Shkarkimi i Metës, Ruçi jep garanci: Kushtetuesja, së shpejti funksionale

Kryetari i Kuvendit Gramoz Ruçi ka zhvilluar të martën një takim me delegacionin e ekspertëve të Komisionit të Venecias të cilët kanë vizituar Shqipërinë, pas kërkesës së bërë nga Kuvendi i Shqipërisë për të dhënë një opinion mbi nismën e kuvendit për të shkarkuar presidentit Ilir Meta për shkelje të rëndë të Kushtetutës.

Në këtë takim Ruçi, “vlerësoi gatishmërinë e angazhimit të Komisionit të Venecias, megjithë kohën e shkurtër të adresimit të kërkesave; seriozitetin e vizitave të ekspertëve të Komisionit në Shqipëri si edhe cilësinë e lartë të raporteve paraprake dhe përfundimtare të opinionit të Komisionit”.

Në këtë takim kreu i Kuvendit ka theksuar se maxhoranca është “maksimalisht e angazhuar për funksionalitetin Gjykatës Kushtetuese”.

Funksionimi i Gjykatës Kushtetuese në këtë drejtim merr një rëndësi të veçantë, pasi është pikërisht ky institucion që do të thotë fjalën e fundit për shkarkimin ose jo të presidentit të republikës.

Pra fillimisht komisioni hetimor në përfundim të punimeve të tij do të hartojë një raport përfundimtar të cilin do ta paraqesë për miratim në Kuvend. Në raport do të përfshihet opinioni i Komisionit të Venecias si dhe konkluzionet e ligjvënësve shqiptarë dhe vendimi për shkarkimin ose jo të Metës. Raporti do të kalojë për votim në seancë dhe do të jetë Kuvendi që përmes votës do të vendosë shkarkimin ose jo të Metës. Në përfundim vendimi i Kuvendit do të marrë vulën e Gjykatës Kushtetuese. Ndaj dhe ngritja sa më parë e saj është vendimtare në këtë proces./realstory.al

**Kryetari i Kuvendit me delegacionin e Komisionit te Venecias**

Në prag të shkarkimit, Meta ka shpresë: Do jem deri në 2022

Meta duket i vendosur dhe plot shpresë se do të qëndrojë në krye të Presidencës deri në përfundim të mandati të tij më 24 korrik në 2022. Me një gjuhë të zbutur dhe të qetë, kreu i shtetit vlerësoi me nota pozitive praninë e tij në Komisionin Hetimor, duke e cilësuar se “ndihej i lumtur që më në fund u rikthyer sërish në Kuvend pas dy vitesh mungesë.” Meta paraqiti “mbrojtjen e tij” për rreth dy orë mëngjesin e të hënë në Komisionin Hetimor, i cili ka nisur një proces hetimi për shkarkimin e tij.

Me një deklaratë ironike por edhe sfiduese për mazhorancës që ka nisur ndaj tij procedurat e shkarkimit, Meta thekson se të gjitha aktet e tij vijnë në mbrojtje të Kushtetutës, demokracisë dhe interesit publik, fjalë që i përsëriti disa herë edhe gjatë Komisionit Hetimor.

“Shumë i lumtur që m’u dha sot mundësia të kthehem në Parlament pas një mungese gati dy vjeçare, për të rikonfirmuar edhe njëherë se deri në 24 korrik 2022, Institucioni i Presidentit do të jetë një kështjellë e pamposhtur në mbrojtje të Kushtetutës, demokracisë, pluralizmit, interesit kombëtar dhe atij publik, me qëllimin e vetëm anëtarësimin e shpejtë dhe pa vonesa të Shqipërisë në Bashkimin Europian.” –shkruan Meta, i cili e shoqëron shkrimin me një video në mbyllje të seancës së Komisionit Hetimor, ku u shprehën pafundësisht falenderime mes Metës, Manjës e të tjerëve me një gjuhë paqësore dhe thuajse plot dashuri, sikur të ishin takuar aty për një bashkëbisedim miqësor dhe jo për hetimin e tij.

Shumë i lumtur që m’u dha sot mundësia të kthehem në Parlament pas një mungese gati dy vjeçare, për të rikonfirmuar edhe njëherë se deri në 24 korrik 2022, Institucioni i Presidentit do të jetë një kështjellë e pamposhtur në mbrojtje të Kushtetutës, demokracisë, pluralizmit, interesit kombëtar dhe atij publik, me qëllimin e vetëm anëtarësimin e shpejtë dhe pa vonesa të Shqipërisë në Bashkimin Europian.
Gepostet von Ilir Meta am Montag, 9. September 2019

Meta, me gjysmë të vërteta në Komision. Gjakderdhjen e shmangu Palmer, jo ai

Ka zgjatur dy orë “mbrojtja” e presidentit Ilir Meta në Komisionin Hetimor për shkarkimin e tij. Nga “Heavy Metal”, presidenti këtë herë u shfaq i qetë, por pa lënë mënjanë akuzat si ndaj Ramës ashtu edhe ndaj Bashës.

Dy ishin argumentet e përdorur nga presidenti për mbrojtjen e tij, përgjatë 120 minutave. E para ishte garantimi i të drejtës së zgjedhjes së qytetarëve përmes një gare me disa kandidatë dhe e dyta shmangia e gjakderdhjes. Por në të dyja argumentet, presidenti tha gjysmë të vërtetat që i shkonin për shtat.

E para. Në zgjedhjet e 30 qershorit në gjysmën e bashkive në garë ishte dy kandidatë dhe jo një, për shkak të pjesëmarrjes në zgjedhje të Partisë Bindja Demokratike, ndërsa në fletën e votimit zgjedhësit kishin të renditur jo pak por 39 parti që garonin për Këshillat Bashkiakë.

Ndërsa përsa i përket shmangies së gjakderdhjes, të gjithë meritat për këtë duhet t’i marrë ndihmës sekretari amerikan i shtetit Mathew Palmer.

Në prag të protestës së 8 qershorit të opozitës, Palmer ia bëri të qartë si Bashës ashtu edhe Kryemadhit, se do të mbajnë përgjegjësi në rast se protesta do të jetë e dhunshme. Ai tha se SHBA-të do t’i fusin partitë e tyre në listën e organizatave të dhunshme dhe do të ndërpresë çdo marrëdhënie me ta.

“Më lejoni të jem shumë i qartë: dhuna nuk ka vend në demokraci. Shtetet e Bashkuara respektojnë të drejtën Demokratike të qytetarëve për të protestuar në mënyrë paqësore. Megjithatë, përdorimi i përleshjeve fizike apo mjeteve shpërthyese si mjete proteste është jo vetëm jodemokratik, por është edhe i paligjshëm.

Shënjestrimi me fishekzjarre dhe molotov i oficerëve të policisë dhe ndërtesave publike nuk janë akte paqësore. Ata që përfshihen në aktivitete të tilla të dhunshme kryejnë krim dhe duhet të mbajnë përgjegjësi.

Iu kemi bërë thirrje në mënyrë të përsëritur udhëheqësve të opozitës, sidomos kryetarit të Partisë Demokratike Lulzim Basha dhe kryetares së LSI Monika Kryemadhi që të dënojnë publikisht aktet e mbështetësve të tyre, të bashkëpunojnë me hetimet që synojnë të identifikojnë autorët individualë dhe vënien e tyre para përgjegjësisë, si dhe të sigurojnë që të gjitha protestat e ardhshme publike të jenë të rregullta dhe paqësore.

Dua të jem shumë i qartë me zotin Basha, zonjën Kryemadhi dhe të tjerë në partitë e tyre: nëse në protestat e ardhshme ka akte dhune, për ne ata do të jenë përgjegjësit.

Nxitja e dhunës nga kushdo është një fyerje për popullin shqiptar dhe duhet dënuar nga të gjithë. E kemi bërë të qartë kundërshtinë tonë ndaj dhunës si instrument politik. Pengimi i një procesi zgjedhor potencialisht përbën arsye për moskualifikim për të hyrë në Shtetet e Bashkuara”, është shprehur Palmer para protestës së datës 8 qershor.

Ka qenë pikërisht kjo deklaratë e fortë e tij që shmangu gjakderdhjen në Shqipëri. Opozita dha sinjale para nisjes së protestës se ajo do të ishte paqësore. Kryetarja e LSI-së, Monika Kryemadhi u distancua menjëherë nga aktet e dhunës dhe bëri thirrje që protesta e opozitës të ishte paqësore. Më vonë doli presidenti Meta i cili njoftoi se do të anulonte datën e zgjedhjeve të 30 qershorit. Pra vendimi i tij nuk shmangu gjakderdhjen. Pas vendimit të Metës për anulimin e datës së zgjedhjeve kujtojmë se në Shkodër iu vu zjarri shkollës dhe protestuesit e PD-së kërkuan heqjen e materialeve zgjedhore duke përmendur dekretin e presidentit për anulimin e datës së zgjedhjeve. Edhe në qytete të tjera pati protesta, pasi shumë opozitarë i referoheshin vendimit të Metës për të anuluar zgjedhjet. PD e përdori si kauzë dekretin e Metës duke bllokuar marrjen e zyrave nga të zgjedhurit e rinj vendorë pas 30 qershorit, siç ndodhi në Devoll e Kavajë.

Gjatë mbrojtjes së tij përreth 2 orë, presidenti nuk përmendi asnjë nen të Kushtetutës se ku bazohej vendimi i tij për të anuluar datën e zgjedhjeve, por mori si shembull paraardhësit e tij dhe veçanërisht Ramiz Alinë, pavarësisht se situata historike është e krejt e ndryshme. Gjithësesi komisioni hetimor do të vijojë me procedurat e shkarkimit të Metës sipas planit të veprimit të miratuar më parë./Realstory.al

PAS RAMËS, META BËN ARMIK DHE BASHËN: KËRKOI GJAKDERDHJE

PROTESTAT ME MOLOTOV TË BASHËS, META I QUAN “MITING”: DO DIGJNIN KUVENDIN

Protestat me molotov të Bashës, Meta i quan “miting”: Do digjnin Kuvendin

Në fjalën e mbajtur para deputetëve të Komisionit Hetimor, një ndër argumentet e përdorur nga Presidenti ka qenë se firmosja e dekretit për anulimin e zgjedhjeve është bërë për të mbrojtur sigurinë kombëtare të vendit. Por ajo që ra në sy ishte përpjekja deri në fund e presidentit për të mbrojtur opozitën jashtëparlamentare. Të gjithë i kujtojmë se protestat e PD-LSI, ishin të dhunshme ku u përdorën masivisht shashkat e moltovët. Por presidenti zgjedh t’i cilësojë këto protesta, mitingje. Ai thotë se ka pasur informacione të klasifikuara që i kanë ardhur, si nga shërbimet e brendshme të informacionit ashtu edhe nga shërbimet ndërkombëtare se “persona të caktuar do të shfrytëzonin mitingjet e opozitës për të djegur Kuvendin e Shqipërisë”.

Meta tha se është gati që këtë informacion të klasifikuar t’ia vërë në dispozicion kuvendit, pasi deputetët të pajisen me certifikatën e sigurisë.

“Presidenti i Republikës për shkak të detyrës së tij ka patur informacione të mjaftueshme si në rrugë zyrtare dhe shtetërore të sigurisë kombëtare për përpjekje për të organizuar akte destabilizimi në vend. Në datën 7 shtator, një ditë para se presidenti të bënte publik vendimin e tij për shfuqizimin e datës 30 qershor, ka marrë një informacion të klasifikuar. Ky informacion bënte të qartë se persona të caktuar do të shfrytëzonin mitingun e opozitës, që të digjnin kuvendin e Shqipërisë. Kisha dhe informacione të tjera të brendshme dhe ndërkombëtare. Ndaj dhe presidenti u mundua të shmangte një ‘97 të re në Shqipëri. Një ngjarje që mund të prodhonte pasoja për shqiptarët dhe prishje të imazhit të vendit tonë”, tha Meta në Komision.

Por kujtojmë se para protestës së opozitës kishte reaguar ndihmës sekretari amerikan i Shtetit, Mathew Palmer i cili kishte bërë apel që drejtuesit e protestës të merrnin masa dhe të mos lejonin akte dhune, pasi do të klasifikoheshin si organizata të dhunshme dhe se SHBA do të ndërpriste çdo marrëdhënie me ta. Të gjitha sinjalet nga opozita ishin se protesta e datës 8 qershor do të ishte paqësore, ndryshe nga protestat e kaluara. Por pikërisht në këtë moment, ndërhyn Meta i cili njofton anulimin e datës së zgjedhjeve duke dalë kundër rekomandimeve të BE-së dhe SHBA./Realstory.al

Detajet, Meta, sot “i pandehur” në Komision. Ecën në këmbë drejt Kuvendit

Presidenti Ilir Meta do të jetë të hënën (sot) në orën 09:59 përballë deputetëve të komisionit hetimor parlamentar të ngritur për hetimin dhe shkarkimin e tij për shkelje të rëndë të kushtetutës të bërë përmes firmosjes së dekreteve antikushtetuese, siç ishte ai për anulimin e datës së zgjedhjeve. Presidenti ka vendosur ta bëjë në këmbë rrugën nga presidenca drejt parlamentit dhe do të jetë i shoqëruar nga tre këshilltarë.

Në mbledhjen e Komisionit, presidenti pritet të argumentojë arsyet që çuan në anulimin e datës së zgjedhjeve dhe më pas do t’u përgjigjet pyetjeve të deputetëve që lidhen me shkeljen e kushtetutës, kompetencat që Kushtetuta i njeh presidentit, si dhe precedentët e mëparshëm.

Pritet që mbledhja të karakterizohet nga debate dhe batuta mes palëve, ndërkohë që duhet thënë se kundër aktit të presidentit është edhe opozita parlamentare. Pra Meta do të ketë përballë në komision jo vetëm maxhorancën por edhe opozitën e re parlamentare.

Kjo është hera e parë në historinë e politikës shqiptare, që një president përballet me një komisionin hetimor që kërkon shkarkimin e tij.

Komisioni Hetimor i ka dërguar kreut të shtetit kërkesën që të jetë i pranishëm në mbledhjen e së hënës datë 9 shtator në orën 10:00. Ndërkohë, vetë presidenti e cilësoi “çmenduri” pyetjen e gazetarëve nëse ai do të jetë ose jo i pranishëm në Kuvend, ndërsa theksoi se “mezi pret të kthehet në parlament”.

Duke parë reagimet që nga qershori edhe deri më sot, Presidenti Meta pritet ta shfrytëzojë përballjen e tij me deputetët në Kuvend për të dhënë mesazhe të koduara ndaj Ramës dhe Bashës, ashtu siç ka vepruar në shumë dalje me akuza të rënda edhe për ndërkombëtarët deri në deklarata për “deep state”. Kohët e fundit ai ka treguar se i pëlqen të jetë në qendër të vëmendjen mediatike dhe për këtë ka shfrytëzuar çdo hapësirë që mundësojnë rrjetet sociale.

Gjithsesi dita e hënë pritet të jetë vendimtare për presidentin Meta, edhe për faktin se në Tiranë zbarkojnë ekspertët e Komisionit të Venecias, të thirrur nga Kuvendi për të dhënë ekspertizën e tyre për kërkesën për shkarkimin e presidentit. Në axhendë është parashikuar që ekspertët e Komisionit të Venecias të zhvillojnë disa takime. Fillimisht me presidentin Meta, për të vijuar më pas me takimet e tjera zyrtare; me krye parlamentarin Gramoz Ruçi; përfaqësuesit e mazhorancës dhe opozitës në Parlament, përfshirë Komisionin e Posaçëm Hetimor, Ministrin e Brendshëm, përfaqësues të KQZ-së dhe kryetarin në detyrë të Gjykatës Kushtetuese. Para se të vendosë për shkarkimin e presidentit, maxhoranca do të presë raportin paraprak të Komisionit të Venecias. Komisioni Hetimor parlamentar ka një afat 3 mujor i cili përfundon më 9 tetor. /Realstory.al

Marrëveshje Rama-Basha? Meta, mesazh si kryetar i LSI: Asnjë kompromis!

Presidenti Ilir Meta i është kthyer mesazheve drejtuar Ramës e Bashës, ndërsa ka risjellë një video të vetën në kohën kur ishte kryetar i LSI-së.

Në videon e publikuar në profilin zyrtar të presidentit, Meta shfaqet me pamjen e tij të dikurshme, me më shumë kilogramë, ndërsa flet në një miting elektoral të LSI-së dhe thotë se nuk do të bëjë asnjë kompromis me atentatin kushtetues të 21 prillit, ditë kur u miratuan ndryshimet kushtetuese të vitit 2008 të dakordësuara midis dy partive të mëdha, PS-së në opozitë në atë kohë dhe PD-së në maxhorancë.

Sipas Metës, parimi i ndarjes së pushteteve është i shenjtë.

“Ne kurrë nuk do të pranojmë dhe nuk do të bëjmë asnjë kompromis me atentatin kushtetues të 21 prillit. Sepse për ne parimi i ndarjes së pushteteve është i shenjtë, është jetik, është vetë vija ndarëse midis demokracisë dhe diktaturës”, ka deklaruar Meta në mitingun e LSI-së. Ndërsa të shtunën (sot) shkruan se kjo deklaratë e tij e bërë 11 vite më parë, është më e vërtetë dhe më aktuale se kurrë më parë.

Përmes kësaj deklarate duket se presidenti po mundohet të japë disa mesazhe drejtuar Ramës e Bashës. Së pari edhe më herët ai është shprehur kundër ndryshimeve kushtetuese të bëra në vitin 2008. Këto ndryshime të Kushtetutës bënë që Presidenti i Republikës nga 84 vota, të zgjidhet në dy raundet e fundit vetëm me 71 vota. Që nga hyrja në fuqi në vitin 1998, Kushtetuta e Republikës së Shqipërisë është rishikuar tre herë. Në rastin e parë, në vitin 2007, u bë zgjatja e afatit të qëndrimit në detyrë për organet e zgjedhura të pushtetit vendor nga 3 në 4 vjet. Në rastin e dytë, në 2008-ën, u konsumuan ndryshimet më të rëndësishme teksa u modifikuan procedura e zgjedhjes së Presidentit të Republikës, procedura e votëbesimit të qeverisë, dhe afati i qëndrimit në detyrë për Prokurorin e Përgjithshëm. Në rastin e tretë, në vitin 2012, u bë një ndërhyrje për të mundësuar zbutjen e regjimit të imuniteteve të funksionarëve të lartë publikë.

Gjithësesi ajo që duhet të kujtojmë është se Kushtetuta u ndryshua përmes një marrëveshje Rama-Berisha dhe siç duket Meta kërkon të thotë se nuk do të pranojë një marrëveshje të ngjashme Rama-Basha, nisur nga zhvillimet e fundit dhe sinjalet për bashkëpunim mes palëve për realizimin e reformës zgjedhore.

Po kështu duke risjellë pamjet e tij në kohën kur ishte kryetar i LSI-së, Meta kërkon të tregojë se është gati të kthehet si kryetar partie. Të paktën këtë mesazh e ka dhënë edhe më herët kur deklaroi pjesëmarrjen e tij në Komisionin Hetimor parlamentar për shkarkimin e tij. Presidenti shkroi se “mezi pret të kthehet në parlament”, duke njoftuar në këtë mënyrë se fill pas shkarkimit ai do të jetë aktiv në politikë si kryetar partie dhe se do ta kenë përballë si Rama dhe Basha, të cilët nuk do të lejohen të bëjnë marrëveshje të ngjashme si ajo e 2008./Realstory.al

Edhe sot më e vërtetë dhe aktuale se 11 vite më parë!
Gepostet von Ilir Meta am Freitag, 6. September 2019

Meta e pranon: Jam çmendur! Mezi pres kthimin në Kuvend! (Për hetimin)

Presidenti Ilir Meta jep sinjale se do të largohet nga presidenca dhe do të kthehet në parlament. Këtë deklaratë e ka bërë të mërkurën teksa i ka kthyer përgjigje gazetarëve, siç thotë ai, që e kanë “çmendur” me mesazhe duke e pyetur nëse do të shkojë në seancën dëgjimore në Komisionin Parlamentar Hetimor, i cili dje vendosi ta thërrasë presidentin të dëshmojë për shkeljet antikushtetuese siç është anulimi i datës së zgjedhjeve.

“Të dashur miqtë e mi gazetarë. Më “çmendët” me sms tuaja, si asnjëherë tjetër!

Po ç’është kjo pyetje kaq absurde që më bëni të gjithë: A do shkoj tek Parlamenti?!

Së pari, Presidentit si Kryetar i Shtetit, i takon të jetë shembull i bashkëpunimit institucional. Dhe besoj se në këto dy vite kam bërë gjithçka për vendosur këtë bashkëpunim, në respekt të plotë të Kushtetutës, shtetit ligjor dhe interesit publik.

Së dyti, unë mezi pres të kthehem tek Parlamenti”, shkruan Meta, i cili mes rreshtave kthen përgjigje për shumë pyetje të tjera njëkohësisht dhe konfirmon atë që realstory ka shkruar më herët se presidenti po bëhet gati për t’u kthyer në politikë si kryetar partie.

Përmes kësaj deklarate Meta njofton kthimin e tij në politikë si opozitar në parlament, tani që është në prag të shkarkimit nga Kuvendi. Më herët realstory ka shkruar se presidenti Meta po përgatit terrenin që pas shkarkimit të krijojë një parti të re, ndërsa LSI-në do ta lërë nën drejtimin e Kryemadhit.

Komisioni Hetimor Parlamenti vendosi në mbledhjen e së martës që të thërrasë në seancë dëgjimore presidentin Meta, i cili duhet t’i përgjigjet deputetëve në lidhje me vendimin e tij për të anuluar datën e zgjedhjeve më 30 qershor. Ligjvënësit akuzojnë presidentin se ka tejkaluar kompetencat që i njeh Kushtetuat përmes këtij akti dhe se ai tentoi të destabilizonte vendin. Pritet që Meta të jetë i pranishëm në mbledhjen e ardhshme të këtij komisioni./Realstory.al

META NË BOSNJE, THYEN BOJKOTIN SHQIPTAR. KRIJON NJË PARTI TË RE?

META KONFIRMON REALSTORY PËR PARTINË E RE: LSI NUK ËSHTË AMBICIA IME

JAVËN E ARDHSHME, META “I PANDEHUR” NË KUVEND. 9 HAPA PËR SHKARKIMIN

Reforma në Drejtësi, në rrugë të drejtë. SHBA mbron procesin, rrëzon Metën

Procesi i vettingut dhe reforma në drejtësi po kryhet drejtë dhe procesi është nën monitorimin e rreptë të përfaqësuesve evropianë dhe amerikanë. Ambasada Amerikane në Tiranë ka postuar të martën një video për me reformën në drejtësi, përmes të cilës sqaron dhe njëherë se kjo reformë është një investim direkt i ndërkombëtarëve dhe se deri tani procesi është duke ecur në rrugë të drejtë. Përmes kësaj video SHBA i kthen dhe përgjigje sulmeve të presidentit Meta dhe përfaqësuesve të opozitës drejtuar reformës në drejtësi. SHBA e bën të qartë se Reforma në Drejtësi synon që të gjithë të jenë të barabartë para ligjit dhe se deri tani procesi është në rrugë të mbarë, pavarësisht akuzave të Metës dhe të opozitës se ajo ka devijuar dhe është kapur nga Rama.

Sipas SHBA-së në sistemin e vjetër gjyqësor kushdo që kishte pushtet dhe para ndikonte në vendimet e gjykatave, por me sistemin e ri kjo gjë është e pamundur. SHBA kujton gjithashtu se ngritja e SPAK pritet të bëhet shumë shpejt realitet. Kjo strukturë do të hetojë zyrtarët e korruptuar dhe të lidhur me krimin dhe do të garantojë drejtësi të barabartë për të gjithë.

“Çfarë është reforma në Drejtësi? Në korrik të vitit 2016 parlamenti i Shqipërisë votoi unanimisht për të ndryshuar 1/3 e Kushtetutës dhe për të transformuar sistemin e Drejtësisë në mënyrë që të trajtojë si duhet korrupsionin. Kushtetuta e re siguron që Shqipëria të ketë gjyqtarë të pastër si dhe mbikëqyrje për të siguruar që kushdo vepron sipas rregullave. Si funksionon kjo? 800 gjyqtarët dhe prokurorët shqiptarë duhet të rivlerësohen nga vettingu. Vettingu gjatë rivlerësimit shqyrton nëse gjyqtarët dhe prokurorët kanë burime të pashpjegueshme pasurie, lidhje me krimin e organizuar dhe nëse janë të aftë. Vettingu siguron që gjyqtarët dhe prokurorët e korruptuar të mos futen në sistemin e ri.

E dimë që ky proces po kryhet drejtë sepse vëzhgues europianë dhe amerikanë sigurohen që procesi të kryhet në mënyrë korrekte. ONM misioni i ndërkombëtar monitoron procesin dhe sigurohet që ai të kryhet sipas rregullave”, sqaron ambasada e SHBA-së.

Si do të garantojë sistemi i ri që të gjithë të veprojnë sipas rregullave?

Ambasada më tej shpjegon se me sistemin e ri krijohen dy organe të reja, KLP dhe KLGJ.

“Detyra e KLGJ është që gjyqtarët e rivlerësuar që kanë kaluar vettingun është të sigurohen që të vendosen në detyra të posaçme dhe të sigurohen që ata zbatojnë rregullat. KLP bën të njejtën gjë, por me prokurorët.

Le t’i shohim ato si forca policore e sistemit gjyqësor. Të dy organet përbëhen nga gjyqtarë dhe prokurorë profesionistë të cilët kanë kaluar vettingun. Kanë po ashtu edhe anëtarë jo gjyqtarë dhe jo prokurorë si unë dhe ti për të monitoruar procesin dhe për të siguruar që gjyqtarët dhe prokurorët bëjnë punën e tyre. Këta anëtarë pra jo gjyqtarë dhe jo prokurorë kanë kaluar rivlerësimin e tyre të kryer nga avokati i popullit me ndihmën e ONM-së. Të dy këshillat u ngritën në dhjetor të vitit 2018 dhe tani janë në punë.

Aktualisht KLP po punon për të ngritur një grup të ri që do të hetojë dhe do të ndjekë penalisht zyrtarë të korruptuar dhe anëtarë të krimit të organizuar. Këtë grup e njohim si njësia e posaçme anti korrupsion ose shkurt SPAK për të cilën do të flasim në një video tjetër. Ky organ do t’i çojë çështjet në gjykatën antikorrupsion, e cila do të ketë përgjegjësinë për të gjykuar dhe më pas për të dënuar zyrtarët e korruptuar dhe anëtarët e krimit të organizuar.

Në të kaluarën kushdo që kishte para apo pushtet mund të ndikonte në sistemin e gjykatave në favor të tij. Në sistemin e ri secili duhet të veprojë sipas rregullave. Secili duhet të jetë i barabartë para ligjit. Kjo është reforma në drejtësi”, sqaron SHBA.

Presidenti Meta doli hapur në shumë raste kundër reformës në drejtësi të cilën e emërtoi si Ramaforma, duke akuzuar kryeministrin Rama por kapjen e saj. Sulmeve të Metës nuk i shpëtuan as ndërkombëtarët dhe veçanërisht amerikanët. Presidenti i akuzoi ata se kanë kapur reformën një drejtësi së bashku me Ramën dhe kanë bërë përpjekje për krijimin e një “deep state”, ose të një shteti paralel në Shqipëri. Gjatë dy muajve të fundit SHBA janë investuar drejtëpërdrejtë në informimin e opinionit publik në lidhje me reformën në drejtësi duke postuar rreth 6 video në lidhje me ecurinë e kësaj reforme të cilat në thelb janë një përgjigje ndaj akuzave të presidentit por edhe të përfaqësuesve të opozitës. Duke ia bërë të qartë atyre se në krye te këtij procesi qëndron SHBA dhe BE dhe se të gjithë do të jenë të barabartë para ligjit, përfshi këtu edhe presidentin, kryeministrin dhe këdo tjetër./realstory.al

FACT CHECKING/ SI SHBA ‘HESHTI’ METËN, QË E QUAJTI REFORMËN NË DREJTËSI, RAMAFORMË

DREJTËSIA, META SULMON REFORMËN… DHE EURALIUS

FACT CHECKING/ METAMORFOZA E METËS, NË 2 MUAJ 20 SULME NDAJ NDËRKOMBËTARËVE

SPAK NË PRAG, META AKUZON PËR ANSHMËRI RAMËN: PËRDORI LU DHE VETTINGUN PËR TË PASTRUAR KED

Meta nuk ndal akuzat: Instalimi i sistemit totalitar pengon integrimin e vendit

Presidenti Meta nuk harron në asnjë fjalim, aktivitet apo takim të tij, që të sulmojë qeverinë. Me gjuhën e një opozitari, Meta kundërshton ende me forcë se zgjedhjet e 30 qershorit janë të paligjshme dhe njëpartiake dhe se duhet shmangur vendosja e një sistemi monist në vend. Presidenti Meta tha se kurrsesi nuk duhet lejuar asnjë sistem totalitar të instalohet në Shqipëri, në të gjitha format e tij, por cilëson se duhet të forcohet demokracia që të ecet përpara në rrugën e Bashkimit Europian. Këto deklarata presidenti i bëri gjatë ceremonisë së vlerësimit të viktimave të zhdukura nga regjimi komunist në Ditën Ndërkombëtare të të Zhdukurve me Forcë.

“Dita Ndërkombëtare e të Zhdukurve me Forcë është një mundësi për të ngritur zërin dhe për të mos i harruar viktimat e zhdukur gjatë regjimit komunist. Një ditë si kjo, na kujton se ne duhet të jemi edhe më shumë të bindur për një rrugëtim më të shpejtë dhe solid drejt Bashkimit Europian dhe forcimit të demokracisë, duke mos lejuar më kurrë asnjë sistem totalitar të instalohet në Shqipëri, në të gjitha format e tij. Që të mos kthehemi 30 vite pas si në kohët e errëta të dhunimit dhe shtypjes, por të ecim përpara denjësisht si qytetarë të lirë europianë dhe me dinjitetin njerëzor që meriton çdo shqiptar“, shprehet Meta.

Kjo është hera e dytë që Meta hedh këto akuza brenda 12 orëve, duke akuzuar Ramën se po vendos një sistem totalitar e komunist në vend. Më herët e bëri në një intervistë për median italiane “Il Giornale”. Anulimi i zgjedhjeve të 30 qershorit futi vendin në krizë dhe për të mbrojtur veten, Meta akuzon mazhorancën që zhvilloi zgjedhje komuniste, e cila në fakt thjeshtë ndoqi ligjin dhe atë që vetë presidenti e kishte dekretuar sipas Kushtetutës, një datë e mbështetur edhe nga ndërkombëtarët. Meta nuk e pranon faktin se anulimi i zgjedhjeve të 30 qershorit ishte arsyeja e krizës dhe vijon të sulmojë qeverinë se kriza erdhi si pasojë e mospranimit nga Rama të dekretit të tij.

Meta sfidon nga 2751 metra lartësi: Kaloj çdo pengesë (edhe shkarkimin?)

Kreu i shtetit, Ilir Meta ka zgjedhur majën e malit të Korabit, që ndodhet 2751 metra mbi nivelin e detit, që të sfidojë mazhorancën, vetëm pak ditë para se të nisë sesioni i ri parlamentar, pasi në shtator komisioni hetimor do të nxjerrë konkluzionet për shkarkimin e Presidentit. I braktisur pothuajse plotësisht nga faktori ndërkombëtar, por edhe nga kreu i opozitës, i cili nuk pranoi të regjistrohet për 13 tetorin, pavarësisht se Meta i shtyu zgjedhjet e 30 qershorit për të, kreu i shtetit ka zgjedhur që mesazhet politike, kohët e fundit edhe më të rralla, t’i japë nga lugina dhe nga male, si në Kosovë, ashtu edhe në Shqipëri.

Të premten në mëngjes, ai ka nxjerrë një postim në rrjetet sociale, duke treguar se ishte në majën e Malit të Korabit, nga ku ka dhënë një mesazh sfidues për mazhorancën, e cila po pret me padurim votimin për shkarkimin e tij dhe ngritjen e Gjykatës Kushtetuese për vulosjen e këtij vendimi. “Në majën më të lartë të maleve shqiptare, mbi Korab, aty ku duket sikur prek qiellin me dorë. Ngjitja ishte sfidë jo e lehtë, por bukuritë dhe monumentet e rralla natyrore të këtij mali madhështor, të frymëzojnë dhe të japin energji të reja për të kaluar me sukses çdo pengesë!”, shprehet Meta, duke dhënë mesazhin se ai nuk e ka pasur të lehtë ngjitjen në krye të shtetit, por edhe duke paralajmëruar se do të kalojë pengesën e shkarkimit, që duket se po i afrohet gjithnjë e më shumë. Megjithatë, krahasimi metaforik i Metës duket paksa i ekzagjeruar, ndoshta edhe për faktin, ashtu siç ai shprehet në pjesën e parë të mesazhit se aty i duket sikur prek qiellin me dorë.

Ndërsa një tjetër sfidë e Metës është 13 tetori, që deri më sot është njohur vetëm nga LSI dhe disa aleatë të vegjël të opozitës, të cilët më shumë e kanë pranuar për faktin se mbetën pa asnjë pushtet për shkak të aksionit opozitar të drejtuar nga Basha, sesa mendojnë që do të ketë zgjedhje me këtë datë. Gjithsesi, nga e hëna, kreu i shtetit rikthehet në zyrë, ndërkohë që Komisioni Hetimor ka vijuar punën gjatë gjithë verës për përgatitjen e relacionit për shkarkimin e tij.

Një nga informacionet e publikuara gjatë gushtit për punën e kryer nga Komisioni Hetimor janë mbledhja e të dhënave të policisë për krimet zgjedhore para anulimit të 30 qershorit, duke qenë se Meta ka deklaruar që kishte informacione se po përgatiteshin krime të rënda gjatë procesit zgjedhor. Por, nga të dhënat e policisë së shtetit rezulton se kishte pasur vetëm 2 kallëzime për krime elektorale, ndërsa pas 10 qershorit, u proceduan 192 persona, duke shkaktuar kështu një krizë, jo vetëm institucionale, por edhe goditje ndaj rendit kushtetues. Gjithsesi, përveç institucioneve që janë vënë në lëvizje, një rol të rëndësishëm në procesin e shkarkimit të Presidentit pritet të ketë edhe Komisioni i Venecias, që më 9 shtator do të zbarkojë në Tiranë. / Realstory.al

Në majën më të lartë të maleve shqiptare, mbi Korab, aty ku duket sikur prek qiellin me dorë. Ngjitja ishte sfidë jo e…
Gepostet von Ilir Meta am Freitag, 30. August 2019