Tag: negociata

Integrimi/ Komisioneri i BE për Zgjerimin: Nuk ishte e lehtë të fillonim negociatat me Shqipërinë, ecuria varet nga reformat

Në një intervistë për median gjermane ‘‘Frankfurt Allgemeine”, komisioneri i BE për Zgjerimin, Oliver Varhelyi komentoi procesin e antërarësimeve të vendeve candidate.  

Duke u ndalur te Shqipëria, që e merr si shembull të një vendi që ka bërë përpjekje të mëdha, ai thekson se çelja e negociatave me BE nuk ishte aspak e lehtë, por në fund u bë.

Më tej ai thekson se një vend kandidat duhet të jetë serioz sa i përket synimit për t’u anëtarësuar në BE, dhe kjo mund të ndodhë vetëm në sajë të reformave reale.

PJESË NGA INTERVISTA

PYETJA: Komisioner, shumë vende të BE-së kanë kohë që kanë rezerva në lidhje me pranimin e anëtarëve të rinj. A do të vijë koha kur Komisioneri i Zgjerimit do të duhet të marrë në konsideratë rregullimet institucionale me Ballkanin Perëndimor nën pragun e anëtarësimit të plotë?

Ajo që ne po ofrojmë është anëtarësimi i plotë, siç vendoset nga krerët e shteteve dhe qeverive evropiane. Për ata që kërkojnë më pak se kaq, unë u përgjigjem: Por atëherë mos prisni që rajoni të përputhet me kushtet tona. Dhe mos prisni që rajoni të jetë një fqinj i sigurt dhe i qëndrueshëm për ne.

PYETJA: Për një kohë të gjatë, mbizotëron pikëpamja se një vend që është një kandidat për anëtarësim në BE ose madje është duke zhvilluar negociata të anëtarësimit po bën përparim demokratik vetëm përmes kësaj. Por a është ende kështu?

Ky nuk është një automatizëm. Duhet të jetë zgjedhja serioze e një vendi për t’u bashkuar me BE. Kjo është e mundur vetëm me reforma reale në vendet kandidate, të cilat ata gjithashtu i dinë. Kjo është treguar kohët e fundit nga përpjekjet e mëdha që Maqedonia e Veriut dhe Shqipëria kanë bërë vetëm për të qenë në gjendje të fillojnë negociatat e pranimit.

PYETJA: Asnjë zgjedhje nuk mund të fitohet me premtime për t’u bashkuar për dhjetë ose më shumë vjet në të ardhmen. A kanë nevojë për qëllime të ndërmjetme të arritshme procesi i pranimit në mënyrë që politika në vendet kandidate të mund të fitojë përsëri zgjedhjet me premtimin e anëtarësimit?

Deklarata e bërë nga shtetet kandidate është e qartë: Ata po përpiqen për anëtarësim të plotë në BE. E vërtetë që rruga atje është bërë gjithnjë e më e gjatë. Sa kohë, saktësisht, varet kryesisht nga vendet kandidate.

PYETJA: A nuk është një shtet ligjor që funksionon një kusht për mbështetjen financiare nga BE?

Vendet që duan të bashkohen me BE-në kanë nevojë për institucione të qëndrueshme, duhet të garantojnë demokracinë, shtetin e së drejtës, të drejtat e njeriut dhe mbrojtjen e pakicave. Procesi i anëtarësimit bazohet në kushte të rrepta, por të drejta, me bazat e tilla si sundimi i ligjit në qendër. Mbështetja jonë i ndihmon kandidatët të përmbushin kushtet, përfshirë kriteret demokratike. Në të njëjtën kohë, ne i ndihmojmë ata me zhvillimin ekonomik dhe konvergjencën. Për më tepër, bëhet fjalë për projekte që nuk përfitojnë nga kjo apo ajo elitë, por nga rajoni në tërësi. Për shembull, ne duam të lidhim të gjitha kryeqytetet e Ballkanit Perëndimor me njëri-tjetrin me autostrada dhe linja hekurudhore. Këto janë projekte objektive që ne do t’i financojmë brenda mandatit të komisionit aktual.

Juncker: Zhgënjim, një gabim i madh historik

Presidenti i Komisionit Europian, Jean-Claude Juncker është shprehur i zhgënjyer sa i përket mos hapjes së negociatave me Shqipërinë dhe Maqedoninë e Veriut, duke deklaruar qartazi se ky është një gabim i madh historik i Bashkimit Europian.

“Jam shumë i zhgënjyer nga rezultati i diskutimit për zgjerimin e Bashkimit Europian. Është një gabim i madh historik të mos hapës negociatat e zgjerimit me ShqipërinE dhe Maqedoninë e Veriut. Një gabim i madh historik!”, ka deklaruar Juncker, duke përsëritur zhgënjimin e tij.

Gjatë fjalës së tij në Parlamentin Europian me rastin e debatit për përgatitjet për Këshillin Evropian të 17-18 Tetor 2019, Juncker kërkoi që të mbahet premtimi me vendet e Ballkanit Perëndimor. “Maqedonia e Veriut dhe Shqipëria kanë bërë përparim thelbësor. Kjo është arsyeja pse presidenti Tusk, presidentja e zgjedhur Von der Leyen dhe unë u shkruam një letër shteteve anëtare duke i ftuar ata të bëjnë atë që u premtuan vendeve të Ballkanit Perëndimor, veçanërisht Shqipërisë dhe Maqedonisë së Veriut”, pati deklaruar Juncker para takimit të liderëve të 28 vendeve anëtarë të BE.

Negociatat, Merkel: Dëshpëruese, nuk mbajtëm premtimin

Kancelarja Angela Merkel ka deklaruar zyrtarisht mungesën e konsensusit mes vendeve të BE-së për të çelur negociatat me Shqipërinë dhe Maqedoninë e Veriut. Merkel tha se ky vendim i BE-së ishte dëshpërues dhe patjetër që do të shkaktojë zhgënjim mes dy vendeve të Ballkanit Perëndimor, por ajo tha se mirëkupton edhe qëndrimin e Presidentit Macron për reformimin e sistemit të zgjerimit të Bashkimit Europian.

“Janë disa vende që kanë rezerva për hapjen e negociatave. Ne kemi diskutuar për këtë, problemi është se cili do të jetë efekti nëse hapen negociatat. Patjetër që do të zhgënjehen si kryeministri i Maqedonisë së Veriut dhe ai i Shqipërisë. Unë fola me Zaev, por e mbështes në një pikë Macron sa i përket procesit ë zgjerimit që duhet reformuar. Kemi rënë dakord për disa gjëra që duhen bërë. Ne vërtetë dëshirojmë që të ndodhë hapja e negociatave”.

Europa, i kujt është faji?
Rezultati

“Maqedonia e Veriut ka bërë shumë sa i përket hapjes së negociatave. Ndryshimi i emrit ka qenë një progres i madh, por edhe Shqipëria ka bërë progres, por nuk na ka bërë ende që të marrim një vendim unanim, ka pasur ndasi sa i përket një vendimi të përbashkët. Në Gjermani ka rezerva sa i përket Shqipërisë, bëhet fjalë për hapjen e negociatave të Shqipërisë, ata patjetër që duhet të përballen me disa kushte që ne kemi vendosur, në Shqipëri vazhdon të ketë probleme, përfshirë edhe emigrimi, megjithëse Shqipëria ka bërë maksimumin sa i përket kësaj çështje. Në fakt kur bëjmë premtime, patjetër që duhet t’i mbajmë dhe nuk duhet t’u kthejmë shpinën vendeve. Në fakt janë disa faza sa i përket anëtarësimit në BE”, tha Merkel.

E pyetur sërish për negociatat dhe nëse pati një votim për Shqipërinë dhe Maqedoninë e Veriut, Kancelarja Merkel tha se kjo çështje nuk është hedhur në votim. Ajo tha se për Shqipërinë disa vende të BE-së kundërshtuar procesin e hapjes së negociatave. “Nuk patëm vendim. Nga vendet e BE-së pati disa vende që e kundërshtuan hapjen e negociatave për Shqipërinë”, tha ajo.

Hahn: Vendimi i BE rrezikon destabilizimin e Ballkanit

Zhgënjyes, e ka cilësuar eurokomisioneri për zgjerimin në BE, Johannes Hahn vendimin e liderëve që nuk arritën të dalin me një marrëveshje pro çeljes së negociatave të pranimit për Shqipërinë dhe Maqedoninë e Veriut në samitin e Brukselit. Një vendim që nuk na bën aspak krenar, shkruan Hahn, ndërsa shton se ky vendim rrezikon ketë pasoja negative dhe destabilizim në Ballkan. Përgjegjësia jonë, shkruan Hahn është që të mbështesim fuqimisht këto shtete dhe veçanërisht qytetarët e zhgënyer me të drejtë, ndërsa premton se vetë ai do të punojë fort në mbështetjen e strategjisë së zgjerimit të BE-së.

“Udhëheqësit e BE nuk arritën të zbatojnë angazhimin e tyre për të hapur negociatat me Maqedoninë e Veriut dhe Shqipërinë. Ky është një zhgënjim ekstrem. BE tani duhet të sqarojë se sa serioz është angazhimi i tyre për integrimin e Ballkanit Perëndimor.

Përgjegjësia jonë tani është të mbështesim qytetarët e këtyre shteteve që janë të zhgënjyer deri në kockë me të drejtë dhe të vazhdojmë të bëjmë gjithçka, që unë kam fuqi të bëj për t’i mbështetur ata. Integrimi  në BE i Ballkanit është dhe mbetet një politikë e rëndësishme strategjike, në interesin tonë të ndërsjellë.

Siç u tha tashmë në Luksemburg: Ky nuk është një moment lavdie për BE. Refuzimi i njohjes së progresit të faktuar do të ketë pasoja negative, përfshirë rrezikun e destabilizimit të Ballkanit Perëndimor, që do të sjellë ndikime edhe në BE.

Falënderoj të gjithë ata që natën e kaluar vunë gjithë peshën e tyre për të arritur një vendim me rëndësi të madhe strategjike për BE dhe luftuan për dërgimin e një sinjali të  shpresës tek qytetarët e Ballkanit Perëndimor”, shkruan Hahn.

Krerët e BE po shkojnë drejt shtyrjes së çeljes së negociatave  për Shqipërinë dhe MAqedoninë e Veriut pas vetos së vendosur nga Franca e cila kërkon më parë reformimin e BE dhe më pas ecjen përpara me procesin e zgjerimit./realstory.al

Nuk ka marrëveshje për negociatat, vendimi i BE drejt shtyrjes

Negociatat për Shqipërinë dhe Maqedoninë e Veriut po shkojnë sërish drejt shtyrjes, pasi kryeministrat e vendeve anëtare të BE nuk kanë arritur të kenë asnjë marrëveshje gjatë të enjtes dhe paradites së të premtes, ndërkohë që samiti vijon të diskutojë për çështjet klimaterike.

Euroactiv raporton se kryeministrat nuk kanë arritur të kenë një dakordësi, duke e lënë pa vendim çështjen e negociatave me Shqipërinë, ndërsa zërat janë se kjo çështje mund të diskutohet në një takim tjetër të liderëve të BE-së. “Një rinisje e bisedimeve për zgjerimin nuk është në axhendën e sotme, megjithëse një përmendje mbi ndryshimin procedural në konkluzionet përfundimtare nuk përjashtohet plotësisht”, tha një diplomat i BE, citon Euractiv.

Ndërkohë, Kryeministri i Bullgarisë, Boyko Borisov, ka deklaruar se asgjë nuk ka përfunduar për Shqipërinë dhe Maqedoninë e Veriut sa i takon çeljes së negociatave. “Asgjë nuk ka mbaruar për Shqipërinë dhe Maqedoninë e Veriut, ajo vetëm po shtyhet. Është një fakt që ne nuk pranuam të kishim një vendim me shkrim për zgjerimin në Këshill. Ata kanë mbështetjen tonë që nga fillimi dhe gjithçka që filloi mund të përfundojë për gjashtë deri në shtatë muaj. Kam pasur një bisedë të gjatë me Zoran Zaev, dhe e këshillova që të mos jepte dorëheqjen. Ai bëri shumë dhe ka shumë për të bërë” tha Borisov.

Manovra e Holandës për “të larë duart” me Shqipërinë

Ministri i jashtëm holandez lexon të martën në mbrëmje para parlamentit holandez relacionin për Shqipërinë dhe Maqedoninë e Veriut. Parlamenti holandez ka një shumicë të brishtë që mban qeverinë, e cila megjithëse me ligj nuk është e detyruar të zbatojë rezolutën edhe nëse ajo është kundër hapjes së negociatave me Shqipërinë, nuk mund të rrezikojë fatin e saj për këtë arsye. Por nga ana tjetër qeveria e Holandës nuk mund të rrezikojë “faqen” e saj përballë Europës, nëse ngelet e vetmja kundër. Kështu ka filluar një lojë taktike mes qeverisë dhe parlamentit në Hagë, për të evituar këto dy skenare. Kjo vihet re qoftë në gjuhën e përdorur, qoftë në faktin se pikërisht në këtë kohë kryeministri holandez ka “zgjedhur” që të jetë në vizitë në Indonezi, sesa të jetë në parlament në natën e vështirë të të martës. Po për me shumë kjo vihet re në relacionin që do të lexojë para deputetëve portokallinj, ministri i Jashtëm Stepp Block.

“Këshilli konkludoi në 26 qershor 2018 se negociatat e pranimit me Maqedoninë Veriore mund të hapen pasi të ishte implementuar një rrugë konkrete e reformës së sundimit të ligjit: vendi duhej të arrinte rezultate të qëndrueshme dhe të prekshme në fushën e reformës në sektorin gjyqësor, shërbimet e sigurisë, etj. sektori i sigurisë dhe administrata publike. Qeveria ndan vëzhgimin e Komisionit se qeveria e Maqedonisë Veriore ka ndërmarrë shumë hapa pozitivë gjatë vitit të kaluar. Marrëveshja “Prespa” është një shembull për rajonin dhe janë ndërmarrë hapa demonstrues në axhendën e reformës. Një hap i rëndësishëm që duhet të ndërmerret është miratimi i një ligji që garanton gjithashtu ndjekjen e pavarur të korrupsionit të mundshëm në të ardhmen në nivelin më të lartë. Ka një konsultë të vazhdueshme intensive midis opozitës dhe qeverisë për këtë. Kjo ende nuk ka rezultuar në një përfundim konkret”.

Duket se qeveria e Holandës kërkon të jetë me kujdes, në linjën europiane, të mos ndarjes së dy dosjeve, Maqedonisë dhe Shqipërisë. Për këtë, ka vendosur të jetë kritike me të dyja:

“Këshilli gjithashtu konkludoi në 26 qershor 2018 se Shqipëria duhej të zbatonte një rrugë konkrete të reformës së sundimit të ligjit përpara se të hapeshin negociatat e pranimit: vendi duhej të kryente reforma gjyqësore dhe të arrijë rezultate të prekshme në luftën kundër korrupsionit dhe krimit të organizuar. Kabineti mirëpret hapat që Shqipëria ka ndërmarrë tashmë gjatë vitit të kaluar në fushën e zgjidhjes radikale, krijimin e një numri institucionesh në fushën e sundimit të ligjit, një numër në rritje të operacioneve policore dhe dënimin e dy kriminelëve kryesorë. Por Shqipëria duhet të bëjë më shumë për të luftuar korrupsionin dhe krimin e organizuar. Struktura Speciale Kundër Korrupsionit dhe Krimit të Organizuar (SPAK) së paku duhet të jetë në funksion të parë dhe Shqipëria duhet të tregojë një rekord bindës në luftën kundër krimit të organizuar dhe korrupsionit. Kabineti është i mendimit se është e parakohshme të filloni negociatat tani”.

Shqetësimi i qeverisë holandeze se kështu ajo rrezikon të jetë e vetmja kundër dy vendeve kandidate, vihet re në paragrafin e fundit: 

“Jo të gjitha shtetet anëtare ende kanë përcaktuar përfundimisht pozicionin e tyre, por një shumicë e madhe në Këshill është në favor të hapjes së negociatave të pranimit me të dy vendet. Shumë shtete anëtare deklaruan më herët se ata donin të shpejtonin procesin e zgjerimit në mënyrë që të ruanin vrullin e reformave ligjore, t’i lejojnë BE-së të projektojë vlerat dhe standardet e saj në vendet e Ballkanit Perëndimor dhe t’i ofrojë popullatës një perspektivë. Këto shtete anëtare theksuan fuqinë transformuese të procesit të zgjerimit. BE-ja duhet të përmbushë premtimet e saj; Maqedonia Veriore dhe Shqipëria bëjnë të njëjtën gjë, sipas këtyre Shteteve Anëtare”.

Me kujdes relacioni i qeverisë holandeze para parlamentit nënvizon dhe çështjet gjeostrategjike që lidhen me këtë vendim:

“Për shumë shtete anëtare, konsideratat gjeopolitike dhe stabiliteti në rajon gjithashtu luajnë një rol. Prandaj, një numër i Shteteve Anëtare dëshirojnë një lidhje midis dy vendimeve. Ky grup i Shteteve Anëtare pajtohet me rekomandimet e Komisionit për Maqedoninë Veriore dhe Shqipërinë dhe dëshiron të hapë negociatat e pranimit me këto dy vende sa më shpejt që të jetë e mundur. Këto shtete anëtare nënvizuan se bëhet fjalë vetëm për fillimin e një procesi të gjatë – dhe jo për anëtarësimin aktual”.

Dhe në fund vjen “bomba” gjermane. Holanda ka qënë një vend që në Europë ka folur gjithnjë ne sinkron me Berlinin. Kështu ndodhi edhe në qershor. Duket se në relacion me qetësi e kujdes, edhe qeveria e Holandës i kërkon parlamentit të bëjë të njëjtën gje:

“Ndërkohë, Bundestag gjerman ka rënë dakord edhe me vendimin e qeverisë gjermane për të hapur negociata me Maqedoninë Veriore, duke bërë thirrje që vëmendje e vazhdueshme t’i kushtohet përparimit të reformave, veçanërisht në fushën e sundimit të ligjit dhe trajtimin e korrupsionit dhe krimit të organizuar. Për më tepër, Bundestag ka pranuar vendimin e qeverisë gjermane për të hapur negociata me Shqipërinë, me kusht që të plotësohen kushtet shtesë. Këto kushte përfshijnë ri-funksionimin e Gjykatës së Lartë dhe Gjykatës Kushtetuese, si dhe zbatimin e reformave zgjedhore. Për më tepër, Bundestag bën thirrje për përparim të më tejshëm në fusha të tilla si krimi i organizuar dhe korrupsioni në të gjitha nivelet para hapjes së kapitujve të parë në negociatat e pranimit me Shqipërinë”.

Por çfarë synon kjo “lojë” e re mes qeverisë dhe parlamentit holandez? Deputetët janë kundër Shqipërisë dhe një rezolutë e kërkuar nga grupet e ekstremit të djathtë me siguri do të merrte shumicën e votave pro. Kësaj i ndruhet qeveria e Holandës. Burime diplomatike të huaja i pohuan në rrugë  jo zyrtare realstory.al se përpjekja është që kjo mos të ndodhë dhe relacioni të miratohet në formën që është. Forma “aseksuale” e relacionit lejon në fakt që qeveria e Holandës t’i ketë duart e lira në të dyja variantet: Nëse nuk është vetëm kundër Shqipërisë, vota e saj do të  jetë pro mos hapjes së negociatave. Por në rast se zëri portokalli do jetë një “zë në shkretëtirë” dhe i vetëm kundër Tiranës dhe Shkupit, atëherë kjo rezolutë do të lejojë hapësirë për manovrim dhe Holanda, nuk do të pengojë hapjen e negociatave për të dyja vendet e Ballkanit Perëndimor./Realstory.al/

Bloomberg zbulon dokumentin e BE: “PO” negociatave me Shqipërinë

“Bashkimi Evropian do të autorizojë çeljen e negociatave zyrtare të pranimit të Shqipërisë dhe Maqedonisë së Veriut, muajin e ardhshëm”. Kështu shkruan media prestigjioze Bloomberg, e cila i referohet një draft dokumenti të Bashkimit Europian, ku shkruhet se BE do të vlerësojë çeljen e negociatave për dy vendet e Ballkanit Perëndimor, duke “vënë bast që perspektiva e anëtarësimit në union do të ndihmojë në ankorimin e mëtejshëm të rajonit të Ballkanit të trazuar të kontinentit drejt Perëndimit”.

Në dokumentin e zbuluar nga Bloomberg shkruhet se dy vendet kanë përparuar me reformat, ndërkohë që vihet në dukje edhe fakti se shumë vende anëtare të BE-së vijojnë të jenë skeptike dhe të zhgënjyer nga shtetet që u pranuan më herët në Union.

“Në dritën e progresit të arritur në ecurinë e reformave”, në mbledhjen e ministrave të BE në Luksemburg në 15 tetor do të vendoset “hapja e negociatave të pranimit” me qeveritë e Tiranës dhe të Shkupit,- sipas një drafti të komunikatës së tyre që e ka parë Bloomberg.

Bloomberg shkruan më tej se deklarata edhe mund të ndryshojë, siç ndodhi më herët me një deklaratë të ngjashme, në të cilën nuk rekomandohej nisja e bisedimeve.

“Një shtyrje e ngjashme për të hapur negociatat e pranimit u vendos në qershor, pasi vende si Franca, Hollanda, Gjermania dhe Danimarka nuk pranuan. Qeveritë e shteteve perëndimore të BE-së janë acaruar nga dështimi i disa shteteve lindore që iu bashkuan bllokut në 2004; për të vendosur sundimin e ligjit dhe luftën kundër korrupsionit. Kështu këta shtete janë të kujdesshëm të pranojnë anëtarë të rinj në unionin më të madh tregtar në botë, ku njerëzit, mallrat dhe shërbimet mund të lëvizin lirshëm”, shkruan Bloomberg.

“Në vendimin e qershorit për zgjerimin, BE tha se pranimi i anëtarëve të rinj duhet të marrë parasysh aftësinë e Unionit për t’i integruar ato.

Edhe pse bisedimet e pranimit zgjasin me vite – apo edhe dekada, si në rastin e Turqisë – dhe përfundimi i tyre nuk është i garantuar, fillimi i procesit është një fitore për qeverinë e Maqedonisë së Veriut. Ky shtet investoi pjesën më të madhe të kapitalit të saj politik në një marrëveshje me Greqinë për të ndryshuar emrin kushtetues të ish republikës Jugosllave, me shpresën se kjo do t’i hapte rrugën anëtarësimit në BE.

Qeveria e re greke ka thënë se nuk pajtohet me marrëveshjen e bërë midis Maqedonisë së Veriut dhe paraardhësit të saj, por nuk do të kërkojë ta anulojë atë për shkak të nevojës për të ruajtur vazhdimësinë në marrëveshjet ndërkombëtare”, shkruan më tej Bloomberg.

Edhe në Shqipëri shpresat janë të larta që këtë herë BE të vendosë pro çeljes së negociatave, nisur kjo edhe nga vendimi i fundit i Bundesdagut gjerman. Vendimi i Gjermanisë pro çeljes së negociatave është parë si një shenjë pozitive që do të ndikojë edhe në vendimin që do të marrin shtetet e tjera skeptike si Franca apo Holanda. Bazuar edhe në dokumentin, të cilit i referohet Bloomberg, gjasat janë që BE të shkojë me një “po”, këtë herë, për Shqipërinë dhe Maqedoninë  e Veriut./realstory.al

Kusht për negociata, regjistër me zyrtarë që duhen hetuar

Ngritja e SPAK dhe funksionimi i institucioneve të drejtësisë në mënyrë të pavarur duket se është kushti parësor i BE për çeljen e negociatave për Shqipërinë. Kreu i Grupit Parlamentar të PS-së, Taulant Balla e konfirmoi një gjë të tillë para mediave. Ai u pyet nga gazetarët nëse arrestimi i peshqve të mëdhenj është kusht për negociatat dhe tha se kusht është funksionimi i pavarur i drejtësisë. Por Balla shtoi se ngritja e SPAK do të shoqërohet edhe me krijimin e një regjistri me emrat e funksionarëve të lartë të shtetit që do të hetohen së shpejti. Duke konfirmuar pikërisht atë që realstory.al e ka paralajmëruar më herët: që Shqipëria duhet të japë prova se drejtësia funksionon, (pra që ka zyrtarë të arrestuar), në mënyrë që të fitojë negociatat.

“Duhet të kuptojmë se funksionimi i drejtësisë nuk bëhet me plan dhe numra funksionarësh apo përfaqësues të lartë përpara drejtësisë. Drejtësia duhet të funksionojë e pavarur nga politika. Ky ka qenë gur i themelit të funksionit të drejtësisë. Funksioni dhe ngritja e Prokurorisë Speciale Antikorrupsion, do te shoqërohet me një regjistër të personave të nivelit të lartë që duhen hetuar dhe gjykuar paanshmërish. Gjithmonë rruga e integrimit europian shoqërohet me standarde, kushte që çdo vend duhet t’i përmbush. Edhe vendet që janë anëtare të BE, shoqërohen me kushte që duhet të përmbushen”, tha Balla.

Më herët është deklaruar se SPAK do të jetë funksional brenda shtatorit. Madje kreu i KLP-së, Gent Ibrahimi duket se ka vënë emrin e parë në listë, ndërsa ka deklaruar se puna e SPAK mund të nisë me dosjen e Adriatik Llallës, ish kryeprokurorit të përgjithshëm të Shqipërisë. Por Ibrahimi ka premtuar se SPAK do të hapë edhe dosje të vjetra. Pritet që në bazë të këtyre “fryteve” të vlerësohet funksionimi i drejtësisë së pavarur. Ndërkohë që ndërkombëtarët në union kanë vlerësuar ecurinë e deritanishme të procesit të vettingut të gjyqtarëve dhe prokurorëve pavarësisht kritikave dhe akuzave që vijnë nga opozita dhe presidenti./realstory.al

Rama për Euronews: Maqedonia para Shqipërisë mund të destabilizojë rajonin

Nëse BE do të vendosë pro hapjes së negociatave për Maqedoninë e Veriut dhe kundër për Shqipërinë, kjo mund të sjellë destabilizim në mbarë rajonin. Kështu është shprehur kryeministri Edi Rama në një intervistë dhënë Euronews. Megjithëse është shfaqur tejet sportiv, me një bluzë me mëngë të shkurtra dhe me pantallona të shkurtra ku ka pritur gazetarin e euronews Jack Parrock  në vilën qeveritare në Dhërmi, ku është duke kaluar disa ditë pushimesh, Rama është treguar kritik me BE. Ai është shprehur se BE duhet t’i vlerësojë shtetet mbi bazën e përparimit që ata bëjnë dhe të mos marrë vendime vetëm mbi bazën e debatit të brendshëm që kanë shtetet për zgjerimin ose jo të BE-së.

 “Ne duhet të përballemi me atë që gjithnjë e më shumë vendimmarrja e Këshillit të Europës nuk bazohet në atë që ne bëjmë, në ato që bëjnë vendet si ne, por në situatën e brendshme ose dinamikën e brendshme politike në shtete të ndryshme anëtare. Për ne, Evropa nuk është thjesht një proces burokratik, ose nuk është thjesht një bashkim i vendeve të zhvilluara që dëshirojmë, shpresojmë ose ëndërrojmë të bashkohemi. Evropa është ajo që ishte për baballarët themelues, para së gjithash një projekt i paqes dhe bashkëpunimit”, thotë Rama.

Ai shton se Maqedonia e meriton plotësisht çeljen e negociatave falë nënshkrimit të marrëveshjes historike me Greqinë, por edhe Shqipëria ka bërë rrugë përpara dhe është vlerësuar në raportet e vetë BE-së.

Për Euronews ka folur edhe ambasadori i BE-së në vendin tonë, Luigi Soreca. Ai vlerësoi reformat që ka ndërmarrë Shqipëria, por shtoi se ka ende punë për të bërë. ‘Ka zona ku institucionet shqiptare në tërësi duhet të vazhdojë të punojnë. Lufta kundër korrupsionit është një luftë e përditshme, po ashtu lufta kundër krimit të organizuar të cilin trafiku i drogës po ia ndryshon lëkurën” tha ai. Vendimmarrja për Shqipërinë është shtyrë nga qershori për në shtator.

Franca, Holanda dhe Danimarka janë shtetet të cilat kundërshtojnë zgjerimin e mëtejshëm të BE-së dhe kjo ka bërë që negociatat për Shqipërinë dhe Maqedoninë e Veriut të shtyhen sërish.

Reforma në Drejtësi, Calavera kërkon prova: Burg dhe sekuestrim pasurish

Shefja e Operacionit Ndërkombëtar të Monitorimit, Genoveva Ruiz Calavera ka folur të enjten më hapur se kurrë duke i dhënë një mesazh shumë të qartë politikanëve shqiptarë: Që të hapen negociatat ne duam të shohim njerëz në burg.

Ajo ka mbajtur një fjalim të enjten në samitin për Ballkanin Perëndimor në Poloni, ku është ndalur te ecuria e reformës në drejtësi në vendin tonë. Për të parën herë ajo e ka bërë të qartë se duhet të shikojnë njerëz në burg me qëllim që të hapen negociata.

“Këtë herë kur ne negociojmë anëtarësimin, ne kërkojmë një historik treguesish. Kjo do të thotë që ne duam të shohim që ligjet të zbatohen, duam të shohim njerëzit në burg, asetet e krimit të sekuestrohen dhe ne duam të kemi mjaftueshëm fakte/prova, jo vetëm ligje, për të demonstruar që sistemi është i konsoliduar. Vetëm mund të shpresoj që në Shqipëri, kur sistemi po tronditet, të gjithë politikanët ta kuptojnë vlerën e që ka respektimi dhe mbështetja e kësaj reforme”, tha ajo.

Edhe pse presidenti Meta trumbeton se reforma në drejtësi është e kapur nga qeveria dhe nuk po ecën si duket, për BE ajo është në rrugën e duhur dhe nuk do të ketë asnjë kthim pas.

“Kjo ka për të qenë thelbësore: të keni një shtet ligjor funksional, të keni një sistem gjyqësor të pavarur. Nuk është më një çështje e negociueshme. Ne duhet të nxëmë nga mësimet tona. Prandaj jam shumë e lumtur që për shkak të popullit shqiptar dhe jo për shkak të politikanëve, për shkak të qytetarëve, ky ndryshim dramatik ka nisur në Shqipëri. Sepse kjo do të thotë që me këtë proces, që unë besoj se po shkon në drejtimin e duhur, ne do të kemi një gjyqësor të pavarur, Shqipëria do të arrijë në një pozicion fantastik, për të kapur kohën e humbur deri tani. Çdo vend duhet të gjejë mënyrën për të reformuar gjyqësorin. Nuk është e thënë që të jetë kaq dramatike sa e Shqipërisë, sepse problematika nuk është e njëjtë për çdo vend, por ju duhet të gjeni një mënyrë për të bërë reformën”, ka thënë ajo.

Deklarata e Calaveras vjen në një moment kur skena politike shqiptare është e ndezur nga debati për reformën në drejtësi. Dy figura politike kanë dalë hapur kundër saj. Presidenti Meta dhe ish kryeministri Berisha e kanë kundërshtuar këtë reformë duke thënë se nuk po zbatohet siç duhet dhe se është e kapur nga Rama dhe nga ndërkombëtarët e Euralius. Vendimi për hapeje negociatave merret më 17 tetor dhe kjo do të thotë se deri në këtë datë mund të ketë arrestime VIP.

RAMA “KËRCËNON” SËRISH ME PRECEDENTIN SANADER: PROTESTA E PESHQVE TË MËDHENJ, KUNDËR REFORMËS.
RASTI “SANADER” DHE INTEGRIMI EUROPIAN
Skip to toolbar