Negociatat me LDK, Zaimi: Tre funksionet që nuk lëshojmë

Arbër Zaimi, Koordinator i Lëvizjes Vetëvendosje në Kosovë, u shpreh në “Real Story” se janë tre drejtime, të cilat janë shtyllat e programit qeverisës të LVV dhe që duhet të drejtohen nga kryeministri, duke treguar kështu edhe faktin se përse posti i kryeministrit nuk është i negociueshëm. Sipas Zaimit, tre shtyllat kryesore të Vetëvendosjes janë politika fiskale, antikorrupsioni dhe drejtësia, duke nënkuptuar Ministrinë e Financave, Ministrinë e Drejtësisë dhe Ministrinë e Punëve të Brendshme. “Të tre këto funksione duhet të jenë nën drejtimin e kryeministrit, pasi ai ka peshën kryesore të qeverisjes. Prandaj kjo nuk mund të negociohet”, deklaroi Zaimi, ndërsa komentoi negociatat me LDK si para procesit zgjedhor, ashtu edhe për ftesën që drejtuesi i Vetëvendosjes, Albin Kurti, ka bërë menjëherë pasi fitoi zgjedhjet.

Po ashtu, Zaimi ka krahasuar edhe situatën politike të Kosovës me atë të Shqipërisë. “Shqipëria duhet të marrë shembull nga Kosova, në lidhje me organizimin e zgjedhjeve. Prej 2010 jemi përpjekur të mbrojmë votën, jo vetëm tonën por të gjithë qytetarëve. Në Shqipëri nuk është fatale situata, por ekziston mundësia për të marrë shembullin e Kosovës”, tha Zaimi.

Sipas tij, vota e emigrantëve ishte vendimtare në ndryshimin politikë në Kosovë. “Një faktor që bëri ndryshimin është vota e diasporës. Janë mbi 12 mijë zarfa, ka pasur një ardhje masive e mërgatës për të votuar në Kosovë. Votat me postë do tregojnë një rezultat më komod kur të numërohen. Angazhimi i mërgatës për të ndryshuar Kosovën ka qenë pozitiv. Diaspora gëzon fatmirësisht një liri më të madhe se ata që mbeten në vend. Ajo që ndryshoi ishte, veç kulturës dhe pjekurisë demokratike, ndryshoi organizimi demokratik i qytetarëve, thirrja e mërgatës, thirrja e të rinjve. VV ka prirë bindshëm për votuesit e të rinjve”, tha Zaimi.

Gjithashtu, ai foli edhe për linjën e kuqe që nuk mund të preket gjatë negociatave me LDK-në. “Ne kemi një kriter, mbajtjen larg pozitave zyrtare të personave me të shkuar kriminale. LDK tha që kryeministri t`i takojë fituesit dhe tani mbetemi në ato terma, kryeministri t’i takojë fituesit. Lufta kundër korrupsionit do t`i takojë partisë që nuk ka qenë asnjëherë në pushtet. Ne kemi një plan për procesin e Vettingut për reformimin e drejtësisë”, tha Zaimi. Megjithatë, ai la të kuptohet se Vetëvendosja do të jetë gati të ofrojë poste të tjera, duke nisur nga ajo e Ministrit të Jashtëm apo Presidentit në të ardhmen, të cilat janë artikuluar gjatë fushatës së shkurtër zgjedhore. Madje, këto drejtime që duhet të jenë në dorën e Kryeministrit, bëri që të mos arrihej koalicioni parazgjedhor.

Por, duke vlerësuar qëndrimin e Vetëvendosjes, por edhe rezultatin tejet të ngushtë të dy partive opozitare që fituan zgjedhjet, analistët në Real Story të Sokol Ballës, i shikojnë të vështira këto negociata.

Ish-ambasadori shqiptar në Maqedoninë e Veriut, Agim Çejku deklaroi se i shikon negociatat e vështira. “Unë personalisht mendoj se negociatat nuk do jenë të lehta. VV nuk ka eksperiencën e duhur. Edhe LDK është një parti thuajse e para. Kjo e bën të vështirë negociatën. LDK ka bërë më herët marrëveshje me PDK, ka program etj. Ndërsa Vetëvendosja për herë të parë bisedon për të ndarë pushtetin dhe aty fillon fërkimi e përplasja. VV duhet të jetë e përgatitur të mos përçahet”, tha Çejku.

Kurse diplomati Bashkurti tha se nuk i shikon aspak të vështira bisedimet mes Vetëvendosjes dhe Lidhjes Demokratike të Kosovës, për shkak se këto dy parti përafrohen në shumë pika. “Unë mendoj sesi Albin Kurti dhe Vjosa Osmani janë persona të mentalitetit qytetar dhe udhëhiqen nga principe. Nuk besoj se do jenë të vështira negociatat, sepse Kosova nuk ka luksin të ketë një qeverisje me bazë të gjerë. Unë mendoj se palët do të merren vesh. Mendoj se kanë agjendë të përbashkët dhe qasjen ndaj problematikave e kanë të përafërt”, tha Bashkurti. /Realstory.al/

BASHKIMI SHQIPËRI-KOSOVË, ZAIMI: PJESË E PROGRAMIT, POR JO TANI

ZGJEDHJET NË KOSOVË, ZAIMI I VV NË REAL STORY: U MBËSHTETËN TË PAKAPURIT

Negociatat, Cakaj: Kroacia, mbështetëse e fuqishme

Ministri në Detyrë për Evropën dhe Punët e Jashtme, Gent Cakaj, zhvilloi një takim me homologun e tij kroat, Gordan Grlic Radman. Sipas Ministrit Cakaj, Kroacia dha “mesazh të fuqishëm” për hapjen e negociatave. “Kroacia sot ka dhënë një mesazh të fuqishëm në përkrahje të aspiratës evropiane të Shqipërisë jo vetëm duke e mbështetur hapjen e negociatave për anëtarësim në tetor, por edhe duke e vendosur procesin e negocimit të Shqipërisë në qendër të Konferencës Ballkanike në kuadër të Presidencës Kroate të Këshillit të BE-së 2020”, shkruan Cakaj.

Ministri shprehet se diskutimi u përqëndruar te bashkëpunimi dypalësh me theks të veçantë shtimin e bashkëpunimit ekonomik. “Thelbi i takimit u përqëndrua te bashkëpunimi dypalësh me theks të veçantë në shtimin e përpjekjeve për të nxitur ndërlidhjen ekonomike, mobilitetin kulturor e rinor dhe zhvillimin e brezit Adriatik në përgjithësi. Në këtë kuadër, riafirmuam angazhimin e përbashkët për vazhdimin e projekteve të rajonit nëpërmjet Korridorit Blu dhe Linjës së Gazit Joniano-Adriatik”, shprehet Cakaj.

Më tej, Cakaj tregon se është rënë dakord, për fillimin e takimeve tripalëshe, Shqipëri-Kosovë-Kroaci, që do të sjellin përfitime të drejtpërdrejta. “Në shërbim të thellimit të bashkëpunimit rajonal, u dakordësuam parimisht për fillimin e takimeve trilaterale mes Shqipërisë, Republikës së Kosovës dhe Kroacisë. Një bashkëpunim i tillë, krahas përfitimeve të drejtëpërdrejta, do të jetë edhe në shërbim të frymës euroatlantike të rajonit”, shprehet Ministri.

Selahi: Më donte Belgjika, por jam 100% shqiptar

Edy Reja vijon revolucionin në ekipin kombëtar. Një nga emrat e thirrur rishtaz në përfaqësuese, është 20-vjeçari Lindon Selahi, i cili luan në Holandë me Twente. Qendërmesfushori foli në konferencë për shtyp të hënën, duke rrëfyer emocionet e grumbullimit në kombëtare. Talenti u shpreh se veç Shqipërisë, ftesë i shkoi edhe nga Belgjika, por zgjodhi me zemër.

“Mendoj se e kam merituar këtë ftesë. Që i vogël ka qenë dëshira ime që të luaj në Kombëtare. Jam më i vogël por shpresoj që të luaj, trajneri vendos në fund dhe mendoj se jam gati. I njoh disa nga futbollistët, pasi kemi luajtur tek U-21. Kur kam qenë i ri kam luajtur me Belgjikën sepse nuk më ka ftuar Shqipëria, por tani që më thirri Shqipëria e vendosa. Edhe tani më ka kërkuar Belgjika, por kur e ndjen veten shqiptar, shkon 100% te Shqipëria. Ka pasur momente që nuk kanë qenë mirë por tani jemi mirë”, tha mesfushori.

Më tej ai foli për dy takimet e radhës, atë kundër Turqisë dhe Moldavisë, duke u shprehur se kombëtarja i ka shanset për të fituar. “Mendoj se kemi shans për të kaluar, dhe në Turqi e Moldavi shkojmë për të fituar dhe për të luajtur mirë. Mund të luaj kudo në mesfushë por mund të luaj më mirë si numër 8. Nuk e kam problem edhe si “6” apo “10”. Për momentin jam në sezonin parë te Twente por jam mirë. Nuk po shoh lart por jam mirë. Ëndrra ime është të luaj sa më shumë minuta dhe të luaj me Kombëtaren. Ëndrra është të kualifikohemi dhe të fitojmë në Kupat e Europës”, tha Selahi.

Kosova fiton turneun e UEFA. Shqipëria e dyta

Të hënën janë luajtur ndeshjet e fundit të turneut “UEFA Development Tournament” për ekipet kombëtare të moshës U-15. Ndeshjet e këtij turneu u luajtën në Kamëz. Shqipëria si vend organizator, luajti kundër Estonisë, Kosovës dhe Taxhikistanit. Pas përfundimit të të gjitha ndeshjeve, përfaqësuesja U-15 e Kosovës është shpallur fituese e turneut, duke fituar të gjitha ndeshjet me një bilanc prej 9 pikësh, 12 gola të shënuar dhe asnjë i pësuar.

Në takimin e fundit të këtij turneu, Kosova luajti kundër përfaqësuese kuqezi të Shqipërisë, duke fituar me rezultatin 1:0, me golin e shënuar nga Elton Krasniqi. Ndërkohë, kombëtarja kuqezi e mbylli turneun në vendin e dytë me 4 pikë, ndërsa në vendin e tretë u rendit Estonia me 3 pikë dhe Taxhikistani në vendin e fundit me 2 pikë.

Në këtë turne, ekipi i Kosovës vendosi dhe një rekord, pasi fitoi kundër Taxhikistanit me rezultatin 8:0 në ndeshjen e parë, ndërsa në takimin e dytë mundi Estoninë me rezultatin 3:0. UEFA ia besoi Shqipërisë zhvillimin e këtij turneu, që organizohet për promovimin e talenteve të ekipeve kombëtare të moshave.

Tërmeti, Mogherini: BE, gati të ndihmojmë Shqipërinë

Pas Komisionerit Johanes Hahn, ka ardhur dhe reagimi i Përfaqësueses së Lartë të Bashkimit Europian për Punët e Jashtme, Federica Mogherini, e cila ka shprehur solidaritet për Shqipërinë, pas tërmetit të së shtunës. Në një komunikatë zyrtare, e publikuar nga Ambasadori i BE në Shqipëri, Luigi Soreca, Mogherini shprehet se ka pasur një bisedë me Kryeministrin Edi Rama. Ajo i ka shprehur mbështetjen shefit të qeverisë, duke theksuar se BE është gati të ofrojë ndihmë për Shqipërinë.

“Federica Mogherini, Përfaqësuesja e Lartë për Punë të Jashtme dhe Politikë të Sigurisë, i shprehu solidaritet Kryeministrit të Shqipërisë, Edi Rama, pas një seri tërmetesh shkatërruese që goditën Shqipërinë, duke plagosur dhjetëra njerëz dhe duke shkaktuar dëme jashtëzakonisht të mëdha në ndërtesa dhe infrastrukturë. Në kontaktin e tyre, Përfaqësuesja e Lartë uroi shërim të shpejtë për të gjithë të dëmtuarit”.

“Ajo gjithashtu nënvizoi gatishmërinë e Bashkimit Evropian për të ofruar ndihmë, edhe përmes Mekanizmit të Mbrojtjes Civile. Ndërsa Kryeministri Edi Rama anuloi udhëtimin e tij për në New York për javën ministrore të Asamblesë së Përgjithshme të Kombeve të Bashkuara. Ai do të zëvendësohet nga Ministri në Detyrë i Punëve të Jashtme, Gent Cakaj, në darkën që Përfaqësuesja e Lartë mban sot me krerët e Ballkanit Perëndimor”, thuhet në deklaratën e publikuar nga ambasadori i BE.

Sondazhi i Real Story: A do t`i hapen negociatat Shqipërisë në tetor?

Në 18 tetor, Shqipëria pret përgjigjen e një “provimi” të rëndësishëm, hapjen ose jo të negociatave për anëtarësim me Bashkimin Europian. Nëse do të ketë një vendim pozitiv ose jo për Shqipërinë në këtë datë, Realstory.al, kërkon mendimin e qytetarëve, duke votuar në sondazhin e hapur në faqen tonë me pyetjen; A do t`i hapen negociatat Shqipërisë në tetor?. Të gjithë qytetarët, brenda dhe jashtë vendit, mund të votojnë në sondazhin tonë, duke shprehur mendimin e tyre lidhur me vendimin që do të marrin vendet e Unionit për çeljen ose jo të negociatave me Shqipërinë.

A do t'i hapen negociatat Shqipërisë në tetor?

Pas qershorit, kur Komisioni i Europës rekomandoi hapjen pa kushte të negociatave për Shqipërinë dhe Maqedoninë e Veriut me BE, Këshilli i Europës vendosi që vendimin ta shtynte për në tetor. Momenti i të vërtetës po afron, ndërsa në vend ka optimizëm, të paktën nga mazhoranca dhe Kryeministri Edi Rama, që së fundi ka marrë konfirmimin e Gjermanisë për çeljen e negociatave.

Ndërkohë, disa vende anëtare të BE, kanë konfirmuara paraprakisht votën “Pro” për Shqipërinë, duke shtuar optimizmin. Së fundi, para Gjermanisë, ishin vendet e Grupit të Vishegradit, të cilat pas një takimi me kryeministriat e vendeve të Ballkanit, në një deklaratë të përbashkët kërkuan nga BE që të çel negociatat me Shqipërinë dhe Maqedoninë e Veriut. Këto katër vende, e cilësuan këtë veprim si “investim strategjik të BE-së” në Ballkan.

Meta nuk u ndahet ndërkombëtarëve: Po mbajnë Shqipërinë në ngërç

Në 1 orë e 30 minuta konferencë për mediat, Ilir Meta, pas një periudhe të gjatë heshtje, ka sulmuar përsëri ashpër ndërkombëtarët. Meta bëri përgjegjës, për atë që ai e quan ‘antagonizëm’, pikërisht faktorin ndërkombëtar. Sipas Ilir Metës, Rama dhe Basha janë nxitur në ‘mungesën e përgjegjësisë’ nga ndërkombëtarët, që sipas Presidentit, arsyeja e këtij polarizimi është për të ‘mbajtur Shqipërinë në situatë ngërçi.

“Kjo ka qenë një situatë artificiale, e kam thënë, shqiptarët nuk e kanë merituar, se ky polarizim nuk jeton poshtë në shoqëri, në lagje, komunitete, fshatra, ky është një antagonizëm nga lart, por duket dhe si antagonizëm i orkestruar nga jashtë për të mbajtur Shqipërinë në një situatë ngërçi, dhe jo për të pasur ato kredenciale si një vend i NATO-së që duhej të kishte hapur negociatat, dhe që njerëzit nuk duhet të ikin me vrap nga vendi. Nëse reflektojnë tani është gjë e madhe, ja kam kërkuar prej kohësh. Ka qenë e pamundur deri tani për shkak të pavullnetit të tyre. U kam dhënë një rrugë për të ecur në rrugën e kthimit të vendit në shinat e kushtetutës”, tha Meta.

Pra, Meta ‘shkarkon’ përgjegjësinë e tij për thellimin e krizës me ‘dekret’, dhe vë ‘nën akuzë’ ndërkombëtarët, si shkaktarët e krizës politike në vend. Në fakt, ndërkombëtarët, të paktën vendet aleate, gjatë gjithë kohës, jo vetëm që nuk kanë nxitur ‘polarizimin’ dhe ‘antagonizmin’, siç presidenti pretendon, por kanë bërë thirrje për dialog dhe bashkëpunim. Janë lehtësisht të verifikueshme deklaratat e vendeve partnere, që nga nisja e krizës e deri më sot, që u kanë kërkuar palëve politike të ulen në dialog, të bashkëpunojnë për reformat kryesore në vend dhe të punojnë për qëllimin madhor të Shqipërisë, hapjen e negociatave me BE.

Por sulmet nuk u ndalën me kaq. Ai ka shigjetuar Reformën në Drejtësi. Gjatë deklaratës së tij, Meta përmendi rastet e bashkëpunimit të Shqipërisë me Komisionin e Venecias, duke sjellë shembulli për hartimin e Kushtetutës së vitit 1998. Lidhur me këtë dokument themeltar të funksionimit të shtetit, Meta u shpreh se ka qenë një nga kushtetutat më të mira të vendit.

“Jam këtu për të dhënë përgjigje përtej objektit të punës së Komisionit të Venecias. Për komisionin e Venecias unë kam respektin më të madh. Nuk janë diplomatë që flasin pa përgjegjësi se do ikin nesër dhe do vazhdojnë punën e tyre. Ata janë një referencë edhe për vendet e tjera. Ndaj ka bërë shumë mirë Kuvendi që e ka ftuar. Në vitin 1998 kushtetutën e bëmë me Komisionin e Venecias. Ajo u votua. Pastaj u ndryshua brenda natës dhe nuk u pyet as Venecia as qytetarët, e duartrokitën disa ambasadorë”, tha Meta.

Më tej, kreu i shtetit vijoi sulmin ndaj Reformës në Drejtësi, madje duke lënë të kuptohet se shkaku pse vendi është në krizë politike, është pikërisht moszbatimi i kësaj reforme. “Kjo situatë është edhe shprehje e një krize kushtetuese institucionale të vendit. Një nga arsyet pse jemi këtu është se janë shkelur rekomandimet e Venecias për Prokurorinë e Përgjithëm dhe për Gjykatën Kushtetuese. Prandaj duhet t’i kishim dëgjuar ata”, tha Meta. /Relastory.al/

META TREMBET NGA VENECIA, NIS SERIOZISHT MBROJTJEN

META “FLIRTON” ME MAZHORANCËN (APO BLOF PËR SHKARKIMIN?)

DEKRETI I 13 TETORIT, META PRANON SHKELJEN E AFATEVE ZGJEDHORE

“DJEGIA E KUVENDIT”, META: KOMISIONI KËRKOI DETAJE, POR JANË SEKRET

Palmer e thotë prerë: Shqipëria në BE, prioritet i SHBA

Përfaqësuesi i Posaçëm i SHBA për Ballkanin Perëndimor, Mathew Palmer, ka zhvilluar një vizitë në Malin e Zi. Ai ka takuar, në shtetin fqinj të Shqipërisë, disa zyrtarë të lartë të vendit, përfshi presidentin Milo Gjukanoviç dhe Kryeministrin Dushko Markoviç. Palmer ka folur për zhvillimet në rajon me drejtuesit më të lartë të shtetit malazez, ndërsa fokusi kryesor i bisedimeve ka qenë anëtarësimi i vendeve të rajonit në Bashkimin Europian. Ndërkohë, në deklaratën për shtyp të shpërndarë nga Presidenti i Malit të Zi, është zbuluar edhe një nga objektivat kryesor të Palmer si përfaqësues i posaçëm i SHBA në Rajon.

Sipas deklartës së shpërndarë nga zyra e shtypit e Presidentit të Malit të Zi, mësohet se Mathew Palmer i ka konfirmuar Milo Gjukanoviç, se përparësi e tij në rajon, është mbështetja për hapjen e negociatave të Shqipërisë dhe Maqedonisë së Veriut me Bashkimin Europian. “Palmer shprehu kënaqësinë e tij për takimin, duke theksuar se nuk është rastësi që Mali i Zi është destinacioni i parë që viziton në fillim të mandatit të tij si përfaqësues i SHBA për Ballkanin Perëndimor. Ai informoi Presidentin (Milo Gjukanoviç) se përparësitë e misionit të tij janë: inkurajimi i hapjes së negociatave të pranimit në BE për Tiranën dhe Shkupin, kthimin e dialogut Beograd-Prishtinë dhe kërkimin e zgjidhjeve për funksionalitetin e Bosnje-Hercegovinës”, mësohet të ketë thënë Palmer.

Kjo deklaratë e Përfaqësuesit të Posaçëm të SHBA për Ballkanin Perëndimor, është inkurajuese për Shqipërinë, e cila pret çeljen e negociatave për anëtarësim me BE në muajin tetor. Në fakt, roli i SHBA në këtë proces po konfirmohet nga dita në ditë, aq sa pas takimit që Lulzim Basha pati me zyrtarin e DASH, David Kostelancik, ka nisur të lobojë për hapjen e negociatave për integrimin e Shqipërisë në Bashkimin Europian. Në fakt, roli i SHBA si ‘Partner Strategjik’ i Shqipërisë po konfirmohet nga dita në ditë, e cila tashmë duket më e angazhuar se kurrë për të mos lejuar vendin tonë të jetë preh e influencës ruse në rajon. Për këtë qëllim, pak ditë më parë, Drejtori i Zyrës për Europën Jugore dhe Qendrore në Departamentin Amerikan të Shtetit, David Kostelancik, zhvilloi një vizitë në Shqipëri, i cili kishte mision ‘influencën ruse’ në vendin tonë. /Realstory.al/

Deputetja gjermane e SPD: Të hapen negociatat, Shqipëria ka kaluar pengesat

Deputetja socialdemokrate gjermane e Bundestagut, Nezahat Baradari në një deklaratë për Deutsche Wellen e vlerëson si hap të rëndësishëm hapjen e negociatave të anëtarësimit me Shqipërinë dhe Maqedoninë e Veriut. “Të dyja vendet kanë bërë përpjekje të mëdha për reforma dhe me këtë i kanë përmbushur kushtet për fillimin e negociatave. Për vazhdimin e kësaj dinamike të reformave negociatat e anëtarësimit do të ishin një motor vendimtar.”

Sipas deputetes socialdemokrate Nezahat Baradari, Bundestagu duhet tani të hapë përfundimisht rrugën për fillimin e bisedimeve të anëtarësimit. “Me kushtet paraprake të formulurara për Shqipërinë dhe fokusimin në kapitujt e shtetit ligjor në negociatat e pranimit, do duhet të jenë mënjanuar të gjitha pengesat që i zinin rrugën miratimit.”

Partia Socialdemokrate Gjermane e mbështeti edhe në qershor hapjen e negociatave të anëtarësimit me Shqipërinë. Kurse unioni CDU/CSU pritet që këtë javën të merret intensivisht me Shqipërinë, në kërkim të një qëndrimi për çeljen e negociatave./DW/

“Luftë me flakët”, 324 zjarre shkrumbuan 1900 ha pyje në dy muaj

Në vetëm dy muaj, korrik dhe gusht, në vendin tonë janë shënuar 324 vatra zjarri që ka djegur një sipërfaqe prej 1900 hektarësh. Me anë të një informacioni të publikuar në faqen e saj zyrtare në rrjetet sociale, Ministrja e Mbrojtjes Olta Xhaçka sqaron se 99% e zjarreve të rënë gjatë verës, kanë qenë të qëllimshëm, ndërsa shton se për personat përgjegjës do të veprojë ligji.

“Pavarësisht punës së jashtëzakonshme të Emergjencave Civile, Forcave te Armatosura, zjarrfikësve dhe ndihmës së qytetarëve të shumtë që na u bashkuan si vullnetarë, korriku dhe gushti shënuan një numër të pazakontë zjarresh. 324 vatra zjarri në mbarë territorin e vendit, 1900 ha pyje, toka bujqësore, kullota, nga zjarre që në 99% të rasteve kanë ardhur jo nga temperaturat e larta, por nga zjarrvënia e qëllimshme! Vazhdojmë të jemi në krye të detyrës për të mbrojtur pronën publike e private, e mbi të gjitha jetën e qytetarëve. Ligji do të veprojë me ashpërsinë më të madhe ndaj autorëve të këtyre akteve që rrezikojnë të mirën tonë të përbashkët”, shkruan Xhaçka.

Dy muajtë e nxehtë të verës kanë qenë dramatik sa i përket situatës së zjarreve. Sipërfaqe të konsiderueshme me pyje por dhe pemë frutore u shkrumbuan në zona të ndryshme të vendit për shkak të zjarreve. Flakët nuk kanë pushuar as në ditët e para të muajit shtator, ku së fundi një sipërfaqe e konsiderueshme pyjore në Cakran të Fierit u shkrumbua nga flakët.