“Nuk premtoj mrekulli”, Rama në Ukrainë: Do punojmë për të arritur paqen

Kryeministri Edi Rama, në cilësinë e Kryetarit të OSBE, nisi të hënën vizitën dy ditore në Ukrainë. Pas takimeve që pati me disa zyrtarë të lartë të këtij vendi, Rama mbajti një konferencë për shtyp me ministrin e Jashtëm të Ukrainës, Vadym Prystaiko. Gjatë fjalës së tij, Rama u shpreh se nuk do të bëjë mrekulli në krye të OSBE, por theksoi se synim mbetet “zgjidhja e konfliktit dhe ndihma ndaj njerëzve në zonat e prekura nga konflikti midis Ukrainës dhe Rusisë”.

“Dua t’ju falenderoj për diskutimet e sinqerta dhe produktive. Pres me padurim të takohem me kryeministrin dhe presidentin dhe autoritete të tjera të larta gjatë ditës. Nuk është rastësi që Ukraina është vizita ime e parë si kryetar i Presidencës së OSBE-së, ajo reflekton rëndësinë e përpjekjeve për të zgjidhur krizën. Do të bëjmë maksimumin dhe do të inkurajojmë fort zbatimin e marrëveshjeve të Minskut.

Ndërkohë që marrëveshjet, formatet po diskutohen dhe duke qenë se shumë kohë e ndoshta do të kërkohet, ajo çka mbetet thelbësore mbetet jeta e njerëzve dhe vështirësitë që të gjithë ata përballin duke jetuar në zonat e prekura nga konflikti. Aty është ku ne do të punojmë pa reshtur duke bërë gjithçka, pasi garantimi i ndalimit të të shtënave dhe një armëpushim i qëndrueshëm është jetik për jetën e njerëzve atje”, tha Rama.

Rama tha se rruga drejt paqes është e gjatë, ndërsa u shpreh se misioni i OSBE do të punojë për të arritur finalizimin e këtij procesi. “Konflikti vijon të prodhojë viktima civile dhe kjo është e papranueshme. Kjo duhet të ndalet. Synimi ynë është ë sigurojmë armëpushim të plotë. Rruga është e gjatë drejt një paqeje të qëndrueshme dhe unë jam këtu për t’iu thënë se përfaqësuesi im i posaçëm në Ukrainë do të të eksplorojë mënyrën si të ecë sa më mirë ky proces.

Ne ndajmë bindjen që kontributi që është dhënë nga misioni i monitorimit është unik dhe thelbësor për të ulur tensionet dhe rivendosur paqen. Unë ndava me ministrin për të mbështetur më shumë me një buxhet më solid për tu siguruar që ta luajë më mirë rolin e vet. Në Ukrainën Lindore dua të shoh personalisht situatën dhe ndikimin praktik në terren të misionit të monitorimit.

Jemi të vendosur për të ndihmuar që të sjellin një zgjidhje paqësore të konfliktit dhe të përmirësojmë jetët e atyre që janë prekur në mënyrë brutale nga konflikti. Nuk jemi këtu për të premtuar ndonjë mrekulli, por e dimë se ka diçka që ne mund ta bëjmë më mirë se të tjerët, për të ndihmuar që të lehtësojmë sa shumë të jetë e mundur jetët e atyre që janë të pafajshëm” tha ai. Gjatë vizitës në Ukrainë, si kryetar i OSBE, Rama do të ketë takime me drjetuesit e këtij shteti, ndërsa të martën do të vizitojë zonat e prekura nga konflikti në Ukrainën Lindore.

Rama nis vizitën dy ditore në Ukrainë si kryesues i OSBE. Axhenda e takimeve

Kryeministri Edi Rama, në detyrën e Kryesuesit të OSBE nisi mëngjesin e të hënës vizitën në Ukrainë. Rama shoqërohet në vizitën e tij në Ukrainë nga Ministri në Detyrë i Punëve të Jashtme, Gent Cakaj dhe zyrtarë të tjerë të OSBE.

Kievi është zgjuar të hënën nën petkun e dëborës. Ndërsa Rama dhe delegacioni i OSBE-së zgjodhën të ecin disa minuta në këmbë, deri në godinën e Ministrisë së Jashtme të Ukrainës. Takimin e parë në Kiev, Rama e zhvilloi me Ministrin e Jashtëm të Ukrainës, ndërsa më pas do të takohet edhe me zyrtarë të tjerë të këtij shteti.

Në cilësinë e Kryetarit të Zyrës së OSBE-së për vitin 2020, Rama do të zhvillojë bisedime me Presidentin e Ukrainës Volodymyr Zelensky, Kryeministrin Oleksiy Honcharuk dhe Kryetarin e Parlamentit Dmytro Razumkov. Gjithashtu do të mbahet dhe një konferencë për shtyp me ministrin e Jashtëm të Ukrainës.

Një ditë më parë, OSBE dha detaje nga fokusi i takimeve të Kreut të OSBE Edi Rama me zyrtarët e shtetit të Ukrainës. Sipas njoftimit, mësohet se “bisedimet do të përqendrohen në forcimin e bashkëpunimit midis OSBE-së dhe Ukrainës, në punën e Misionit të posaçëm të monitorimit të OSBE-së (SMM) në Ukrainë, dhe në përpjekjet për një zgjidhje paqësore”.

Të martën, Rama do të vizitojë Ukrainën lindore për të pasur një përvojë të dorës së parë të situatës në zonat e prekura nga konflikti dhe punën e SMM. Kryeministri Edi Rama, njoftoi më herët gjatë marrjes zyrtare të detyrës si kreu i OSBE, se vizitën e parë do ta zhvillonte në Ukrainë. Ai gjithashtu tha se do të ketë edhe një vizitë në Rusi, shtet me të cilin Ukraina është në konflikt prej disa vitesh.

Rama në Kiev më 20-21 janar, Ukraina e mirëpret: Do hapim ambasadë në Shqipëri

Ambasadori i Ukrainës në OSBE, Yevhenii Tsymbaliuk shprehu vlerësimin e tij për marrjen e kryesimit të kësaj organizate nga Shqipëria për 2020, ndërsa tha se e mirëpret faktin që vizita e parë e kryeministrit Rama në rolin e drejtimit të OSBE do të zhvillohet në Ukrainë.

Ambasadori Tsymbaliuk tha për gazetarët shqiptarë në Vjenë se kjo vizitë mund të zhvillohet më 20-21 janar 2020 si dhe vlerësoi prioritetet që kryeministri Rama paraqiti gjatë mbajtjes së konferencës për marrjen e kryesimit të OSBE. Tsymbaliuk tha se mbrojtja e sovranitetit të në vendi është i rëndësishëm, sidomos për Ukrainën e cila ndodhet vazhdimisht nën presionin e Rusisë. I pyetur se cilat janë pritshmëritë e Ukrainës gjatë kryesimit të Shqipërisë në OSBE, Tsymbaliuk u shpreh se Shqipëria gjatë kryesimit të OSBE mund të ndihmojë në implementimin e marrëveshjeve të arritura në samitin e Parisit.

“Mirëpritëm ardhjen e kryeministrit Rama në Vjenë për të prezantuar prioritetet e kryesimit të OSBE dhe jemi shumë të lumtur që disa prej tyre lidhen me implementimi i principeve që respektojnë integritetin territorial dhe sovranitetin e një vendi, që është mjaft e rëndësishme për Ukrainën, e cila cenohet nga Rusia. Çdo vend ka zërin e tij dhe këtu çdo gjë behet në mënyrë konsensuale dhe nëse ti ke kryesimin e OSBE mund të influencosh në shumë mënyra. Ne shpresojmë që kryesimi i OSBE nga Shqipëria do të ketë një rol të rëndësishëm në rastin e Ukrainës në implementimin e parimeve që u arritën në samitin e Parisit, që në fakt ende nuk janë zbatuar në praktikë. Pata nderin të kisha një bisedë të shkurtër me kryeministrin dhe i shpreha atij opinionin tim se hapi kryesor është armëpushimi pasi njerëz po vriten atje dhe është e rëndësishme që t’i japim fund kësaj” tha Tsymbaliuk.

Tsymbaliuk tha se marrëdhëniet me Shqipërinë janë intensifikuar dhe se vizita e parë e kryeministrit Rama si drejtues i OSBE do të zhvillohet më 20-21 janar. Ai tha se brenda vitit 2020 shpreson që të hapet edhe ambasada e Ukrainës në Shqipëri për të forcuar edhe më shumë marrëdhëniet mes dy vendeve.

“Ne vlerësojmë që vizita e parë e kryesuesit të OSBE do të bëhet ne Ukrainë dhe shpresojmë që do jetë më 20 -21 janar të këtij viti. Këtu në Vjenë kemi zhvilluar kontakte dhe konsulta shumë produktive mes nesh dhe Shqipërisë dhe këto konsultime do të zhvillohen çdo javë në zyrat e OSBE për të diskutuar pikat që janë në axhendë. Janë rritur kontaktet mes Ukrainës dhe Shqipërisë dhe shpresojmë që këtë vit të hapim edhe ambasadën e Ukrainës në Shqipëri për të forcuar edhe më tej marrëdhëniet” u shpreh Tsymbaliuk.

Ukraina prek kualifikimin. Portugalia kërcënohet nga Serbia

Portugalia dhe Cristiano Ronaldo nuk ia kanë dalë dot në Ukrainë. Andry Shevchenko dhe të besuarit e tij fituan takim kualifikues të Euro 2020 kundër të besuarëve të Santos në një ndeshje të madhe.

Golat e shënuar nga Yarmechuk në të 6` dhe Yarmolenko në të 27` i dhanë fitoren Ukrainës, ndërkohë që CR7 vetëm sa ngushtoi shifrat në të 72` nga penalltia, por pa mundur të ndryshojë fatet e takimit.

Ukraina, pas tre pikëve të fituara ndaj Portugalisë, shkon në kuotën e 19 pikë dhe mban vendin e parë në Grupin B, ndërsa Portugalia me 11 pikë mban vendin e dytë në grup me 11 pikë.

Kualifikimi I Portugalisë për në fazën në grupe vështirësohet më tepër tani, pasi Serbia mundi Lituaninë dhe ka 10 pikë, një më pak se portugezët dhe do të synojë kualifikimin deri në fund.

Ukraina voton për zgjedhjet e parakohshme parlamentare

Ditën e diel, ukrainasit do të ushtrojnë të drejtën e tyre për të votuar për të vendosur për qeverinë e re të vendit. Ukraina zhvillon zgjedhjet e parakohshme parlamentare, pasi shpërndarjes së parlamentit nga presidenti i vendit Volodymyr Zelensky.

Parlamenti i përbërë nga 450 ulëse, do të sjell deputetët e rinj, ku 225 do të hyjnë nga lista e kadidatëve të partive politike, ndërsa pjesa tjetër e deputetëve nga lista e zonave zgjedhore.

Zgjedhjet nuk do të zhvillohen në 26 zona në Krime që është nën kontrollin e Rusisë dhe në rajonin e Donbas që është nën kontrollin e separatistëve

Sipas informacioneve të fundit të njoftuara nga Komiteti Qendror i Zgjedhjeve të Ukrainës, në zgjedhje do të garojnë 2.746 kandidatë nga lista e 22 partive politike. Ndërsa për listën e 199 rajoneve zgjedhore, do të garojnë 3.085 kandidatë, edhe si partiakë dhe të pavarur.

Sipas sondazheve, Partia “Shërbyesit e Popullit” të Zelensky-t pritet të marrë 49.5 % të votave, “Platforma Pro-Ruse e Opozitës për Jetë” rreth 10.5 % të votave, partia “Solidariteti Evropian” i ish-presidentit Petro Poroshenko 7.7 % të votave, ndërsa Partia “Atdheu” e ish-kryeministres Yuliya Timoshenko pritet të kalojnë pragun zgjedhor me 5 % të votave.

Zgjedhje do të vëzhgohen prej Misionit Ndërkombëtar të Vëzhgimit të organizuar nga Rrjeti Europian i Organizatave Vëzhguese të Zgjedhjeve (ENEMO), ku pjesë e këtij misioni janë edhe shqiptarë. Koalicioni për Reforma, Integrim dhe Institucione të Konsoliduara (KRIIK Albania) është anëtare e rrjetit ENEMO prej vitit 2009 duke u bërë pjesë e vëzhguesve ndërkombëtar në zgjedhjet e vendeve të tjera.