Prej orës 8:00 të mëngjesit, me orët lokale të vendeve anëtare të Bashkimit Europian, ka nisur votimi për zgjedhjet parlamentare të PE-së, në 21 vendet anëtare që ende nuk kishin votuar. Deutsche Welle shkruan se deri në mesditë ka pasur një numër rekord votuesish. Në Francë kanë marrë pjesë në votime më shumë se 19.26% e zgjedhësve, ka raportuar Ministria e Brendshme në Paris.
Kjo përqindje është disa herë më e madhe se ajo e vitit 2014, kur deri në mesditë, para pesë vjetësh, në Francë kishin votuar vetëm 15.70%, ndërsa në 2009 rreth 14.8%. Në dy vende të tjera ku është duke u zhvilluar votimi për zgjedhjet parlamentare të Bashkimit Europian, Hungari dhe Sllovaki, numri i zgjedhësve që kishin votuar deri afër mesditës ishte më i madh se ai në zgjedhjet kombëtare të dy vendeve.
Në Hungari deri në orën 11:00 pjesëmarrja në votime ka qenë rreth 17.2%, me gati 6 % më shumë se pesë vite më parë. Sllovakia ka pasur dhe numrin më të lartë të pjesëmarrësve në zgjedhje deri më tani ka qenë 20%, numër i cili ndryshon vazhdimisht.
Në Gjermani ende nuk ka të dhëna rreth pjesëmarrjes në votime, por Deutsche Welle shkruan se edhe në këtë vend, sipas sondazheve të ndryshme, ka pasur një rritje të numrit të votuesve në krahasim me zgjedhjet e kaluara. Të drejtën e votën kanë sot më shumë se 400 milionë banorë të 28 shteteve ë BE. Zgjedhjet kanë filluar me 23 maj dhe do të përfundojnë sonte.
