“Grykësia për pushtet e pasuri”. Meta nuk gjen paqe

Përmes një mesazhi Presidenti Meta ka kujtuar 21 shtatorin, Ditën Ndërkombëtare të Paqes, ndërsa tregon se nuk ka gjetur paqe, dhe nuk heq dorë nga sulmet ndaj qeverisë dhe Ramës. Ndërsa kujton shprehje të Nënë Terezës (me të cilën s’ka asnjë lidhje), Meta shkruan se “nuk mund të ketë paqe nëse nuk respektohen të drejtat dhe liritë themelore të njeriut, nëse egoja, ambicja, interesi i ngushtë personal, si dhe grykësia për pushtet e pasuri, prevalon mbi interesin e përbashkët”. Një deklaratë të tillë e bën njeriu që gjatë gjithë jetës së tij ka luftuar për pushtet dhe karrige, ka bërë aleanca nga më të pabesueshmet, duke u hedhur sa majtas e sa djathtas, vetëm nga grykësia për pushtet (e pasuri).

Më tej Meta shkruan: “paqja e sigurtë, afatgjatë dhe e qëndrueshme garantohet vetëm kur liritë, të drejtat, aspiratat dhe nevojat e qytetarëve, mbrohen përmes sundimit të shtetit të së drejtës”. Këtë e thotë pikërisht ai që ka sulmuar ashpër përpjekjen për të ndërtuar shtetin e së drejtës përmes reformës në drejtësi. Sulme që nuk kanë kursyer askënd, as qeverinë dhe as ndërkombëtarët, veçanërisht SHBA-në që është investuar fuqishëm në realizimin e reformës në drejtësi.

Më pas Presidenti kujton regjimin diktatorial duke shkruar se “e kaluara kur harrohet, rrezikon të përsëritet”, duke bërë një analogji me qeverisjen e Ramës. Deklaratë e përsëritur, duke përdorur të njejtën gjuhë si opozita.

“Në rajonin tonë, kujtimet e hidhura, dhimbjet, vuajtjet dhe pasojat e rënda që lanë pas luftrat, masakrat, genocidet dhe regjimet diktatoriale janë ende të freskëta.

E kaluara kur harrohet, rrezikon të përsëritet!

Duhet të jemi shumë vigjilentë ndaj çdo tentative që do të mund të cenonte sovranitetin, paqen, qetësinë, mirëkuptimin, respektin reciprok dhe bashkëjetesën mes njerëzve, popujve, kombeve, etnive dhe besimeve, duke synuar mbjelljen e farës së paragjykimeve, ndenjës së urrejtjes dhe autoritarizmit, veçanërisht nga keqpërdorimi i shtetit për përfitime personale dhe të pushtetit”, shkruan Meta.

Reagimi i presidentit i cili duhet të ishte mbi palët në respekt të Kushtetutës, por që është bërë palë me opozitën, vjen në një kohë kur po afrohet dita e shkarkimit të tij. Komisioni Hetimor Parlamentar është në pritje të raportit të Komisionit të Venecias. Vetë presidenti e ndjeu rrezikun e shkarkimit, ndaj dhe fluturoi drejt Venecias për të bërë lobime kundër shkarkimit. Por u prit si një “turist i ardhur nga kozmosi” nga presidenti i Komisionit të Venecias. Pritet që raporti i Venecias të jetë gati më 12 tetor dhe më pas Komisioni Hetimor do të vendosë për shkarkimin e Metës, proces të cilin maxhoranca është vendosur ta çojë deri në fund./realstory.al

Meta, udhëtim privat drejt Strasburgut, lobime në Venecia

Ilir Meta ka fluturuar drejt Frankfurtit, por pavarësisht se në cilësinë e Kreut të Shtetit, ai vizitën e ka mbajtur tërësisht private.

Burime nga protokolli i shtetit bëjnë me dije se asnjë punonjës i Ministrisë së Jashtme apo Ambasadës shqiptare në Strasburg nuk është përfshirë në vizitën e Presidentit. Pasi ka fluturuar me linjën ne Frankfurt, Ilir Meta ka udhëtuar drejt Strasburgut me një makinë luksoze të marrë me qera (nuk dihet si dhe kush ka paguar për këtë) dhe më pas është akomoduar në një vilë pranë qytetit të vogël ku ka selinë edhe Komisioni i Venezias.

Portali pranë Ilir Metës raporton se Presidenti do të zhvillojë një takim me Kongresin e Autoriteteve Vendore, por mbetet mister përse një vizitë e tillë e Kreut të Shtetit duhet të mbahet e fshehur dhe pa protokoll?

Burimet pranë Metës bëjnë me dije se në fakt arsyeja e vërtetë e udhëtimit drejt Strasburgut është një takim sekret me Gianni Buquicho, ndërkohë që këto ditë Komisioni i Venecias nën drejtimin e Buquichos do të marrë vendimin nëse Ilir Meta e ka shkelur apo jo Kushtetutën e Republikës kur vendosi të çdekretojë datën e zgjedhjeve të 30 qershorit duke nxitur protesta të dhunshme që e kanë dëmtuar jo pak imazhin e Shqipërisë.

Jo më larg se dy ditë më parë, në një intervistë në portalin pranë tij, Ilir Meta deklaroi se ishte maxhoranca ajo që po lobonte pranë Komisionit të Venecias për ta shpallur jokushtetuese çdekretimin e 30 qershorit.

Meta theksoi tek Çim Peka se në rast se Komisioni i Venecias do ta klasifikonte si shkelje çdekretimin, atëherë Presidenti nuk do të priste as votimin e shkarkimit të tij në Parlament e as vendimin e Gjykatës Kushtetuese, por do të jepte menjëherë dorëheqjen.

Por në kushtet kur Ilir Meta udhëton fshehtas dhe nën kamuflim drejt Strasburgut për të takuar personin kyç të Komisionit të Venecias, pyetja që ngrihet është: Kush po lobon në Strasburg, maxhoranca apo vetë Ilir Meta? Dhe a mos është ky lobim i Ilir Metës garancia dhe siguria që ai ka se Venecia nuk do ta lërë në baltë?/TEMA

Pasi shkeli Kushtetutën, Meta, nismë për mbrojtjen e saj (më 22 nëntor)

Presidenti Meta ka njoftuar se më 22 nëntor do të dalë me një nisëm në mbrojtje të Kushtetutës. Ai e ka cilësuar këtë nisëm si të Presidentit dhe se nuk ka lidhje me partitë apo forcat politike. Kjo nisëm sipas Metës ka detyrim të kujdeset për të drejtat themelore të qytetarëve shqiptare, të mos pajtohet me asnjë institucion që i cenon ato. Data 22 duket se është zgjedhur nga Meta pasi përkon me 22 nëntori 1998, ku shqiptarët miratuan me referendum Kushtetutën e vendit, atë që garanton të drejtat e qytetarëve, ndërsa nuk ka lënë pa sulmuar ndryshimet kushtetuese të 2008 që u bën me marrëveshjen Berisha-Rama.

“Përveç 18 tetorit, një datë e rëndësishme është 22 nëntori, dita kur shqiptarët në vitin 1998 me referendum miratuan Kushtetutën, që natyrisht është sakatuar padrejtësisht që nga viti 2008 e në vazhdimësi. Ndaj unë më 22 nëntor do të bëj publike nismën time në mbrojtje të Kushtetutës, në mbrojtje të të drejtave themelore të qytetarëve shqiptar dhe kjo do të jetë një nismë mjaft e mirëmenduar dhe e mirëorganizuar në mënyrë që të mos tolerojmë më në këtë vend, shkeljen dhe dhunimin sistematik të të drejtave kushtetuese të qytetarëve tanë.”, – ka thënë Meta në një intervistë në Ora News, një deklaratë që bie në kundërshtim të hapur me veprimet e tij të ndërmarra që me dekretin e shfuqizimit të 30 qershorit e deri më sot. Meta i e ka shkelur Kushtetutën me të dyja këmbët dhe për këtë ndaj tij ka nisur një proces hetimor nga Kuvendi. Në lidhje me rastin është kërkuar edhe një opinion nga Komisioni i Venecias, i cili pritet të jap një opinion përfundimtar më 11 tetor nëse presidenti Meta e ka shkelur apo jo Kushtetutën. Ky opinion do të jetë vendimtare për vendimin që Komisioni Hetimor do të marrë dhe do e çoj për miratim në Kuvend. Më pas do të jetë Gjykata Kushtetuese ajo që do të thotë fjalën përfundimtare.

Për mazhorancën Meta ka rënë si President, dhe duket se kjo është e vlefshme edhe për SHBA dhe BE, pasi në dy vizita të ndarë në Tiranë, të zyrtarit të lartë të DASH, David Kostelancik dhe Presidentit të Këshillit të Europës Donald Tusk, i kanë shmangur takimet me të. Ndërkombëtarët nuk kanë dhënë asnjë opinion në lidhje me shkarkimin, por duket se mosreagimi i tyre shpreh një miratim të heshtur. Por a do të jetë Meta ende president më 22 nëntor? Kjo do të përcaktohet gjatë muajit tetor dhe ndoshta nga frika e shkarkimit, mund ta nxjerr sërish Metën të deklarojë nisma të reja në mbrojtjen e Kushtetutës, asaj që po ai vetë e shkeli./ Real Story

Pas SHBA, edhe BE izolon Metën. Asnjë takim me Tusk

Sulmet dhe akuzat drejtuar ndërkombëtarëve nga presidenti Meta kanë dhënë efektin që pritej. Ndërkombëtarët duket se e kanë izoluar duke mos e përfshirë atë në axhendën e takimeve. Pas SHBA-së, e cila tregoi hapur shmangien e Metës nga axhenda e takimeve që zhvilloi në Tiranë zyrtari i lartë i DASH, David Kostelancik; edhe BE ka nisur të ndjekë të njejtën politikë. Gjatë të martës Tiranën zyrtare do ta vizitojë Presidenti i Këshillit të Europës Donald Tusk, por në axhendën e tij, nuk është parashikuar asnjë takim me presidentin Meta.

Sipas axhendës Tusk do të zhvillojë të martën paradite një vizitë zyrtare në Maqedoninë e Veriut, ku do të zhvillojë takime edhe me kryeministrin Zoran Zaev, edhe me presidentin Stevo Pendarovski. Të njejtën vizitë do ta zhvillojë të martën pasdite në Tiranë, por në axhendën e tij është parashikuar vetëm takimi me kryeministrin Rama në orën 15.00 dhe asnjë takim me presidentin Meta.

Duket qartë si një sinjal që BE u jep akuzave dhe sulmeve të Metës ndaj ambasadorëve që kanë krijuar sipas tij një “deep state”.

Të njejtën gjë bëri edhe drejtori i Ballkanit në Departamentin e Shtetit, David Kostelancik, i cili gjatë vizitës së tij zhvilloi shumë takime, madje edhe me përfaqësuesit e opozitës së re, me Ralf Gjonin e Rudina Hajdarin dhe nuk gjeti “kohë” të takonte Metën. E vërteta duket se është një izolim që ndërkombëtarët po i bëjnë Metës. Për ta ai është një presidenti në prag shkarkimi dhe fakti se nuk njohën asnjë nga dekretet e tij tregon se Meta nuk gëzon mbështetje ndërkombëtare.

Donald Tusk vjen në Shqipëri dhe pritet të japë lajmin e mirë të çeljes së negociatave më 18 tetor. Shqipëria dhe Maqedonia e Veriut, presin përgjigjen pozitive të Këshillit të Bashkimit Evropian për çeljen e negociatave më 18 tetor për vazhdimin e procesit të integrimit në BE. Pritet që Tusk të jetë i pari që do të japë lajmin e mirë për këto dy vende, por mendohet se vizita e tij do të shoqërohet edhe me disa kushte shtesë.

ERDHI PËR INFLUENCËN RUSE, KOSTELANÇIK SHMANG METËN

Veliaj, i ashpër me Metën dhe opozitën: Shkrepin pushkët kundër Shqipërisë

Kryebashkiaku i Tiranës, Erjon Veliaj ka qenë i ashpër dhe i drejtëpërdrejtë në replikë me kreun e shtetit, Ilir Meta teksa i tha se “askush nuk duhet të shkrepë pushkë kundër Shqipërisë”, një mesazh ky edhe për opozitën dhe lobimet e saj kundër integrimit në BE. Veliaj dhe Meta morën pjesë bashkë në festimet me rastin e 77 vjetorit të konferencës së Pezës.

Në fjalën e tij Meta tha se antagonizmi i theksuar politik gjatë këtyre viteve ka sjellë vonesa në integrimin e Shqipërisë në BE. Ai u bëri thirrje palëve që të lënë mënjanë interesat afatshkurta dhe të përqendrohen tek integrimi evropian. Meta foli edhe për kushtet që mund t’i vihen Shqipërisë nga BE më 18 tetor dhe tha se është i gatshëm të presë kushte edhe për institucionin e presidentit “për të parë qartë se kush e vonon këtë proces”.

Meta ‘thumboi’ sërish edhe procesin zgjedhor të 30 qershorit, kur vuri theksin tek pluralizmi i Konferencës së Pezës ku morën pjesë pa bindje politike, fetare, e ideje.

“Qëllimi ynë sot, interesi ynë kombëtar është integrimi në BE. Një proces, të cilin antagonizmi politik e ka vonuar shumë. Sjellja ime si president ka qenë në funksion të këtij interesi kombëtar që në 18 tetor, të gjithë aktorët politikë, t’i kërkojmë BE t’i thotë një PO çeljes së negociatave për Shqipërinë. Nëse do të ketë kusht, do të ketë për çdo institucion dhe për presidentin e republikës që të jetë e qartë se kush e pengon këtë proces”, tha Meta.

Në replikë kryebashkiaku Veliaj tha se e mbështet fuqishëm pluralizmin politik në Shqipëri, por ai shtoi se pluralizëm nuk do të thotë që të shkrepësh me pushkë kundër Shqipërisë. Duke bërë një paralelizëm me kohën e luftës ai tha se partizanët ishin ata që morën pushkët e luftuan. Ndaj dhe sot sipas Veliaj, të mos luftojnë vetëm partizanët por të gjithë (edhe Meta edhe opozita).

“Shpesh them 1001 të zeza për njëri -tjetrin, jo vetëm në kafene po edhe në debate politike, por mos harrojmë të themi disa të mira për njëri -tjetrin. Presidenti e tha me të drejtë, ka qenë edhe një hapësirë pluralizmi, të gjithë e dimë që ishte në Pezë, po vetëm partizanët vajtën shkrepën armët. Pushka sot nuk është vetëm plumb, është edhe fjala. Pluralizëm po, kudo në çdo fushë, nuk mundet të kemi pluralizëm në tavolinë dhe vetëm partizanët në luftë. Duhet të inkurajojmë pluralizmin kudo, edhe kur shkojmë në kuti të votimit, edhe flasim në kancelaritë e huaja, ama kurrë nuk do të shkrepim pushkë kundër Shqipërisë. Dhe pushka sot nuk është vetëm me plumb por dhe me fjalë me çfarë shkruajmë. Ndaj unë do do t’i bashkohem thirrjes duhet pluralizëm, por kudo”, u shpreh Veliaj.

Pas ceremonisë Meta u pyet nga mediat për këtë deklaratë të Veliajt dhe tha se duhet të lexojë raportin e OSBE/ODIHR-it.

“Nuk ka patur asnjë institucion më koherent në respektimin e pluralizmit, bashkëpunimit, te standardeve evropiane dhe shtetit të së drejtës, sesa Presidenti i Republikës. Të gjithë ata që kanë paqartësi të lexojnë raportin final te OSBE/ODIHR”, tha Meta.

Shfaqja e Metës në krah të përfaqësuesve të maxhorancës gjatë ceremonisë së 77 vjetorit të konferencës së Pezës u lexua si një zbutje e qëndrimeve të tij në prag të shkarkimit, duke pasur parasysh se qëndroi shumë pranë Vasilika Hysit, (anëtare e komisionit hetimor); por replikat që shkëmbyen me Veliajn tregojnë të kundërtën. Meta vijon të lëshojë akuza kundër maxhorancës dhe 30 qershorit, dhe kjo e fundit (maxhoranca) vijon me procedurat për shkarkimin e tij./realstory.al

Po i afrohet dita e shkarkimit, Meta merr timonin e opozitës (flet për beteja)

Presidenti Meta po tregon çdo ditë e më shumë se është në një gjendje të paqëndrueshme ku herë shfaqet si komik në Facebook dhe herë si revolucionar në “mbrojtje” të demokracisë. Kjo mund të ketë lidhje me afrimin datës së shkarkimit, duke bërë që presidenti Meta të humbas kontrollin dhe hyjë në rolin e kryetarit të opozitës. Në kuadër të ditës ndërkombëtare të Demokracisë, Meta, i cili duhet të ruante rolin e unitetit kombëtar, është shprehu me një gjuhë mjaft revolucionare dhe sulmuese kundër qeverisë dhe shtetit të propagandës siç e cilëson ai.

Me fjalët dhe motivimin si të ishte lideri i opozitës jo parlamentare, Meta ka thënë se demokracia është cenuar në Shqipëri dhe se qytetarët duhet ta mbarojnë atë me beteja për ta shpëtuar demokracinë nga pengëmarrja e një pakice ilegjitime.

“Fenomeni i rrezikshëm i shtetit paralel të propagandës dhe PPP-ve, dhe axhendat e nëndheshme që kanë kapur për fyti Shqipërinë, nuk janë gjë tjetër veçse një komplot kundër demokracisë, çdo vlere e parimi të saj, kundër sovranitetit të të gjithë qytetarëve që duan një demokraci të vërtetë europiane dhe perëndimore.

Ndaj ne sot kemi një mision të përbashkët historik: Të shpëtojmë demokracinë nga pengëmarrja e një pakice të papërgjegjshme dhe jolegjitime!

Koha nuk pret!

Kjo është beteja jonë! E njerëzve të lirë, të ndershëm dhe punëtorë, e rinisë sonë të mrekullueshme! E të gjithëve ne që e duam me shpirt dhe zemër Shqipërinë! Dhe unë jam më i vendosur se kurrë!” ka shkruar ndër të tjera Meta, i cili ishte i pari që shkeli Kushtetutën dhe u mohoi qytetarëve të drejtën demokratike për të zgjedhur duke i anuluar ato. Për sa i përket akuzave për një pakicë ilegjitime në qeverisje të vendit duket se nuk qëndrojnë, pasi zgjedhjet e 30 qershorit u njohën nga SHBA, ndërkombëtaret dhe OSBE/ODIHR-i, si dhe mori bekimin e tyre për t’u mbajtur në 30 qershor, sipas datës Kushtetuese, duke hedhur poshtë çdo plan shkatërrimtar të opozitës por dhe Metës që doli në mbrojtje të saj dhe jo të drejtës demokratike të qytetarëve.

Që pas këtij vendimi sulmet e presidenti Meta ndaj ndërkombëtarëve por edhe qeverisë janë rritur, pasi njohja e 30 qershorit bëri që SHBA të mos e njohë më atë si president, ndërsa mazhoranca e cilëson “president në detyre” deri në shkarkimin e tij, dita e të cilit po afron. Ndoshta kjo ka bërë që Meta ta humbasë herë pas herë kontrollin dhe qetësinë e tij, për të cilën thotë se karakterizohet.

Të dashur miq, sot është Dita Ndërkombëtare e Demokracisë.Në themel të demokracisë qëndron vota, e drejta e çdo…
Gepostet von Ilir Meta am Sonntag, 15. September 2019

Meta tallet me peshqit (dhe me SHBA): Po kapim dallgë…

Presidenti e ka nisur mëngjesin e së premtes duke kapur peshq me grep në breg të detit. Meta ka postuar një foto nga bregu i detit ndërsa mban grepin në dorë, në shoqërinë e aktorit të humorit Bes Kallakun. Meta shkruan “ne e nisem ditën për peshk e po kapim dallgë”. Të shumtë janë komentuesit që kanë vërshuar me komente në facebookun e Metes të cilët i kujtojnë “peshkun e madh”.

Në fakt cilido që ka pak memorie politike do i kujtohej peshku i madh i Donald Lu dhe pikërisht kjo foto e Metës duket si kunj për SHBA-të, nisur edhe nga vazhdimësia e deklaratave të tij kundër ndërkombëtarëve dhe reformës në drejtësi.

Kujtojmë se ish ambasadori amerikan Donald Lu e përsëriste vazhdimisht si një kërkesë thelbësore domosodshmërinë që në Shqipëri të kapen “peshqit e mëdhenj” duke nënkuptuar këtu vënien para drejtësisë të zyrtarëve të lartë të shtetit.

Nga ana tjetër presidenti Meta e ka sulmuar reformën në drejtësi të bërë nën bekimin amerikan; reformë e cila do të vërë para drejtësisë pikërisht këta “peshq të mëdhenj”.

Pikërisht si një kunj ndaj SHBA-së dhe reformës së tyre “të dështuar”, sipas Presidentit, duket kjo foto e Metës, ose ndoshta është thjesht humor. Por dikush i shkruan se ai është president dhe jo aktor humori./realstory.al

Mirëmëngjes! Me Bes Kallakun, e nisem për peshk e po kapim dallgë.
Gepostet von Ilir Meta am Donnerstag, 12. September 2019

Rama i vendosur për shkarkimin. “Meta çlirohet, të marrë drejtimin e opozitës”

Maxhoranca është e vendosur ta çojë deri në fund nismën për shkarkimin e Metës, nismë kjo që sipas Spiropalit do ta çlirojë Metën dhe do t’i japë atij mundësinë që të vendoset në krye të opozitës.

Megjithëse nuk ka qenë në seancën e së enjtes në Kuvend, kryeministri Rama ka reaguar në facebook në lidhje me dekretet e Metës që u rrëzuan në seancë nga maxhoranca. Rama shkruan se dekretet e Metës janë një katrahurë pa asnjë bazë ligjore që janë firmosur në kohë rekord nga Meta për të sulmuar qeverinë dhe që si qëllim kanë pasur vetëm vazhdimin e luftës së dështuar të opozitës.

“Koha rekord me të cilën Ilir Meta shqyrtoi, analizoi dhe vendosi për t’i kthyer ligjet në Kuvend flet për qëllimin e vërtetë të Ilir Metës. Të gjitha kthimet janë bërë pa asnjë bazë juridike dhe pa marrë parasysh interesin publik. Katrahurën me dekrete e zhdekrete e bën për të plotësuar dështimin e “miqve” të tij të luftës dhe që ngushëllimin e gjejnë tek Presidenca”, shkruan Rama teksa poston fjalimin e ministres së Shtetit për Marrëdhëniet me Parlamentin, Elisa Spiropali.

Ajo është treguar më e ashpër në fjalimin e saj, teksa hedh poshtë argumentet e Metës për kthimin mbrapsht të ligjeve në kuvend, duke thënë se Meta nuk është kujdesur në asnjë moment për interesin publik, as në rastin kur u hoqi shqiptarëve të drejtën të votojnë në 30 qershor duke anuluar datën e zgjedhjeve.

“Presidenti kthen në Kuvend çdo ligj. Sulmon nëpërmjet tastierës së tij dhe zëdhënësve qeverinë dhe parlamentin. Presidenca duhet ta dijë se kthimi i këtyre ligjeve është në kundërshtim me interesin publik. Rezervat materiale, janë vetëm të grupit A tek gruri dhe materialet e thjeshta, nuk e di pse Metës i shkon mendja menjëherë tek floriri, por këtë le ta shpjegojë Frojdi jo ne. Nevoja e ndryshimit të këtij ligji vjen nga eksperiencat e mëparshme. Gjatë kohës së emergjencave kemi pasur një vonesë të lëvrimit të mallrave.

Nuk ka rrezik për qamet financiar, se qamet fizik përmes tërmetit nuk ndodhi, por edhe për këtë presidenti të jetë sigurtë që nuk do të ndodhë. Si qingj u fsheh nga drejtësia pas cjapit legjendar të PD-së për një rrugë që i kishte e zeza me të bardhë abuzimet, por shpëtoi me një raport mjekësor. Që presidenti të kthejë në dekrete përvuajtjet hipokrite të opozitës së rrugës nuk i kishim menduar. Por ata nuk po ia dinë mundin që Presidenti po bën. Po presim të dëgjojmë kush do ta digjte parlamentin? Dështuan dhe vijojnë që të dështojnë, pasi nuk kanë asnjë alternativë. Komisioni Hetimor nuk do të shërbejë si mekanizëm ndëshkues për Presidentin, por si çlirues për Ilir Metën për t’u kthyer në krye të opozitës”, tha Spiropali.

Siç duket nuk ka asnjë ndryshim nga qëndrimi i PS-së. Maxhoranca është e vendosur ta çojë deri në fund nismën për shkarkimin e Metës nga posti i presidentit./realstory.al

ERTV Live😊:Koha rekord me të cilën Ilir Meta shqyrtoi, analizoi dhe vendosi për t’i kthyer ligjet në Kuvend flet për qëllimin e vërtetë të Ilir Metës. Katrahurën me dekrete e zhdekrete e bën për të plotësuar dështimin e miqve të tij të luftës dhe që ngushëllimin e gjejnë tek Presidenca. Flet ministrja e Shtetit për Marrëdhëniet me Parlamentin, Elisa Spiropali
Gepostet von Edi Rama am Donnerstag, 12. September 2019

Në prag shkarkimi, Meta sulmon mediat, sqaron “sekretin” e djegies së Kuvendit

Meta nuk i ndal sulmet e tij, ku përveç mazhorancës, ndërkombëtarëve e ndonjëherë edhe opozitës, ka përfshirë në listën e tij edhe mediat në vend. Kreu i Shtetit i ka i cilësuar ato si pjesë e shtetit të propagandës, duke krijuar një “antagonizëm” me fjalën e lirë të medias.

Në përpjekje për të sqaruar se nga kush e mori informacioni sekret se më 8 qershor do të digjej Kuvendi, në reagimin e Presidencës, sulmohen disa media e portale duke i cilësuar si pjesë e shtetit të propagandës që dezinformojnë opinionin publik me lajmin e rremë, sikur Meta po mban sekret raportin që paralajmëronte rrezikun e djegies së Parlamentit në datën 8 qershor 2019. Presidenca sqaron edhe rrugën që ka ndjekur Meta në lidhje me informacionin sekret që e paralajmëronte atë se do të digjej Kuvendi. Kreu i shteti Ilir Meta i ka dërguar një letër institucionit të lartë të sigurisë kombëtare që t’i verë në dispozicion edhe Kuvendit, raportin që i ka dorëzuar Presidentit në datën 7 qershor 2019 si dhe ka informuar edhe Kuvendin në lidhje me kërkesën e tij.

“Me keqardhje, por pa çudi, portale dhe gazeta të SHTETIT TË PROPAGANDËS DHE PPP-ve, me kokëfortësi të shpjegueshme, vazhdojnë ende të dezinformojnë opinionin publik me lajmin e rremë, sikur Presidenti Meta po mban sekret raportin e prodhuar nga institucioni i lartë i sigurisë kombëtare, që paralajmëronte rrezikun e djegies së Parlamentit në datën 8 qershor 2019. Sikundër Kreu i Shtetit e sqaroi edhe dje shumë qartë, jam i detyruar të rikonfirmoj se:

Ditën e djeshme, Institucioni i Presidentit i ka nisur një kërkesë institucionit të lartë të sigurisë kombëtare, që mbështetur mbi ligj, t’i verë në dispozion edhe Kuvendit, raportin që i ka dorëzuar Presidentit në datën 7 qershor 2019. Po dje, Institucioni i Kreut të Shtetit i ka dërguar një letër zyrtare edhe Kuvendit, ku e vë në dijeni lidhur me kërkesën e mësipërme.” – shkruhet ndër të tjera në reagimin e Presidencës.

Seanca sot, Kuvendi rrëzon 8 herë Metën

Kuvendi zhvillon të enjten (sot) seancën e dytë plenare në nisje të sesionit të ri parlamentar. Seanca pritet të nis në orën 10:00, ndërsa në rend të ditës janë kthimi për rishqyrtim i 8 dekreteve të Presidenti Meta gjatë verës. Kuvendi pritet të rrëzojë presidentin Meta ashtu siç u bë edhe në komisionet përkatëse të tyre. Dekretet që pritet të rrëzohen nga parlamenti janë që nga qeverisja vendore, koncesionet për rrugët Orikum- Dukat, Milot– Balldren, apo edhe propozimi i tij për emërimin e Petraq Milos në krye të Kontrollit të Lartë të Shtetit.

Tetë dekretet e Presidentit që pritet që të rrëzohen në Kuvend:

1. Dekreti për ligjin për rezervat materiale të shtetit

2. Dekreti për privatizimin dhe dhënien në përdorim shoqërive tregtare

3. Dekreti për ligjin e për vetëqeverisjen vendore

4. Dekreti për ligjin për planifikimin dhe zhvillimin e territorit

5. Dekreti për ligjin për koncesionet dhe partneritetin publik privat

6. Dekreti për koncesionin e rrugës Orikum – Llogara, Porti i jahteve – By-Pass Orikum – Dukat

7. Dekreti për koncesionin e rrugës Milot – Balldren

8. Dekreti për propozimin e kryetarit të Kontrollit të Lartë të Shtetit

Presidenti Meta, i cili kishte nisur një luftë të ashpër institucionale ndaj mazhorancës gjatë verës, i ktheu saj plot 7 dekrete si një mënyrë për ta sulmuar dhe bllokuar punë e saj. Megjithatë rikthimi për rishqyrtim të këtyre dekreteve, ashtu siç pritej, do të rrëzohen nga Kuvendi dhe do të miratohen me një shumicë të thjeshtë votash.

Kreu i shteti gjatë gjithë verës përdori dekretet e tij për të sulmuar qeverinë deri në anulimin e zgjedhjeve, që u njohën edhe nga ndërkombëtarët se duhet të zhvilloheshin më 30 qershor. Kjo bëri që presidenca dhe mazhoranca të hyjnë në një marrëdhënie jo vetëm të ftohtë por edhe të ashpër, aq sa nisi procedurat për shkarkimin tij për shkelje të rëndë të kushtetutës. Me kërkesë të PS, Kuvendi ngriti një komision hetimor për hetimin e shkeljeve të Presidentit për shfuqizimin e 30 qershorit.

Mbrojtja e Metës para Komisionit Hetimor, bëri që ai të ndërmerrte një qëndrim të ri ndaj partisë në pushtet. Nga sulmet e ashpra mes mazhorancës dhe tij, aty u shfaq një dashuri me tepricë nga të dyja palët.

Kreu i shtetit, Ilir Meta ka nisur një flirtim të ri me mazhorancën, sikur po kërkon të afrohet sërish me të majtën. Ndoshta kjo mund të jetë një shenjë e ngrohjes së marrëdhënieve mes tyre, ose një bllof i Metës për të zbutur disi përplasjet dhe për të krijuar një përçarje mes tyre për çështjen e shkarkimit. Pas dekretit për shfuqizimin e 30 qershorit, mazhoranca e cilëson atë “President në detyrë”, ndërsa vetë Meta shprehët i bindur se nuk do të lëviz nga zyra e tij deri në përfundim të mandatit më 24 korrik 2022.