Liderëve të Izraelit, mes tyre Kryeministri, Benjamin Netanyahu do t’u lëshohet një urdhër arresti ndërkombëtar nga Gjykata Penale Ndërkombëtare.
Zyrtarët izraelitë mund të akuzohen për pengimin e dërgimit të ndihmave humanitare në Rripin e Gazës dhe për ndjekjen e një përgjigjeje tepër të ashpër ndaj sulmeve të Hamasit të 7 tetorit ndaj Izraelit, citon New-York Times.
Zyrtarët izraelitë dhe të huaj besojnë gjithashtu se gjykata po peshon urdhër-arrestet për liderët e Hamasit. Por nuk është e qartë se kush mund të akuzohet nga Hamasi apo cilat krime do të citohen. Urdhër-arrestet nga gjykata do të shiheshin në pjesën më të madhe të botës si një ndëshkim moral përulës, veçanërisht ndaj Izraelit, i cili për muaj të tërë është përballur me reagime ndërkombëtare për sjelljen e tij në Gaza, përfshirë edhe nga aleati i tij kryesor, Joe Biden.