Zbulohet ujë në planetin K2-18b, mendohet të ketë jetë

Për herë të parë, astronomët kanë hyrë në atmosferën e një exoplaneti, një planet jashtë sistemit tonë diellor. Shkenctarët kanë zbuluar në atmosferën e këtij planeti avuj uji dhe temperatura që mund të ndihmojnë potencialisht zhvillimin e jetës, thuhet në një studim të ri. Exoplaneti, i njohur si K2-18b, është tetë herë më i madh se masa e Tokës dhe njihet si një super-Tokë. Ai ndodhet në orbitën e një ‘ylli xhuxh’, 110 vite dritë larg Tokës, në yjësinë Leo. Planeti u zbulua për herë të parë në vitin 2015 nga anija kozmike Kepler e NASA-s.

Një ekip hulumtuesiesh përdori të dhënat arkivore të mbledhura nga Teleskopi Hapësinor Hubble midis vitit 2016 dhe 2017, i cili kapte dritën e yjeve ndërsa kalonte nëpër atmosferën e exoplanetit. Studiuesit thanë që ata panë qartë avujt e ujit në atmosferë kur i vendosën të dhënat e tyre përmes algoritmeve. Studiuesit, gjithashtu, janë shprehur se kanë gjetur shenja të hidrogjenit dhe heliumit në atmosferë, dy nga elementët më të bollshëm në univers.

Zbulimi i avujve të ujit në atmosferën e këtij exoplaneti është tërheqës për studiuesit, pasi ky planet është brenda zonës së banueshme të yjësisë së tij, ku përfshin temperaturat e duhur që uji i lëngshëm të ekzistojë në sipërfaqen e planetit. Kjo do të thotë që jeta mund të ekzistojë në K2-18b. Studiuesit publikuan gjetjet e tyre në revistën Nature Astronomy të mërkurën. “Gjetja e ujit në një botë potencialisht të banueshme, përveç Tokës, është jashtëzakonisht emocionuese”, tha Angelos Tsiaras, bashkëpunëtor i studimit në Qendrën Hapësinore në Kolegjin Universitar të Londrës.

Nis ndërtimi i ujësjellësit të ri në Ersekë, Balluku premton 24 orë ujë të pijshëm

Ndërtimi i ujësjellësit të ri në Ersekë do të furnizojë me 24 orë ujë të pijshëm mbi 7 mijë banorë të këtij qyteti. Deklarata është bërë nga ministrja e Infrastrukturës dhe Energjisë, Belinda Balluku e cila së bashku me ministren Spiropali panë nga afër punimet që kanë nisur për ndërtimin e këtij ujesjellësi.

“E rëndësishme është që 7156 banorë të qytetit të Ersekës do të marrin shërbim më të mirë, por do marrin dhe sasi më të madhe të ujit për frymë, çfarë është dhe synimi, dhe një nga strategjitë tona kryesore për përmirësimin e jetës së qytetarëve, që është strategjia e ujit dhe çfarë është më e rëndësishme, rrjeti do jetë një rrjet i ri, modern i cili nuk do të ketë humbje dhe nuk do të ketë ndotje, ashtu siç ndodhte më parë. E gjithë kjo është në vazhdimësinë e projekteve për përmirësimin e cilësisë së shërbimit të ujit që ne kemi dhe do vazhdojmë jo vetëm në këtë zonë por dhe në zona të tjera dhe me ritme të shpejta”, u shpreh Balluku.

Për ministren Spiropali ndërtimi i ujësjellësit të ri për banorët e Ersekës është një premtim i mbajtur teksa falënderoi ministrinë e Infrastrukturës dhe Energjisë si dhe AKUM për punën e bërë.

“Është një premtim i mbajtur, ne së bashku kemi qenë disa herë në Ersekës, në Kolonjë, në fushatë, është premtim i kryeministrit, premtim i qeverisë shqiptare, që po bëhet realitet. Është një investim i konsiderueshëm, një investim i madh i cili zgjidh përfundimisht çështjen e ujit këtu dhe unë si deputete e zonës dua t’ju falënderoj për punën që është bërë”, tha Spiropali.

Furnizimi me ujë të pijshëm për banorët e Ersekës ka qenë një shqetësim i trashëguar në vite. Rrjeti aktual, për shkak të amortizimit, ka degraduar duke bërë që edhe humbjet e sasisë së ujit të jenë të mëdha. Me investimin e bërë të gjitha këto probleme marrin zgjidhje.

Sakja i ultimatumit, nxjerr zjarrfikësit për të gjuajtur me ujë policët

Kryetari i bashkisë Kavajë, Isa Sakja, ndryshe nga bashkiakët e tjerë demokratë, ka dalë vetë në ball të sulmit ndaj KZAZ-ve. Në shkollën “3 Dëshmorët”, ‘qytetari i parë’ i Kavajës udhëheq një turmë të vogël njerëzish, të cilët pas ‘skadimit të ultimatumit të Sakes’, kanë sulmuar me gurë, sende të forta dhe ujë të lëshuar nga automjetet zjarrfikëse të kësaj bashkie forcat e Policisë së Shtetit që mbron ambientet e shkollës ku ndodhen materialet zgjedhore.

Militant e PD-së, të udhëhequr nga kryebashkiaku demokrat, kanë tentuar të shkatërrojnë gardhin rrethues të shkollës, teksa kanë sulmuar efektivët e policisë. Ndërkohë, policia u është përgjitur me gaz lotsjellës militantëve që kanë tentuar të hyjnë me dhunë në shkollën “3 Dëshmorët”.

Akti më i rëndë i kësaj ngjarje është nxjerrja e punonjësve zjarrfikës, të cilët janë bërë palë me militantët duke i hedhur ujë me presion të lartë forcave të policisë, të cilat ndodheshin në ambientet e shkollës. Ky është një tjetër akt i paprecedent i kundërvënies së forcave zjarrfikëse kundër atyre të Policisë së Shtetit.