Drafti ligjor, si do të zhbllokohet betimi i anëtarit të Gjykatës Kushtetuese

Pas ngërçit të krijuar për emërimet dhe dekretimet e anëtarëve të Gjykatës Kushtetuese, maxhoranca qeverisëse në Kuvend është duke përgatitur disa amendamente në dy ligje, atë “Për organizimin e Gjykatës Kushtetuese” dhe “Për statusin e gjyqtarëve dhe prokurorëve”. Ligjet synojnë të zgjidhin ngërçin e krijuar për procedurën e fillimit të detyrës së anëtarit të Gjykatës Kushtetuese, që aktualisht, sipas përcaktimeve ligjore, që anëtari i kushtetueses së fillojë detyrën duhet të bëjë betimin te Presidenti.

Ky përcaktim pritet të hiqet, dhe sipas Kryetarit të Komisionit të Ligjeve, ndryshimet nuk synojnë vetëm zgjidhjen e ngërçit aktual. Në një deklaratë për mediat, Manja bëri të njohura ndryshimet. Drafti saktëson se gjyqtari i emëruar në Gjykatën Kushtetuese, që nuk thirret për betim në Presidencë e kryen betimin në formë të shkruar, mund të ndryshojë duke hequr kufizimin e duke përcaktuar se “ceremonia e betimit mund të organizohet pranë Gjykatës Kushtetuese”.

Por, a do të ketë ligji fuqi prapavepruese, duke i dhënë mundësi Arta Vorpsit të marrë detyrën e anëtares së Gjykatës Kushtetuese? Ulsi Manja shprehet se kjo çështje do të zgjidhet nga vetë Gjykata Kushtetuese. “Vendimin se kush do konsiderohet anëtare e Gjykatës Kushtetutese, Arta Vorpsi apo Marsida Xhaferllari, do e marrë Gjykata Kushtetutese”, tha Manja. Nisma ligjore e propozuar nga deputetët e maxhorancës do të diskutohet në sezonin e ri parlamentar vitin e ardhshëm.

Kushtetuta s’lejon “Nikin” të hyjë në zyrë

Anëtari i zgjedhur nga Presidenti për vakancën e Gjykatës Kushtetuese, Besnik Muçi, u shkarkua të enjten nga Kolegji i Posaçëm i Apelimit. Ish-prokurori i zgjedhur anëtar i Gjykatës Kushtetuese pak javë më parë, nuk e kaloi një nga kriteret e rivlerësimit, atë të pasurisë. Megjithatë, Besnik Muçi u shpreh se nuk e njeh vendimin e KPA, pasi sipas tij në çastin që u zgjodh anëtar i Gjykatës Kushtetuese humbi statusin e prokurorit. Dhe për Besnik Muçin fakti që humbi statusin e prokurorit, i krijon atij mburojën nga Vettingu.

Por a qëndron kështu e vërteta? Pra a është subjekt i rivlerësimit, anëtari i Gjykatës Kushtetuese Besnik Muçi?

Po, ai është subjekt i rivlerësimit. Këtë e përcakton qartë Neni 179/b/3 i Kushtetutës së Shqipërisë, ku thuhet: “Të gjithë gjyqtarët, duke përfshirë gjyqtarët e Gjykatës Kushtetuese dhe të Gjykatës së Lartë, të gjithë prokurorët, duke përfshirë Prokurorin e Përgjithshëm, Kryeinspektorin dhe inspektorët e tjerë pranë Këshillit të Lartë të Drejtësisë, i nënshtrohen rivlerësimit ex officio”, thuhet në Kushtetutë. Këtu bie pretendimi i parë i Besnik Muçit se për të duhet të ishte ndërprerë Vettingu në çastin që u zgjodh anëtar i Gjykatës Kushtetuese.

Gjithashtu, ligji për funksionimin e Gjykatës Kushtetuese përcakton qartë në Nenin 7/a mbi kriteret dhe kushtet e emërimit të gjyqtarit të Gjykatës Kushtetuese, në pikën “dh” të këtij neni thuhet: “Të ketë kaluar me sukses procesin e kontrollit dhe verifikimit të pasurisë së tij personale dhe të familjarëve të tij, sipas ligjit”.

Në fakt, kjo pikë do të duhet të kishte fuqi vepruese përpara se Besnik Muçi të zgjidhej anëtar i Gjykatës Kushtetuese. Pra, Presidenti, në çastin që kishte përpara listën e kandidatëve për të zgjedhur një emër për vakancën e Gjykatës Kushtetuese, duhet t`i ishte referuar kësaj pike, duke mos dekretuar Besnik Muçin anëtar të Gjykatës Kushtetuese, pasi ishte ende në proces rivlerësimi. Megjithatë, ky është një tjetër diskutim.

Besnik Muçi është shprehur se ai nuk e njeh vendimin e Kolegjit të Apelimit, duke thënë se do të vijojë punën si anëtar të Gjykatës Kushtetuese. Por, edhe në këtë pikë, ligji është i qartë. Sipas ligjit “Për rivlerësimin kalimtar”, në Nenin 66 për Vendimin e Kolegjit të Apelimit, në pikën 3 thuhet: “Vendimi i Kolegjit të Apelimit, që vendos shkarkimin nga detyra, ka efekt të menjëhershëm ex lege”. Pra, Besnik Muçi s`mund të jetë anëtar i Gjykatës Kushtetuese prej ditës së sotme. Ndërkohë, nëse ai do të tentojë të mos zbatojë këtë vendim, do të përballet me shkelje ligjore. Konkretisht, është Kodi Penal ai që parashikon masat ndëshkimore për funksionarët publik.

Në Nenin 246 të këtij Kodi, ku flitet për Përvetësimin e titullit apo detyrës shtetërore, thuhet: “Përvetësimi i një titulli apo detyre shtetërore i shoqëruar me kryerjen e veprimeve që i takojnë mbajtësit të titullit apo të detyrës, përbën kundërvajtje penale dhë dënohet me gjobë ose me burgim gjer në dy vjet. Kur vepra kryhet me qëllim fitimi apo ka prekur lirinë, dinjitetin apo të drejta të tjera themelore të shtetasit, dënohet me gjobë ose me burgim gjer në pesë vjet”, thuhet në Kodin Penal./Realstory.al/

Deklarata bombë e ambasadës së SHBA: Venecia ka precedentë pro Vorpsit

Debati dhe ngërçi i krijuar për ngritjen e Gjykatës Kushtetuese ka bërë që SHBA, si investuesi dhe aktori kryesor i zbatimit të Reformës në Drejtësi, të rekomandojë marrjen e opinionit të Venecias në lidhje me përplasjet ligjore e kushtetuese të krijuara në skenën e politikës shqiptare.

Duket se kjo është zgjidhja që SHBA i propozon politikës shqiptare duke gjetur një rrugë të mesme por që në thelb synon njohjen e Arta Vorpsit në Gjykatën Kushtetuese. Kjo nisur edhe nga precedentët e vendimeve të mëparshme të Komisionit të Venecias që ka njohur betimet e noterizuara të anëtarëve të Gjykatës Kushtetuese, pas qenë nevoja që anëtarët të betohen në presidencë, njëlloj siç bëri Vorpsi. Duket se pikërisht kjo është arsyeja që SHBA propozon që çështja të shkojë në Venecia dhe ky qëndrim i SHBA ka bërë që presidenti Meta të shpërthejë në sulme ndaj saj.

Në deklaratën e tyre SHBA bën thirrje që palët kundërshtuese të respektojnë opinionin e Venecias, duke i dhënë një mesazh të qartë kreut të shtetit Ilir Meta, i cili ka krijuar një përplasje e re mes institucionit të KED dhe Presidencës, përplasje që përfundoi me një dekret antikushtetues për emërimin e Marsida Xhaferllarit dhe një padi penale ndaj kreut të KED, Ardian Dvorani.

“Reforma në drejtësi është një nga prioritetet më të larta të Shteteve të Bashkuara në Shqipëri. Përparimi i vazhdueshëm i reformave është thelbësor për çuarjen përpara të qëllimit tonë të përbashkët të anëtarësimit të Shqipërisë në Bashkimin Europian. Tashmë Shqipëria ndodhet në prag të ringritjes së Gjykatës së saj Kushtetuese, një hap madhor në procesin e reformës në drejtësi. Megjithatë ky përparim i nevojshëm ka ngecur për shkak të interpretimeve të ndryshme ligjore të procesit të emërimit, parashikuar nga kushtetuta shqiptare dhe ligjet për zbatimin e reformës në drejtësi.

Institucionet gjyqësore shqiptare, kushtetuta dhe ligjet për zbatimin e reformës në drejtësi, duhet të udhëheqin procesin e zgjidhjes së këtyre intepretimeve të debatuara.

Në mungesë të një institucioni të përshtatshëm ligjor, i cili mund të vendoste mbi intepretimet e kundërta, Shtetet e Bashkuara mbështesin çuarjen e çështjes në Komisionin e Venecias, si një palë e tretë kompetente dhe e paanshme, për opinionin e tij ligjor. Gjithashtu, nxisim palët kundërshtuese që të respektojnë opinionin ligjor të Komisionit të Venecias. Ecja në këtë drejtim do të ishte tërësisht në përputhje me aspiratat europiane të vendit.

Teksa Shqipëria ndërmerr këto reforma thelbësore, Shtetet e Bashkuara do të vazhdojnë të qëndrojnë në krah të saj si një vend mik, partner dhe aleat” shkruhet në deklaratën e SHBA.

Më herët edhe Ambasadori italian Alberto Cutillo tha se Gjykata Kushtetuese duhet të ngrihet sa më parë, por mbi rregulla të qarta duke këshilluar që për ngërçin e krijuar palët t’i drejtohen për mendim Komisionit të Venecias.

Kushtetuesja kërkon më shumë para, debat me Finon

Projektbuxheti i vitit 2020 për Gjykatën Kushtetuese ka sjellë debate të forta në Komisionin e Ligjeve mes sekretarit të Përgjithshëm i Gjykatës Kushtetuese, Eugen Papandile dhe deputetit socialist Bashkim Fino.

Papandile tha se Gjykata Kushtetuese ka nevojë për punonjës të rinj dhe ndërhyrje në ambientet e godinës për krijimin e kushteve të punës për shkak të amortizimit. Ai tha se buxheti është shkurtuar me 3 milionë lekë për shpenzimet operative, në një kohë ku numri i punonjësve të rinj do rritet për shkak të fluksit të lartë të kërkesave që presin për t’u shqyrtuar. “Jemi të zhgënjyer me buxhetin sepse është ulur me 3 milionë lekë. Sa i përket investimeve nuk po zgjatem shumë në shifra si jurist që jam po ju paraqes disa nga kërkesat e kësaj gjykate të cilat lidhen me godinën se jemi në të njëjtën godinë, se ambientet e amortizuara të Gjykatës Kushtetuese, të goditura për së dyti nga tërmeti. Mendoni kushtet në të cilat kanë filluar punë anëtarët e rinj të gjykatës Kushtetuese. Duke pasur parasysh fluksin e punës, mbledhja e gjyqtareve ka miratuar 72 punonjës të kësaj gjykate. Nuk kam shifër tamam, por diku 110 të dosje. Por në momentin që Gjykata e Lartë të fillojë nga funksionimi mund të bëhet dhe 1010. Do ketë fluks të madh kërkesash dhe për këtë jam i bindur” tha Papandile.

A duhet ndërruar Kushtetuta për të kufizuar Presidentin?

Nga ana tjetër, deputeti socialist Bashkim Fino tha se nuk është e vërtetë, pasi buxheti për Gjykatën Kushtetuese është në rritje dhe i mjaftueshëm për aktivitetin e saj. “Projektbuxheti i gjykatës Kushtetuese është në rritje. I japim 160 milionë lekë. Nga 34 milionë lekë ju keni harxhuar vetëm gjysmat dhe me të drejtë Ministria e Financave ka akorduar 31 milionë lekë. Nga 34 milionë lekë për investime keni harxhuar 0. Kur unë të jap 4 milionë ti investon 0.2 kjo është absurde. Nga 114 milionë lekë që është totali ne ju dhamë 161 milionë, rritje goxha e konsiderueshme” tha Fino.

Gjykata Kushtetuese njeh Xhaferllarin: Për Vorpsin nuk kemi kuorum

Pas miratimit në Kuvend të Rezolutës për “Shmangin e krizës me synim legjitimimin e Gjykatës Kushtetuese”, ky institucion reagoi zyrtarisht pasditen e të premtes. Në deklaratën e saj, Gjykata Kushtetuese shprehet se pavarësisht plotësimit të disa vakancave, kjo gjykatë nuk e ka kuorumin e nevojshëm për të shqyrtuar dhe vendosur në seancë gjyqësore për kërkesat që paraqiten përpara saj.

“Për sa më sipër, lidhur me Rezolutën e miratuar nga Kuvendi i Shqipërisë, Gjykata Kushtetuese sqaron se, edhe pas plotësimit të disa prej vakancave në përbërjen e saj, nuk e ka ende kuorumin e nevojshëm për të shqyrtuar dhe vendosur në seancë gjyqësore lidhur me kërkesat që paraqiten përpara saj. Për këtë arsye ajo nuk mund të ushtrojë kompetencat e saj thelbësore apo juridiksionale lidhur me zgjidhjen e konfliktit të kompetencave midis pushteteve apo organeve kushtetuese, si dhe as ato kompetenca që lidhen me shqyrtimin e kushtetutshmërisë së akteve të nxjerra nga organet e pushtetit publik”, thuhet në njoftim.

Më tej, Gjykata Kushtetuese, thotë se është duke ndërmarrë hapat administrative formale për fillimin e detyrës për tre anëtarët e rinj, pas betimit të tyre para Presidentit të Republikës.

“Në këto kushte, Gjykata Kushtetuese si një institucion i pavarur, duke zbatuar Kushtetutën dhe ligjin e saj organik dhe legjislacionin në fuqi, si dhe praktikat administrative të ndjekura ndër vite, me qëllim sigurimin e kushteve normale për mbarëvajtjen dhe mirëfunksionimin e veprimtarisë së saj, është duke ndërmarrë të gjitha hapat e nevojshme administrative formale për fillimin e detyrës së tri anëtarëve të rinj, pas betimit të tyre para Presidentit të Republikës”, thuhet në njoftim, duke iu referuar Elsa Toskës, Marsida Xhaferllarit dhe Fiona Papajorgjit.

Nisur nga ky njoftim, duket se anëtarët aktual të Gjykatës Kushtetuese nuk do të “njohin” mandatin e Arta Vorpsit, deri në plotësimin, sipas kësaj gjykate, të vakancave të tjera që do të krijonin kuorumin për shqyrtimin dhe marrjen e një vendimi në themel.

Arta Vorpsi “injoron” Metën, betohet si anëtare e Gjykatës Kushtetuese

“Betohem se gjatë kryerjes së detyrave të mia do t`i qëndroj kurdoherë besnik Kushtetutës së Republikës së Shqipërisë”, tha të enjten me dorën mbi Kushtetutë, Arta Vorpsi. Atë që nuk e bëri Ilir Meta, pra të thërriste anëtaren e re të Gjykatës Kushtetutese për të bërë betimin, e bëri noterja Miranda Xhemalçe. Arta Vorpsi bëri betimin të enjten paradite, jo para Metës, por para noterit.

Në fakt, edhe Meta, që e shmangu dhe la të kuptohet se nuk do ta thërriste Arta Vorpsin për të bërë betimin ceremonial, nuk do të bënte asgjë më shumë se sa një akt noterial. Ndaj, në kushtet kur Meta i ka shpallur luftë Kushtetutës dhe institucioneve shtetërore, Arta Vorpsi, që kishte pikë më shumë se çdo kandidat tjetër për kushtetutesen, bëri betimin mbi Kushtetutë, përpara noteres Miranda Xhemalçe.

Pas këtij akti, Arta Vorpsi njoftoi të gjitha institucionet kushtetuese se bëri betimin si anëtare e Gjykatës Kushtetuese. Ky akt i sotëm pritet të prodhojë reagime të tjera të forta, pasi sipas Kushtetutës, anëtari i Gjykatës Kushtetutese e fillon detyrën pasi bën betimin te Presidenti. Arta Vorpsi ishte renditur kandidatja me më shumë pikë në katër listat që KED i dërgoi presidentit dhe parlamentit.

Presidenti nuk e zgjodhi, duke djegur afatet. Për këtë arsye, sipas Kushtetutës, Vorpsi mori automatikisht mandatin me vendimin e KED-s botuar në Fletoren Zyrtare. Ndërkohë, Ilir Meta të mërkurën dekretoi Marsida Xhaferllarin, si anëtare të re të Gjykatës Kushtetuese, duke bërë të tjera shkelje ndaj ligjit themelor të shtetit dhe duke nxitur tashmë një tjetër krizë për ngritjen e Gjykatës Kushtetutese. /Realstory.al/

“Dekretimi” i Xhaferllarit, përplasja e re Kuvend-Presidencë

“Dekretimi” i Marsida Xhaferllarit nga Presidenti Meta dhe mosnjohja e Arta Vorpsit, të emëruar në mënyrë automatike nga ligji për Gjykatën Kushtetuese sjell një përplasje të re institucionale Kuvend –Presidencë, por duket se fundin e hidhur mund ta ketë vetë Meta. Kreu i Komisionit të Ligjeve dhe njëherësh kreu i Komisionit Hetimor për shkarkimin e Presidentit, Ulsi Manja, por edhe deputeti i opozitës së re në Kuvend, Ralf Gjoni parashikuan një gjë të tillë në emisionin “Real Story” të datës 11 nëntor.

Mes debateve të shumta nëse presidenti do të thërriste Arta Vorpsin për t’u betuar, solli dhe një deklaratë të fortë të deputetit të opozitës në Kuvend Ralf Gjoni, i cili tha se nëse Meta nuk thërret anëtaret e zgjedhura për t’u betuar kjo do të çojë në një përplasje të madhe Kushtetueses duke lënë të kuptohet se kjo gjë mund të zërë poshtë Presidentin dhe jo Kuvendin.

“Nëse Meta nuk thërret anëtaret e zgjedhura për t’u betuar, kjo do të çojë në një përplasje të madhe Kushtetuese, shumë më e fortë se ajo e zgjedhjeve lokale të qershorit. Kjo është një zgjedhje shumë e madhe kushtetuese midis institucionit të Kuvendit dhe atij të Presidentit dhe kam frikë se kjo do rrokulliset si orteku dhe do zërë poshtë…Mund të them se Parlamenti është organi bazë i një demokracie.”

Ndërsa Ulsi Manja ndërhyn duke lënë të kuptohet se Kuvendi do dalë në krye dhe poshtë “ortekut” do të ngec Presidenti Meta. “Sigurisht që në një Republikë Parlamentare dihen zgjidhjet…” .

Ndaj Presidentit Meta ka nisur një proces shkarkimi, pikërisht prej dekreteve të tij të shpallura në mënyrë anti-ligjore dhe në kundërshtim me Kushtetutën e vendit për zgjedhjet, ndërsa Ulsi Manja, njëherësh edhe kreu i Komisionit Hetimor për shkarkimin e Presidentit, tha se vendimet e fundit të Metës nuk janë objekt hetimi për shkarkimin, por që do të merren parasysh në kuadrin e përgjithshëm kur të merret vendimi. / Real Story

Kush janë dy anëtaret e reja të Gjykatës Kushtetuese

Elsa Toska dhe Fiona Papajorgji janë dy anëtaret e zgjedhura nga Kuvendi për Gjykatën Kushtetuese. Ato u zgjodhën me 105 vota duke çuar në pesë numrin e anëtarëve në Gjykatën Kushtetuese. Po cilat janë dy anëtaret e reja?

Elsa Toska u konfirmua në detyrë nga Komisioni i Pavarur i Kualifikimit në 12 shkurt të 2019, ndërsa ka punuar si këshilltare ligjore prej 12 vitesh në Gjykatën Kushtetuese. Ajo ka mbaruar fakultetin e Drejtësisë në vitet 1996-2000 si dhe doktoraturën për ligjin kushtetues dhe atë administrativ. Toska e ka filluar karrierën si ndihmës/komisionere e Avokatit të Popullit dhe prej vitit 2007 punonte si këshilltare ligjore në Gjykatën Kushtetuese. Ka punuar gjithashtu si pedagoge në disa universitete në vend si dhe ka bashkëpunuar në rolin e ekspertet me një sërë organizatash ndërkombëtare.

Lexo këtu CV-n e Elsa Toskës

Fiona Papajorgji u konfirmua nga Komisioni i Pavarur i Kualifikimit më 26 nëntor 2018, ndërsa ka punuar si këshilltare ligjore në Gjykatën Kushtetuese që prej vitit 2011. Papajorgji ka ushtruar edhe rolin e pedagoges në disa universitete private në vend. Ajo zotëron gradën shkencore “Doktor” të marrë në Universitetin e Barit në Itali në vitet 2009-2012.

Lexo këtu CV-n e Fiona Papajorgji

Elsa Toska dhe Fiona Papajorgji i bashkohen anëtarëve të tjerë të Gjykatës Kushtetuese duke e çuar në 5 numrin e tyre. Në të ndodhet aktualisht Vitore Tusha, e cila kaloi vettingun, Besnik Muçi, i cili u zgjodh nga Presidenti dhe Arta Vorpsi, e cila u zgjodh automatikisht si e para në listën e Presidentit, për shkak të mbarimit të afatit kohor prej 30 ditësh. Megjithatë që Gjykata Kushtetuese të jetë funksionale nevojitet minimumi një kuorum prej 6 anëtarësh.

Kuvendi injoron Metën, voton dy anëtaret e Gjykatës Kushtetuese

Me 105 vota pro, Kuvendi miratoi kandidatet Elsa Toska dhe Fiona Papajorgji si anëtare të Gjykatës Kushtetuese. Prej kësaj të hëne, Gjykata Kushtetuese e Republikës së Shqipërisë bëhet me pesë anëtarë. Vitore Tusha, e cila i kaloi Vettingun, Besnik Muçi i dekretuar nga Presidenti, Arta Vorpsi që u fut automatikisht si kandidatja me më shumë pikë, si dhe Elsa Toska dhe Fiona Papajorgji e votuara në Kuvend, janë pesë anëtarët e Gjykatës Kushtetuese.

Ndërkohë, mbeten për t`u emëruar dhe 4 anëtarë të tjerë të kësaj gjykate. Dy emra do të përzgjidhen nga Presidenti dhe Kuvendi, ndërsa dy të tjerë do të emërohen nga Gjykata e Lartë, pasi ajo të jetë funksionale. Sipas ligjit për Gjykatën Kushtetuese, trupa e kësaj gjykate përbëhet nga 9 anëtarë, ku 3 i zgjedhë Presidenti, 3 Kuvendi dhe 3 Gjykata e Lartë. Megjithatë, për funksionimin e kësaj gjykate do të duhet të zgjidhet dhe të paktën një anëtar.

Pasi Këshilli i Legjislacionit në Kuvend verifikoi dhe konfirmoi procedurën për përzgjedhjen e anëtarëve të rinj të Gjykatës Kushtetuese, drejtuesi i seancës Gramoz Ruçi vendosi të bënte një pushim të shkurtër përpara se të procedohej me votimin. Pas pushimit, Ruçi vijoi direkt me votimin, që u bë në mënyrë elektronike. Të dyja kandidatet për Kushtetuesen, Elsa Toska dhe Fiona Papajorgji, morën përkatësisht nga 105 vota pro, 2 kundër në rastin e parë dhe 3 në të dytin. Por pavarësisht kësaj, ky votim tregoi se votat e opozita e re ishte e unifikuar në qëndrimin e saj duke mbështetur ngritjen e kushtetueses.

Pas votimit në Kuvend për dy anëtaret e Gjykatës Kushtetuese, reagoi presidenca. Zëdhënësi për mediat i Presidentit, Tedi Blushi reagoi në rrjetet sociale, duke shkruar: “Asgjë e re nga fronti i Ramaformës! Presidenti Meta vazhdon vizitën në Paris dhe kur të kthehet në Shqipëri do të ndajë vlerësimet e tij me qytetarët shqiptarë”, shkruan Blushi.

Megjithatë, deri në votimin e dy kandidateve në dy listat që KED i kishte dërguar Kuvendit për Gjykatën Kushtetuese, seanca është shoqëruar me debate. Kryetarja e grupit Parlalmentar të Djathtë, Rudina Hajdari kërkoi dialog mes presidentit dhe Kuvendit, pasi sipas saj procedura ka boshllëqe.

“Presidenti dhe palët të gjejnë gjuhën e përbashkët. Nëse ka ndonjë kandidaturë të dalë dhe ta sjellë. Duhet të ketë një përzgjedhje nga secili institucion. E gjithë procedura ka boshllëqe. Nëse duam ta kapërcejmë këtë konflikt do ishte mirë ta ndërpresim seancën dhe ta diskutojmë më presidentin. Unë mendoj që të gjitha palët kanë faj dhe po i bëjnë hile njëri tjetrit. Pas kësaj seance do jetë përcaktuese mënyra si do ngrihet Gjykata Kushtetuese”, u shpreh Hajdari.

Ndërkohë, më herët gjatë ditës, Ilir Meta i bëri thirrje Kuvendit që të zgjidhte vetëm një anëtar për Gjykatën Kushtetuese, me argumentin se vetëm kështu respektohet procedura. Gjithashtu, Meta tha se nëse Kuvendi do të vepronte sipas këtij rregullit, Presidenti do të shprehej brenda 24 orëve për zgjedhjen e anëtarit të dytë Gjykatës Kushtetueses për vakancën që plotësohet nga Presidenti.

Kujtojmë se Elsa Toska dhe Fiona Papajorgji, ishin dy kandidatet e vetme që Kuvendit i kishin mbetur për të zgjedhur, pasi në listat e paraqitura bënin pjesë dhe emrat e Besnik Muçit dhe Arta Vorpsit, që më herët u zgjodhën anëtar të Kushtetues nga Presidenti dhe KED. /Realstory.al/

BALLA: PRESIDENTI KA HALL TË ÇOJË NË KUSHTETUESE BASHKËJETUESEN E ALIBEAJT

META SULMON KED, PËRPLASET PËR KUSHTETUESEN

PS I PËRGJIGJET METËS: DO TË MBASH PENG NGRITJEN E KUSHTETUESES PËR NJË VIT

PS i përgjigjet Metës: Do të mbash peng ngritjen e kushtetueses për një vit

Nga foltorja e Kuvendit, deputeti socialist dhe kryetari i Komisionit të Ligjeve, Ulsi Manja, e quajti tentativën e Ilir Metës për të bllokuar ngritjen e Gjykatës Kushtetuese, si konflikt të pastër politik. Manja foli të hënën gjatë seancës parlamentare, duke u shprehur se “Presidenti e lexon Kushtetutën politikisht e jo si garant i saj”. Ndaj, Manja i kërkoi Metës të çlirohet nga konflikti dhe të bashkëpunojë për të plotësuar vakancat e Kushtetueses.

“Sot është momenti të dëshmojmë seriozitetin e vullnetin politik për ta bërë funksionale kushtetuesen. Duhet të bëjmë detyrën tonë, kandidatët që na ofrohen për votim janë dy zonja që i bëjnë nder gjykatës Kushtetuese. Kemi një debat me Presidentin, si përherë na paraqetitet si debat kushtetues po në thelb është konfliktik i pastër politik, që kur Presidenti e lexon kushtetutën politikisht e jo si garant i saj. Në rastin e kushtetueses duhet të çlirohet nga mentaliteti i konfliktit politik dhe të bashkëpunojë për plotësimin e vakancave në Gjykatën Kushtetuese”, tha Manja.

Më tej, deputeti socialist, dha dhe arsyet e vërteta pse, sipas tij, Meta po bllokon ngritjen e Gjykatës Kushtetuese. “Doja t’i bëja një pyetje presidentit: E supozojmë se do të zbatojmë radhën. Të parin e ka dekretuar presidenti, të dytin po e votojmë ne sot, radha nuk i shkon presidentit për të tretin, e ka Gjykata e Lartë por që nuk e voton dot. Atëherë çfarë do bëjmë sipas presidentit do bllokojmë Gjykatën Kushtetuese dhe për një vit? Arsyetimi i presidentit nuk është dashamirë por dashakeq. Është momenti që këto dy zonja që do t’i votojmë pak më vonë, t`i mbështesim”, tha Manja.

Të dielën, Presidenti publikoi letrën e plotë, ku argumentonte pezullimin e procesit të zgjedhjes së anëtarit të dytë të Gjykatës Kushtetuese. Meta citonte disa herë faktin që sipas Kushtetutës është përcaktuar se plotësimi i vakancave bëhet sipas radhës, President, Kuvend dhe Gjykatë e Lartë. Në kushtet kur mungon Gjykata e Lartë, gjasat janë që Ilir Meta do e përdorte si alibi për të bllokuar Gjykatën Kushtetuese.

Pra, nëse Kuvendi do të votonte vetëm një anëtar të hënën, duke ndjekur procedurën e sipërpërmendur, alibia e Metës për të kundërshtuar më pas zgjedhjen e anëtarit të dytë prej tij do të forcohej, pasi radha, pas Kuvendit, do të ishte e Gjykatës së Lartë, dhe jo e presidentit. Atë që Ulsi Manja e tha sot, Realstory.al e paralajmëroi të dielën, bllokimi i Gjykatës Kushtetuese nga Presidenti duket i paramenduar. /Realstory.al/

KUSHTETUESJA, META AKUZON KED. POR A KISHTE PARASHIKUAR BLLOKIMIN?