Kreu i PD-së, Basha ka publikuar spotin e protestës, ku ndryshe nga herët e tjera nuk shfaqet asnjë pamje dhune, madje duken në sfond yjet e flamurit të BE-së. Ai gjithashtu si kurrë më parë, në thirrjen e tij i drejtohet mësuesve, pedagogëve, artistëve dhe intelektualëve ndërsa nuk përmend revolucion apo mosbindje civile, por bashkim qytetar. Ky ndryshim në fjalorin e kreut të PD-së, vjen vetëm një ditë pas kthimit të tij nga Gjermania.
“Bashkimi, pjesëmarrja dhe vendosmëria për ta çuar këtë betejë drejt fitores së sigurtë, është investimi më krenar për fëmijët, për të ardhmen e tyre dhe të cdo shqiptari. Të rinj e të reja, studentë dhe profesionistë, pedagogë, artistë, intelektualë, mjekë infermierë dhe mësues, sipërmarrës të ndershëm dhe fermerë, pensionistë dhe të papunë, familjarë, prindër dhe bij e bija të shqiptarëve, mirësevini sonte në bashkimin popullor dhe qytetar në orën 19 në Tiranë. Asnjë hap pas! #8qershor”, shkruan Basha.
