Meta sulmon “Drejtësinë” dhe kur flet për Bankat

Presidenti Meta nuk heziton të sulmojë Reformën në Drejtësi duke u shprehur se për shkak të mosfunksionimit të saj dhe gjyqësorit ka sjell dobësimin e ekonomisë. Duke folur në konferencë vjetore të Bankës së Shqipërisë, Meta shprehet i shqetësuar për efektshmërinë e bankave në lidhje me ekonomië duke ulur numrin e kredive gjatë 10-vjeçarit të fundit. Meta tha se kjo lidhet me dështimin e sundimit të ligjit në vendin dhe se përmirësimi saj do të sillte edhe një përmirësim në ekonomi.

“ Mbetet shqetësim se bankat në Shqipëri kanë efektivitet shumë të ulët në ekonomi. Ato japin kredi në përqindje shumë të ulët nga depozitat që disponojnë. Duke iu referuar vlerësimit të tyre nga BQE, vërehet se gjatë 10 viteve të fundit Shqipëria ka raportin më të ulët të kredisë ndaj depozitave dhe raportin më të ulët të arkëtuar të sistemit bankar ndaj PPB.

Sipas BQE një nga arsyet pse bankat kanë frenuar kreditimin në Shqipëri lidhet me dobësitë e sundimit të ligjit. Për këtë arsye një kthim dhe forcim në shinat e ligjshmërisë dhe funksionim të shtetit të së drejtës për funksionimin e plotë të gjyqësorit si dhe lufta ndaj korrupsionit do të sillte ndikim të mirë jo vetëm ndaj vendit, por edhe në efikasitetin e drejtpërdrejtë bankar mbi ekonominë shqiptare.” tha Meta

Sulmet ndaj Reformës në Drejtësi janë të shpeshta nga presidenti Meta, që sipas tij nuk po gjen zbatim dhe e konsideron atë kapur nga kryeministri Rama duke e quajtur dhe “Ramaformë”. Reforma në drejtësi është një ndër më të vlerësuar nga ndërkombëtarët që ka nisur me procesin e vettingut për pastrimin drejtësisë dhe shumë shpejt pritet ngritja e institucioneve të reja të drejtësisë për të hetuar krimin dhe korrupsionin në nivele të larta qeverisëse. Ngërçi në Gjykatën e Lartë dhe atë Kushtetuese ka ardhur pikërisht nga reformimi dhe spastrimi i drejtësisë nga prokurorët dhe gjykatësit e korruptuar dhe të kapur nga politika.

Metës i “flet Frojdi” para “Venecias”: Evitova një “21 janar” të dytë

Vetëm tre ditë para vendimit të Komisionit të Venecias për shkeljen e Kushtetutës nga Presidenti Meta, kreu i shtetit ka nisur një fushatë justifikimi mbi arsyet e marrjes së vendimit të anulimit të 30 qershorit. Gjatë një takimi me pedagogë dhe studentë në Universitetin Europian të Tiranës, Meta është rikthyer tek vendimi i tij për anulimin e zgjedhjeve të 30 qershorit, sipas së cilit nuk është një akt normal, por tha se e mori një vendim të tillë për të parandaluar një përplasje të mundshme civile që mund të përshkallëzohej dhe të përsëritej një 21 janar të dytë. (Ai në fakt shkaktoi të parin ne 2011, pas videoskandalit me Dritan Priftin). Që prej atij viti Meta, cdo 21 janar ka qënë jashtë shtetit, por të martën pasdite gjatë një bashkëbisedimi ne UET, i është kthyer kësaj date tragjike, në mënyrë “heroike” frojdiane.

“Nuk do ndaloj Komisionin e Venecias që të çmendet, jam i gatshëm t’i nënshtrohem çdo kontrolli mjekësor nëse mendoni se përdor doping. Unë jam shumë i qartë, Kushtetuta e Shqipërisë të drejtën ia jep Presidentit dhe askujt tjetër. Anulimi i zgjedhjeve nuk është një akt normal, se u konsultua presidenti me Partitë, por nga nëntori deri në 10 qershor, ju e dini që nuk ka qenë një situatë normale. E zhdekretova 30 qershorin për të parandaluar një përplasje të mundshme, që mund të përshkallëzohej më tej. Sepse në Shqipëri janë vrarë, duke filluar 2 prill i 1991 deri në 21 janar. Konfrontimi u evitua”, u justifikua Meta për vendimin për anulimin e 30 qershorit.

Madje, ai vazhdoi ligjeratën, duke i dhënë të drejtë vetes se evitimi i kësaj përplasje, pra respektivisht anulimi i 30 qershorit i jep shpresë sot shqiptarëve për hapjen e negociatave, ndërkohë që i gjithë faktori ndërkombëtar ka dënuar pikërisht krizën e shkaktuar, si faktor që mund të dëmtojë Shqipërinë në vendimin e pas 10 ditëve. “Nuk do të kishte sot një vendim apo një shpresë se mund të merret një autorizim ose një vendim për çeljen e negociatave. U detyrova që të zhdekretoja”, tha Meta.

Kreu i shtetit përsëriti sërish para studentëve dhe pedagogëve qëndrimin e tij se “zgjedhjet kanë qenë antikushtetuese, të paligjshme se asnjë gjykatë nuk ke ka rrëzuar dekretin e presidentit”. Por, në të vërtetë ai nuk përmendi faktin se dekreti i tij për anulimin e 30 qershorit është rrëzuar nga Kolegji Zgjedhor, i cili njohu procesin e nisur në atë kohë nga KQZ, por që tashmë pritet t’i vendosë vulën edhe Komisioni i Venecias, i cili në fakt, në raportin e publikuar para pak ditësh e ka rrëzuar dekretin e Metës, duke njohur edhe zgjedhjet e 30 qershorit. Para se të dilte ky raport, Presidenti kishte deklaruar se do të jepte dorëheqjen nëse raporti i Venecias ishte kundër tij, por që pas daljes së raportit, ai ndryshoi qëndrim. “Gjykata Kushtetuese mund të caktojë nëse kam bërë shkelje ose jo”, deklaroi Meta para studentëve duke mos dashur të largohet nga Presidenca, pavarësisht se mazhoranca ka nisur procedurën për shkarkimin e tij, ndërsa komisioni hetimor pritet të dalë në konkluzione deri në fund të nëntorit. Por vendimtar për Komisionin Hetimor do të jetë edhe opinioni i Komisionit të Venecias, i cili pritet të publikohet zyrtarisht më 11 tetor.

Tema: Rama mund Metën, 7 herë më shumë shikues

Kryeministri Edi Rama dhe Presidenti Ilir Meta kanë qenë të dy të ftuar në emisione televizive mbrëmjen e të enjtes. Kryeministri Rama ishte i ftuar në emisionin “Real Story” të gazetarit Sokol Balla në News 24 dhe Presidenti Meta ka qenë në “Opinion”

Transmetimet live janë dhënë edhe në faqen zyrtare të Kryeministrit dhe Presidentit në Facebook. Sipas faqes së tyre Edi Rama ka 3 200 shikues live, ndërsa Ilir Meta rreth 500 vetë live, rreth 7 herë më pak se Kryeministri. Në këtë rast nuk po flasim për statistikat e audiencës së dy emisioneve, por interesin rreth Ramës e Metës nga vetë publiku në faqet e tyre zyrtare.

“Venecia”, Rama injoron Metën: S’kam kohë të merrem me fatin e tij

Kryeministri Rama ka reaguar me indiferentizëm, gati-gati në injorim ndaj Metës, në lidhje me draftin paraprak të Komisionit të Venecias në të cilin u shkruajtë qartë “Meta ka tejkaluar kompetencat dhe ka shkelur Kushtetutën.” I ftohtë, i qetë dhe me një pozicion neutral, që në fakt duhet ta kishte presidenti Meta si “unifikues i popullit”, Rama tha se nuk ka asnjë koment për atë çështje dhe se kjo çështje i takon komisionit të posaçëm që është ngritur apostafat me ekspertë ligjor për të diskutuar shkeljet kushtetuese të Metës. Rama tha se nuk ka asnjë minutë kohë të humbas me fatin e Metës, dhe se aktualisht është i fokusuar të qëndrojë në shërbim të njerëzve.

“Nuk kam asnjë qëndrim për këtë sepse është një çështje që i takon komisionit të posaçëm dhe ka të gjithë kompetencën për të gjykuar mbi shkeljen e bërë dhe për të konstatuar peshën e kësaj shkelje. Është krijuar një komision që ka në përbërje njerëz të ligjit, që dinë të zbërthejnë të gjithë materien nga pikëpamja ligjore dhe ata do të na bëjnë ne sugjerimin e tyre si parlament dhe ne do të marrim vendimin tonë. Nuk kam asnjë minutë për t’u marrë me fatin e Ilir Metës. Mbrëmë u mora me fatin e një djali që gjendej në situatë dramatike që i mungonte një krevat special për sëmundjen e tij. Ilir Meta nuk ka asnjë problem shëndetësor dhe uroj të mos ketë kurrë, për problemet e tjera të Ilir Metës nuk kam asnjë interes, fare.” tha Rama në emisionin ‘Repolitix’ në Report TV

Megjithatë Rama foli për një pikë të draftit paraprak të Komisionit të Venecias, i cili tha se në atë pikë u vërtetua qëndrimi që ai kishte mbajtur më herët gjatë fushatës elektorale. Sipas Ramës, Komisioni i Venecias e tha qartë “e zeza mbi të bardhë” ashtu siç është shprehur edhe ai në mënyrë të vazhdueshme.

“Për mua tani është shumë e rëndësishme që Komisioni i Venecias është shprehur, sikur unë shprehja në mënyrë të përsëritur më pyesnit si do të bëhen zgjedhje me një parti dhe u thosha asnjë parti apo një grup nuk mund të marrin peng zgjedhjet. Këtë Venecia e ka thënë e zeza mbi të bardhë dhe nuk ka asnjë diskutim se shkuarja në zgjedhje ka qenë vendim i duhur dhe se zgjedhjet janë plotësisht legjitime” tha Rama

Më draftin e Venecias theksohej se bojkoti i partive politike nuk mund të parandalojë që të mbahen zgjedhje të rregullta, pasi në të kundërt këto parti do të fitonin të drejtën të pengonin çdo proces zgjedhor në të ardhmen. Kjo ishte edhe një nga deklaratat e përsërita të kryeministrit Rama gjatë fushatave elektorale, ku theksonte se pse në vend duhej të zhvilloheshin zgjedhjet.

Premtimi i Metës: Iki, nëse Venecia më gjen në shkelje

Komisioni i Venecias renditi disa shkelje të Presidentit Meta në lidhje me shkeljen e Kushtetutës për anulimin e zgjedhjeve të 30 qershorit. Vetë presidenti Meta u shpreh gjatë një interviste për Çim Pekën se nëse do të gjendeshin shkelje të Kushtetutës nga ana e tij, ai do të jepte dorëheqjen pa pritur fare vendimin e Kuvendit. Të premten pasdite RealStory.al siguroi draftin paraprak të Komisionit të Venecias, në të cilin renditeshin disa shkelje të Presidentit Meta për aktin e tij të çdrekretimit. Venecia e ka lënë shkarkimin në dorën e Kuvendit dhe Gjykatës Kushtetuese.

Megjithatë vetë Meta do e mbajë fjalën e tij? Ai bëri një deklaratë të fortë kur tha se nëse kapet në shkelje nga Venecias largohet nga detyra pa pritur fare vendimin e Kuvendit të Shqipërisë duke thënë se si “mund të rri unë në detyrë, nëse Venecia thotë se Presidenti ka shkelur Kushtetutën”, kur është pyetur në mënyrë të drejtpërdrejtë nëse do jepte dorëheqjen nëse Komisioni i Venecias e kapte në shkelje.

“Nëse Venecia thotë që Ilir Meta ka shkelur Kushtetutën, patjetër që do ta jap dorëheqjen. Unë kam dhënë dorëheqjen kur kam qenë kryeministër për një gjë që nuk kishte lidhje fare me mua. Të thotë Komisioni i Venecias që Presidenti ka shkelur Kushtetutën dhe unë të rri president? Kurrë në botë. Por kjo është qesharake, se thonë “ka çdekretuar”. Unë kam bërë një punë normale, kam çdekretuar dekretin që kam nxjerrë vetë. Ky është një dekret ekskluziv i Presidentit. Ti kujton se po rri unë në punë. Unë e ndjej veten se jam në mision. Siç e kanë shkelur 100 herë ata kushtetutën, unë jam i bindur se e kam respektuar Kushtetutën.

Gjithë këto PPP që po kalojnë do të marrin ndonjë gjë edhe ata për sa kohë heshtin. Unë do të vazhdoj të jem në politikë dhe të përfaqësoj njerëzit që besojnë tek unë.

Nëse shikoj që Komisioni i Venecias lobohet, do të iki përsëri. Unë kam shprehur respekt për Komisionit të Venecias. Unë i qëndroj të gjitha deklaratave që kam thënë më përpara. Jam i vendosur të mbrojë interesin kombëtar. Ia kam thënë Edi Ramës të parit”, tha Meta

Pyetja që ngrihet është e thjeshtë, a do ta mbajë fjalën presidenti Meta dhe të jap dorëheqjen? / Real Story

Meta mbytet në “Venecia”: Shkeli “pak” Kushtetutën

RealStory.al ka siguruar draftin paraprak të Komisioni të Venecias për hetimet që ka zhvilluar ndaj Presidentit Ilir Meta, në lidhje me Shkeljen e Kushtetutës. Në raportin paraprak Komisioni i Venecias cilëson se presidenti i ka tejkaluar kompetencat e tij duke shkelur Kushtetutën, pasi ai mund të anulojë zgjedhjet vendore në një situatë emergjente vetëm përmes një baze ligjore specifike ad-hoc – për të shtyrë zgjedhjet. Sipas Komisionit të Venecias anulimi i zgjedhjeve bëhet i mundur vetëm në situata që plotësojnë kërkesën për shpalljen e gjendjes së jashtëzakonshme. Në këtë rast, thuhet në raport, nuk u ndoqën as rregullat kushtetuese për situatat emergjente dhe as nuk kishte një konsensus politik, i cili do të lejonte krijimin e një baze ligjore ad-hoc.

“ Në përgjigje të kërkesës për një mendim nga Kryetari i Kuvendit të Shqipërisë, Komisioni i Venecias del në përfundimin, që në mungesë të një dispozite ligjore për këtë çështje, që Presidenti mund të anulojë zgjedhjet vetëm për organet e qeverisjes vendore në një situatë që plotëson kriteret për marrjen e masave emergjente. Edhe atëherë Presidentit i duhet një bazë ligjore specifike – ad-hoc – për të shtyrë zgjedhjet. Ky përfundim mbështetet nga rregulli i përgjithshëm interpretues, sipas të cilit rregullimi i shprehur i kompetencave të urgjencës në Kushtetutë dhe ligjet e kufizon përdorimin e çdo fuqie plotësuese të pashkruar të emergjencave në situata shumë të jashtëzakonshme; kryesisht për situata me pamundësi faktike ose juridike të cilat nuk parashikohen në mënyrë të qartë nga ligji i shkruar i urgjencës. Anulimi i zgjedhjeve është i mundur vetëm në situata që plotësojnë kërkesën për shpalljen e gjendjes së jashtëzakonshme. Sidoqoftë, rregullat e zbatueshme kushtetuese për situata emergjente nuk u ndoqën në këtë rast. As nuk kishte një konsensus politik, i cili do të lejonte krijimin e një baze ligjore ad-hoc.” thuhet në raportin e Venecias

Në raport theksohet edhe shkelja e presidentit Meta në lidhje me të drejtat elektorale të qytetareve duke shtyrë të drejtën e tyre për të vendosur dhe votuar. Në të është përcaktuar edhe bojkoti i partive politike që nuk mund të merret si një arsye e mjaftueshëm që të mos mbahen zgjedhje të rregullta, përndryshe këto parti do të krijonin të njëjtën situatë sa herë të dëshironin.

“Anulimi i zgjedhjeve gjithashtu prek të drejtat elektorale të njohura nga instrumentet ndërkombëtare të të drejtave të njeriut dhe thjesht aplikimi i “actus contrarius” parandalohet nga kërkesa e proporcionalitetit të çdo ndërhyrje. Bojkoti zgjedhor nga partitë politike, edhe nëse ato përfaqësojnë një pjesë të rëndësishme të elektoratit nuk mund të parandalojë që të bëhen zgjedhje të rregullta. Përndryshe, këto parti do të merrnin levën për të parandaluar plotësisht çdo zgjedhje.” shkruhet në raport.

Në shkeljen e radhës thuhet se Presidenti tejkaloi kompetencat e tij sipas Kushtetutës duke anuluar së pari dhe më pas duke shtyrë zgjedhjet lokale. Por për këtë Komisioni i Venecias deklaron se do të jetë Gjykata Kushtetuese ajo që do të vendos nëse ka ‘shkelje serioze” që do të fajësonin presidentin për shkarkimin e tij.

“Presidenti tejkaloi kompetencat e tij sipas Kushtetutës duke anuluar së pari, duke shtyrë më pas zgjedhjet lokale. Është detyrë e Gjykatës Kushtetuese të përcaktojë nëse kjo ka të bëjë me “shkelje serioze”, të cilat do të lejonin një fajësim të Presidentit.”

Megjithatë në raportin e Komisionit të Venecias thuhet se pavarësisht këtyre shkeljeve dhe tejkalimit të kompetencave të tij rekomandohet që Presidenti të mos shkarkohet. Madje Komisioni rekomandon se edhe nëse konstatohet serioziteti i këtyre shkeljeve kjo nuk duhet të çojë në shkarkim të presidentit në mënyrë që të ruhen ekuilibrat dhe parimi “check and balance”.

“Të marra së bashku, të gjithë këta elementë çojnë në përfundimin, që megjithëse Presidenti tejkaloi kompetencat e tij kushtetuese duke anuluar dhe shtyrë zgjedhjet lokale përtej mandatit zgjedhor të autoriteteve lokale, pa një bazë të veçantë ligjore. Sidoqoftë, elementet e paraqitura më lart mund të çojnë në përfundimin se këto akte nuk mund të kenë qenë të një natyre serioze të mjaftueshme për të garantuar një shkarkim të Presidentit. Më në fund, edhe nëse u konstatua serioziteti i shkeljeve, kjo nuk duhet domosdoshmërish të çojë në një fajësim të Presidentit, duke marrë parasysh fuqinë e Sesionit Plenar të Kuvendit për të marrë parasysh qëllimet kushtetuese, siç janë kontrollet dhe ekuilibrat.” mbyllet raporti i Komisionit të Venecias.

Edhe pse Komisioni shprehet për ruajtjen e balancave qeverisëse, në fakt vëren se Presidenti ka shkelur Kushtetutën me disa pika të saj. Komisioni i Venecias e ka lënë në dorë të Kuvendit dhe Gjykatës Kushtetuese shkarkimin e tij. Më herët Meta, gjatë një interviste për Çim Pekën në Syri.net u shpreh se do të japë dorëheqjen nëse ekspertët e Komisionit të Venecias rekomandojnë shkarkimin e tij, pa pritur fare vendimin e Kuvendit të Shqipërisë. “Nëse rekomandimi i Venecias është për shkarkimin tim, patjetër do jap dorëheqjen. Të thotë Venecia që e kam shkelur Kushtetutën dhe unë të rri President, kjo nuk ndodh.” është shprehur Meta. Pas gjithë shkeljeve që renditi Komisioni i Venecias, A do të jap dorëheqjen presidenti Ilir Meta?

Gjermania “Po” Shqipërisë, Meta kundër: Urime Maqedonisë së Veriut

Ilir Meta thyen heshtjen për negociatat. Presidenti shkroi katër fjali në Facebook për “PO-në” e Gjermanisë për hapjen e negociatave. “Falenderim i veçantë Bundestagut, veçanërisht grupit CDU-CSU për angazhimin e tyre serioz në mbështetje të integrimit të Shqipërisë! Tani urgjent të punohet për zgjidhjen e shpejtë të krizës së rëndë politike dhe plotësimin e 9 kritereve të qarta! Po të ishin dëgjuar këshillat e tyre në kohë, sot do të kishim marrë një vendim pa kushte ashtu si Maqedonia e Veriut. Reflektim serioz për t’i dhënë Shqipërisë një mundësi reale, jo imagjinare! Urime Maqedonisë së Veriut”, shkruan Ilir Meta në rrjetin social Facebook.

Kreu i shtetit habit me shkrimin e tij, pasi uron vetëm Maqedoninë e Veriut dhe “kritikon” Shqipërinë. Në fakt, vendimi i të enjtes i Bundestagut ishte i pritshëm. Të martën më 24 shtator, CDU/CSU, kaluan në grupin e tyre parlamentar Rezolutën që rekomandonte hapjen e negociatave të Shqipërisë me BE. Të gjithë reaguan, përfshi dhe Lulzim Bashën, që shprehu “mirënjohjen” ndaj ligjvënësve të CDU/CSU për votën “Pro” negociatave të Shqipërisë me BE. I vetmi që nuk reagoi ishte kreu i shtetit, që mesa duket ishte ende skeptik, dhe vota e 395 deputetëve gjermanë e “bindi” dhe atë, se në 18 tetor, Shqipëria do të marrë “po” nga BE.

Ilir, po negociatat do hapen?

Metës i del fjala, tërmeti apokaliptik trondit Shqipërinë. Tërmeti i frikshëm që përfshiu vendin me intensitet 7.5 ballë përveç dëme materiale shkaktoi një panik të madh tek banorët, të cilët dolën të gjithë jashtë banesave të tyre. Me qetësimin e situatës, gjëja e parë që të gjithëve u shkon në mendje janë parashikimet e presidentit Meta për rënien e tërmeteve apokaliptike.

Pak muaj më parë, Presidenti i vendit Ilir Meta paralajmëroi se vendet e Ballkanit pritet të goditet nga një tërmet apokaliptik. Ai apeloi ndaj institucioneve përkatëse që të marrin masa paraprake duke shkaktuar humor jo vetëm tek institucionet por edhe qytetarëve, pasi tërmetet, siç dihet edhe nga shkencëtarët dhe ekspertët e fushës, nuk mund të parashikohen.

Si duket presidenti Meta ka aftësi parashikuese (ose ndihmohet nga filxhani i Monës), pasi të gjithë i janë drejtuar përmes memeve se “kreu i shtetin na i tha por ne nuk e besuam”. Nëse Meta ka aftësi të parashikojë gjëra, një pyetje kemi, Po negociatat do të hapen zoti President më 18 tetor?

Meta sulmon Reformën në Drejtësi për gjykatat që i boshatisi Vettingu. Ja e vërteta

Presidenti Meta i është kthyer sërish reformës në drejtësi ndërsa ka shprehur shqetësim për mos funksionimin e Gjykatës së Lartë dhe asaj Kushtetuese, duke theksuar se po shkelen të drejtat themelore të qytetarëve. Ndërsa SHBA-të e vlerësojnë ecurinë e reformës në drejtësi, presidenti vijon ta sulmojë hapur atë.

“Të drejtat themelore të qytetarëve shqiptarë për të patur një shqyrtim gjyqësor brenda një afati të arsyeshëm dhe nga një gjykatë e caktuar me ligj, po cenohen haptazi nga grumbullimi i çështjeve të mbartura në Gjykatën e Lartë, për të cilat askush sot nuk mban përgjegjësi publike dhe askush nuk mundet t’u thotë qytetarëve se kur do të përfundojë shqyrtimi i tyre.

Sot askush nuk mban përgjegjësi publike edhe pse vendi nuk ka ende Gjykatë Kushtetuese, ku dosjet që presin radhën për shqyrtim janë bërë pirg!

Reforma u bë për qytetarët dhe funksionimi i sistemit të drejtësisë duhet t’i shërbejë vetëm qytetarëve.

Duhen marrë të gjitha masat që të garantohet sa më shpejt për qytetarët akses i plotë në të gjitha shkallët e gjyqësorit, dhe brenda një afati të arsyeshëm, si dhe të garantohen të drejtat dhe liritë themelore të shtetasve që të mos cënohen nga mosfunksionimi i Gjykatës së Lartë”, shkruan Meta i cili fton qyetarët të lexojnë një raport të INFOÇIP, një organizatë që monitoron çështjet transparencës së institucioneve. Në raportin e saj INFOÇIP ka bërë një llogaritje duke thënë se 30 mijë dosje që janë për t’u shqyrtuar në gjykatën e lartë do të duhen 20 vite për të dhënë vendime.

Por si qëndron e vërteta e boshatisjes së gjykatave? E vërteta të cilën presidenti nuk e thotë deri në fund është se emërimet politike, të pakualifikuara dhe të njëanshme në Gjykatën e Lartë të bërë nga Partia Demokratike, nga viti 2008 deri në vitin 2013 (pas vitit 2009 në bashkëpunim me Lëvizjen Socialiste për Integrim) bënë që shumica e gjyqtarëve “të këputen” në vetting. Por kishte dhe nga ata gjyqtarë që dhanë dorëheqjen vetëm e vetëm që t’i shpëtonin vettingut, duke e njohur mirë veten e tyre, parapëlqyen t’i jepnin fund karrierës sesa të kalonin në sitën e vettingut. Ndërsa presidenti kërkoi që këto gjykata të plotësohen me të tjerë gjyqtarë të cilët sërish u rrëzuan në vetting, ndryshe nga sa kërkon faktori ndërkombëtar. Kushti është që gjyqtarët që kandidojnë për Gjykatën e Lartë dhe atë Kushtetuese të kenë kaluar sitën e vettingut dhe të mos kenë asnjë ndikim politik. Të dyja gjykatat pritet të ngrihen shumë shpejt në muajt në vijim. Por duket se kjo s’do ta qetësojë aspak presidentin, i cili është në prag shkarkimi dhe vulën e fundit do ta vendosë Gjykata e re Kushtetuese./reasltory.al

141 ditë në avion, Meta harxhon mbi 1 mijë euro dita

Presidenti Ilir Meta ka qëndruar 141 ditë në udhëtime jashtë shtetit ndërsa shuma që ai ka harxhuar me bileta avioni, dieta dhe qëndrime nëpër hotele i kalon 91 mijë euro.

Shifrat janë bërë publike nga vetë institucioni i presidencës duke iu përgjigjur në këtë mënyrë interesimit të mediave. Por shifrat janë dhënë vetëm për lëvizjet e presidentit dhe jo për stafin e tij. Si rregull presidenti në asnjë vizitë nuk udhëton vetëm, por ka një staf të gjerë, këshilltarësh, shoferësh, ndihmësish, e bodyguardësh që e shoqërojnë ndaj dhe shifra e dhënë nga presidenca është gjysmake dhe mendohet se harxhimet e Metës janë disa fish më të mëdha.

Presidenca njofton se Meta që nga marrja e detyrës në 24 korrik 2017, deri në gusht të vitit 2019 ka realizuar: 59 vizita shtetërore, zyrtare dhe pune jashtë vendit, nga të cilat 36 prej tyre me avion.

“Nga 36 udhëtimet me avion, Presidenti Meta nuk ka udhëtuar asnjëherë me First Class apo Charter.

Presidenti ka udhëtuar kryesisht me Business Class (26 udhëtime), por edhe me Economic Class (10 udhëtime), vlera e të cilave në vite është si më poshtë:

Për vitin 2017: 7156 euro (bileta avioni)

Për vitin 2018: 24384 euro (bileta avioni)

Për vitin 2019: 24217 euro (bileta avioni)

Udhëtimi kryesisht në Business Class është zgjedhur si mundësi për udhëtim të sigurtë, që garanton fleksibilitetin e ndryshimeve të itinerareve të udhëtimit për shkak të axhendës, pa paguar kosto shtesë, si dhe ka garanci të plotë në transferimin e bagazheve.

Gjatë viteve 2017, 2018 dhe 2019, Presidenti i Republikës ka qëndruar në total 141 ditë jashtë vendit.

Vlera totale e trajtimit financiar me dietë të përfituara për 141 ditët e qëndrimit jashtë vendit ka qenë në vlerat: 12600 euro dhe 4260 USD.

Nga 59 vizita shtetërore, zyrtare dhe pune që Presidenti i Republikës ka realizuar jashtë vendit, vlera totale e shpenzuar për akomodimin në hotel jashtë vendit nga buxheti i Institucionit të Presidentit është në vlerën 19322 euro”, njofton presidenca.