t’i thoshte?

Le t’i marrim me rradhë.

“Kryeneçësinë e Kryeministrit për të shkuar përpara me zgjedhjet, pavarësisht faktit se në 31 nga 61 bashki do të kishin vetëm një kandidat të regjistruar nga Partia Socialiste; ndërsa 22 të tjera kanë nga një kandidat alternativ më shumë, të një partie fallco, të regjistruar përtej afateve ligjore, duke shkelur të gjithë procedurat ligjore dhe administrative”

FAKE: Partia e Astrit Patozit është regjistruar nga KQZ dhe deri në këtë moment nuk ka asnjë ankimim në Kolegj Zgjedhor për pavlefshmërinë e këtij akti.

“Duhet të theksohet se:

– Partitë aktuale opozitare politike (PD: LSI, PDIU dhe të tjerë aleatë) përbëjnë 48. 14% të votave të zgjedhjeve të përgjithshme parlamentare të vitit 2017, ndërsa Partia Socialiste (PS) dhe aleatët politikë të saj aktualë përbëjnë gjithsej 49.83% të votave.

– Sa i përket përfaqësimit lokal, blloku aktual i opozitës përbën 48.6% të votës popullore të vitit 2015, ndërsa Partia Socialiste dhe aleatët e saj përbëjnë 43% të votave.

– Në lidhje me këto të dhëna, zhvillimi i zgjedhjeve të qeverisjes vendore më 30 qershor 2019, pa pjesëmarrjen e opozitës, që përfaqëson të paktën gjysmën e elektoratit shqiptar, shkel parimet kushtetuese cilësuara nga dispozitat e posaçme kushtetuese”.

FAKE: Në asnjë nen të Kushtetutës nuk shkruhet se vlefshmëria e zgjedhjeve përcaktohet nga pjesëmarrja në votime, falë një ndryshimi të bërë në vitin 2008. Gjithashtu në Kodin Zgjedhor përcaktimet janë të qarta. Dhe sidomos nëse në garë ka vetëm një kandidat (një gjë e ligjshme), për përcaktimin e fituesit mjaftojnë një numër minimal votash nga çdo kuti (tre). Pra edhe ky argument i presidentit është vetëm politik, por jo ligjor.

– Në të njëjtën kohë, mbajtja e zgjedhjeve të tilla do të përbënte një shkelje e nenit 3, Protokolli 1, i Konventës Evropiane për të drejtat e njeriut dhe të klauzolave preambulative të MSA-së me BE-në.

FAKE: Ky është thjesht një interpretim politik i Presidentit. Kushtetuta e Shqipërisë është akti i parë i pranuar nga institucionet ndërkombëtare. Nëse do ishte e vërtete kjo që thotë presidenti, atëherë OSBE do të kishte ndaluar misionin e saj të ODHIR dhe do kishte çuar zonjën Glover në shtëpi. Për më tepër OSBE dhe ODHIR janë bashkëhartues dhe sponsorizues të Kodit Zgjedhor. Pra veç një interpretimi të njëanshëm politik, këto argumente të Metës për OSBE, janë të tipit “Hajde baba, të të tregoj arat”.

– Klima shumë e tensionuar politike dhe sociale po shkon drejt sistemit monopartiak dhe potencialit për të përshkallëzuar konfliktin civil në të gjithë vendin. Veprimet institucionale që kërcënojnë pluralizmin politik, janë një sulm ndaj vetë ekzistencës së Republikës;

FAKE: KQZ i vetmi autoritet i pavarur ka regjistruar dhjetëra parti në zgjedhjet e 30 qershorit. Këto mund të mos jenë parti nga ato që i pëlqejne presidentit, por simpatia politike nuk është një argument kushtetues, përkundrazi antikushtetues i veprimtarisë disa mujore të Presidentit.

– Përpjekjet e mia të vazhdueshme institucionale duke apeluar tek të gjitha palët që të rivendosin dialogun politik dhe për të zgjidhur krizën kushtetuese: politike dhe përfaqësuese nuk patën sukses, duke përfshirë edhe ftesën time për të gjitha palët për një marrëveshje të përbashkët që të caktohet një datë e re për zgjedhjet lokale.

FAKE: Pas intervistës së Kryeministrit Edi Rama në Real Story në 7 qershor, se zgjedhjet janë në 30 qershor, Presidenti foli publikisht dhe tha: “Dëgjova zotin Rama në një emision TV të thoshte se zgjedhjet nuk shtyhen”. Më 8 qershor nxorri dekretin e shfuqizimit të zgjedhjeve dhe të hënën me 9 qershor tha në konferencë për shtyp se nuk e kishte parë të arsyeshme të konsultohej me zotin Rama, i cili ka thënë publikisht se për të zgjedhjet nuk shtyhen”. Pra, presidenti së paku me njërën palë, nuk ka pasur kontakte as formale dhe as joformale për të diskutuar një datë të re zgjedhjesh. NJE DATE TE RE ZGJEDHJESH? Edhe ky, eshte nje tjetër autogol kushtetues i Metës. Sepse ai duhet të kishte nxjerrë menjeherë dekretin e zgjedhjeve të reja.

“Informacioni i poseduar në cilësinë time si President i Republikës për një përplasje të mundshme gjatë protestës kombëtare të 8 qershorit”

FAKE: Asnjë informacion të posaçëm nuk ka patur për dhunë në protestën e 8 qershorit. Përkundrazi. Ajo ishte ashtu si kjo e fundit, civile dhe me pantomima e mizanskena të këndshme. Një “karnavale” politike para Kryeministrisë. Por pikërisht njoftimi i anulimit të dekretit, u përdor nga lideri i opozitës në fjalimin e tioj, duke e cilësuar “fitore të aksionit opozitar”. Dhe ky lajm, rriti më pas sërish tensione të vogla dhe të izoluara para kuvendit në fund të protestës.

“Kushtetuta jonë përcakton qartë Presidentin e Republikës si të vetmin autoritet me të drejtë ligjore për të shpallur datën e zgjedhjeve.”

E VËRTETË. Por ky është autogoli më i madh i letrës së Presidentit. Nëse më sipër ai thotë se ka anuluar dekretin për zgjedhjet e 30 qershorit, me kete fjali, ai pranon se ka shkelur Kushtetutën. Sepse siç thotë vetë “Kushtetuta jonë përcakton qartë Presidentin e Republikës si të vetmin autoritet me të drejtë ligjore (vetëm) për të shpallur datën e zgjedhjeve.”

“Për më tepër, me ligj, i vetmi institucion që mund të gjykojë mbi këtë Dekret të Presidentit është Gjykata Kushtetuese, e cila siç e dini është jo funksionale.”

E VËRTETË. Por ky duhet të ishte argument plus për Presidentin që të ruante Kushtetutën dhe jo ta përdorte atë me papërgjshmëri, vetëm sepse “s’ka roje”. Sepse edhe ai është roje i Kushtetutës.

“Ngjarjet, në mënyrë alarmante po përshkallëzohen nga kryeministri dhe ministrat e kabinetit, jo vetëm duke provokuar me retorikë thellësisht përçarëse dhe konfliktuese me anëtarët e opozitës dhe civilët, por edhe duke ushtruar presion të paligjshëm për kapjen e të gjitha institucioneve të tjera, që të çon drejt një grushti institucional të Kryeministrit”.

FAKE: Nëse do ishte e vërtete, atëherë presidenti i republikës duhet të thërriste urgjent mbledhjen e Këshillit të Sigurisë Kombëtare. Do të merrte gjithë masat e duhura kushtetuese në rast të cënimit të rendit kushtetues. Por deri tani i vetmi argument që përdor është botimi në Fletoren Zyrtare i dekretit të tij. Por nëse do ishim në kushtet e grushtit te shtetit, përse qeveria (qe boton fletoren zyrtare), nuk e pengoi botimin e tij? Perkundrazi, qeveria është treguar dinake për të botuar dekretin, ndoshta për ta pasur si fakt të pakundërtueshem në procesin që tashmë ka nisur për shkarkimin e Presidentit.

10.

“Kryeministri Rama refuzon të pranojë Dekretin e Presidentit dhe ka urdhëruar përfaqësuesit e tij socialistë në Komisionin Qendror të Zgjedhjeve të vazhdojnë përpara me zgjedhjet e 30 qershorit, komplet në shkelje të hapur të Kushtetutës dhe legjislacionit të vendit”.

FAKE: Ka qënë KQZ që ka shpallur pavlefshmërinë absolute të këtij dekreti me mosveprim dhe vazhdim të procesit të përgatitjes së zgjedhjeve. Qeveria me ligj është e detyruar të ndihmojë në këtë proces. Kaq është roli i saj në bazë të Kodit Zgjedhor.

11.

“Nga ana tjetër, këta (socialistët) anëtarë të Komisionit Qendror të Zgjedhjeve kanë bërë thirrje për mosrespektimin e Dekretit të Presidentit të Republikës dhe për të ecur përpara me zgjedhjet e 30 qershorit, duke i kërcënuar publikisht të gjithë qytetarët, të cilët vendosin t’i binden këtij akti ligjor”.

FAKE: Anëtarët e KQZ propozohen nga partitë politike, por në momentin e zgjedhjes, kryejnë funksione jashtë politikës. Anatemimi me sens “pezhorativ” “socialistë”, është i pavërtetë dhe jo etik. Këtu për shembull presidenti nuk përmend dorëheqjen e tre anëtarëve të tjerë të KQZ, bile as nuk i cilëson “demokratë”. Presidenti nuk përmend që Kreu i KQZ qëndron në detyrë, megjithëse nuk është “socialist”. Ai ska marrë pjesë në votime të caktuara, por ka votuar në të tjera. Më e rëndësishmja: atë të shpërndajres së misionit vëzhgues të huaj në terren. Po ky votim, përse nuk quhet antiligjor nga Presidenti?

12.

“Siç thashë më lart, trazirat civile kanë shpërthyer në dhjetëra bashki, me punonjës bashkie dhe civilë duke u përplasur me Policinë e Shtetit për zhvillimin e zgjedhjeve lokale njëpartiake.”

FAKE: Letra mban datën 20 qershor. Prej dy ditësh në vend nuk kishte thuajse asnjë trazirë. Por letra ka mbërritur në tryezën e Lajçak, PERPARA mitingut të Ramës në Shkodër. Duket sikur presidenti ka dashur të paralajmërojë përplasje të forta që do të pasonin këtë vizitë. Por ajo që ndodhi ishte një protestë normale me shenja tensioni, por nuk pati përplasje të rënda dhe vetë organizatorët e protestës (Voltana Ademi dhe Flamur Noka) bënë thirrje publike kundër dhunës. Në fund gjithçka shkoi qetësisht.

13.

“Policia e Shtetit po përdoret për të ndaluar këto bashki dhe qytetarë që të zbatojnë dhe respektojnë Dekretin e Presidentit, sipas ligjit të Republikës”.

FAKE: Policia në fushatë zgjedhore ndjek udhezimet e KQZ, autoriteti më i lartë zgjedhor në vend dhe mbron procesin pergatitor duke ruajtur e shoqëruar materialet zgjedhore. Qeveria nuk ka vendimmarrje. Ajo është e detyruar të ndjekë urdhërat e KQZ.

14.

“Tensionet janë rritur më tej dhe autonomia e organeve të qeverisjes vendore është shkelur, duke rritur sjellë në rritje gjendjen e paligjshmërisë dhe anarkinë.”

FAKE: Pushteti lokal është aq autonom në Shqipëri, sa krerët bashkiakë të opozitës nuk kane zbatuar urdhëresat e KQZ, kanë sulmuar KZAZ dhe prishur materiale zgjedhore si në Kukës. Mbajtja e zgjedhjeve synon vetëm rinovimin e mandatit të të zgjedhurve. Të thuash që zgjedhjet prishin autonominë vendore, është një argument absurd, por jo kushtetues.

15.

“Pavarësisht se kanë kaluar 10 ditë nga dekreti im presidencial, unë vazhdimisht po u bëj thirrje të gjitha palëve të rivendosin dialogun politik, që synon zgjidhjen urgjente të kësaj krize gjithnjë në rritje, dhe për të parandaluar çdo konflikt civil gjë që për fat të keq do të rrezikonte stabilitetin e Shqipërisë dhe atë të Procesi i integrimit evropian të saj, duke përfshirë edhe statusin tonë në pritje për Kryesinë e radhës së OSBE-së”.

FAKE: Integrimi europian ka vetëm një kusht: “rezultatet konkrete në reformën në drejtësi”. Lexo: ngritjen e SPAK dhe BKH

OSBE drejtimin e të cilës e marrim në janar 2020, ka qënë e qartë deri tani në pozicionin e saj për zgjedhjet e 30 qershorit, me fjalë (duke mos e përmendur fare çdekretimin dhe duke shprehur shqetesim për dhunimet e KZAZ-ve). Kjo sepse misioni i ODHIR ndjek veprimtarine e KQZ dhe jo të qeverisë, apo kryeminstrit.

Dhe të bën përshtypje përse Presidenti në letrën dërguar Lajçak, nuk i kërkon atij pikërisht këtë: që në zbatim të dekretit që ai e quan të ligjshëm dhe meqë ai qenka i vetmi autoritet kushtetues për zgjedhjet, përse nuk i kërkon kreut të OSBE që ODHIR të ndërpresë misionin e tij për zgjedhjet e 30 qershorit?

Një autogol i fundit, në letrën që kreu i shtetit i dërgon zotit Lajçak. A thua të ketë harruar?

Në kohë është. Le t’ja kërkojë tani.../realstory.al/

EXCLUSIVE/ LETRA SHOKUESE E METËS PËR LAJÇAK, SI BERISHA PAS 21 JANARIT: “RAMA PO BËN PUÇ SHTETI, VENDI DREJT ANARKISË”.

Basha në rrugën e arsyes, Meta “lan duart” nga dhuna, Rama gati për dialog. A thua paqja afër?

Lulzim Basha jep sinjalin e parë se është gati për të bërë një marrëveshje politike për zgjedhjen e krizës në vend? Nga selia Blu, Basha foli këtë të enjte pasdite në një konferencë për shtyp, ku dha sinjale se mund të futet në rrugën e dialogut, por ai vendos një kusht të ri. “Asnjë hap politik, asnjë zgjidhje politike në Shqipëri nuk do të bëhet pa patur në themel të saj ndëshkimin e të gjithë atyre që kanë vjedhur votat e shqiptarëve. Asnjë marrëveshje politike për daljen nga kriza nuk do mund të arrihet, nëse pika numër 1 e saj nuk është ndëshkimi i vjedhësve të votave”, tha Basha. Por deri dje, Basha nuk fliste për marrëveshje. Deri dje Basha fliste vetëm për një gje: pika numër 1, ishte një tjetër: Rama ik. Në deklaratë gjithsesi Basha e klasifikoi Kryeministrin si kreun e bandës, por duket se fokusi ishte tek pergjimet dhe jo tek akuzat politike. Dhe tek përgjimet e BILD, emrat e përfolur janë të tjerë….

Nëse i sheh gjërat kështu, edhe dalja e Arta Markut të enjten në Kuvend, ishte si dalje nën presion për të shpejtuar hetimet e të famshmeve dosje 339 dhe 184. Duke sikur palët janë në kërkim të dhënies së sinjaleve dhe garancive për një marrëveshje të mundshme, të negociuar sigurisht nga ndërkombëtarët.

Nëse dëshiron t’i besosh jo vetëm intuitës, jo vetëm deshirës se mirë që ky vend të mos shkojë për lesh, të paktën duhet t’i besosh fakteve. Dhe fakt është se dhunë të enjten nuk pati. Askund. Edhe Voltana, ndryshoi qendrim me shpejt sesa c’do ndryshonte modelin e flokëve. Tani ajo thotë se do të marshojë qetesisht kundër Ramës të enjten ne darkë.

Pra, lexuar ndryshe, Edi Rama dhe Lulzim Basha, pavarësisht shumë ndasive, po arrijnë në një pikë të përbashkët, ndëshkimin e krimeve elektorale. Këtë ka kërkuar Rama publikisht prej ditës që kanë dalë përgjimet, këtë po kërkon sot dhe Basha. Deklarata e Ramës e bërë mbrëmjen e së mërkurës fliste pwr vullnetin e tij pwr dialog, megjithwse kaloi heshturazi nën zë nga shumë media, ndonëse edhe për shkak të publikimit të audiopërgjimeve të reja të nxjerra nga gazeta gjermane Bild.

Gjithsesi deklarata e Bashës është ndoshta sinjali i parë nga Selia Blu se mundësia për marrëveshje është rritur. Cuditërisht pak më herët, në të njëjtën valë ishte edhe Presidenti Meta. Guerrilas për dhjetë ditë rresht, deklarata e të enjtes ishte shumë më ndryshe. Ajo i referohej dekretimit te shfuqizimit të zgjedhjeve në kohën e shkuar. Dekreti sipas tij për “ruajtjen e stabilitetit dhe shmangien e konfliktit civivil në vend”, nuk doli sipas pritshmërive. Ndaj, këtë të enjte edhe kreu i shtetit kërkoi që palët të ulen në dialog, pasi sipas tij nuk është koha për matje force. pasdite krerët e kishës katolike (të cilët që prej vitit 1991 kanë luajtur rol zbutës në momente krizash historike), bënë thirrje që të “harrohen britmat kërcënuese, dhe të nisin ato pajtuese”.

Nëse i lexon me kujdes, të tre liderët kryesor, pavarësisht se deri më sot kanë bërë “thyerje krahu”, duket se nuk janë të gatshëm të marrin përgjegjësinë historike ta çojnë vendin në një konflikt civil me pasoja në jetë njerëzish. Të tre, ndoshta e kanë kuptuar (fatkeqësisht më vonë se të gjithë), se ky zhvillim, nuk do t`i sillte askujt përfitime politike, ndoshta do të ishte fundi politik i të treve, por jo në të njëjtën radhë! Ndaj, arsyeja duket se po fiton terren, vetëm se tashmë duhet që dikush të bëjë hapin e parë konkret drejt dialogut. Nëse këto sinjale do jenë reale, do testohen mbremjen e së enjtes nëse Rama do kontestohet paqësisht në Shkodër, dhe një ditë më pas edhe në Tiranë. Prej dy ditësh pritej një ndërhyrje e fortë ndërkombëtare. Mesa duket rruga nga Uashingtoni në Tiranë, doli më e shkurtër sesa ajo për në Korenë e Veriut. Jo vetëm nga numri i kilometrave. /realstory.al/

Realstory: Qeveria të marrë përgjegjësitë, ose të tërhiqet

Realstory.al zbuloi ekskluzivisht të martën në mbrëmie, qëllimin e vërtetë të kërkesës që Presidenti i Repubulikës Ilir Meta i drejtoi Komisionit Qendror të Zgjedhjeve, për të ditur në rrugë zyrtare, numrin e deputetëve që ka aktualisht Parlamenti. Në fundin e javës së kaluar, kur dhe u zbardh veprimi i Ilir Metës, të gjithë krijuan përshtypje, përfshi dhe Realstory.al, se kjo lëvizje ishte hapi i parë i presidentit drejt shpërndarjes së Parlamentit. Mirëpo, arsyeja nuk ishte kjo, Ilir Meta, siç zbuloi të martën Realstory.al, po përgatitet për të mbrotjur veten, duke i bërë parapri një vendimi final të Kuvendit për shkarkimin e tij me 94 vota, çka mazhorancës do t`i duhen edhe votat e deputetëve të rinj për të plotësuar korumin e nevojshëm për të shkarkuar kreun e shtetit.

Pikërisht, tek deputetët e rinj qëndron “thembra e Akilit” për Ilir Metën. Ai, pritet të përgatisë dosjen e mbrojtjes për shkarkimin nga parlamenti, ku do të cilësojë si të paligjshëm deputetët e rinj, që morën mandatet e dorëzuar në shkurt të këtij viti nga PD dhe LSI. Meta do të kapet pikërisht te verifikimi i dorëzimit të mandateve të opozitës në shkurt, ku në disa prej formularëve të firmosur nga ish-deputetët e PD-LSI, përfshi dhe atë të Monika Kryemadhit, ka pasur parregullsi.

Ndërkohë, shkrimin e plotë të Realstory.al e lexoni këtu!

Por gjithë kjo ndodhi para se kryetarët bashkive të drejtuar nga të zgjedhurit e PD-LSI të ndërmerrnin hapa konkret për vënien në zbatim të skenarit të pengimit të zgjedhjeve, duke mësyrë në Komisionet Zonale të Administrimit të Zgjedhjeve. Tashmë situata ka kaluar përtej një tensioni normal, duke shënuar edhe të plagosur mes militantëve të PD-së apo punonjësve të policive bashkiake të kësaj force politike, të cilët po zbatojnë urdhrat e shefave të tyre për të djegur e shkatërruar materialet zgjedhore. Në fakt, nuk është as më shumë e as më pak, por ajo që zëdhënësi i Ilir Metës, Tedi Blushi, lajmëroi pak ditë më parë “se parlamenti i ‘çunave të Shijakut” do të merrte përgjigjen e merituar nga qytetarët shqiptarë”. Sot trekëndëshi Presidencë-PD-LSI, po vë në zbatim skenarin e pengimit të zgjedhjeve.

Por kujt po i shërben më shumë ky skenar? Kauzës së opozitës për zgjedhje të lira dhe të ndershme? Apo është pasojë direkte e dekretit të 8 qershorit të Metës? A është kjo beteja e kreut të shtetit, për të mos ikur me asnjë mënyrë e me çdo mjet nga Presidenca? Këtë të mërkurë në Burrel është plagosur një militant i Partisë Demokratike, Alfred Lika. Ky i fundit, sipas vetë deklaratës së PD-së “ishte duke zbatuar dekretin e Presidentit, në mbrojtje të Kushtetutës”. Cituar kjo nga një njoftim shpërndarë për mediat nga zyra e shtypit e selisë Blu.

Aktet e dhunshme të së mërkurës bien ndesh me argumentin e Presidentit. Ai argumentoi se protesta e 8 qershorit do të kishte përfunduar në akte dhune të pallogaritshme atë natë, nëse s`do dilte dekreti i tij. Por cili është rezultati sot, dhjetë ditë më vonë?

Situata është tensionuar dhe ka ndezur vatrat e para të konfliktit, pikërisht për shkak të atij dekreti, apo në “mbrojtje” të atij dekreti. Kjo situatë, e cila pritet të kalojë një të enjte “përvëluese” më 20 qershor, mund të jetë prologu i një tensioni dhe më të madh të premten më 21 qershor, ku vatrat e konfliktit për momentin vetëm nëpër bashkitë e djathta, të ndizen përballë Kryeministrisë në protestën e thirrur nga PD-LSI, në Tiranë. Por a do të kenë guximin për ti shkuar deri në fund këtij skenari?!

Të mërkurën pasdite presidenca nxitoi të shpërndante një letër qe Meta ja ka dërguar OSBE dhe kreut të saj Lajçak, të cilin së bashku me disa të tjerë i quajti para disa ditësh ngatërrestarë. A është kjo shenjë se skenari i ditëve të fundit, që mund të kulmojë në 21 qershor, është një mjet final presioni për të bërë që ndërkombëtarët të ndryshojnë mendje për 30 qershorin? A është kjo përpjekja finale për të legalizuar një dekret, që sot është shkaku kushtetues për shkarkimin e Metës? A është fakti më i fundit i asaj që paralajmëruam një ditë më parë, se e gjithë kjo nxitje e rrëmujës, është në fakt vetëm një përpjekje e Ilir Metës për të shpëtuar jo vetëm Presidencën, por veten e tij, pas dekretit të diskutueshëm të 8 qershorit, që amerikanët e quajnë vetëm “njoftim”?

Ndërkohë përballë, Komandant Iliri dhe të tijët, kanë përballë maxhorancën, e cila nuk është e qartë në qëndrime sesa është në fjalë. Duket se kur ndërkombëtarët thonë se “zgjidhjen ta gjejnë vetë shqiptarët”, nënkuptojnë edhe përgjegjësinë dhe vendosmërinë e qeverisë për të mbajtur zgjedhjet në 30 qershor. Për këtë mbështetja e tyre nuk ka munguar për kryeministrin Rama. Por të mërkurën mesazhet e maxhorancës kanë qënë kontradiktore. Kryeministri Edi Rama dhe Ministri i Brendshëm Sandër Lleshaj, ashtu si dhe Policia e Shtetit, kanë bërë thirrje për distancim nga aktet e dhunës dhe pengimi i zgjedhjeve, pasi urdhëruesit e këtyre akteve do të përballen me ligjin. Por ndërsa kemi patur deklarime direkte të bashkiakëve demokratë, nga Voltana e Molotovëve e deri te Frani i tokave të Lezhës, ndërsa kreu i Kavajës jep ultimatume si Berisha në 9 mars 1997, ndërsa në Kukës policët sulmohen si kafshët nga disa mbështetës të PD, qeveria (ajo e llafeve të Lleshit dhe e nje ligji që gjoja nesër kalon në kuvend kundër krimit zgjedhor, por që s’do ketë asnjë efekt për dhunuesit e para 30 qershorit), “Policia ka vepruar me profesionalizëm për të shmangur përshkallëzimin e situatës”.

Të paktën, kështu u shpreh zëvendës ministrja e Brendshme Rovena Voda për të justifikuar tërheqjen përballë njerëzve në Kukës. Por a është Kukësi pjesë e Shqipërisë, që drejton Edi Rama? A është kjo shenjë e një paqartësie, pasigurie dhe tërheqjeje e maxhorancës përballë dhunës politike të paralajmëruar nga Meta, Berisha dhe Basha? Sot është momenti që maxhoranca të marrë përgjegjësitë e qeverisjes së vendit. Ajo nuk mund të presë me kompjuterin hapur, në pritje të ndonjë emaili nga Uashingtoni ose Lajçak. Ja dhe deklarata nga Lajçak erdhi. Po sa e ndryshon kjo situatën? Sa e forcon kjo deklaratë veprimin e qeverisë? Dhuna vazhdon. Nga Shkodra e Voltanës, e deri tek Delvina e Balilëve. Ajo ose duhet të vendose ruajtjen e ligjit dhe të rendit publik, ose të tërhiqet tani, siç thotë zëvendësministrja Voda. Nëse si Voda, mendon dhe kryeministri, se skenari do ketë viktima, dhe ata nuk e ndalkan dot, vecse duke u tërhequr, atëherë më mirë të tërhiqen tani sesa kur të vriten njerëz në 30 qershor. Këtë e ka paralajmëruar Meta, Berisha dhe tani po e thonë edhe grekët. Tërheqja sigurisht do kishte siklet dhe turp brenda pasi prej 5 muajsh, Rama i thotë njerëzve se ka zgjedhje në 30 qershor. Por nëse këtë është i paaftë ta sigurojë, atëherë më mirë të tërhiqet.

Mund të humbasë “betejën” bulliste përballë një opozite të dhunshme drejtuar nga një President i papërgjegjshëm, mund të humbasë besimin e ndërkombëtarëve tek Edi Rama si një lider i qendrueshëm, por të paktën nuk bëhet pjesë qoftë dhe padashje e skenarëve të përgjakshme të kokave të nxehta të Tiranës. E rëndësishme është të mos tërhiqet, si pasojë e një pazari. Edi Rama e di mirë përse ndërkombëtarët këmbëngulin që ai të mbajë zgjedhjet në 30 qershor. Se beteja e vërtetë fillon më pas: ajo Për SPAK.

Shqipëria nuk do ta humbasw luftën përballë të shkuarës dhe të keqes. Thjesht dikush e shtyn atë në kohë. E shtyn. Ky është suksesi i vetëm i dekretit personal të Ilir Metës, njëlloj si ato të Berishës në 1997: Që shtyn udhëtimin pa biletë kthyese të së shkuarës. Kemi pritur 30 vjet. Mund të presim edhe tre muaj.

Exclusive/ “Meta nuk do të shkrijë Kuvendin” dhe nuk do të lërë Presidencën

Nëse pyet gazetarë e politikanë se përse Ilir Meta kërkoi informacion nga KQZ për 122 deputetët e Kuvendit, të gjithë (përfshirë edhe Realstory.al), deri dje të japin të njëjtën përgjigje. Presidenti po përgatiste dekretin për shpërndarjen e Parlamentit, si pjesë e përballjes së tij alogjike (për shumë dhe antikushtetuese) me qeverinë, me fokus 30 qershorin. Apo jo?

Gabim. Realstory.al ka marrë informacione të mjaftueshme dhe të verifikuara se përse kjo është përgjigje e gabuar ndaj pikepyetjes që ngriti lëvizja e presidentit. Përgjigja e saktë është se presidenti ka vetëm një hall, të tijin. Ose më saktë atë të shkarkimit.

Gjithçka ka pikënisje në takimin e tensionuar disa ditë më parë me ambasadorët e huaj. Së paku tre prej tyre, i kanë konfirmuar Realstory.al direkt ose indirekt se informacioni se Presidenti Meta ka deklaruar (apo kërcënuar) se do të nxjerrë në rrugë ushtrinë me pretekstin e ruajtjes së stabilitetit, është i vërtetë. Replikat kanë qënë të ashpra dhe janë shkëmbyer emaile me pjesën përkatëse të Kushtetutës në shqip dhe anglisht. Ambasadorët i kanë kujtuar Presidentit se sipas artikullit 169 të Kushtetutës, në kohë paqeje kreu i shtetit “ushtron komandën e forcave të armatosura përmes Kryeministrit dhe Ministrit të Mbrojtjes”.

Ambasadorët (që mesa duket njohin mirë dhe kushtetutën por dhe qëllimet e Metës), i kanë kujtuar atij gjithashtu edhe Ligjin e amenduar nr.64 të vitit 2014 (votuar edhe nga vetë deputeti Ilir Meta atë kohë) dhe Artikullin 9, sipas të cilit: “Presidenti i republikës në kohë paqeje ushtron lidershipin kushtetues të Forcave të Armatosura përmes Kryeministrit dhe ministrit të Mbrojtjes ndërsa në Kohë lufte, e ushtron vetë, ose përmes Shefit të Shtabit të Përgjithshëm (që vërtet e miraton ai, por vjen si propozim i Kryeministrit).

Nisur nga këto prerogativa kushtetuese, ligjore por edhe politike (shefi i shtabit mund të vendosë të zbatojë Kushtetutën dhe jo një urdhër të paligjshëm qoftë edhe të presidentit për të nxjerrë ushtrinë në rrugë), diplomatët i kanë bërë thirrje arsyes (!) së Kreut të Shtetit, që së paku këtë gjë mos ta artikulojë në publik, duke rrezikuar të bëhet dhe qesharak.

Por duket ambasadorët kanë marrë më seriozisht aludimin e heshtur të kreut të shtetit me kërkesën që ai i ka bërë KQZ. Shkrirja e Kuvendit është e përcaktuar aq qartë në Kushtetutë e ligj, saqë një vendimmarrje e tij për këtë, do të rrezikonte të konsiderohej shkelje në flagrancë e Kushtetutës, me pasoja direkte të shkarkimit të tij të menjëhershëm dhe pasojave të tjera ligjore. Por këtu Presidenti ka mbajtur një qëndrim tjetër. Ai ka lënë të kuptohet se vrulli i tij e ka një kufi. (Dhe ky në vetvete është një lajm i mirë). Presidenti Meta ka lënë të kuptohet se nuk ka ndërmend të shpërndajë parlamentit, por të sigurojë legjitimitetin e tij. Arsyeja nuk janë votat e vjedhura (parlamenti i çunave të Shijakut) por “respektimi i procedurave te marrjes së mandateve nga deputetët e rinj”.

Një burim nga LSI i ka pohuar një prej selive diplomatike, në kushtet e anonimitetit dhe jo zyrtarisht se qëllimi i Metës është verifikimi i ligjshmërisë së numrit të deputetëve, me qëllim që nëse parlamenti ecën para dhe voton shkarkimin e tij (duhen 93 vota). Argumenti ligjor për tu mbrojtur në Gjykatën Kushtetuese nga avokatët e Presidentit pritet të jetë se Kuvendi ka vetëm 82 deputetë të ligjshëm. Këtë e ka deklaruar vetë Ilir Meta muajt e fundit, menjëherë pasi Kuvendi përcolli kërkesat e dorëheqjes nga mandati të deputetëve të opozitës në 16 shkurtin e shkuar, ndërsa bashkëshortja e tij, kryetarja e LSI e ka përmendur këtë në intervista televizive, përfshirë edhe në Real Story në Vizion Plus.

Po ku bazohet dyshimi i Metës dhe çfarë ka marrë nga përgjigja e KQZ?

Në letrën drejtuar kreut të shtetit Sekretarja e përgjithshme e KQZ shkruan ndër të tjera, “… si pasojë e njoftimeve nga Kuvendi i Shqipërisë, për dorëzimin e mandateve të deputetëve të opozitës…” KQZ ka marrë njoftim, dhe ka vazhduar proceduren per plotësimin e vendeve. Kandidatët e listës kanë plotësuar dokumentacionin dhe më pas janë paraqitur në Komisionin e Verifikimit të mandateve në Kuvend.

Por këtu mund të jetë klecka. A është ndjekur e njëjta procedurë nga Komisioni i Mandateve edhe për deputetët që ikën? Sic kujtojmë të gjithë, kërkesat e dorëzuara nga opozitaret parlamentarë, u dërguan brenda dy ditëve në KQZ, pa pritur fundin e afatit 30 ditor që përcakton ligji. Burime të larta nga Kuvendi thonë se drejtuesit kanë qënë “nën presion të madh ndërkombëtar” që këto mandate të dorëzuara të dërgohen sa më shpejt në KQZ, për habine e vetë ish deputetëve, disa prej të cilëve e kanë shprehur atë publikisht. Bile Monika Kryemadhi kishte vënë në letrën e saj një datë të gabuar. Por a po tregon koha se ajo e ka bërë qëllimisht këtë “gabim”?

Sipas të njëjtave burime që i dhanë Realstory.al informacionin për qëllimet e vërteta të Metës në kërkesën drejtuar KQZ, në bazë të Kodit Zgjedhor, duket se presidenti po përgatit që tani dosjen mbrojtëse për Gjykatën Kushtetuese. Duke argumentuar se Komisioni i Mandateve nuk ka berë verifikimet e kërkesave për dorëzimin e tyre nga deputetët e opozitës, për të kërkuar kështu pavlefshmërinë e votimit në kuvend për shkarkimin e tij. Realstory i kërkoi një burimi të lartë në KQZ një opinion verifikues për këtë. Sipas tij: “Komisioni i Mandateve nuk ka në praktikë parlamentare verifikimin e kërkesës për dorëzim të mandateve. Sic e thotë dhe titulli i komisionit, ai nuk detyron dot nje deputet të mbajë mandatin. Megjithëse verifikimi formal ndoshta është i mundur, në kushtet e 16 shkurtit kemi pasur deklarime publike, dhe eksklamative për dorëzim të mandatit. Në të shkuarën, nga Azem Hajdari, tek Sajmir Tahiri, asnjëherë nuk është ndjekur një praktikë e tillë”.

Por sigurisht në rastin e parë historik të impeachment të një Presidenti, cdo gjykatë, aq më tepër ajo Kushtetuese, do ishte skrupuloze në verifikimin e Çdo argumenti të paraqitur nga palët. Dhe këtu lëvizja e Metës duket dinake dhe vizionare. Kryesisht dhe vetëm për hallin e tij.

Shkurt, as nuk do shkrijë Kuvendin dhe as ka ndërmend të iki nga Presidenca. As para dhe as pas 30 qershorit. /realstory.al/

Kriza politike, Sokol Balla: Ndërkombëtarët ngulin këmbë për marrëveshje që tejkalon 30 qershorin

Drejtuesi i emisionit “Real Story” në Vizion Plus dhe “RealStory.al“, Sokol Balla ishte i ftuar në emisionin e “Çim Peka Live” në Syri.Tv së bashku me gazetarin Blendi Fevziu. Tema e diskutimit në emisionin e sotëm ishte pikërisht kriza politike në vend dhe skenarët e zgjidhjes së saj.

Sokol Balla u shpreh se PD aktuale është ndryshe nga ajo e janarit 2019, kur opozita ishte ende në parlament. “Ndërkombëtarët janë koalicion kundër Lulzim Bashës. PD aktuale është ndryshe nga ajo e janarit 2019, këtë e them me bindje të plotë. Edhe nëse marim parasysh sondazhet që e nxjerrin PD para, atëherë pse opozita nuk futet në zgjedhje?!”, u shpreh fillimisht Sokol Balla.

Më tej, ai deklaroi se pozicionimi i ndërkombëtarëve kundër shtyrjes së datës së zgjedhjeve, vjen pasi partnerët e huaj duan një marrëveshje që kapërcen 30 qershorin.

“Ndërkombëtarët po ngulin këmbë për një marrëveshje që kapërcen 30 qershorin. Këto nuk janë zgjedhje. Janë formalisht zgjedhje, do të jenë një palë votime formale. Të dyja palët me konsultimin e ndërkombëtarëve duhet të ulet në tryezën e dialogut. Basha duhet të mësojë ti fitojë zgjedhjet, jo të kërkojë pushtet në tavolinë”, tha Sokol Balla.

Po në këtë linjë, duke u ndalur te hetimet e Prokurorisë për blerjen e votave në Durrës, Sokol Balla u shpreh se lidhur me këtë dosje nuk ka fakte. “Unë di që për 400 CD e Durrësit ka indicie por nuk ka fakte për vjedhjen e zgjedhjeve. Të gjithë ata prokurorë që janë marrë me këtë çështje, nuk merreshin me hetimin, por merreshin me nxjerrjen e informacioneve në media”, u shpreh Balla.

Grezda largohet nga kombëtarja, FSHF: Arsye personale! E vërteta sipas nesh

Një ditë më parë, Federata Shqiptare e Futbollit, lajmëroi se tre lojtarë nuk do të jenë në dispozicion të trajnerit Edy Reja për dy ndeshjet zyrtare ndaj Moladavisë dhe Islandës.

Ledian Memushaj, Egzon Binaku dhe Marash Kumbulla ishin tre emrat, me dy të parët për arsye dëmtimi dhe i treti pasi grumbullohet me U-21, që nuk do të luanin me ekipin përfaqësues.

Megjithatë, këtë të shtunë, trajneri Edy Reja ka mësuar se nuk do të ketë në dispozicion edhe një tjetër lojtar. Bëhet fjalë për sulmuesin anësor, Eros Grezda. Ky i fundit sipas një njoftimi të FSHF-së largohet nga grumbullimi për arsye personale.

FSHF

Eros Grezda nuk do të jetë pjesë e skuadrës për dy ndeshjet e rradhës për arsye personale. Lexo të plotë

“Ka ndryshime në listën e kombëtares A për dy ndeshjet zyrtare ndaj Islandës në transfertë më 8 qershor dhe Moldavisë në “Elbasan Arena” më 11 qershor ora 20:45. Eros Grezda nuk do të jetë pjesë e skuadrës për dy ndeshjet e rradhës për arsye personale”.

“Trajneri Reja ka thërritur në skuadër Lorenc Trashin, nga Partizani, që do të bashkohet me grupin në ndeshjen e sotme në “Elbasan Arena”, ku kuqezinjtë do të luajnë përballë U-21 të drejtuar nga Alban Bushi”, shkruhej në njoftimin e FSHF.

Edhe media të ndryshme, kryesisht ato sportive e kanë publikuar lajmin e dhënë nga FSHF, se lojtari është larguar nga kombëtarja për arsye personale, duke theksuar ai nuk ka pasur dëmtim.

TELESPORT

E çuditshme: Futbollisti braktis kombëtaren për arsye personale, Trashi e zëvendëson Lexo të plotë

Sipa nesh!

Megjithatë, RealStory.al ka mësuar se në fakt Eros Grezda është larguar nga grumbullimi pasi ka pasur probleme me muskujt e kofshës (auktorin), çka e ka detyruar sulmuesin të largohet nga ekipi ynë kombëtar.

Sulmuesi kuqezi, që aktivizohet me Rangers në Skoci, nuk ka pasur një sezon të mirë, teksa i është dashur të përballet me disa dëmtime, të cilat e kanë mbajtur jashtë fushës për shumë kohë.

Së fundi ai ishte rikuperuar dhe ndihej gati për të luajtur, por duket se ka ardhur dëmtimi i radhës, që tashmë e penalizon edhe për aktivizimin në ekipin kombëtar.

RealStory.al merr urimet e para nga Javanews dhe Politiko!

Pasditen e sotme në tregun e mediave online në Shqipëri, nisi aktivitetin edhe një tjetër portal, RealStory.al. Një media që vjen me risi dhe ofron një trajtim ndryshe të lajmit, ka marrë urimet e para nga portale të ngjashme që ushtrojnë aktivitetin e tyre në vendin tonë prej kohësh. “Javanews.al” ishte portali i parë që përshëndeti dhe uroi “RealStory.al”, pas publikimit të saj online.

“Gazetari Sokol Balla ka lançuar sot për publikun iniciativën më të re mediatike. Bëhet fjalë për portalin RealStory.al, emër ky i bazuar në emisionin e njohur politik që Balla drejton në Vizion Plus. RealStory.al pritet të ketë fokus mbi politikën dhe aktualitetin. Ai hyn në garën e medias online duke rimarrë një ndër markat kryesore të debatit politik televiziv. I urojmë kolegut Balla dhe stafit të tij, suksese në këtë rrugëtim”, shkruan Javanews.

“Gazetaria e re është bërë tunduese edhe për ‘gazetarët e vjetër’. Një nga veteranët e shtypit të shkruar dhe të televizionit, Sokol Balla, ka hapur portalin me të njëjtin emër si edhe emisioni i tij politik i fashës prime-time, aktualisht në Vizion Plus. Realstory.al i shtohet portaleve online, të cilat janë bërë një sfidant i pamëshirshëm i medias mainstream (apo të vjetër) duke i konkuruar jo vetëm në shpejtësi, por edhe në novacione, megjithë të metat jo të vogla ‘të fillestarit’.

“Sokol Balla, i cili njihet edhe si polemist i fortë, do të jetë një shtesë për t’u patur parasysh dhe frikë në garën e medias online. Shpesh ai zgjedh kënde të papritura trajtimi të lajmit dhe nuk përton të jetë agresiv dhe transgresiv në trajtimin e ngjarjeve dhe fenomeneve. Politiko.al i uron mirëseardhjen realstory.al”, shkruan “Politiko.al”.

Skënderbeu përgatitet për CAS-in, përgënjeshtron lajmet e rreme!

Skënderbeu nuk po kalon një sezon të mirë, teksa në ndeshjen e fundit në kampionat u mund përsëri nga Partizani. Skuadra korçare ka pasur shumë probleme, të cilat, të paktën jo zyrtarisht, lidhen me pritjen e gjatë të marrjes së vendimit nga CAS, për dënimin e dhënë ndaj klubit të Skënderbeut nga UEFA.

Kjo ka bërë që skuadra të shfaq shumë ulje-ngritje këtë sezon, aq sa në media janë krijuar disa skenarë me të ardhmen e klubit. Gjatë ditës së sotme, media të shkruar dhe ato online, kanë raportuar se klubi korçar dhe konrektisht, Presidenti Ardian Takaj, kanë përgatitur një listë me emrat e lojtarëve që do të largohen në fund të sezonit.

Sot pak pas mesdite, ka ardhur dhe reagimi zyrtar i klubit të Skënderbeut, që ka përgënjeshtruar lajmin se skuadra do të largojë disa nga lojtarët.

“Skënderbeu mohon kategorikisht lajmin e publikuar sot në median e shkruar dhe online. Sigurojmë se klubi momentalisht nuk po mendon për merkaton në hyrje dhe dalje. Drejtuesit dhe lojtarët janë të përqëndruar për të mbyllur sezonin me sukses dhe për të arritur objektivat e klubit. Faleminderit për mirëkuptimin”, shkruan klubi në reagimin e tij.

KF Skënderbeu mohon kategorikisht lajmin e publikuar sot në median e shkruar dhe online.Sigurojmë se klubi…
Publiée par KF Skënderbeu sur Vendredi 12 avril 2019

Kujtojmë se Skënderbeu do të paraqitet në CAS vetëm pas katër ditësh, ku në dy ditë, do të zhvillohet seanca dëgjimore me drejtues të klubit dhe avokatin që do të mbrojë Skënderbeun para trupës gjykuese në Gjykatën e Arbitrazhit Sportiv në Lozanë.

“RealStory.al” ka mësuar se pothuajse të gjithë drejtuesit e klubit do të jenë të pranishëm në seancën dëgjimore, teksa shpresojnë në marrjen e një vendimi në favor të Skënderbeut. Ky i fundit është dënuar nga UEFA me 10 vite përjashtim nga të gjitha garat evropiane dhe një gjobë prej 1 milionë eurosh.

Dënimi i dhënë nga komisioni i Disiplinës në UEFA vitin e kaluar, mbeti në fuqi dhe nga Komisioni i Apelit i të njëjtit institucion. Megjithatë, Skënderbeu, e ka apeluar vendimin në Gjykatën e Arbitrazhit Sportiv, duke shpresuar në rrëzimin e vendimit të dhënë nga UEFA.