Tag: meta

Meta takon Lajçak: Urgjente zgjidhja e krizës politike dhe institucionale

Presidenti i Republikës Ilir Meta priti në takim Kryesuesin e OSBE-së, Miroslav Lajçak, njëherësh edhe Ministri për Europën dhe Punët e Jashtme të Sllovakisë. Meta vlerësoi vëmendjen që Kryesia sllovake i ka kushtuar rajonit të Ballkanit Perëndimor dhe mbështetjes së kandidaturës shqiptare për kryesimin e Organizatës gjatë 2020-s.

“Në këtë sipërmarrje, Shqipëria do të mbështetet në ekspertizën e Sekretariatit të OSBE-së dhe të vendeve partnere, duke siguruar vazhdimësinë e prioriteteve me kryesitë e mëparshme, përfshirë dhe Sllovakinë”, – u shpreh Presidenti Meta.

Kreu i Shtetit inkurajoi gjithashtu forcimin e marrëdhënieve dypalëshe mes Shqipërisë dhe Sllovakisë, përfshirë bashkëpunimin edhe më të madh në kuadër të Grupit të Vishegradit.

Duke u ndalur në Kryesinë shqiptare të OSBE për vitin e ardhshëm, Presidenti Meta theksoi se kjo është një përgjegjësi shumë e madhe që kërkon përkushtim tejet serioz edhe për vetë ndikimin që ka për imazhin e vendit.

“Është e domosdoshme që gjatë kryesisë së OSBE-së, Shqipëria të reflektojë vlerat e mirëfillta të demokracisë, të shtetit ligjor dhe të respektimit të lirive themelore, duke mishëruar denjësisht imazhin e Organizatës”, – theksoi Presidenti Meta.

Në këtë kontekst, Kreu i Shtetit evidentoi domosdoshmërinë e zgjidhjes urgjente të krizës së thellë kushtetuese, institucionale, politike dhe përfaqësuese ku ndodhet vendi, përmes reflektimit dhe dialogut.

Tërmeti në Korçë, reagon Meta: Të merren masa, vëmendje për banorët e prekur

Presidenti i Republikës, Ilir Meta ka reaguar duke shprehur shqetësimin e tij për situatën e krijuar në Korçë dhe në fshatrat përreth që u prekën në tërmetet e natës së të premtes.

“Presidenti Meta u bën thirrje dhe nxit të gjitha autoritetet qendrore dhe lokale, që të ndjekin me shumë vëmendje dhe të analizojnë me përgjegjësi këto pasoja, si dhe të marrin masa të menjëhershme në plotësimin e nevojave emergjente të banorëve të prekur nga kjo fatkeqësi natyrore duke u garantuar shërbim shëndetësor, pajisje me ushqim e ujë të pijshëm dhe sistemimin në ambiente të përshtatshme strehimi. Presidenti Meta u uron shërim të shpejtë qytetarëve të lënduar”, njofton presidenca.

6 tërmete, më i forti me magnitudë 5.3 prekën gjatë natës Korçen dhe fshtrat përreth, duke shkaktuar dëmtime në rreth 70 banesa, shumica të pabanuara dhe duke lënduar 4 qytetarë të cilët ndodhen jashtë rrezikut për jetën.

Meta ankohet, por KLD e tij, fajtore për vonesat

KLGJ ka dorëzuar në Kuvend raportin për veprimtarinë e Këshillit të Lartë të Drejtësisë gjatë vitit 2017 kur drejtohej nga presidenti, Ilir Meta. Në raport thuhet se nën drejtimin e Metës KLD nuk ka vlerësuar profesionalisht gjyqtarët.

Vitin e kaluar ish-KLD ka vlerësuar vetëm 2 gjyqtarë, një numër shumë i ulët. “Neni 171, pika 1 e ligjit nr. 96/2016, parashikon se KLD duhet të përfundonte vlerësimin e gjyqtarëve të Shkallës së Parë dhe të Apelit për periudhën 2007- 2012, bazuar në rregullat ekzistuese para hyrjes në fuqi të këtij ligji. Procesi i vlerësimit të gjyqtarëve mbeti vetëm në fazën fillestare. Aktualisht ka përfunduar vlerësimi vetëm për periudhën 2007-2009, ndërkohë që nga kjo periudhë e deri më sot kanë hyrë në sistem breza të tërë magjistratësh, të cilët nuk kanë asnjë vlerësim profesional të veprimtarisë së tyre. Nga dokumentacioni që ndodhet pranë institucionit, konstatohet se ka përfunduar vlerësimi profesional dhe etik vetëm për 2 gjyqtarë gjatë vitit 2018”, thuhet në raport.

Në raport pasqyrohet numri i kërkesave të ardhura nga Ministria e Drejtësisë në ish-KLD për të marrë masa ndaj gjyqtarëve të kapur me shkelje, por këto kërkesa thuhet se janë anashkaluar. Ish-KLD është mjaftuar me masa shumë të lehta vetëm për 4 gjyqtarë. “Janë shqyrtuar kërkesat e ardhura përgjatë vitit 2017 dhe vitit 2018 nga ministri i Drejtësisë për procedim disiplinor ndaj gjyqtarëve, dhe konkretisht janë marrë në shqyrtim dhe kanë përfunduar 16 procedime disiplinore për 16 gjyqtarë, me rezultatet e mëposhtme: 12 gjyqtarë rrëzohet kërkesa e MD dhe nuk propozohet masë tjetër; 3 gjyqtarë “Vërejtje publike”;1 gjyqtar “Vërejtje konfidenciale”, theksohet në raport.

Në raport gjithashtu bëhet e ditur se pavarësisht vakancave KLD ka transferuar vetëm një numër të vogël gjyqtarësh, duke krijuar probleme në sistemin e Drejtësisë.

Vizita, Stoltenberg shton takimin me Metën

Vetëm pak orë para protestës së të dielës të opozitës, në Tiranë do të vijë Sekretari i Përgjithshëm i NATO-s, Jens Stoltenberg.

Gjatë të enjtes u raportua se Stoltenberg do të zhvillonte një takim me kryeministrin, Edi Rama, për të udhëtuar më pas drejt Maqedonisë së Veriut, por sot mësohet se ai do të zhvillojë një takim edhe me Presidentin e vendit, Ilir Metën.

Kriza politike në vend mësohet se do të jetë në qendër të bisedimeve mes Stoltenberg dhe krerëve më të lartë të shtetit. Pritet që ai të japë mesazhe të qarta për palët në Shqipëri.

Faktori ndërkombëtarë prej kohësh ka bërë thirrje që opozita dhe qeveria të gjejnë gjuhën e dialogut në mënyrë që t’i japin fund krizës politike në vend.

Por mbërritja e Stoltenberg dhe konferenca për shtyp vetëm tre orë para protestës pritet të lëshojnë një mesazh të qartë atyre që do mblidhen pak orë më pas në bulevard, se një vend i NATO-s nuk mund të tolerojë lojërat me trazirat  dhe stabilitetin, duke kërcënuar proceset zgjedhore.

Zyrtarë dytësorë USA në Tiranë. Vizitë rutinë, jo lidhje me krizën

Një delegacion me punonjës dhe staf të Kongresit Amerikan ka mbërritur në Tiranë të martën si pjesë e vizitës së tij rutinore vjetore faktmbledhëse në Ballkan.

Delegacioni përbëhet nga staf që punon për Senatorë e Kongresmenë Amerikanë, si dhe të Këshillit të Atlantikut me qendër në Uashington DC, të kryesuar nga Damon Wilson. Delegacioni është takuar të martën në mëngjes me presidentin Ilir Meta. Zyra e shtypit e Presidencës njofton se Meta e ka njohur delegacionin me përpjekjet e Shqipërisë për integrimin në BE.

“Zhvillimet e brendshme politike, zgjidhja sa më e shpejtë e krizës aktuale dhe nevoja për reflektim të menjëhershëm, zbatimi e implementimi i reformës në drejtësi mbështetur në shinat kushtetuese, hedhja e hapave të nevojshme drejt integrimit në BE dhe roli i rëndësishëm i Shqipërisë në rajon si faktor kyç për stabilitetin, ishin temat kryesore të diskutimit”, sipas Presidencës.

Ndërkaq delegacioni i kongresmenëve po zhvillon në takim në zyrën e kryeministrit Rama dhe më vonë në orën 11:15 do zhvillojë një takim me kryetarin e Kuvendit Gramoz Ruçi. Ndërsa në orën tre do ketë takim me kreun e opozitës Lulzim Basha.

Delegacioni amerikan ne takim me presidentin Meta

Soreca, Metës: Reforma në Drejtësi, e pakthyeshme

Ndryshe nga sa tha presidenti Meta dy ditë më parë, Ambasadori i BE-së në Tiranë, Luigi Soreca është shprehur sot se Reforma në Drejtësi në Shqipëri është bërë në përputhje me Kushtetutën dhe po jep rezultatet e para. Ai ka thënë se kjo reformë ka hyrë në një rrugë të pakthyeshme dhe që duhet të mbështetet nga të gjithë politikanët. Soreca gjithashtu u shpreh sot në Konferencën për  Monitorimin e Integritetit Gjyqësor se shumica e shqiptarëve janë pro reformës dhe presin rezultate konkrete prej saj.

“Reforma në drejtësi i ka dhënë një shtysë të re pjesëmarrjes së shoqërisë civile që jo vetëm monitoron sistemin, po janë aktorë të vetë sistemit. Ibrahimi dhe Llagami janë shembulli kryesorë, psai janë në krye të dy këshillave. Kjo reforma ka bërë një ndryshim të madh për sistemin e drejtësisë. Mesazhi im kyc sot është që t’u inkurajoj që të jeni pjesë aktive e sistemit të drejtësisë, është i juaji dhe përgjegjësia juaj për ta përforcuar. Dje në rastin e përvjetorit të vdekjes së Falcone-s citova një mesazh të të tij ‘një botë më e mirë nuk është thjeshtë ëndërr, por përgjegjësia e të gjithë neve’. BE-ja është partneri juaj kryesor dhe si BE bëjmë të pamundurën që të keni të gjitha burimet e mjaftueshme financiare. Ne do të vijojmë që të japin mbështetjen tonë si partneritet në sistemin e drejtësisë. Kjo do të jetë një fushë kyce për mbështetjen tonë duke  menduar krerët 23 dhe 24 për integrimin. Shoqëria Civile është pjesë kyce e imunitetit të trupës gjyqësore. Sistemi do të duhet që të mbrohet, kjo punë na përket të gjithëve ne.

Çdo qytetar të refuzojë që të japë apo marrë ryshfet. Shumica e shqiptarëve janë për reformën dhe duan të shihin rezultatet. Është arritur një përparim i madh përsa i përket integritetit si në vlerësimin e prokurorëve dhe gjyqtarëve. Reforma e drejtësisë është zbatuar në përputhshmëri të plotë me Kushtetutën dhe legjislacionin, reforma po ecën përpara dhe është e pakthyeshme, të gjitha institucionet shqiptare duhet ta mbështesin atë. KE do të publikojë pas pak ditësh raportin e progresit, do të shikojmë atë që është bërë dhe atë që duhet bërë. Do të shikojmë edhe tranzicionin. Ne nuk duhet të harrojmë çmimin dhe koston që paguhet dhe do të kishim paguar pa këtë reformë. Reforma në drejtësi dhe integrimi është përparësi për çdo politikan, arsyeja për t’u bashkuar dhe jo për t’u ndarë” tha ambasadori i BE-së, Soreca.

Dy ditë më parë Presidenti Ilir Meta kritikoi misionin e BE-së, Euralius që është marrë me hartimin e reformës në drejtësi duke thënë se kjo reformë nuk është europiane dhe nuk është as e suksesshme.

Sulmi ndaj drejtësisë, Ngjela: Meta ka humbur arsyen nga frika e SPAK

“Ilir Meta ka humbur arsyen nga frika e SPAK”. Kështu i komenton avokati Spartak Ngjela kritikat e presidentit Ilir Meta drejtuar Euralius dhe Reformës në Drejtësi.  Sipas Ngjelës, Meta është i trembur nga reforma në drejtësi pasi ai do të ndëshkohet për aferat e kryera.

“Këta sa më shumë i afrohen goditjes penale që do t’ju vijë nga reforma në drejtësi, aq më shumë bëhet vrer zemra e tyre. Janë të shqetësuar. Problemi i të provuarit në jurisprudencë me dëshminë ka një aksiomë: i dëshpëruari, i tremburi dhe idioti nuk merren për dëshmitarë sepse nuk mund të dëshmojnë të vërtetën. Edhe këta tani futen tek ata dy të parët, të dëshpëruar dhe të trembur. Krijohet një lidhje, një koneksion midis të tremburit dhe të dëshpëruarit sepse frika të çon në dëshpërim, dëshpërimi çon në frikë dhe kjo pastaj të humb arsyen. Meta ka humbur arsyen sepse nuk mundesh ti të godasësh as OSBE, as Uashingtonin dhe as ndërkombëtarët në tërësi. Ata kanë marrë përsipër reformën në drejtësi, kë kap reforma në drejtësi nuk është përgjegjësia e tyre, por e atyre që nuk kanë ditur të drejtojnë, por janë korruptuar. Kështu që kot të merresh me ta”, është shprehur Ngjela për gazetën “Sot”.

Sipas Ngjelës, Ilir Meta ka harruar se është kryetar shteti dhe ka nisur të bëjë opozitë. “Ne duhet të shikojmë ecurinë e shpejtë të reformës në drejtësi sepse Meta flet mbi pozitën e kreut të shtetit prandaj gabon rëndë. Sepse ke edhe këta të tjerët nga ana tjetër, të gjithë kështu flasin, por këtyre nuk iu rëndon shumë sepse ata janë opozitarë. Të trembur janë të gjithë dhe Meta duket sikur po bën opozitë me demokracinë ndërkombëtare”, u shpreh Spartak Ngjela.

Dy ditë më parë, Presidenti Ilir Meta kritikoi reformën në drejtësi duke thënë se nuk është e suksesshme, ndërsa për misionin ndërkombëtar Euralius tha se merr urdhëra politikë.

Pse s’është Monika, nuk funksionon parlamenti?! Balla reagon ndaj Metës

Një ditë më parë, presidenti Ilir Meta u shpreh se parlamenti është jofunksional, por përgjigjen e ka marrë sot nga kreu i grupit parlamentar të PS, Taulant Balla. Në fjalën e mbajtur në parlament, Balla u shpreh se megjithëse mungon Monika, në vend të saj në parlament është Ralfi, kështu që s’mund të thuhet se parlamenti është jofunksional. Ai gjithashtu i bëri thirrje opozitës që të ulen në tryezën e dialogut.

“Më vjen keq e më duhet ta them që Presidenti e rendit veten në krah të atyre që mendojnë se reforma nuk ka ecur sic duhet edhe pse nuk ka një partner sot që nuk e vlerëson. Parlamenti sipas Presidentit nuk qenka funksional. Po pse? Sepse nuk është Monika dhe është Ralfi? Realisht dua t’jua them le ta shfrytëzojmë këtë kohë të mbetur, të punojmë për Shqipërinë europiane”, u shpreh Balla.

Meta, pas drejtësisë, sulm ambasadorit Soreca

Pas kritikave të djeshme drejtuar Euralius dhe Reformës në Drejtësi, presidenti Meta sot ka sulmuar ambasadorin e BE-së, Luigi Soreca, ndërsa ka thumbuar në distancë edhe kryeministrin Rama. Përmes zëdhënësit për shtyp, Meta i sugjeron Ramës të vazhdojë të këndojë “na fitorja në fitore”.

Gazetarët kanë pyetur sot zëdhënësin e Metës, Tedi Blushi në lidhje me qëndrimet e shprehura dje nga ambasadori i BE dhe kryeministri Rama për reformën në drejtësi. Përgjigja e tij ishte kjo:

“Kam vetëm një qëndrim për të dy.

Presidenti i Republikës, jo vetëm i ka bërë të gjitha përpjekjet e mundshme deri tani, në mënyrë transparente e sistematike, të dokumentuar dhe informale, konstruktive e gjithëpërfshirëse, por edhe do të vazhdojë të bëjë çdo përpjekje për zbatimin kushtetues të reformës në drejtësi, për të evituar vonesat, kolapsin, zbatimin e njëanshëm e përçarës dhe kapjen e sistemit.

Presidenti nuk do të lodhet edhe në të ardhmen, si detyrim ndaj qytetarëve shqiptarë, të punojë në këtë frymë.

Ndërkohë Presidenti nuk ndalon askënd, të këndojë “na fitorja në fitorje”, si në variantin solo, ashtu edhe në kor”, reagoi zëdhënësi i Metës.

Rama: Çfarë e pengon Metën të mbrojë zgjedhjet?

Pas kritikave të Metës për Reformën në Drejtësi por edhe për krizën politike në vend, ka ardhur reagimi i Ramës. Në dy mesazhe në twitter Rama pyet se çfarë e pengon Metën të mbrojë datën e zgjedhjeve të dekretuar prej tij, por që me këmbëngulje po kërkohet nga opozita të shtyhet. Rama shkruan se është ende në pritje të apelit të Presidentit për mbrojtjen e datës së zgjedhjeve, ndërsa referuar kritikave për Reformën në Drejtësi, ai bën thirrje që të tregohet i duruar, pasi çdo reformë kërkon kohën e saj.

“Padiskutim Presidenti ka të drejtë kur thotë djegia e mandateve është e papranueshme po dhe më i papranueshëm është përbetimi për të djegur zgjedhjet!S’e dimë opinionin e Presidentit për këtë dhe bashkë me kritikat e tij,mezi e presim apelin e vonuar në mbrojtje të 30 qershorit.

A e pengon mungesa e Gjykatës Kushtetuese Presidentin e Republikës të mbrojë datën e zgjedhjeve që sipas Kushtetutës ai e ka dekretuar? Falë Vetingut GJK është sot një djep bosh pa shejtanin brenda! Kjo është më shumë se gjysma e një pune të madhe që kërkon durimin e kohën e saj”, shkruan Rama.

Skip to toolbar