Apeli aleatëve të PD, Balla: Jo shtyrje zgjedhjesh, dialog vetëm për…

Gjatë ditët se sotme aleatët e Bashës propozuan një marrëveshje me 12 pika për të zgjidhur krizën politike në vend. Mazhoranca nuk ka qëndruar indiferent ndaj apelit të partive të vogla për një tryezë politike. Nga Pogradeci, kreu i grupit parlamentar të PS-së, Taulant Balla tha se data e zgjedhjeve nuk ndryshon, por janë të hapur për dialog për ndryshimet në Reformën Zgjedhore.

“Duhet të jetë shumë e qartë për këdo që data e zgjedhjeve nuk caktohet nga partitë politike, por caktohet nga Kushtetuta, nga Kodi Zgjedhor dhe data e zgjedhjeve në 30 qershor është një datë e fiksuar tashmë dhe në asnjë rast ajo nuk mund të ndryshojë. Në 30 qershor do të zhvillohen zgjedhjet, janë 42 parti të regjistruara, askush nuk mund të pengoje të mos marrë pjesë në zgjedhje. Dua t’u them shumë qartë që kushte PS nuk mund t’i vendosë askush sepse nuk mund t’i vendosen kushte shqiptarëve. Ne kemi qenë gjithmonë të gatshëm për të dialoguar në parlament dhe përmes një procesi dialogu rikthyem komisionin e reformës zgjedhore. Kjo është një instrument i rëndësishëm për të dialoguar lidhur me të gjitha domosdoshmëritë dhe nevojat që kanë të bëjnë me ndryshimet e Kodit Zgjedhor.” – tha Balla

“Nuk merret pushteti me deputetë pijanecë që bllokojnë rrugët”

Nga qyteti i Elbasanit, kryeministri Edi Rama ka ironizuar protestën e opozitës e cila edhe sot bllokoi rrugën hyrëse të qytetit të Elbasanit për të mos lejuar kalimin e eskortës së kryeministrit.

Në fjalën e tij Rama tha se një parti që pretendon pushtetin nuk mund të bllokojë rrugët.

“Bota nuk pati 30 vjet Saliun, ne e patëm. Por tani e kemi në grahmat e fundit që shfaqet si një peng me ujë, me deputet dhe pijanec që bllokojnë rrugën dhe shtyhen me policin dhe mendojnë se me rrugaçëri të tilla do bllokojnë transformimin e Shqipërisë. Si mundet që një parti politike që pretendon që të marrë pushteti, të bllokojë rrugët dhe të pretendojë se në këtë formë do të luftojë për demokraci. Kush i ha këto, sa i dehur duhet të jesh që të ndjekësh nga pas. Gjithë atyre që mbajnë çadër, është më mirë. Kur nuk e mban lala, shihe sa e sigurt është kjo që po ju them. Më vjen mirë, që edhe një herë tjetër, si gjithmonë në Elbasan kemi një mikpritje dhe një mbështetje kaq kuptimplotë dhe me kaq shumë njerëz, më vjen mirë që shiu po i shton nuk i pakëson. Më vjen shumë mirë, që sa herë vij këtu dëgjoj fjalë të mira në adresën time. Të jemi të sigurt se gjithçka që kemi bërë në Elbasan nuk do ishte e mbundur pa Qazim Sejdinin, dhe Sejdini s’mund të bënte dot pa ne. 12 vite në krye, 6 me Salin dhe 6 me PS. Nëse e shikoni, raporti është 10 më shumë se 6 vitet e para. Dhe më vjen mirë, që pasi kemi ardhur këtu për të kërkuar mandatin, që tani Qazimi po e mbyll me nder, ju kam thënë na jepni besimin dhe ne do bëjmë për Elbasanin sa nuk është bërë në vitet e kaluara”, tha Rama.

Pas Shkodrës, opozita i bllokon rrugën Ramës edhe në Elbasan

Opozita ka vazhduar edhe sot me protesta dhe bllokim rrugësh.

Një grup mbështetësish të PD-së janë vendosur sot në hyrje të qytetit të Elbasanit, tek rrethrrotullimi në Bradashesh për të bllokuar kalimin e kryeministrit, i cili sot është nisur drejt Elbasanit në kuadër të turit “Bashkia që duam”.

Një ditë më parë përfaqësues të opozitës bllokuan rrugët hyrëse të qytetit të Shkodrës, duke djegur goma makinash.

Më vonë Rama postoi një mesazh në twitter ku shkruante se ndihej i keqardhur nga kjo orvatje e një pakicë që duan të çojnë Shqipërinë në qorrsokak.

5 qarqe në protestë për një orë

Pas një ore, ka përfunduar protesta e opozitës së bashkuar, që kishte bllokuara 5 akset rrugore kryesore në vend.

Protestat u zhvilluan në Tiranë tek rrethrrotullimi Shqiponja, Durrës në zonën Plepa-Autostradë, në Fier tek rrethrrotullimi Sheq, Elbasan tek rrethrrotullimi Bradashesh dhe në Milot tek karburanti në autostradë ku ishte i pranishëm edhe kryetari i PD-së, Lulzim Basha.

Protestuesit në Durrës në zonën e Plepave kanë ndezur tymuese dhe flakadanë dhe e njëjta situatë ka vijuara edhe tek rrethrrotullimi Shqiponja në Tiranë.

Ndërsa në Elbasan, protestuesit kanë preferuar, që në vend të tymueseve të djegin edhe goma, ku të pranishëm ishin edhe dy ish-deputetë të PD, Luçiano Boçi dhe Endri Hasa.

Në përgjithësi protesta ka vijuar e qetë pa incidente për një orë dhe është shoqëruar me thirrjet “Rama Ik”. Më pas kalimi i mjeteve është kryer normalisht në të gjitha akset e bllokuara.

Rama: Zgjedhjet janë më 30 qershor dhe kjo nuk ndryshon

Gjatë seancës plenare, ka folur edhe Kryeministri Rama, i cili ka vënë edhe një herë theksin se zgjedhjet do të mbahen në ditën që ato janë përcaktuar me ligj, më 30 qershor.

Rama e cilësoi vendimin e opozitës për të dalë nga zgjedhjet si vetëshkatërruese dhe formë ekstreme në kundërshtim me çdo logjikë demokratike.

“Me përfundimin e afatit të regjistrimit të partive politike në zgjedhjet e 30 qershorit, opozita e rrugës ka vendosur të dalë edhe nga rruga e zgjedhjeve, pasi doli nga rruga e jetës parlamentare duke zgjedhur dy forma ekstreme në kundërshtim të plotë me vijën e logjikës demokratike. E para e panjohur dhe e padëgjuar, e dyta jo e panjohur, por e provuar si një rrugë e vetëshkatërrimit. Aty ku opozitat kanë zgjedhur të braktisin zgjedhjet, praktikisht kanë marrë prapësht një periudhë të gjatë rrënimi dhe vështirësish për rindërtim. Në vend që të luftojnë me program dhe ide ka zgjedhur të luftojë me kërcënime dhe kapsolla. Në vende t’i përfaqësojë zgjedhësit e vetë në këtë sallë dhe në zgjedhje ka vendosur ti nxjerrë edhe ata nga rruga e betejës demokratike. Në vend t’i udhëheqë në rrugën e betejës demokratike ka vendosur t’i përdorë si mish për top duke i përdorur. Kjo është e papranueshme nga askush.” – ka thënë Rama

Gjatë fjalës së tij, Rama tha nuk ishte faji i qeverisë për djegien e mandateve dhe përjashtimin e opozitës nga zgjedhjet lokale dhe u shpreh i vendosur se pavarësisht kërcënimeve të opozitës zgjedhjet do të mbahen.

“Ne nuk kemi ndonjë zgjedhje tjetër përveç të vijojmë rrugën tonë pa u ndaluar të merremi me ata. Dmth pa u devijuar nga rruga e zgjedhjeve të 30 qershorit, pavarësisht kërcënimit apo shantazheve. Unë i mirëkuptoj ata që ndryshe nga unë mendojnë se zgjedhjet pa opozitë janë anormale, por dua t’u them se kjo nuk është as zgjedhja jona, as faji ynë. Ne kemi bërë gjithçka që kjo mos ndodhë.”- tha Rama

“Lulzim, ke të drejtë të protestosh, por jo të nxisësh dhunë”

Teksa opozita ka njoftuar se sot pasdite do të bllokojë 5 akse të rëndësishme rrugore, në shenjë protestë kundër qeverisë, Taulant Balla i PS-së, i ka kujtuar ligjin dhe i ka bërë thirrje që të mos nxisin dhunë. Në fjalën e tij në seancë parlamentare Balla tha se Basha e Kryemadhi protestojnë se kanë frikë reformën në Drejtësi.

“Sot jemi në përmbyllje të miratimit në Kuvend të një prej paketave të reformës më të rëndësishme që ka ndërmarrë Shqipëria. Sot apeli im është edhe për deputetët e opozitës të votojnë ligjin sepse besoj se jeni të ndryshëm nga kolegët nga listat prej nga vini. Besoj se nuk keni hesape të hapura me drejtësinë, sikur mund të jetë kjo arsyeja pse ikën nga Kuvendi.

Basha dhe Kryemadhi kanë vendosur të bllokojnë akset kryesore, por jo reformën në drejtësi, miratimin e këtij ligji, sikur nuk kanë mundur të bllokojnë ndryshimet Kushtetuese, vettingun apo edhe aktet e tjera. Ndryshimet Kushtetuese erdhën dhe i votuan si pulat.

Halli i tyre është reforma në drejtësi, prandaj bllokojnë rrugët. Nuk kanë për të arritur të bllokojnë demokracinë apo zgjedhjet. Halli i tyre është biznesi i kunatit dhe jo i një qytetari të ndershëm shqiptar. Lulzim, ke të drejtën që të protestosh, por harroje të nxisësh dhunë në kryesh akte vandalizmi, pasi ke për t’u përballur me ligjin. Qoftë ti apo kushdo që tenton të bllokojë rrugë apo vandalizojë biznese private. Nuk do të ndodhë kurrë bllokimi i zhvillimit të zgjedhjeve” tha Balla.

Sot në orën 18.00 opozita ka njoftuar se do të bllokojë për 1 orë 5 segmente të rëndësishme rrugore në vend.

Protestat e opozitës u kanë kushtuar shqiptarëve 640 mln lekë

“Protestat e opozitës u kanë kushtuar shqiptarëve 640 mln lekë”. Ky është titulli i sotëm i një prej gazetave të përditshme në Shqipëri. Gazeta “Shqiptarja.com” ka siguruar të dhënat zyrtare nga Ministria e Brendshme dhe nga Bashkia e Tiranës mbi koston e protestave të opozitës, për periudhën shkurt-prill 2019, kosto e cila pritet të marrë përmasa të tjera gjatë javëve në vijim, pasi PD-LSI kanë vendosur përshkallëzimin e aksionit të tyre radikal. Deri më sot protesta e dhunshme të PD-LSI u kanë kushtuar shqiptarëve 640 milionë lekë.

Vetëm Policisë së Shtetit, e cila paguhet nga të gjithë taksapaguesit, protestat e deritanishme të opozitës i kanë kushtuar 61 838 138 lekë. Konkretisht, pashijet e dëmtuara nga dhuna e protestuesve, gjatë të gjitha protestave, ku përfshihen kamera trupi policie, mburoja plastike, skafandra, xhamat dhe tapiceria e një mjeti policie, kanë kushtuar 776 600 lekë. Për çdo protestë të opozitës janë angazhuar mijëra punonjës policie, edhe jashtë orarit zyrtar të punës.

Kostoja e orëve shtesë të uniformave blu, për menaxhimin e protestave të opozitë, sipas të dhënave të Ministrisë së Brendshme, është 60,361,538 lekë. Sipas të dhënave të siguruara nga Shqiptarja.com, për menaxhimin e protestave të PD-LSI, për periudhën shkurt-prill, janë angazhuar 14.182 punonjës policie, ndërsa llogariten 103 504 orë shtesë. Ndërkaq, kostoja e barrierave të vendosura nga policia para institucioneve shtetërore, por që janë dëmtuar nga protestuesit e dhunshëm gjatë konfrontimeve me policinë dhe sulmeve ndaj godinave shtetërore, është 700,000 lekë.

Dëmi që kanë shkarkuar protestuesit e dhunshëm në qytetin e Tiranës, sipas shifrave zyrtare të Bashkisë së Tiranës, është 2 539 834 lekë. Këtë shumë, Bashkia e Tiranës ia ka faturuar Partisë Demokratike, përmes 7 gjobave. Dëmi financiar konsiston në shkatërrimin e e shtyllave ndriçuese, gjelbërimit, pemëve etj. Sipas të dhënave, koston më të madhe përfshin dëmi që u është bërë fasadave të godinave shtetërore, sidomos fasadës së Kryeministrisë.

KOSTO E DËMEVE TE PROTESTAVE TË OPOZITES NË TIRANË SIPAS TE DHENAVE ZYRTARE TE BASHKISË

Procesverbal mbajtur me 15 prill 2019

Vendi bulevardi deshmoret e kombit

Pastrim grilave tee dritareve 27600 lekë

Pastrim i bordurave prej mermeri 72 000 lekë

Pastrim I shkallës prej mermeri 144 000 lekë

Shuma :243.600 lekë

Vendi bulevardi deshmoret e kombit

Pastrim fasade prej pllakash mermeri dekorativ deri në 18 m lartësi: 1 672 000 lekë

Pastrim kornize mermeri e dritareve dhe dyerve: 198 000 lekë

Gjithsej: 1 870 000 lekë

Procesverbal mbajtur me 17 prill

Vendi: shëtitorja Murat Toptani

Shtylla: 19 044 lekë

Ndriçues dekorativ: 5 copë 171 294 lekë

Gjithsej: 190 334 lekë

Procesverbal mbajtur me 15 prill

Pastrim I trotuarit pergjatë fasadës së objektit: 48600 lekë

Pastrim I rrjetave te dritareve ne katin bodrum 10 800 lekë

Gjithsej : 59 400 lekë

Procesverbal mbajtur me 16 prill

Pemë lofate 12 000 lekë

Pemë Arizona 21 000 lekë

Lule decorative 88 500 lekë

Vazo decorative 15 000 lekë

Gjithsej 136 500 lekë

Procesverbal mbajtur me 16 shkurt

Dëmtim të hapësirës publike, dhe të gjelbër

Dëmi: 20 000 lekë

Procesverbal 15 prill

Shëtitorja Murat Toptani

Dëmtim I shtyllave apo ndriçuesve: 20 000

Gjobat nga Bashkia Tiranë për Partinë Demokratike

16 shkurt dëmtimi I hapësirës së gjelbër 20.000 lekë

16 shkurt dëmtimi I pemëve decorative 136.500 lekë

15 prill kosot e pastrimit të Kryeministrisë 243.600 lekë

15 prill dëmtimi I shtyllave Rr.”Murat Toptani” 20.000 lekë

15 prill kosto e pastrimit 59.400 lekë

15 prill kosto e pastrimit 1.870.000 lekë

17 prill riparimi I shtyllave 190.334 lekë

Gjobat në total 539834 lekë

Burimi: Shqiptarja.com

Grupit parlamentar demokrat i shtohen dhe 3 deputetë të rinj

Opozita në Kuvend vazhdon të shtohet në numër. Ditën e sotme Komisioni Qendror Zgjedhor i ka dhënë mandatin 3 kandidatëve, të cilët vijnë nga lista shumë-emërore e Partisë Demokratike.

Zef Shtjefni nga qarku Shkodër, Nikolin Straka nga qarku Shkodër dhe Artur Roshi nga qarku Tiranë, janë 3 emrat e rinj që priten të marrin mandatin e deputetit dhe të bëjnë betimin e tyre në Kuvend.

Së bashku me 3 kandidaturat e reja, numri i deputetëve në Kuvend shkon në 105.

Opozitës i shtohen edhe 4 deputetë të tjerë

Vijojnë emrat nga lista shumë-emërore e partive politike të PD-së dhe LSI-së të pranojnë mandatin e deputetit. Komisioni Qendror i Zgjedhjeve u dha sot mandatin e deputeti edhe katër kandidatëve të rinj, 3 nga Partia Demokratike dhe një nga Partia Socialiste për Integrim.

Opozitës në Kuvend do i shtohen edhe 4 emra të rinj:

-Eugen Bojaxhi nga lista e LSI-së për qarkun e Beratit

-Andi Përmeti nga lista e PD-së për qarkun Korçë

-Erion Piciri nga lista e PD-së për qarkun Tiranë

-Fatjona Dhimitri nga lista e PD-së për qarkun Gjirokastër

4 kandidatët pritet që të bëjnë betimin e tyte në seancën e ardhshme të Parlamentit. Me shtimin e këtyre deputetëve të rinj, opozita shkon me 31 vende në Kuvendin e Shqipërisë.

“Të tregojmë se kompromisi mund të arrihet”

Drejtoresha për Evropën Perëndimore, Ballkanin Perëndimor dhe Turqinë në EEAS, Angelina Eichhorst ka qenë sot e pranishme në Tiranë ku ka marrë pjesë në Forumin Ballkanik për Shoqërinë Civile. Në fjalën e saj ajo i ka bërë thirrje palëve për dialog, për gjetjen e një rruge kompromisi, ndërsa ka theksuar se bojkoti nuk i shërben askujt.

“Përmes dialogut dhe punës që ne kemi bërë sëbashku, mund të tregojmë se kompromisi mund të arrihet. Bojkoti nuk mund të jetë një instrument që duhet të përdoret. Është shumë negative të thuash ne nuk do jemi të pranishëm, ne nuk vijmë. Padyshim duhet kurajo për t’u bashkuar në tryezë, të diskutojmë dhe të ballafaqohemi me çështjet që duam të diskutojmë. Është pikërisht kjo, pse ne duhet të përdorim këto mekanizma që kanë në fokus debatin, dhe themi se debati nuk është rruga e duhur që duhet ndjekur. Kjo nuk të çon drejt standardeve demokratike. E rëndësishme është që të ketë debat në të gjitha nivelet”, tha Angelina Eichhorst.

I pranishëm në këtë forum ka qenë edhe kryebashkiaku Veliaj i cili se bashku me Drejtoreshën për Evropën Perëndimore, Ballkanin Perëndimor dhe Turqinë në EEAS theksuan domosdoshmërinë për bashkimin mes palëve.

“Siç e tha edhe Erioni, ka pak nervozizëm lidhur me punët që janë bërë, disa herë ka negativitet, dhe ne gjithmonë përpiqemi të shohim më të mirën. Është shumë gjë e mirë të shohim atë që vërtet ka ndodhur, të shohim pozitivitet. Ky është një mesazh gjithashtu për Ballkanin dhe BE. Ju jeni vërtet të bashkuar, jemi në një kontinent, ndaj është shumë e rëndësishme mënyra sesi ne do të vazhdojmë të punojmë së bashku, në një kontinent, në një union, në një familje. Kjo është busulla e punëve që ne duam të bëjmë sot dhe unë këtë e shoh qartësisht këtu në Ballkan. Është e rëndësishme të shohim bashkëpunimin e thellë në të gjitha nivelet, sigurinë, politikat për fondet, edukimin, mjedisin, në të gjitha nivelet dhe unë e di që këtë do ta diskutojmë së bashku sot”, deklaroi Angelina Eichhorst.