Konflikti mes Izraelit dhe Hamasit ka arritur një nivel të paprecedent pas sulmit të fundjavës së kaluar në territorin izraelit dhe për fundin e tij nuk shihet dritë në fund të tunelit.
Diplomacia ka dështuar ndër dekada dhe ekspertët e pranojnë se është e vështirë të gjendet një zgjidhje që të stabilizojë rajonin.
Hugh Lovatt, ekspert për Lindjen e Mesme, deklaron: “Mendoj se për momentin asnjëra nga palët nuk ka dëshirë për t’i dhënë fund luftës. Dhe duke parë se cila ishte situata përpara këtyre luftimeve, ky nuk më duket një opsion i mundshëm”.
Çdo zgjidhje e mundshme do të përfshijë aktorë ndërkombëtarë. Bashkimi Evropian dhe Shtetet e Bashkuara janë përpjekur pa sukses të afrojnë Izraelin me Palestinën ndër vite. Këtë herë, ekspertët sugjerojnë një rol më të madh nga vendet fqinje.
“Kur flasim për ndërmjetësim, përse nuk ndërmjetësohet tani për kushtet për t’i dhënë fund dhunës dhe vuajtjeve? Sigurisht që Egjipti, por edhe Katari po luajnë një rol të rëndësishëm lidhur me këtë, pasi kanë aftësinë të dialogojnë me të dyja palët, Izraelin dhe Hamasin”, tha Lovatt.
Sakaq Yossi Mekelberg, ekspert për Lindjen e Mesme dhe Afrikën Veriore u shpreh: “Duhen Shtetet e Bashkuara dhe Bashkimi Evropian, por pa dyshim edhe fuqitë rajonale si Egjipti, Jordania, Emiratet, Maroku dhe Bahrejni. Por duhen edhe lojtarë të rinj. Të mos harrojmë se Arabia Saudite parashtroi në 2002-shin nismën saudite që u përkthye në Deklaratën e Bejrutit për Paqen, ose për normalizimin e marrëdhënieve. Mendoj se ky opsion është ende në tryezë”.
Si Brukseli dhe Uashingtoni ndajnë pjesën e tyre të përgjegjësisë për gjendjen aktuale të rajonit dhe është jetike që ato të mësojnë nga gabimet e së kaluarës.
“Izraeli ka rrënjosur pushtimin e tij, duke lëvizur drejt një aneksimi të plotë të territoreve palestineze dhe përforcimit të asaj që përshkruhet si aparteid. Reagimet nga Bashkimi Evropian, qeveritë evropiane dhe Shtetet e Bashkuara për këtë çështje kanë qenë të pakta”, tha Lovatt.
Yossi Mekelberg u shpreh: “Kjo është neglizhuar dhe braktisur prej vitesh, pavarësisht se situata acarohej. Duhet të mendojmë se çfarë konteksti, çfarë kushtesh fuqizuan ekstremin në këtë konflikt, në vend që të fuqizonin ata që duan të jetojnë në paqe”.