Lëvizja “Basha ik” frikëson kreun e opozitës, njeh 13 tetorin e Metës

Rritja e kritikave brenda të vetëve pas humbjes edhe të atyre bashkive që PD i ka pasur bastione, ka bërë që Basha të njohë dekretin e presidentit Meta për mbajtjen e zgjedhjeve më 13 tetor. Edhe pse nuk u regjistrua as formalisht në këto zgjedhje ashtu siç bënë aleatët e tij të tjerë në opozitë, Basha ka deklaruar se ka vetëm një datë kushtetuese për zgjedhjet vendore, 13 tetorin e Metës.

Një njohje të tillë Basha e bëri edhe pas takimit që pati me kreun e shtetit Ilir Meta për të vendosur datën e 13 tetorit, por që pas shpalljes së saj nga Presidenti, ai deklaroi se nuk do të marrë pjesë në asnjë palë zgjedhje me Ramën kryeministër. Kjo solli përplasje të Bashës me aleatët e tij të vegjël, të cilët njohën dekretin dhe pranuan që mund të hyjnë në zgjedhje edhe me Ramën Kryeministër. Madje, edhe Meta i doli kundër Bashës, pavarësisht se anulimin e 30 qershorit e bëri pikërisht për të mbrojtur atë dhe LSI-në. Tashmë, rritja e presionit nga të vetët duket se ka sjellë një tërheqje të liderit të PD.

Gjatë një deklaratë për mediat, pyetur se nëse PD do të merrte pjesë në zgjedhjet e pjesshme që do të vendoste KQZ për Shkodrën, Basha tha se kjo nuk është e ligjshme, pasi nuk është KQZ ajo që vendos mbajtjen e zgjedhjeve, por presidenti dhe se ai ka folur me një dekret atë të 13 tetorit.

“Kushtetuta është e qartë. KQZ mund të bëjë zgjedhje edhe në Vietnam, kështu siç kanë shkuar punët, por KQZ-ja nuk ka asnjë tagër të organizojë një proces kur i teket dhe si i teket, por duhet të ndjekë dhe të zbatojë Kushtetutën dhe dekretin e Presidentit.” – tha Basha.

Sigurisht kjo tregon dy frika madhore të Bashës atë të lëvizjes ”Basha ik” dhe frika që KQZ mund të anashkalojë Metën dhe të shpallë zgjedhje të reja në Shkodër, pasi ajo që është kuptuar deri tani është se Basha nuk do zgjedhje, pasi nuk regjistrohet kurrë në to. Pas dorëheqjes se Valdrin Pjetrit, Meta deklaroi më herët se nuk do të dekretojë datë për zgjedhje të pjesshme, pasi zgjedhjet do të mbahen më 13 tetor duke e thelluar edhe më tej krizën. Këtë ngërç duket se e zgjidh Kodi Zgjedhor me nenin 161 të tij duke nxjerrë jashtë loje presidentin Meta. Ky nen në pikën 6 të tij thotë qartë se është KQZ ajo që vendos të përsërisë zgjedhjet dhe të vendosë për datën e zhvillimit të tyre jo më vonë se 4 javë nga marrja e vendimit. Kjo frikë e Bashës për të anashkaluar Metën, që e ka pasur si mburojën e tij gjatë aksionit politik që ka ndërmarrë në këto 7 muaj, por edhe frika se shumë shpejt lëvizja “Basha ik” do të marrë përmasa më të mëdha, e ka detyruar të dal e të pranojë publikisht dekretin e 13 tetorit të presidentit Meta.

Ndërkohë, Basha duket se po kërkon një garanci që të pranojë një marrëveshje, por mos të pranojë fajin për aksionin opozitar që dështoi për zgjedhjet e 30 qershorit. Në këtë prizëm, ai po tenton të mbajtur të karikuar demokratët, duke denoncuar kryebashkiakët e rinj, ndërsa të martën ka paralajmëruar se si Vladrini dhe Kajmaku, PD do të denoncojë dhe raste të tjera. “PD po shqyrton të gjitha rastet për dhjetëra individë me rekorde të garuar nga Rama, të kandiduar, janë pjesë e një procesi antikushtetues. “ u shpreh Basha.

Pas lobimit rus, Basha nuk deklaron financimet për 53 degët e PD

Ndaj kreut të Partisë Demokratike, Lulzim Basha ka nisur një hetim lidhur me lobimin rus në SHBA për periudhën zgjedhore të vitit 2017, ku kryedemokrati është marrë i pandehur për fshehjen e një financimi prej 650 mijë dollarë. Pavarësisht kësaj, Basha nuk ka deklaruar as financimet dhe shpenzimin për 53 degët e PD-së në të gjithë vendin gjatë vitit 2018.

Çdo degë ka një administratë të saj të vogël që ushtrojnë veprimtarinë në bazë të statutit të partisë, me një kosto të caktuar financiare. Konkretisht, çdo degë e PD ka kryetarin e saj, nënkryetarin, një sekretar, katër sekretarë funksionalë, një bord me këshilltarë, një aparat administrativ si dhe një bord financiar bashkë me kryetarin e tij. E gjithë kjo administratë ka një kosto financiare. Por sipas raportit të auditimit të pasqyrave financiare të Partisë Demokratike për vitin 2018, kjo e fundit nuk ka paraqitur të ardhura dhe shpenzime pranë Komisionit Qendror të Zgjedhjeve për 53 degëve të saj. Në raportin e auditimit për 2018 që Shqiptarja.com ka siguruar thuhet se “Partia Demokratike nuk ka paraqitur të ardhura dhe shpenzime për degët e saj. Ne kemi audituar pasqyrat financiare të PD, të cilat përbëhen nga bilanci kontabël i datës 31 dhjetor 2018, pasqyra e të ardhurave dhe shpenzimeve dhe pasqyra e flukseve të parave për vitin që mbyllet në këtë datë si shënimet për pasqyrat financiare, përfshirë një përmbledhje të politikave kontabël më të rëndësishme. Sipas opinionit tonë, me përjashtim të parregullsive më sipër, pasqyrat financiare japin një pamje të vërtetë dhe të sinqertë të PD me 31 dhjetor 2018, të rezultatit të saj financiar dhe të flukseve të parave të saj për vitin e mbyllur financiar, në përputhje me kuadrin financiar të raportit të partive politike.”

Mirëpo këto degë kanë secila një kosto të caktuar financiare shuma e të cilës përcaktohet nga statuti i Partisë Demokratike, në nenin 43 të saj. Ky nen parashikon mënyrën e financimit të strukturave vendore të PD, duke përfshirë edhe administratën e degëve.

Kjo shumë për strukturat vendore të PD përcaktohet nga shuma në formë granti që akordon Kryesia qendrore, kuotizacioni i anëtarësisë së territorit përkatës, të cilat shpërndahen sipas niveleve të ndryshme të organizimeve territoriale sipas kushteve të përcaktuara në rregulloren financiare, kontributi që derdhin të zgjedhurit vendor e në qendër, shumë e cila përcaktohet nga Kryesia e rrethit dhe burime të tjera financiare që autorizon ligji për partitë politike. Kryetari i Bordit Financiar të Degës emërohet nga Kryesia, pasi ka marrë pëlqimin paraprak të PDSH-së në qendër. Ai është përgjegjës përpara Kryesisë për fondet që ka në ngarkim. Bordi financiar i organeve vendore të partisë përbëhet nga një numër anëtarësh sipas vendimit të Kryesisë përkatëse. Ai zbaton me rigorozitet në ushtrimin e detyrave të tij rregulloren e brendshme financiare të Partisë.

Mosdeklarimi i shpenzimeve për degët e partisë krijon një kontrast të madh në atë që Basha bën me vepra dhe atë që thotë me fjalë. Në një kohë kur nuk deklaron shpenzimet dhe financimet për 53 degët e Partisë Demokratike, në fund të 2018, Basha del më një platformë ku kërkon ndarjen e politikës nga krimi financimin e partive 100 % nga shteti në fushatat zgjedhore. “Gjëja më e rëndësishme është ndarja e politikës me krimin. Financimi i partive, financim shtetëror 100% i fushatës, ndërkohë që kompanitë që financojnë partitë e kandidatët të përjashtohen nga tenderat e koncesionet.” ka thanë Basha gjatë prezantimit të platformës së tij në fund të 2018 për zgjedhje të lira dhe të ndershme.

Basha, opozitë nga Facebook, kërkon dorëheqjen e Kajmakut

Që pas zgjedhjeve të 30 qershorit, me përfundimin e protestave që do të sillnin rrëzimin e qeverisë, aksioni opozitar i Bashës dhe i PD-së është përqendruar tek akuzat që lëshohen në Facebook. Daljet e Bashës nga selia e PD-së dhe deklaratat për gazetarët janë rralluar ndjeshëm. Megjithëse u premtua se opozita nuk do të marrë asnjë ditë pushim, e kundërta ka ndodhur. Ish deputetët nuk janë parë më në selinë blu, ndërkohë që aksioni opozitar i PD-së mbështetet vetëm nga facebook. Mjafton vetëm një smartphone për të linçuar kundërshtarin politik.

Gjatë të dielës Basha ka kërkuar dorëheqjen e kryebashkiakut të Vorës, Agim Kajmaku, të cilin e akuzon se ka fshehur dënimin në Greqi në formularin e dekriminalizimit. Basha shkruan se Rama e dinte se Kajmaku ka qenë i dënuar dhe sërish e zgjodhi ta kandidonte në Vorë.

“Njëlloj si me Valdrin Pjetrin, Edi Rama e di se Agim Kajmaku i Vorës ka falsifikuar formularin e dekriminalizimit! Hajduti Psiqik e di se i përzgjedhuri i tij për Vorën ka probleme të hapura me drejtësinë greke, dhe se ai e ka fshehur të vërtetën.

Jorgo Kajmaku duhet të largohet dhe të merret menjëherë i pandehur sepse ka shkelur Ligjin e Dekriminalizimit dhe ka fshehur të dhënat mbi të kaluarën e tij. Ai duhet të përballet edhe me drejtësinë greke të cilës i është fshehur prej vitesh! Por sërish Edi Rama e mbron Jorgo Kajmakun nga zbatimi i Ligjit të Dekriminalizimit, me anë të prokurorisë së korruptuar dhe politizuar”, shkruan Basha.

PD i ka kërkuar prokurorisë së përgjithshme në nisë hetimet dhe verifikimet për Kajmakun dhe megjithëse prokuroria ka nisur hetimet, por ende nuk ka një përgjigje përfundimtare, sërish kreu i PD-së e bën fakt të kryer, dënimin e Kajmakut, duke bërë edhe rolin e prokurorit dhe atë të gjykatësit.

Basha ndërron mendje për protestat në shtator, flet për platformë masash

Qëndrimi kaotik i opozitës në lidhje me aksionin e saj opozitar në shtator u thellua edhe më shumë gjatë një dalje të shkurtër për mediat, nga kreu i Partisë Demokratike, Lulzim Basha. Ai vetë por edhe anëtarë të PD-së kanë folur më herët për rikthim të protestave kombëtare, gjatë të enjtes kreu i PD-së, në asnjë moment, nuk i përmendi ato. Duket se gjatë pushimeve verore, Basha e ka harruar krizën politike në të cilën e futi vendin dhe me një pamje të qetë dhe zë të butë ai foli për një plan kombëtar me masa që do u vijë shqiptarëve si një alternativë më e mirë qeverisëse.

“PD së bashku me opozitën e bashkuar, javët në vazhdim do të paraqesim një platformë masash, si një ofertë kombëtare dhe plan kombëtar për të Shqipërinë si gjithë Europa për të mos humbur më shumë kohë të çmuar duke mbyllur derën e Evropës për Shqipërinë. Këto masa do i nënshtrohen një dialogu kombëtar duke përfshirë jo vetëm qytetarët por edhe intelektualët dhe mediat,” – tha Basha

Fjala protestë apo rinisja e tyre si aksion politik i opozitës nuk u përmend askund. Ndërkohë që vetëm një ditë më herët, të mërkurën, vartësi i tij ish deputeti Aldo Bumçi deklaroi se protesta do të rinisin në shtator si rruga e vetme për të rrëzuar qeverinë dhe për t’i hapur rrugë shpresës së qytetarëve. Një qëndrim ky mjaft kontradiktor me atë të Bashës të enjten (sot), i cili tha se mënyra e vetme për t’i dhënë shpresë qytetarëve shqiptarë është plani kombëtarë që PD do të prezantojnë gjatë javëve në vazhdim.

Kjo linjë politike kontradiktore në fakt, që duket se vetëm konfuzojnë qytetarët, të cilat janë në pritje të një zgjidhje të ngërçit politik, që prej më shumë se 6 muajsh ka pushtuar vendin. /realstory

PD E MERR MALLI PËR PROTESTAT: RIKTHEHEMI NË SHTATOR (SAPO TË MBAROJNË PUSHIMET)

Dosja 184, Basha sulmon Markun dhe Prelën: Ndjekje penale dy “Katicave”

Kryetari i Partisë Demokratike, Lulzim Basha ka kërkuar ndjekje penale për prokuroren e përgjithshme Arta Marku dhe për prokuroren Donika Prela për transferimin e dosjes 184 në prokurorinë e Dibrës, ndërsa i ka krahasuar ato me prokuroren e Maqedonisë së Veriut, Katica Janeva, e cila u arrestua të mërkurën për korrupsion.

Basha akuzoi prokurorinë se po zbaton urdhrat e Ramës dhe synon që përmes këtij transferimi kërkon mbylljen e dojes së famshme 184 që lidhet me përgjimet e publikuara nga gazeta gjermane Bild për shit- blerjen e votave në Dibër.

“Ky është një veprim i dy “Katicave” të Prokurores së përgjithshme dhe të Krimeve të Rënda, që po veprojnë si pjesë e grupit të strukturuar kriminal të rilindjes. Janë aty për t’i mbrojtur dhe jo për t’i çuar para ligjit politikanët që janë kapur duke vjedhur votat e shqiptarëve. Guximi që kanë marrë për të mbyllur një dosje që e ka marrë vesh e gjithë bota tregon që dëshpërimi i Edi Ramës është i tillë saqë ka vendosur t’i shtyjë edhe këto masha të pushtetit të tij, Arta Marku, e Donika Prela, dy “Katicat” e tij, drejt vetëflijimit, se me veprimet që kanë marrë të dyja janë penalisht të ndëshkueshme nga ligji. Kanë bërë shpërdorim detyre, prej këtij momenti duhet të ndiqen penalisht për shpërdorim detyre, meritojnë të quhen “Katicat” e Shqipërisë, njëlloj si prokurorja speciale që u vu në pranga në Maqedoninë e Veriut”, tha Basha për gazetarët pas takimit që zhvilloi me ambasadorin e ri gjerman në Tiranë.

Më herët Arta Marku përmes një deklarate për mediat shpjegoi se pse i takon prokurorisë së Dibrës që të regjistrojë procedimin penal për dosjen 184 dhe se vendimi për ndryshimin e cilësimit juridik të veprës penale nga forma e veçantë e bashkëpunimit “grup i strukturuar kriminal” në “bashkëpunim të thjeshtë” është marrë nga prokurori i çështjes, Klodian Braho, të cilin Basha nuk e përmendi në akuzat e tij.

Marku shpjegoi se me ndryshimin e cilësimit penal, prokuroria e krimeve të Rënda nuk ka kompetencë të merret me këtë çështje, por i takon prokurisë së Dibrës të vijojë hetimet. Kjo e fundit ka refuzuar urdhrin e Markut, dhe pritet që çështja në fjalë të marrë zgjidhje nga Këshilli i Lartë i Prokurorisë.

DOSJA 184 FUT NË SHERR PROKURORITË. ZGJIDHJA NË DORËN E KLP

Fact Checking/ Basha: Vetting për të hetuar politikanët, por gabon (harron që po krijohet SPAK)

Kryetari i Partisë Demokratike ka publikuar pasditen e të mërkurës një video, ku tregon sipas Lulzim Bashës, pesë arsyet “pse Edi Rama ka frikë vetingun e politikanëve”. Paraprakisht, vetingu në politikë është një propozim i hershëm i Partisë Demokratike, i ngjashëm me modelin e vetingut në sistemin gjyqësor, ndërsa një vit më parë rreth propozimeve të PD ka dhënë opinion dhe Komisioni i Venecias. Megjithatë, Realstory.al bën një ‘fact checking’ për videon me pesë arsyet, që sipas Bashës, vettingu i politikanëve tremb Ramën.

“Vetingu i politikanëve kërkon një shumicë prej 93 votash në Parlament. Edi Rama ka mbushur parlamentin me kriminelë që nuk votojnë fundin e tyre”, shkruan Basha në video mesazhin e shpërndarë në rrjetet sociale.

Gabohet! Parlamenti ka mbi 120 deputetë aktualisht, kuorum i nevojshëm për të miratuar draft-ligjin, që sipas Bashës, mazhorancës i mungojnë votat. Madje, në kushtet aktuale, nëse ky draft do të shkonte në Kuvend për votim, ekziston mundësia që drafti të votohet me më shumë se 93 vota, pasi deputetët e opozitës në Parlament, kanë shprehur vullnet të mbështesin çdo ligj që i shërben pastrimit të sistemit politik. Fakti është, se vetëm një muaj më parë, ishin votat e deputetëve të opozitës së re në Kuvend, që miratuan dy ligjet e fundit të Reformës në Drejtësi, që mbaheshin peng prej (lexo këtu) gati tre vjetësh nga PD dhe LSI. Pra votat në Kuvend janë. Sa i përket fjalisë se “Edi Rama ka mbushur Parlamentin me kriminelë që nuk votojnë fundin e tyre”, përsëri Basha gabohet, pasi për këtë mjafton të kujtojë vetëm miratimin e ligjit të dekriminalizmit, që u votua nga shumë deputetë, që më pas ishin subjekt i tij dhe humbën mandatin.

“Vetingu i politikanëve heton të gjithë zyrtarët e lartë, deputetët, ministrat dhe kandidatët e pushtetit vendor. Edi rama vodhi zgjedhjet për të mbushur bashkitë me të dënuar për trafik droge dhe qeniesh njerëzore”.

Gabohet! Në fakt, lidhur me këtë pikë, merr vlerë opinioni i Komisionit të Venecias i 30 nëntorit të vitit 2018, ku shprehej ndër të tjera: “Siç është aktualisht, propozimi i verifikimit nuk ka qartësi ligjore dhe siguri juridike, si për sa i përket qëllimit të synuar, arsyet për moszgjidhje dhe humbje të mandatit dhe mekanizmin e zbatimit të tij. Në shumë aspekte, ajo gjithashtu ngre çështje të proporcionalitetit. Nuk është e qartë se kush do të kryejë verifikimin e zyrtarëve publikë dhe kandidatëve zgjedhorë dhe nëse kjo do të bëhet nga një organ gjyqësor ose një organ tjetër i pavarur. Përveç kësaj, nuk janë propozuar masa mbrojtëse për të shmangur rrezikun që mund të përdoret në një mënyrë të politizuar ose në mënyrë arbitrare”, thuhej ndër të tjera në opinionin e Komisionit të Venecias.

Edi Rama kandidon kriminelë dhe e përdor krimin për të vjedhur zgjedhjet, sepse bashkë me krimin pasurohet duke vjedhur shqiptarët dhe pastruar paratë e krimit. Hajduti Psiqik përbën rrezik për jetën dhe sigurinë e çdo familje. Ai dhe krimi i organizuar janë të pandashëm. Që të shpëtojmë Shqipërinë nga kriminelët me pushtet, duhet të largojmë Edi Ramën.#ShqipëriaSiEuropa #HajdutiPsiqik #RamaIkNjë vit më parë Partia Demokratike dhe Opozita e Bashkuar propozuan ligjin për vetingun e politikanëve. Edi Rama dhe Organizata e Rilindjes votoi kundër këtij ligji. Ja 5 arsyet pse Edi Rama nuk e do vetingun e politikanëve:
Gepostet von Lulzim Basha am Mittwoch, 21. August 2019

Megjithatë, lidhur me këtë pikë që Basha e cilëson si “arsye frike për Ramën nga Vettingu i politikanëve”, kryedemokrati duhet të ketë parsysh se gjithë çfarë thotë, do të jetë objekt i punës së Prokurorisë Speciale, që do të hetojë korrupsionin në nivele të larata. Pra Vettingu s`mund të kryejë detyrën që do të ketë SPAK, që nis në shtator.

“Vetingu i politikanëve largon përgjithmonë nga jeta publike kriminelët në politikë dhe zbulon rrjetet e tyre mafioze. Edi Rama e mban pushtetin me kriminelë dhe politikanë të lidhur me krimin”, shkruan Basha.

Gabim! Në fakt, për këtë pikë, Lulzim Bashës nuk i nevojitet një Vetting politikanësh, pasi vetë PD e tij propozoi dhe gjeti mbështetjen e mazhorancës për ligjin e dekriminalizmit. Mjafton të kujtosh rezultatin e fundit me Valdrin Pjetrit, një denoncim bërë nga PD, për të kuptuar se në këtë rast nuk nevojitet një Vetting për politikanët, për t`i mbajtur ata larg funksioneve publike, por mjafton një funksionim normal i strukturave që ngarkon ligji i dekriminalizmit, për të verifikuar pastërtinë e figurës për personat që synojnë të bëhen pjesë e politikës apo funksioneve publike në vend.

“Vetingu i politikanëve heton dhe largon të gjithë politikanët që nuk justifikojnë pasurinë e tyre. Edi Rama grabit shqiptarët dhe pasurohet bashkë me bandën e tij në politikë”.

Gabohet! Edhe në këtë pikë ka institucione përgjegjëse të cilat kanë detyrë për të hetuar pasuritë e politikanëve dhe zyrtarëve publikë. Inspektorati i Lartë i Deklarimit të Pasurisë, është institucioni përgjegjës që heton pasuritë e politikanëve, dhe në rast dyshimesh apo përfitimesh të paligjshme, ky institucion ia adreson çështjen organeve hetimore në vend. Me ngritjen e SPAK, gjërat do të jenë dhe më funksionale.

“Vetingu i politikanëve e përfshin kryeministrin e Shqipërisë. Edi Rama ka frikë vetingun. Ai është në krye të kupolësë së krimit, që po mban peng Shqipërinë”.

Gabohet! Në fakt, detyrën për të hetuar zyrarët më të lartë të kupolës politike në vend dhe jo vetëm, do ta ketë SPAK. Prokuroria Speciale e Anti Korrupsionit dhe Krimit të Organizuar do të fillojë punë në shtator. Ashtu si pak ditë më parë lajmëronte ambasada e SHBA me një video në rrjetet sociale, SPAK do të hetojë, jo vetëm kryeministra e ministra, por edhe presidentin. Pra është SPAK institucioni që do të hetojë gjithë shkelësit e ligjit dhe politikanët e korruptuar pa pasur nevojë për organe të tjera shtesë, që veç të tjerash do të ishin barrë për buxhetin e shtetit, dhe njëkohësisht do të ishte një institucion paralel me institucionet e drejtësisë./Realstory.al/

Nuk shkoi në Shkodër, Basha sulmon qeverinë nga Facebook

Pas protestës që demokratët e PD-së së Shkodrës organizuan kundër konstituimit të Këshillit të ri Bashkiak, ka reaguar në facebook, kreu i PD-së, Lulzim Basha.

Ai nuk mori pjesë në protestë, ndryshe nga sa i kishte premtuar kryebashkiakëve të djathtë se do i mbronte me çdo kusht dhe me çdo mjet bashkitë e djathta dhe nuk do i lironin zyrat. Por ja që edhe në Shkodër Basha nuk u shfaq, por nga facebook sulmoi qeverinë dhe bëri thirrje për arrestime.

“Beteja e sotme në Shkodër është beteja e çdo shqiptari që nuk pranon dhunën, hajdutërinë dhe kriminelët e Edi Ramës, nuk pranon papunësinë, padrejtësinë dhe arrogancën e Hajdutit Psiqik.

Qëllimi ynë është t’i nxjerrim këta banditë dhe hajdutë nga institucionet, nga parlamenti, nga bashkitë e pushtuara dhunshëm, t’i nxjerrim nga lokalet dhe hotelet luksoze, t’i nxjerrim nga studiot e mediave të kapura, t’i nxjerrim nga ekonomia, e t’i çojmë para ligjit. Tu vëmë prangat dhe t’i pastrojmë institucionet dhe rrugët e Shqipërisë, të pastrojmë ekonominë shqiptare nga këta banditë dhe hajdutë dhe t’ua kthejmë Shqipërinë njerëzve”, shkruan Basha.

Ndërsa Sekretarit të Përgjithshëm të PD Gazment Bardhi pas protestës në Shkodër tha se kjo është protestë qytetare dhe jo politike.

“Protesta është një protestë qytetare, nuk është një protestë politike. Ajo që patë atje ishte një cirk i paligjshëm i një qeverie të paligjshme, që ka grabitur me krimin pushtetin qendror, sot tentoi të grabiste, po me krimin, pushtetin vendor. Në Shkodër dhe në të gjithë Shqipërinë nuk kanë për ta gëzuar asnjë ditë.”, shkruan Bardhi.

PD e cila nuk mori pjesë në zgjedhjet e 30 qershorit, pas zgjedhjeve shpërndau një dokument të brendshëm, të cilin e publikoi në mëmnyrë ekskluzive realstory dhe përmes të cilit angazhohej për mbrojtjen me çdo mjet të bashkive të djathta. Por rezistenca e demokratëve u pa vetëm në bashkinë e Devollit dhe në atë të Kavajës dhe më pas u shumua. Vetë lidershipi i PD-së u tërhoq me nisjen e pushimeve verore dhe nuk u shfaqen as në mbrotje të Xhelal Mziut në Kamëz dhe as në Shkodër ku protesta u udhëhoq nga Bardh Spahia dhe jo nga Basha.

Protesta në prag të negociatave, Basha e Meta me skenar si i qershorit

Djegia e mandateve dhe bojkoti i zgjedhjeve të 30 qershorit e nxorri PD-në jashtë çdo pushteti si qendror ashtu dhe vendor, por pavarësisht kësaj opozita nuk ka menduar një strategji të re, por vazhdon t’i qëndrojë aksionit 6 mujor të protestave, që u ndërpre për shkak të plazhit dhe pushimeve verore, por që sipas Bashës, do të nisë në shtator.

Kryetari i Partisë Demokratike, Lulzim Basha pasi firmosi të premten një kontratë që s’ka asnjë fuqi ligjore, me banorët e Unazës së re, sikurse bëri edhe me aktorët protestues kundër shembjes së Teatrit, njoftoi se në shtator do të nisin protestat popullore për të larguar Ramën.

“Laku po ngushtohet e po shtrëngohet e despotit të inkriminuar dhe hajdutit psiqik Edi Rama. Koha për të dhënë llogarinë finale para popullit po afron, dhe unë kam kënaqësinë dhe nderin, që para nisjes së shtatorit të protestave popullore dhe të dialogut kombëtar e platformës kombëtare “Për Shqipërinë si e gjithë Evropa”, që këtë ta nisim me nënshkrimin e Marrëveshjes së sotme, marrëveshjes dhe kontratës me banorët e Unazës së Re”, tha Basha të premten.

Ndërsa në PD shtohet zërat kundër tij dhe nisjen e lëvizjes Basha IK, kreu i PD-së, kërkon të mbajë gjallë frymën opozitare. Që të shpëtojë veten dhe të mos pranojë dështimin e aksionit opozitar që e nxorri PD-në jashtë loje, Basha vijon t’i mëshojë fort skenarit të protestave dhe duket se në këtë pikë mbështetet edhe nga presidenti Meta.

Ai njoftoi të premten se nuk do të dekretojë datë të re për zgjedhje të pjesshme në Shkodër, duke shkelur sërish kushtetutën dhe duke krijuar ngërç në drejtimin e bashkisë së këtij qyteti.

Meta vazhdon të kërkojë zgjedhje në 13 tetor, ndërkohë që e di shumë mirë se kjo data është antikushtetuese, që nuk pranohet as nga Rama as nga Basha dhe nga institucionet në vend.

Megjithëse bën thirrje për marrëveshje e kompromis mes palëve duke përmendur 18 tetorin dhe vendimin që Këshilli i Europës pritet të marrë për Shqipërinë për çeljen e negociatave, duket se Metës më shumë i intereson mbajtja e vendit në krizë. Të paktën këtë e vërteton me aktet e tij. Nëse do të dekretonte zgjedhjet e pjesshme në Shkodër kjo do t’i jepte një shans zgjidhjes së krizës dhe një mundësi edhe opozitës të dalë nga ngujimi dhe të futet në zgjedhje. Por si Basha dhe Meta deri tani me aktet e tyre paralajmërojnë protesta dhe kaos në prag të çeljes së negociatave duke përsëritur të njëjtin skenar si në qershor ku negociatat u shtynë për shkak të krizës politike në vend./realstory.al

Protesta në Shkodër, shansi i humbur i Bashës, e braktisi njëlloj si Kamzën

Demokratët shkodranë u ngritën të mërkurën në protestë menjëherë pasi PD nxorri dokumente që implikojnë kryebashkiakun socialist Valdrin Pjetri. Pas disa javësh qetësi demokratët e Shkodrës treguan se nuk janë të gjithë me pushime, por ka edhe nga ata që reagojnë në situata të tilla. Dhe në fakt rasti i Pjetrit ishte një shanc për PD-në, të cilës i dha një kauzë të fuqishme për ta mbështetur në këto ditë boshe gushti.

Një mundësi edhe për kreun e PD-së Basha që të dilte në krah të demokratëve dhe të mbante gjallë frymën e opozitës, si dhe të përmbushte në një farë mënyrë premtime që i ka bërë kryebashkiakëve të djathtë por edhe demokratëve dhe militantëve të kësaj partie se bashkitë e djathta do t’i mbrojnë me çdo mjet e me çdo kusht.

Por ajo që ndodhi ishte e kundërta. Shkodra ishte një tjetër shans i humbur, një tjetër mundësi e çuar dëm. Basha nuk u shfaq në Shkodër. Ai e braktisi ashtu siç bëri me të gjitha bashkitë e djathta. Pas fushatës që ndërmori në strukturat e PD-së në disa qytete, dhe premtimeve që s’do lëshojmë asnjë zyrë, kreu i PD-së i la të gjithë në baltë dhe zyrat u lëshuan një nga një.

E gjitha PD-ja u përfaqësua në qytetin bastion të saj vetëm me Bardh Spahinë një figurë dytësore e partisë dhe për më tepër i dënuar nga gjykata për djegien e shkollës në protestat e PD-së para zgjedhjeve të 30 qershorit.

Kreu i PD-së, Basha u kënaq vetëm me një konferencë shtypi të mbajtur mesditën e djeshme. Një konferencë e njoftuar në 12 e 30, por që nisi 1 orë me vonesë për arsye që nuk dihen përse. Menjëherë pas saj Basha u zhduk, sigurisht pasi dha porosi që të sulmohej hapur Jozefina Topalli që ia numëroi të gjitha një më një kreu të PD-së, ndërsa paralajmëroi nisjen sa më parë të lëvizjes Basha Ik.

Basha nuk shkoi në Shkodër për të mbështetur sa për shoë Voltanën e cila ç’nuk bëri për PD-në, madje ishte e gatshme të merrte vetë molotovët në dorë dhe të pengonte zgjedhjet. E braktisi njëlloj siç bëri me Xhelal Mziun në Kamzë, ku jo vetëm që nuk shkoi vetë, por nuk dërgoi asnjë përfaqësues të partisë, asnjë anëtarë kryesie, asnjë ish deputet. Basha braktisi dy bastione, Shkodrën dhe Kamzën aty ku PD gjente mbështetje dhe mbushte sheshin sa herë thërriste për protesta.

Basha ka njoftuar se në shtator do të nisë sërish sezoni i protestave por nuk dihet se ku do t’i gjejë militantët për të mbushur bulevardin.

Rasti i Valdrinit ishte një mundësi që PD të bashkohej rreth kauzës, të shfaqej më e fortë, të zgjonte shpresë se PD është gati të luftojë, të garojë, të fitojë sërish pushtetin në qytetin bastion të së djathtës. Por e gjitha përfundoi në një protestë të vakët ku mungonte kreu i PD-së./Realstory.al

PD PROTESTON KUNDËR VALDRIN PJETRIT NË SHKODËR, BARDH SPAHIA DREJTON MILITANTËT, LË NË HIJE VOLTANA

BASHA BRAKTIS KAMZËN, MZIU I LËSHON ZYRËN BOSH SULIT

Topalli merr “timonin” e opozitës: Luli mashtroi, nuk ekziston më për PD

E ashpër, e drejtpërdrejtë, akuzuese dhe luftarake. Kështu është shfaqur ish numri dy i PD-së, Jozefina Topalli në një status të publikuar të mërkurën në facebook në të njejtën kohë kur Basha mbante konferencën e vonuar për shtyp.

Topalli, një nga zërat më të ashpër kundër Bashës, ka treguar dhe njëherë se ajo është gati të marrë frerët e opozitës, të largojë Bashën nga drejtimi i gabuar i PD-së dhe të sjellë ndryshim në selinë blu.

Në mesazhin e saj Topalli e akuzon Bashën për nxjerrjen e PD-së jashtë sistemit, për prishje të marrëdhënieve me ndërkombëtarët, për shkatërrimin e partisë demokratike dhe për bashkëpunim me Ramën.

Sipas saj Basha dhe Rama mbajnë njëri-tjetrin në pushtet dhe se falë opozitës së Bashës, Rama vijon të jetë kryeministër.

Topalli shkruan se nëse Basha nuk do të bojkotonte zgjedhjet, as Shkodra dhe as ndonjë bashki tjetër nuk do të ishin të gjitha sot në duart e Ramës.

“Koha vetëm po konfirmon atë që unë besoj dhe kam përsëritur vazhdimisht, se Edi Rama dhe Lulzim Basha mbajnë reciprokisht njëri- tjetrin, dhe ndajnë interesa të mëdha mes tyre. Edi Rama e çoi Valdrinin në Shkodër, por mandatin për Kryetar Bashkie të Shkodrës ia dhe ti Lul, me bojkotin e zgjedhjeve. Po të kishte një kandidat të djathtë, Valdrini as në ëndërr nuk shihte karrigen e Kryetarit të Bashkisë. Për më tepër je tepër i vonuar në luftën krimit. Në Shkodër, qytetarët prej disa muajsh, tregojnë për dyshimet e thella të së kaluarës të komprometuar të Valdrinit. Por ti për muaj nuk fole. Ashtu siç nuk fole për vite për Mark Frrokun e kompaninë e tij. Ti Lul nuk mbulon dot shpartallimin që i bëre PD me vendimet tuaja personale anti demokratike që i more vetëm për të mbrojtur karrigen tënde. Po te mos ishte Lulzim Basha, sot Shkodra e shume bashki te tjera nuk do binin ne duart e PS. Po të mos ishte LB, Edi Rama nuk do te ishte sot Kryeministër, por do ishte rrëzuar 100 herë dhe vendi do kishte një tjetër qeverisje; Po të mos ishte LB, Edi Rama nuk do kontrollonte të gjithë pushtetin vendor; lista e deputetëve nuk do ishte ajo lista qesharake e 2017. Nuk do kishim parë të zëvendësohen beteja politike me luftë vezësh pulash dhe sot nuk do shikonim të uleshin në karrigen e Kuvendit figura komike dhe të padenja për atë që duhej të ishte altari i demokracisë. Po të mos ishte Lulzimi, Deputetët e PD mund të ishin dinjitozë, do ishin në parlament duke përfaqësuar votuesit e tyre e duke mbrojtur interesin publik të shqiptarëve, duke bërë beteja politike për një ekonomi më të mirë dhe një jetë më të sigurte”, shkruan Topalli.

Ajo akuzon Bashën për shkatërrimin e partisë, për marrjen e postit të kryetarit të PD-së me vota të vjedhura dhe për mos mbledhje të strukturave të PD-së për 6 vite me rradhë.

“Po të mos ishte pazari si formë komunikimi mes krerëve të opozitës dhe qeverisë, sot skena politike shqiptare nuk do ishte e deformuar siç është tani, sot shqiptarët nuk do jetonin në dëshpërim për shkak të vrasjes së perspektivës dhe mbytjes së shpresës që një opozitë normale sjell për vendin e saj. Pas 3 dekadash ngjitjesh e uljesh, përpjekjesh e sakrificash , demokracia brenda forcave politike është në agoni. Dhe kjo sepse krerët e partive kanë vrarë votën brenda vehtes. Në 6 vitet që drejton opozitën LB jo vetëm ka habit me humbjet e tij të pandalshme e katastrofike, por ai ka vrarë votën brenda saj, ka vjedhur votat në shtëpinë e tij ( dhe kjo me video, me zë e figurë). Është i vetmi kryetar partie që pas numërimit të votave për forumet e partisë i dalin më shumë vota se votues.( me dokumenta). Ai do mbahet mend si njeriu që nuk mblodhi për 4 vite rresht asnjë forum të saj për asnjë vendimarrje. Do mbahet mend për emërimet më pas në forume të disa personave që nuk thonë asgjë për askënd.

Do fillojë të mbledhë forumet vetëm pas fshesës e spastrimeve të mëdha në parti, pas gjuetisë së shtrigave ndaj demokratëve, pas përçarjes e shkretimit që i bëri PD, për të noterizu vendimet e tij të çmendura, si ajo e djegies së mandateve e dhe te mos hyrja në zgjedhje.

Megjithë pakënaqësinë në rritje ndaj qeverisë, LB nuk i shkoi kush pas, sepse siç koha e ka vërtetuar ai është i rremë. Kauzat nga goja e tij janë fallso e të rreme. Jo sepse njerëzit e Edi Rames nuk kanë blerë vota. Kanë blerë sa kanë dasht sepse e dinin që LB-së kjo nuk i interesonte sa kohë ishte në qeveri dhe kishte bërë pazarin për bashkëqeverisje me Ramën në vazhdim.

Ishte kjo arsyeja, që Lulzimi urdhëroi anëtarët e PD-së në KQZ, që të votonin 7:0 rezultatin e zgjedhjeve të 2017; urdhëroi që të mos bëhej asnjë shënim kundërshtues në procesverbale dhe te mos ankimohej asnjë qender votimi, duke legjitimuar mandatin e dytë të Ramës. Dhe për 2 vite rresht nuk pat asnjë fjalë për çështjen. U kujtua vetëm kur erdhi koha e fushatës, kur me shpresën e presionit të djegies se mandateve kërkonte rezultatin në tavoline.( njëlloj si me çadrën). Kur ai thoshte se vota e zgjedhjet i lira janë qëllimi ynë gënjente. Gënjente sepse së pari ai nuk ka bërë kurrë zgjedhje të lira në partinë që ai drejtoi. Gënjen sepse ka fallsifiku votat për vehten e tij si kryetar, dhe ka fallsifiku listën finale të emrave te KK dhe Kryesisë”, shkruan Topalli.

Teksa e cilëson këmbanë alarmi vendimin për djegien e mandateve të deputetëve të PD-së, Topalli shkruan se Basha do të mbahet mend për frikën patologjike dhe papërgjegjshmërinë që ka treguar si drejtues opozite.

“Do mbahet mend për papërgjegjesinë e frikshme që ka tregu sidomos në opozitë. Ky të lë pa fjalë në mënyrë konstante. Djegia e mandateve nga LB ishte një këmbanë e fortë për ata që kanë minimumin e përgjegjësisë mbi rrezikun që sjell papërgjegjësia e një njeriu, që nuk e vret ndërgjegja për asgjë. Në 1946 i pushkatuan deputet e opozitës , por mandatet nuk i tradhtuan. Mos futja në zgjedhje ishte një tjetër alarm i madh për rrezikun që mbart me vete njeriu që merr vendime kaq të papërgjegjshme. Lulzim Basha të lë pa fjalë kur humbjet e 2015 i quante rritje dhe rimëkëmbje; kur pas humbjes katastrofike të 2017 nuk lejoi as kohë për analizë dhe me buzë në gaz shpalli vetengrirjen dhe vete-kurorezimin( pa garë). Të habit kur i dhuron Ramës edhe ata pak bashki që i kane mbetur dhe thotë se fituam me 85%. Të habit me akuzat që i drejton kundërshtarit për gjerat që ka bërë vetë apo ka ndër mend t’i bëjë vetë. Nuk i lëviz qerpiku kur thotë se unë bëra dekriminalizimin, ndërkohë që kur grupi i ish deputetëve që e filluan këtë betejë dhe u kërcënuan nga krimi, i hodhi, që t’ i shqyente krimi, ndërkohë që vetë merrej me katin shtesë tek pallatit të tij dhe si kryetar, për vite rresht nuk përmendi një emër të dyshuar për rekorde kriminale. Është i vetmi rast në botë në botë, që kur pakënaqësia ndaj qeverisë rritet në kulm, kryetari i opozitës zbret ne kulm ( 13%). Unë nuk kam lexu as dëgju që të gjendet sot një njeri që nxjerr vetë forcën e tij politike nga sistemi, ia heq karriget e parlamentit, e hedh jashtë çdo bashkie e Këshilli Bashkiak e për vehte të vazhdojë të mbajë karrigen e tij”, shkruan Topalli.

Ajo e mbyll ligjëratrën e saj të gjatë me një mesazh të drejtëpërdrejtë drejtuar demokratëve. “Unë nuk besoj se PD-së i është mpirë nervi politik; Nuk besoj se demokratët janë të lumtur dhe aq më pak që të konformohen me tradhëtinë që i beri njeriu që vetëm i gënjeu”, shkruan Topalli teksa duket se paralajmëron rikthimin e saj në PD dhe marrjen e drejtimit të opozitës.

“Nuk besoj se të rinjtë kanë model, njeriun që bëri gjithë perëndimin kundra, që i dha mandatin e dytë Ramës për 14 milion euro të pallatit të tij, që dogji çdo përfaqësim të PD në nivel qëndror e lokal me premtimin e rremë për qeveri tranzitore e largimin e Ramës; që duke qene në opozitë e çoi partinë në humnerë, shqiptaret i çoi në dëshpërim dhe të rinjve i dha rrugët e botës. Luli nuk ekziston më për demokratët. Për Shqipërinë, Luli bashkë me Ramën janë bërë një kosto e patolerueshme. Shqiptarët kanë një problem për të zgjidhur. Ata nuk mund të tolerojnë më, që 4 vetë të mbajnë peng jetën e tyre e të bijve të tyre”, përfundon Topalli.

Realstory e ka paralajmëruar më herët nisjen e lëvizjes Basha ik, por me këtë mesazh Topalli tregoi qartë se ajo mund të jetë padyshim drejtuesja e kësaj lëvizje dhe rivalja më e ashpër që mund të sjellë largimin e Bashës.

EXCLUSIVE/ NË SHTATOR, LËVIZJA “BASHA IK”

“BASHA IK”: LËVIZJA SHTON EMRA TË TJERË

PD I DUHET TË PRESË (SA TË LINDË JORIDA)

STARTON LËVIZJA BRENDA PD. EDVIN KULLURI-BASHËS: BËHU BURRË DHE IK!