Venecia i jep goditjen e parë Metës. Rrëzon dekretin për 13 tetorin

Debati nëse do të ketë apo jo zgjedhje në 13 tetor, ka marrë vulën e Komisionit të Venecias. Në një intervistë për A2 CNN, Sekretari i Komisionit për Demokraci Përmes Ligjit, Thomas Markert, është shprehur se në praktikë nuk do të ketë zgjedhje më 13 tetor. “Është një koincidencë datash. Por unë mendoj se në praktikë nuk do të ketë zgjedhje më 13 tetor. De fakto, nuk mendoj se janë duke u bërë përgatitje për mbajtjen e zgjedhjeve, me aq sa unë jam në dijeni”, ka thënë ai ndër të tjera.

I pyetur nëse Ilir Meta ka shkelur ligjin me anulimin e datës 30 qershor për zgjedhjet vendore, Markert është shprehur se nuk mund të komentojë për momentin opinionin që do të japë Komisioni i Venecias për këtë çështje. “Nuk do të komentoj tani opinionin që do të publikohet muajin e ardhshëm”, ka thënë Market, ndërkohë ai ka komentuar edhe takimet që ai dhe anëtarët e tjerë të Komisionit të Venecias zhvilluan për dy ditë në Tiranë.

Thomas Market është shprehur se ‘opozita parlamentare nuk ka qëndrime të qarta’, ndërsa ajo jashtëparlamentare i ka të qarta. “Opozita parlamentare nuk ka një qëndrim të unifikuar, por qëndrime të ndryshme. Ndërsa opozita jashtëparlamentare, i ka të qarta qëndrimet e saj”, ka thënë Market, ndërsa ka komentuar dhe takimin me Kryeministrin Edi Rama. “Ju e dini që kryeministri Rama ka qenë shumë kritik për atë që bëri Presidenti i Republikës. Ne diskutuam dhe për rolin e presidentit. Çfarë ai duhet të bëjë, ka të drejtë të bëjë e çfarë jo, si dhe për pasojat e këtyre veprimeve”, ka thënë Thomas Markert.

Fact Checking/ Mbi 12 raste, si u dogjën KZAZ-të me dekretin e Metës

Presidenti Ilir Meta në seancën dëgjimore përpara Komisionit Hetimor Parlamentar për shkarkimin e tij deklaroi se dekreti për anulimin e datës së zgjedhjeve më 30 qershor synonte të ndalonte gjakderdhjen dhe se fill pas firmosjes së tij u ndalën aktet e dhunës. Por pak javë kanë kaluar nga ajo kohë dhe kujtesa është ende e freskët për të mbajtur mend se ngjarjet nuk rrodhën pikërisht kështu sikurse thotë presidenti. E vërteta është se fill pas firmosje së dekretit të Metës për anulimin e datës së zgjedhjeve në Shqipëri shpërtheu një valë protestash me zjarrvënie në mbarë vendin, që synonin djegien e KZAZ-ve dhe materialeve zgjedhore duke tundur si flamur dekretin e Metës.

Anulimi i zgjedhjeve nga Meta ndryshoi strategjinë e protestave të PD-së. Liderët e opozitës u tërhoqën nga protestat masive me molotov kundër kryeministrisë (pas apelit të SHBA-së dhe Palmer) dhe u shpërndanë nëpër qytetet e Shqipërisë veçanërisht aty ku ndodheshin bashkitë e djathta, ku sulmuan KZAZ-të dhe i vunë zjarrin materialeve zgjedhore. Argumenti që u përdor në të gjitha rastet si nga drejtuesit e bashkive, përfaqësuesit politikë, por edhe nga militantët dhe protestuesit e thjeshtë ishte se nuk kishte zgjedhje më 30 qershor, për shkak se presidenti i anuloi përmes dekretit.

Realstory ka bërë një kontroll të fakteve dhe ka zbuluar se pas firmosje së dekretit të Metës është paraqitur një situatë e tensionuar në qytetet të tilla, si Pogradec, Bilisht, Kukës, Çorovodë, Burrel, Kamëz, Berat, Klos, Gjirokastër, Dropull, Delvinë, Kavajë, Kamëz, Lezhë, dhe Dibër.

Më poshtë kemi përzgjedhur me data ngjarjet më të rënda:

12 qershor. Dy javë para zgjedhjeve të 30 qershorit, është sulmuar Komisioni Zonal i Administrimit Zgjedhor të qytetit të Rrogozhinës. Militantët kanë thyer fishekun e derës se kësaj qendre, ndërkohë policia ka rrethuar qendrën e KZAZ-së.

18 qershor, zjarr në KZAZ-në nr. 3 në Shkodër. Digjet shkolla Shejnaze Juka. Militantët e PD-së i vënë flakën materialeve zgjedhore. Nuk ka zgjedhje më 30 qershor, Meta i anuloi.

18 qershor, incidente janë shënuar edhe në Tropojë, ku disa shtetas kanë dëmtuar materialet zgjedhore në KZAZ tek Muzeu Historik.

19 qershor, zyrtarët e Bashkisë së Burrelit dhe militantët e PD-së kanë sulmuar KZAZ-në nr. 16 dhe i kanë vënë zjarrin materialeve zgjedhore duke zbatuar kështu dekretin e Metës për anulimin e zgjedhjeve.

19 qershor është sulmuar dhe është tentuar të hapet edhe KZAZ nr. 27 e Bashkisë Kamëz. Policia Bashkiake e Kamzës ka tentuar të lirojë ambientet e KZAZ-së që ndodhen në shkollën “Ibrahim Rugova”, por ka hasur me Policinë e Shtetit e cila është vënë në ruajtje të ambienteve të kësaj KZAZ-je.

19 qershor. Në KZAZ-në numër 11 në Kukës e cila është vendosur në ambientet e një palestre, militantë të PD-së në bashki, kanë tentuar të hyjnë me forcë për të nxjerrë nga KZAZ materialet zgjedhore. Militantët kanë thyer edhe xhamat e palestrës. Ka pasur përplasje mes tyre dhe forcave të rendit, por situata më e rëndë është bërë kur militantët kanë marrë një kamionçinë dhe me të kërcënojnë të hapin me dhunë derën e KZAZ-së.

19 qershor. Kanë vijuar në mbrëmje tensionet në Kavajë, në KZAZ nr. 42 kur disa militantë të PD janë konfrontuar me forcat e sigurisë. I pranishëm ka qenë edhe kryebashkiaku i PD i cili ka nxjerrë në terren edhe forcat zjarrfikëse të bashkisë për të sulmuar forcat e policisë.

27 shtator, militantët e PD-së i vendosin zjarrin KZAZ-së nr.6 brenda shkollës në Vaun e Dejës. KZAZ-ja ndodhet në shkollën profesionale ‘Ndre Mjeda’ në Bushat. KZAZ-ja u sulmua me molotv. Strukturat e PD-së janë mobilizuar në zbatim të skenarit të opozitës për të bllokuar zgjedhjet në 30 Qershor duke ndjekur modelin e Shkodrës pak ditë më parë me përplasjet që kulmuan me zjarrin që iu vendos po një KZAZ-je në shkollë.

27 qershor, incidente në KZAZ-të numër 12 dhe 13 në Lezhë. Materialet zgjedhore janë transportuar nga mjete të ushtrisë të shoqëruara nga forcat speciale të policisë. Nga ana tjetër policia bashkiake e Lezhës, e cila drejtohet nga PD ka kërkuar lirimin e ambienteve ku janë vendosur materialet zgjedhore.

28 qershor. PD tenton të futet në KZAZ-në nr. 19 në Dibër që ndodhet në palestrën e shkollës së mesme “Nazmi Rushiti”. Rreth 300 militantë janë përplasur me policinë.

28 qershor. Incidente edhe në Pogradec. Dy punonjës bashkie janë arrestuar pasi kanë mbyllur me çelës 3 shkollat dhe kopshtin, të caktuar nga KQZ si qendra votimi.

28 qershor sulmohet KZAZ 19 në Dibër. Një numër i madh mbështetësish të Partisë Demokratike ku tentuan të hyjnë me forcë. Protestuesit u përplasën fort me policinë. Të paktën gjashtë policë dhe një gazetar kanë mbetur të dëmtuar dhe kanë marrë ndihmë mjekësore.

Edhe pas zgjedhjeve të 30 qershorit, dekreti i Metës u përdor nga kryebashkiakët e djathtë si pretekst për të mos liruar zyrat për të zgjedhurit e rinj vendorë që dolën fitues nga zgjedhjet. Trazira u shënuan në Devoll e Kavajë, ndërkohë që PD ishte përgatitur për skenar dhune në të gjitha bashkitë e djathta, por më pas u tërhoq. Pra faktet vërtetojnë të kundërtën e asaj që Presidenti deklaroi një ditë më parë në komision. Dekreti i tij i hodhi më tej benzinë zjarrit, dhe nuk ndali “gjakderdhjen”./realstory.al

Kuvendi në punë për shkarkimin e Metës. Si ndikoi dekreti për anulimin e zgjedhjeve

Nuk ka pushime për Komisionin Hetimor për shkarkimin e Presidentit Ilir Meta. Anëtarët e këtij komisioni kanë nisur të mbledhin prova mbi pasojat që ka shkaktuar dekreti i Metës për anulimi e zgjedhjeve të 30 qershorit.

Kështu Kuvendi i ka drejtuar një kërkesë për informacion Policisë së Shtetit dhe Prokurorisë së Përgjithshme, ku 2 titullarëve të këtyre institucioneve iu është kërkuar informacion në lidhje me trendin e krimeve zgjedhore, para dhe pasi Presidenti të anulonte me dekret zgjedhjet e 30 qershorit, shkruan gazeta Sot referuar burimeve nga ky komision.

“Numri i kallëzimeve të referuara në organin e Prokurorisë për shkelje penale të procesit zgjedhor gjatë periudhës kohore 1 janar 2019- 10 qershor 2019 në shkallë vendi; Numri i kallëzimeve të referuara në organin e prokurorisë për shkelje penale të procesit zgjedhor gjatë periudhës kohore 10 qershor 2019 e në vijim, në shkallë vendi”, janë disa nga pyetjet që Komisioni Hetimor iu ka dërguar në kërkesë Prokurorisë dhe Policisë. Por këto institucione i kanë dërguar përgjigje Kuvendit në lidhje me kërkesën me informacione që mazhoranca kërkon t’i përdorë për shkarkimin e Ilir Metës nga detyra.

Kështu sipas të dhënave të Policisë së Shtetit, para se Presidenti të dekretonte anulimin e zgjedhjeve, kishte pasur vetëm 2 kallëzime për krime elektorale, ndërsa pas 10 qershorit, u proceduan 192 persona. “Në total, për periudhën 01 janar 2019 -10 qershor 2019 janë gjithsej 2 kallëzime që lidhen me procesin zgjedhor, të referuara në Prokurori, zbuluar 1, ose 50% e tyre.

Në këto vepra penale është proceduar 1 autor, i cili ndiqet në gjendje të lirë. Në total për periudhën 10 qershor 2019 e në vazhdim, janë gjithsej 32 kallëzime që lidhen me procesin zgjedhor, të referuara në Prokurori, zbuluar 27, ose 84,37% e tyre. Në këto vepra penale janë proceduar 192 autorë, nga të cilët 71 persona të arrestuar, 18 të ndaluar, 60 ndiqen në gjende të lirë dhe 43 janë larguar dhe shpallur në kërkim policor”, thuhet në përgjigjen e Policisë së Shtetit për Komisionin Hetimor.

Përveç institucioneve që janë vënë në lëvizje, duke i kthyer përgjigje Komisionit Hetimor të ngritur nga Kuvendi për shkarkimin e Metës, edhe Komisioni i Venecias është vënë në lëvizje për këtë gjë. Në 9 shtator, ekspertët e Venecias do të zbarkojnë në Tiranë, ku pritet të takojnë palët para se të japin një opinion mbi ligjshmërinë e veprimeve të Presidentit Ilir Meta. Pra maxhoranca nuk po pushon por po punon që në shtator shkarkimi i Metës të jetë fakt i kryer.

Lufta e Metës me dekretet, kthen koncesionin Milot-Balldren

Presidenti Meta nuk ka aspak në plan të ndalojë betejën e dekreteve që ka nisur me qeverinë duke i kthyer asaj edhe një ligj tjetër për rishqyrtim, atë të koncesionit për projektimin, ndërtimin dhe mirëmbajtjen e segmentit rrugor Milot–Balldren. Ky bëhet ligji i 3 që i kthehet mbrapsht Kuvendin në vetëm 3 ditë.

Gjatë arsyetimit të kthimit të këtij ligji, Meta cilëson se kontrata me koncesionarin është miratuar në kundërshtim me parimin e shtetit të së drejtës dhe në kundërshtim të hapur me interesin publik. Madje Meta sulmon qeverinë se më këtë kontratë ka dashur të “mbulojë paligjshmërinë e bërë nga autoriteti kontraktor dhe qeveria shqiptare, me qëllim mos evidentimin e përgjegjësisë në këtë proces dhe mbulimin e çdo paligjshmërie nëpërmjet ligjit.”

Presidenti Meta rreshton 8 pika të cilat janë arsye të mjaftueshme për ta kthyer mbrapsht këtë ligj për koncesionet si dhe thekson se institucionet financiare ndërkombëtare kanë kërkuar nga qeveria shqiptare, në mënyrë eksplicite, eliminimin në mënyrë të menjëhershme të ofertave të pakërkuara, si oferta me një kosto të rëndë në ekonominë e vendit.

“Ky ligj dhe Kontrata Koncesionare bashkëlidhur janë propozuar, hartuar, nënshkruar dhe miratuar në kundërshtim me parimin e shtetit të së drejtës. Ky ligj miraton një Kontratë Koncesionare ku vullneti i Qeverisë Shqiptare në këtë proces është formuar në kundërshtim të hapur me interesin publik dhe në shkelje të parimit të konkurrencës së lirë dhe të barazisë përpara ligjit. Kontrata e lidhur mes autoritetit kontraktor dhe operatorit ekonomik është formalizuar përgjatë një procesi aspak transparent ndaj publikut dhe pa një bazë ligjore për negocimin e çmimit të saj. Mungesa e një vlerësimi të qartë ekonomik krijon rrezik për cenim të financave të shtetit. Nuk rezulton të ketë një studim fizibilteti të plotë dhe objektiv të hartuar dhe të miratuar nga institucionet shtetërore përgjegjëse të ngarkuara me ligj me këtë detyrë. Nuk është dhënë miratimi i këtij projekti nga Ministria e Financave dhe Ekonomisë, konform kërkesave të aktit që rregullon këtë proces. Rriskon seriozisht buxhetin e shtetit, pasi nuk ka një përllogaritje të saktë të efekteve të saj në ekonominë e vendit. Qëllimi i miratimit me ligj të kësaj kontrate është vetëm mbulimi i paligjshmërisë së bërë nga autoriteti kontraktor dhe qeveria shqiptare, me qëllim mosevidentimin e përgjegjësisë në këtë proces dhe mbulimin e çdo paligjshmërie nëpërmjet ligjit.” – shkruan Meta

Më herët Presidenti Meta i ktheu qeverisë edhe dy ligje të tjera të rëndësishme atë të për koncesionet dhe PPP-të dhe ndryshimet në Kodin Penal.

Duket se Meta ka vendosur ta përdorë të gjithë fuqinë e tij Kushtetuese për t’ia vështirësuar edhe më shumë punën mazhorancës, por në fakt, pavarësisht kthimit të tyre, kjo vetëm do të sjell vonesa të hyrjes në fuqi, por nuk shkaktojnë asnjë penalizim tjetër. Këto dekrete mund të miratohen lehtësisht me fuqinë e kartonit me një shumicë të thjeshtë votash në Kuvend, vota të cilat Partia Socialiste i ka të garantuara.

Lexo këtu deklaratën e plotë.

“Tërmeti apokaliptik”, Xhaçka: Presidenti, blof për herë të dytë

Dy ditë më parë, Ilir Meta i drejtohej me një letër shqetësuese, Kryeministrit Edi Rama, Ministres së Mbrojtjes Olta Xhaçka dhe disa institucioneve të tjera, ku kërkonte informacion në lidhje me masat e marra për një tërmet, që sipas Metës pritet të godasë vendin tonë dhe do të jetë me përmasa apokaliptike. Në përgjigjen, që Xhaçka i kthen Metës, ajo qetëson Presidentin, duke i pohuar edhe faktin që “pas konsultimeve me specialistë të fushës, rezulton se tërmetet janë një fenomen i paparashikueshëm”.

“Përfitoj nga rasti për t’ju informuar ju, e përmes jush edhe mbarë opinionin, pas konsultimeve me Institutin e Gjeoshkencave, Energjisë, Ujit dhe Mjedisit (IGJEUM), se aftësia për të parashikuar vitin, datën e orën kur do të godasë një tërmet, apo fuqinë me të cilën do të godasë shkon përtej mundësive të shkencës. Tërmetet për fat të keq janë të paparashikueshëm. Ky është një fakt që e konfirmojnë sizmiologët tanë dhe çdo sizmiolog kudo në botë. Për më tepër, e konfirmon edhe vetë sizmiologu i njohur Tselentis, fjalët e të cilit janë bërë shkas për shqetësimin tuaj”, shprehej Xhaçka..

Megjithatë, shqetësimit të Presidentit, Olta Xhaçka i është përgjigjur duke i kujtuar edhe ligjin “Për mbrojtjen civile”, miratuar së fundi në Kuvend, dhe dërguar në zyrën e Presidentit për dekretim. “Ndërkohë, shprehja më e qartë e seriozitetit të punës sonë është ligji “Për Mbrojtjen Civile”, që pret sot dekretimin nga ana juaj. Është një ligj i hartuar me ekspertizën e mbështetjen e ekspertëve më të mirë vendas e të huaj, dhe që do të transformojë qasjen e vendit tonë ndaj emergjencave duke e zhvendosur fokusin nga reagimi, tek parapërgatitja, parandalimi e zvogëlimi i riskut. Unë besoj që duke dekretuar këtë ligj, pa humbur kohë, ju do të jepni një kontribut real në përgatitjen e vendit tonë për t’u përballur sa më mirë, e me sa më pak dëme me çdo lloj fatkeqësie natyrore, përfshirë edhe tërmetet, të cilat, pavarësisht dëshirës sonë, në fund, mbeten të pakontrollueshme e të paparashikueshëm”, shprehet Olta Xhaçka.

Pas kësaj kërkese të Olta Xhaçkës, ka ardhur reagimi i Presidentit me anë të zëdhënësit Tedi Blushi, i cili është shprehur se “ligji ‘Për mbrojtjen civile’ është dekretuar para se të përfundojë afati”. Por duket se Presidenca në këtë rast ka dalë blof, pasi ligji, të paktën publikisht nuk gjendet askund i dekretuar. Nga një verifikim në faqen e presidencës, në seksionin e ‘Dekreteve’, shihen disa ligje të dekretuara ose jo, por ai për “Mbrojtjen civile” jo. Në fakt, as në Fletoren Zyrtare nuk është i publikuar ende dekretimi i këtij ligji.

Basha thotë ‘Jo’, e tradhton Pampuri: Zgjedhjet më 13 tetor

Lulzim Basha është shprehur se nuk do të marrë pjesë në zgjedhjet e 13 tetorit (nëse ato do të mbahen). Kreu i PD-së kërkon largim të Qeverisë, dhe krijimin e një kabineti tranzitor për të garantuar zgjedhje “të lira dhe të ndershme”, shprehet Basha. Por, ky komunikim publik i Lulzim Bashës, duket se nuk është në të njëjtën linjë me komunikimin brenda partisë.

Të paktën kështu ka lënë të kuptohet ish-deputetja e PD-së, Oriola Pampuri, që ka folur në një studio televizive dhe është shprehur se “Ka një dekret të Presidentit, që zgjedhjet të mbahen më 13 tetor. Nuk mund ta hedhësh poshtë dhe as të bësh asnjë hap kundër këtij dekreti. Vetëm Gjykata Kushtetuese do ta gjykojë, çdo hap i gabuar do të gjykohet nga kjo gjykatë. Sot jemi pa drejtësi dhe pa gjykata. Ramin e tradhtoi padituria”, është shprehur Pampuri.

Tani, se kush tradhton kë, kjo kuptohet qartë. Pasi në fakt, është ish-deputetja demokrate që nxjerr zbuluar liderin e saj, që është zotuar se nuk merr pjesë në zgjedhjet e 13 tetorit (gjithmonë nëse ato do të mbahen). Por, ky ligjërim i Pampurit s`mund të jetë kurrsesi jashtë linjës së mendimit politikë të partisë që ajo përfaqëson.

Dhe kjo kuptohet nga fakti që Pampuri në deklaratën e saj në vijim, ka përsëritur në një moment atë që tha Lulzim Basha në protestën e të hënës “se me Ramën nuk bëhet marrëveshje, pasi ai nuk i qëndroi asaj të 2017”. Ndërkohë, ish-deputetja ka shprehur dhe qëndrime të tjera zyrtare, që legjitimoin në fakt pranimin e zgjedhjeve të 30 qershorit nga opozita, siç ishte rasti i disa ditëve më parë, kur vetë Oriola Pampuri deklaroi në një konferencë për shtyp se PD do të padiste Taulant Ballën dhe Denar Bibën për shpërdorim detyre, për rezultatin e zgjedhjeve për Elbasanin. Thënë kjo, PD pranon ‘de facto” 30 qershorin, dhe nëpërmjet ish-deputetes jep sinjale për një marrëveshje me Qeverinë, për të shkuar përsëri në zgjedhje më 13 tetor.

Rama tallet: Liri, zgjedhje para ditëlindjes së Doktorit

Kryeministri Edi Rama vijon ironitë e tij me dekretin e ri të nxjerrë nga presidenti Meta ku vendosi datën e zgjedhje të reja më 13 tetor. Këtë herë Rama është kapur pas faktit të ditëlindjes së Doktorit (Sali Berisha), i cili e feston 2 ditë pas zgjedhjeve të reja që dekretoi Meta, pra më 15 tetor. Thua se zgjedhjet e 13 tetorit do të jenë zgjedhje të lira për popullin, pasi sipas presidentit Meta këtë herë do të jenë gjithëpërfshirëse.

“ E paska lëvizur datën me 8 ditë, se 21-shi i binte e hënë ose pastaj e ka lexuar si 2 ditë para ditëlindjes së 1-shit, domethënë Doktorit, që e ka si shpirt kur shpirtin i’a merr peng paniku.” – shkruan Rama

Gjatë konferencës së tij për mediat ku prezantoi dhe dekretin e ri për zgjedhjet Meta tha se ishte “shoku i doktorit” dhe se nuk mund t’i drejtohej dot Saliu, pasi e kishte pikë të dobët. Meta gjithmonë ka kërkuar siguri nga Doktori sa herë që ka qenë në vështirësi, dhe ndihma e tij nuk i ka munguar. Por këtë herë si do jetë? Dekreti i ri, si për mazhorancën dhe edhe për ato që njohin ligjin është nul dhe se nuk çon në asnjë lloj mënyrë të zgjidhjes së krizës politike

View this post on Instagram

E paska lëvizur datën me 8 ditë, se 21-shi i binte e hënë ose pastaj e ka lexuar si 2 ditë para ditëlindjes së 1-shit në 15 tetor, domethënë Doktorit, që e ka si shpirt kur shpirtin i’a merr peng paniku😨🤣

A post shared by Edi Rama (@ediramaal) on Jun 27, 2019 at 8:29am PDT

Sadushi: Pse Presidenti nuk mund të shtyjë datën e zgjedhjeve dhe dy rastet kur shpërndahet parlamenti

Presidenti i Republikës nuk mund të shtyjë datën e zgjedhjeve, përveç rastit kur ka fatkeqësi të madhe natyrore. Kështu është shprehur Drejtori i Shkollës së Magjistraturës, Sokol Sadushi i cili ka deklaruar se dekreti i Presidentit Meta për anulimin e datës së zgjedhjeve vendore është një akt antikushtetues, duke theksuar se një veprim i tillë nuk ka ndodhur në asnjë vend të Europës.

“Ka një arsye pse nuk ka një shtyrje zgjedhjesh kur ka një shoqëri që respekton kushtetutën. Zgjedhjet kanë një periodicitet dhe duhen bërë në afatin e përcaktuar, lihet një tolerancë që data të jetë para mbarimit të mandatit, por të mos tejkalohet mandati nga organet, nga kjo pikëpamje duhet respektuar afati kushtetues. Ka diferencë, shtyrja e zgjedhjeve në 2007, ka patur një respektim të përpiktë të ligjit, sepse mandati përfundonte në 20 shkurt të 2007, ndërsa zgjedhjet ishin në 20 janar të 2007, dhe ishin 30 ditë në avancë para mbarimit të mandatit. Ndodhi ajo e certifikatave, dhe palët ranë dakord për shtyrje, por Presidenti Alfred Moisiu ia kërkoi Kuvendin me shkresë, ku ky i fundit detyroi Presidentin për vendosjen e një date para se të përfundonte mandati. Rasti i 2007 duhet vlerësuar, ndërsa rasti i shtyrjes në 2017, sipas meje nuk është respektuar ligji. Data nuk ndryshon dhe nuk ka arsye, mund të ndryshojë vetëm për arsye që nuk lidhen me njeriun, çdo arsye tjetër është e pajustifikueshme, sepse nuk duhet tejkaluar mandati i organeve apo Kuvendit”, u shpreh Sadushi ne TVSH.

Ndërkaq, ai ka folur edhe për debatin e dy ditëve të fundit nëse Presidenti e ka mundësinë që të shpërndajë Parlamentin. Dhe në këtë pikë, Sadushi thotë se kjo mund ndodhë vetëm në dy raste. Rasti i parë është ai kur nuk arrihet që të zgjidhet kryeministri dhe qeveria dhe rasti i dytë kur ka të bëjë me mocionin e besimit të kryeministrit.

PD-Ramës: Kur Presidenti të shpallë zgjedhjet e reja, do zbatojmë ligjin

Partia Demokratike i është përgjigjur kryeministrit Rama ku ka kërkuar zbatimin e ligjit nga kryetarët demokrat të bashkive, duke e cilësuar se në fakt ‘është vetë kryeministri në paligjshmëri të plotë.‘

Paraditen e së premtes, 5 bashki që udhëhiqen nga opozita, i drejtuan një letër Komisionit Qendror të Zgjedhjeve për të tërhequr KZAZ-të dhe listat emërore, pasi zgjedhjet nuk do të mbahen më 30 qershor sipas dekretit të presidentit Meta.

Në deklaratën e saj, Partia Demokratike kërkon që Rama të zbatojë ligjin, pasi vendimi i presidentit Meta është botuar në Fletoren Zyrtare.”Kur Presidenti të shpallë një datë të re zgjedhjesh, atëherë gatishmëria jonë për respektimin e ligjit, do të jetë, si gjithmonë, maksimale.” thotë PD-ja.

“Zoti Kryeministër! Je kokë e këmbë në paligjshmëri!

Qeveria e drejtuar prej teje ka botuar në Fletoren Zyrtare dekretin e Presidentit. Siç mund ta dish fare mirë, në Fletoren Zyrtare publikohen aktet ligjore të detyrueshme për zbatim në Republikën e Shqipërisë. Mos u lodh me urdhra pa vlerë që nxisin militantët e tu në KQZ të na kërcënojnë me ndjekje penale, sepse, për sa kohë nuk ekziston një datë zgjedhjesh, as zgjedhjet nuk ekzistojnë.. Kushdo që vepron ndryshe, është në paligjshmëri!

Zoti Kryeministër, kur Presidenti të shpallë një datë të re zgjedhjesh, atëherë gatishmëria jonë për respektimin e ligjit, do të jetë, si gjithmonë, maksimale.

Hallin e datës 30 nuk ta zgjidhim dot ne!

Je që je kot dhe sillesh nëpër Shqipëri si qyfyrexhi, jepi urdhër KQZ-së të shpallë menjëherë nisjen e negociatave me BE-në!” – thuhet në deklaratën e PD.

30 qershori, Meta kërcënon me destabilitet

Presidenti Ilir Meta theksoi të premten për mediat se dekreti i tij për anulimin e zgjedhjeve të 30 qershorit është në fuqi dhe ata që nuk e respektojnë atë do të vuajnë pasojat që do të provokojnë destabilitet në vend. “Ata që ecin në rrugën e paligjshmërisë do të kenë të gjithë pasojat që do të provokojnë paqen sociale dhe stabilitetin në vend”, tha Meta.

I pyetur për 100 votat kundër tij në parlament, Meta tha se ai është zgjedhur nga një parlament i ligjshëm dhe jo nga ky parlament, duke nënkuptuar se ky parlament është i paligjshëm.

“Presidenti është zgjedhur nga parlamenti, natyrisht jo nga ky. Nga një parlament plotësisht legjitim. Por presidenti i takon Republikës. Dhe republika është e qytetarëve”, tha Meta, i cili shtoi se është duke punuar me qetësi për vendosjen e datës së re të zgjedhjeve dhe së shpejti do të thërrasë në takim Ramën dhe Bashën.

“Sa më parë të jetë e mundur. Po punojmë me shumë qetësi. Dekreti është në fuqi. Është i detyrueshëm për të gjithë. Presidenti mban shënim çdo institucion që shkel ligjin”, tha Meta.

I pyetur nëse do pranojë një vendim të Kolegjit Zgjedhor për dekretin e tij Meta tha me ironi se ata mund të çmenden dhe të ankohen edhe në Gjykatën e Skraparit që nuk ekziston.

“Dekreti mund të gjykohet edhe nga gjykata e Skraparit që nuk ekziston. Presidenti nuk lejon askënd që të çmendet. Shqipëria ka nevojë për zgjedhje të lira dhe të ndershme sepse vetëm ato sigurojnë çeljen negociatave që është objektiv i të gjithë shqiptarëve. Kush dëshiron të eci në rrugën e paligjshmërisë le të vazhdojë është e drejta e tij. Presidenti ka të drejtë të bëjë thirrje për reflektim. Ata që ecin në rrugën e paligjshmërisë do të kenë të gjithë pasojat që do të provokojnë paqen sociale dhe stabilitetin në vend”, tha Meta.