Zgjedhjet në Greqi, dy shqiptarë në garë për parlamentin helen

Greqia zhvillon ditën e diel më 7 korrik zgjedhjet e parakohshme parlamentare ku do të përcaktohet kryeministri i ardhshëm i vendit. Këto zgjedhje janë të rëndësishme dhe 150 000 shqiptarët me të drejtë vote në shtetin fqinj grek, pasi garojnë edhe 2 shtetas shqiptarë.

Për herë të parë do të garojnë edhe shqiptarët për të përfaqësuar bashkëkombësit e tyre në Parlamentin grek. Në garë janë dy emigrantë shqiptarë, përkatësisht Fatos Malaj dhe Eda Gemi, të cilët jetojnë në Greqi prej vitesh. Të dy garojnë në kryeqytetin grek, Athinë. Eda Gemi ishte gjithashtu kandidate në zgjedhjet europiane për eurodeputete, por nuk ja doli të fitonte. Të dy shqiptarët garojnë për Partinë Lëvizja për Ndryshim apo ‘Kinima Allagis’, një forcë politike e majtë në koalicion me PASOK, e cila është në opozitë.

Ndërkohë, në këto zgjedhje parlamentare në Greqi kanë të drejtë vote mbi 150 000 emigrantë shqiptarë dhe minoritarë grekë, që kanë marrë nënshtetësinë. Shpresat e dy kandidatëve shqiptarë për të marrin mandat në Parlamentin grek janë të mëdha.

Zgjedhjet e 30 qershorit, PS ‘tejkalon veten’ 73 mijë vota më shumë se në 2015

Socialistët do t’i kalojnë ditët e nxehta të korrikut mes shifrash. Llogaritja e rezultateve të 30 qershorit dhe krahasimi me votën politike të vitit 2017 dhe votës së veçuar nga koalicioni në zgjedhjet e vitit 2015 do të jenë pasqyra e vlerësimit në Asamblenë e fund korrikut.

A2 CNN ka bërë llogaritjen e 12 bashkive kryesore në vend si qendër qarku, ku nga rezultatet e këshillave bashkiakë, që shquhet vota për siglën e partisë, krahasuar me zgjedhjet lokale të vitit 2015, duket një thellim i rezultatit në adresë të Partisë Socialiste, me 73 496 vota.

Kështu, për qarkun më të madh në vend, Tiranën, në vitin 2015, ku garonte po Erjon Veliaj, PS kishte marrë 108 290 vota, ndërsa më 30 qershor, 138 090 vota, me një diferencë gati 30 mijë vota. Duhet nënvizuar se këto vota janë vetëm për siglën e Partisë Socialiste, pa votat e koalicionit të Aleancës për Shqipërinë Europiane.

Në vitin 2015, socialistëve iu shtuan edhe 54 mijë votat e LSI dhe disa mijëra të tjera nga aleatët e vegjël. Në vijim të kësaj logjike, diferenca e votave ndihet më shume në Fier, me 11 273 vota mbi rezultatin që vetë Armando Subashi kishte marrë në vitin 2015. Renditet I treti Elbasani, që ka shtuar votat e socialistëve me 10 248 vota më shumë se sa rezultati që pati paraardhësi i Gentian Llatjas, Qazim Sejdini.

Në listë vijon Vlora, Durrësi, Berati, Kukësi e Shkodra. Ndërsa diferencën më të vogël e ka bërë Lezha me vetëm 765 vota mbi rezultatin e vitit 2015, dhe e fundit Dibra me vetëm 315 vota shtesë. Nëse shohim rezultatet e vitit 2015, duket se këto janë vota të marra nga LSI, që ka pasur rezultatin e dytë më të mirë pas PS në koalicion.

Megjithatë, duhet të sjellim në vëmendje se në të dhënat krahasuese të vitit 2019, ne kutitë e votimin në 10 bashki, u gjetën më shumë fletë votimi se votues. Fenomenin, Komisioni Qendror i Zgjedhjeve e justifikoi me faktin se të dhënat ishin përcjellë me telefon, dhe rrugës mund të ketë pasur lapsuse në llogaritje. Gjithsesi, analiza e votës do të tregojë në Asamblenë e Përgjithshme të PS, nëse do të ketë “prerje kokash” për ata që nuk kanë arritur objektivat e partisë, apo ngritje në detyrë për ata që kanë pasur performancën më të mirë.

Greqi: Pritet ndryshim i pushtetit, luftë për votuesit e majtë

Të dielën (07.07) grekët zgjedhin një parlament të ri. Opozita konservatore pret të fitojë me diferencë të madhe, kurse kryeministri i majtë, Aleksis Tsipras lufton për mbijetesën politike.

“Të dielën në mëngjes kutia e votimit është akoma bosh”, përsëriste gjithmonë në fushatë Aleksis Tsipras, kryeministri grek duke nënkuptuar me këtë: Nuk ka rëndësi se çfarë thonë sondazhet, përkrahësit e tij duhet të shkojnë të votojnë dhe nuk duhet të dekurajohen. Arsye për dekurajim ka për partinë e majtë, Syriza: Partia konservatore, Nea Demokratia kryeson sondazhet: Sipas një sondazhi të kësaj jave, madje konservatorët kanë një diferencë prej 13%. Kreu i opozitës, Kyriakos Mitsotakis, kërkon të jetë kryeministri i ardhshëm i Greqisë.”Ne luftojmë për çdo votë dhe duam të krijojmë një qeveri të fortë, që Mitsotakis të vërë në jetë shpejt premtimet e tij”, thotë Konstantinos Kyranakis kundrejt Deutsche Welles, kandidat për deputet i konservatorëve.

Por ende nuk ka ardhur puna deri këtu. “Besoj, se ne do t’i fitojmë zgjedhjet parlamentare, dua ta besoj këtë”, mendon Kostas Arvanitis, deputet i ri i sapozgjedhur i Syrizas në Parlamentin Europian. “Prognozat nuk janë gjithmonë të sakta, dhe shpesh të gabuara”, thotë ai për Deutsche Wellen. Nëse bëhet fjalë për të mbrojtur politikën e partisë së tij, ai është gati të luftojë. “Syriza e çoi deri në fund punën e saj, ajo e mbylli politikën e kursimit të Greqisë”, thotë ish-gazetari. Fakti që Fondi Monetar Ndërkombëtar nuk i mbikqyr më financat e shtetit helen, ai e sheh si një “sukses të madh” të qeverisë së Tsiprasit.

Grindje për politikën ekonomike në vend

Kur ishte kryetar i opozitës, Aleksis Tsipras i kishte shpallur armike kushtet e kursimit të vëna nga kreditorët ndërkombëtare. Pas ngjitjes në post në vitin 2015 ai mori kthesën drejt realitetit politik-ekonomik. Por sa më shumë që afron data e zgjedhjeve, aq më shumë grekëve u vjen ndër mend Tsiprasi i dikurshëm, që ngrinte fort zërin. Vetë ai përpiqet të shpjegojë kthesën politike që mori në vitin 2015: “Ne kishim naivitetin të besonim, se Europa do t’i respektonte vendimet e popullit grek”, tha ai në televizionin grek, Skai. Nënkuptohet, të tjerët e kishin fajin.

Kryeministri aktual, Tsipras paralajmëron nga një ndryshim i qeverisë. Me kreun konservator, Mitsotakis në Greqi do të kthehet politika e kursimit dhe impulset e reformave të viteve të fundit do të vihen në rrezik, thotë ai. Por politikani opozitar, Kyranakis kundërpërgjigjet. “Qeveria e fundit konservatore ishte ajo që për herë të parë e vuri nën kontroll deficitin e pakufishëm dhe e ktheu vendin në rrugën e rritjes ekonomike.” Sipas tij, Tsipras ka ndjekur një kurs me zigzage, dhe në fund të fundit ka grumbulluar borxhe të reja në vlerë prej 30 miliardë euro, kritikon Kyranakis.

Edhe Konstantinos Botopoulos, që të dielën kandidon për Partinë Socialiste, KINAL e kritikon retorikën e Tsipras. Çështja “politikë konservatore kursimi apo vepra bamirësie të majta” është një dilemë e stisur për qëllim elektorale, mendon ai. Në realitet, Syriza ka kohë që i ka pranuar kushtet e kursimit të vendosura nga kreditorët.

Lufta për votuesit e majtë

Tsipras lufton pa u lodhur në dy fronte: kundër konservatorëve dhe tani edhe kundër socialistëve të forcuar së fundmi. Prej kohësh socialistët gjendeshin në periferi të skenës politike, por të dielën ata shpresojnë për një rezultat dy shifror- Por dhe nëse do të humbet të dielën, Tsipras dëshiron patjetër të arrijë objektivin e tij minimal dhe të forcojë Syrizan si forcën kryesore politike majtas qendrës politike. Tsipras ka gjasa t’ia dalë kësaj. Për socialistin Botopoulos nuk shtrohet aspak çështja e konkurrencës me Syrizan. Sepse sipas tij vetëm KINAL-i i tij ofron një alternativë të vërtetë socialdemokrate në Greqi. Për të Syriza nuk është as socialdemokrate dhe as e majtë.

As politikani i Syrizas, Arvanitis nuk i kupton socialdemokratët si konkurrencë të vërtetë, por për arsye të tjera. “Në gatë ti shikon kush është përbri teje ose para teje, ata që ndodhen pas teje nuk kanë ndonjë rëndësi.”/DW/

Greqia voton të dielën, Mitsotakis premton ulje të taksave. Tsipras rritje të pagave

Greqia u drejtohet kutive të votimit të dielën më 7 korrik, për të mbajtur zgjedhjet e parakohshme parlamentare, pas shpërndarjes së parlamentit nga Kryeministri Alexi Tsipras, qëhumbi në zgjedhjet për Parlamentin Europian. Partia konservatore “Demokracia e Re” e Kyriakos Mitsotakis, që u shpall fituese edhe në zgjedhjet e Parlamentit Europian, shihet si favorite në zgjedhjet e të dielës në Greqi.

Këtë të premte është mbyllur zyrtarisht fushata elektorale për zgjedhjet e 7 korrikut, teksa në Athinë është mbajtur dhe mitingu përbmbyllës. Mitsotakis ka premtuar premtuar ulejn e taksës mbi të ardhurat, që sipas tij do bëhet 9% nga 22% që është aktualisht.

Gjithashtu, kreu i konservatorëve, ka premtuar ulje deri në 30% të tatimit mbi pronën gjatë dy viteve të ardhshme, duke i dhënë mundësi rritjes së aktivitetit konik dhe konkurrencës në vend. “Është obligimi ynë, veçanërisht për brezin e ri që meriton të gjejë punë në Greqi, në vend që të shkojë jashtë vendit”, ka thënë Kyriakos Mitsotakis.

Sondazhet i japin kreu të Demokracisë së Re në Greqi një avantazh të kënaqshëm në raport me kundërshtarin e tij, Alexia Tsipras, i cili po vuan rënien e popullaritetit për shkak të problemeve ekonomike që ka pasur vendit.

“Ne kemi rritur pagën minimale me 11%. Jemi zotuar që të ketë një rritje prej 15% të pagave gjatë dy viteve të ardhshme, në mënyrë që pagat të paktën të arrijnë nivelet e para krizës”, ka shkruar në Twitter, Alexis Tsipras, të premten duke i kërkaur mbështetje qytetarëve grek për një mandat të ri.

Të drejtën e votës për të zgjedhur deputetët e parlamentit të ri në Greqi, e kanë dhe mijëra qytetar shqiptarë që jetojnë prej vitesh në shtetin fqinj, dhe që kanë fituar të drejtën për të votuar.

“Përplasje në 30 qershor”, PD pranon qarkoren, Alibeaj: Nuk i lirojmë zyrat e bashkive

Ish-deputeti demokrat Enkeled Alibeaj, ka konfirmuar për herë të parë zyrtarisht Qarkoren e shprëndarë një javë para mbajtjes së zgjedhjeve nga PD për strukturat e saj. Në atë Qarkore bëhej thirrje për dhunë dhe pamundësim të zgjedhjeve deri në përplasje me policinë.

“Ne thamë që do të pamundësojmë zgjedhjet dhe kjo bëhet duke mos marrë pjesë. Sa i takon përplasjeve fizike, e menduam. Ju thamë njerëzve që kjo nuk është çështje e opozitës, ne shqiptuam faktin që të mos lejonim zgjedhjet, qoftë edhe fizikisht. I thamë popullit “po e kemi të drejtën, të ndalojmë me çdo lloj mjeti farsën”. Ne nuk kompleksohemi nga asnjë ndërkombëtar, por dëgjojmë zërin e arsyes, që do të thotë nëse nga ana e regjimit ka papërgjegjshmëri, gjë që e treguan, se Rama kërkoi vëllavrasje, pse duhet ta çonim ne në planin e tyre. E lamë të dështonte plani i autokratit dhe kështu ndodhi”, tha ndër të tjera Alibeaj.

Opozita po përgatit skenarin e radhës për të mos lejuar kryebashkiakët e rinj të dalë nga zgjedhjet e 30 qershorit, të shkojnë në zyrë. Atë që e kanë konfirmuar individualisht të ish-drejtues të bashkive të zgjedhur në siglën e PD-së si Xhelal Mziu apo Voltana Ademi, tani e konfirmojnë në nivele të larta nga përfaqësues të PD-së. Ish-deputeti, Enkelejd Alibeaj, në një studio televizive, është shprehur se kryetarët e bashkivet të PD-së nuk do të liërojnë zyrën për të zgjedhurit e rinj të PS, që morën mandatin e kryebashkiakëve të rinj në 60 bashki të vendit.

“Nuk është punë karrigesh, tanët nuk e kanë bërë për karrige, se ata po. Kryetarët tanë kanë qenë të diskriminuar nga qeveria, asnjë projekt, kanë bërë vetëm me taksat e vogla. Asnjë mbështetje financiare nuk kanë marrë. Nuk është e rëndësishme çfarë do bëjnë kryetarët tanë, por çfarë do bëjë publiku në këto bashki. Ky që po vjen nuk është produkt i dëshirës së tyre. Kryetarët tanë kanë për detyrë t’i lirojnë karrigen një pasardhësi të ligjshëm. Kur nuk njihet procesi, edhe produkti është i paligjshëm”, u shpreh ish-deputeti.

Rikthimi plangëprishës i Olldashit Jr. Nga protesta, tani “Basha Ik”

Jozefina Topalli nuk është e vetme kundër Lulzim Bashës. Pasi heshtën dhe pritën deri më 30 qershor, ndoshta duke besuar se kauza e kryedemokratit me djegien e mandateve dhe bojkotin e zgjedhjeve do të detyronte Edi Ramën të largohej, tani që kjo gjë nuk ndodhi dhe PD është pa asnjë pushtet, reagimet brenda së djathtës janë shtuar. Dhe pas Topallit, një tjetër zë, ndoshta jo më shumë për figurën personale por për atë që mbart në mbiemrin e tij, ka dalë kundër kreut të PD-së, duke kërkuar largimin nga partia.

Ai është Glauk Olldashi, i biri i të ndjerit Sokol Olldashit, një nga ish personalitetet më të rëndësishme të Partisë Demokratike, që u nda nga jeta tragjikisht pak vite më parë. Glauku, i biri i Olldashit, këtë vit ka mbushur moshën për të votuar, ka reaguar pas zgjedhjeve të 30 qershorit, që ‘de facto dhe de jure’ e nxjerrin PD-në pas asnjë pushtet. Olldashi ‘Junior’, i cili ka mbështetur PD dhe Lulzim Bashën në çdo protestë prej 16 shkurtit deri në 21 qershor, shkruan se tashmë Basha duhet të largohet, pasi ka humbur dy palë zgjedhje dhe në të tretat, partia nuk pati mundësi të testonte besimin e popullit.

“E Diela ishte dita në të cilën do të kisha ushtruar për herë të parë të drejtën e votës. Nuk e bëra, edhe pse e kisha pritur këtë ditë prej kohësh. Demokratët nuk i janë trembur kurrë proceseve zgjedhore sepse ato janë për ne prova dhe sprova e demokracisë. PD-ja fiton zgjedhje vetëm kur ndjell besim dhe frymëzon demokratët dhe të gjithë shqiptarët që edhe pse nuk kanë bindje të caktuara politike besojnë tek fryma që forca jonë përfaqëson. A është në popull ky besim? Zgjedhjet e 2015 dhe 2017 treguan që, Jo. Tek procesi i 2019 nuk e testuam besimin e popullit. Tashmë ky akt, i cili i dha 61 bashki PS – A do t’i vlejë kësaj force politike? Po për ne a do të vlejë?”, shkruan Glauk Olldashi.

Më pas, djali i Sokol Olldashit, ngre pyetjen se kush e ka fajin për gjithë këtë dështim, duke dhënë dhe përgjigjen, “vetja”. Ai shprehet se demokratët shqiptarë nuk u pyetën për pjesëmarrjen ose jo në zgjedhje, ndaj, tani duhet, sipas Glauk Olldashit, që të nis një proces zgjedhor për ristrukturimin e PD-së. “Fakti i hidhur është që PD nuk do të menaxhojë më asnjë pushtet. Kush ka faj? Sigurisht që përgjigja që na vjen në mendje kur na pyesin është “vetja”. Por, demokratët nuk u pyetën për vendimin e mospjesëmarrjes, në fakt demokratët jo vetëm që nuk pyeten më në PD, por edhe kur ndonjëri guxon të kundërshtojë shpallët “tradhëtarë”. Kjo mendësi komuniste, edhe pse e huaj për partinë tonë, na ka “infektuar”. C’farë është kura? Për mendimin tim do na bënte mirë një proces zgjedhor për ristrukturimin e partisë tonë. Po më quajtët tradhtar. nuk mërzitem”,- e mbyll komentin e tij djali të ndierit Sokol Olldashi, 18-vjeçari me emër Ilir, Glauk.

Në fakt, kjo thirrje e Glaukut, të kujton edhe njëherë se “rrënjët mbeten rrënjë”. Ashtu si babai i tij, Sokoli, që disa vite më parë akuzonte Lulzim Bashën se i kishte marrë partinë duke manipuluar votatat e demokratëve në zgjedhjet për kryetar, një filiz e re po rritet dhe mban të njëjtin mbiemër, ndoshta do të ketë dhe atë karakter si i ati, që edhe sot e kësaj dite, ka idhtarët e tij brenda së djathtës.

Zgjedhjet dhe kriza, në “Real Story”: SHBA ruajti stabilitetin, tani dialog!

Situata politike në vend, qasja e re e palëve për dialogun dhe zgjidhja e krizës, ishin temat e debatit në studion “Real Story” të gazetarit Sokol Balla në Vizion Plus. Analistët e ftuar në mbrëmjen e së hënës, Skënder Minxhozi, Arjon Sulo, Alfred Lela dhe Aleksandër Furxhi, kanë diskutuar rreth rrugëve, ku Lulzim Basha dhe Edi Rama mund të kalojnë për të gjetur zgjidhjen e krizës. Fillimisht, drejtuesi i emisionit, Sokol Balla, deklaroi se “paqja” në 30 qershor ishte falë presionit amerikan, të cilët u kanë shprehur palëve se duhet të ruajnë pozicionet e tyre, për të mbajtur dhe për të mos prishur zgjedhjet.

“U është thënë qartë palëve; ti do rrish urtë dhe nuk do prishësh zgjedhjet, ndërsa ti tjetri do rrish këtu dhe do bësh zgjedhje! Ka disa mënyra për të zgjidhur krizën. Për mua PD, duhet të tërhiqet, jo nga kauza, por nga gjuha e kasapëve, me koka. Basha dhe Rama duhet të dalin dhe të thonë se drejtësia duhet të vazhdojë”, u shpreh Sokol Balla.

Për analistin Alfred Lela, ka një tentativë për të “vrarë” Lulzim Bashën në ekranet televizive, ndërsa shtoi se Basha as nuk ka fituar e as nuk ka humbur nga zgjedhjet e 30 qershorit. “Ka një përpjekje për ta vrarë Lulzim Bashën nga ekrani. Basha është gjallë, kur se kanë vrarë shqiptarët, s`mund ta vrasin nga ekrani. Basha sido që ta shohim nuk ka dalë i vrarë nga zgjedhjet, por nuk ka dalë as fitues. Nuk ka fituar askush. Jane dy gjysma qe po zihen me njera-tjetren se jane trecerekeshe. Nuk jane, as njera e as tjetra. Basha është duke kërkuar një “fli”, pra do drejtësi”.

Skënder Minxhozi gjithashtu u shpreh se zgjedhjet ishin të Zëvendës Ndihmës Sekretarit Amerikan të Shtetit, Matheë Palmer, jo të Ramës. “Zgjedhjet ishin të Matheë Palmer, jo të Ramës. Ndodhemi përballë një realiteti shumë agresiv. Kemi qeverinë që është ngujuara në kullën e mermerit, ndërsa opozita thotë pa ikur ti nuk dialogojmë… Çfarë do të vazhdojë të mbrojë Edi Rama pas zgjedhjeve? Çfarë aksioni do të vazhdojë opozita? Nuk është momenti i polemikës, por është momenti i politikës. Duhet lexuar në mënyrë që të ndahen paragjykimet që dy të mëdhenjtë nuk duan të flasin”, tha Minxhozi.

Për analistin Arjon Sulo, më i intersuar për zgjidhjen e krizës është kryeministri Edi Rama. “Gjendja politike nuk mban më kështu. Kriza është aty. Kryeministri është sot njeriu më i interesuar për të zgjidhur krizën. Opozita e ka hequr barrën e saj, e kaloi 30 qershorin. Një nga instrumentatat e aksionit të opozitës janë protestat. Nëse nuk ka përgjegjësi juridike për kauzën e saj të drejtë, protestat janë një nga instrumentat”.

Ndërsa, gazetari Aleksandër Furxhi tha se nisja e hetimit për zgjedhjet e Dibrës dhe Durrësit, si dhe ndëshkimi i disa personave, do të lehtësonte klimën për dialogun mes Bashës dhe Ramës. “Deklarata e Bashës për të cilën po diskutojmë e ka brenda zgjidhjen. Është lënë rruga e hapur që nëse nuk futen brenda ata që kanë vjedhur votën, nuk ka zgjidhje. Prokuroria mund të hap një proces. Hapja e një procesi hetimi i shpëton fytyrën edhe Lulzim Bashës. Unë se kështu do të jetë më e lehtë”.

Kërcënon Kryemadhi: Bashkiakët e PS nuk do shkojnë në zyrë

Monika Kryemadhi është shprehur me tone kërcënuese, duke thënë “se të zgjedhurit e rinj lokal në 61 bashkitë e vendit, nuk do të shkojnë kurrë në zyrë”. “Aksioni do të jetë hap pas hapi, këtë javë është konsultimi ynë me partitë aleate. Do vazhdojmë gjithë procesin që do vijë në mënyrë të njëpasnjëshme. Nuk është problemi aty, tek zënia e zyrave, ata nuk do të shkojnë në zyrë asnjëherë. E di sa gjëra do ndodhin deri ën 12 gusht”, tha Monika Kryemadhi.

Këto deklarata Monika Kryemadhi i bëri në një lidhje direkte në Tv Klan, ndërkohë që gjatë fjalës së saj ajo ka komentuar edhe deklaratën e Maja Kocijanaçiç. Kryemadhi është shprehur se zonja (Koçijançiç) nuk e ka shkruar vetë deklaratën.

“Zonja që ka bërë deklaratën nuk e ka shkruar vetë, ia kanë shkruar të tjerët. Zonja nuk e ka të qartë që faktikisht ka një ngërç shumë të madh në atë që thotë. Ajo thotë të shkojnë në zyrë, kush të shkojnë në zyrë. Po kush?”.

Në lidhje me reagimin e ambasadës Amerikane ajo tha se e mbështet atë. Sipas saj zgjedhje do të ketë në 13 tetor, pasi dekretin e Presidentit nuk e gjykon dot tjetër gjykatë, vetëm ajo Kushtetuese siç e mështet dhe OSBE-OHDIR.

BE: Njohim të zgjedhurit e rinj lokal, tani dialog

Bashkimi Europian ka “certifikuar” procesin e zgjedhjeve të 30 qershorit dhe i ka vlerësuar ato të qeta dhe të rregullat, ashtu siç bëri pak më parë edhe Ambasada Amerikane.

Zëdhënësja e Përfaqësueses së Lartë për Politikën e Jashtme, Federica Mogherini, Maja Kocijancic deklaroi e pavarësisht ndarjes politike, zgjedhjet ishin të rregullta. Madje ajo tha se të zgjedhurit e rinj në krye të bashkive do të jenë në gjendje të kryejnë të gjitha kompetencat kushtetuese, duke njohur ligjshmërinë e zgjedhjes së tyre. Kjo rrëzon kreun e Bashkisë Kamëz, Xhelal Mziu, i cili ka thënë se nuk e liron karrigen e tij, pasi nuk i njeh këto zgjedhje.

“Zgjedhjet lokale të zhvilluara në Shqipëri të dielën më 30 qershor u zhvilluan në një kontekst të ndarjes politike, por në një mënyrë përgjithësisht të qetë dhe të rregullt. Ne morëm parasysh të gjitha vërejtjet paraprake të bëra nga shefi i Misionit të Vëzhgimit të Zgjedhjeve të OSBE / ODIHR. Organet lokale të sapo zgjedhura tani duhet të jenë në gjendje të punojnë sipas kompetencave të tyre kushtetuese, në dobi të qytetarëve të vendit.” – thotë Kocijancic.

Zëdhënësja e BE, Kocijancic bëri thirrje që palët të tregojnë pjekuri politike dhe të ulën në dialog për të kapërcyer krizën dhe të punojnë për reformat me rëndësi për vendin.

“Siç thuhet në mënyrë të përsëritur: qeveria dhe opozita duhet të tregojnë pjekuri politike dhe të angazhohen urgjentisht në dialog konstruktiv për të kapërcyer situatën aktuale politike. Të gjitha institucionet shqiptare dhe udhëheqësit politikë tani duhet të përqendrojnë përpjekjet e tyre në vijueshmërinë e zbatimit të procesit të reformës, duke përfshirë rinisjen e reformës së iniciuar më parë të legjislacionit zgjedhor për të adresuar rekomandimet e ODIHR-it.” – thuhet në reagimin e saj.

SHBA: Mbështesim ODIHR, kontestimi i zgjedhjeve vetëm në Gjykatën Kushtetuese

Ambasada e SHBA, reagoi për herë të parë pas zgjedhjeve të 30 qershorit, me një deklaratë që duhet thënë ishte perfekte duke vënë pikat mbi “i”. Ishte një deklaratë e një fitimtari, i një fitore pa luftë që arriti të neutralizojë palët, pavarësisht tensioneve të larta dhe skenarëve real për të destabilizuar paqen dhe qetësinë në vend. Në reagim e saj, Ambasada Amerikane vlerësoi qetësinë dhe procesin e rregullt që mbizotëroi gjatë votimit, por theksoi se për shkak të ngërçit politik, votuesit nuk kishin një zgjedhje kuptimplotë.

“Shtetet e Bashkuara mirëpresin përfundimet e misionit vëzhgues të ODIHR-it, sipas të cilave zgjedhjet bashkiake të 30 qershorit u zhvilluan përgjithësisht në mënyrë të qetë dhe të rregullt, si dhe dhanë një vlerësim të përgjithshëm pozitiv për numërimin e votave. Ne pranojmë, megjithatë, ashtu siç e vuri në dukje edhe misioni i ODIHR-it, se ngërçi dhe polarizimi politik kontribuan për zgjedhje në të cilat votuesit nuk kishin një zgjedhje kuptimplotë. Pavarësisht pengesave, populli shqiptar – qoftë ata që morën pjesë në zgjedhje, ashtu edhe ata që abstenuan – ushtruan të drejtën e tyre demokratike në mënyrë paqësore dhe ne i përgëzojmë për këtë.” – shkruhet në deklaratën e ambasadës amerikane.

Ambasada e SHBA, nuk hezitoi t’i përgjigjej edhe opozitës, e cila tha se nëse dikush nuk njeh rezultatin e zgjedhjeve, duhet të pres krijimin e Gjykatës Kushtetuese për të bërë kontestimin e tyre. Opozita dhe presidenti Meta, i kanë cilësuar si zgjedhje nul dhe të pavlefshme duke mos i njohur ato. Madje kjo deklaratë erdhi menjëherë pas daljes publike të kreut të PD, Basha, i cili doli me një fjalim triumfuesi duke thënë se 85 % e shqiptarëve i bojkotuan zgjedhjet farsë. Ambasada Amerikane shtoi se është e gatshme të bashkëpunojë dhe të ndihmojë në forcimin e shtetit ligjor për të gjithë shqiptarët.

“Në këtë çast, ne iu bëjmë thirrje të gjithë udhëheqësve politikë që të respektojnë shtetin ligjor dhe të punojnë brenda institucioneve ngritura për të përcaktuar rrugën përpara për demokracinë shqiptare, përfshi përparimin me reformat e rëndësishme zgjedhore të rekomanduara nga ODIHR. Ata që dëshirojnë të sfidojnë rezultatin e zgjedhjeve, mund të presin nga Gjykatën Kushtetuese, e cila shpresojmë do të ngrihet së shpejti, me gjykatës të cilët kanë kaluar një proces rigoroz vetingu. Si gjithnjë, Shtetet e Bashkuara janë në krah të popullit shqiptar si një vend partner, një mik dhe një aleat. Ne jemi të përkushtuar të ndihmojmë për forcimin e shtetit ligjor dhe ndërtimin e një demokracie më të fortë dhe një të ardhmeje më të ndritur për të gjithë shqiptarët.” – përfundon deklarata.